བོད་སློབ་གྲྭ་ཁག་ཏུ་ལུས་ཐོག་ཉེས་ཆད་གཏོང་རྒྱུ་ངེས་པར་དུ་མཚམས་འཇོག་གནང་དགོས།

བསྟན་འཛིན་ནོར་བཟང་གིས་ཨིན་ཡིག་ཏུ་བརྩམས།
ཚེ་རིང་དོན་གྲུབ་ཀྱིས་བོད་ཡིག་ཏུ་བསྒྱུར།
སྒྱུར་རྩོམ་གྱི་ཁུངས། བོད་ཀྱི་དུས་བབ།

བོད་སློབ་འཛིན་ཁང་ཞིག་གི་ནང་ཕྲུ་གུ་ཞིག་ཞེད་སྣང་སྐྱེད་ཀྱིན་བསྡད་ཡོད། འདི་ནི་ཡིག་རྒྱུགས་མ་འཕྲོད་པའི་ཞེད་སྣང་མ་ཡིན་ལ། ཕ་མའི་བློ་ཕམ་དུ་བཅུག་པའི་ཞེད་སྣང་ཀྱང་མ་ཡིན། འདི་ནི་རང་ཉིད་ཀྱི་རྒན་ལགས་ཀྱི་ཕྱག་གམ། ཡང་ན་རྒན་ལགས་ཀྱི་ཕྱག་ཏུ་བསྣམས་པའི་ཐིག་ཤིང་ངམ་དབྱུག་པ་གང་རུང་ཞིག་ལ་ཞེད་སྣང་རེད། ཕྲུ་གུ་དེས་ཁ་ཁུ་སིམ་སིམ་ངང་བསྡད་དེ་བསླབ་གཞི་རྩ་འཛིན་གང་གི་ནང་དུའང་སློབ་འཁྲིད་བྱ་རྒྱུར་དམིགས་པ་མ་ཡིན་པའི་གོ་དོན་ཞིག་རྟོགས་བཞིན་ཡོད་པ་ནི། དབང་ཤུགས་ཟེར་དུས་ན་ཟུག་ལ་གོ་དགོས་པ་དང་། བརྩེ་བ་དང་འཚེ་བ་གཉིས་ཁང་པ་གཅིག་གི་ནང་མཉམ་གནས་ཐུབ་ཀྱི་ཡོད་པ་དེ་རེད།

ངས་གླེང་བཞིན་པ་ནི་རྟོག་བཏགས་ཀྱི་འཆར་སྣང་ཞིག་མ་ཡིན། ངས་གླེང་བཞིན་པ་ནི་ངས་ངོ་ཤེས་པའི་ཕྲུ་གུ་དང་། ང་ཚོའི་སྤྱི་ཚོགས་ཀྱི་བུ་ཕྲུག་སྟེ། ང་ཚོའི་སྤྱི་ཚོགས་ཀྱི་མིང་དང་ང་ཚོའི་སྤྱི་ཚོགས་ཀྱི་རེ་བ་འཁུར་མཁན་གྱི་སློབ་གྲྭའི་སློབ་ཕྲུག་གི་སྐོར་ཡིན།

ཞེད་སྣང་འདི་ང་རང་ཉིད་ཀྱི་མིག་གིས་མཐོང་བྱུང་ལ། ང་རང་ཉིད་ཀྱི་ཁྱིམ་ཚང་ནང་དུའང་ཚོར་བྱུང་།

ངའི་བཟའ་ཟླའི་སྤུད་མཆེད་ཀྱི་བུ་གངས་སྐྱིད་དཔེ་སྟོན་སློབ་གྲྭ་འགྲིམས་པའི་སྐབས་རྒན་ལགས་གཅིག་གིས་ཁོ་ལ་ཉེས་ཆད་ཀྱི་ཚུལ་དུ་འཛིན་ཁང་ནང་ཡར་བསླངས་ཏེ་ངོ་གདོང་ལ་རི་མོ་བྲིས་ནས་འཛིན་གྲོགས་རྣམས་ཀྱིས་ཁོ་རང་ལ་འཕྱ་ལད་བརྒྱབ་ཏུ་བཅུག་འདུག ངས་གནས་ཚུལ་དེ་ཐོས་སྐབས་རྦད་དེ་ཧང་སངས་བྱུང་བས། ངས་ཁྱིམ་བདག་ལ་ཡིག་ཐོག་ནས་ཞུ་གཏུག་བྱ་དགོས་པའི་སྐུལ་མ་བྱས་པ་ཡིན། ཡིན་ནའང་ཁོང་ཚོས་ཞེད་སྣང་བྱེད་ཀྱི་འདུག ཞེད་སྣང་བྱེད་དགོས་ངེས་ཀྱང་རེད། གང་ལགས་ཞེ་ན་ཞུ་གཏུག་དེའི་མཇུག་འབྲས་ནི་རྒན་ལགས་དེས་ཁོ་ཚོའི་ཕྲུ་གུ་གཞན་ལས་ཟུར་འདོན་བྱ་རྒྱུ་ལས། ཉེས་ཆད་ནི་མཚམས་འཇོག་གི་མ་རེད་ལ། དེ་ཡང་མངོན་གསལ་མེད་པའི་སྒོ་ནས་ཇེ་སྡུག་ཇེ་ཞན་དུ་འགྲོ་རྒྱུ་ཡིན་པ་ལམ་ལུགས་འདིའི་ནང་སྡོད་མཁན་གྱི་མི་ཚང་མས་ཤེས་གསལ་རེད།

