རྒྱ་ནག་གི་ས་ཁུལ་ཁག་ཅིག་ཏུ་ཆུ་ལོག་དང་ས་རུད་སོགས་རང་བྱུང་གོད་ཆག་བྱུང་སྟེ་མི་གྲངས་སྟོང་ཕྲག་མང་པོའི་འཚོ་བར་དོ་ཕོག་དང་ཁང་ཁྱིམ་སོགས་ལ་གཏོར་སྐྱོན་ཐེབས་འདུག
ཁ་སང་ཕྱི་ཚེས་ ༧ ཉིན་རྒྱ་ནག་གི་ཀན་སུའུ་ཞིང་ཆེན་གྱི་ནུབ་བྱང་ཁུལ་གྱི་གྲོང་གསེབ་ཏུ་ས་རུད་བྱུང་སྟེ། མི་གྲངས་ ༣༣ རྐྱེན་ལམ་དུ་ཤོར་བ་དང་། མི་གྲངས་ ༡༧ ཙམ་མྱུར་སྐྱོབ་བྱེད་ཐུབ་ཡོད་ཅིང་། ད་ལྟའི་ཆར་ས་གནས་ཀྱི་འབྲེལ་ཡོད་ཚོས་ས་རུད་ཀྱི་གོད་ཆག་བྱུང་དེའི་ཁྲོད་བོར་བརླག་ཏུ་ཕྱིན་པའི་མི་རྣམས་འཚོལ་ཞིབ་བྱས་དང་བྱེད་མུས་ཡིན་པ་མ་ཟད། ཁུལ་དེའི་ཡུལ་མི་རྣམས་ཉེན་གཡོལ་སླད་ས་གནས་གཞན་དུ་གནས་སྤོ་བྱས་ཡོད་སྐོར་རྗོད་ཀྱིན་འདུག
གཞན་ཡང་། རྒྱ་ནག་གི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཟླ་འདིའི་ཕྱི་ཚེས་ ༦ སྟེ་རེས་གཟའ་ཟླ་བའི་ཉིན་རྒྱ་ནག་ལྷོ་ཁུལ་གྱི་ཀུང་ཞི་ (Guangxi) ས་ཁུལ་དུ་ཆར་པ་ཤུགས་ཆེན་བསྟུད་མར་བབས་པའི་རྐྱེན་གྱིས་ཆུ་ལོག་རྒྱུགས་པ་དང་། རླུང་འཚུབ་འཕྱུར་ཏེ་ཉུང་མཐར་མི་གྲངས་ ༤ རྐྱེན་ལམ་དུ་ཤོར་བ་དང་། མི་གྲངས་ ༨ གར་སོང་ཆ་མེད་གྱུར་བ། དེ་བཞིན་ཉུང་མཐར་མི་གྲངས་ཁྲི་ ༥ ས་གནས་གཞན་དུ་གནས་སྤོ་བྱ་དགོས་བྱུང་འདུག ད་དུང་རྒྱ་ནག་ལྷོ་རྒྱུད་ནན་ཉིན་ (Nanning) གྲོང་ཁྱེར་དུ་ཆར་པ་བསྟུད་མར་བབས་རྐྱེན་ཆུ་ལོག་བྱུང་ཞིང་། ཁུལ་དེའི་ཆུ་རགས་གསུམ་དུ་ཆུས་ཁེངས་ཏེ་ལུད་པར་བརྟེན། ཡུལ་མི་ ༥༥,༠༠༠ ཙམ་གྱི་འཚོ་བར་དོ་ཕོག་ཤུགས་ཆེན་ཐེབས་ཡོད་འདུག
རྒྱ་ནག་ལྷོ་རྒྱུད་ནན་ཉིན་གྲོང་ཁྱེར་གྱི་དཔོན་རིགས་ཚོས། ཁུལ་དེར་ཆར་པ་བསྟུད་མར་བབས་པའི་རྐྱེན་གྱིས་ཆ་རགས་གཏོར་སྐྱོན་ཐེབས་ཏེ་ཆུ་ལོག་འབྱུང་ཉེན་ཡོད་པའི་ཉེན་བརྡ་བཏང་བ་མ་ཟད། ཆུ་ལོག་ཚོད་འཛིན་གྱི་ཛ་དྲག་མྱུར་སྐྱོབ་ཀྱི་ཚད་རིམ་མཐོ་ཤོས་སུ་སླེབས་ཡོད་སྐོར་བརྗོད་འདུག
ད་དུང་ཟླ་འདིའི་ཕྱི་ཚེས་ ༥ ཉིན་རྒྱ་ནག་གི་གུང་ཏུང་ཞིང་ཆེན་གྱི་ལྷོ་ཁུལ་དུ་ཡོད་པའི་རེན་ཧཱ་གྲོང་གསེབ་ (Renhe village) ཏུ་ཆར་པ་ཤུགས་ཆེན་བབས་རྐྱེན་ཁུལ་དེར་ཆུ་ལོག་རྒྱུགས་ནས་མི་གྲངས་ ༡༧ རྐྱེན་འདས་དང་། མི་གྲངས་བརྒྱ་ཕྲག་མང་པོར་རྨས་སྐྱོན་ཕོག་པ་མ་ཟད། མི་གྲངས་སྟོང་ཕྲག་མང་པོ་ཉེན་གཡོལ་ཆེད་ས་གནས་གཞན་དུ་གནས་སྤོ་བྱས་འདུག དེ་བཞིན། རྒྱ་ནག་དབུས་ཁུལ་གྱི་ཧུ་བྷའེ་ (Hubei) ཞིང་ཆེན་དུ་རླུང་འཚུབ་དྲག་པོ་འཕྱུར་ཏེ་ཉུང་མཐར་མི་གྲངས་ ༡༡ རྐྱེན་འདས་དང་མི་གྲངས་ ༣༣༡ ཙམ་ལ་རྨས་སྐྱོན་ཕོག་པ་མ་ཟད། ཁང་ཁྱིམ་ ༤༨༠༠ གཏོར་བཤིག་བཏང་བ་དང་ཁང་པ་ ༢༢ བརྡིབ་སྐྱོན་ཤོར་འདུག
