༧སྐུའི་འཁྲུངས་སྐར་དུས་ཆེན་སྲུང་གཙིའི་གཞུང་འབྲེལ་མཛད་སྒོ་འཚོགས།

༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ཀྱི་དགུང་གྲངས་ ༩༡ ལ་ཕེབས་པའི་༧སྐུའི་འཁྲུངས་སྐར་དུས་ཆེན་གྱི་གཞུང་འབྲེལ་མཛད་སྒོ་འཚོགས་སོང་།

ལོ་ལྟར་ཕྱི་ཟླ་ ༧ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་དུས་ཆེན་སྲུང་གཙི་ཞུ་ཡི་ཡོད་པ་ལྟར། དེ་རིང་ཕྱི་ཟླ་ ༧ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༡ ལ་ཕེབས་པའི་༧སྐུའི་འཁྲུངས་སྐར་ཉིན་མོ་སྲུང་གཙིའི་གཞུང་འབྲེལ་མཛད་སྒོ་འཚོགས་སོང་། འཁྲུངས་སྐར་དུས་ཆེན་གྱི་མཛད་སྒོའི་ཐོག་སྐུ་མགྲོན་གཙོ་བོ་ཀང་ར་རྫོང་དཔོན་སྐུ་ཞབས་ཧེམ་ར་ཇི་ (Dr. Hemraj Bairwa) མཆོག་དང་། སྲིད་ཚབ་ཆོས་རིག་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་མཆོག བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། སློབ་གྲྭ་ཁག་གི་སློབ་མ་དང་མི་མང་སོགས་ཚང་འཛོམས་གནང་འདུག ཐེངས་འདིའི་མཛད་སྒོའི་ཐོག་ཀང་ར་རྫོང་དཔོན་སྐུ་ཞབས་ཧེམ་ར་ཇི་མཆོག་གིས་ཞབས་ལོ་ ༢༥ འཁོར་བའི་བོད་མིའི་སྒྲིག་འཛུགས་ཀྱི་ལས་བྱེད་ ༥ ལ་ལེགས་སྐྱེས་ཕུལ་བ་དང་། སྲིད་ཚབ་མཆོག་གིས་བོད་མིའི་སྒྲིག་འཛུགས་ཀྱི་ལས་བྱེད་ལས་དོན་གཟེངས་ཐོན་གཟེངས་རྟགས་ཐོབ་མཁན་གཉིས་ལ་གཟེངས་རྟགས་དང་ཕྱག་འཁྱེར་གནང་སོང་།

ཐོག་མར་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱངས་གནང་བའི་ནང་། རྒྱལ་ཀུན་སྙིང་རྗེའི་རང་གཟུགས་འཕགས་མཆོག་འཇིག་རྟེན་མགོན་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག མཐའ་ཡས་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ། འཇིག་རྟེན་ཞི་བདེའི་དེད་དཔོན་ཆེན་པོ། ལྷར་བཅས་སྲིད་ཞིའི་གཙུག་རྒྱན་༸གོང་ས་སྐུ་ཕྲེང་བཅུ་བཞི་པ་ཆེན་པོ། དོན་གྱི་སླད་དུ་མཚན་ནས་སྨོས་ན་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་བོད་ཤིང་ཕག་ཟླ་ ༥ ཚེས་ ༥ ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་བོད་མདོ་སྨད་ས་ཡིས་ཐིག་ལེར་ཁྱིམ་གཞིས་སུ་ཡབ་ཡུམ་རིགས་རུས་ཆོ་འབྲང་ཕུན་སུམ་ཚོགས་པར་བསམ་བཞིན་དུ་སྲིད་པ་བཟུང་སྟེ་འདི་ལོར་དགུང་གྲངས་ ༩༡ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཁྱད་པར་ཅན་གྱི་ཉིན་མོར། འཛམ་གླིང་ཁྱོན་ཡོངས་སུ་སྤྲོ་སེམས་འཁོལ་བའི་ངང་རྣམ་དཀར་དགེ་བའི་ལས་ལ་འབུངས་ཤིང་བསོད་ནམས་གསོག་སྒྲུབ་ལ་བྲེལ་བའི་སྐབས་འདིར། སོར་བཅུའི་འདབ་མ་སྙིང་ཁར་བཟུང་སྟེ་༸རྒྱལ་དབང་མཆོག་ལ་གུས་ཕྱག་གྲངས་མེད་སྔོན་དུ་ཕུལ་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བོད་མི་མང་སྤྱི་འཐུས་ལྷན་ཚོགས་ནས་དགའ་དད་སྤྲོ་གསུམ་གྱི་ངང་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། མུ་མཐའ་མེད་པའི་སྐྱེ་འགྲོ་སྤྱི་དང་སྒོས་སུ་བདག་ཅག་ཉམ་ཐག་བོད་འབངས་རྣམས་ལ་མགོན་སྐྱབས་དཔུང་གཉེན། སྐྱབས་དང་རེ་ས་འཆའ་ཡུལ་༸སྐྱབས་མགོན་དོན་གྱི་བདག་པོ་ཁྱེད་ཉིད་གཅིག་པུར་ངེས་པ་ལགས་ན་མགོན་པོ་མཆོག་༸ཞབས་པད་མི་འགྱུར་ཆོས་དབྱིངས་ཀུན་ཏུ་བཟང་པོའི་ངོ་བོར་རྟག་ཏུ་བརྟན་ཅིང་། མཛད་འཕྲིན་འཇིག་རྟེན་ཀུན་ལ་དར་ཁྱབ་ཡོང་བའི་གསོལ་འདེབས་དང་སྨོན་འདུན་ཤུགས་དྲག་ཞུ་རྒྱུ་ཡིན།