གནས་སྟངས་འདི་ངས་ཤེས། གང་ལགས་ཞེ་ན་དེ་ང་ལ་བྱུང་མྱོང་ལ། ངའི་ཕྲུ་གུ་ལའང་བྱུང་སོང་།

ངའི་ཕྲུ་གུ་རྣམས་གུ་རུ་པུ་རའི་ས་གནས་སུ་ཡོད་པའི་སཾ་བྷོ་ཊའི་སློབ་གྲྭ་དང་། གངས་སྐྱིད་དུ་ཡོད་པའི་དཔེ་སྟོན་སློབ་གྲྭ། ཤེས་རབ་དགའ་ཚལ་སློབ་གླིང་དུ་ཡོད་པའི་དཔེ་སྟོན་སློབ་གྲྭ་བཅས་སློབ་གྲྭ་ཁག་གསུམ་འགྲིམས་ཡོད། སློབ་གྲྭ་གསུམ་ཀའི་ནང་ཁོང་ཚོའི་ལུས་ཐོག་ཏུ་ཉེས་ཆད་མྱངས་ཡོད།

གུ་རུ་པུ་རར་ཡོད་པའི་སཾ་བྷོ་ཊའི་སློབ་གྲྭའི་རྒན་ལགས་གཅིག་གིས་ངའི་བུ་མོར་ཉེས་ཆད་ཀྱི་ཚུལ་དུ་ཡར་ལངས་མར་བསྡད་ (sit-up) ཐེངས་བརྒྱ་བྱེད་དུ་བཅུག་འདུག་པ་དང་། ཉིན་རྗེས་མར་ཡང་ཐེངས་བརྒྱ་བྱེད་དུ་བཅུག་པས། ངའི་བུ་མོའི་ལུས་པོར་ན་ཟུག་གི་རྐྱེན་པས་གོམ་པ་ཡང་སྤོ་དཀའ་བར་གྱུར་ཏེ། སློབ་གྲྭ་ནས་ཉིན་གཅིག་རིང་དགོངས་པ་ཞུ་དགོས་བྱུང་། སློབ་གྲྭ་དེ་རང་གི་ནང་ངའི་བུ་ལའང་ཉེས་པ་གཅིག་མཚུངས་བཏང་འདུག གངས་སྐྱིད་དཔེ་སྟོན་སློབ་གྲྭར་རྒན་ལགས་རྣམ་པས་ལུས་ཐོག་ཉེས་ཆད་གཏོང་སྐབས་རྒྱུན་དུ་འགྲམ་ལྕག་གཞུ་བ་དང་། རྐང་པའི་བརླ་ཤ་དང་ཉྭ་རིལ་ལ་རྒྱུག་རྡུང་། དཔྲལ་བར་ཁུ་ཚུར་རྡེག་པ་བཅས་བྱེད་ཀྱི་ཡོད། ངའི་ཕྲུ་གུ་ཚོ་ནང་དུ་ལོག་ཡོང་སྐབས་རྒན་ལགས་འདིས་སློབ་ཕྲུག་དེ་ལ་ཉེས་རྡུང་གང་འདྲ་སེ་བཏང་བ་དང་། རྒན་ལགས་དེས་ཕྲུ་གུ་དེ་ལ་གང་འདྲ་སེ་གཞུས་སྐོར་གྱི་སྒྲུང་བཤད་ཀྱི་ཡོད། སྐབས་དེར་ངས་ཕ་མ་དེ་ཚོས་གང་རེ་བྱས་ནས་ཞུ་གཏུག་བྱེད་ཀྱི་མེད་དམ་ཞེས་བསམ་བློ་གཏོང་སྐབས། ངས་ང་རང་ཡང་ཁོང་ཚོའི་གྲས་ཀྱི་གཅིག་ཡིན་པ་དྲན་མྱོང་། སྐབས་རེར་ང་རང་གིས་ངའི་བཟའ་ཟླས་ཞུ་གཏུག་བྱ་རྒྱུར་བཀག་འགོག་བྱེད་ཀྱི་ཡོད་ལ། སྐབས་རེར་མོ་རང་གིས་ངས་ཞུ་གཏུག་བྱ་རྒྱུར་བཀག་འགོག་བྱེད་ཀྱི་ཡོད། གང་ལགས་ཞེ་ན་ཞུ་གཏུག་བྱས་ན་རང་ཉིད་ཀྱི་ཕྲུ་གུ་དཀའ་ངལ་ནང་ཚུད་འཇུག་གི་ཡོད་པ་ངེད་གཉིས་ཀྱིས་ཤེས་པས་རེད།

