རྒྱ་ནག་གི་རྒྱལ་སྲུང་བློན་ཆེན་ཟུར་པ་ཝེ་ཧྥིན་ཧི་དང་ལི་ཧྲང་ཧྥུ་གཉིས་ཀྱིས་ལྐོག་རྔན་འབོར་ཆེན་བླངས་པའི་ནག་ཉེས་འོག་ལོ་གཉིས་ཕར་འགྱང་གི་སྲོག་ཁྲིམས་བཅད་འདུག་ལ་ལོ་གཉིས་ཀྱི་རྗེས་སུ་ཚེ་བཙོན་དུ་འཇོག་འཆར་ཡོད་འདུག
ཁ་སང་ཕྱི་ཚེས་ ༧ ཉིན་རྒྱ་ནག་གི་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་དམག་དོན་ཁྲིམས་ཁང་གིས་རྒྱ་ནག་དབུས་དམག་དོན་ལྷན་ཁང་གི་རྒྱུན་ལས་ཟུར་པ་དང་། རྒྱལ་སྲིད་སྤྱི་ཁྱབ་ཁང་གི་རྒྱུན་ལས་ཟུར་པ་། རྒྱལ་སྲུང་བློན་ཆེན་ཟུར་པ་ཝེ་ཧྥིན་ཧི་(魏凤和)དང་ལི་ཧྲང་ཧྥུ་(李尚福)གཉིས་ཀྱིས། ལྐོག་རྔན་འབོར་ཆེན་བླངས་བའི་ནག་ཉེས་འོག་ལོ་གཉིས་ཕར་འགྱང་གིས་སྲོག་ཁྲིམས་བཅད་ཡོད་འདུག
ཁྲིམས་ཆད་སྐོར་ལ་རྒྱ་ནག་དམག་དོན་ཁྲིམས་ཁང་ཟེར་བས། ལོ་གཉིས་ཕར་འགྱང་གི་སྲོག་ཁྲིམས་བཅད་པའི་ཁར། ཆབ་སྲིད་ཀྱི་ཐོབ་ཐང་ཚེ་གང་ལ་འཕྲོག་པ་དང་། དེ་བཞིན་སྲོག་ཁྲིམས་ཕར་འགྱང་བྱས་པའི་ལོ་གཉིས་ཀྱི་དུས་ཡུན་རྫོགས་ཚང་རྗེས་ཚེ་བཙོན་དུ་འཇོག་རྒྱུ་ལས་ཁྲིམས་ཆད་གུ་ཡངས་དང་གློད་གྲོལ་གཏོང་རྒྱུ་མིན་ཚུལ་བསྒྲགས་འདུག
ཝི་ཧྥིན་ཧི་ནི་ཕྱི་ལོ་༡༩༥༤ ལོར་རྒྱ་ནག་ཧྲན་ཏུང་ཞིང་ཆེན་ལོའོ་ཆི་གྲོང་ཁྱེར་དུ་སྐྱེས་ཡོད་ཅིང་། ཕྱི་ལོ་ ༡༩༧༠ ལོར་རྒྱ་ནག་མི་མང་བཅིངས་གྲོལ་དམག་མི་ནང་ཞུགས། ཕྱི་ལོ་ ༡༩༧༢ ལོར་རྒྱ་ནག་དམར་ཤོག་ཚོགས་པའི་ནང་དུ་ཞུགས། ཕྱི་ལོ་ ༡༩༧༥ ལོར་རྒྱ་ནག་རྒྱལ་སྲུང་ཚན་རྩལ་ཁང་གི་འཕུར་མདེལ་ཆེན་མོའི་སློབ་གྲྭ་ཆེན་མོར་སློབ་ཞུགས་བྱས་ནས་འཕྲུལ་འཁོར་གྱི་ཆེད་ལས་སྦྱངས། ཕྱི་ལོ་ ༡༩༨༤ ལོར་མེ་ཤུགས་འཕུར་མདའི་ལག་རྩལ་སློབ་གྲྭ་ནས་མེ་ཤུགས་འཕུར་མདའ་གཉིས་པའི་དམག་དཔུང་གི་བཀོད་འདོམས་སློབ་གླིང་གི་བཀོད་འདོམས་སྡེ་ཚན་གྱི་ཆེད་སྦྱོང་འཛིན་གྲྭར་སློབ་སྦྱོང་བྱས། མེ་ཤུགས་འཕུར་མདའ་གཉིས་པའི་དམག་དཔུང་གི་བཀོད་འདོམས་སློབ་གླིང་གི་བཀོད་འདོམས་སྡེ་ཚན་ནས་སློབ་མཐར་ཕྱིན། ཕྱི་ལོ་ ༢༠༡༢ རྒྱ་ནག་མི་མང་བཅིངས་གྲོལ་དམག་གི་མེ་ཤུགས་འཕུར་མདའ་གཉིས་པའི་དམག་དཔུང་གི་སྤྱི་ཁྱབ་དཔོན་པོར་བསྐོས། ཕྱི་ལོ་ ༢༠༡༨ ལོའི་ཟླ་ ༣ ཚེས་ ༡༩ ཉིན་རྒྱ་ནག་རྒྱལ་སྲུང་བློན་ཆེན་དང་རྒྱལ་སྲིད་སློབ་སྟོན་པ་གཉིས་ཀར་བསྐོ་བཞག་བྱས། ཕྱི་ལོ་ ༢༠༢༣ ལོའི་ཟླ་ ༩ ཚེས་ ༢༡ ཉིན་རྒྱ་ནག་དབུས་དམག་དོན་ལྷན་ཁང་གི་སྒྲིག་ཁྲིམས་ཞིབ་བཤེར་ཁང་གིས་ཞིབ་བཤེར་བྱས། ཕྱི་ལོ་ ༢༠༢༤ ལོར་རྒྱ་ནག་དམར་ཤོག་ཚོགས་པའི་ཁོངས་ནས་ཕྱིར་འབུད་བྱས་ཡོད་འདུག
དེ་བཞིན་ལི་ཧྲང་ཧྥུ་ནི་ཕྱི་ལོ་༡༩༨༢ ལོར་རྒྱ་ནག་མི་མང་བཅིངས་གྲོལ་དམག་གི་རྒྱལ་སྲུང་ཚན་རིག་སློབ་ཆེན་ནས་བསླབ་མཐར་ཕྱིན། ཕྱི་ལོ་ ༢༠༠༣ ལོར་རྒྱ་ནག་འཁོར་སྐར་ཚན་རྩལ་ལྟེ་གནས་ཁང་གི་འགན་འཛིན་དུ་བསྐོས། ཕྱི་ལོ་ ༢༠༡༦ ལོར་རྒྱ་ནག་མི་མང་བཅིངས་འགྲོལ་དམག་གི་འཐབ་ཇུས་རྒྱབ་སྐྱོར་དཔུང་སྡེའི་དམག་དཔོན་དུ་བསྐོས། ཕྱི་ལོ་ ༢༠༡༧ ལོར་རྒྱ་ནག་དབུས་དམག་དོན་ལྷན་ཁང་གི་དམག་ཆས་འཕེལ་རྒྱས་སྡེ་ཁག་གི་འགན་འཛིན་དུ་བསྐོས། ཕྱི་ལོ་ ༢༠༡༨ ལོའི་ཟླ་ ༢ ཚེས་༢༤ ཉིན་སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མིར་བདམས། ཕྱི་ལོ་ ༢༠༢༢ ལོར་རྒྱ་ནག་དམར་ཤོག་ཚོགས་པའི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་དང་པོའི་འཐུས་མིར་བདམས། ཕྱི་ལོ་ ༢༠༢༣ ལོའི་ཟླ་ ༨ ཚེས་ ༣༡ ཉིན་རྒྱ་ནག་དབུས་དམག་དོན་ཁང་གི་སྒྲིག་ཁྲིམས་དང་ལྟ་ཞིབ་ཁང་གིས་ཞིབ་བཤེར་བྱས་ཡོད་འདུག
འདི་ལོའི་ཕྱི་ཟླ་ ༡ ཚེས་ ༢༥ ཉིན་རྒྱ་ནག་དབུས་དམག་དོན་ཁང་གིས་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་དང་། རྒྱ་ནག་དབུས་དམག་དོན་ལྷན་ཁང་གི་འགན་འཛིན་གཞིན་པ་ཀྲང་ཡུ་ཤཱ་（zhang you xia) དང་། རྒྱ་ནག་དབུས་ཆབ་སྲིད་ལྷན་ཁང་རྒྱུན་ལས་དང་། རྒྱ་ནག་དབུས་དམག་དོན་མཉམ་འབྲེལ་སློབ་སྟོན་ཁང་གི་འགན་འཛིན་ལུའུ་ཀྲིན་ལི་(Liu Zhenli) གཉིས་ཁྲིམས་སྒྲིག་དང་ཚབས་ཆེན་འགལ་བའི་ནག་ཉེས་འོག་ཞིབ་བཤེར་འོག་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
