སེན་ཊི་པོལ་གྲོང་ཁྱེར་དུ་༸སྐུའི་འཁྲུངས་སྐར་བྱམས་བརྩེའི་ཉིན་མོར་སྲུང་གཙི་ཞུ་རྒྱུའི་གཏན་འབེབས་གནང་།

ཨ་རིའི་མི་ནི་སོ་ཊ་མངའ་སྡེའི་སེན་ཊི་པོལ་གྲོང་ཁྱེར་གྱིས་༧གོང་ས་མཆོག་གི་སྐུ་ཚེ་ཧྲིལ་པོ་ཞི་བདེ་དང་བྱམས་བརྩེ། འཚེ་བ་མེད་པ་སོགས་རླབས་ཆེན་གྱི་མཛད་འཕྲིན་ལ་ཆེ་བསྟོད་ངོས་འཛིན་སླད་༧སྐུའི་འཁྲུངས་སྐར་ཉིན་མོ་དེ་བྱམས་བརྩེ་ཉིན་མོར་གཏན་འབེབས་གནང་འདུག

ཁ་སང་ཕྱི་ཚེས་ ༢༤ ཉིན་ཨ་རིའི་མི་ནི་སོ་ཊ་མངའ་སྡེའི་སེན་ཊི་པོལ་ (Saint Paul) གྲོང་ཁྱེར་གྱིས་༸གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་འཁྲུངས་སྐར་ཕྱི་ཟླ་ ༧ ཚེས་ ༦ ཉིན་༸མགོན་པོ་གང་ཉིད་མཆོག་གིས་སྐུ་ཚེ་ཧྲིལ་པོར་ཞི་བདེ་དང་བྱམས་བརྩེ། འཚེ་བ་མེད་པ། མིའི་རིན་ཐང་གི་ཆེད་དུ་རླབས་ཆེན་གྱི་མཛད་འཕྲིན་རྒྱ་ཆེན་བསྐྱངས་པར་ངོས་འཛིན་དང་ཆེ་བསྟོད་ཞུ་རྒྱུའི་གྲོས་ཆོད་བཞག་སྟེ། ཕྱི་ཟླ་ ༧ ཚེས་ ༦ ཉིན་ནི་བྱམས་བརྩེའི་ཉིན་མོར་གཏན་འབེབས་ཞུས་འདུག་ལ། སེན་ཊི་པོལ་གྲོང་ཁྱེར་ལྷན་ཚོགས་ (Saint Paul City Council) ཀྱིས་བསླེབ་ལ་ཉེ་བའི་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༡ ལ་ཕེབས་པའི་སྐུའི་འཁྲུངས་སྐར་སྲུང་གཙི་ཞུ་རྒྱུ་དང་། སེན་ཊི་པོལ་བོད་རིགས་སྤྱི་མཐུན་ཚོགས་པའི་སྤྱི་ཚོགས་ཞབས་འདེགས་ལ་ངོས་འཛིན་གནང་རྒྱུ་ཡིན་འདུག

གཏན་འབེབས་བྱུང་བའི་གྲོས་ཆོད་དེའི་ནང་༧གོང་ས་མཆོག་གི་མཛད་རྣམ་སྙིང་བསྡུས་ཤིག་བྲིས་པ་ལྟར་ན། བོད་པའི་ནང་པ་རྣམས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་ནི་བོད་ཀྱི་བླ་ན་མེད་པའི་དབུ་ཁྲིད་དང་། འཕགས་པ་སྤྱན་རས་གཟིགས་ཀྱི་རྣམ་སྤྲུལ་ལ་ངོས་འཛིན་བྱེད་ཀྱི་ཡོད། ཁོང་ནི་བོད་བརྒྱུད་ནང་བསྟན་གྱི་ཆོས་ལུགས་ཀྱི་དབུ་ཁྲིད་ཅིག་རེད། ༸རྒྱལ་དབང་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་གིས་ཞི་བདེ་དང་། བྱམས་བརྩེ། འཚེ་མེད་ཞི་བའི་སྐོར་གྱི་བཀའ་སློབ་བསྩལ་བར་འཛམ་གླིང་ཁྱོན་ཡོངས་སུ་ངོས་འཛིན་ཐོབ། ༸མགོན་པོ་གང་ཉིད་མཆོག་ནི་དགུང་ལོ་ཆུང་དུས་ནས་༸རྒྱལ་དབང་སྐུ་ཕྲེང་བཅུ་གསུམ་པའི་ཡང་སྲིད་དུ་ངོས་འཛིན་གནང་སྟེ། སྐུ་ཚེ་གང་པོར་ནང་ཆོས་ཀྱི་ལྟ་གྲུབ་སློབ་གཉེར་དང་ལག་ལེན་གནང་ནས་བྱམས་བརྩེ་དང་ཆོས་ལུགས་ཕན་ཚུན་བར་གྱི་འབྲེལ་ལམ་ཡར་རྒྱས་དང་། ཕན་ཚུན་བརྩི་འཇོག་གོང་འཕེལ་གནང་རྒྱུའི་མཛད་འཕྲིན་བསྐྱངས་ཡོད་པ་རེད། ཕྱི་ལོ་ ༡༩༥༠ ལོར་རྒྱ་ནག་གཞུང་གིས་བོད་ལ་བཙན་འཛུལ་བྱས་པ་དང་། ཕྱི་ལོ་ ༡༩༥༩ ལོར་བོད་ནང་སྒེར་ལངས་བྱུང་རྗེས་༸གོང་ས་མཆོག་བཙན་བྱོལ་དུ་བྲོས་བྱོལ་ལ་ཕེབས་པ་ནས་བཟུང་བོད་མིའི་རིག་གཞུང་དང་། ཆོས་ལུགས། ལོ་རྒྱུས་སོགས་མི་ཉམས་གོང་འཕེལ་དང་ཉམས་པ་སོར་ཆུད་ཀྱི་ཆེད་དུ་མཛད་འཕྲིན་རྒྱ་ཆེན་བསྐྱངས་དང་སྐྱོང་མུས་རེད། ད་དུང་༸མགོན་པོ་གང་ཉིད་ཀྱིས་མི་ནི་སོ་ཊ་ཚུད་པའི་འཛམ་གླིང་ས་ཕྱོགས་གང་སར་ཆིབས་བསྒྱུར་གྱིས་ཆོས་དད་ཡོད་མེད་ལ་མ་ལྟོས་པར་མང་ཚོགས་ལ་བྱམས་བརྩེ། ཞི་བདེ། བཟོད་སྒོམ་སོགས་དང་འབྲེལ་ནས་བཀའ་སློབ་བསྩལ་བ་སོགས་རླབས་ཆེན་གྱི་མཛད་འཕྲིན་བསྐྱངས། ཕྱི་ལོ་ ༡༩༨༩ ལོར་ཁོང་ཉིད་ལ་ནོ་སྦེལ་ཞི་བདེའི་གཟེངས་རྟགས་ཐོབ།

