རྒྱ་གར་གྱི་དམག་གིས་ཧི་མ་ཅལ་མངའ་སྡེ་སློབ་ཆེན་དང་མཉམ་འབྲེལ་གྱིས། ཧི་མ་ཅལ་མངའ་ཁོངས་ཀྱི་བོད་དང་རྒྱ་གར་གྱི་ས་མཚམས་དང་དེའི་འབྲེལ་ལམ་སྐོར་ལ་ཞིབ་འཇུག་བྱ་རྒྱུ་ཡིན་འདུག
དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་གར་གྱི་དམག་མི་དང་ཧི་མ་ཅལ་གྱི་སློབ་གྲྭ་ཆེན་མོ་གཉིས་བར་འཕགས་བོད་ས་མཚམས་ཀྱི་ལོ་རྒྱུས་དང་རིག་གཞུང་གི་འབྲེལ་ལམ་སོགས་ཀྱི་སྐོར་ལ་ཞིབ་འཇུག་བྱ་རྒྱུའི་གྲོས་མཐུན་གན་རྒྱ་ཞིག་བཞག་ཡོད་ཅིང་། ཞིབ་འཇུག་ལས་དོན་འདི་ནི་བོད་དང་ས་འབྲེལ་ཡོད་པའི་བྱེ་བྲག་ཧི་མ་ཅལ་མངའ་ཁོངས་ཀྱི་ས་མཚམས་ཁོ་ནར་དམིགས་ཤིང་། ཧི་མ་ཅལ་མངའ་སྡེ་སློབ་ཆེན་གྱིས་ལས་དོན་འདིའི་མགོ་མཇུག་ཡོངས་ལ་འགན་འཁུར་རྒྱུ་དང་འགྲོ་གྲོན་ཡོངས་རྒྱ་གར་དམག་གིས་གཏོང་གི་འདུག
ཧི་མ་ཅལ་སློབ་ཆེན་གྱིས་ཞིབ་འཇུག་ལས་དོན་དེ་དང་འབྲེལ་བའི་ལམ་སྟོན་གནང་བ་ལྟར་ན། འཕགས་བོད་ས་མཚམས་ཀྱི་འབྲེལ་ལམ་སྐོར་གྱི་ཞིབ་འཇུག་ནང་། ལོ་རྒྱུས་ཡིག་ཚགས་དང་། ས་ཁྲ་ཞིབ་འཇུག་གི་སྙན་ཐོ། དཀྱིལ་དགོན་པ་དང་ཏ་བོ་ཆོས་འཁོར་རམ་དཔལ་ལྡན་བཀྲ་ཤིས་བད་ེགནས་གཙུག་ལག་ཁང་(Tabo)སོགས་ས་མཚམས་དང་འབྲེལ་བའི་དགོན་པ་ཁག་གི་ལོ་རྒྱུས། ཚོང་འབྲེལ་ལམ་ཡིག་དང་འགྲིམས་འགྲུལ་ཀྱི་ལམ་ཡིག ད་དུང་ས་གནས་ཀྱི་ཡོང་འབབ་ཐོ་གཞུང་། ལོ་རྒྱུས་ཁྲོད་ཀྱི་འགྲོ་ལམ་དང་དེའི་བེད་སྤྱོད་བྱེད་ཕྱོགས་སོགས་དགོས་ཀྱི་ཡོད་པ་མ་ཟད། ཞིབ་འཇུག་གི་ལས་དོན་ནང་དགོན་པའི་གྲྭ་བ་དང་མི་རབས་རྒན་པ། ཆོས་དཔོན་དང་བོད་མི་སྐྱབས་བཅོལ་བ་བཅས་ལ་བཅར་འདྲི་དང་། ཚོང་ལམ་དང་གནས་སྐོར། མི་རིགས་མཉམ་འདྲེས་གཉེན་སྒྲིག་བྱས་པའི་མི་སོགས་ལ་ངག་ཐག་བཅར་འདྲི་བྱེད་དགོས་ཀྱི་འདུག་ཅིང་། ས་གནས་དང་མིའི་མིང་སོགས་ཡུལ་སྐད་དང་བོད་སྐད། ལེགས་སྦྱར་སྐད་གང་ཡིན་གསལ་འདོན་དགོས་པ། ས་ཁྲའི་འགྱུར་ལྡོག་དང་སྐད་བརྡའི་འགྱུར་ལྡོག་སོགས་ལ་ཞིབ་འཇུག་གིས་ས་ཁུལ་གང་རུང་ཞིག་ཏུ་རིག་གཞུང་སོགས་ཀྱིས་ཤུགས་རྐྱེན་ཇི་ལྟར་ཐེབས་དང་ཐེབས་མུས་ཡིན་པ་གསལ་འདོན་བྱ་དགོས་སྐོར་སོགས་བརྗོད་འདུག
