རྒྱལ་ཚོགས་ཀྱིས་རྒྱ་ནག་གི་ཁྲིམས་འཆར་གསར་པར་ཞིབ་དཔྱོད་དགོས་པའི་ནན་སྐུལ།

བོད་མིའི་སྒྲིག་འཛུགས་ནས་རྒྱལ་ཚོགས་གཙོས་རྒྱལ་ཁབ་ཁག་གི་དབུ་ཁྲིད་རྣམས་ཀྱིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བའི་ཁྲིམས་སྒྲིག་དེར་ཛ་དྲག་ཞིབ་དཔྱོད་དགོས་པའི་རེ་སྐུལ་ཞུས། 

དེ་རིང་ཕྱི་ཚེས་ ༡ ཉིན་རྒྱ་ནག་གཞུང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ཟེར་བའི་ཁྲིམས་ཤིག་བོད་ནང་དུ་དངོས་སུ་ལག་བསྟར་བྱེད་མགོ་འཛུགས་ཀྱིན་ཡོད་པ་ལྟར། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། འཛམ་གླིང་རྒྱལ་ཁབ་ཁག་དང་། གྲོས་ཚོགས་འཐུས་མི་རྣམ་པ། བསམ་བློ་བ་རྣམ་པ། དེ་བཞིན་གཞུང་འབྲེལ་མིན་པའི་རྒྱལ་སྤྱིའི་ཚོགས་པ་མང་དག་ཅིག་ལ། རྒྱ་ནག་གཞུང་གིས་ལག བསྟར་བྱེད་མགོ་བཙུགས་པའི་ཁྲིམས་འཆར་དེས་བོད་མིའི་ངོ་བོ་དང་། ཆོས་རིག སྐད་ཡིག་སོགས་རྩ་མེད་དུ་གཏོང་བར་དམིགས་ཡོད་སྟབས། རྒྱལ་སྤྱིའི་ཚོགས་པ་ཁག་གིས་མི་རིགས་མཐུན་སྒྲིལ་ཟེར་བའི་ཁྲིམས་སྒྲིག་དེར་ཞིབ་དཔྱོད་དང་གཟིགས་ཞིབ་གནང་དགོས་པའི་ནན་སྐུལ་གནང་འདུག 

སྲིད་སྐྱོང་སྤེན་པ་ཚེ་རིང་མཆོག་གིས། ངས་བོད་མི་རིགས་ཀྱི་མ་འོངས་པ་དང་། ང་ཚོའི་ཐུན་མོང་མ་ཡིན་པའི་རིག་གཞུང་དང་ཆོས་ལུགས་ཀྱི་ཤུལ་བཞག་སྲུང་སྐྱོབ་ཐད་ལ་བློ་འཚབ་ཆེན་པོ་དང་ཛ་དྲག་གི་ངང་ནས་ཁྱེད་རྣམས་ལ་འཕྲིན་ཡིག་འབྲི་བཞིན་ཡོད། བོད་ནི་ལོ་རྒྱུས་ཐོག་རང་བཙན་རྒྱལ་ཁབ་ཅིག་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བཙན་བཟུང་བྱས་ཡོད་པ་ནི། རྒྱལ་སྤྱིའི་ནང་ཐག་གཅོད་མ་བྱུང་བའི་རྩོད་རྙོག་ཅིག་ཏུ་གྱུར། ཕྱི་ལོ་ ༢༠༢༦ ཟླ་ ༣ ཚེས་ ༡༢ ཉིན་མི་དམངས་སྤྱི་མཐུན་རྒྱལ་ཁབ་ཀྱིས་མི་རིགས་མཐུན་སྒྲིལ་དང་ཡར་རྒྱས་གཏང་རྒྱུའི་སྐོར་གྱི་ཁྲིམས་ཞེས་པ་གཏན་འབེབས་བྱས་ཏེ། ཕྱི་ལོ་ ༢༠༢༦ ཟླ་ ༧ ཚེས་ ༡ ཉིན་ནས་ལག་བསྟར་བྱ་རྒྱུ་ཡིན། རྒྱ་ནག་གཞུང་གི་ཁྲིམས་སྒྲིག་འདི། སྤྱི་ཚོགས་མཐུན་སྒྲིལ་དང་རྒྱལ་ཁབ་གཅིག་གྱུར་གོང་འཕེལ་གཏང་རྒྱུའི་ལམ་ལུགས་ཤིག་ཏུ་ངོས་འཛིན་བྱེད་ཀྱི་ཡོད་ནའང་། དོན་དངོས་སུ་དེས་བཙན་བསྒྱུར་གྱི་སྲིད་ཇུས་ཁག་གཏན་འབེབས་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་ཆེད་འཛུགས་བྱས་པའི་བཅའ་སྡོད་སློབ་གྲྭ་ཁག་དང་། བོད་ཀྱི་སྐད་ཡིག ཆོས་ལུགས། ཤེས་ཡོན། སྲོལ་རྒྱུན་གྱི་འཚོ་བའི་ཁྱབ་ཁོངས་སུ་ཤུགས་རྐྱེན་ཐེབས་པའི་སྲིད་ཇུས་གཞན་དག་བཅས་དང་མཉམ་དུ་བསྡོམས་ན། ཁྲིམས་འདིས་བོད་ཀྱི་ངོ་བོ་རྒྱུན་གནས་ཐུབ་མིན་ལ་བློ་འཚབ་ཆེན་པོ་བསླངས་ཡོད་པའི་མུར། འདི་བོད་མི་རིགས་རྩ་མེད་བཟོ་རྒྱུའི་གོམ་ཁ་གཞན་ཞིག་ཏུ་འགྱུར་སྲིད། ཅེས་གསུངས་འདུག 

རྒྱ་ནག་གཞུང་གིས་བོད་ནང་ཁྲིམས་ལུགས་དེ་ལག་བསྟར་བྱས་ཏེ་བོད་ནང་ཐེབས་པའི་ཤུགས་རྐྱེན་ཁག་ཅིག་གསལ་འདོན་གནང་བའི་ཁྲོད། རྒྱ་ནག་གཞུང་གིས་ཁྲིམས་ལུགས་ལྟར་སྐྱོང་བ་ཞེས་པའི་བསྒྲགས་ཚིག་གི་འོག་ནས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་ལུགས་སུ་གསལ་བའི་ས་གནས་རང་སྐྱོང་ཐོབ་ཐང་གི་ཁྲིམས་སྒྲིག་རྣམས་རྩིས་མེད་དུ་བཏང་ནས། ཁྲིམས་སྒྲིག་གི་དབང་བསྒྱུར་འོག་ནས་མི་རིགས་བསྲེས་སྦྱོར་ཁྲིམས་མཐུན་ཅན་དུ་བསྒྱུར་བ་དང་། བོད་ཀྱི་ཤུལ་བཞག་རིག་གནས་དང་ངོ་བོ་རྩ་མེད་དུ་བཟོ་སླད། བོད་ནང་དུ་རྒྱ་རིགས་གཙོས་མི་རིགས་གཞན་རྣམས་གནས་སྤོར་བྱེད་དུ་བཅུག་ནས། བོད་ཀྱི་ཡུལ་སྲོལ་གོམས་གཤིས་དང་། ལོ་རྒྱུས། དད་མོས་བཅས་སུ་ཚད་བཀག་གིས་རྒྱ་ནག་གི་ཁྲིམས་སྒྲིག་གི་ལམ་ལུགས་བཞིན་ཤར་སྐྱོད་བྱས་ཏེ། བོད་ཀྱི་ངོ་བོ་ཤུལ་མེད་དང་རྒྱ་མི་རིགས་ཀྱི་ཁྲོད་དུ་སིམ་ཐབས་བྱ་རྒྱུ་དང་། རྒྱ་ནག་གཞུང་གིས་ཁྲིམས་སྒྲིག་དེ་བརྒྱུད་ནས། བོད་ཀྱི་སྐད་ཡིག་དང་། ཆོས་ལུགས་དད་མོས། རིག་གཞུང་བཅས་སུ་ཁ་བྲལ་རིང་ལུགས་ཡིན་ལུགས་བཤད་ནས། བོད་མི་རྣམས་ལ་རྒྱ་མི་རིགས་ཀྱི་ཆེད་དུ་སྤྱི་ཚོགས་ཀྱི་འདུ་ཤེས་བརྟན་པོ་ཟེར་བ་ཞིག་གི་ངོ་བོའི་ཐོག་ནས་བོད་མིའི་ངོ་བོ་ཤུལ་མེད་བཟོ་ཐབས་བྱེད་མུས་སྐོར་སོགས་གསལ་འདུག 

དེ་བཞིན་ཁྲིམས་ལུགས་དེ་ལག་བསྟར་བྱས་པའི་དབང་གིས། རྒྱ་ནག་གཞུང་གིས་བྱིས་བཅོལ་ཁང་ཚུད་པའི་བོད་ནང་གི་སློབ་གྲྭ་ཚང་མའི་ནང་ཁྲིམས་སྒྲིག་རང་བཞིན་གྱི་ཐོག་ནས་སྤྱི་སྐད་ཟེར་བའི་རྒྱ་ཡིག་རྒྱ་སྐད་བཀོལ་སྤྱོད་བྱས་བཅུག་པ་ལས། སློབ་གྲྭ་ཁག་སོགས་སུ་བོད་ཀྱི་སྐད་ཡིག་གི་སློབ་ཁྲིད་མེད་པར་བཟོས་པ། མི་རིགས་བསྲེས་སྦྱོར་སོགས་བྱས་པའི་དབང་གིས་བོད་ཀྱི་གདོད་མའི་ཤུལ་བཞག་རྣམས་རྨེག་མེད་དུ་བཏང་བ། དེ་བཞིན་སྤྱི་ཚོགས་དོ་དམ། ཚན་རྩལ་དང་གློག་རྡུལ་སོགས་ཀྱིས་བོད་མི་རྣམས་ཀྱི་ངོ་གདོང་སོགས་གཤེར་ཏེ། བོད་ཀྱི་སྐད་ཡིག་སྦྱང་བརྩོན་དང་། ཆོས་ལུགས་དད་མོས། བོད་ཀྱི་རིག་གཞུང་གཅེས་སྐྱོང་བྱས་པ་སོགས་ལ་ཕྱོགས་ཡོངས་ནས་དམ་དྲག་དང་སོ་མྱུལ་ནན་མོ་བྱས་པ་མ་ཟད། རྒྱ་ནག་གཞུང་གིས་རྒྱལ་མཚམས་ལས་བརྒལ་ནས་རྒྱལ་ཁབ་གཞན་དང་གཞན་དུ་གནོན་ཤུགས་སྤྲད་དེ། བོད་མི་དང་གྲངས་ཉུང་མི་རིགས་ལ་དངོས་ཤུགས་བརྒྱུད་གསུམ་ནས་གནོན་ཤུགས་ཇེ་ཆེར་སྤྲད་ཉེན་ཡོད་སྐོར་སོགས་གསལ་འདུག 

དབུས་བོད་མིའི་སྒྲིག་གི་ཛ་དྲག་གི་འབོད་སྐུལ་ཁྲོད། རྒྱལ་ཁབ་ཁག་གི་སྲིད་གཞུང་རྣམས་ཀྱིས་རྒྱ་ནག་གཞུང་གི་ཁྲིམས་འདིར་ངོ་རྒོལ་དང་། ལག་བསྟར་བྱ་རྒྱུར་ངོས་ལེན་མེད་པ། དེ་བཞིན་ཁྲིམས་འདི་ཕྱིར་འཐེན་དགོས་པའི་འབོད་སྐུལ་ཞུ་རྒྱུ། མཉམ་འབྲེལ་རྒྱལ་ཚོགས་གཙོས་འབྲེལ་ཡོད་མཉམ་འབྲེལ་རྒྱལ་ཚོགས་ཀྱི་ཚན་པ་ཁག་གིས། མྱུར་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཉམ་བསྲེས་ཀྱི་སྲིད་ཇུས་ལ་བསྐྱར་ཞིབ་དང་། རིག་གཞུང་། སྐད་ཡིག ཆོས་ལུགས་ཀྱི་ཐོབ་ཐང་ལ་བརྩི་མེད་རྡོག་རོལ་མུ་མཐད་གཏང་རྒྱུ་འགོག་ཐབས། རྒྱལ་ཁབ་རྣམས་ཀྱི་ཕྱི་འབྲེལ་ལས་དོན་བརྒྱུད་ནས་སྲིད་ཇུས་འདི་དག་བཟོ་བ་དང་ལག་བསྟར་བྱེད་མཁན་གྱི་མི་སྒེར་དང་ཚོགས་པ་ཁག་ལ་ཞིབ་འཇུག་ཆ་ཚང་བྱས་ཏེ།  ཉེས་ཆད་ཚུད་པའི་འགན་ཁུར་གྱི་འདུ་ཤེས་སྐྱེད་ཐབས། རྒྱ་ནག་པེ་ཅིང་སྲིད་གཞུང་ལ་བོད་རྒྱའི་གནད་དོན་ཞི་བའི་ཐོག་ནས་བོད་རྒྱའི་འབྲེལ་མོལ་ཡོང་ཐབས་གླེང་དགོས་པ། དབུས་བོད་མིའི་སྒྲིག་འཛུགས་ཀྱིས་བོད་ཀྱི་རིག་གཞུང་དང་ངོ་བོ་སྲུང་སྐྱོབ་དང་དར་སྤེལ་གཏོང་བའི་འབད་བརྩོན་ལ་རྒྱབ་སྐྱོར་དང་།  བོད་ནང་བོད་མིའི་ངོ་བོ་རྩ་མེད་བཟོ་མུས་ཡིན་པའི་གནས་སྟངས་ཐེར་འདོན་བྱ་དགོས། ཞེས་གསལ་འདུག 

འདི་ལོའི་ཕྱི་ཟླ་ ༣ ཚེས་ ༡༢ ཉིན་རྒྱ་ནག་གཞུང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་རྒྱས་ལ་སྐུལ་འདེད་ཀྱི་བཅའ་ཁྲིམས་ཟེར་བ་དེ་གཏན་འབེབས་བྱས་ཡོད་ཅིང་། རྒྱ་ནག་དམར་ཤོག་གཞུང་གི་མགྲིན་པ་ལྟ་བུར་གྱུར་བའི་རྒྱ་ནག་ཤིན་ཧཱ་གསར་ཁང་གིས། བཅའ་ཁྲིམས་དེ་གཏན་འབེབས་བྱེད་སྐབས།  རྒྱབ་སྐྱོར་བྱེད་མཁན་མི་གྲངས་ ༢༧༥༦ དང་། རྒྱབ་སྐྱོར་མི་བྱེད་མཁན་ ༣། བར་གནས་ ༣ བཅས་སོགས་བྱུང་ཡོད་ལུགས་དང་། འདི་ལོའི་ཕྱི་ཟླ་ ༧ ཚེས་ ༡ ཉིན་ནས་དངོས་སུ་ལག་བསྟར་བྱ་རྒྱུ་ཡིན་ལུགས་བསྒྲགས་འདུག་ལ། ཁྲིམས་ཡིག་འདི་བརྒྱུད་རྒྱ་ནག་གཞུང་གིས་གྲངས་ཉུང་མི་རིགས་རྣམས་ཀྱི་ངོ་བོ་ཤུལ་མེད་དང་། རིག་གཞུང་རྩ་གཏོར། དད་མོས་ལ་ཚོད་འཛིན། དྲག་གནོན་སོགས་སྔར་ལས་ལྷག་གཏང་རྒྱུ་ཡིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།