ཨ་རིའི་ཕྱི་སྲིད་དྲུང་ཆེས་བལ་ཡུལ་གྱི་སྐྱབས་བཅོལ་བོད་མིའི་ཡིག་ཆའི་དཀའ་ངལ་སེལ་དགོས་པའི་འབོད་སྐུལ་གནང་།

ཨ་རིའི་ཕྱི་སྲིད་ལྷན་ཁང་གི་དྲུང་ཆེ་གཞོན་པ་སཱ་མིར་པུལ་ཀཱ་པུར་ལགས་ཀྱིས་བལ་ཡུལ་ནང་གི་སྐྱབས་བཅོལ་བོད་མིའི་དཀའ་ངལ་སེལ་རོགས་བྱ་དགོས་པའི་འབོད་སྐུལ་གནང་།

ཟླ་འདིའི་ཕྱི་ཚེས་ ༢༠ ནས་ ༢༢ བར་ཉིན་གསུམ་རིང་ཨ་རིའི་ཕྱི་སྲིད་ལྷན་ཁང་གི་ལྷོ་ཨེ་ཤེ་ཡ་དང་དབུས་ཨེ་ཤེ་ཡའི་དྲུང་ཆེ་གཞོན་པ་སྐུ་ཞབས་སཱ་མིར་པུལ་ཀཱ་པུར་ (Samir Paul Kapur) ལགས་བལ་ཡུལ་རྒྱལ་ཁབ་ནང་འཚམས་གཟིགས་ཕེབས་ཏེ། བལ་ཡུལ་གྱི་ཕྱི་སྲིད་བློན་ཆེན་ཤི་ཤིར་ཁཱ་ནལ་ (Shishir Khanal )་དང་། དཔལ་འབྱོར་བློན་ཆེན་སི་ཝིར་ནིམ་ཝ་གྷལ་(Swarnim Wagle)་གཉིས་དང་མཇལ་འཕྲད་ཀྱིས་ཨ་རི་དང་བལ་ཡུལ་རྒྱལ་ཁབ་གཉིས་བར་གྱི་ཚོང་འབྲེལ་དང་། མ་འཇོག་འཛུགས་སྐྲུན་སོགས་ཐོག་བགློ་གླེང་གནང་ཡོད་པ་མ་ཟད།སྐབས་དེར་བལ་ཡུལ་ནང་གི་སྐྱབས་བཅོལ་བོད་མི་རྣམས་ལ་འཕྲད་བཞིན་པའི་དཀའ་ངལ་ཐོག་བལ་ཡུལ་གཞུང་གིས་རྒྱབ་སྐྱོར་གནང་དགོས་པའི་འབོད་སྐུལ་གནང་འདུག

ཨ་རིའི་རྒྱལ་སྲིད་ལྷན་ཁང་གི་དྲུང་ཆེ་གཞོན་པ་སཱ་མིར་པུལ་ཀཱ་པུར་ལགས་ཀྱིས་བལ་ཡུལ་གྱི་ཕྱི་སྲིད་བློན་ཆེན་ཤི་ཤིར་ཁཱ་ནལ་ཐུག་འཕྲད་བྱེད་སྐབས། བལ་ཡུལ་ནང་གི་བོད་མི་རྣམས་ལ་བལ་ཡུལ་གཞུང་གི་ཡིག་ཆའི་ཐོག་ནས་དཀའ་ངལ་འཕྲད་བཞིན་ཡོད་པས།  ད་ལྟའི་ཆར་བོད་མི་རྣམས་ཀྱིས་དངུལ་ཁང་བེད་སྤྱོད་བྱེད་ཕྱོགས་དང་། ཚོང་ལས་གཉེར་ཕྱོགས། སྨན་ཞབས་ཀྱི་སློབ་གཉེས་སོགས་ཀྱི་ལས་ཀ་བྱེད་པར་དཀའ་ངལ་འཕྲད་བཞིན་ཡོད། དེ་བཞིན་བལ་ཡུལ་གཞུང་གིས་བོད་མི་རྣམས་ཀྱི་དཀའ་ངལ་ཐོག་རོགས་སྐྱོར་བྱ་དགོས་པའི་འབོད་སྐུལ་གནང་འདུག

སྐབས་དེར་བལ་ཡུལ་གྱི་ཕྱི་སྲིད་བློན་ཆེན་ཤི་ཤིར་ཀ་ནལ་མཆོག་གིས། བོད་མི་སྐྱབས་བཅོལ་བའི་གནད་དོན་ནི་བལ་ཡུལ་བྱང་ཕྱོགས་ཀྱི་ཁྱིམ་མཚེས་རྒྱལ་ཁབ་རྒྱ་ནག་ལ་འབྲེལ་བ་ཡོད་པ་རེད། བལ་ཡུལ་གཞུང་གིས་བོད་མི་སྐྱབས་བཅོལ་བ་རྣམས་མི་ཆོས་རིང་ལུགས་ཀྱི་རྨང་གཞིའི་ཐོག་ནས་སྣེ་ལེན་བྱེད་བཞིན་ཡོད། མ་འོངས་བའང་མུ་མཐུད་དུ་དེ་ལྟར་བྱ་རྒྱུ་ཡིན། ཅེས་བརྗོད་འདུག