༸གོང་ས་ཡིད་བཞིན་ནོར་བུ་མཆོག་དགུང་གྲངས་ ༩༠ ལ་ཕེབས་པའི་༸རྒྱལ་བའི་གོ་སྟོན་དང་བསྟུན་བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༢༥ ཟླ་ ༧ ཚེས་ ༦ ནས་ ༢༠༢༦ ཟླ་ ༧ ཚེས་ ༥ བར་ལོ་འཁོར་མོར་བྱམས་བརྩེའི་ལོ་སྲུང་བརྩི་ཞུ་རྒྱུའི་ཆ་ཤས་སུ། འཛམ་གླིང་ས་ཕྱོགས་གང་སར་བོད་མི་གནས་སྡོད་ལྟ་ཅི། ཧི་མ་ལ་ཡའི་རི་རྒྱུད་སྤུན་ཟླ་རྣམས་ཀྱིས་གཙོས། ༸གོང་ས་མཆོག་ལ་དད་གུས་རྩེ་གཅིག་ཞུ་མཁན་ཕྱི་རྒྱལ་རྒྱབ་སྐྱོར་བ་དང་བོད་ཀྱི་གྲོགས་པོ་རྣམས་ནས་༸རྒྱལ་བའི་དགོངས་གཞི་དང་མཛད་པ་འཕྲིན་ལས་དང་འབྲེལ་བའི་ལས་རིམ་སྣ་མང་བསྒྲིགས་ཏེ་༸རྒྱལ་བའི་གོ་སྟོན་གྱི་བྱམས་བརྩེའི་ལོ་སྲུང་བརྩི་ཟབ་རྒྱས་ཞུས་ཐུབ་པ་བྱུང་ཡོད་པ་མ་ཟད། ༸གོང་ས་མཆོག་གི་ཐུགས་དགོངས་ནི་གཞི་རྒྱ་ཆེ་ལ་གཏིང་ཟབ་ཅིང་། འཛམ་གླིང་གི་ཁོར་ཡུག་སྲུང་སྐྱོབ་དང་འགྲོ་བ་རིགས་དྲུག་སེམས་ཅན་ཐམས་ཅད་ལ་ཕན་པ་ཇི་ཙམ་བྱས་པ་དེ་ཚོད་ཀྱིས་སེམས་ཅན་ཀུན་ལ་བདེ་སྐྱིད་སྦྱིན་པ་དང་འཛམ་གླིང་ཞི་བདེར་བཀོད་པའི་ནུས་པ་ཡོད་པར་སོང་། རླབས་ཆེན་གྱི་ཐུགས་བསྐྱེད་དམ་བཅའ་བཞི་སྟེ་འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས། ཆོས་ལུགས་ཕན་ཚུན་མཐུན་འབྲེལ། བོད་ཀྱི་ཆོས་རིག་འཛིན་སྐྱོང་སྤེལ་གསུམ། རྒྱ་གར་གནའ་རབས་ཀྱི་རིག་གཞུང་དང་། ཆོས་ལུགས་དང་མ་འབྲེལ་བའི་བཟང་སྤྱོད་བཅས་དེང་གི་ཤེས་ཡོན་ལམ་ལུགས་དང་མཉམ་སྦྲེལ་གྱིས་བསྐྱར་གསོ་གནང་རྒྱུ་བཅས་ཀྱི་ཐོག་ལ་ཚང་མས་དུས་རྟག་ཏུ་སློབ་སྦྱོང་བྱས་ཏེ། དེ་དག་ལག་ལེན་དུ་བསྟར་ཐུབ་པ་བྱ་རྒྱུ་དང་། རྒྱུན་དུ་བྱམས་བརྩེས་ཀུན་ལ་ཕན་པ་བསྒྲུབ་རྒྱུ་ནི་༸རྒྱལ་བ་དགྱེས་པའི་མཆོད་སྤྲིན་དུ་འགྱུར་ངེས་ལ་སོང་དེ་དོན་ཚང་མས་མཛད་ཕྱོགས་ཡོང་བའི་སྐུལ་མ་ཞུ་རྒྱུ་ཡིན།

ཕྱི་ལོ་ ༢༠༢༦ ཟླ་ ༣ ཚེས་ ༡༢ ཉིན་རྒྱ་ནག་དམར་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་གཏན་འབེབས་བྱས་པ་འདི་ལོའི་ཕྱི་ཟླ་ ༧ ཚེས་ ༡ ནས་དངོས་སུ་ལག་བསྟར་བྱ་རྒྱུ་ཡིན་པར། བོད་ནང་བོད་ཕྲུག་ལོ་ན་མ་སོན་པ་རྣམས་བཅའ་སྡོད་སློབ་གྲྭར་བཙན་འཁྲིད་ཀྱིས་བོད་མི་རིགས་ཀྱི་ངོ་བོ་དང་རིག་གཞུང་གི་སྲོག་རྩ་བོད་ཀྱི་སྐད་ཡིག་རྒྱུན་འཛིན་ཐུབ་རྒྱུའི་རེ་བ་བྲལ་བ་ཙམ་དུ་མ་ཟད། ཕ་མའི་བྱམས་བརྩེས་ཕོངས་པའི་གནས་སུ་གྱར་ཡོད་ན། འདི་ལོའི་འགོ་སྟོད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་ཀྱི་སྐད་ཡིག་ནི་རིག་གཞུང་གི་གནད་འགག་ཡིན་པ་ཤེས་པ་བྱས་ཏེ་བོད་ཀྱི་སྐད་ཡིག་ཐོག་དམིགས་བསལ་དོ་སྣང་དགོས་པའི་བཀའ་སློབ་ཟབ་མོ་ཕེབས་པ་བཞིན། རང་དབང་ལུང་པར་གནས་པའི་བོད་མི་ཡིན་ནོ་ཅོག་གིས་བོད་ཕྲུག་ན་གཞོན་རྣམས་ལ་སོ་སོའི་སྐད་ཡིག་གང་ཐུབ་ཅི་ཐུབ་ཀྱིས་བེད་སྤྱད་དེ་མི་ཉམས་རྒྱུན་འཛིན་བྱ་རྒྱུའི་ལས་འགན་ངོ་འཕྲོད་ཐུབ་པ་ཙམ་དུ་མ་ཟད། ན་གཞོན་རྣམས་རྒྱན་རྩེད་རིགས་དང་བག་མེད་ལོངས་སྤྱོད་ཀྱིས་རང་ཉིད་དང་ཁྱིམ་ཚང་། བོད་མི་རིགས་ཕུང་གཞིའི་ལས་ལ་མིི་འཇུག་པར་ཡ་རབས་བཟང་པོའི་སྤྱོད་པར་འབད་འབུངས་ལྷོད་མེད་གནང་གལ་གྱི་དྲན་སྐུལ་ཡང་ཞུ་རྒྱུ་ཡིན།

ཕྱི་ལོ་ ༢༠༢༦ ཟླ་ ༧ ཚེས་ ༡ ཉིན་རྒྱ་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དངོས་སུ་ལག་བསྟར་བྱས་པའི་ཉིན་གཉིས་པར། ཨ་རིའི་གྲོང་ཁྱེར་ནིའུ་ཡོག་ཏུ་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ཐང་དུ་ཨ་རིའི་གྲོང་ཁྱེར་ནིའུ་ཡོག་ཏུ་གནས་སྡོད་རྒྱལ་གཅེས་དཔའ་བོ་བློ་བཟང་དཔལ་ལྡན་ནམ་རང་བཙན་བློ་དགའ་ལགས་ནས་བོད་ཀྱི་རྒྱལ་དར་འཁྱེར་ནས་ལམ་མདོར་རྒྱལ་དར་སྒྲེང་འཛུགས་གནང་བ་དང་། ཨིན་ཡིག་ནང་རྒྱ་ནག་བོད་ནས་ཕྱིར་ཐོན་དགོས་ (China Out Of Tibet) ཞེས་པ་སོགས་བསྣམས་ཤིང་བཀྲམ་ནས། རྒྱ་གཞུང་གིས་བོད་རྩ་མེད་བཟོ་རྒྱུའི་སྲིད་བྱུས་སྣ་ཚོགས་སྤེལ་བཞིན་ཡོད་པར་ངོ་རྒོལ་གྱིས་རང་ལུས་མེར་བསྲེགས་བཏང་ནས་མཐར་སྐུ་ཚེ་མ་ཟིན་པའི་གནས་ཚུལ་ཐོན་ཡོད།

