༧གོང་ས་རྒྱལ་བ་རིན་པོ་ཆེ་མཆོག་ནས་ཕལ་ཆེར་དགུང་ལོ་ ༡༣༠ ཙམ་སྡོད་པའི་རྨི་ལམ་དང་མཚན་མ་བྱུང་ཞེས་གསུངས། 

དྭགས་ཀྱི་ཕོ་བྲང་ཞི་བའི་ཚལ་གྱི་གསུང་ཆོས་རྭ་བའི་ནང་༧གོང་ས་མཆོག་དགུང་གྲངས་ ༩༡ ལ་ཕེབས་པའི་འཁྲུངས་སྐར་སྲུང་གཙི་ཞུས་ཏེ་བོད་མིའི་སྒྲིག་འཛུགས་ཀྱི་བྱམས་བརྩེའི་ལོ་མཇུག་སྒྲིལ་ཡོད་འདུག

ཕྱི་ཚེས་ ༦ ཉིན་ཏེ་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་དང་བསྟུན། དབུས་བོད་མིའི་སྒྲིག་འཛུགས་དང་། ལ་དྭགས་ནང་ཚོགས་དང་དགོན་ཚོགས་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག ༧མགོན་པོ་གང་ཉིད་མཆོག་དགུང་གྲངས་ ༩༡ ལ་ཕེབས་པའི་སྐུའི་འཁྲུངས་སྐར་ཟབ་རྒྱས་ཤིག་སྲུང་གཙི་ཞུས་ཡོད་ཅིང་། འཁྲུངས་སྐར་སྲུང་གཙིའི་མཛད་སྒོའི་ཐོག་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུས། སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག ལ་དྭགས་ནང་པ་ཚོགས་པའི་དབུ་སྐྱོང་དང་ལ་དྭགས་དགོན་སྤྱི་ཚོགས་པའི་ཚོགས་གཙོ་སོགས་ས་གནས་ཡུལ་མི་དང་བོད་མི། དེ་བཞིན་དད་ལྡན་དོན་གཉེར་ཅན་སྟོང་ཕྲག་མང་པོ་ཞིག་ཆེད་ཕེབས་གནང་ཡོད་པ་རེད།

སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་དངོས་གནས་དྲང་ནས་དམ་ཚིག་དང་དད་པ་གཡོལ་བ་མེད་པའི་མི་རིགས་ཁག་མང་པོ་ཞིག་ས་གནས་འདིར་འདུས་ནས། ངོས་རང་ཚེ་རིང་པོ་ཡོང་བའི་སྨོན་ལམ་རྒྱག་པ་སོགས་བྱས་པ་རེད། ངོས་རང་ལའང་ཆ་བཞག་ན། བསྟན་པ་རིན་ཆེན་མཆོག་གི་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག ། ཅེས་ཐུགས་སྨོན་ཇི་ལྟར་གནང་བ་ནང་བཞིན། འཛམ་གླིང་འདིར་ཆོས་དད་མེད་ན་དགེ་མཚན་ག་རེ་འདུག ངོས་རང་སྔ་མོ་རྒྱ་ནག་ཏུ་མའོ་ཙེ་ཏུང་ལ་ཐུག་པའི་སྐབས། ཆོས་ཟེར་བ་དེ་དུག་རེད་ཅེས་བཤད་མྱོང་། གང་ལྟར་དངོས་ཡོད་གནས་ཚུལ་ལ་ཆོས་ནི་ལྷ་གསོལ་བའི་སྐད་ཆ་གཅིག་པུ་མ་རེད། སེམས་རྒྱུད་ལ་བརྟག་དཔྱད་ཀྱིས་འདུལ་ཐབས་བྱེད་པ་ནི་བློ་ཆོས་སུ་འགྲོ་བའི་ཆེད་དང་། ཆོས་ལ་དད་པ་བྱེད་པའི་དགོས་དོན་སྙིང་པོ་ནི་སེམས་རྒྱུད་ཞི་ཞིང་དུལ་བ་ཞིག་དགོས་རྒྱུ་དེ་རེད། ངོས་རང་ལ་ཆ་བཞག་ན་ཞོགས་པ་ཡར་ལངས་པ་དང་བསྟན་པ་རིན་ཆེན་མཆོག་གི་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག ། ཅེས་ཕན་པའི་ལྷག་བསམ་གྱིས་ཀུན་ནས་བསླངས་ཏེ་འཛམ་བུ་གླིང་ལ་དངོས་གནས་དྲང་གནས་ཞི་བདེ་ཡོང་བ་དང་། རྒྱ་ནག་ལ་ཆ་བཞག་ན་ནང་པའི་ཆོས་ཤུགས་ཆེན་པོ་ཡོད་པ་དེ་དར་རྒྱས་ཡག་པོ་ཞིག་འགྲོ་ཐུབ་རྒྱུ་ཞིག་དང་། ང་ཚོ་བོད་ཆོལ་ཁ་གསུམ་གྱི་མི་མང་ཚང་མ་མཚོན་ནའང་ཆོས་ལ་དད་པ་ཞེ་དྲགས་ཤུགས་ཆེན་པོ་རེད། བྱས་ཙང་ང་ཚོ་ཚང་མས་སོ་སོའི་ཕ་མེས་ནས་མར་བྱུང་བའི་རིག་གཞུང་དང་སེམས་རྒྱུད་ཞི་ཞིང་དུལ་བ། གཞན་ལ་ཕན་པ་བསྒྲུབ་རྒྱུ་དེ་རེད། ཅེས་གསུངས་སོང་།

༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་སྔ་མོ་རྒྱ་ནག་ཏུ་ཕྱིན་པའི་སྐབས་སུ་ཏུང་པེ་ཁུལ་སོགས་སུ་སླེབས་སྐབས་ཆོས་ལ་དད་པའི་ཤུགས་གང་ས་གང་དུ་འདུག དེ་བཞིན་ང་ཚོ་བོད་ཆོལ་ཁ་གསུམ་གྱི་མི་མང་ཚང་མ་ཆོས་ལ་ཧ་ཅང་དད་པ་ཤུགས་ཆེན་པོ་རེད། དེར་བརྟེན། ང་ཚོ་ཚང་མ་སོ་སོའི་ཕ་མེས་ནས་རིག་གཞུང་དང་ཁྱད་མེད་ཀྱི་སེམས་རྒྱུད་ཞི་ཞིང་དུལ་བ་དང་། གཞན་ལ་ཕན་པ་སྒྲུབ་པའི་གོམས་གཤིས་ཡོད། ངོས་རང་ལ་ཆ་བཞག་ན་སྔ་མོ་རྒྱ་ནག་ལ་ཕྱིན་པ་ཡིན་ལ་ཏུང་པེ་ཁུལ་དུ་མང་པོ་བསླེབས་སོང་། ཆོས་ལ་དད་པའི་ཤུགས་དེ་གང་ས་གང་དུ་འདུག ད་ལྟ་ང་ཚོ་བཙན་བྱོལ་བ་ཆགས་ནས་རྒྱ་གར་བྱང་རྒྱུད་དུ་རུབ་རུབ་བྱས་ཏེ་བསྡད་ཡོད། རྒྱ་གར་ཡུལ་མི་ཙམ་དུ་མ་ཟད་ང་ཚོར་དགའ་མོས་བྱེད་མཁན་གྱི་མི་མང་པོ་དེ་རིང་འདིར་འཛོམས་ཡོད་རེད། ཚང་མས་བསྟན་པ་རིན་ཆེན་མཆོག་གི་མ་ཁྱབ་པའམ།། ཞེས་སོགས་ཕན་པའི་བསམ་པ་ཞི་ཞིང་དུལ་བའི་བློ་དེ་ལྟ་བུས་འཛམ་གླིང་ལ་ཞི་བདེ་ཡོང་བའི་སྨོན་ལམ་བརྒྱབ་པ་བཞིན། ངོས་རང་གིས་དངོས་གནས་དྲང་གནས་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་ཉམས་ལེན་དང་། དེ་ཟིན་པའི་ཐོག་ནས་བསྟན་པ་དང་འགྲོ་བ་ལ་ཕན་ཐོགས་རྒྱ་ཆེར་ཡོང་ཐུབ་པར་ཞོགས་པ་ཡར་ལངས་པ་དང་སྨོན་ལམ་རྒྱག་བཞིན་ཡོད། ཅེས་དང་། ངོས་རང་གིས་སྨོན་ལམ་རྟག་པར་རྒྱག་གི་ཡོད་ལ། སྨོན་ལམ་དེ་ཡང་གང་འཚམ་འགྲུབ་པ་ལྟ་བུར་མཐོང་གི་འདུག དེང་སང་རྒྱ་ནག་ལ་མཚོན་ནའང་ནང་ཆོས་ལ་དོ་སྣང་ཤུགས་ཆེན་པོ་འདུག དེ་བཞིན་འཛམ་གླིང་གི་ས་ཁུལ་མང་པོར་སངས་རྒྱས་པའི་ཆོས་ཀྱི་ནང་བྱམས་བརྩེ་ཞེས་གསུངས་པ་ལ་དོ་སྣང་དང་། ཆོས་མེད་མཁན་གྱི་ལུང་པ་དང་། ཁ་ཆེའི་ལུང་པ། ཧིན་དྷུའི་དང་པོ་འཛིན་མཁན་གྱི་ལུང་པ་སོགས་ཀྱིས་མཚོན་པའི་གང་ས་གང་དུ་ཕན་སེམས་ཀྱི་བློ་ལ་ཚང་མས་དགའ་མོས་བྱེད་བཞིན་འདུག ངོས་རང་ལ་ཆ་བཞག་ན་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་བསམ་བློ་གཏོང་གི་ཡོད། སྨོན་ལམ་རྒྱག་གི་ཡོད། དངོས་ཡོད་ཀྱི་གནས་ཚུལ་ལ་ངོས་རང་ས་ཆ་གང་ས་གང་དུ་བསླེབས་ཡོང་དུས། ཕན་པའི་བསམ་པ་དེ་རྒྱ་ཆེར་སྤེལ་ཐུབ་ན་བསམས་ནས་སྨོན་ལམ་དེ་རྒྱག་གི་ཡོད།  ཅེས་གསུངས་སོང་།