དེ་འབྲེལ་རྒྱ་ནག་གཞུང་གི་གནམ་གཤིས་དཔྱད་རིག་པས་ཞིབ་འཇུག་བྱས་པ་བརྒྱུད། རྒྱ་ནག་གི་གུང་ཏུང་དང་། ཀེའུ་ཀྲུའུ་ (Guizhou) ཞིང་ཆེན། ཧུ་ནན་ (Hunan) ཁུལ་དུ་ཆར་པ་ཤུགས་ཆེན་འབབ་རྒྱུའི་ཚོད་དཔག་བྱེད་ཀྱིན་འདུག་ལ། རྒྱ་ནག་གི་ས་ཁུལ་གསུམ་དེའི་ནང་ཡུལ་མི་གྲངས་ས་ཡ་ ༡༥༠ ལྷག་འཚོ་སྡོད་བྱེད་ཀྱིན་ཡོད་ཅིང་། དེ་ནི་ཨུ་རུ་སུའི་མི་འབོར་ལས་མང་བ་ཆགས་ཀྱི་ཡོད་འདུག གཞན་ཡང་། གནམ་གཤིས་བརྟག་དཔྱད་རིག་པ་བ་ཁག་ཅིག་གིས། གོ་ལའི་གནམ་གཤིས་འགྱུར་ལྡོག་ཤུགས་ཆེན་ཕྱིན་པར་བརྟེན། རྒྱ་ནག་གི་མི་མང་དང་དཔལ་འབྱོར་ལ་ཉེན་ཁ་ཚབས་ཆེ་རུ་འགྲོ་བཞིན་ཡོད་པ་མ་ཟད། ཨ་སྒོར་ཐེར་འབུམ་མང་པོའི་ཞིང་ལས་ལ་ཉེན་ཁ་བཟོ་ཡི་ཡོད་པ་རེད། ཅེས་བརྗོད་འདུག
ད་ལྟའི་རྒྱ་ནག་རྒྱལ་ཡོངས་སུ་རང་བྱུང་གོད་ཆག་གི་རྐྱེན་གྱིས་ཡུལ་མིའི་འཚོ་བར་བརྡབ་གསིག་དང་གནོད་འཚེ་ཕོག་གི་ཡོད་ཅིང་། དམིགས་བསལ་གྱིས་དབྱར་ཁའི་དུས་སུ་ས་ཁུལ་ཁག་ཅིག་ལ་ཆར་པ་བསྟུད་མར་བབས་ཏེ་ཆརཤུགས་ཆེ་དྲགས་ནས་དཀའ་ངལ་འཕྲད་ཀྱི་ཡོད་འདུག་ལ། རྒྱ་ནག་གི་བྱང་ཕྱོགས་དང་དབུས་ཞིང་ཆེན་ཧེ་ནན་དང་ཧྲན་ཏུང་། ཧྲན་ཤི་སོགས་སུ་ཚ་དྲོད་ཆེ་དྲགས་པའི་དཀའ་ངལ་ཡང་འཕྲད་ཀྱིན་ཡོད་པ་རེད། དེ་འབྲེལ་ཚན་རིག་པ་རྣམས་ཀྱིས། འཛམ་གླིང་ཁྱོན་ཡོངས་སུ་བཟོ་གྲྭ་ཇེ་མང་དུ་ཕྱིན་ཏེ་འཕྲུལ་རིག་ཡར་རྒྱས་ཤུགས་ཆེན་འགྲོ་བཞིན་ཡོད་པའི་རྐྱེན་གྱིས། ཁོར་ཡུག་དང་མཁའ་རླུང་སོགས་ལ་འབག་བཙོག་ཤོར་ཏེ། གོ་ལའི་གནམ་གཤིས་འགྱུར་ལྡོག་དང་འཛམ་གླིང་གི་ཚ་དྲོད་མུ་མཐུད་དུ་འཕར་བཞིན་ཡོད་པའི་ཉེན་བརྡ་བཏང་ཡོད་པ་རེད།
འདི་ལོའི་ཕྱི་ཟླ་ ༥ པའི་ནང་རྒྱ་ནག་གི་དབུས་དང་ལྷོ་ཕྱོགས་ཁུལ་དུ་ཆར་པ་ཤུགས་ཆེན་བབས་པའི་རྐྱེན་གྱིས་ཉུང་མཐར་མི་གྲངས་ ༢༢ རྐྱེན་ལམ་དུ་ཤོར་བ་དང་། ས་ཁུལ་ཁག་ཅིག་ཏུ་ཆར་པའི་འབབ་ཚད་མཐོ་ཤོས་བྱུང་ཡོད་པ་སོགས་བསྒྲགས་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