༸གོང་ས་མཆོག་གི་ཆོས་ལུགས་ལ་མ་བརྟེན་པའི་བཟང་སྤྱོད་དང་། བྱམས་བརྩེ།  སེམས་ཚོར་གདོང་ལེན་ (emotional resilience) གནང་ཕྱོགས་སྐོར་སོགས་དང་འབྲེལ་བའི་བཀའ་སློབ་དང་ལམ་སྟོན་གནང་སྟེ་འཛམ་གླིང་ཡོངས་ཀྱི་ཤེས་ཡོན་པ་དང་། ཆོས་ལུགས་ཉམས་ལེན་པ། རྒྱལ་ཁབ་ཀྱི་མགོ་ཁྲིད་རྣམས་ལ་ཤུགས་རྐྱེན་ཐེབས་ཡོད་ལ། བོད་མི་ལྔ་སྟོང་ལྷག་ཙམ་གྱིས་མི་ནི་སོ་ཊ་རང་གི་ཁྱིམ་དུ་རྩིས་ནས་སྤྱི་ཚོགས་དང་རིག་གཞུང་། དཔལ་འབྱོར་སོགས་ཀྱི་ཐོག་ནས་ཞབས་འདེགས་ཞུས་ནས་ཕན་ཐོགས་ཀྱི་ཡོད་ལ། ཕྱི་ལོ་ ༢༠༠༣ ནས་བཟུང་སེན་ཊི་པོལ་དུ་ཡོད་པའི་ལུགས་གཉིས་ཕུན་ཚོགས་ཁང་ཞེས་པའི་བོད་མིའི་ཚོགས་ཁང་ཞིག་གསར་འཛུགས་ཀྱིས། ཁུལ་དེར་གནས་སྡོད་བོད་མི་རྣམས་ལ་བོད་ཀྱི་སྐད་ཡིག་དང་། རིག་གཞུང་སྲུང་སྐྱོབ་དང་ཉར་ཚགས་ཀྱི་ཆེད་དུ་ལྟེ་གནས་ཤིག་མཁོ་སྐྲུན་བྱས་ཡོད་པ་མ་ཟད། ཚོགས་ཁང་དེ་ནི་བོད་ཀྱི་སྲོལ་རྒྱུན་རིག་གཞུང་དང་དུས་ཆེན་ཁག་གི་ཆེད་དུ་འཛོམས་འཛོམས་བྱ་ཡུལ་ཞིག་ཆགས་ཀྱི་ཡོད། ཕྱི་ལོ་ ༢༠༢༦ ཟླ་ ༧ ཚེས་ ༦ ཉིན་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༡ ལ་བཞེས་པའི་༸སྐུའི་འཁྲུངས་སྐར་ཉིན་མོ་དང་བསྟུན། ༸མགོན་པོ་གང་ཉིད་ཀྱིས་སྐུ་ཚེ་གང་པོར་ཞི་བདེ་དང་བྱམས་བརྩེའི་ཆེད་དུ་མཛད་འཕྲིན་བསྐྱངས་དང་སྐྱོང་མུས་ཡིན་པར་ངོས་འཛིན་དང་ཆེ་བསྟོད་མཚོན་ཆེད། སེན་ཊི་པོལ་གྲོང་ཁྱེར་གྱི་གྲོས་ཚོགས་ནས་ཕྱི་ལོ་ ༢༠༢༦ ཟླ་ ༧ ཚེས་ ༦ ཉིན་ནི་སེན་ཊི་པོལ་གྲོང་ཁྱེར་དུ་བྱམས་བརྩེའི་ཉིན་མོར་སྲུང་གཙི་ཞུ་རྒྱུའི་གྲོས་ཆོད་གཏན་འབེབས་གནང་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།