བཙན་བྱོལ་བོད་མི་བློ་དགའ་རང་བཙན་ལགས་ཀྱིས་ཨ་རིར་སྐུ་ལུས་མེར་བསྲེགས་བཏང་སྟེ་རྒྱ་ནག་གིས་བོད་ཐོག་འཛིན་པའི་དྲག་གནོན་དབང་སྒྱུར་ལ་ངོ་རྒོལ་གནང་ཡོད།

རྩོམ་ཁུངས། བོད་ཀྱི་དུས་བབ།

རྩོམ་པ་པོ། ཕན་ཐོགས། བོད་ཀྱི་སྲིད་བྱུས་ཉམས་ཞིབ་ཁང་། 

ཕྱི་ལོ་ ༢༠༢༦ ཟླ་ ༧ ཚེས་ ༣ ཉིན། བཙན་བྱོལ་བོད་མི་བློ་དགའ་རང་བཙན་ལགས་ཀྱིས་ནེའུ་ཡོག་མཉམ་འབྲེལ་རྒྱལ་ཚོགས་ཀྱི་ཚོགས་ཁང་ཆེན་མོའི་མདུན་དུ་སྐུ་ལུས་མེར་བསྲེགས་བཏང་ཡོད། བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་གཏང་བའི་དུས་ཚོད་ནི། རྒྱ་ནག་གིས་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་》ཟེར་བའི་ཁྲིམས་དེ་དངོས་སུ་ལག་བསྟར་བྱས་པའི་ཉིན་གཉིས་པ་དེ་ཡིན་ཞིང་། ཁོང་གིས་ “བོད་རང་བཙན་” དང་ “རྒྱ་མི་བོད་ནས་ཕྱིར་འབུད་གཏོང་དགོས་” ཞེས་སྐད་འབོད་བྱས་ཏེ། རྒྱ་ནག་གཞུང་གིས་བོད་ནང་འཛིན་པའི་དྲག་གནོན་དབང་སྒྱུར་ལ་ངོ་རྒོལ་གནང་ཡོད།

ཕྱི་ལོ་ ༢༠༢༦ ཟླ་ ༧ ཚེས་ ༣ ཉིན། ཨ་རིའི་ཚེས་ ༢ ཀྱི་ཕྱི་དྲོ་ཆུ་ཚོད་ ༦ ཙམ་ལ། ས་གནས་དེའི་ནང་གནས་སྡོད་བཙན་བྱོལ་བོད་མི་བློ་དགའ་རང་བཙན་ (Lobga Rangzan) ལགས་ཀྱིས་ནེའུ་ཡོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ལས་ཁུངས་ཀྱི་མདུན་དུ་སྐུ་ལུས་མེར་བསྲེགས་བཏང་རྗེས། ས་གནས་ཉེན་རྟོག་པས་ཁོང་སྨན་ཁང་དུ་སྐྱེལ་ཏེ་མྱུར་སྐྱོབ་བྱས་ཀྱང་། མ་ཕན་པར་འདས་གྲོངས་སུ་ཕྱིན་པའི་གནས་ཚུལ་བྱུང་ཡོད། ཁོང་འདས་སྐབས་དགུང་ལོ་ ༥༢ རེད་འདུག

 བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གཏོང་བའི་བརྒྱུད་རིམ་ཧྲིལ་པོ་རང་གི་ངོ་དེབ་ཁ་བྱང་བརྒྱུད་ཐད་གཏོང་གནང་ཡོད། ཐད་གཏོང་བརྙན་པར་ནང་། བློ་དགའ་རང་བཙན་ལགས་ཀྱིས་བོད་ཆས་ནག་པོ་ཞིག་གྱོན་ཞིང་། ལག་ཏུ་བོད་ཀྱི་རྒྱལ་དར་ཞིག་བཟུང་ནས་ཐོན་བྱུང་། ཁོང་གིས་བོད་ཀྱི་རྒྱལ་དར་དེ་ལམ་ཟུར་དུ་བཙུགས་རྗེས། བོད་ཀྱི་རྒྱལ་དར་གྱི་འགྲམ་དུ་ཕྱག་ཏུ་སྐུ་ལུས་མེར་བསྲེགས་དགོས་པའི་མངོན་འདོད་བཀོད་པའི་ཤོག་བུ་དག་བཟུང་ནས་མེ་སྤར། མེ་ལྕེས་འཕྲལ་དུ་ཁོང་གི་ལུས་ཡོངས་བསྡམས། བློ་དགའ་རང་བཙན་ལགས་ཀྱིས་མེ་ཕུང་ནང་མདུན་དུ་གོམ་པ་འགའ་སྤོས་ཏེ། ཕྱག་ནང་ཡོད་པའི་མངོན་འདོད་བཀོད་པའི་ཤོག་བུ་རྣམས་གཏོར། མེ་ཤུགས་ཇེ་ཆེར་ཕྱིན་པ་དང་ན་ཟུག་ནང་དཔའ་ཉམས་ཆེ་བའི་ཕྱག་གཉིས་ཕྱིར་བརྐྱངས། བཟོད་མི་ཐུབ་པའི་ན་ཟུག་ཁྲོད་ཁོང་གི་སྐུ་གཟུགས་གཡོ་ཡང། བཟོད་བསྲན་གྱིས་མུ་མཐུད་སྐུ་གཟུགས་འགྲེང་པོར་གནས་ཐབས་གནང་། དེ་ནས་ཁོང་གི་སྐུ་གཟུགས་གཡོ་ནས་ག་ལེར་ས་ལ་ཁ་སྦུག་ལོག དེའི་རྗེས་ལས་བྱེད་མི་སྣ་ཞིག་རང་ལུས་མེར་བསྲེགས་ཀྱི་ས་གནས་སུ་འབྱོར་ནས་མེ་གསོད་ཡོ་བྱད་ཀྱིས་ཁོང་གི་ལུས་ཐོག་གི་མེ་གསོད་ཐབས་བྱས། 

ཨ་རིའི་ཉེན་རྟོག་པའི་གནས་ཚུལ་ལྟར་ན། ཟླ་ ༧ ཚེས་ ༢ ཕྱི་དྲོ་ཆུ་ཚོད་ ༦ དང་ཕྱེད་ཀའི་ཐོག་ཉེན་རྟོག་པར་ཁ་པར་འབྱོར་རྗེས། རང་ལུས་མེར་བསྲེགས་ཀྱི་ས་གནས་སུ་འབྱོར་ནས་ཁོང་ནེའུ་ཡོག་བེལ་ལི་ཝེའུ་སྨན་ཁང་ (Bellevue Hospital) དུ་བསྐྱལ། འོན་ཀྱང་མེ་སྐྱོན་ཚབས་ཆེན་ཕོག་པའི་རྐྱེན་གྱིས་མྱུར་སྐྱོབ་བྱས་པ་མ་ཕན་པར་འདས་གྲོངས་སུ་ཕྱིན་འདུག

སྐུ་ལུས་མེར་བསྲེགས་མ་བཏང་བའི་ཆུ་ཚོད་གསུམ་གྱི་གོང་ལ། བློ་དགའ་རང་བཙན་ལགས་ཀྱིས་རང་གི་ངོ་དེབ་ཁ་བྱང་གི་འདྲ་པར་བརྗེ་པོ་བརྒྱབ་ནས་ཞལ་ཆེམས་ངོ་པར་ཞིག་བཞག་ཡོད། དུས་མཚུངས་སུ་བརྙན་པར་ཞིག་ཀྱང་སྤེལ་ཡོད་ཅིང་། བརྙན་པར་དེའི་ནང་ཁོང་གིས་རྒྱལ་ཚོགས་ཀྱི་མདུན་ཐང་ནས་ཕར་འགྲོ་བྱེད་བཞིན་ལག་པ་གཡས་པ་ཡར་བཀྱགས་ཏེ། བོད་རང་བཙན་” ཞེས་ལན་གསུམ་བོས་ཡོད།

  བློ་དགའ་རང་བཙན་ནི་བོད་རང་བཙན་ལས་འགུལ་བ་བརྟན་པོ་ཞིག་ཡིན་ཞིང་། རང་ལུས་མེར་བསྲེགས་མ་བཏང་བའི་ཆུ་ཚོད་གཅིག་གི་གོང་དུ། ཁོང་གིས་ངོ་དེབ་ཐོག་སྐུ་ལུས་མེར་བསྲེགས་གནང་བའི་མངོན་འདོད་ཡང་སྤེལ་ཡོད་ཅིང་། དེའི་ནང་ “FREE TIBET” (བོད་རང་བཙན་) དང་ “CHINA OUT OF TIBET” (རྒྱ་མི་བོད་ནས་ཕྱིར་འབུད་གཏོང་དགོས་) ཞེས་སོ་སོར་བྲིས་ཡོད།

