ཟི་ཁྲོན་ཞིང་ཆེན་ཁུལ་དུ་ཚད་རིམ་ལྔ་ཅན་གྱི་ས་ཡོམ་བསྟུད་མར་བྱུང་སྟེ་མྱུར་སྐྱོབ་ཀྱི་ཚད་རིམ་ཨང་གསུམ་པ་ཅན་གྱི་ཐོག་ནས་ཛ་དྲག་གི་མྱུར་སྐྱོབ་བྱ་དགོས་ལུགས་ཀྱི་བཀའ་ཁྱབ་བསྒྲགས་ཡོད་ཀྱང་། རྒྱ་ནག་གཞུང་གིས་མི་གྲངས་བཞི་ལས་རྨས་སྐྱོན་ཕོག་མེད་ལུགས་བསྒྲགས་ནས་དངོས་ཡོད་ཀྱི་གནས་ཚུལ་སྦས་སྐུང་བྱས།
A magnitude 5.29 earthquake struck the Sichuan province in southwestern China on Sunday, June 28, 2026
རྒྱ་ནག་གཞུང་འབྲེལ་གོ་ལའི་དུས་བབ་གསར་ཁང་གི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༧ དང་ ༨ བཅས་ཀྱི་ཞོགས་པར་རྒྱ་ནག་ཟི་ཁྲོན་ཞིང་ཆེན་གོ་ཤིན་(Gaoxian county) རྫོང་ཁོངས་སུ་ཚད་རིམ་ ༥།༠༠ ཅན་གྱི་ས་འགུལ་རྒྱུགས་ནས། ད་བར་ཉུང་མཐར་མི་གྲངས་ ༤ ལ་རྨས་སྐྱོན་ལ་ཕོག་ཡོད་ལུགས་མ་གཏོགས། ཕྱོགས་ཡོངས་ནས་གནས་ཚུལ་སྦས་སྐུང་བྱས་པའི་དབང་གིས་གསལ་ཁ་གང་ཡང་མེད་པའི་ཁར། རྒྱ་ནག་གིས་དབྱེ་བགོས་བྱས་པའི་ཟི་ཁྲོན་ཞིང་ཆེན་ཟེར་བའི་ནང་གི་བོད་མི་འདུ་སྡོད་ས་གནས་ཁག་ཏུ་ས་ཡོམ་བྱུང་ཡོད་མེད་གསལ་ཁ་གང་ཡང་མི་འདུག
རྒྱ་ནག་གཞུང་འབྲེལ་གསར་ཁང་ཁག་ལྟར་ན། ཟླ་འདིའི་ཚེས་ ༧ གྱི་ཞོགས་པར་ཟི་ཁྲོན་ཞིང་ཆེན་གོ་ཤིན་རྫོང་ཁོངས་སུ་ས་འགུལ་རྒྱུགས་ནས་མི་གྲངས་ ༢ ལ་རྨས་སྐྱོན་ཆུང་ཚགས་རེ་བྱུང་ཡོད་པའི་ཁྲོད། མི་གཅིག་ས་གནས་སྨན་ཁང་དུ་བསྐྱལ་ནས་སྨན་བཅོས་བྱས་ཡོད་ལུགས་དང་། ཕྱི་ཚེས་ ༨ ཉིན་གྱི་ཞོགས་པའི་ཆུ་ཚོད་ ༡༠།༠༨ ཀྱི་སྟེང་སླར་ཡང་ས་འགུལ་རྒྱུགས་ནས་མི་གྲངས་གཉིས་ལས་རྨས་སྐྱོན་རིགས་ཕོག་མེད་ལུགས་བསྒྲགས་འདུག་ལ། ཡུལ་དངོས་སུ་ས་འགུལ་བྱུང་རྗེས། ཟི་ཁྲོན་ས་འགུལ་མྱུར་སྐྱོབ་ཚན་པས་ཡུལ་དངོས་ནས་མྱུར་སྐྱོབ་དང་རོགས་འདེགས་བྱས་ཡོད་ལུགས་བསྒྲགས་པའི་མུར། ཡུལ་དངོས་ཀྱི་གནས་བབ་རྟོག་ཞིབ་དང་སྔོན་འགོག་རིགས་ལ་གཞོལ་དགོས་ལུགས་ཀྱི་སྐད་ཆ་སོགས་བཤད་ཡོད་ལུགས་བསྒྲགས་འདུག་ལ། རྒྱ་ནག་དབུས་ས་འགུལ་མྱུར་སྐྱོན་ཚན་པས། ཁུལ་དེར་མྱུར་སྐྱོབ་ཀྱི་ཚད་རིམ་ཨང་གསུམ་པ་(Level-III ) ཅན་གྱི་ཐོག་ནས་ཛ་དྲག་གི་མྱུར་སྐྱོབ་ཀྱི་ལས་དོན་གཉེར་དགོས་པའི་བཀའ་ཁྱབ་བསྒྲགས་འདུག
ཨ་རབ་གསར་ཁང་(Voice of Emirates) ལྟར་ན། ས་ཡོམ་དེ་ས་གནས་ཀྱི་སྔ་དྲོའི་ཆུ་ཚོད་ ༦། ༡༢ ལ་བྱུང་ཞིང་། བྱང་གི་འཕྲེད་ཐིག་ ༢༨།༥༢ དང་ཤར་གྱི་གཞུང་ཐིག་ ༡༠༤།༦༨ ཐོག་ཏུ་བྱུང་ཡོད། ས་ཡོམ་གྱིགཏིང་ཚད་ལ་སྨི་ ༨ ཙམ་ཡོད་སྟབས། ས་ཡོམ་གྱི་ཤུགས་རྐྱེན་ཉེ་འཁོར་ས་ཁུལ་ཁག་ཏུ་གསལ་པོར་ཚོར་ཐུབ་ཡོད་པ་མ་ཟད། ས་ཡོམ་གྱི་རྗེས་སུ་སྐར་མ་བཅུའི་ནང་ཚུད་དུ་རིམ་པ་ ༣།༠ ནས་ ༤།༠ བར་གྱི་ས་ཡོམ་མང་པོ་བྱུང་སྟེ། ཉེ་འཁོར་གྱི་མི་མང་རྣམས་ཁྱིམ་ནས་ཕྱིར་ཐོན་དགོས་པའི་གནད་དོན་སོགས་བྱུང་འདུག་ལ། ཁུལ་དེར་ཟླ་འདིའི་ཕྱི་ཚེས་ ༨ ཉིན་གྱི་ཞོགས་པའི་ཆུ་ཚོད་དྲུག་ནས་བརྒྱད་བར་ཉུང་མཐར་ས་འགུལ་ཐེངས་བརྒྱད་བྱུང་ཡོད་པ་མ་ཟད། ཟི་ཁྲིན་ཞིང་ཆེན་གྱི་རྒྱལ་ས་ཁྲིན་འདུ་ཁུལ་དུའང་ས་ཡོམ་གྱི་འགུལ་ཤུགས་བསླེབས་ཡོད་འདུག
རྒྱ་ནག་གཞུང་འབྲེལ་དྲ་ལམ་ཁག་ལྟར་ན། སི་ཁྲོན་ཞིང་ཆེན་ནི་ས་ཁམས་ཀྱི་གནས་ཡུལ་རྙོག་འཛིང་ཆེ་བ་དང་རི་བོ་མང་བའི་ས་ཁུལ་ཞིག་ཡིན་པས། ས་ཡོམ་ཡོང་ཉེན་ཆེ་ཤོས་ཀྱི་ས་ཁུལ་ཞིག་ཡིན་པ་མ་ཟད། ཕྱི་ལོ་ ༢༠༠༨ ཟླ་བ་ ༥ ཚེས་ ༡༢ ཉིན་ཡུལ་དེར་ཤུགས་ཚད་ ༧།༩ ས་ཡོམ་བྱུང་ནས། མི་རྒྱུ་གཉིས་ལ་གྱོང་གུན་ཆེན་པོ་བྱུང་ཡོད་སྟབས། རྒྱ་ནག་གཞུང་གིས་ས་ཁུལ་དེར་ལྟ་ཞིབ་དང་མ་དངུལ་སྤུངས་འཇོག་བྱེད་ཀྱིན་ཡོད་པ་མ་ཟད། གལ་ཏེ་ཁུལ་དེར་ས་ཡོམ་བྱུང་ཚེ་ལྷོ་རྒྱུད་དུ་ཆུ་ལོག་དང་ཆར་ཞོད་སོགས་རང་བྱུང་ཁོར་ཡུག་གི་གོད་ཆག་ཤུགས་ཆེན་འབྱུང་ཉེན་ཡོད་པ་རེད། དེ་བཞིན་རྒྱ་ནག་གཞུང་གིས་དབྱེ་བགོས་བྱས་པའི་ཟི་ཁྲོན་ཞིང་ཆེན་ཁུལ་གྱི་བོད་མི་འདུ་སྡོད་ཀྱི་ས་གནས་ཁག་ཏུ་ས་འགུལ་བྱུང་ཡོད་མེད་ཐད་གསལ་ཁ་གང་ཡང་མེད་པའི་ཁར། རྒྱ་ནག་གཞུང་གིས་དེ་སྔ་ནས་བོད་མི་རྣམས་ཀྱིས་བོད་ནང་དང་རྒྱ་ནག་ཏུ་རང་བྱུང་གོད་ཆག་དང་འབྲེལ་བའི་གནས་ཚུལ་གྱི་པར་བརྙན་སོགས་དྲ་ལམ་དུ་བསྐུར་བ་དང་ཁྱབ་སྤེལ་བྱས་པར་དམ་དྲག་ཆེན་པོ་བྱེད་མུས་ཡིན། ཕྱི་ལོ་ ༢༠༢༠ ཟླ་ ༡༠ ནང་ད་ལྟ་ས་ཡོམ་འབྱུང་སའི་ཡུལ་དངོས་གོ་ཤིན་(Gaoxian county) རྫོང་ཁོངས་ཀྱི་མི་འབོར་ཞིབ་བཤེར་ཁྲོད། ཁུལ་དེར་གནས་སྡོད་བྱེད་མཁན་བོད་རིགས་སྐྱེས་པ་བཅུ་དང་བུད་མེད་དགུ་བཅས་ཁྱོན་བོད་རིགས་ཉི་ཤུ་ལས་མེད་ལུགས་གསལ་འདུག
གཞན་ཡང་། ཟླ་འདིའི་ཕྱི་ཚེས་ ༦ ཉིན་རྒྱ་ནག་ལྷོ་ཁུལ་གྱི་ཀུང་ཞི་ (Guangxi) ས་ཁུལ་དུ་ཆར་པ་ཤུགས་ཆེན་བསྟུད་མར་བབས་པའི་རྐྱེན་གྱིས་ཆུ་ལོག་རྒྱུགས་པ་དང་། རླུང་འཚུབ་འཕྱུར་ཏེ་ཉུང་མཐར་མི་གྲངས་ ༤ རྐྱེན་ལམ་དུ་ཤོར་བ་དང་། མི་གྲངས་ ༨ གར་སོང་ཆ་མེད་གྱུར་བ། དེ་བཞིན་ཉུང་མཐར་མི་གྲངས་ཁྲི་ ༥ ས་གནས་གཞན་དུ་གནས་སྤོ་བྱ་དགོས་བྱུང་འདུག དེ་བཞིན་རྒྱ་ནག་ལྷོ་རྒྱུད་ནན་ཉིན་ (Nanning) གྲོང་ཁྱེར་དུ་ཆར་པ་བསྟུད་མར་བབས་རྐྱེན་ཆུ་ལོག་བྱུང་ཞིང་། ཁུལ་དེའི་ཆུ་རགས་གསུམ་དུ་ཆུས་ཁེངས་ཏེ་ལུད་པར་བརྟེན། ཡུལ་མི་ ༥༥,༠༠༠ ཙམ་གྱི་འཚོ་བར་དོ་ཕོག་ཤུགས་ཆེན་ཐེབས་ཡོད་འདུག་ལ། ཕྱི་ཚེས་ ༧ ཉིན་རྒྱ་ནག་གི་ཀན་སུའུ་ཞིང་ཆེན་གྱི་ནུབ་བྱང་ཁུལ་གྱི་གྲོང་གསེབ་ཏུ་ས་རུད་བྱུང་སྟེ། མི་གྲངས་ ༣༣ རྐྱེན་ལམ་དུ་ཤོར་བ་དང་། མི་གྲངས་ ༡༧ ཙམ་མྱུར་སྐྱོབ་བྱེད་ཐུབ་ཡིན་ལུགས་སོགས་བསྒྲགས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