རང་ལུས་མེར་བསྲེགས་མ་གནང་བའི་སྔོན་ལ་མཐའ་མའི་ཞལ་ཆེམས་ཀྱི་བརྙན་ཐུང་ནང་། “རྒྱ་ནག་གུང་ཁྲན་གྱིས་བོད་ལ་འཛིན་པའི་སྲིད་བྱུས་དང་། བོད་མི་རིགས་རྩ་མེད་རང་གཏོང་རྒྱུའི་ཆེད་དུ་ལས་འགུལ་སྤེལ་གྱི་ཡོད་ཅེས་དང་། ང་རང་ཚོ་དངོས་གནས་དྲང་གནས་ཟེར་རྒྱུ་དེ། མི་རིགས་གཅིག་གི་འཐབ་རྩོད་ཀྱི་ཆེད་དུ་གཞི་རྩའི་གང་ཡང་བྱེད་མི་དགོས་པའི་ཐོག་ནས་རྩ་བ་ནས་རག་གི་མ་རེད། དེ་ཡིན་པར་སོང་ང་ཚོ་བཙན་བྱོལ་གྱི་ནང་ལ་སྡོད་མཁན་དེ་ཚོས་ཤུགས་མང་ཙམ་ཞིག་རྒྱག་དགོས་འདུག་ཅེས་དང་། བོད་རྒྱལ་ཁབ་ཀྱི་ཆེད་དུ་ལས་ཀ་ལས་དགོས་ཀྱི་རེད། བོད་མི་རིགས་ཀྱི་ཆེད་དུ་ལས་ཀ་ལས་དགོས་རེད། ད་ལྟ་ང་ཚོ་གང་གར་འགྲོ་བ་མིའི་ཐོབ་ཐང་མི་འདུག སྨྲ་བརྗོད་རང་དབང་མི་འདུག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་བཞག་རྒྱུའི་རང་དབང་མི་འདུག་ཟེར་དུས། རང་དབང་ཡོངས་སུ་རྫོགས་པ་དེ་ག་རེ་བྱས་ནས་མེད་པ་རེད། བོད་རང་བཙན་ཤོར་བའི་རྒྱུ་མཚན་ལ་བརྟེན་ནས་མེད་པར་ཆགས་པ་རེད། རྒྱུ་མཚན་དེ་ཡིན་དུས་ང་ཚོ་གང་གས་ཉིན་མོ་དེ་རིང་ནས་བཟུང་སྟེ། བོད་གཞུང་ཡིན་ནའང་རེད། སྤྱི་འཐུས་གྲོས་ཚོགས་ཡིན་ནའང་རེད། བོད་མི་མང་ཡིན་ནའང་རེད། གང་ག་རྡོག་རྩ་གཅིག་ཏུ་སྒྲིལ་ནས་དེ་རིང་ནས་བཟུང་སྟེ་ང་ཚོ་བོད་རྒྱལ་ཁབ་དང་མི་རིགས་འདིའི་ཆེད་དུ་ང་ཚོ་གང་གས་ཕྱག་ལས་གནང་རྒྱུ་དང་རྡོག་རྩ་ཆིག་སྒྲིལ་བྱ་རྒྱུ་དེ་དཔེ་མི་སྲིད་པའི་གལ་ཆེན་པོ་རེད་འདུག་ཅེས་དང་། ང་ཚོ་རང་བཙན་ཤོར་བའི་རྒྱུ་མཚན་ལ་བརྟེན་ནས་རེད་དཱ། རང་བཙན་རག་པ་ཡིན་ན་ང་ཚོར་གང་ག་ཡོད་པ་རེད། དེ་ཡིན་དུས་ང་ཚོར་ག་རེ་དགོས་ཀྱི་རེད། རང་བཙན་དགོས་ཀྱི་ཡོད་པ་རེད། རང་བཙན་ཆེད་དུ་ག་རེ་བྱེད་དགོས་ཀྱི་རེད། གང་གས་དཀའ་ལས་རྒྱག་དགོས་ཀྱི་རེད། དེ་མི་གང་གས་མུ་མཐུད་ནས་དཀའ་ལས་རྒྱག་རོགས་གནང་ཞེས་ཞུ་རྒྱུ་ཡིན། བོད་རང་བཙན་རྒྱལ་ལོ། བོད་རྒྱལ་ལོ། བོད་རང་བཙན་རྒྱལ་ལོ།” ཞེས་གསུངས་པ་བཞིན་བོད་དང་བོད་དོན་ཆེད་དུ་དམ་པ་ཁོང་ནས་རང་གི་རྩ་ཆེའི་ལུས་སྲོག་བློས་གཏོང་གནང་བ་ནི་བོད་ཀྱི་ལོ་རྒྱུས་ནང་ནམ་ཡང་བསུབ་ཏུ་མེད་པའི་རླབས་ཆེན་གྱི་མཛད་རྗེས་ཤིག་ཡིན་པ་མ་ཟད། ཕྱི་ལོ་ ༢༠༠༩ ནས་བཟུང་ད་བར་བོད་གཞིས་བྱེས་གཉིས་སུ་རྒྱུན་མ་ཆད་པར་རང་ལུས་མེར་བསྲེགས་གཏོང་གནང་མཁན་བརྒྱ་ཕྲག་གཅིག་དང་ཕྱེད་ལྷག་བྱུང་བ་འདི་ནི་འཛམ་གླིང་གི་ལོ་རྒྱུས་ནང་རང་ལུས་མེར་བསྲེགས་བཏང་སྟེ་ཞི་རྒོལ་གྱི་ལས་འགུལ་ཡུན་རིང་ཤོས་དང་། གྲངས་ཚད་མང་ཤོས་ཤིག་ཆགས་ཡོད་པས་རྒྱལ་སྤྱིའི་ནང་གཞུང་ཁག་དང་། གྲོས་ཚོགས། མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་སྡེ་ཚན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེར་ཛ་དྲག་ངང་ཁྲིམས་དོན་བསྐྱར་ཞིབ་གནང་སྟེ། མི་རིགས་རྩ་གཏོར་གྱི་ནག་ཉེས་འགོག་སྡོམ་གྱི་ཐབས་ཚུལ་གང་ཡོད་བསྟེན་ཏེ་འགོག་ཐབས་ཡོང་བའི་རེ་སྐུལ་ཞུ་རྒྱུ་དང་། ལྷག་པར་དུ་རྒྱ་ནག་དབུས་སའི་གཞུང་གི་དཔོན་རིགས་ཁག་ནས་དཔྱད་ཞིབ་མཐིལ་ཕྱིན་བྱས་ཏེ་བོད་ཐོག་མཁྲེགས་འཛིན་གྱིས་དྲག་གནོན་དང་། སྡུག་རྩུབ་ཅན་གྱི་སྲིད་བྱུས་རྣམས་འཕྲལ་དུ་མཚམས་འཇོག་གིས་དོན་ཕན་ལྡན་པའི་བོད་རྒྱ་གཉིས་དབར་དཀའ་རྙོག་སེལ་ཐབས་དགོས་པའི་གྲོས་མོལ་གྱི་ལས་དོན་འཕྲལ་དུ་འགོ་འཛུགས་དགོས་པ་ནན་སྐུལ་བྱ་རྒྱུ་ཡིན།

