རྒྱ་ནག་གཞུང་གིས་བོད་གཞིས་ཀ་རྩེ་རྣམ་གླིང་རྫོང་ཁོངས་ཀྱི་སློབ་གྲྭ་ ༡༡༠ ནང་ཁུང་ཙིའི་སློབ་གསོ་སློབ་ཁྲིད་ལག་བསྟར་བྱས་ཡོད་ཅིང་། དེ་ནི་ཡོངས་གྲགས་ཀྱི་ཐོག་ནས་བོད་ནང་དུ་ཁུང་ཙིའི་སློབ་གསོ་རྒྱ་ཁྱབ་ཏུ་སྤེལ་བ་ཐོག་མར་གྱུར།
རྒྱ་ནག་གཞུང་གིས་ཀྲུང་ཧཱ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གཞུང་རྒྱུན་འཛིན་དང་དར་སྤེལ་བྱས་ཏེ་རྒྱལ་ཁབ་ཀྱི་མཐུན་སྒྲིལ་སྲ་བརྟན་དུ་གཏོང་བ་ཟེར་བའི་མིང་འོག་ནས་བོད་གཞིས་ཀ་རྩེ་རྣམ་གླིང་རྫོང་ཁོངས་ཀྱི་སློབ་གྲྭ་ ༡༡༠ དང་ལས་ཁུངས་ ༤༥ ་ནང་དུ་ཁུང་ཙིའི་སློབ་གསོ་དར་སྤེལ་གྱི་སྲིད་ཇུས་ལག་བསྟར་རྒྱ་ཆེར་བྱེད་བཞིན་འདུག་ལ། སྲིད་ཇུས་དེ་ནི་བོད་པའི་བྱིས་པ་རྣམས་རང་གི་སྐད་ཡིག་དང་ཤེས་ཡོན་སློབ་གསོ་ལས་ཁ་བྲལ་གཏོང་ཐབས་ཤིག་ཡིན་པ་མངོན་གསལ་ཆགས་ཡོད།
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། རྒྱ་ནག་གཞུང་གིས་བོད་གཞིས་ཀ་རྩེའི་ནང་ཁུང་ཙིའི་སློབ་གླིང་བཙུགས་དོན་ནི་ཀྲུང་ཧཱ་མི་རིགས་ཀྱི་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་། མི་རིགས་མཐུན་སྒྲིལ་ཡར་སྐུལ་ཆེད་བཙུགས་པ་ཡིན་ཟེར་གྱི་ཡོད། ད་སྔ་བར་རྣམ་གླིང་རྫོང་མ་གཏོགས་བོད་ཀྱི་ས་ཁུལ་གཞན་དུ་ཁུང་ཙིའི་སློབ་གླིང་བཙུགས་མི་འདུག ཅེས་བརྗོད་སོང་ལ། མ་འོངས་པར་བོད་ཀྱི་རྒྱལ་ས་ལྷ་ས་དང་མདོ་སྟོད་སྨད་གཉིས་ཀྱི་ནང་དུ་ཁུང་ཙེའི་སློབ་གསོ་ལག་བསྟར་བྱེད་སྲིད་པའི་སེམས་འཚབ་བསྟན་སོང་།
རྒྱ་ནག་གཞུང་འབྲེལ་གྱི་གནས་ཚུལ་ལྟར་ན། རྣམ་གླིང་རྫོང་དུ་ཁུང་ཙིའི་སློབ་གླིང་བཙུགས་པ་དེས། བོད་ལྗོངས་ཀྱི་སློབ་གསོའི་བྱ་གཞག་སྤུས་ཚད་མཐོ་རུ་གཏོང་བ་དང་། མི་རིགས་མཐུན་སྒྲིལ་ཡར་རྒྱས་གཏོང་བའི་བྱ་གཞག་ཟབ་སྤེལ་གཏོང་བའི་མཚོན་བྱེད་ཅིག་ཡིན་ཟེར་བ་དང་། ལྷག་པར་དུ་སློབ་གླིང་དེ་དག་བོད་པའི་བྱིས་པ་རྣམས་ལ་རྒྱའི་རིག་གནས་ཀྱི་ཚོར་བ་དང་། རྒྱ་མི་རིགས་ཀྱི་ཐུན་མོང་གི་ངོས་འཛིན་བརྟན་པོ་བཟོ་བའི་རྨང་གཞི་འདིང་བྱེད་དུ་བེད་སྤྱོད་གཏོང་གི་ཡོད་འདུག
ཕྱི་ལོ་ ༢༠༢༡ ལོ་ནས་བཟུང་། རྣམ་གླིང་རྫོང་གིས་ལོ་རེ་བཞིན་བོད་པའི་སློབ་མ་ཚོ་དང་དགེ་རྒན་རྣམས་རྒྱ་ནག་ཧྲན་ཏུང་དུ་རིག་གཞུང་བརྗེ་རེས་ཟེར་བ་དང་སློབ་སྦྱོང་བྱེད་པར་གཏོང་མགོ་བཙུགས་ཡོད་ཅིང་། དེ་དང་ཆབས་ཅིག་ཏུ་ཧྲན་ཏུང་གི་ཉེ་འཁྲིས་ཆིང་ཏའོ་དང་། ཅི་ནན། ཝེ་ཧྥང་། ཙི་པོ། ཆུ་ཧྥུ་ས་གནས་སོགས་སུ་འཁྲིད་ཀྱི་ཡོད་འདུག