གནད་དོན་དེ་དང་འབྲེལ་ནས་ཟླ་འདིའི་ཕྱི་ཚེས་ ༧ ཉིན་བལ་ཡུལ་དུ་གནས་སྡོད་རྒྱ་ནག་གཞུང་ཚབ་པ་ཀྲང་མོ་མིང་(Zhang Maoming) དང་བལ་ཡུལ་ཕྱི་སྲིད་བློན་ཆེན་ཤི་ཤལ་ཀ་ནལ་གཉིས་ཐུག་འཕྲད་བྱེད་སྐབས། བལ་ཡུལ་ཕྱི་སྲིད་བློན་ཆེན་གྱིས་བལ་ཡུལ་གཞུང་གིས་ཕྱི་སྲིད་ལ་བཟུང་བའི་རྩ་ཁྲིམས་གཏན་འབེབས་བྱས་ཡོད་པ་ལྟར། ང་ཚོས་མུ་མཐུད་དུ་རྩ་དོན་གྱི་ལངས་ཕྱོགས་བརྟན་པོའི་ཐོག་ནས་རྒྱུན་འཁྱོངས་བྱ་རྒྱུ་ཡིན་ལ། ང་ཚོའི་ལངས་ཕྱོགས་སྔར་བཞིན་རང་འཇགས་ཡིན། རྒྱ་ནག་ཚུད་པའི་རྒྱལ་ཁབ་གཞན་གང་ལའང་ང་ཚོའི་ས་ཁོངས་བེད་སྤྱོད་གཏོང་དུ་འཇུག་རྒྱུ་མིན་ཡང་། ང་ཚོས་རྒྱ་ནག་གཅིག་གི་རྩ་དོན་ལ་རྒྱབ་སྐྱོར་བྱ་རྒྱུ་ཡིན། ཞེས་བརྗོད་འདུག

བལ་ཡུལ་དུ་གནས་སྡོད་རྒྱ་ནག་གཞུང་ཚབ་པས། བལ་ཡུལ་གཞུང་གིས་བལ་ཡུལ་དུ་གནས་སྡོད་བོད་མིའི་གནས་བབ་རྒྱུས་ལོན་ཐོ་འགོད་བྱ་དགོས་པ་མ་ཟད། བོད་དང་ཐའེ་ཝན་གྱི་གནད་དོན་རིགས་ལ་ཚོད་འཛིན་ནན་མོ་དང་། འདི་ལོའི་སྲིད་སྐྱོང་སྤེན་པ་ཚེ་རིང་མཆོག་གི་སྲིད་སྐྱོང་གི་ལས་ཡུན་གཉིས་པའི་དམ་འབུལ་དེ་ཕྱི་ཟླ་ ༥ ཚེས་ ༢༧ ཉིན་དབུལ་འཆར་ཡོད་པས། དབུས་བོད་མིའི་སྒྲིག་འཛུགས་ཀྱིས་བལ་ཡུལ་ནང་སྲིད་བློན་ཆེན་མཆོག་དམ་འབུལ་མཛད་སྒོར་གདན་ཞུ་གནང་སྲིད་པ་ཞིག་ཡིན་པས། སྔ་ས་ནས་དོགས་གཟོན་གནང་དགོས་ལུགས་སོགས་བཤད་ཡོད་འདུག

སྤྱིར་འདི་ལོའི་བལ་ཡུལ་གྱི་འོས་བསྡུའི་ཁྲོད་རང་བཙན་སྲིད་དོན་ཚོགས་པར་(RSP)འོས་བསྡུའི་རྒྱལ་ཁ་ཐོབ་སྟེ་བལ་ཡུལ་གཞུང་གསར་པས་ལས་ཁུར་བྱས་རྗེས།རྒྱ་ནག་གཞུང་གིས་མུ་མཐུད་དུ་བལ་ཡུལ་གཞུང་གསར་པར་མཉམ་ལས་བྱ་འདུན་ཡོད་ལུགས་སོགས་བཤད་ཡོད་པའི་ཁར།  རྒྱ་ནག་གཞུང་གིས་འཐབ་ཇུས་ཀྱི་ཁེ་ཕན་དང་མ་འཇོག དེ་བཞིན་བལ་ཡུལ་ནང་ཚོང་དོན་དང་ཡུལ་སྐོར་གྱི་ཁྱབ་རྒྱ་ཇེ་ཆེར་གཏང་རྒྱུ་དང་།   རྒྱུད་གཅིག་ལམ་གཅིག་གི་ལས་གཞི་ལག་བསྟར། དེ་བཞིན་སྔོན་ཆད་ཀྱི་གྲོས་མཐུན་ཁག་སྲུང་སྐྱོབ་བྱེད་ཆེད་དུ་བལ་ཡུལ་ནང་སྐུ་ཚབ་ཚོགས་ཆུང་དང་འཐུས་མི་སོགས་ཆེད་དུ་མངགས་ནས། བལ་ཡུལ་གཞུང་གསར་པའི་མགོ་ཁྲིད་དང་གནད་ཡོད་མི་སྣ་སོགས་དང་ཐུག་འཕྲད་བྱེད་ཀྱིན་ཡོད་འདུག

འདས་ལོའི་ཕྱི་ཟླ་བཅུ་གཉིས་ནང་། བལ་ཡུལ་དུ་ཡོད་པའི་རྒྱ་ནག་གཞུང་ཚབ་པ་ཟུར་པ་ཁྲན་སོན་ཟེར་བས། བལ་ཡུལ་གྱི་བར་བརྒལ་སྲིད་བློན་ཟུར་པ་ལྕམ་སོའུ་ཤི་ཀར་ཀི་མཆོག་ལ་ཐུག་འཕྲད་གནང་སྐབས་ཀྱང་། བལ་ཡུལ་དུ་གནས་སྡོད་སྐྱབས་བཅོལ་བོད་མི་དང་བལ་བོད་མཐའ་མཚམས་ཀྱི་ས་གནས་ཁག་ཏུ་བོད་དོན་དང་འབྲེལ་བའི་ལས་དོན་རིགས་མི་གཉེར་སླད་དོགས་གཟོན་བྱ་དགོས་ལུགས་བཤད་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།