ཆེས་རྩ་ཆེ་བ་ནི། བློ་དགའ་རང་བཙན་ལགས་ཀྱིས་ངོ་དེབ་བརྒྱུད་བརྙན་པར་གྱི་ཞལ་ཆེམས་ཤིག་བཞག་ཡོད། ཁོང་གིས་བརྙན་པར་དེའི་ནང་རང་ཉིད་ནས་རང་ལུས་མེར་བསྲེགས་གཏོང་རྒྱུ་ཡིན་པ་དངོས་སུ་བརྗོད་མེད་ཀྱང་། ཤུགས་བསྟན་གྱི་སྒོ་ནས་ཁོང་གིས་ཚབས་ཆེ་བའི་ལས་འགུལ་ཞིག་སྤེལ་རྒྱུ་ཡིན་པར་བརྗོད་ཡོད། ད་དུང་ཁོང་གིས་ཚབས་ཆེ་བའི་ལས་འགུལ་སྤེལ་ཚེ་དེ་ནི་ཁོ་རང་ལ་ཟས་དང་གྱོན་ཆས་སོགས་མ་རག་པའི་རྐྱེན་གྱི་མིན་པར་བོད་རྒྱལ་ཁབ་ཀྱི་ཆེད་དུ་སྤེལ་ཡིན་པ་མངོན་གསལ་གསུངས་འདུག

  སྐར་མ་ ༦ ཅན་གྱི་བརྙན་པར་དེའི་ནང་། ཁོང་ལ་རང་ལུས་མེར་བསྲེགས་གཏོང་ལ་ཉེ་བའི་སེམས་འཚབ་དང་ཁོང་ཁྲོའི་རྣམ་པ་གང་ཡང་མེད་པར། ཞི་འཇམ་གྱི་སྒོ་ནས་ནང་མིའི་གཏམ་གླེང་བྱེད་པ་ལྟར་ལྷོད་ལྷོད་ངང་གླེང་མོལ་བྱས་ཡོད་པ་དེས། ཁོང་གི་བློ་རྒྱ་དང་སྙིང་སྟོབས་མཚོན་ཐུབ། ཁོང་ནི་མངོན་སུམ་གྱི་དཔའ་བོ་དམ་པ་ཞིག་རེད།

ཁོང་གིས་ཞལ་ཆེམས་ནང་བོད་ནང་གི་བོད་མི་རྣམས་ཀྱིས་ཡུན་རིང་གནང་བཞིན་པའི་བློས་གཏོང་དང་སྙིང་སྟོབས་ལྡན་པའི་འཐབ་རྩོད་ལ་དམིགས་ཏེ་བསྔགས་བརྗོད་ཆེན་པོ་བྱས་ཡོད་པ་དང་། ཁོང་གིས་ “རྒྱ་ནག་གུང་ཁྲན་གྱིས་བོད་ལ་འཛིན་པའི་སྲིད་བྱུས་དང་བོད་རྩ་མེད་རང་གཏོང་ཡ་ཆེད་དུ་ལས་འགུལ་སྤེལ་བཞིན་ཡོད་རེད། དེ་ཡིན་དུས་ས་ནས། ང་རང་ཚོ་བཙན་བྱོལ་ནང་བསྡད་མཁན་གྱིས་བོད་ནང་དུ་བསྡད་མཁན་བོད་པ་ལ་རྩ་བ་ཉིད་ནས་ཞུ་ཡ་མེད། དངོས་གནས་དྲང་གནས་ལྷག་བསམ་རྣམ་དག་གིས་སོ་སོའི་སྐད་དང་ཡི་གེ། ཆོས་དང་རིག་གཞུང་མི་ཉམས་གོང་འཕེལ། ཉམས་པ་སླར་གསོ་གནང་ཡག་ལ་དངོས་གནས་དྲང་གནས་ཧ་ལས་པ་རེད་འདུག དེ་ཡིན་པའི་རྒྱུ་མཚན་ལ་བརྟེན་ནས་ཐུགས་རྗེ་ཆེ་ཞུ་ཡ་དང་། གཞན་བསམ་ཚུལ་གང་ཡང་ཞུ་ཡ་མེད།” གསུངས་འདུག