ང་ཚོ་མི་ཡུལ་ས་མཐར་བཙན་བྱོལ་དུ་གྱར་ནས་མི་ལོ་དྲུག་ཅུ་ལྷག་བརྒལ་བའི་རིང་བོད་ཀྱི་རྩ་དོན་དང་། རིག་གཞུང་སྐད་ཡིག་སོགས་ཀྱི་ཐོག་ལ་ལྷག་བསམ་རྣམ་དག་གིས་རྒྱབ་སྐྱོར་གནང་མཁན་གཙོ་ཆེ་རྒྱ་གར་གཞུང་མང་གཉིས་དང་། ཨ་རི་དང་ཡུ་རོབ་གཉིས་ཀྱིས་གཙོས་བོད་དོན་རྒྱབ་སྐྱོར་བ་ཡོངས་ལ་བཀའ་དྲིན་ཤིན་ཏུ་ཆེ་ཞུ་རྒྱུ་དང་། སླད་མར་ཡང་བོད་དོན་བདེན་མཐའ་མ་གསལ་བར་མུ་མཐུད་རོགས་སྐྱོར་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན། ཞེས་གསལ་འདུག

སྲིད་ཚབ་ཆོས་རིག་བཀའ་བློན་མཆོག་གིས་བཀའ་ཤག་གི་གསུང་བཤད་སྒྲོགས་སྦྱངས་གནང་བའི་ནང་། དེ་རིང་ལྷར་བཅས་སྲིད་ཞིའི་གཙུག་རྒྱན་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་དགུ་བཅུ་གོ་གཅིག་ལ་ཕེབས་པའི་༸འཁྲུངས་ལྷ་དབྱར་གསོལ་གྱི་དུས་བཟང་འདིར། བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་ཕུལ་བའི་ཐོག་ནས་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབས་ཅིག་ཏུ། དུས་སྟོན་མཛད་སྒོར་ཆེད་ཕེབས་གནང་མཁན་སྐུ་མགྲོན་རྣམ་པ་དང། སེར་སྐྱ་མང་ཚོགས། དེ་བཞིན་འཛམ་གླིང་ཁྱོན་དུ་དུས་སྟོན་ལ་མཉམ་རོལ་བྱེད་མཁན་ཚང་མར་སྤྲོ་སེམས་འཁོལ་བའི་ངང་འཚམས་འདྲི་ཞུ་རྒྱུ་ཡིན།

བཀའ་ཤག་གིས་སྔ་ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༠ ལ་ཕེབས་པའི་གོ་སྟོན་གྱི་དུས་ཚིགས་ཁྱད་པར་ཅན་དང་བསྟུན། ༸མགོན་པོ་མཆོག་གི་བཀའ་དྲིན་དྲན་ཤེས་དང་། མཛད་ཁུར་རྣམ་བཞིའི་དགོངས་བཞེད་ཁྱབ་སྤེལ་ལ་དམིགས་ཏེ། འཛམ་གླིང་ཁྱོན་དུ་བྱམས་བརྩེའི་ལོ་འཁོར་སྲུང་བརྩི་ཞུ་རྒྱུའི་ལས་རིམ་གསལ་བསྒྲགས་ཞུས་པ་བཞིན། བོད་རིགས་དང་བོད་ཀྱི་གྲོགས་པོ་ཚོས་རྣམ་དཔྱོད་ལྡན་པའི་ལས་འགུལ་སྣེ་མང་ཞིག་སྤེལ་འདུག་པར་སྙིང་ཐག་པ་ནས་ཐུགས་རྗེ་ཆེ་ཞུ་གི་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས། མི་སྒེར་དང༌། ཁྱིམ་ཚང༌། སྤྱི་ཚོགས་བཅས་སུ་བདེ་སྐྱིད་འབྱུང་བའི་གཞི་རྩར་འགྲོ་བ་མིའི་རྒྱུད་ཀྱི་ཡ་རབས་བཟང་སྤྱོད་གོང་མཐོར་སྤེལ་ཐབས་དང་། ཆོས་ལུགས་འདྲ་མིན་ལ་ལྟ་བ་དང་གྲུབ་མཐའ་འདྲ་མིན་ཡོད་ཀྱང༌། བྱམས་པ་དང༌། བརྩེ་བ། བཟོད་སྒོམ། ཆོག་ཤེས། ཚུལ་ཁྲིམས་བཅས་ཀྱི་བསླབ་བྱ་གཅིག་མཚུངས་སུ་ཉམས་ལེན་བྱེད་པའི་ཆ་ནས་ཕན་ཚུན་གུས་བརྩིའི་ཐོག་ཆོས་ལུགས་མཐུན་སྒྲིལ་སྐུལ་སྤེལ། བྱམས་བརྩེའི་གདམ་ངག་གིས་ཕྱུག་པའི་བོད་ཀྱི་ཆོས་དང་རིག་གཞུང་ཉམས་དམས་དང་། འཛམ་གླིང་སྣེ་གསུམ་པའི་ཁོར་ཡུག་ཉམས་རྒུད་ཀྱི་གྱོང་གུད་ནི་འགྲོ་བ་མི་ཐུན་མོང་ལ་ཕོག་ངེས་པའི་ཆ་ནས་བོད་ཀྱི་རྩ་དོན་ལ་ཐུགས་ཁུར། རྒྱ་གར་གྱི་གནའ་བོའི་སེམས་ཁམས་རིག་པ་དང་། ཚད་མའི་རྣམ་གཞག ལྟ་གྲུབ་དང་འབྲེལ་བའི་སྒོམ་སྒྲུབ། ཆོས་ལུགས་དང་མ་འབྲེལ་བའི་སྤྱོད་བཟང་བཅས་དེང་རབས་ཀྱི་ཤེས་ཡོན་ལམ་ལུགས་དང་མཉམ་སྦྲེལ་གྱིས་བསྐྱར་གསོ་བྱུང་ན། བྱམས་བརྩེ་ལྡན་པའི་འཛམ་གླིང་ཞིག་འཛུགས་སྐྲུན་བྱེད་པར་ཕན་ཐོགས་ཐུབ་པར་ངོས་འཛིན་གྱིས་མངོན་འགྱུར་ཡོང་ཐབས་སུ་སྐུལ་སློང་གནང་གི་ཡོད་པ་བཅས་རླབས་ཆེན་གྱི་མཛད་ཁུར་བཞི་བདག་གིར་བཞེས་པ་ནི། མི་རིགས་དང་། ཡུལ་ལུང་དབྱེ་བགོས་བྱས་པའི་སྒོས་ཚན་བྱེ་བྲག་པའི་ཁེ་གྱོང་ལ་དམིགས་པ་ཞིག་མ་ཡིན་པར། གོ་ལ་འདིའི་སྣོད་བཅུད་གཉིས་ཞི་བདེ་བག་ཕེབས་ཡོང་བའི་ཐབས་ཚུལ་རྨད་དུ་བྱུང་བ་ཞིག་ཡིན་པས། ༸མགོན་པོ་མཆོག་གི་རླབས་ཆེན་དགོངས་བཞེད་འདི་དག་ཁྱབ་སྤེལ་ཞུ་རྒྱུ་ནི་ང་ཚོ་འགྲོ་བ་མི་ཐུན་མོང་གི་འགན་ཁུར་ཆགས་ཡོད།

