རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་དབུ་འཛུགས་གནང་།

འདི་ལོར་རྒྱལ་ཁབ་ ༡༣ ནས་ཚོགས་བཅར་བ་ ༩༨ ཀྱིས་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པར་མཉམ་ཞུགས་ཀྱིས་བོད་དོན་དང་། བོད་དོན་ཞུ་གཏུག་གི་ལས་འགུལ། བོད་ནང་གི་གནས་སྟངས་ཛ་དྲག་གི་གནས་སྟངས་སོགས་ཀྱི་ཐད་ལ་གོ་བསྡུར་གནང་གི་ཡོད་འདུག

དེ་རིང་ཕྱི་ཟླ་ ༧ ཚེས་ ༣ ནས་ ༥ བར་ཉིན་གྲངས་གསུམ་གྱི་རིང་དྷ་ས་འཛིན་སྐྱོང་སྦྱོང་བརྡར་ཁང་དུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་དབུ་འཛུགས་གནང་ཞིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་འཇར་མན་གྲོས་ཚོགས་ལས་ཁུངས་ཀྱི་འཐུས་མི་དང་འཇར་མན་དང་པོ་ལེན་ཌིའི་འབྲེལ་ལམ་གྱི་ཆེད་མཁས་པ་སྐུ་ཞབས་རྗོ་ན་སི་ (Mr. Jonas Kolecki) ལགས། སྲིད་སྐྱོང་དང་ཕྱི་དྲིལ་བཀའ་བློན་གཅིག་ལྕོགས་སྤེན་པ་ཚེ་རིང་མཆོག ཕྱི་དྲིལ་དྲུང་ཆེ་ཀརྨ་རིན་ཆེན་ལགས། ཕྱི་དྲིལ་ཟུང་དྲུང་འབྲུག་བསྟན་སྐྱིད་ལགས། དེ་བཞིན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། རྩོམ་པ་པོ་དང་བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་དང་། ལྟེ་གནས་ཁང་གི་འགན་འཛིན་གཞོན་པ་བསོད་ནམས་བདེ་ཆེན་ལགས། རྩོམ་པ་པོ་དང་གསར་འགོད་པ། བོད་དོན་སྐོར་ཆེད་མཁས་པ་ལྕམ་སྐུ་ཀེ་ཊེ་སོན་ཌར་སི་ (Kate Saunders) ལགས་སོགས་གསུང་བཤད་པ་ཁག་ཅིག ཕྱིའི་རྒྱལ་ཁབ་ ༡༣ ནས་ཚོགས་བཅར་བ་ ༩༨ ཀྱིས་མཉམ་ཞུགས་གནང་འདུག

སྲིད་སྐྱོང་སྤེན་པ་ཚེ་རིང་མཆོག་གིས་དབུ་འབྱེད་ཀྱི་གསུང་བཤད་གནང་བའི་ནང་། དེ་རིང་ནས་ཉིན་མ་གསུམ་གྱི་རིང་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་འཚོག་མུས་ཡིན་པ་རེད། ཁ་སང་ཨ་རིའི་ཕྱི་དྲོའི་ཆུ་ཚོད་ ༥ པའི་སྟེང་ཨ་རིའི་ནེའུ་ཡོག་ཏུ་རང་བཙན་བློ་དགའ་ལགས་ཀྱིས་བོད་སྤྱི་པའི་དོན་དུ་རང་ལུས་མེར་བསྲེགས་ཏེ། ཡུལ་དེའི་ཕྱི་དྲོའི་ཆུ་ཚོད་ ༧ པ་ཙམ་དུ་སྨན་ཁང་དུ་འདས་གྲོངས་སུ་ཕྱིན་པ་རེད། ད་ལྟ་ངས་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐོག་གཏམ་བཤད་དངོས་སུ་མ་བྱས་སྔོན་ནས་བློ་དགའ་ལགས་ཀྱིས་བློས་གཏོང་གནང་བ་དེ་ལ་དྲན་གསོ་ཞིག་ཞུས་པ་དང་། ད་ལྟ་ཚོགས་འདུ་མགོ་འཛུགས་པ་དང་མྱ་ངན་གུས་འདུད་ཅིག་ཞུས་པ་རེད། དེ་དང་དེ་བཞིན་ད་ལྟ་འཛམ་གླིང་འདིའི་ནང་དམག་འཁྲུག་མང་པོ་ཞིག་ཡོང་གི་ཡོད་ལ། བྱུང་བའི་གོད་ཆག་ཀྱང་མང་པོ་ཞིག་ཡོང་གི་ཡོད་ཅིང་། ཁག་ཅིག་གིས་བྱུང་བའི་གོད་ཆག་ཡོང་བསྡད་པ་དེ་དག་མིས་བཟོས་པའི་རྐྱེན་གྱིས་གོད་ཆག་ཡོང་གི་ཡོད་པའི་འགྲེལ་བཤད་སྐྱོན་མཁན་ཡོད་པ་རེད། དེར་བརྟེན་འཛམ་གླིང་འདིའི་ནང་འགྲོ་བ་མི་རྣམས་ཀྱིས་སྡུག་བསྔལ་མྱོང་སྡོད་ཀྱི་ཡོད་པས། དེ་དག་ཚང་མ་སྙིང་དབུས་སུ་བཞག་སྟེ་བསམ་བློ་བཏང་ནས་ལས་ཀ་བྱ་དགོས་པ་དེ་གལ་ཆེན་པོ་རེད། ཅེས་གསུངས་སོང་།

ཚོགས་ཆེན་དང་འབྲེལ་ནས་སྲིད་སྐྱོང་མཆོག་གིས། དེ་རིང་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་འཚོགས་མགོ་ཚུགས་པ་རེད། བཀའ་ཤག་སྐབས་རིམ་པ་བྱས་ནས་བཀའ་ཤག་སྐབས་སོ་སོའི་དགོངས་པ་བཞེས་ཕྱོགས་ཀྱི་ཐོག་ནས་ང་ཚོ་བོད་པའི་སྤྱི་ཚོགས་ཀྱི་གཞོན་སྐྱེས་ཚོར་མར་བསྙོབ་རྒྱུ་དང་། གཞོན་སྐྱེས་དང་མཉམ་དུ་མཐུན་འབྲེལ་བྱ་རྒྱུ། དེ་བཞིན་དམིགས་ཡུལ་གཙོ་བོ་དེ་ཕྱི་དྲིལ་དྲུང་ཆེ་ཀརྨ་རིན་ཆེན་ལགས་ཀྱིས་གསུངས་པ་གཞིར་བཟུང་། ང་ཚོའི་མ་འོངས་མགོ་ཁྲིད་གསོ་སྐྱོང་བྱ་དགོས་ཀྱི་ཡོད་པ་རེད། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་དང་། རང་དབང་ཅན་གྱི་སྡེ་ཚན་དང་ལས་བྱེད་ནང་གཟིགས་པ་ཡིན་ན། བོད་ནས་ཡོང་མཁན་དེ་ཚོ་ཕལ་ཆེར་རྫོགས་འགྲོ་ཡི་ཡོད་པ་རེད། བཙན་བྱོལ་དུ་སྐྱེས་པའི་མི་རབས་དང་པོ་དང་གཉིས་པ་དེ་ཚོས་འགན་ཁུར་ནས་འགྲོ་ཡི་ཡོད་པ་རེད། ང་ཚོའི་མི་རབས་ཀྱང་རྫོགས་འགྲོ་ཡི་ཡོད་པ་རེད། ང་རང་ཡིན་ནའང་ལོ་ ༦༠ ལ་བསླེབས་ཡོད་ལ། ང་ཚོའང་ཉིན་མ་གཅིག་ཤི་འགྲོ་ཡི་རེད། དེར་བརྟེན་མ་འོངས་པར་བོད་པའི་འཐབ་རྩོད་གནས་ཐུབ་མིན་དེ་ཁྱེད་ཚོར་རག་ལས་ཀྱི་ཡོད་པ་རེད། དེ་མིན་གཞན་པ་སུ་གཅིག་ལའང་མཛུབ་མོ་འཛུགས་ས་མེད་པ་རེད། ང་ཚོའི་མི་རབས་ལ་བོད་ནས་ཡོང་མཁན་གྱི་མི་རབས་ཀྱིས་བསླབ་བྱ་བསྐྱོན་ཏེ། བོད་ནང་གི་སྐོར་ལ་འགྲེལ་བརྗོད་དང་སོ་སོའི་ལས་འགན་ངོ་སྤྲོད་བྱས་པ་ལ་བརྟེན་ནས། རྒྱབ་ལྗོངས་ག་རེ་ཡིན་མིན་ལ་མ་ལྟོས་པར་ད་ལྟ་ང་ཚོ་འགན་འཁྱེར་མཁན་ཞིག་ཆགས་བསྡད་འདུག ད་ལྟ་བར་དུ་༸གོང་ས་རྒྱལ་བ་རིན་པོ་ཆེ་མཆོག་གིས་སྐུ་ལས་བསྐྱོན་པ་དེ་དག་མུ་མཐུད་དུ་གནས་དགོས་ཀྱི་ཡོད་ན། རྣམ་པ་ཚོས་འགན་བཞེས་རྒྱུ་མགོ་འཛུགས་དགོས་ཀྱི་རེད། དེ་མིན་རྣམ་པ་ཚོས་འགན་མ་བཞེས་ན་ང་ཚོས་གཞན་པ་ཞིག་ལ་རྩིས་སྤྲད་ས་གང་ཡང་མེད་པ་རེད། བཀའ་ཤག་སྐབས་རིམ་པས་གཞོན་སྐྱེས་ཚོར་བསྙོབ་རྒྱུའི་ཐབས་ཤེས་གནང་བ་རེད་ལ། བཀའ་ཤག་སྐབས་བཅུ་དྲུག་གི་སྔོན་ལ་ལྔ་དང་ལྔ་བཅུའི་ཚོགས་ཆེན་འཚོགས་ཡོད་པ་མ་ཟད། དེ་དག་གིས་སྤྱི་ཚོགས་ཁྲོད་ཕན་ཐོགས་ཆེན་པོ་བྱུང་བ་རེད། ཅེས་གསུངས་སོང་།

ཡང་སྲིད་སྐྱོང་སྤེན་པ་ཚེ་རིང་མཆོག་གིས། བོད་པ་ཚོས་རེ་བ་བཟང་ས་ནས་བརྒྱག་དགོས་རེད། བོད་རྒྱའི་དཀའ་རྙོག་གསལལཐུབ་པར་རེ་བ་བཟང་ས་ནས་བརྒྱག་དགོས་ཀྱི་རེད། ཡིན་ནའང་བཙན་བྱོལ་དུ་བསླེབས་ནས་ལོ་ ༦༧ ཕྱིན་པ་རེད། བོད་ལ་རྒྱ་ནག་གིས་བཙན་འཛུལ་བྱས་ནས་ལོ་ ༧༦ འགྲོ་ཡི་ཡོད་པ་རེད། ད་ལྟ་བར་དུ་༸གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་པ་ལ་བརྟེན་ནས་བོད་པའི་གནས་ཚུལ་གསོན་པོར་ལྷག་ཐུབ་པ་རེད། འཛམ་གླིང་འདིའི་ནང་བཙན་བྱོལ་བ་དཔེ་མང་པོ་ཡོད་རེད། བཙན་བྱོལ་བ་དང་སྐྱབས་བཅོལ་བ་མང་པོ་ཡོད་པའི་ཁྲོད་དམངས་གཙོའི་ཆ་ལག་ཡོངས་སུ་ཚང་བ་ང་ཚོ་གཅིག་པོ་རེད། དེར་བརྟེན་