ཀོ་ཝན་ཀོའུ་ལ་མི་ལོ་སུམ་ཅུ་ཡི་བཙོན་འཇུག་ཁྲིམས་ཐག་བཅད།

རྒྱ་རིགས་ཚོང་པ་ཆེན་པོ་ཀོ་ཝན་ཀོའུ་ཡིས་ཨ་སྒོར་ཐེར་འབུམ་ ༡ ལྷག་གཡོ་ལེན་བྱས་པའི་ནག་ཉེས་འོག་མི་ལོ་སུམ་ཅུ་ཡི་བཙོན་འཇུག་ཁྲིམས་ཐག་བཅད་འདུག

དེ་རིང་ཨ་རིའི་ཆེས་མཐོའི་ཁྲིམས་ཞིབ་ཁང་གིས་ཨ་རིའི་ཕོ་བྲང་དཀར་པོའི་ཇུས་འགོད་སློབ་སྟོན་པ་ཟུར་པ་སི་ཊི་ཝི་བྷ་ནོ་ (Steve Bannon) དང་འབྲེལ་བ་ཡོད་པ་དང་། ཨ་རིར་བྲོས་བྱོལ་དུ་ཡོང་བའི་རྒྱ་རིགས་ཚོང་པ་ཆེན་པོ་ཀོ་ཝན་ཀོའུ་ (Guo Wengui) ཡིས་ཁོ་རང་གི་ཚོང་ལས་ལ་མ་འཛུགས་བྱེད་མཁན་ཚོར་དངུལ་འབོར་ཆེན་པོ་ཐོབ་ཀྱི་ཡོད་ལུགས་བཤད་དེ། མི་མང་སྟོང་ཕྲག་ཁ་ཤས་ལ་མགོ་སྐོར་བཏང་སྟེ་ཨ་སྒོར་ཐེར་འབུམ་ ༡ ལྷག་གཡོ་ལེན་བྱས་པའི་ཉེས་ནག་འོག་འཛིན་བཟུང་གིས་མི་ལོ་ ༣༠ ཡི་བཙོན་འཇུག་ཁྲིམས་ཐག་བཅད་འདུག

གནད་དོན་དེ་དང་འབྲེལ་ནས། ནེའུ་ཡོག་ཁྲིམས་ཁང་གི་ཁྲིམས་དཔོན་ཨེ་ནེ་ལི་ས་ཊོར་རེ་སི་(Analisa Torres) ཡིས། ཀོ་ཝན་གྱིས་རྒྱ་ནག་གི་དམངས་གཙོ་དོན་གཉེར་བ་རྣམས་ཀྱི་ལག་ནས་དངུལ་སྒོར་གཡོ་ལེན་བྱས་ཏེ། རྒྱས་སྤྲོ་ལྡན་པའི་མི་ཚེ་རོལ་གྱི་ཡོད། ཅེས་དང་། ཨ་རིའི་ཁྲིམས་རྩོད་པ་ཤཱན་ཨེསི་བྷག་ལི་(Buckley ) ཡིས་དེ་རིང་གི་ཁྲིམས་ཐག་གཅོད་དོན་འདིས་མིང་གྲགས་དང་རྒྱུ་ནོར་གྱིས་ཁྲིམས་ལས་བརྒལ་མི་ནུས་ཤིང་། ཕལ་བའི་མི་ཚང་ལ་གནོད་འཚེ་བཏང་ནས་རང་ཉིད་ཕྱུག་པོར་བསྒྱུར་བའི་མགོ་སྐོར་གཏོང་མཁན་ཚོར་མཇུག་འབྲས་ཚབས་ཆེན་འཕྲད་རྒྱུ་ཡིན་པ་བསྟན་ཡོད། ཅེས་བརྗོད་འདུག