བོད་མིའི་སྒྲིག་འཛུགས་ནས་བྱམས་བརྩེའི་ལོ་འཁོར་ནང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་ཁུར་རྣམ་བཞིའི་དགོངས་བཞེད་ཁྱབ་སྤེལ་གྱི་ལས་རིམ་འཆར་སྒྲིག་བཞིན། དབུས་ལས་ཁུངས་ཁག་ནས་འགན་ཁུར་བླངས་ཏེ། ཕྱི་རྒྱལ་སྐུ་ཚབ་དོན་གཅོད་དང་། ས་གནས་འགོ་འཛིན་སོ་སོའི་ཁྱབ་ཁོངས་ས་གནས་ཁག་ཏུ་༸གོང་ས་མཆོག་གི་མཛད་རྣམ་དང་མཛད་ཁུར་རྣམ་བཞིའི་སྐོར་གྱི་པར་རིས་འགྲེམས་སྟོན་དང་། རྣམ་པ་ཅི་རིགས་ཀྱི་ཚོགས་འདུ། མཁས་པའི་བགྲོ་གླེང་། གོ་རྟོགས་ལས་འགུལ་གོ་སྒྲིག ༸གོང་ས་མཆོག་ནས་ལྗགས་རྩོམ་མཛད་པའི་”བོད་དང་བོད་མིའི་མགྲིན་ཚབ་”སོགས་དཔེ་དེབ་འགྲེམས་སྤྲོད་དང་། ཡུལ་ལུང་ཁག་ཅིག་གི་སྐད་ཡིག་ཏུ་རྩོམ་སྒྱུར་པར་སྐྲུན། ཞི་བདེའི་སྐྱེས་བུ་དང་བདེ་སྐྱིད་ཀྱི་ཤེས་རབ་སོགས་དངོས་བྱུང་གློག་བརྙན་དང་། ༸རྒྱལ་བའི་མཛད་འཕྲིན་སྐོར་གྱི་གློག་བརྙན་གཟིགས་འབུལ། ༸རྒྱལ་བའི་བཀའ་སློབ་དུམ་བུ་ཟུར་འདོན་གྱིས་སྐད་ཡིག་སྣ་མང་ཐོག་སྤྱི་ཚོགས་དྲ་ལམ་དུ་འགྲེམས་སྤེལ།་དུས་སྟོན་དང་འབྲེལ་བའི་རྗེས་དྲན་དངོས་པོ་བགོ་འགྲེམས། ༸སྐུའི་གོ་སྟོན་ལོ་ཐོ་འགྲེམས་སྤྲོད། རྒྱལ་སྤྱིའི་གྲོང་ཁྱེར་ཆེ་ཁག་གི་གཞུང་ལམ་དང་འབབ་ཚུགས་སུ་༸རྒྱལ་བའི་སྐུ་པར་དང་བཀའ་སློབ་ཅན་གྱི་འཕྲེད་དར་དང་སྦྱར་ཡིག་བཟོ་འགྲེམས། རྩོམ་རིག་དང་རྩེད་རིགས་འགྲན་བསྡུར། རྒྱལ་སྤྱིའི་སྒྱུ་རྩལ་དུས་སྟོན་ནང་མཉམ་ཞུགས་དང་། བོད་ཀྱི་རིག་གཞུང་དུས་སྟོན་གོ་སྒྲིག །རིག་གཞུང་འཁྲབ་སྟོན་སྐོར་བསྐྱོད་སོགས་ཀྱི་ལས་རིམ་རྣམས་ལེགས་གྲུབ་བྱུང་ཡོད།