ང་ཚོས་འཛམ་གླིང་ནང་སྐོར་སྐྱོད་བྱེད་པའི་སྐབས་སུ། ང་ཚོ་ལའང་གུས་བརྩི་ཏོག་ཙམ་ཡོང་བ་དེ་༸རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ཡོང་གི་ཡོད་པ་རེད། དེར་བརྟེན་ང་ཚོའི་ངོས་ནས་བྱ་དགོས་པ་དེ་དག་ང་ཚོས་བསམ་བློ་བཏང་ནས་འགྲོ་ཡི་ཡོད་པ་རེད། ༸རྒྱལ་བ་རིན་པོ་ཆེ་མཆོག་ད་ལྟ་ཞལ་བཞུགས་པའི་སྐབས་སུ་ང་ཚོས་རྒྱལ་ཁབ་གཞན་པ་དང་མཉམ་དུ་འབྲེལ་བ་གང་འདྲ་གཞག་དགོས་ཀྱི་ཡོད་མེད་དེ་དག་སྒྲོམ་གཞི་དང་ལྡན་པའི་ཐོག་ནས་གཞག་དགོས་ཀྱི་ཡོད་པ་རེད། ད་ལྟ་༸རྒྱལ་བ་རིན་པོ་ཆེ་ཞལ་བཞུགས་དུས་ང་ཚོར་ཆེ་མཐོང་རག་གི་ཡོད་པ་འདི། ད་ལྟ་ང་ཚོས་བདག་པོ་ཡག་པོ་བརྒྱག་ཐུབ་ན་དེ་ཚོ་འགྲོ་སྟངས་ཤིག་ཆགས་ཀྱི་རེད། མ་འོངས་པར་ལོ་ ༢༠ དང་ ༣༠ རྗེས་སུ་རྒྱ་ནག་གཞུང་ལ་ཁ་གཏད་གཅོག་ཐུབ་པའི་བོད་མིའི་སྒྲིག་འཛུགས་ཀྱི་འཛིན་སྐྱོང་ཚད་དང་ལྡན་པ་ཞིག་ཆགས་ཐུབ་ཀྱི་རེད། དེ་མིན་བཙན་བྱོལ་དུ་བོད་མི་འབུམ་གཅིག་དང་ཁྲི་གསུམ་མ་གཏོགས་མེད་ཀྱང་། ང་ཚོ་ནང་ཁུལ་རྩོད་པ་རྒྱག་ན་ཕན་ཐོགས་རྒྱུ་མེད་པ་རེད། ཅེས་དང་། ད་ལན་གྱི་ཚོགས་ཆེན་འདི་དང་བསྟུན་རྒྱལ་ཁབ་བཅུ་གསུམ་ལྷག་ནས་ཆེད་ཕེབས་གནང་བའི་གཞོན་སྐྱེས་རྣམས་ཀྱིས་དུས་ཚོད་སྟོང་སད་དུ་མི་གཏོང་བར། བོད་ནང་གི་ཛ་དྲག་གི་གནས་སྟངས་མང་དག་ཅིག་ལ་རྒྱུས་ལོན་གྱིས།  སྤྱི་ཚོགས་སུ་ཞབས་འདེགས་བསྒྲུབ་རྒྱུའི་དམིགས་ཡུལ་བཅངས་དགོས་པའི་མུར། བོད་ཀྱི་འབྱུང་འགྱུར་གྱི་འཐབ་རྩོད་དེ་མི་ལོ་བཅུ་ཕྲག་འགར་གནས་སླད་བོད་ཀྱི་གཞོན་སྐྱེས་རྣམས་ཀྱི་འགན་འཁུར་དགོས་སྐོར་སོགས་གསུངས་སོང་།

སྐུ་མགྲོན་གཙོ་བོ་འཇར་མན་གྲོས་ཚོགས་འཐུས་མིའི་ལས་ཁུངས་ཀྱི་འཇར་མན་དང་པོ་ལན་ཌིའི་འབྲེལ་ལམ་ཐད་མཁས་པ་རྗོ་ན་སི་ (Mr. Jonas Kolecki) ལགས་ཀྱིས། རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་སྟེང་མཉམ་ཞུགས་བྱ་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་ལ་སྐལ་བ་བཟང་པོ་ཡིན་སེམས་ཀྱི་འདུག