ཕྱི་ལོ་ ༢༠༢༣ ལོར་ཨ་རིའི་ཁྲིམས་འཛིན་ལྷན་ཁང་ (Justice Department) གིས།  རྒྱ་རིགས་ཚོང་པ་ཀོ་ཝན་ཀོའུ་ལ་ (Miles Guo) དང་ (Ho Wan Kwok) ཟེར་བའི་མིང་མི་འདྲ་བ་གསུམ་ཡོད་པ་དང་། ཀོ་ཝན་ཀོའུ་ཡིས་དཔལ་འབྱོར་སློབ་སྟོན་པ་ཀིན་མིང་རྗེ་ (Kin Ming Je) ཡི་རོགས་རམ་བརྒྱུད། དྲ་རྒྱ་དང་དེའི་བདེ་འཇགས་དང་དངུལ་ཁང་སོགས་ལ་མགོ་སྐོར་བཏང་སྟེ་དངུལ་གཡོ་ལེན་བྱས་ཡོད་པར་བརྟེན། ཨ་རིའི་གཞུང་གིས་ཁོའི་ལས་རོགས་ཀིན་མིང་རྗེའང་འཛིན་བཟུང་བྱས། ཁོས་ཚོང་ལས་ལ་མ་འཛུགས་བྱས་ཡོད་པའི་དངུལ་དེ་ནས་ཨ་སྒོར་ས་ཡ་ ༣༧ གྱི་གྲུ་ཆུང་ (Yacht) དང་། ཁོ་རང་གི་བུ་ལ་ཨ་སྒོར་ས་ཡ་ ༣།༥ ཡི་མོ་ཊ་ (Ferrari)། དེ་བཞིན་ཨ་སྒོར་སྟོང་ཕྲག་ ༣༦ གི་གདན་གཉིས་དང་། ཨ་སྒོར་སྟོང་ཕྲག་ ༦༢ ཅན་གྱི་བརྙན་འཕྲིན། ཕི་ཊི་གྲུ་བཞི་མ་ ༥༠,༠༠༠ ཡི་ཁང་པ་བཅས་ཉོས་འདུག

ཕྱི་ལོ་ ༢༠༡༨ ནས་ ༢༠༢༠ བར་དུ་ཀོ་ཝན་ཀོའུ་དང་ཨ་རིའི་ཕོ་བྲང་དཀར་པོའི་ཇུས་འགོད་སློབ་སྟོན་པ་སི་ཊི་ཝི་བྷོ་ནོན་ (Steve Banon) གཉིས་ཀྱིས་ (G News) དང་ (GTV Media Group) ཟེར་བའི་གསར་ཁང་གཉིས་བཙུགས་པ་དང་། ཕྱི་ལོ་ ༢༠༢༡ ལོར་ཚོང་དོན་ཆེད་ཁྲིམས་འགལ་གྱི་ཐོག་ནས་མ་དངུལ་མཁོ་སྒྲུབ་བྱས་རྐྱེན་ཨ་སྒོར་ས་ཡ་ ༥༣༩ ཆད་པ་སྤྲད་དགོས་བྱུང་བ་དང་། ཕྱི་ལོ་ ༢༠༡༤ ལོའི་ལོ་མཇུག་ཏུ་རྒྱ་ནག་ནས་ཨ་རིར་བྲོས་བྱོལ་དུ་ཕྱིན། རྒྱ་ནག་གི་དཔོན་རིགས་ཚོས་ཀོ་ཝན་ཀེའུ་ལ་བཙན་གཡེམ་དང་བཙན་ཁྲིད། ལྐོག་རྔན་སོགས་སྤྲད་པའི་སྐྱོན་འཛུགས་བྱེད་སྐབས། ཁོས་རྒྱ་ནག་གཞུང་གིས་སྐྱོན་འཛུགས་ཁག་ལ་ངོས་ལེན་རྩ་བ་ནས་བྱས་མེད་པ་མ་ཟད། ཁོས་ཞི་ཅིན་ཕིན་གྱི་གཙོས་རྒྱ་ནག་དམར་ཤོག་གཞུང་གི་མགོ་ཁྲིད་ཚོའི་བྱ་སྤྱོད་ངན་པའི་རིགས་ཐེར་འདོན་དང་ངོ་རྒོལ་གྱི་ལས་འགུལ་རབ་དང་རིམ་པ་མང་པོ་སྤེལ་ཡོད་པ་རེད།