ཁུང་ཙིའི་སློབ་གླིང་དེ་དག་གི་ནང་དུ་བོད་པའི་སློབ་ཕྲུག་ཚོར་རྒྱའི་གནའ་བོའི་སྙན་ངག་དང་ཞབས་བྲོ། ཡིག་གཟུགས། སྲོལ་རྒྱུན་ལག་ཤེས་སོགས་སློབ་ཚན་མི་འདྲ་བ་ ༢༨ བཀོད་སྒྲིག་བྱས་ཏེ། བོད་པའི་ཞིང་འབྲོག་ཁུལ་གྱི་བྱིས་པ་ཚོར་བྱམས་པ་དང་། དྲང་བདེན། གུས་ཞབས། ཤེས་རབ། དད་པ་བཅས་ཀྱི་རིག་གནས་མྱོང་དུ་འཇུག་གི་ཡོད་ཚུལ་བསྒྲགས་འདུག་ནའང་། ལོ་ངོ་སྟོང་ཕྲག་གི་ལོ་རྒྱུས་ལྡན་པའི་བོད་མི་རིགས་ལ་རྒྱ་མི་རིགས་དང་ལྷག་པར་དུ་རྒྱ་ནག་དམར་ཤོག་ཚོགས་པས་བྱམས་པ་དང་གུས་ཞབས། དད་མོས་སོགས་སློབ་ཁྲིད་བྱེད་ཀྱིན་ཡོད་ཟེར་བ་ནི་འཇིག་རྟེན་གོ་ལྡོག་གི་གནས་ལུགས་ལས་མ་འདས་པ་བརྗོད་མི་དགོས་པ་ཞིག་ཏུ་གྱུར་ཡོད།
རྣམ་གླིང་རྫོང་ཁོངས་ཀྱི་སློབ་གྲྭ་ཁག་ཏུ་ཁུང་ཙིའི་སློབ་གསོ་ལག་བསྟར་འཁྲིད་བཞིན་པ་འདི་ནི། ད་སྔ་བར་ཡོངས་གྲགས་ཀྱི་ཐོག་ནས་བོད་ནང་དུ་ཁུང་ཙིའི་སློབ་གསོ་ཁྱབ་རྒྱ་ཆེན་པོ་སྤེལ་བཞིན་པ་ཐོག་མར་གྱུར་ཡོད་ཅིང་། རྒྱ་ནག་གཞུང་གིས་ཕྱིའི་རྒྱལ་ཁབ་ཁག་ཏུ་ཁུང་ཙིའི་སློབ་གསོ་ལྟེ་གནས་ཁང་བརྒྱུད་ནས་དམར་ཤོག་ཚོགས་པའི་ལྟ་གྲུབ་དང་ཆབ་སྲིད་ཁྱབ་སྤེལ་དང་རྒྱ་བསྐྱེད་ཀྱི་ལག་ཆར་བཀོལ་སྤྱོད་བྱས་པར་བརྟེན། ཨ་རི་སོགས་ནུབ་ཕྱོགས་རྒྱལ་ཁབ་མང་པོས་རྒྱལ་སྲིད་བདེ་འཇགས་དང་སློབ་གསོའི་རང་དབང་སོགས་ལ་ཉེན་ཁ་ཆེ་བའི་ངོས་འཛིན་འོག ད་སྔ་བར་ཨ་རིར་ཡོད་པའི་ཁུང་ཙི་ལྟ་གནས་ཁང་ ༡༡༨ ལས་ ༡༠༤ སྒོ་བརྒྱབ་ཡོད་ཅིང་། དེ་བཞིན། འཇར་མན་དང་ཨོ་གླིང་སོགས་ནུབ་ཕྱོགས་རྒྱལ་ཁབ་མང་པོས་འདས་པའི་ལོ་ཟླའི་ནང་རིམ་བཞིན་ཁུང་ཙི་ལྟེ་གནས་ཁང་མང་པོ་སྒོ་བརྒྱབ་ཡོད། རྒྱ་ནག་གཞུང་ཕྱོགས་ཀྱི་གྲངས་ཐོ་ལྟར་ན། འདས་པའི་ལོ་ཤས་ནང་ཕྱིའི་རྒྱལ་ཁབ་ ༡༦༠ ཡི་སློབ་ཆེན་དང་མཐོ་སློབ་ཁག་ནང་ཁུང་ཙི་ལྟེ་གནས་ཁང་ ༥༠༠ ལྷག་མཉམ་འབྲེལ་འཛུགས་སྐྲུན་དང་ཁུང་ཙི་སློབ་ཆུང་ཟེར་བ་ ༡༡༧༢ བཙུགས་ཡོད་པ་དང་། ད་ལྟའི་བར་སློབ་གྲྭ་དེ་དག་ནང་སློབ་གཉེར་བ་ཁྲི་ ༩༡༦ དང་། མི་གྲངས་ཁྲི་ ༡ ལྷག་གིས་ཁུང་ཙི་རིག་གནས་ལ་དང་ལེན་བྱས་ཡོད་སྐོར་སོགས་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