ང་རང་ཁ་སང་དྷ་སར་འབྱོར་རྗེས་ཁྱེད་རྣམ་པས་སྣེ་ལེན་ཟབ་རྒྱས་ཞུས་པར་ཐུགས་རྗེ་ཆེ་ཞུ་ཡི་ཡིན། ད་ལན་ང་རང་ཡུ་རོབ་མཐུན་ཚོགས་ནས་ཕྱིའི་རྒྱལ་ཁབ་ཏུ་འགྲུལ་བཞུད་བྱས་པ་ཐོག་མ་ཡིན། ཞེས་དང་། བོད་པའི་གཞོན་སྐྱེས་རྣམས་ལ་སོ་སོའི་གནས་ཡུལ་རྒྱལ་ཁབ་གང་དུ་ཡོད་རུང་བོད་ཀྱི་སྐད་ཡིག་དང་རིག་གཞུང་། ཡུལ་སྲོལ་གོམས་གཤིས་སོགས་གསོན་པོར་གནས་པར་དམིགས་བསལ་གྱི་འོས་འགན་ཆེན་པོ་ཡོད་སྟབས། བོད་ཕྲུག་རྣམས་ཀྱིས་མུ་མཐུད་དུ་བོད་ཀྱི་སྐད་ཡིག་དང་རིག་གཞུང་སོགས་མི་ཉམས་རྒྱུན་འཛིན་དང་སྲུང་སྐྱོབ་བྱ་རྒྱུ་གལ་ཆེན་ཡིན་སྐོར་དང་། བོད་མིའི་གཞོན་སྐྱེས་རྣམས་ཀྱིས་ཕྱིའི་རྒྱལ་ཁབ་ཀྱི་ཚོགས་སྡེ་ཁག་དང་སྤྱི་ཚོགས། དེ་བཞིན་ཆབ་སྲིད་ནང་མཉམ་ཞུགས་བྱས་ཏེ་བོད་དོན་དྲིལ་བསྒྲགས་དང་། ཞི་བའི་ལས་འགུལ་སྤེལ་བ་བརྒྱུད་བོད་དོན་རྒྱབ་སྐྱོར་བ་འཚོལ་ཞིབ་བྱ་རྒྱུ་གལ་ཆེན་ཡིན་སྐོར་གསུངས་སོང་།

འདི་གའི་གསར་འགོད་པས་ཕྱི་དྲིལ་དྲུང་ཆེ་ཀརྨ་རིན་ཆེན་ལགས་སུ་ཚོགས་ཆེན་དེའི་དགོས་དམིགས་སྐོར་དྲིས་པར་ཁོང་གིས། རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་གསུམ་འཚོགས་ཟིན་ནས་གཞོན་སྐྱེས་ ༣༠༠ ལྷག་ལ་གོ་སྐབས་ཕུལ་ཟིན་པ་རེད། ཚོགས་ཆེན་དེའི་དམིགས་ཡུལ་ནི་ཚོགས་ཆེན་ནང་ཚོགས་བཅར་ཞུས་པའི་གཞོན་སྐྱེས་རྣམས་ཀྱི་སོ་སོའི་ཤེས་བྱ་དང་། ལས་རྩལ། བློ་སྟོབས་གོང་འཕེལ་གཏང་རྒྱུར་དམིགས་པ་གཅིག་དང་། གཉིས་པ་དེ་ལ་འཛམ་གླིང་རྒྱལ་ཁབ་འདྲ་མིན་ནས་བོད་རིགས་གཞོན་སྐྱེས་མང་པོ་ཞིག་བསླེབས་ཡོད་པ་དེ་དག་ལ་སོ་སོའི་ཉམས་མྱོང་དང་ཤེས་ཡོན་གང་ཡོད་པ་རྣམས་གཞོན་སྐྱེས་ཕན་ཚུན་བརྗེ་ལེན་བྱ་རྒྱུའི་སྡིངས་ཆ་དང་གོ་སྐབས་བསྐྲུན་རྒྱུ། གསུམ་པ་དེ་བོད་ནང་གི་དངོས་ཡོད་གནས་སྟངས་དང་། རྒྱལ་སྤྱིའི་གནས་བབ་ཐོག་ལ་བོད་དོན་གྱི་གནས་སྟངས་གང