དེའི་རྗེས་བློ་དགའ་རང་བཙན་གྱིས་བཙན་བྱོལ་བོད་མི་རྣམས་ལ་ཞལ་ཆེམས་དོན་ཚན་བཞི་བཞག་ཡོད་པ་ནི། དོན་ཚན་དང་པོ། བཙན་བྱོལ་བོད་མི་རྣམས་ཀྱིས་རང་གི་ལས་འགན་མ་བརྗེད་པར། ད་ལྟའི་འཚོ་བ་ཙམ་ལ་བློ་ཁ་མ་ཚིམས་པར། བོད་ནང་གི་བོད་མིའི་ཆེད་དུ་མུ་མཐུད་འབད་བརྩོན་བྱེད་དགོས་པའི་སྐུལ་མ་བྱས། དོན་ཚན་གཉིས་པ། བཙན་བྱོལ་བོད་མི་རྣམས་ཀྱིས་ང་ཚོའི་སྡུག་བསྔལ་ནི་རང་གི་རྒྱལ་ཁབ་ཤོར་བ་དང་། རྒྱ་ནག་གིས་བོད་བཙན་བཟུང་བྱས་པའི་དངོས་ཡོད་གནས་ཚུལ་ལས་བྱུང་བ་མ་བརྗེད་པ་བྱེད་དགོས། དོན་ཚན་གསུམ་པ། བཙན་བྱོལ་བོད་མིའི་ནང་ཁུལ་མཐུན་སྒྲིལ་དགོས་ཤིང་། ལུང་ཚན་དང་ཆོས་ལུགས་སོགས་ཀྱི་དབྱེ་བ་མ་ཕྱེ་བར། དངོས་གནས་དཔུང་པ་མཉམ་གཤིབ་ཀྱིས་མཐུན་སྒྲིལ་བྱེད་དགོས། དོན་ཚན་བཞི་པ། བཙན་བྱོལ་བོད་མི་རྣམས་ཀྱིས་ཁོང་གི་རང་ལུས་མེར་བསྲེགས་ཀྱི་རྐྱེན་གྱིས་བྱེད་དགོས་པའི་ལས་ཀ་རྣམས་མཚམས་མི་འཇོག་པར། དངོས་གནས་ཀྱི་མྱ་ངན་ནི་མུ་མཐུད་བོད་ཀྱི་ཆེད་དུ་འཐབ་རྩོད་བྱེད་དགོས་པའི་སྐུལ་མ་གནང་ཡོད།

བློ་དགའ་རང་བཙན་ལགས་ཀྱིས་ཞལ་ཆེམས་ནང་དུ་༸གོང་ས་༸སྐྱབས་མགོན་ཆེན་པོ་མཆོག་གི་མཚན་ཐེངས་མང་འདོན་བཞིན། ༸གོང་ས་མཆོག་གིས་བོད་མི་རྣམས་རང་དབང་མང་གཙོའི་ལམ་བུར་འཁྲིད་པར་བཀའ་དྲིན་རྗེས་དྲན་བྱས་པ་དང་། བོད་མི་རྣམས་ཀྱིས་༸གོང་ས་མཆོག་གི་བཀའ་སློབ་ལ་ཉན་པ་དང་ལག་ལེན་བསྟར་དགོས་པའི་སྐུལ་མ་གནང་འདུག

བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་མ་གནང་སྔོན་གྱི་ཆུ་ཚོད་གཅིག་ཙམ་ནང་ཁོང་རང་གི་འཐབ་གྲོགས་བློས་ཐུབ་ཁ་ཤས་ལ་མཐའ་མའི་ཞལ་པར་ཐོག་ཞལ་གྱེས་ཞུས་གནང་འདུག འོན་ཀྱང་མེར་བསྲེགས་གནང་གི་ཡོད་པའི་སྐོར་གང་ཡང་གསུངས་མིན་འདུག

བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་གཏང་བའི་དུས་ཚོད་ནི། རྒྱ་ནག་གིས་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་》ཟེར་བའི་ཁྲིམས་དེ་དངོས་སུ་ལག་བསྟར་བྱས་པའི་ཉིན་གཉིས་པ་དེ་ཡིན་ཞིང་། རྒྱ་ནག་གི་ཁྲིམས་སྲོལ་དེ་ནི་ “མི་རིགས་མཐུན་སྒྲིལ་” ཞེས་པའི་མིང་ཐོག་ནས། དོན་དངོས་སུ་ “གྲངས་ཉུང་མི་རིགས་” སུ་འབོད་པའི་བོད་པ་གཙོས་པའི་མི་རིགས་གཞན་རྣམས་བཙན་ཤེད་ཀྱིས་རྒྱ་ནག་ཅན་དུ་སྒྱུར་བའི་ལས་གཞི་ཞིག་ཡིན།