དེང་སང་མིས་བཟོས་པའི་དམག་འཁྲུག་དང་འབྱུང་བའི་གོད་ཆག་མང་དག་ཅིག་གཅིག་རྗེས་གཉིས་མཐུད་དུ་ཡོང་བཞིན་པའི་སྐབས་འདིར། དེའི་གཉེན་པོ་ནུས་པ་ལྡན་ཤོས་ནི་མིའི་སེམས་རྒྱུད་ལ་བྱམས་བརྩེའི་ས་བོན་བཏབ་སྟེ། ཡ་རབས་བཟང་སྤྱོད་གསོ་སྐྱོང་བྱ་རྒྱུ་དེ་ཡིན་པས། བྱམས་བརྩེའི་ལོ་འཁོར་འདི་ལོ་ཡུན་གཅིག་ནང་རྫོགས་འགྲོ་བ་ཞིག་ལ་ངོས་འཛིན་མི་བྱེད་པར། སོ་སོའི་ཁྱིམ་ཚང་ནས་འགོ་བཙུགས་ཏེ། མི་རེ་ངོ་རེས་ཉིན་ཟླ་ལོ་བརྩེགས་ཀྱིས་མི་ཚེ་ཧྲིལ་པོར་ཉམས་ལེན་ལ་འབད་འབུངས་ཡོང་བའི་རེ་སྐུལ་ཞུ་གི་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་ཁུར་རྣམ་བཞི་ནི་འཛམ་གླིང་ཞི་བདེ་དང་། མི་ཚེ་བདེ་སྐྱིད་སྒྲུབ་པའི་ཐབས་ཚུལ་རྨད་དུ་བྱུང་བ་ཞིག་ཡིན་པས། འགྲོ་བ་མི་རྣམས་གཅིག་གྱུར་གྱི་འདུ་ཤེས་བཟུང་སྟེ་བཟང་སྤྱོད་གོང་སྤེལ་དང། སློབ་གསོ་ལམ་ལུགས་ནང་དུ་སྤྱི་སེམས་བཟང་གསུམ་གྱི་སློབ་གཉེར་འཛུགས་སྐྱོང་། འབྱུང་ཁམས་དོ་སྙོམས་ཡོང་བར་ཁོར་ཡུག་སྲུང་སྐྱོབ། འགལ་ཟླ་དང་རྩོད་རྙོག་སེལ་བར་འཚེ་བ་མེད་པ་དང་གྲོས་མོལ་གྱི་ཐབས་ལམ་གཞིར་འཛིན་དགོས་པའི་བཞེད་དགོངས་ལ་རྒྱལ་སྤྱིའི་ཁྱོན་དུ་རྒྱ་ཁྱབ་ངང་ངོས་ལེན་གྱིས་ལག་བསྟར་བྱེད་བཞིན་པའི་སྐོར་དང་། བོད་དོན་བདེན་པའི་འཐབ་རྩོད་ལའང་སྐྱེ་འགྲོ་ཀུན་གྱིས་དོ་སྣང་ཆེན་པོ་བྱེད་ཀྱི་ཡོད་པའི་གནས་སྟངས་རྣམས་བཀའ་ཤག་གི་གཏམ་བཤད་སྔ་མ་ཁག་ཏུ་རགས་རིམ་ཞིག་ངོ་སྤྲོད་ཞུས་ཡོད།

ཡིན་ནའང་། རྒྱ་ནག་ལ་མཚོན་ན། དུས་རབས་འདིའི་ནང་འཛམ་གླིང་གི་དཔལ་འབྱོར་གནས་བབས་ཨང་གཉིས་པར་སླེབས་པ་དང་བསྟུན། ཆབ་སྲིད་དང་དམག་ཤུགས་ཀྱི་གདེང་ཚོད་འཕར་མ་སླེབས་ཏེ། རྒྱལ་སྤྱིའི་ནང་རྩོད་གཞི་སློང་བའི་བྱ་སྤྱོད་རིམ་པར་ཐོན་བཞིན་པ་མ་ཟད། རྒྱལ་ཁབ་ཀྱི་མངའ་ཁོངས་སུ་བཙན་གྱིས་བཅུག་པའི་མི་རིགས་གཞན་རྣམས་རྒྱ་རིགས་སུ་བསྒྱུར་རྒྱུའི་སྲིད་ཇུས་གདུག་རྩུབ་ཇེ་ཆེར་འགྲོ་བཞིན་པ་དང་། ལྷག་པར་འདི་ཟླའི་ཚེས་ ༡ ནས་ལག་ལེན་འགོ་འཛུགས་བྱེད་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེས། མི་རིགས་རྩ་གཏོར་གྱི་བྱེད་སྒོ་རྣམས་མངོན་སུམ་གྱི་དམིགས་འབེན་དུ་བཞག་ཡོད།

རྒྱལ་སྤྱིའི་ཁྲིམས་ལུགས་དང་། རྒྱ་ནག་གི་རྩ་ཁྲིམས་སུ་རྒྱ་གུང་ཁྲན་གཞུང་དང་། དེའི་དབང་འཛིན་པ་ཚོར་མི་རིགས་རྩ་གཏོར་གཏོང་རྒྱུའི་འགན་དབང་སྤྲད་མེད་ལ། བོད་རིགས་ཐེ་བའི་རྒྱ་ནག་གི་མངའ་ཁོངས་སུ་བཅུག་པའི་མི་རིགས་སུ་ལའང་རང་ཉིད་ཀྱི་ངོ་བོ་ནག་གསུབ་གཏོང་དུ་འཇུག་རྒྱུའི་འདོད་པ་མེད་ངེས་ཡིན་པ་མ་ཟད། ཁྲིམས་ཡིག་དེ་ནི་རྒྱ་གུང་ཁྲན་གཞུང་ལ་ “མི་རིགས་རྩ་མེད་བཟོ་བའི་དམིགས་རྟེན་” (Intent to destroy) ཇི་ཡོད་ཀྱི་ངོ་མའི་དཔང་རྟགས་རྒྱ་གཞུང་རང་གིས་རྒྱལ་སྤྱིའི་སྤྱི་ཚོགས་ཀྱི་མདུན་སར་འདོན་སྤྲོད་བྱས་པ་ཞིག་དང་། དེ་ལས་ནག་ཉེས་ཀྱི་བྱ་སྤྱོད་ (Actus Reus) དང་། ནག་ཉེས་ཀྱི་ཀུན་སློང་ (Mens Rea) གཉིས་ཐད་ནས་རྒྱ་གཞུང་གི་མི་རིགས་རྩ་གཏོར་གྱི་བྱ་སྤྱོད་དེ་དག་ཁུངས་སྐྱེལ་ར་སྤྲོད་བྱེད་ཐུབ་ཀྱི་ཡོད་པས། “མི་རིགས་རྩ་གཏོར་གཏོང་བའི་ཉེས་པ་བཀག་འགོག་དང་ཆད་གཅོད་བྱེད་པའི་ཆིངས་ཡིག་”དང་། མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་གཞིར་བཟུང་བཀག་སྡོམ་བྱེད་མ་ཐུབ་ཚེ། རྒྱ་གུང་ཁྲན་གཞུང་གིས་གོམ་པ་རྗེས་མ་གང་དུ་སྤོ་མིན་དང་། རྒྱལ་སྤྱིའི་སྤྱི་ཚོགས་ལ་ཉམས་ཚོད་ཇི་ལྟར་ལེན་ཐུབ་མིན། རྒྱལ་སྤྱིའི་སྤྱི་ཚོགས་ནས་དེར་གདོང་ལེན་ཇི་ལྟར་བྱེད་མིན་གྱིས། གོ་ལ་འདི་མ་འོངས་པར་གུ་དོག་གི་ལམ་ཁ་ཞིག་ཏུ་འགྲོའམ། གུ་ཡངས་ཀྱི་ལམ་ཁ་ཞིག་ཏུ་འགྲོ་མིན་གྱི་མཚམས་ཐིག་ཀྱང་འགོ་ཚུགས་ས་ཁྲིམས་ཡིག་དེ་ལྟ་བུས་འཛིན་ཆོག