ངས་དེ་རིང་རྩོམ་ཡིག་འདི་འབྲི་བའི་སྐབས། ངའི་བུ་གཉིས་ཀྱིས་ཤེས་རབ་དགའ་ཚལ་སློབ་གླིང་དུ་ཡོད་པའི་དཔེ་སྟོན་སློབ་གྲྭའི་ནང་སློབ་སྦྱོང་བྱེད་བཞིན་ཡོད་པ་རེད། ལོ་མང་པོའི་གོང་དུ་མ་རེད་ལ། དྲན་ཡུལ་ལས་ཐག་རིང་བའི་སར་ཡང་མ་རེད། དེ་རིང་རང་རྒན་ལགས་ཤིག་གིས་ཁོ་གཉིས་ལ་འགྲམ་ལྕག་གཞུས་འདུག དགོང་མོ་ཕལ་ཆེ་བ་དང་འདྲ་བར། དེ་རིང་དགོང་མོར་ཡང་ཁོ་གཉིས་ཀྱིས་རྒན་ལགས་སུས་ཕྲུ་གུ་སུ་ལ་ཉེས་རྡུང་བཏང་ཚུལ་གྱི་སྒྲུང་འཁྱེར་ཏེ་ནང་ལ་སླེབས་བྱུང་།

འདི་ནི་འདས་པའི་བྱུང་རབས་མ་རེད། འདི་ནི་ད་ལྟ་རང་འབྱུང་བཞིན་པའི་གནས་ཚུལ་རེད།

དེ་ཡང་ངའི་ཁྱིམ་ཚང་གཅིག་པུ་མ་རེད།

ཉེ་སྔོན་ངའི་གྲོགས་པོ་ཞིག་གིས་ཁོང་རང་གི་བུ་གོ་པལ་པུར་བོད་ཁྱིམ་དུ་བོད་ཡིག་སྦྱོང་བར་བཏང་བ་རེད། བུ་དེར་འཇིགས་སྐུལ་དང་བརྙས་བཅོས་བཏང་འདུག སློབ་གྲོགས་ཤིག་གིས་བུ་དེའི་ལག་པར་ལྕགས་ཚ་བོ་སྦྱར་ཏེ་ལག་པ་ཐེངས་མང་པོར་བསྲེགས་འདུག་ཀྱང་། སུ་གང་གིས་བཀག་འགོག་བྱེད་མཁན་མ་བྱུང་བར་དུས་ཡུན་གང་འཚམ་རིང་བརྙས་བཅོས་དེ་མྱངས་དགོས་བྱུང་འདུག་པས། དོན་རྐྱེན་དེས་མཐར་ཕ་མ་གཉིས་ཀྱིས་རང་ཉིད་ཀྱི་བུ་སློབ་གྲྭ་ནས་ཕྱིར་འཐེན་བྱ་དགོས་བྱུང་འདུག དེ་ནི་སློབ་གྲྭ་རུ་འབོད་པའི་སྒྲིག་འཛུགས་གང་འདྲ་ཞིག་གི་ནང་དུའང་བསམ་ཡུལ་ལས་འདས་པའི་གནད་དོན་ཞིག་ཡིན་དགོས་པ་རེད།

ཡང་ངའི་གྲོགས་པོ་གཞན་ཞིག་གི་བུ་མོ་ཤེས་རབ་དགའ་ཚལ་སློབ་གླིང་དུ་ཡོད་པའི་དཔེ་སྟོན་སློབ་གྲྭར་ད་ལྟ་སློབ་སྦྱོང་བྱེད་མུས་རེད། མོ་རང་ལ་རྒན་ལགས་ཤིག་གིས་འགྲམ་ལྕག་ལན་མང་གཞུས་འདུག་པས། མོ་རང་ཁྱིམ་དུ་སླེབས་སྐབས་ཧང་སངས་སངས་ངང་ཕ་མ་གཉིས་ལ་ “རྒན་ལགས་ཀྱིས་སློབ་ཕྲུག་ལ་གང་འདྲ་སེ་གཞུ་ཆོག་གི་རེད། དེ་ཁྲིམས་འགལ་མ་རེད་དམ།” ཞེས་བཤད་འདུག