རྒྱ་ནག་གིས་ “ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་བརྟན་པོ་བཟོ་རྒྱུ་” ཟེར་བ་དེས། བོད་ཀྱི་ཐུན་མོང་མ་ཡིན་པའི་ཁྱད་ཆོས་དང་མི་རིགས་ཀྱི་ཁྱད་ཆོས་རྣམས་ཉེན་ཁ་ཞིག་ཏུ་བརྩི་བཞིན་ཡོད། རྒྱ་ནག་གི་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་》ཀྱི་སྙིང་པོ་ནི། “ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་བརྟན་པོ་བཟོ་རྒྱུ་” ཞེས་པའི་མིང་ཐོག་ནས། བོད་མི་རིགས་ཀྱི་ངོ་བོ་མེད་པར་བཟོ་རྒྱུ་དང་། “ཆོས་ལུགས་རྒྱ་ནག་ཅན་དུ་སྒྱུར་རྒྱུ་” ཞེས་པའི་མིང་ཐོག་ནས་ བོད་ཀྱི་དད་མོས་རང་དབང་ལ་དྲག་གནོན་བྱེད་རྒྱུ། “རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་སྤེལ་གཏོང་རྒྱུ་” ཞེས་པའི་མིང་ཐོག་ནས་བོད་ཀྱི་སྐད་ཡིག་མེད་པར་བཟོ་རྒྱུ་བཅས་ཡིན།

རྒྱ་ནག་གི་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་》གཏན་འབེབས་བྱས་པ་ནས་ཟླ་ ༧ ཚེས་ ༡ ཉིན་དངོས་སུ་ལག་བསྟར་བྱས་བར་བཙན་བྱོལ་བོད་མི་རྣམས་ཀྱིས་ད་བར་ལས་འགུལ་སྣ་ཚོགས་སྤེལ་ཏེ། རྒྱ་ནག་གི་བྱ་ངན་དེ་ལ་ངོ་རྒོལ་བྱེད་བཞིན་ཡོད།

ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་གྲངས་ ༡༦༠ ཉེ་བས་རྒྱ་ནག་གིས་བོད་ཐོག་འཛིན་པའི་དྲག་གནོན་དབང་སྒྱུར་དང་མི་རིགས་རྩ་མེད་གཏོང་བའི་སྲིད་ཇུས་ལ་ངོ་རྒོལ་བྱས་ཏེ། རང་ལུས་མེར་བསྲེགས་བཏང་བ་དངོས་སུ་ར་འཕྲོད་ཡོད།

 གཞན་ཡང་། བཙན་བྱོལ་སྤྱི་ཚོགས་ནང་དུ་ཡང་སྐུ་ལུས་མེར་བསྲེགས་ཀྱི་དོན་རྐྱེན་འགའ་ཤས་བྱུང་ཡོད་ཅིང་། དེའི་ནང་ནས་མིང་གྲགས་ཆེ་ཤོས་ནི། ཕྱི་ལོ་ ༡༩༩༨ ལོར་བོད་མི་ཐུབ་བསྟན་དངོས་གྲུབ་ (Thupten Ngodup) ལགས་ཀྱིས་རྒྱ་གར་ལྡི་ལི་གསར་པར་ཟས་བཅད་ངོ་རྒོལ་གྱི་ལས་འགུལ་སྐབས་སྐུ་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་པ་དེ་ཡིན། འདི་ནི་བོད་ཕྱི་ནང་གཉིས་ཀྱི་སྐུ་ལུས་མེར་བསྲེགས་ཀྱི་དཔེ་མཚོན་ཐོག་མ་དེ་ཡིན། ཕྱི་ལོ་ ༢༠༡༢ ལོར་རྒྱ་ནག་གི་སྲིད་འཛིན་ཟུར་པ་ཧུའུ་ཅིན་ཐའོ་རྒྱ་གར་དུ་སྐོར་སྐྱོད་ལ་ཡོང་སྐབས། བོད་མི་འཇམ་དཔལ་ཡེ་ཤེས་ (Jamphel Yeshi) ཀྱིས་ཀྱང་ལྡི་ལི་གསར་པར་སྐུ་ལུས་མེར་བསྲེགས་བཏང་ནས་འདས་གྲོངས་སུ་ཕྱིན་ཡོད།

