འདི་ལོའི་རྐང་སྤོལ་རྩེད་འགྲན་གྱི་གསེར་བུམ་བདག་པོ་དེ་སུ་ཡིན་ནམ།

 ད་ལྟ་འཛམ་གླིང་གི་རྩེད་རིགས་ཆེད་མཁས་པ་སོགས་ཀྱིས། ད་ལྟའི་རུ་ཁག་བཞི་པོའི་རྩེད་འགྲན་སྐར་ཆེན་རྣམས་ཀྱིས་རྩེད་འགྲན་ལ་བཟུང་བའི་གདེང་སྤོབས་དང་འགྲན་སེམས། དེ་བཞིན་ཕྱོགས་ཡོངས་ཀྱི་རུ་ཁག་རྣམས་ཀྱི་མཉམ་འདུས་ཀྱི་ནུས་པ་དང་གྲུབ་འབྲས་བཅས་ལ་གཞིགས་ན་རྩེད་འགྲན་གྱི་རྒྱལ་ཕམ་ཚོད་དཔག་བྱ་རྒྱུ་དཀའ་མོ་ཡིན་སྐོར་ཤོད་ཀྱིན་འདུག

སང་ཉིན་ཕྱི་ཚེས་ ༡༥ ཉིན་གྱི་མཚན་གུང་གི་རྒྱ་གར་གྱི་ཆུ་ཚོད་ ༡༢།༣༠ སྟེང་དུ་འདི་ལོའི་འཛམ་གླིང་བུམ་པ་རྟགས་མའི་སྐྱེས་པའི་རྐང་སྤོལ་རྩེད་འགྲན་གྱི་བཞི་རྩོད་ཀྱི་རྩེད་འགྲན་དེ་ཧྥ་རན་སི་དང་སི་པེན། དེ་བཞིན་གནངས་ཉིན་ཨར་ཇིན་ཊི་ན་དང་དབྱིན་ཡུལ་གཉིས་བར་རྩེད་འགྲན་བྱ་རྒྱུ་ཡིན་ཞིང་། དེ་ལས་རྣམ་པར་རྒྱལ་མཁན་གྱི་རུ་ཁག་གཉིས་རྟིང་རྩོད་དུ་ཚུད་ཀྱི་ཡོད་སྟབས། གོ་ལ་ཡོངས་ཀྱི་ལྒང་ཞེན་པ་རྣམས་ཀྱིས་རྩེད་འགྲན་དེ་དག་ལ་ངང་སྒུག་ཆེན་པོ་བྱེད་བཞིན་པའི་མུར། བཙན་བྱོལ་བོད་མིའི་རྒྱལ་ས་དྷ་སའི་ཁུལ་དུའང་། ཚོང་པ་དང་། ལྒང་ཞེན་པ་རྣམ་པ། དེ་བཞིན་ལྟད་མོ་རྣམས་ཀྱིས་ཚ་ཚ་འུར་འུར་ངང་འདི་ལོའི་རྐང་སྤོལ་འགྲན་ཚོགས་ཆེན་པོ་དེ་གླེང་ཞིང་། དེའི་ཆེད་དུ་གྲ་སྒྲིག་བྱས་དང་བྱེད་མུས་ཡིན་འདུག་པས། ཁྱེད་ཅག་གིས་བལྟས་ན་འདི་ལོའི་འཛམ་གླིང་རྐང་སྤོལ་འགྲན་ཚོགས་ཀྱི་རྐང་སྤོལ་རྒྱལ་པོ་དང་གསེར་ཐོའི་བདག་པོ་དེ་སུ་ཡིན་ནམ། 