མོ་རང་གིས་བཤད་པ་དེ་བདེན་པ་རེད། དེ་ཁྲིམས་འགལ་རེད།

ཁྲིམས་ལུགས་ནང་དེའི་ཐད་ཁ་གསལ་མེད་པ་མ་རེད།

རྒྱ་གར་གཞུང་གིས་སློབ་གྲྭའི་ནང་ལུས་ཐོག་ཉེས་ཆད་འགེལ་མི་ཆོག་པའི་བཀག་རྒྱ་ཡོངས་ཁྱབ་ཏུ་བཏང་ཡོད། སློབ་གྲྭ་ཚང་མའི་ནང་ཉེས་ཆད་དེ་རིགས་མཚམས་འཇོག་བྱ་རྒྱུའི་སྲིད་ཇུས་ཀྱང་ཁ་གསལ་ཤིག་དགོས་ཀྱི་ཡོད་པ་རེད། ང་ཚོའི་སྤྱི་ཚོགས་ནང་ལ་ཆ་མཚོན་ན། ཕྱི་ལོ་ ༢༠༠༤ ལོར་གཏན་འབེབས་བྱས་པའི་ཡང་དག་པའི་ཤེས་ཡོན་སྲིད་བྱུས་ཤིག་ཡོད། དེ་ནི་དུས་རབས་ཀྱི་སྔོན་ཐོན་སྲིད་བྱུས་ཤིག་ཡིན་པས། ང་ཚོས་སྲིད་བྱུས་དེའི་གཞུང་ལུགས་ཀྱི་ཟབ་ཚད་ལ་བསྔགས་བརྗོད་རྒྱ་ཆེ་བྱས་ཡོད། སྲིད་བྱུས་དེའི་ནང་ཕྲུ་གུ་ཞིག་གི་ཕྱོགས་ཡོངས་ཀྱི་འཕེལ་རྒྱས་དང་། ཆེ་མཐོང་། བྱམས་བརྩེ་བཅས་རྩ་བར་བཟུང་བའི་ཤེས་ཡོན་ཞིག་འཆར་སྣང་དུ་བཟུང་ཡོད།

ཤེས་ཡོན་སྲིད་བྱུས་དེ་ང་ཚོས་གཏན་འབེབས་དང་། ང་ཚོས་བསྔགས་བརྗོད་བྱས་པ་ཞིག་ཡིན་པས། ད་ཆ་ང་ཚོས་ངེས་པར་དུ་ལག་བསྟར་བྱ་དགོས་པ་རེད།

ངའི་དགོང་མོའི་གཉིད་གཅོག་མཁན་གྱི་དྲི་བ་དཀའ་ཁག་ཅན་ཞིག་འདོན་རྒྱུ་ཡིན།

ཚོགས་སྡེ་ཞིག་གི་ངོ་བོའི་ཆ་ནས་ང་ཚོ་ད་ལྟ་གང་དུ་སླེབས་ཡོད་པར་ལྟོས་དང་། ང་ཚོའི་དབུ་ཁྲིད་ནི་སྐུ་ན་བགྲེས་བཞིན་འདུག ང་ཚོའི་མི་མང་ནི་འཛམ་གླིང་གི་ས་ཕྱོགས་གང་སར་ཁ་འཐོར་བཞིན་འདུག དེ་སྔ་ང་ཚོ་མཉམ་དུ་སྦྲེལ་མཁན་གྱི་གཅིག་སྒྲིལ་གྱི་གོང་བུ་ལ་གས་ཆག་གི་རྣམ་པ་མངོན་བཞིན་འདུག་ལ། གས་ཆག་དེ་ནི་ལོ་ཟླ་རིམ་སོང་གི་དུས་ཡུན་རེ་རེའི་ནང་སྣང་མེད་དུ་འཇོག་དཀའ་བའི་གནས་སུ་གྱར་བཞིན་འདུག ངས་མར་བསྡད་ནས་སེམས་རྣལ་དུ་ཕབ་སྟེ་ང་ཚོའི་རྩ་དོན་དང་། ང་ཚོའི་རིག་གཞུང་། ང་ཚོའི་མི་རིགས་ཀྱི་ངོ་བོ། ང་ཚོའི་བོད་བཅས་ཀྱི་མ་འོངས་ལ་བསམ་བློ་གཏོང་སྐབས། ང་ལ་འཇིགས་ཡེ་རེ་བའི་ཚོར་སྣང་ཞིག་འབྱུང་བཞིན་འདུག ཚོར་སྣང་དེ་ང་ཚོ་མང་པོ་ཞིག་ལ་ཡོང་བཞིན་ཡོད་ཀྱང་འགའ་ཤས་ཤིག་གིས་མ་གཏོགས་བརྗོད་ཀྱི་མེད།

ད་ལྟའི་དུས་ཚོད་འདི་ནི་ང་ཚོར་ཡོད་པའི་ནུས་པ་ཆ་ཚང་སྤུང་དགོས་པའི་དུས་སྐབས་ཡིན་པས། ངས་ངེས་ཤེས་བརྟན་པོའི་སྒོ་ནས་ཡིད་ཆེས་བྱེད་པ་ནི་ང་ཚོའི་མ་འོངས་པ་ནི་ནུས་པ་ཚང་མའི་ནང་ནས་མིའི་ནུས་པ་ལ་བརྟེན་དགོས་པ་རེད། འདི་ནི་ང་ཚོའི་མིའི་མ་རྩ་རེད། ང་ཚོའི་མིའི་མ་རྩའི་རྨང་གཞི་ནི་སློབ་གྲྭའི་ནང་ནས་གདིང་དགོས།