་འདྲ་ཡོད་པ། དེ་བཞིན་གནས་སྟངས་དེ་འདྲའི་འོག་ལ་བོད་དོན་ཞུ་གཏུག་གི་ལས་འགུལ་ཇི་འདྲ་སྤེལ་དགོས་ཀྱི་ཡོད་པ། རྒྱ་ནག་གཞུང་གིས་བོད་ནང་སྲིད་ཇུས་འདྲ་མིན་ལག་བསྟར་བྱས་ཏེ་བོད་ནང་གི་གནས་སྟངས་ཛ་དྲག་པོ་ཡོད་པ་དེ་གང་འདྲ་ཐེར་འདོན་བྱ་དགོས་ཀྱི་ཡོད་པ་བཅས་ལ་དམིགས་ཏེ་ཚོགས་ཆེན་འདི་འཚོགས་དང་འཚོག་མུས་ཡིན་པ་རེད། ཚོགས་འདུ་འདི་རང་བཞིན་གྱིས་གལ་ཆེན་པོ་ཆགས་ཀྱི་འདུག དེ་སྔ་ཚོགས་ཐེངས་གསུམ་འཚོགས་པ་དེས་ནུས་པ་ཆེན་པོ་ཐོན་པ་ཞིག་མཐོང་གི་འདུག བོད་དོན་འཐབ་རྩོད་མུ་མཐུད་གནས་པར་མི་རབས་རྒན་པས་མི་རབས་གཞོན་པར་རྩིས་སྤྲོད་བྱ་དགོས་ཀྱི་ཡོད་པར་བརྟེན། ང་ཚོས་ད་ལྟ་ནས་མི་རབས་གཞོན་པ་གསོ་སྐྱོང་བྱ་དགོས་ཀྱི་ཡོད་པས་ཚོགས་ཆེན་འདི་གལ་ཆེན་པོ་ཆགས་ཀྱི་ཡོད། ཅེས་གསུངས་བྱུང་།

དེ་རིང་ཞོགས་པར་ཆུ་ཚོད་ ༡༡ སྟེང་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། རྩོམ་པ་པོ་དང་བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས་རྣམ་གཉིས་ཀྱིས་བོད་ཀྱི་གནད་དོན་མུ་མཐུད་གསོན་པོར་གནས་ཐབས་དང་། གཞོན་སྐྱེས། རང་གི་ངོ་བོ། རང་དབང་འཐབ་རྩོད་ཅེས་པའི་བརྗོད་གཞིའི་ཐོག་གསུང་བཤད་གནང་རྗེས། ཆུ་ཚོད་ ༡༢ སྟེང་བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་ཆེ་བསྟན་འཛིན་ལེགས་བཤད་ལགས་ཀྱིས་རིག་གཞུང་འབྲེལ་འདྲིས། མཐུན་ཕྱོགས་སྐྱེད་སྲིང་། གོ་ལ་ཁྱོན་དུ་བོད་དོན་རྒྱབ་སྐྱོར་སྤེལ་ཐབས་ཀྱི་འབྲེལ་ལམ་ཞེས་པའི་བརྗོད་གཞིའི་ཐོག་གསུང་བཤད་གནང་སོང་། ཉིན་རྒྱབ་ཆུ་ཚོད་ ༢ པའི་སྟེང་རྩོམ་པ་པོ་དང་གསར་འགོད་པ། བོད་དོན་སྐོར་ཆེད་མཁས་པ་ལྕམ་སྐུ་ཀེ་རེ་སོན་ཌར་སི་ (Kate Saunders) ལགས་ཀྱིས་འཐབ་ཇུས་ཀྱི་འབྲེལ་ལམ་དང་། གནས་ཚུལ་ལོག་བཤད་ལ་གདོང་ལེན་བྱེད་ཕྱོགས་ཞེས་པའི་བརྗོད་གཞིའི་ཐོག་གསུང་བཤད་གནང་སོང་།

གསར་འགོད་པ། བསྟན་འཛིན་ཕུར་བུ།