 འདི་ལོའི་ཕྱི་ཟླ་ ༦ ཚེས ༡༡ ཉིན་ཧྥི་ཧྥ་རྩེད་འགྲན་གྱི་རྒྱལ་ཁབ་རིམ་པའི་རྐང་སྤོལ་རྩེད་འགྲན་གྱི་རྩེ་ཏོག་རྒྱལ་ཁབ་ཉི་ཤུ་ཐམ་པ་གསལ་བསྒྲགས་བྱས་པའི་ཁྲོད།  ཨར་ཇིན་ཊི་ན་ཨང་རིམ་དང་པོ་དང་སི་པེན་གཉིས་པ། ཧྥ་རན་སི་གསུམ་པ། དེ་བཞིན་དབྱིན་ཡུལ་བཞི་པ་བཅས་སུ་ངོས་འཛིན་བྱས་ཡོད་ལ། ད་བར་གྱི་རྩེད་འགྲན་གྱི་དྲག་འདེམས་རིམ་པ་དང་། རུ་ཁག་དེ་དག་ཀྱང་ཕམ་ཕུད་(knock Out) རྩེད་འགྲན་སོགས་ཀྱི་རྩེད་འགྲན་ལས་རྣམ་པ་རྒྱལ་ནས་མཐའ་མའི་རྩེ་ཏོག་གི་རུ་ཁག་བཞི་ཡི་གྲལ་དུ་ཚུད་ཡོད། དེ་རིང་འདི་གའི་གསར་འགོད་པས་འཛམ་གླིང་གི་ཆེས་སྐད་གྲགས་ཆེ་བའི་མིས་བཟོས་རིག་ནུས་ཏེ་ཅ་ཊི་ཇི་པི་ཊི་ (Chat GPT) ལ་འདྲི་སྐབས། ཧྥ་རན་སི་དང་སི་པེན་གཉིས་ཀྱི་རྩེད་འགྲན་དེ། སྤྱི་ཡོངས་ནས་སི་པེན་ལ་རྒྱལ་ཁ་ཐོབ་པའི་བརྒྱ་ཆ་ ༥༥ དང་ཧྥ་རན་སི་ལ་བརྒྱ་ཆ་ ༤༥ དང་བཅས་སྤོ་ལོ་ ༡–༢ བྱས་ནས་སི་པེན་ལ་རྒྱལ་ཁབ་ཐོབ་པའི་ཚོད་དཔག་བྱེད་ཀྱིན་འདུག་ཀྱང་། Google Gemini དང་ Cluade གཉིས་ཀྱིས་ཧྥ་རན་སི་སི་པེན་ལས་རྣམ་པར་རྒྱལ་ནས་རྟིང་རྩོད་དུ་ཚུད་པའི་ཚོད་དཔག་བྱེད་ཀྱིན་འདུག འོན་ཀྱང་། དེ་ནི་ཐོག་མའི་ཚོད་དཔག་ཙམ་ལས་དོན་དངོས་ཀྱིས་ཐག་གཅོད་བྱ་ཁག་པོར་གྱུར་ཡོད་ཀྱང་། ལྟད་མོ་བ་ས་ཡ་མང་པོས་རང་རང་གི་རྒྱལ་ཁབ་དེ་རྩེད་འགྲན་ལས་རྣམ་པར་རྒྱལ་བར་ནུས་པ་ཡོད་རྒུ་རྩལ་སྤྲུགས་ཀྱིས་འབད་བརྩོན་བྱེད་བཞིན་པ་གདོན་མི་ཟ་ལ། ལྟད་མོ་བའི་ཀི་སྒྲ་དང་ཤུགས་སྒྲ། དགའ་སྤྲོའི་མཉམ་གླུ་སོགས་ནི་རྩེད་འགྲན་པར་ངར་ཤུགས་སློང་ཞིང་སྙིང་སྟོབས་རྒྱས་པའི་སྨན་མཆོག་ལྟ་བུར་གྱུར་ཡོད། 

 དེ་བཞིན་མིས་བཟོས་རིག་ནུས་ཏེ་ཅ་ཊི་ཇི་པུ་ཊི་(Chat GPT ) ཡིས། དབྱིན་ཡུལ་དང་ཨར་ཇིན་ཊི་ན་གཉིས་ཀྱི་རྩེད་འགྲན་ཡོངས་སུ་སྤོ་ལོ་ ༡–༡ འདྲ་མཚུངས་ཆགས་ཏེ། མཐར་མདུན་བཀག་མེད་པའི་རྡུང་རྡེག་(penalty) གི་རྒྱལ་ཕམ་རྩོད་སྐབས། དབྱིན་ཡུལ་རྣམ་པར་རྒྱལ་བའི་ཚོད་དཔག་བྱས་ཡོད་ཀྱང་། ད་ལྟ་འཛམ་གླིང་གི་རྩེད་རིགས་ཆེད་མཁས་པ་དང་། རྐང་སྤོལ་གྲགས་ཅན་སོགས་ཀྱིས། ད་ལྟའི་རུ་ཁག་བཞི་པོའི་རྩེད་འགྲན་སྐར་ཆེན་རྣམས་ཀྱིས་རྩེད་འགྲན་ལ་བཟུང་བའི་གདེང་སྤོབས་དང་འགྲན་སེམས། དེ་བཞིན་ཕྱོགས་ཡོངས་ཀྱི་རུ་ཁག་རྣམས་ཀྱི་མཉམ་འདུས་ཀྱི་ནུས་པ་དང་གྲུབ་འབྲས་བཅས་ལ་གཞིགས་ན། རྩེད་འགྲན་གྱི་རྒྱལ་ཕམ་ཚོད་དཔག་བྱ་རྒྱུར་དཀའ་ཁག་ཅན་ཞིག་ཏུ་གྱུར་སྐོར་ཤོད་ཀྱིན་འདུག 