 ཐེངས་འདིར་བློ་དགའ་རང་བཙན་ལགས་ཀྱིས་རྒྱ་ནག་གི་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་》ལག་བསྟར་བྱེད་པའི་དུས་ཚོད་འདིར། སྐུ་ལུས་མེར་བསྲེགས་བཏང་སྟེ་རང་གི་ལངས་ཕྱོགས་གསལ་སྟོན་གྱིས། རྒྱ་ནག་གིས་བོད་ནང་འཛིན་པའི་དྲག་གནོན་དབང་སྒྱུར་ལ་ངོ་རྒོལ་གནང་ཡོད། བློ་དགའ་རང་བཙན་ལགས་བོད་ཁམསཏྲེ་ཧོར་ལྕོག་རི་ཡུལ་དུ་འཁྲུངས་ཤིང་། ཆུང་དུས་ནས་ས་གནས་ཀྱི་དགོན་པར་རབ་ཏུ་བྱུང་། ༡༩༩༠ གོ་གྲངས་ནང་རྒྱ་གར་དུ་བཙན་བྱོལ་ལ་འབྱོར་རྗེས། མུ་མཐུད་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ཁོངས་ཀྱི་དགའ་ལྡན་བྱང་རྩེ་གྲྭ་ཚང་དུ་ནང་དོན་རིག་པར་སློབ་གཉེར་བྱས། ཕྱི་ལོ་ ༢༠༠༦ ལོ་ཡས་མས་ཙམ་ལ་ཨ་རིར་གནས་སྤོས་བྱས། ཁོང་ནི་བོད་ཀྱི་འཐབ་རྩོད་ལས་འགུལ་ལ་སེམས་ཁུར་ཆེ་བ་ཞིག་ཡིན་ལ། ནེའུ་ཡོག་ས་གནས་ཀྱི་བོད་མིའི་ ལྷག་དཀར་ལས་འགུལ་གསར་གཏོད་གནང་མཁན་གཅིག་ཀྱང་ཡིན།

བློ་དགའ་རང་བཙན་ལགས་ཀྱི་མིང་དངོས་ལ་བློ་བཟང་དཔལ་ལྡན་ཟེར་ཞིང་། “བློ་དགའ་རང་བཙན་” ཞེས་པའི་ “རང་བཙན་”གྱི་ཚིག་འདི་ནི་རང་ཉིད་ཀྱི་ཆབ་སྲིད་ཀྱི་དགོས་འདུན་མཚོན་ཆེད་དུ་རང་གིས་བཏགས་པའི་མིང་ཞིག་ཡིན།

 བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་ནི་ “དབུ་མའི་ལམ་” ཡིན་ནའང་། བཙན་བྱོལ་སྤྱི་ཚོགས་ནང་དུ་ “བོད་རང་བཙན་” གྱི་ལངས་ཕྱོགས་འཛིན་མཁན་མང་པོ་ཡོད་ཅིང་། ཁོང་ཚོས་ལོ་གཉིས་གསུམ་རེའི་མཚམས་སུ་ “རྒྱལ་སྤྱིའི་བོད་རང་བཙན་ཚོགས་ཆེན་” འཚོག་བཞིན་ཡོད། བློ་དགའ་རང་བཙན་ལགས་ནི་བོད་རང་བཙན་ལས་འགུལ་བ་བརྟན་པོ་ཞིག་ཡིན་ཞིང་། ཕྱི་ལོ་ ༢༠༢༤ ལོར་ཁོང་ “རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བདུན་པ་” ལ་མཉམ་ཞུགས་བྱས་ཏེ། རང་གི་ཆབ་སྲིད་ལངས་ཕྱོགས་གསལ་སྟོན་གནང་འདུག