རྒྱ་གུང་ཁྲན་གཞུང་གིས་སོ་སོའི་དམར་པོའི་ལྟ་བ་ལངས་ཕྱོགས་ཁྱིམ་མཚེས་རྒྱལ་ཁབ་ཁག་གིས་མཚོན་པའི་རྒྱལ་སྤྱིའི་ནང་བཙན་འགེལ་བྱས་དང་བྱེད་བཞིན་པའི་ངན་འབྲས་རྣམ་སྨིན་རྣམས་ད་ཆ་མི་མང་པོའི་མཐོང་ལམ་དུ་མངོན་པར་བརྟེན་ནས་དོགས་ཟོན་བྱེད་འགོ་ཚུགས་ཡོད་ནའང་། མི་རིགས་རྩ་གཏོར་གཏོང་བའི་ཁྲིམས་ཡིག་དེ་ལྟ་བུ་སོ་སོའི་རྒྱལ་ཁབ་ཀྱི་མངའ་ཁོངས་ཙམ་དུ་མ་ཟད། དེའི་ཁྲིམས་ཁོངས་ཁྱབ་ཚད་རྒྱལ་མཚམས་བརྒལ་ཏེ། ཁྲིམས་ཡིག་དེ་ལག་བསྟར་ལ་གནོད་སྐྱོན་དང་། མི་རིགས་ཁ་བྲལ་གྱི་བྱ་སྤྱོད་སྤེལ་མཁན་ལ་ཁྲིམས་ལུགས་ཀྱི་འགན་འཁྲི་བརྩད་གཅོད་བྱ་རྒྱུ་ཞེས་བསྒྲགས་ཡོད་པས། རྒྱལ་སྤྱིའི་སྤྱི་ཚོགས་ནས་རྒྱ་གཞུང་གི་བྱ་སྤྱོད་མཐར་ལྷུང་དེ་རིགས་འགོག་སྡོམ་བྱེད་མ་ཐུབ་ན། རྒྱ་གཞུང་གི་མིག་ནང་དུ་མི་མཛེས་པའི་མི་སུ་ལའང་ཁྲིམས་ཆད་གཏོང་སྲིད།

ཁྲིམས་ཡིག་དེས་རྒྱ་ནག་རྒྱལ་ཁོངས་སུ་བཅུག་པའི་མི་རིགས་ཁག་དང་། རྒྱལ་ཁོངས་ཕྱི་ལོགས་སུ་མི་རིགས་དེ་དག་གི་ཆོས་ལུགས་དད་མོས་དང་རིག་གཞུང་། ཡུལ་སྲོལ་གོམས་གཤིས་ལ་འབྲེལ་བ་ཆགས་པའི་ཚོགས་པ་དང་མི་སྒེར་གྱི་འགྲོ་བ་མིའི་གཞི་རྩའི་ཐོབ་ཐང་ལ་དོ་ཕོག་བརྡལ་བཤིག་ཅི་ཙམ་ཐེབས་མིན་ནི་རྒྱ་གུང་ཁྲན་གཞུང་གི་འདོད་པ་ཁོ་ནར་རག་ལས་པ་ཞིག་མིན་པར། མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་ཚན་པ་ཁག་དང་། རྒྱལ་ཁབ་སོ་སོའི་གཞུང་ངོས་ནས་འགྲོ་བ་མིའི་རིགས་ཐུན་མོང་གི་རིན་ཐང་དང་། གོ་ལ་ཧྲིལ་པོའི་ཁེ་ཕན་གྱི་ཚད་གཞི་ཐོག་ནས་རྒྱ་ནག་གཞུང་ལ་སྐྱོན་བསྲང་གི་ཤུགས་རྐྱེན་ཇི་ལྟར་སྤྲོད་ཐུབ་མིན་ལའང་གཏུགས་ཡོད་ཅིང་། རྩ་མེད་ཀྱི་དམིགས་འབེན་དུ་བཞག་པའི་བོད་གཞིས་བྱེས་གཉིས་ནས་གདོང་ལེན་གྱི་འགན་ཁུར་ཅི་ཙམ་ལེན་ཐུབ་མིན་ཡང་གནད་འགག་གཙོ་བོ་ཆགས་ཡོད།

ཕྱི་ཟླ་ ༧ ཚེས་ ༢ ཉིན། བོད་མི་བློ་བཟང་དཔལ་ལྡན་ནམ་བློ་དགའ་རང་བཙན་ཞུ་བ་ཁོང་གིས་ཨ་རིའི་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན། བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་བསྲེགས་ཀྱིས་སྐུ་སྲོག་བློས་གཏོང་གནང་ཡོད་པ་དང་། བོད་ནང་ནས་ཀྱང་ད་བར་ཤེས་རྟོགས་བྱུང་བ་བོད་མི་ ༡༥༧ ནས་སྐུ་ལུས་ཞུགས་འབུལ་གནང་སྟེ། རྒྱ་གཞུང་གིས་བོད་མི་རིགས་རྩ་གཏོར་གཏོང་བའི་སྲིད་ཇུས་ལ་རྒྱལ་སྤྱིའི་སྤྱི་ཚོགས་ཀྱི་དོ་སྣང་འདྲེན་ཐབས་སུ་ཞི་རྒོལ་ལས་འགུལ་སྤེལ་ཡོད།

བཀའ་ཤག་གིས་རྒྱ་གཞུང་གི་མི་རིགས་རྩ་གཏོར་གྱི་ཁྲིམས་ཡིག་དེར་དམིགས་པའི་ཐབས་ཇུས་འཆར་སྒྲིག་བྱེད་འགོ་ཚུགས་པ་བཞིན། ཞིབ་ཆའི་གདོང་ལེན་བྱེད་སྒོ་རྣམས་སྐབས་མཚམས་ལག་བསྟར་བྱ་རྒྱུ་ཡིན་ཞིང་། ཁྲིམས་ཡིག་དེའི་དམིགས་འབེན་དུ་མི་སྒེར་དང་། ཁྱིམ་ཚང་ནས་འགོ་བཙུགས་ཏེ། མི་རིགས་ཀྱི་ངོ་རྟགས་རྒྱ་བསྒྱུར་དང་། ལོ་རྒྱུས་རྒྱ་བསྒྱུར། བསམ་བློ་རྒྱ་བསྒྱུར། ཆོས་ལུགས་རྒྱ་བསྒྱུར། སྐད་ཡིག་རྒྱ་བསྒྱུར། གོམས་གཤིས་རྒྱ་བསྒྱུར། མཚོན་རྟགས་རྒྱ་བསྒྱུར་སོགས་རྒྱལ་ཁབ་ཀྱི་འཕྲུལ་འཁོར་མ་ལག་དང་། འཛིན་སྐྱོང་མ་ལག །སྤྱི་ཚོགས་བཅོས་སྐྱོང་མ་ལག །དཔལ་འབྱོར་འཛུགས་སྐྲུན་མ་ལག་བརྒྱུད་ནས་བཙན་འགེལ་དང་། ཁྲིམས་ལུགས་ཀྱི་འགན་འཁྲི་བརྩད་གཅོད་བརྒྱུད་ནས་མཇུག་གནོན་བྱ་རྒྱུ་ཡིན་པ་ལྟར། གཞིས་བྱེས་བོད་མི་ཡོངས་ནས་དེར་བསྟུན་གྱི་གདོང་ལེན་བྱེད་དགོས།