ད་ལྟ་འཛམ་གླིང་གསེར་བུམ་གྱི་བཞི་རྩོད་ཁྲོད་ཚུད་པའི་སྐར་ཆེན་འགའ།

 ད་ལྟ་འཛམ་གླིང་རྐང་སྤོལ་རྩེད་འགྲན་ཁྲོད་སྐད་གྲགས་འགྲོ་མུས་ཡིན་པའི་ཀི་ལི་ཡན་མེམ་བྷ་པེ་(Kylian Mbappé) ནི་ཧྥ་རན་སིའི་རྐང་སྤོལ་རྩེད་འགྲན་ཁྲོད་ཀྱི་སྐར་ཆེན་ཞིག་དང་། ལྷག་པར་ཁོང་གི་ཁྱད་འཕགས་ཀྱི་མྱུར་ཚད་དང་། སྤོ་ལོ་སྒོར་རར་བླུགས་ཏེ་མཇུག་སྒྲིལ་གྱི་ནུས་པ་དེ་འཛམ་གླིང་རྐང་སྤོལ་རྩེད་འགྲན་གྱི་གར་སྟེགས་སུ་གོ་གནས་ངེས་ཅན་ཞིག་བཟུང་ཡོད། ཀི་ལི་ཡན་མེམ་བྷ་པེར་རྒྱལ་ནང་གི་གཟེངས་རྟགས་མང་པོ་ཐོབ་ཡོད་པ་མ་ཟད། ཕྱི་ལོ་ ༢༠༡༨ དང་ ༢༠༢༢། ༢༠༢༦ བཅས་སུ་ཧྥ་རན་སིའི་རྒྱལ་སྤྱིའི་རྐང་སྤོལ་འགྲན་ཚོགས་ཁྲོད། ཁོང་གི་འཇོན་ཐང་དང་། བློ་སྟོབས། རླབས་ཆེན་གྱི་དམིགས་ཡུལ་བཅས་ཀྱིས་དགའ་མོས་བྱེད་མཁན་ས་ཡ་མང་པོར་སྐུལ་མ་ཐེབས།  ཁོང་ནི་རྒྱལ་སྤྱིའི་རྐང་སྤོལ་གར་སྟེགས་སྟེང་ཧྥ་རན་སིའི་རྐང་རྩེད་སྤོ་ལོའི་མཚོན་རྟགས་ཤིག་སྟེ། མྱུར་ཚད་དང་། གཟབ་ནན་བཅས་ཀྱིས་རྩེད་འགྲན་གྱི་བརྒྱུད་རིམ་ལ་ཁ་ལོ་སྒྱུར་བཞིན་ཡོད་ལ། ཁོའི་སྒྱུ་འཕྲུལ་ལྟ་བུའི་རྐང་རྩལ་སོགས་འགྲན་ཡ་ལས་རྣམ་པར་རྒྱལ་འདོད་པའི་བློ་སྟོབས་ཀྱིས་རྩེད་འགྲན་གྱི་ཁོར་ཡུག་ཡངས་པོར་ཟིལ་གྱིས་མནན་ཐུབ། ཁོང་ནི་འཛམ་གླིང་གི་རྐང་རྩེད་སྤོ་ལོའི་རྩེད་འགྲན་ཁྲོད་ཀྱི་སྐར་ཆེན་ཏེ། རྨི་ལམ་འཚོལ་བཞིན།  ཟིན་ཐོ་གཏོར་བཞིན། འཛམ་གླིང་གི་རྐང་སྤོལ་རྩེད་འགྲན་གྱི་དབུ་འཕང་དགུང་ལ་འདེགས་མཁན་ཞིག་ཏུ་ངོས་འཛིན་བྱེད་ཀྱིན་ཡོད། ཕྱི་ལོ་ ༢༠༢༦ ལོའི་འཛམ་གླིང་རྐང་སྤོལ་འགྲན་ཚོགས་སྟེང་ཁོ་དང་མེ་སི་གཉིས་ཀྱིས་སྤོ་ལོ་བརྒྱད་རེར་བླུགས་ནས་སྤོ་ལོ་བླུག་མཁན་མང་ཤོས་ཀྱི་རྩེད་འགྲན་པ་ཞིག་ཏུ་གྱུར།

