ཁ་སང་བོད་མཚོ་ནུབ་ཁུལ་གྱི་ཚ་འདམ་གྲོང་རྡལ་ཁོངས་སུ་ས་ཡོམ་ཚད་རིམ་ ༦།༣ བྱུང་སྟེ་མི་གཅིག་རྐྱེན་འདས་དང་མི་བརྒྱད་ལ་རྨས་སྐྱོན་ཕོག་ཡོད་ཅིང་། ཁང་པ་དང་བགྲོད་ལམ་སོགས་ལ་གཏོར་བཤིག་ཐེབས་པའི་བརྙན་རིས་དྲ་ལམ་དུ་མཐོང་རྒྱུ་འདུག་ནའང་། རྒྱ་ནག་གཞུང་གིས་བོད་ནང་དུ་བྱུང་བའི་གནས་ཚུལ་ཅི་རིགས་ལ་དོགས་ཟོན་དང་དམ་དྲག་ནན་པོ་བྱེད་བཞིན་ཡོད་སྟབས། ད་སྔ་བར་ཐེངས་འདིའི་ས་ཡོམ་ཁྲོད་དངོས་ཡོད་གནས་སྟངས་ཅི་ཆགས་ཤེས་རྟོགས་ཐུབ་ཁག་པོར་གྱུར་འདུག
ཁ་སང་ཕྱི་ཚེས་ ༡༦ ཉིན་བོད་ནང་གི་ཕྱི་དྲོའི་ཆུ་ཚོད་ ༥།༠༦ ཐོག་མདོ་སྨད་མཚོ་སྔོན་མཚོ་ནུབ་ཁུལ་ཚྭ་འདམ་ཆེ་བ་གྲོང་རྡལ་གྱི་ཁོངས་སུ་ས་ཡོམ་ཚད་རིམ་ ༦།༣ ཅན་བྱུང་ཡོད་ཅིང་། བརྙན་ལམ་ནས་ཚྭ་འདམ་ཆེ་བ་གྲོང་རྡལ་གྱི་ཁང་པར་སེར་ག་གས་པ་དང་། ཚོང་རའི་ནང་གི་ཅ་དངོས་མར་ལྷུང་སྟེ་འགུལ་ཤུགས་ཆེན་པོ་ཡོད་པ་མངོན་གསལ་རེད་འདུག་ལ། གཏེར་ཁ་གྲོང་ཁྱེར་དང་བོང་སྟག པཎ་ཆེན་ཤིང་སྡེ་ས་ཁུལ་སོགས་སུ་ས་འགུལ་གྱི་ཚོར་ཤུགས་ཆེན་པོ་བྱུང་ཡོད་ཀྱང་། ཁུལ་དེ་དག་ཏུ་གནོད་འཚེ་ཕོག་མེད་སྐོར་རྗོད་ཀྱིན་འདུག
ད་ལན་གྱི་ས་ཡོམ་རྒྱག་སའི་ལྟེ་བའི་སྤྱི་ལེ་ ༥ ཡི་ཁྱབ་ཁོངས་ནང་ཆ་སྙོམས་ས་བབ་མཐོ་ཚད་རྒྱ་མཚོའི་ངོས་ལས་སྨི་ ༤༢༧༢ དང་། མཐའ་འཁོར་གྱི་སྤྱི་ལེ་ ༥ ཡི་ནང་གནས་པའི་གྲོང་ཚོའི་གྲས་སུ་ལུག་མགོ་ཆེ་ལུང་པ་དང་། སྤྱི་ལེ་ ༢༠ ཡི་ནང་གནས་པའི་ཤང་དང་གྲོང་རྡལ་ནང་ཚྭ་འདམ་གྲོང་རྡལ་ཡོད་པ་རེད།
རྒྱ་ནག་གཞུང་འབྲེལ་གྱི་གསར་ཁང་ (CGTN) གིས་སྤེལ་བའི་གནས་ཚུལ་ནང་། ཐེངས་འདིའི་གོད་ཆག་ཁྲོད་ཁ་སང་དགོང་མོའི་ཆུ་ཚོད་ ༡༡ བར་མི་གྲངས་ ༡ རྐྱེན་ལམ་ཤོར་བ་དང་། མི་གྲངས་ ༨ ལ་རྨས་སྐྱོན་ཕོག་ཡོད་འདུག་ལ། ཁུལ་དེར་ཡོད་པའི་སློབ་ཆུང་དང་སློབ་འབྲིང་། བྱིས་བཅོལ་ཁང་དུ་ཡོད་པའི་བྱིས་པ་དང་། སློབ་མ། དགེ་རྒན་སོགས་མི་གྲངས་སྟོང་ཕྲག་མང་པོ་ཞིག་གནས་སྐབས་རིང་ས་གནས་གཞན་དུ་གནས་སྤོ་བྱས་ཏེ་དགོས་ངེས་མཐུན་རྐྱེན་ཁག་མཁོ་སྤྲོད་བྱས་པ་མ་ཟད། གནོད་ཐེབས་ས་ཁུལ་དུ་ཛ་དྲག་མྱུར་སྐྱོབ་ཚན་པའི་མི་གྲངས་ ༡༠༠༠ ལྷག་དང་རླངས་འཁོར་ ༢༠༠ ཙམ་ཆེད་གཏོང་གིས་མྱུར་སྐྱོབ་ཀྱི་ལས་གཞི་སྤེལ་ཡོད་ཚུལ་སོགས་བརྗོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