ང་ཚོའི་ཤེས་ཡོན་གྱི་ལམ་སྲོལ་ནི་གནད་དོན་ཕལ་པ་ཞིག་མ་རེད། དེ་ནི་སྔོན་རྩིས་ཀྱི་འཆར་གཞི་ཞིག་མ་ཡིན་ལ། འཛིན་སྐྱོང་གི་གནད་དོན་ཞིག་ཀྱང་མ་ཡིན། ང་ཚོའི་ཤེས་ཡོན་གྱི་ལམ་སྲོལ་ནི་བོད་མིའི་འཐབ་རྩོད་ཀྱི་ནུས་པ་མཐོར་འདེགས་བྱེད་པའི་ཀ་བ་གཙོ་བོ་གཅིག་ཆགས་ཡོད། དེ་རིང་གི་སློབ་ཁང་ཁག་ནང་བསྡད་ཡོད་པའི་ཕྲུ་གུ་དེ་དག་ནི་སང་ཉིན་གྱི་གྲོས་མོལ་བ། ཞུ་རྩོད་པ། རིག་གཞུང་གཅེས་འཛིན་པ། དབུ་འཁྲིད་མི་སྣ་ཞེ་གཅིག་རེད། ང་ཚོས་ཐེག་མི་ཐུབ་པའི་མཚམས་སུ་ཁོང་ཚོས་ང་ཚོའི་རྩ་དོན་དེ་མུ་མཐུད་མདུན་ནས་མདུན་དུ་འཁྱེར་ངེས་རེད། དེ་ལྟར་ཡོང་མིན་ནི་ཁོང་ཚོ་མི་གང་འདྲ་ཞིག་ལ་འགྱུར་མིན་ལ་རག་ལུས་ཡོད་ཅིང་། དེ་ཡང་སློབ་གྲྭའི་ནང་ཁོང་ཚོར་སྤྱོད་ཚུལ་གང་འདྲ་ཞིག་འཛིན་མིན་ཐོག་ནས་འགོ་འཛུགས་དགོས་པ་རེད།

ང་ཚོས་རང་ཉིད་ཀྱི་རྩ་དོན་དེ་དངོས་གནས་གལ་འགངས་ཆེན་པོ་ཞིག་ཏུ་བརྩི་གི་ཡོད་ན། ང་ཚོས་ཕྲུ་གུའི་ནུས་སྟོབས་སྣ་གཅིག་ཡིན་ནའང་ཞེད་སྣང་དང་། སེམས་ནད། ཡང་ན་རང་ཉིད་ལ་གནད་འགག་མེད་པའི་སྙམ་པའི་ངོས་འཛིན་བྱེད་པའི་བསམ་བློ་བཅས་ཀྱི་ཕྱོགས་སུ་ཆུད་ཟོས་སུ་གཏོང་ཐབས་མེད་པ་རེད། ང་ཚོས་ཁོང་ཚོ་འཛམ་གླིང་ཕྱི་ཕྱོགས་སུ་ཆག་གྲུམ་ཤོར་བའི་གདེངས་ཚོད་དང་དྲག་སྐྱེད་བྱུང་མེད་པའི་རྨ་ཁ་དང་སྦྲགས་ཏེ་གཏོང་ཐབས་མེད། ང་ཚོར་དགོས་པ་ནི་ཁོང་ཚོའི་ནུས་སྟོབས་ཆ་ཚང་བ་དེ་རེད། ང་ཚོར་དགོས་པ་ནི་ཁོང་ཚོ་སྟོབས་ཤུགས་དང་ལྡན་པ་དེ་རེད། ང་ཚོར་དགོས་པ་ནི་ཁོང་ཚོས་རང་ཉིད་བོད་མི་ཡིན་པར་དགའ་ཞེན་བྱ་རྒྱུ་དེ་ཡིན་པ་ལས། བོད་མིའི་ཚོགས་སྡེ་རྣམས་ཡིད་ངོར་འཆར་སྐབས་ན་ཟུག་དང་ཉམ་དམས་ཀྱི་ཚོར་སྣང་དག་ཀྱང་ལྷན་གཅིག་ཏུ་འཆར་དུ་འཇུག་རྒྱུ་དེ་མ་རེད།