དམིགས་བསལ་ཞིབ་འཇུག་ལས་དོན་དེའི་གྲོས་འཆར་གྱི་སྒྲོམ་གཞིའི་དགོས་ངེས་ནང་། དགོན་པའི་དངོས་ཟོག་གི་ཐོ་གཞུང་དང་དཔེ་རྙིང་། ཚོང་ཟོག ཁང་ཁྱིམ། འདུ་ཁང་དང་ལྷ་ཁང་གི་བཟོ་བཀོད་སོགས་ཀྱི་སྒྱུ་རྩལ་འདྲ་མཚུངས་ལ་བརྟག་དཔྱད་བྱེད་པ་དང་། ཧི་མ་ཅལ་གྱི་སྤྱི་ཚོགས་དང་བོད་ཀྱི་དགོན་སྡེ་དབར་གྱི་འབྲེལ་བ་མཚོན་པའི་དགོན་པའི་སྦྱིན་བདག་དང་གནས་སྐོར་གྱི་ལམ་ཐིག་སྟོན་པའི་འབྲེལ་ལམ་ལ་དབྱེ་ཞིབ། དེ་བཞིན་དཔྱད་གཞི་དང་པོའི་ལོ་རྒྱུས་ཀྱི་ལྟེ་གནས་ཡིག་མཛོད་དང་། ས་ཁྲ། ངག་རྒྱུན། དངོས་རྫས་རིག་དངོས་བཅས་ལ་བརྟེན་ནས་ཡིད་ཆེས་རུང་བའི་འགྲེལ་བརྗོད་མ་བྱས་གོང་། ས་གནས་ཀྱི་སྤྱི་ཚོགས་དང་། བོད་མི་སྐྱབས་བཅོལ་བ་དང་དགོན་པའི་དབང་འཛིན་ལས་ཁུངས་དང་མཉམ་དུ་བཟོས་པའི་ལོ་རྒྱུས་ཀྱི་འགྲེལ་བརྗོད་བྱེད་སྟངས་དང་། ཧི་མ་ཅལ་མངའ་སྡེ་གཞུང་གི་རིག་གཞུང་སྲུང་སྐྱོབ་དང་། རྒྱུན་གནས་ཐུབ་པའི་ས་མཚམས་ཀྱི་ཡུལ་སྐོར་སྤྲོ་འཆམ། འཚོ་རྟེན་བཅས་དང་འབྲེལ་བའི་སྲིད་བྱུས་ཁག་ལ་བསྟུན་དགོས་སྐོར་ནན་བཤད་བྱས་འདུག
ཧི་མ་ཅལ་སློབ་ཆེན་གྱི་རིག་བདག་གཞོན་པ་སྐུ་ཞབས་མ་ཧཱ་ཝིར་སིངྷ་ལགས་ཀྱིས། ང་ཚོས་རྒྱ་གར་གྱི་དམག་མི་དང་ལྷན་དུ་འཕགས་བོད་ས་མཚམས་ཀྱི་འབྲེལ་ལམ་སྐོར་ལ་ཞིབ་འཇུག་བྱེད་པའི་གྲོས་མཐུན་བཞག་པ་ཡིན། ཞིབ་འཇུག་འདིའི་མགོ་མཇུག་ཡོངས་སློབ་ཆེན་གྱི་འཆར་འགོད་དང་དགེ་རྒན་གྱི་ལས་དོན་སྡེ་ཚན་ལ་འགན་བཅོལ་ཡོད། ཅེས་བརྗོད་འདུག་པ་དང་། ད་ལྟ་ཧི་མ་ཅལ་སློབ་ཆེན་གྱིས་སློབ་གྲྭའི་སྡེ་ཚན་ཁག་གི་འགན་འཛིན་རྣམས་བརྒྱུད་དགེ་རྒན་ཚོས་གང་མགྱོགས་ཞིབ་འཇུག་གི་ལས་གཞི་འཆར་འབུལ་ཞུ་དགོས་པའི་སྐུལ་མ་བྱེད་བཞིན་འདུག
གསར་འགོད་པ། སྐལ་བཟང་སྦྱིན་པ།