ཐེངས་འདིར་བློ་དགའ་རང་བཙན་ལགས་ཀྱིས་ནེའུ་ཡོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ལས་ཁུངས་ཀྱི་མདུན་དུ་སྐུ་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་པའི་གནས་ཚུལ་དེས། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཁྱབ་བསྒྲགས་ཆེན་པོ་བྱུང་ཡོད། ཁོང་གིས་སྐུ་ལུས་མེར་བསྲེགས་ཀྱི་གནས་ཚུལ་ཐོས་རྗེས། འཛམ་གླིང་གང་སར་ཡོད་པའི་བཙན་བྱོལ་བོད་མི་རྣམས་ཀྱིས་བཟོད་པར་དཀའ་བའི་མྱ་ངན་བྱས་ཤིང་། རང་ཉིད་གནས་སྡོད་བྱེད་སའི་རྒྱལ་ཁབ་ཁག་ཏུ་ལས་འགུལ་སྤེལ་ཏེ། ཁོང་གི་སྐུ་ལུས་མེར་བསྲེགས་ཀྱི་བློས་གཏོང་ལ་རྗེས་དྲན་བྱས། དུས་མཚུངས་སུ་ལས་འགུལ་ནང་བློ་དགའ་རང་བཙན་ལགས་ཀྱིས་བཞག་པའི་མངོན་འདོད་ “FREE TIBET” དང་ “CHINA OUT OF TIBET” ཞེས་སྐད་འབོད་བྱས་ཏེ། རྒྱ་ནག་གིས་བོད་ཐོག་འཛིན་པའི་དྲག་གནོན་དབང་སྒྱུར་དང་། རྒྱ་ནག་གིས་བོད་ནང་ལག་བསྟར་བྱེད་པའི་མི་རིགས་རྩ་མེད་གཏོང་བའི་སྲིད་ཇུས་ལ་ངོ་རྒོལ་བྱས།

བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་ཆེད་དུ་གནང་པའི་གྲ་སྒྲིག་དང་མེར་བསྲེགས་ཀྱི་བརྒྱུད་རིམ། ས་ཚིགས། ཞལ་ཆེམས་ཀྱི་ནང་དོན་བཅས་ཕྱོགས་གང་ས་ནས་བལྟས་ན། ང་ཚོས་མཐོང་ཐུབ་པ་ནི། ཁོང་གི་སྐུ་ལུས་མེར་བསྲེགས་འདི་ནི་གྲ་སྒྲིག་ཡག་པོ་ཡོད་པ་དང་། དགོས་འདུན་དང་ཞལ་ཆེམས་ཀྱི་ནང་དོན་གསལ་པོ་ཡོད་པས། ཁོང་ནི་བོད་ཀྱི་ལས་འགུལ་བ་བྱང་ཆུབ་པ་ཞིག་ཡིན་པ་ཧ་ཅང་མངོན་གསལ་རེད།

དེ་ནི་ཁོང་གིས་ལོ་མང་འཐབ་བརྩོད་གནང་བའི་ཁྲོད་སྦྱོང་དར་གནང་བའི་འབྲས་བུ་ཞིག་རེད་ལ་ཁོང་གི་ལོ་མང་རིང་བོད་ཀྱི་རྩ་དོན་ཆེད་བློས་གཏོང་དང་འབད་བརྩོན་མང་དག་ཞིག་གནང་ཡོད་པ་སྨོས་མི་དགོས། ཁོང་ལ་བློ་རྩ་བརྟན་པོའི་ལངས་ཕྱོགས་ཡོད་ཅིང་། དེའི་ཆེད་དུ་རང་གི་སྲོག་ཀྱང་བློས་བཏང་ཡོད། བློ་དགའ་རང་བཙན་ལགས་ནི་བློ་རྒྱ་དང་སྙིང་སྟོབས་ལྡན་པའི་དོམ་དམ་པའི་བོད་ཀྱི་དཔའ་བོ་ངོ་མ་ཞིག་རེད།

ང་ཚོས་དུས་རྟག་ཏུ་བློ་དགའ་རང་བཙན་ལགས་གཙོས་པའི་བོད་ཀྱི་འཐབ་རྩོད་ཆེད་དུ་རང་གི་སྲོག་བློས་གཏོང་གནང་མཁན་གྱི་དཔའ་བོ་དཔའ་མོ་རྣམས་ལ་བཀའ་དྲིན་རྗེས་དྲན་ཞུ་རྒྱུ་དང་། ཁོང་རྣམ་པའི་ཞལ་ཆེམས་རྒྱུན་འཛིན་གྱིས་མུ་མཐུད་མདུན་སྐྱོད་བྱེད་དགོས།།