མེ་སི་རང་ལོ་བཅོ་བརྒྱད་ཀྱི་ཐོག་བྷར་སི་ལོ་ནའི་རུ་ཁག་དང་པོར་བདམས་ནས། ཁོང་གིས་ཕྱི་ལོ ༢༠༠༥ ནས་ ༢༠༢༡ བར་མི་ལོ་ ༡༦ ལྷག་གི་རིང་བྷར་སི་ལོ་ནའི་རྩེད་འགྲན་རུ་ཁག་དང་པོའི་ནང་རྩེད་འགྲན་བྱས། མི་ལོ་དེ་དག་གི་རིང་ལ་ཁོང་གིས། སི་པེན་རྒྱལ་ཁབ་ཀྱི་རྐང་སྤོལ་རྩེད་འགྲན་ལ་ལི་གྷ་( laliga ) ཐེངས་བཅུ་བཀྱགས་ཡོད་པ་དང་། ཡུ་རོབ་ནང་ཆེས་སྐད་གྲགས་ཆེ་བའི་ཆེམ་བྷེན་སི་ལིག (Champions League) ཐེངས་བཞི་བཀྱགས་ཡོད་འདུག་ལ། ཕྱི་ལོ ༢༠༠༩ ལོར་བྷར་སི་ལོ་ནས་ཡུ་རོབ་ནང་གི་རྩེད་འགྲན་ཚང་མ་ལས་རྣམ་པར་རྒྱལ་ཏེ། ཡུ་རོབ་ནང་གི་རུ་ཁག་རྩེ་ཕུད་དུ་གྱུར་ཡོད་ཅིང་། སྐབས་དེར་མེ་སི་ཡིས་རྒྱལ་སྤྱིའི་རྐང་རྩེད་སྤོ་ལོའི་གསེར་གྱི་སྤོ་ལོ་( Ballon D’or) ཆེས་ཐོག་མ་དེ་བཀྱགས་ཡོད་པ་མ་ཟད། ལོ་དེར་ཁོང་ལ་རྒྱལ་སྤྱིའི་ཧྥི་ཧྥའི་ལོ་གཅིག་གི་ཕུལ་བྱུང་རྩེད་འགྲན་པའི་(FiFa world player of the  year award) ཆེས་མཐོའི་གཟེངས་རྟགས་ཀྱང་ཐོབ། ཕྱི་ལོ ༢༠༡༢ ལོར་མེ་སི་ཡིས་ལ་ལི་གྷའི་རྩེད་འགྲན་གཅིག་པུར་སྤོ་ལོ་ ༥༠ བླུགས་ཏེ།  ལོ་དེའི་སྤོ་ལོ་མང་ཤོས་བླུག་མཁན་གྱི་མི་སྣར་བདམས་ནས་གསེར་ལྷམ་ ( golden shoe) ཐོབ་ཡོད་འདུག་ལ། ད་བར་ཁོང་གིས་ཡུ་རོབ་ཀྱི་གསེར་ལྷམ་ཐེངས་ ༦ དང་། རྒྱལ་སྤྱི་རིམ་པའི་གསེར་གྱི་སྤོ་ལོ་( Ballon D’or) ཐེངས་བརྒྱད་བཀྱགས་འདུག་པས། མེ་སི་ལགས་ནི་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་རྒྱལ་སྤྱིའི་གསེར་གྱི་སྤོ་ལོ་ཐོབ་མཁན་ཆེས་མང་ཤོས་ཀྱི་རྩེད་འགྲན་པ་དེ་ཡིན་ལ། ཁོང་ནི་འཛམ་གླིང་རