རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་མཇུག་སྒྲིལ་སོང་།

བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་སྐད་ཡིག་དང་རིག་གཞུང་གནས་ན་མི་རིགས་གསོན་པོར་གནས་ཐུབ་པས་བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་བྱ་རྒྱུ་གལ་ཆེན་ཡིན་སྐོར་གསུངས་སོང་།

དེ་རིང་ཕྱི་ཟླ་ ༧ ཚེས་ ༥ ཉིན་དྷ་ས་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་ཉིན་གྲངས་གསུམ་རིང་གི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་དངོས་སུ་མཇུག་སྒྲིལ་སོང་། མཇུག་བསྡོམས་མཛད་སྒོའི་སྟེང་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་། འཇར་མན་གྱི་དབུས་གཡས་ཕྱོགས་སྲིད་དོན་ཚོགས་པའི་རྒྱ་གར་གྱི་ཐེབས་རྩ་(Konrad-Adenauer-Stiftung) ཁང་གི་འགན་འཛིན་ལས་རོགས་ཨན་ཇི་ལི་ར་ཝ་ཌི་ (Ms. Anjali Rawat) ལགས། ཕྱི་དྲིལ་དྲུང་འཕར་རྣམ་རྒྱལ་ཚེ་དབང་ལགས། ཕྱི་དྲིལ་ཟུང་དྲུང་འབྲུག་བསྟན་སྐྱིད་ལགས། དེ་བཞིན་ཕྱི་དྲིལ་ལས་ཁུངས་ཀྱི་འབྲེལ་ཡོད་ལས་བྱེད་རྣམས་དང་འཛམ་གླིང་རྒྱལ་ཁབ་ ༡༣ ནས་བོད་པའི་གཞོན་སྐྱེས་ ༩༨ ཚོགས་བཅར་ཞུས་འདུག

བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་ཕྱི་དྲིལ་ལས་ཁུངས་ཀྱིས་གོ་སྒྲིག་གནང་བའི་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པའི་ཐོག་ཕེབས་པའི་རང་རིགས་གཞོན་སྐྱེས་རྣམ་པ་དང་། ཕྱི་དྲིལ་ལས་ཁུངས་ཀྱི་འབྲེལ་ཡོད་ལས་བྱེད། གསུང་བཤད་གནང་མཁན་རྣམས་ལ་གྲོས་ཚོགས་ཀྱི་ཚབ་དང་སྒེར་གྱི་ངོས་ནས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། བོད་དེ་རྒྱ་ནག་གཞུང་གིས་བཙན་བཟུང་བྱས་ཏེ་བོད་ནང་གི་བོད་མིའི་འགྲོ་འདུག་སྤྱོད་གསུམ་ལ་དམ་དྲག་ཤུགས་ཆེན་བྱས་དང་བྱེད་མུས་ཡིན་པ་མ་ཟད། རྒྱ་ནག་གིས་བོད་ནང་གི་བོད་ཕྲུག་ས་ཡ་གཅིག་ཙམ་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་ཡོད་པ་རེད། ང་ཚོས་བོད་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་བྱ་རྒྱུ་དགོས་གལ་ཆེན་པོ་རེད། ཁྱེད་རྣམ་པ་ཕྱི་རྒྱལ་དུ་གནས་སྡོད་བྱེད་ཀྱིན་ཡོད་པ་དང་། ཕྱི་རྒྱལ་དུ་སྐད་ཡིག་གཞན་གྱི་ཤུགས་རྐྱེན་ཧ་ཅང་ཆེན་པོ་ཡོད་པར་སོང་། ཕྱི་རྒྱལ་གྱི་སློབ་གྲྭ་ཁག་དང་སྤྱི་ཚོགས་ཁྲོད་བོད་སྐད་བེད་སྤྱོད་གཏོང་མཁན་ཧ་ཅང་ཉུང་ཉུང་རེད། དེར་བརྟེན་སོ་སོའི་ཁྱིམ་ཚང་ནས་བོད་ཀྱི་སྐད་ཡིག་བེད་སྤྱོད་བཏང་ནས་སོ་སོའི་སྐད་ཡིག་ལ་དོ་སྣང་དང་སྤྲོ་བ་སླེབས་ཐུབ་པ་བཟོ་རྒྱུ་གལ་ཆེན་པོ་རེད་འདུག་ལ། བོད་ཀྱི་སྐད་ཡིག་ལ་དོ་སྣང་བསླེབ་པར་བོད་ཡིག་བཀླག་རྒྱུ་དང་འབྲི་རྒྱུའི་ཐད་དོ་སྣང་མང་ཙམ་བྱ་དགོས། ད་དུང་ང་ཚོ་བོད་པ་ཡིན་པའི་ཆ་ནས་བོད་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་བྱ་རྒྱུའི་འོས་འགན་ཡོད་ལ། སྐད་ཡིག་དང་རིག་གཞུང་གནས་ན་མི་རིགས་དེ་གསོན་པོར་གནས་ཐུབ་ཀྱི་ཡོད། ཅེས་གསུངས་སོང་།

ཡང་ཚོགས་གཞོན་མཆོག་གིས། མི་རིགས་ཀྱི་མ་འོངས་པའི་མདུན་ལམ་ནི་གཞོན་སྐྱེས་རྣམས་ཀྱི་ཤེས་ཡོན་ལ་རག་ལས་ཡོད་ཅིང་། རང་མི་རིགས་ཀྱི་སྲོལ་རྒྱུན་གྱི་རིག་གནས་དང་དེང་དུས་ཀྱི་ཤེས་ཡོན། ཁྲིམས་ལུགས། ཆབ་སྲིད་བཅས་ལ་སློབ་སྦྱོང་ཧུར་ཐག་བྱས་ནས་རྒྱལ་སྤྱིའི་སྟེང་བོད་ཀྱི་རྩ་དོན་གླེང་སློང་བྱེད་ཐུབ་པའི་ཤེས་ཡོན་དང་འཇོན་ཐང་གཉིས་ཀ་ལྡན་པའི་མི་སྣ་སྐྱེད་བསྲིང་དང་གསོ་སྐྱོང་བྱེད་དགོས་ཀྱི་ཡོད། གཞན་ཡང་། རྒྱ་ནག་གི་བཙན་གནོན་ལ་གདོང་ལེན་བྱེད་པར་བོད་མི་ནང་ཁུལ་ཆོས་ལུགས་དང་ལུང་ཚན། ལྟ་གྲུབ་སོགས་ཀྱི་དབྱེ་བ་མེད་པར་བོད་མི་རྣམས་ཆིག་སྒྲིལ་བྱ་རྒྱུ་ནི་ནུས་པ་ཆེ་ཤོས་ཡིན་ཞིང་། ནང་ཁུལ་གྱི་མཐུན་ལམ་ནི་དགྲ་བོར་གདོང་ལེན་བྱེད་པའི་མཚོན་ཆ་རེད། ད་དུང་དྲང་བདེན་དང་ཞི་བའི་ལམ་ནས་རང་གི་ཐོབ་ཐང་དང་རང་དབང་གི་ཆེད་དུ་བོད་དོན་འཐབ་རྩོད་བྱེད་པ་དང་། བོད་ཀྱི་ལོ་རྒྱུས་ལ་སློབ་གཉེར་བྱས་ཏེ་སོ་སོའི་མི་རིགས་ཀྱི་ལོ་རྒྱུས་ཤེས་རྟོགས་ཀྱིས་རང་གི་བདག་དབང་རྩོད་ལེན་བྱ་རྒྱུ་དང་། བོད་ནང་འབྱུང་བཞིན་པའི་བདེན་པའི་གནས་ཚུལ་རྣམས་ཕྱི་གསལ་ནང་གསལ་གྱིས་རྒྱལ་སྤྱིའི་སྤྱི་ཚོགས་དང་གསར་འགྱུར་བརྒྱུད་ལམ་ཁག་ཏུ་ཕྱིར་བསྒྲགས་བྱེད་རྒྱུ་དགོས་གལ་ཆེ་ཁར། ཕྱིའི་རྒྱལ་ཁབ་ཁག་དང་རྒྱལ་སྤྱིའི་ཚོགས་སྡེ་ཁག་གི་རྒྱབ་སྐྱོར་འཚོལ་ཐབས་བྱེད་དགོས། བོད་ཀྱི་རྩ་དོན་དང་དམིགས་ཡུལ་འགྲུབ་པའི་ཆེད་དུ་ཚོགས་པ་ཚད་ལྡན་ཞིག་གསར་འཛུགས་བྱེད་པ་དང་། རྒྱལ་སྤྱིའི་ཁྲིམས་ལུགས་དང་འགྲོ་བ་མིའི་ཐོབ་ཐང་གི་རྩ་འཛིན་དམིགས་ཚད་བཟུང་སྟེ་བོད་མི་རིགས་ཀྱི་ཐོབ་ཐང་དང་རང་དབང་སྲུང་སྐྱོབ་ཡོང་ཐབས་ཀྱི་ལས་དོན་བསྒྲུབ་དགོས་གལ་ཆེན་པོ་རེད། ཅེས་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།