རྒྱ་ནག་གི་ཁྲིམས་གསར་དེ་ནི་འཛམ་གླིང་དམག་ཆེན་གཉིས་པ་མཇུག་བསྒྲིལ་རྗེས་གཏན་འབེབས་བྱས་པའི་མི་རིགས་དབྱེ་འབྱེད་ཀྱི་ཁྲིམས་ཡིག་ཆེ་ཤོས་ཤིག་ཡིན་ཞིང་། ཁྲིམས་དེས་འཛམ་གླིང་ཁྱོན་ཡོངས་ཀྱི་མི་རིགས་རྩ་མེད་གཏོང་ཉེན་ཡོད་སྟབས་འཛམ་གླིང་ཡོངས་ནས་ཁྲིམས་དེ་ལ་ངོ་རྒོལ་བྱ་དགོས་པའི་འབོད་སྐུལ་ཞུས།
ཟླ་འདིའི་ཕྱི་ཚེས་ ༡ ཉིན་ནས་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དངོས་སུ་ལག་བསྟར་བྱེད་མགོ་བཙུགས་པ་དང་བསྟུན། འཛམ་གླིང་ཁྱོན་ཡོངས་སུ་གནས་པའི་བོད་དོན་རྒྱབ་སྐྱོར་བ་དང་གྲོས་ཚོགས་འཐུས་མི། གཞུང་འབྲེལ་མི་སྣ། བོད་མིའི་སྒྲིག་འཛུགས་ཀྱི་གཙོས་གཞུང་འབྲེལ་མིན་པའི་ཚོགས་སྡེ་ཁག་སོགས་ནས་ཁྲིམས་གསར་དེར་ངོས་ལེན་མེད་པའི་སྐྱོན་བརྗོད་ཀྱི་ལས་འགུལ་རིམ་པ་སྤེལ་དང་སྤེལ་མུས་ཡིན་པ་ལྟར། དེ་རིང་འཇར་མན་གྲོས་ཚོགས་དང་གཞུང་གི་དྲུང་ཆེ་མའེ་ཁལ་ (Michael Brand) ལགས་དང་། དབྱིན་ཇིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་དབྱིན་ཡུལ་སྐུ་ཚབ་དོན་གཅོད་ལས་ཁུངས། དེ་བཞིན་ཨི་ཊ་ལིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སོགས་ཀྱིས་མི་རིགས་མཐུན་སྒྲིལ་གྱི་ཁྲིམས་ཡིག་དང་འབྲེལ་ནས་རྒྱ་ནག་གཞུང་ལ་ངོ་རྒོལ་བསྒྲགས་གཏམ་སོགས་སྤེལ་འདུག
འཇར་མན་གྲོས་ཚོགས་དང་གཞུང་གི་དྲུང་ཆེ་མའེ་ཁལ་ལགས་ཀྱིས་བརྙན་ལམ་ནས་རྒྱ་ནག་གི་ཁྲིམས་ཡིག་དེར་སྐྱོན་བརྗོད་བྱས་པའི་ནང་། འཛམ་གླིང་ཁྱོན་ཡོངས་སུ་གནས་པའི་མི་མང་གིས་རྒྱ་ནག་གི་ཁྲིམས་གསར་དེར་ངོ་རྒོལ་བྱེད་པར་མཉམ་ལས་བྱ་དགོས་པ་དང་། གྲངས་ཉུང་མི་རིགས་ཀྱི་སྲོལ་རྒྱུན་རིག་གཞུང་དང་། མི་རིགས་དབྱེ་འབྱེད་བྱེད་པའི་ཁྲིམས་གསར་དེ་ཕྱིར་འཐེན་བྱ་དགོས་པ་མ་ཟད། རྒྱ་ནག་གི་ཁྲིམས་གསར་དེས་མི་རིགས་དབྱེ་འབྱེད་ཀྱི་ཚད་རིམ་གསར་པ་དང་དྲག་གནོན་ཇེ་ཆེར་བཏང་བ་མངོན་གསལ་ཆགས་ཡོད་ཅིང་། ལྷག་པར་དུ་ཁྲིམས་ཡིག་དེས་རྒྱ་ནག་གི་མི་སེར་ཁོ་ན་མ་ཡིན་པར་ས་ཁུལ་གཞན་དང་འཛམ་གླིང་ཁྱོན་ཡོངས་ལ་ཉེན་ཁ་བཟོ་ཡི་ཡོད་པའི་གནད་དོན་སོགས་ཐེར་འདོན་གནང་འདུག
ཡང་འཇར་མན་གྲོས་ཚོགས་དང་གཞུང་གི་དྲུང་ཆེ་མའེ་ཁལ་ལགས་ཀྱིས། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དེ་ནི་འཛམ་གླིང་དམག་ཆེན་གཉིས་པ་མཇུག་བསྒྲིལ་རྗེས་གཏན་འབེབས་བྱས་པའི་མི་རིགས་དབྱེ་འབྱེད་ཀྱི་ཁྲིམས་ཡིག་ཚབས་ཆེ་ཤོས་ཤིག་ཡིན་པ་དང་། ཁྲིམས་གསར་དེ་ནི་རྒྱ་རིགས་མ་ཡིན་པའི་གྲངས་ཉུང་མི་རིགས་ཀྱི་མི་མང་ས་ཡ་མང་པོ་དང་རྒྱ་ནག་གི་རྒྱལ་མཚམས་ལས་བརྒལ་བའི་མི་མང་པོ་རྩ་མེད་གཏང་རྒྱུར་དམིགས་ཡོད། དམིགས་བསལ་ལོ་ངོ་སྟོང་ཕྲག་རིང་གི་བོད་ཀྱི་རིག་གཞུང་དང་། ཤར་ཊུ་ཀི་སི་ཐན་སོགས་ལོ་རྒྱུས་ལྡན་པའི་མི་རིགས་དང་གྲངས་ཉུང་མི་རིགས་རྩ་མེད་གཏོང་བའི་དྲག་གནོན་གྱི་ཐབས་ཇུས་དེ་ལ་འཛམ་གླིང་ཁྱོན་ཡོངས་ནས་ཁུ་སིམ་མེར་སྡོད་མི་རུང་བས། གལ་སྲིད་རྒྱ་ནག་གིས་སྲིད་ཇུས་དེ་ལག་བསྟར་བྱེད་ཐུབ་ཚེ། མི་རིགས་དབྱེ་འབྱེད་ཀྱི་བསམ་བློ་དེ་འཛམ་གླིང་གི་རྒྱལ་ཁབ་གཞན་ལ་མིག་དཔེ་ལྟ་ཡུལ་ཞིག་ཏུ་འགྱུར་སྲིད་པ་རེད་ལ། དེ་ལ་བརྟེན་ནས་མི་གྲངས་ས་ཡ་མང་པོ་དང་། མི་རིགས་དེ་དག་གི་རིག་གཞུང་རྩ་མེད་དུ་འགྲོ་ཉེན་ཡོད་པའི་ཉེན་བརྡ་བཏང་འདུག
ཉེ་ལམ་ཕྱི་ཟླ་ ༦ ཚེས་ ༣༠ ཉིན་ཉི་ཧོང་གི་རྒྱལ་ས་ཊོག་ཡོ་ (Tokyo) ནང་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་ལ་ལྟ་ཞིབ་གནང་མཁན་གྱི་་གྲོས་ཚོགས་ཀྱི་ཚོགས་པ་བཞི་དང་། བོད་དང་ཤར་ཊུར་ཀི་སི་ཐན། ལྷོ་སོག་ལ་རྒྱབ་སྐྱོར་གནང་མཁན་གྱི་གྲོས་ཚོགས་ཚོགས་པ་གསུམ་བཅས་ཀྱིས་གསར་འགོད་ལྷན་ཚོགས་ཤིག་འཚོགས་ཏེ། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དེ་ལ་སེམས་འཚབ་ཤུགས་ཆེན་བསྟན་པ་དང་འབྲེལ། ཉི་ཧོང་ནི་དམངས་གཙོའི་རྒྱལ་ཁབ་ཅིག་ཡིན་པའི་ཆ་ནས་ཁྲིམས་གསར་དེ་ལ་ངོས་ལེན་བྱེད་ཐུབ་ཀྱི་མེད། ཁྲིམས་གསར་གྱི་གནད་དོན་དེ་ནི་རྒྱ་ནག་ནང་ཁུལ་གྱི་གནད་དོན་ཞིག་མིན་པར་རྒྱལ་སྤྱིའི་གནད་དོན་ཞིག་རེད། ཅེས་དང་། ཉི་ཧོང་གཞུང་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ལྟ་ཞིབ་རྒྱ་ཆེ་རུ་གཏོང་བ་དང་། ཉི་ཧོང་ནང་ས་མཚམས་བརྒལ་བའི་བྱ་སྤྱོད་ལ་གདོང་ལེན་གྱི་ཐབས་ཇུས་ལ་ཤུགས་སྣོན་གྱིས་གང་མགྱོགས་ལམ་ལུགས་གསར་འཛུགས་དགོས་པའི་འབོད་སྐུལ་ཞུས་འདུག
ཡུ་རོབ་གྲོས་ཚོགས་ནས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དེས་བོད་མི་རིགས་ཀྱི་རིག་གཞུང་དང་། ཆོས་ལུགས། སྐད་ཡིག་བཅས་རྩ་མེད་བཟོ་ཐབས་ཀྱི་ལམ་ལུགས་ཤིག་ཡིན་པའི་ཉེན་བརྡ་བཏང་བ་དང་སྦྲགས། ཁྲིམས་གསར་དེར་སྐྱོན་བརྗོད་ཀྱི་གྲོས་ཆོད་ཅིག་གཏན་འབེབས་གནང་འདུག སྐབས་དེར་གྲོས་ཚོགས་སུ་གྲོས་ཆོད་དེ་ལ་ཡུ་རོབ་གྲོས་ཚོགས་འཐུས་མི་ ༧༡ ཀྱིས་བར་གནས་དང་། འཐུས་མི་ ༥༢ ཀྱིས་དགག་བྱ་དང་། འཐུས་མི་ ༤༣༩ ཡིས་རྒྱབ་སྐྱོར་འོག་གྲོས་ཆོད་དེ་གཏན་འབེབས་གནང་འདུག
ཡུ་རོབ་གྲོས་ཚོགས་རྣམས་ཀྱིས་༸རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་གནང་རྒྱུ་དེ་ཆོས་ལུགས་ཀྱི་གནད་དོན་ཞིག་ཡིན་པར་བརྟེན། བོད་བརྒྱུད་ནང་བསྟན་གྱི་སྲོལ་རྒྱུན་ལྟར་ངོས་འཛིན་གནང་དགོས་པ་ལས་གཞུང་གི་བཙན་ཤེད་ལས་གྲོལ་དགོས། གྲོས་ཆོད་དེའི་ནང་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་ (དགེ་འདུན་ཆོས་ཀྱི་ཉི་མ་) མཆོག་དང་། མཆོག་སྤྲུལ་རྡོ་རྗེ་བསྟན་རིན་པོ་ཆེ་དང་། དཔལ་ལྡན་ཡེ་ཤེས་གཙོས་པའི་ཆབ་སྲིད་བཙོན་པ་བཀག་ཉར་བྱས་པ་དེ་རྒྱལ་སྤྱིའི་ཐོག་བློ་འཚབ་ཀྱི་གནད་དོན་ཞིག་ཏུ་འགྱུར་ཡོད་ལ། ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་ཞུས་འདུག་ལ། ཡུ་རོབ་མནའ་འབྲེལ་གྱི་རྒྱལ་ཁབ་རྣམས་ལ་རྒྱ་ནག་གིས་ཕྱིའི་རྒྱལ་ཁབ་ཁག་ཏུ་གནས་སྡོད་བོད་མི་རྣམས་ལ་རྒྱལ་མཚམས་ལས་བརྒལ་བའི་དྲག་གནོན་བྱེད་བཞིན་པ་དེ་མཚམས་འཇོག་དགོས་པའི་རེ་སྐུལ་ཞུས་པ་མ་ཟད། གྲོས་ཆོད་དེའི་ནང་ཡུ་རོབ་མནའ་འབྲེལ་གྱི་འཛམ་གླིང་གི་འགྲོ་བ་མིའི་ཐོབ་ཐང་བཀག་སྡོམ་གྱི་ལམ་ལུགས་ལག་བསྟར་བྱེད་དགོས་པའི་དགོས་འདུན་བཏོན་ནས་དྲག་གནོན་གྱི་སྲིད་ཇུས་དེ་དག་བཟོ་མཁན་དང་ལག་བསྟར་བྱེད་མཁན་གྱི་དཔོན་རིགས་རྣམས་ལ་ངོ་རྒོལ་བྱེད་དགོས་པའི་དགོས་འདུན་ཡང་བཏོན་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