རྒྱ་གུང་ཁྲན་གྱི་གཞུང་འཛིན་པ་དེ་ཚོ་ནི་ཉོན་མོངས་དུག་གསུམ་གྱི་གཞན་དབང་དུ་སོང་བའི་སྙིང་རྗེའི་ཡུལ་ཡིན་ནའང་། རྒྱལ་སྤྱིའི་ཁྲིམས་ལུགས་དང་། འགྲོ་བ་མིའི་བཟང་སྤྱོད་ལ་རྒྱབ་ཀྱིས་ཕྱོགས་པའི་མ་རུང་བའི་ཉེས་སྤྱོད་དེ་རིགས་ངན་པ་རྒྱ་ཡན་དུ་གཏོང་ཐབས་ཡེ་ནས་མེད་པས། དཔོན་རིགས་དེ་ཚོས་གདུག་རྩུབ་དང་། མཁྲེགས་འཛིན་གྱི་བསམ་སྤྱོད་དོར་ཏེ། མི་རིགས་ཕན་ཚུན་འདྲ་མཉམ་དང་མཐུན་སྒྲིལ་གྱི་སྒོ་ནས་སྤྱི་ཚོགས་བརྟན་ལྷིང་ཡོང་ཆེད། ཁྲིམས་ཡིག་དེ་ལམ་འཕྲལ་ཕྱིར་བསྡུ་དང་། ལག་བསྟར་མཚམས་འཇོག་དགོས་གལ། ཞེས་འཁོད་འདུག

སྐུ་མགྲོན་གཙོ་བོ་ཀང་ར་རྫོང་དཔོན་སྐུ་ཞབས་ཧེམ་ར་ཇི་མཆོག་གིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༡ ལ་ཕེབས་པའི་འཁྲུངས་སྐར་ཉིན་མོ་དང་བསྟུན། ངས་དྷ་རམ་ས་ལའི་མངའ་སྡེ་གཞུང་དང་ཀང་ར་རྫོང་གི་ཚབ་ཞུས་ནས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། འདས་ལོར་༧སྐུའི་གོ་སྟོན་ཉིན་མོ་སྲུང་གཙི་ཞུས་ཡོད་ཅིང་། བོད་མིའི་སྒྲིག་འཛུགས་ཀྱིི་ངོས་ནས་ལོ་འཁོར་མོ་གཅིག་གི་རིང་བྱམས་བརྩེའི་ལོ་སྲུང་གཙི་ཞུས་ཡོད་པ་རེད། བོད་མིའི་སྒྲིག་འཛུགས་ཀྱིས་༧སྐུའི་གོ་སྟོན་དང་བྱམས་བརྩེའི་ལོ་སྲུང་གཙི་དང་འབྲེལ་ནས་ལས་གཞི་སྣ་མང་སྤེལ་ཐུབ་པར་འཚམས་འདྲི་ཞུ་རྒྱུ་ཡིན། དེ་བཞིན་འཛམ་གླིང་ས་ཕྱོགས་གང་སར་བྱམས་བརྩེའི་ལོ་སྲུང་གཙི་ཞུས་པར་དགའ་བསུ་ཡོད། བྱམས་བརྩེའི་ལོ་སྲུང་གཙི་དང་འབྲེལ་ནས་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་གོ་རྟོགས་ཀྱི་ལས་གཞི་སྣ་མང་སྤེལ་ཐུབ་པར་རྗེས་སུ་ཡི་རངས་ཞུ་ཡི་ཡོད། བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་དང་། བོད་མི་རྣམས་ལ་ཕྱོགས་གང་ཅིའི་ཐད་ནས་རོགས་འདེགས་ཞུས་དང་ཞུ་མུས་ཡིན་ལ། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་མི་རྣམས་ཀྱིས་མུ་མཐུད་དུ་བོད་བརྒྱུད་ནང་བསྟན་དང་རྒྱ་གར་གྱི་གནའ་བོའི་རིག་གཞུང་སོགས་མི་ཉམས་རྒྱུན་འཛིན་བྱེད་པར་ཐུགས་རྗེ་ཆེ་ཞུ་རྒྱུ་དང་། དྷ་སར་དགོན་སྡེ་ཁག་མང་པོ་ཡོད་པས་ཡུལ་སྐོར་སྤྲོ་འཆམ་པ་མང་པོ་ཞིག་གནས་སྐོར་དུ་བསླེབས་ཏེ་ས་གནས་ཡུལ་མི་རྣམས་ཀྱི་འཚོ་གནས་ལ་ཕན་ཐོགས་ཆེན་པོ་བྱུང་ཡོད། ༧མགོན་པོ་གང་ཉིད་མཆོག་ནི་འཛམ་ཡོངས་ཀྱི་ཆོས་ལུགས་ཀྱི་དབུ་ཁྲིད་ཅིག་ཡིན་པ་མ་ཟད། ད་ལྟ་རྩོད་རྙོག་ཆེ་བའི་དུས་སྐབས་དང་དེང་རབས་འཕྲུལ་རིག་གི་དུས་འདིར། ཁོང་ཉིད་ནི་ཞི་བདེ་དང་སྙིང་རྗེ། འཛམ་གླིང་སྤྱི་ཡོངས་ཀྱི་འགན་འཁྲིའི་མཚོན་རྟགས་ཤིག་ཀྱང་རེད། ཅེས་དང་། ༧གོང་ས་མཆོག་གི་བཀའ་སློབ་ལམ་སྟོན་གནང་བ་གཞིར་བཟུང་ཚང་མས་ཉིན་ལྟར་སོ་སོའི་འཚོ་བའི་ཁྲོད་ལག་བསྟར་བྱ་རྒྱུ་གལ་ཆེན་ཡིན་པ་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།