འདི་ནི་བོད་དོན་འཐབ་རྩོད་དང་འབྲེལ་མེད་མ་ཡིན་པར་འབྲེལ་བ་གཏིང་ཟབ་ལྡན་ཡོད།

ངས་མཐུན་འགྲིག་བྱ་དཀའ་བར་མཐོང་བའི་འགལ་འདུ་འདི་ཡོད།

ང་ཚོའི་དབུ་ཁྲིད་ནི་ཞི་བདེའི་དེད་དཔོན་ཆེན་པོ་༸གོང་ས་༸རྒྱལ་བ་རིན་པོ་ཆེ་མཆོག་རེད། ཁོང་གི་འཚེ་བ་མེད་པའི་ཐབས་ལམ་ལ་བཅངས་པའི་གཡོ་བ་མེད་པའི་ཆོད་སེམས་ལ་བརྟེན་ཏེ་ཁོང་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ཡོད། ཁོང་ནི་སྐུ་ཚེ་ཧྲིལ་བོར་རང་ཉིད་ཀྱི་ཕྱོགས་གཏོགས་ཙམ་དུ་མ་ཟད། རང་ཉིད་ལ་གཉའ་གནོན་བྱེད་མཁན་ལའང་བྱམས་པ་དང་། བརྩེ་བ། བཟོད་སྲན་བཅས་བྱ་དགོས་པའི་ལམ་སྟོན་གནང་སྟེ་བཞུགས་མཁན་གྱི་སྐྱེས་བུ་ཞིག་རེད། ཁོང་གིས་རང་ཉིད་ཀྱི་ཕ་ཡུལ་བཙན་འཕྲོག་དང་། རང་ཉིད་ཀྱི་དགོན་སྡེ་རྩ་གཏོར། རང་ཉིད་ཀྱི་མི་མང་བཙན་བྱོལ་དུ་གྱར་བཅུག་མཁན་གྱི་སྐྱེ་བོ་ལའང་བྱམས་བརྩེའི་ཕྱག་ཟུང་བསྐྱངས་ཡོད་ལ། ཁོང་གིས་བརྩེ་བ་ནི་ཞེ་སྡང་ལས་སྟོབས་ཤུགས་ཆེ་བ་ཡོད་པ་དང་། བྱམས་བརྩེ་ནི་ཞན་ཆ་ཞིག་མ་ཡིན་པར་སྟོབས་ཤུགས་ཀྱི་མཆོག་ཡིན་པར་དུས་དང་རྣམ་པ་ཀུན་ཏུ་འགྱུར་བ་མེད་པར་ལམ་སྟོན་གནང་བཞིན་ཡོད།

འདི་ནི་ང་ཚོའི་དབུ་ཁྲིད་རེད། འདི་ནི་ང་ཚོའི་ལྟ་གྲུབ་རེད། འདི་ནི་ང་ཚོས་བོད་དོན་སྐོར་སྐད་ཆ་ཤོད་སྐབས་འཛམ་གླིང་མི་མང་ལ་གང་བརྗོད་བཞིན་པ་དེ་རེད། དེས་ན་ང་ཚོས་རང་ཉིད་ཀྱི་ཕྲུ་གུ་ལ་ཉེས་རྡུང་ཇི་ལྟར་གཏོང་ཐུབ་བམ།

ང་ཚོས་རྒྱལ་སྤྱིའི་སྡིངས་ཆའི་སྟེང་འཚེ་བ་མེད་པའི་སྐུ་ཚབ་ཀྱི་ངོ་བོར་མདུན་དུ་ཐོན། དེ་ནས་ཕྱིར་རང་ཁྱིམ་དང་འཛིན་ཁང་དུ་སླེབས་སྐབས་རང་ཉིད་ཀྱི་སློབ་ཕྲུག་ལ་རྒྱུག་རྡུང་དང་། འགྲམ་ལྕག རང་མཉམ་སློབ་ཕྲུག་གི་མདུན་དུ་ཉམ་དམའ་བོ་བཟོ་བའི་བྱ་བ་དེ་རིགས་ཇི་ལྟར་རྩོམ་ཐུབ་ཀྱི་ཡོད་དམ། ང་ཚོས་རང་ཉིད་ཀྱི་སྤྱི་ཚོགས་ནང་གི་ཆེས་ལོ་ཆུང་ཤོས་དང་ཆེས་ཉམ་ཆུང་ཤོས་ཀྱི་འགྲོ་བ་མིའི་རང་བཞིན་ལ་ཕྱོགས་ཡོངས་ནས་ངོས་འཛིན་མ་ཐུབ་པར། འཛམ་གླིང་མི་མང་ལ་ང་ཚོའི་འགྲོ་བ་མིའི་རང་བཞིན་ལ་ངོས་འཛིན་བྱེད་རོགས་ཞེས་ཇི་ལྟར་བརྗོད་ཐུབ་བམ།

ངས་མི་གཞན་ངོ་ཚ་ཁ་སྐྱེངས་བཟོ་རྒྱུའི་དོན་དུ་དྲི་བ་འདི་འདོན་གྱི་མེད། ངས་དྲི་བ་འདི་འདོན་དགོས་དོན་ནི་ད་ལྟའི་འགལ་འདུ་འདི་ནི་དངོས་ཡོད་ཡིན་ཞིང་། འགལ་འདུ་འདི་མེད་ཁུལ་བྱས་ན། འགལ་འདུ་དེ་ཇེ་སྡུག་ཇེ་ཞན་དུ་གཏོང་རྒྱུ་ཁོ་ན་ལས་མ་འདས་པས་ཡིན།

བརྩེ་བ་ནི་ཞེད་སྣང་ལས་སྟོབས་ཤུགས་ཆེ།

ངས་མི་རྒན་པ་དང་གྲོགས་པོ་ཚོས་སྐབས་རེར་སྒྲིག་འཛུགས་སྐྱོང་ཆེད་དུ་ཕྲུ་གུ་ལ་ཉེས་རྡུང་གཏོང་རྒྱུ་དགོས་གལ་ཡིན་སྐོར་བརྗོད་པ་ཐོས་མྱོང་། བསམ་བློ་དེ་གང་ནས་སླེབས་པ་ཡིན་ངས་ཤེས། ཁོང་ཚོ་མང་པོ་ཞིག་ཐབས་ལམ་དེ་འདྲའི་འོག་ནས་སྙོར་སྐྱོང་བྱས་པ་ཞིག་རེད་ལ། ང་ཚོ་མང་པོ་ཞིག་ཀྱང་གཅིག་མཚུངས་རེད། ཡིན་ནའང་ཉེས་རྡུང་ཐེངས་གཅིག་ཀྱང་གཏོང་མ་མྱོང་ནའང་། འཛིན་གྲྭའི་ནང་སློབ་ཕྲུག་རྣམས་ལ་བཀོད་འདོམས་ཚུལ་བཞིན་བྱེད་ཐུབ་མཁན་གྱི་དགེ་རྒན་མང་པོ་ཞིག་ངས་དངོས་སུ་མཐོང་མྱོང་། ཁོང་རྣམ་པའི་སློབ་ཕྲུག་ནི་སློབ་སྦྱོང་ལ་དོན་གཉེར་ཆེ་བ། ཀུན་སྤྱོད་ཚུལ་མཐུན། ཡར་རྒྱས་གྱི་རྣམ་པ་ཡང་མངོན་གསལ་དོད་པོར་མཐོང་རྒྱུ་འདུག དེ་ནི་སྒྲུབ་ཐུབ་པ་ཞིག་རེད། དེ་བསྒྲུབ་རྒྱུར་འབད་འབུངས་ཆེར་སྐྱེད། བྱེད་སྒོ་གསར་གཏོད། སློབ་ཕྲུག་དང་བཅོས་མིན་གྱི་མཛའ་འབྲེལ་བཅས་དགོས་ཀྱི་ཡོད་ཀྱང་། དེ་ནི་ཡོངས་སུ་སྒྲུབ་ཐུབ་པ་ཞིག་རེད།

ང་རང་ཚོའི་རིག་གཞུང་གཙོས་པའི་ཡང་དག་པའི་རིག་གཞུང་ཚང་མའི་ནང་ཡོངས་གྲགས་སུ་ངོས་འཛིན་བྱེད་པའི་བདེན་པ་ཞིག་ཡོད་པ་ནི། བརྩེ་བ་ནི་ཞེད་སྣང་ལས་སྟོབས་ཤུགས་ཆེ་བ་ཡོད་པ་དེ་རེད། ལྷད་མེད་པའི་བརྩེ་བ་ཡིས་མིའི་རིགས་ཉམས་ཞན་དུ་གཏོང་གི་མེད། དེས་མིའི་རིགས་ལ་རླབས་ཆེན་གྱི་བྱ་བ་བསྒྲུབ་རྒྱུའི་ནུས་པ་སྦྱིན་གྱི་ཡོད། ལྷད་མེད་པའི་བརྩེ་བ་ཡིས་བཙན་རྒྱལ་གྱི་སྟོབས་ཤུགས་གཏོར་ཕམ་དང་། དམག་འཁྲུག་མཚམས་འཇོག སེམས་འདུལ་དཀའ་བ་རྣམས་ཀྱང་འདུལ་བ་བཅས་བྱེད་ཀྱི་ཡོད། གལ་སྲིད་བརྩེ་བ་ཡིས་གཉའ་གནོན་གཏོང་མཁན་ཞིག་གི་བློ་ཁ་བསྒྱུར་ཐུབ་ཀྱི་ཡོད་ན། འཚར་ལོངས་འབྱུང་བཞིན་པའི་ཕྲུ་གུ་ཞིག་གི་བློ་ཁ་བསྒྱུར་མི་ཐུབ་པ་གང་ཡོད་དམ།

འབོད་སྐུལ།

རྒན་ལགས་རྣམ་པར། ཁྱེད་རྣམ་པས་ཕྲག་ཏུ་འགན་འཁྲི་ལྕི་མོ་ཞིག་འཁྱེར་བཞིན་ཡོད་ཀྱང་། རྒྱུན་དུ་རྒྱབ་སྐྱོར་དེ་ཙམ་ཐོབ་ཀྱི་མེད་མོད། དེ་ལྟར་ནའང་དབྱུག་པ་ནི་སྒྲིག་འཛུགས་སྐྱོང་སྟངས་ཤིག་མ་རེད། སྒྲིག་འཛུགས་སྐྱོང་སྟངས་ཀྱི་ཐབས་ལམ་བཟང་པོ་མང་པོ་ཡོད་པ་བཞིན། ཐབས་ལམ་མང་པོ་ཞིག་ཁྱེད་རང་གི་ལས་རོགས་ཚོས་དེ་སྔ་ནས་བཀོལ་སྤྱོད་བྱེད་བཞིན་ཡོད།

ཕ་མ་རྣམ་པར། སློབ་གྲྭའི་ནང་གནས་ཚུལ་ཅི་ཞིག་འབྱུང་གི་ཡོད་པ་ཁྱེད་ཀྱིས་ཉིན་ལྟར་སོ་སོའི་ཕྲུ་གུ་ལ་སྐད་ཆ་འདྲི་དགོས། སློབ་གྲྭ་ལ་སློབ་གྲྭའི་སྒྲིག་འཛུགས་སྐྱོང་སྟངས་ཀྱི་སྲིད་བྱུས་གང་ཡིན་པ་སྐད་ཆ་འདྲི་དགོས། གནས་ཚུལ་རིགས་བྱུང་ཚེ་ཡིག་ཐོག་ཏུ་ཐོ་འགོད་བྱ་དགོས། ཁྱེད་རང་གིས་དཀའ་ངལ་དེ་རིགས་འཕྲད་མཁན་ཁྱེད་རང་གཅིག་པུ་ཡིན་པར་བསམ་སྲིད་ཀྱང་ཁྱེེད་རང་གཅིག་པུ་མ་རེད།

འཛིན་སྐྱོང་བ་དང་སྲིད་བྱུས་འདིང་མཁན་རྣམ་པར། གཞི་རིམ་ཤེས་ཡོན་སྲིད་བྱུས་དེ་ལག་བསྟར་བྱེད་དུ་འཇུག་དགོས། ཞུ་གཏུག་གྱི་བརྒྱུད་ལམ་བཙན་པོ་དང་མངོན་གསལ་མེད་པ་ཞིག་གཏོད་དགོས། བརྙས་བཅོས་རིགས་ཞུ་གཏུག་བྱེད་མཁན་གྱི་ཕ་མ་དང་ཕྲུ་གུ་རྣམས་ལ་ཞེ་འཁོན་གྱི་ཕོག་ཐུག་རིགས་མི་ཡོང་བའི་འགན་སྲུང་བྱ་དགོས།

བཙན་བྱོལ་བོད་མིའི་སློབ་གྲྭ་འགྲིམས་མྱོང་བའི་བརྩམས་ཆོས་འདི་ཀློག་མཁན་གྱི་བོད་མི་རྣམས་ལ། སྐར་མ་གཅིག་གི་རིང་ལུས་སེམས་ལྷོད་ལ་དབབ་སྟེ་བསམ་བློ་ཞིག་ཐོངས་དང་། ཁྱེད་རང་གིས་ཉེས་རྡུང་དེ་རིགས་བཟེད་མྱོང་བ་ནི་ཐེངས་གཅིག་ཡིན་ནམ་ཡང་ན་ཐེངས་མང་པོ་ཡིན། སྐབས་དེར་ཁྱེད་རང་ལ་ཚོར་སྣང་གང་བྱུང་བའི་ཐོག་ལ་བསམ་བློ་ཐོངས་དང་། ཁྱེད་རང་ལ་སྲུང་སྐྱོབ་བྱེད་མཁན་དུ་སེམས་པའི་མི་ཞིག་གིས་གནོད་འཚེ་གཏོང་སྐབས་ཧང་སང་ཧོན་འཐོར་བ་དང་། གང་བྱེད་འདི་བྱེད་མེད་པར་ཉམ་དམས་སུ་གྱུར་བའི་ཚོར་སྣང་མ་བྱུང་ངམ། ད་ཁྱེད་རང་གིས་སོ་སོར་དྲི་བ་གཅིག་དྲིས་དང་། ཁྱེད་ཀྱིས་རང་ཉིད་ཀྱི་ཕྲུ་གུ་ལའང་ཚོར་སྣང་གཅིག་མཚུངས་དེ་ཚོར་འཇུག་འདོད་ཡོད་དམ།

བོད་མིའི་སློབ་གྲྭ་ཁག་འགྲིམས་མྱོང་བའི་བོད་མི་བཅུའི་ནང་ནས་དགུ་ཡིས་ངས་གང་བརྗོད་ཀྱི་ཡོད་པ་ལམ་སེང་གསལ་རྟོགས་ཐུབ་ངེས་ཡིན་པ་ངས་ཤེས། འདི་ནི་ཉུང་ཤས་ཤིག་མ་ཡིན་པར་ང་ཚོའི་གཅིག་གྱུར་གྱི་མྱོང་བ་ཞིག་ཡིན་ཞིང་། འདི་ནི་ང་ཚོས་ད་ནས་བཟུང་ཁ་བཙུམས་ཏེ་སྡོད་ཐབས་མེད་པའི་རྒྱུ་མཚན་ཁ་གསལ་ཞིག་ཀྱང་ཆགས་ཡོད།

ང་ཚོའི་སྤྱི་ཚོགས་ཀྱིས་བསྐྲུན་པའི་སློབ་གྲྭ་ཁག་ནི་བློས་གཏོང་དང་། འཆར་སྣང་། བརྩེ་བ་བཅས་དང་སྦྲགས་ཏེ་བསྐྲུན་པ་ཞིག་ཡིན་པས། སློབ་གྲྭ་དེ་དག་ནི་རང་ཉིད་ཀྱི་ཐོག་མའི་དམིགས་ཡུལ་དང་། རང་ཉིད་ཀྱི་དབུ་ཁྲིད། རང་ཉིད་ཀྱི་ལྟ་གྲུབ། རང་ཉིད་ཀྱི་་ཕྲུ་གུ་རྣམས་དང་དོ་མཉམ་པར་འཇུག་ཐུབ་པ་ཞིག་བྱ་དགོས།།

ཨིན་ཡིག་ཐོག་གཟིགས་འདོད་ཚེ་མ་རྩོམ་གྱི་སྦྲེལ་ཐག https://www.tibetanreview.net/the-stick-must-stop-ending-corporal-punishment-in-our-tibetan-schools/