བོད་མཚོ་སྔོན་ཞིང་ཆེན་གྱི་མཚོ་ནུབ་སོག་རིགས་བོད་རིགས་རང་སྐྱོང་ཁུལ་དུ་ས་ཡོམ་ཚད་རིམ་ ༦།༣ བྱུང་སྟེ་མི་གྲངས་ ༡ རྐྱེན་འདས་དང་མི་གྲངས་ ༤ ལ་རྨས་སྐྱོན་ཕོག་འདུག
དེ་རིང་བོད་ནང་གི་ཕྱི་དྲོའི་ཆུ་ཚོད་ ༥།༠༦ ཙམ་ལ་བོད་མདོ་སྨད་མཚོ་སྔོན་ཞིང་ཆེན་གྱི་མཚོ་ནུབ་སོག་རིགས་བོད་རིགས་རང་སྐྱོང་ཁུལ་དུ་ས་ཡོམ་ཚད་རིམ་ ༦།༣ བྱུང་ཡོད་ཅིང་། ས་ཡོམ་དེའི་གཏིང་ཚད་ཀི་ལོ་མི་ཊར་ ༡༠ ཙམ་ཡིན་འདུག བོད་ནང་གི་ས་ཡོམ་གྱི་གོད་ཆག་དང་འབྲེལ་ནས་སིང་གྷ་པོར་དུ་རྟེན་གཞི་བྱས་པའི་ (The Straits Times) གསར་ཁང་གིས་གནས་ཚུལ་སྤེལ་བ་ལྟར་ན། ད་ལྟའི་ཆར་མི་གྲངས་ ༡ རྐྱེན་འདས་དང་མི་གྲངས་ ༤ ལ་རྨས་སྐྱོན་ཕོག་པའི་གནས་ཚུལ་ཐོན་འདུག
འདི་ལོའི་ཕྱི་ཟླ་ ༥ ཚེས ༢༨ ཉིན་གྱི་ཆུ་ཚོད་ ༡༠།༣༧ སྟེང་མཚོ་སྔོན་ཞིང་ཆེན་གྱི་ཡུལ་ཤུལ་གྲོང་ཁྱེར་དུ་ས་ཡོམ་ཚད་རིམ་ ༤།༠ བྱུང་ཡོད་ཅིང་། ས་ཡོམ་དེའི་གཏིང་ཚད་ ༡༠ ཡིན་པ་རེད། ད་དུང་ཕྱི་ཟླ་ ༦ ཚེས་ ༨ ཉིན་གྱི་ཞོགས་པའི་ཆུ་ཚོད་ ༥།༠༧ ཐོག་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དར་རྩེ་མདོ་རུ་ས་ཡོམ་ཚད་རིམ་ ༤།༥ ཅན་བྱུང་བ་དང་། ས་ཡོམ་དེའི་གཏིང་ཚད་ཀི་ལོ་མི་ཊར་ ༡༠ ཡིན་འདུག
ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་གྱི་ཞོགས་པའི་ཆུ་ཚོད་ ༧།༤༩ ཐོག་བོད་སྐྱེ་དགུ་མདོར་ས་ཡོམ་ཚད་རིམ་ ༧།༡ ཅན་ཞིག་བྱུང་སྟེ། མི་གྲངས་ ༤༠༠ རྐྱེན་འདས་དང་མི་གྲངས་ ༨༠༠༠ ལ་རྨས་སྐྱོན་ཕོག་པའི་གནས་ཚུལ་བྱུང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