ཕྱི་ལོ་ ༢༠༢༠ ལོར་ཨ་རིར་བྲོས་བྱོལ་དུ་ཡོང་བའི་རྒྱ་རིགས་ཚོང་པ་ཆེན་པོ་ཀོ་ཝན་ཀོའུ་ (Guo Wengui) ཟེར་བས། ད་ལྟའི་རྒྱ་ནག་དམར་ཤོག་རིང་ལུགས་ལ་ངོས་ལེན་གཏན་ནས་མེད་པ་དང་། རྒྱ་ནག་གསར་པའི་མཉམ་འབྲེལ་གྱི་རྒྱལ་ཁབ་ཅེས་པ་ཞིག་གསར་འཛུགས་བྱ་རྒྱུའི་བསྒྲགས་གཏམ་སྤེལ་ནས། ད་ལྟའི་རྒྱ་ནག་དམར་ཤོག་སྲིད་གཞུང་དེ་འཇིགས་སྐུལ་རིང་ལུགས་པས་བདག་བཟུང་བྱས་ཡོད་སྟབས། རྒྱ་ནག་གི་ཁྲིམས་ལུགས་ལྡན་པའི་སྲིད་གཞུང་དེ་མགོ་རྟིང་བསློགས་ཚར་ཡོད་ལུགས་ཀྱི་སྐྱོན་བརྗོད་ཤུགས་ཆེན་བྱས་འདུག ཕྱི་ལོ་ ༢༠༡༥ ལོའི་ལོ་མགོར་རྒྱ་ནག་ལྐོག་གྱུར་གྱི་ཚོང་པ་ “པེ་ཅིན་སྟེང་ཕྱོགས་ཚོང་འབྲེལ་འཛིན་སྐྱོང་ལྷན་ཁང་” (北京政泉控股)ཟེར་བའི་རྒྱབ་ཀྱི་སྤྱིན་བདག་ཀོ་ཝན་ཀོའུ་དང་རྒྱ་ནག་གཞུང་གི་དཔོན་ངན་ཚོའི་བར་ཐོག་མར་མཉམ་འབྲེལ་བྱས་པ་དང་། རྗེས་སུ་འགལ་ཟླ་བྱུང་བའི་བརྒྱུད་རིམ་གཅིག་རྗེས་གཉིས་མཐུད་དུ་གླེང་སློང་བྱུང་ནས།  རྒྱ་ནག་གཞུང་བདེ་འཇགས་ལྷན་ཁང་གི་འགན་འཛིན་གཞོན་པ་མཱ་ཅིན་གྱི་ནག་ཉེས་སྐོར་ཀོ་ཝན་ཀོའུ་ཡིས་རྒྱ་གཞུང་ལ་སྙན་སེང་ཞུས་རྗེས་མཱ་ཅིན་གྱི་གོ་གནས་ཕབ་པ་སོགས་ཀྱི་གནས་ཚུལ་བྱུང་།

ཕྱི་ལོ་ ༢༠༡༥ ལོར་རྒྱ་ནག་ཆེས་མཐོའི་ཁྲིམས་ཞིབ་ཁང་གི་དབུས་རུལ་སུངས་རྒོལ་རྡུང་ལས་འགུལ་གྱི་མགོ་གཙོ་ཞོ་ཅིན་ཧོའུ་ (Xu Jinhui) ཡིས་རྒྱ་ནག་གཞུང་འབྲེལ་གསར་ལམ་ཐོག ཨ་རིར་བྲོས་བྱོལ་དུ་ཕྱིན་པའི་རྒྱ་ནག་ལྐོག་ཟ་རུལ་སུངས་དང་ལྐོག་རྔན་བླངས་པ། དེ་བཞིན་ཁྲིམས་འགལ་གྱི་དངུལ་འབོར་ཆེན་པོ་ལྐོག་ཉར་བྱས་ཡོད་པའི་མི་སྣ་མང་པོ་ཞིག་གི་དམིགས་བསལ་མིང་ཐོ་ཞིག་ཨ་རིའི་གཞུང་ལ་ཕུལ་ཏེ། ཨ་རིའི་གཞུང་ནས་འཛིན་བཟུང་རོགས་སྐྱོར་ཡོང་བའི་འབོད་སྐུལ་ཞུས་ཡོད་པ་དང་། དམིགས་བསལ་མིང་ཐོ་དེའི་ནང་རྒྱ་ནག་གི་ཁྲིམས་འགལ་ཉེས་ཅན་པ་མང་པོ་ཞིག་ཨ་རིའི་ནང་སྐུང་ཡོད་སྐོར་འཁོད་ཡོད་ཀྱང་། མི་སུ་དག་ཚུད་ཡོད་མེད་ཁྱབ་བསྒྲགས་བྱས་མེད་སྟབས། ཕྱི་ཕྱོགས་ཀྱི་ལམ་གསར་ཁག་ཏུ། དེ་ནི་རྒྱ་གཞུང་གི་གསང་བའི་གནས་ཚུལ་མང་པོ་ཤེས་མཁན་ལིན་ཅི་ཧྭ་ཡི་ནུ་བོ་ལིན་ཝན་ཁྲིན་དང་། དངུལ་སྒོར་གཡོ་ལེན་བྱེད་མཁན་ཀོ་ཝན་ཀོའུ་ (Guo Wengui) སོགས་ཀྱི་མིང་ཐོ་ཡིན་སྐོར་ལ་ཚོད་དཔག་བྱས་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།