ཡང་༧མགོན་པོ་གང་ཉིད་ཀྱིས། དེ་རིང་སྐབས་སུ་བབ་པ་ངོས་རང་ལོ་ ༩༡ སླེབས་པ་རེད། ངོས་རང་གི་མི་ཚེ་ལ་ཕྱིར་བལྟས་སློག་སྐབས་དངོས་གནས་ངོས་རང་གིས་གཞན་ཕན་གྱི་བློ་དེ་རྩ་ཆེན་པོ་བྱས་ཏེ་ཞོགས་པ་གཉིད་སད་པ་དང་། བསྟན་པ་རིན་ཆེན་མཆོག་གི་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག ། ཅེས་སྨོན་རྒྱག་བཞིན་ཡོད་ལ། ད་ལྟའི་བར་དུ་ངོས་རང་ས་ཆ་གང་དུ་སླེབས་པ་ཡིན་ནའང་དགའ་མོས་བྱེད་པའི་རྒྱུ་མཚན་གཙོ་བོ་ནི་བསམ་པ་བཟང་པོ་བྱས་པ་དེ་ཆགས་ཀྱི་འདུག ངོས་རང་གི་རྨི་ལམ་ལ་བལྟས་པ་ཡིན་ན་ངོས་རང་ཕལ་ཆེར་ལོ་ ༡༣༠ ཙམ་སྡོད་པའི་མཚན་མ་ཞིག་འདུག ངོས་རང་དང་ཐད་ཀར་འབྲེལ་བ་ཡོད་པ་རྒྱ་ནག་ཏུ་སངས་རྒྱས་པའི་ཆོས་ཡག་པོ་དར་ཐུབ་པ་དང་། དེ་དང་དེས་མཚོན་པའི་ཡུལ་གྲུ་མང་པོར་ཕན་པའི་བསམ་པའི་ཀུན་སློང་བཟང་པོའི་མི་ཚེ་བསྐྱལ་རྒྱུའི་མིག་ལྟོས་བཟང་པོ་ཞིག་ཡོང་ཐུབ་པའི་སྨོན་ལམ་རྒྱག་བཞིན་ཡོད། ཐུགས་རྗེ་ཆེ། ཞེས་གསུངས།

དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་དང་བསྟུན་རྒྱ་གར་གྱི་སྲིད་བློན་སྐུ་ཞབས་མུ་དྷི་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་ལ་འཚམས་འདྲི་ཞུ། ཁོང་གི་ཞི་བདེ་དང་འཆམ་མཐུན་གྱི་བཀའ་སློབ་ནི་འཛམ་གླིང་ཡོངས་ཀྱི་མི་མང་གི་ལམ་སྟོན་ཞིག་ཡིན་ལ། ཁོང་གི་བླང་དོར་དང་སེམས་ཀྱི་སྟོབས་ཤུགས། འཛམ་གླིང་ལ་ཕན་པའི་དམ་བཅའ་བཅས་ལ་བསྔགས་བརྗོད་ཞུ། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་རིང་ཞིང་བདེ་ཐང་ཡོང་བའི་སྨོན་འདུན་ཞུ། ཅེས་གསུངས་འདུག་ལ། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། དད་གུས་དང་དགའ་སྤྲོ་ཚད་མེད་ཀྱི་ངང་ནས་འཛམ་གླིང་ཡོངས་ཀྱི་དད་ལྡན་པ་དང་བཀྲ་ཤིས་བདེ་ལེགས་ཞུ་མཁན་ས་ཡ་མང་པོ་དང་མཉམ། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༡ ལ་ཕེབས་པར་འཚམས་འདྲི་ཞུ། ༧གོང་ས་མཆོག་སྐུ་ཚེ་རིང་ཞིང་བདེ་ཐང་ཡོང་བ་དང་།  ཐུགས་དགོངས་དང་བྱམས་བརྩེའི་ལམ་སྟོན་དེ་ལོ་ངོ་མང་པོར་དར་ཞིང་རྒྱས་ཏེ་སེམས་ཅན་ཐམས་ཅད་ལ་ཞི་བདེ་དང་། འཆམ་མཐུན། ཆོས་ཀྱི་འོད་སྣང་འབྱུང་བར་ཤོག ཅེས་གསུངས་འདུག

དེ་བཞིན་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་བ་དང་བོད་དོན་རྒྱབ་སྐྱོར་བ་ལྕམ་པེ་ལོ་སི་(Nancy Pelosi) མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་འཁྲུངས་སྐར་བཀྲ་ཤིས་བདེ་ལེགས་ཞུ་རྒྱུའི་གོ་སྐབས་འདི་བདག་གི་སེམས་ནས་དགའ་སྤྲོ་ཆེན་པོས་བླངས་པ་ཡིན་ལ། མི་རབས་མང་པོར་སྐུལ་མ་གནང་མཁན་གྱི་དབུ་ཁྲིད་ལ་བཀའ་དྲིན་ཆེ། ཞེས་དང་། ༧གོང་ས་རྒྱལ་བ་རིན་པོ་ཆེ་མཆོག་དང་བོད་མི་མང་གིས་ཆོས་ལུགས་དང་། སྐད་ཡིག རིག་གཞུང་། ངོ་བོ་བཅས་སྲུང་སྐྱོབ་མུ་མཐུད་དུ་གནང་བཞིན་པར། ང་ཚོ་མི་མང་པོ་ཞིག་སྤོབས་པ་དང་བཅས་་མཉམ་དུ་ལངས་ཡོད། ཅེས་གསུངས་འདུག་ལ། དེ་བཞིན་རྒྱ་གར་རྒྱལ་ས་ལྡི་ལི་ཡི་སྤྱི་ཁྱབ་བློན་ཆེན་རེ་ཁ་གྷུ་ཊ་(Rekha Gupta) མཆོག་དང་།  འབྲས་ལྗོངས་ཀྱི་སྤྱི་ཁྱབ་བློན་ཆེན་པི་རེམ་སི་རྟ་དམག་མཆོག ཀོང་གྷེ་རི་སི་ཆབ་སྲིད་ཚོགས་པའི་མགོ་ཁྲིད་ཤ་ཤི་ཐ་རོར་ ( Shashi Tharoor) མཆོག རྒྱ་གར་དབུས་གཞུང་གི་གྲོས་ཚོགས་དང་གྲངས་ཉུང་མི་རིགས་ཀྱི་བདེ་དོན་བློན་ཆེན་སྐུ་ཞབས་ཀེ་རིན་རི་ཇི་ཇུ་(Shri. Kiren Rijiju)མཆོག རྒྱ་གར་དབུས་གཞུང་གིས་ལམ་དང་འགྲིམ་འགྲུལ་བློན་ཆེན་ནི་ཐན་གྷ་ཌི་གྷ་རི་ (Nitin Gadkari) མཆོག ཨ་སམ་གྱི་སྤྱི་ཁྱབ་བློན་ཆེན་ཧི་མན་ཊི་(Himanta  Biswasarma) མཆོག་སོགས་གཙོས། འཛམ་གླིང་ས་ཕྱོགས་གང་སར་གྱི་ཆབ་སྲིད་མི་སྣ་དང་། མགོ་ཁྲིད་སོགས་ཀྱིས་༧མགོན་པོ་གང་ཉིད་ཀྱི་འཁྲུངས་སྐར་ལ་འཚམས་འདྲི་ཞུས་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།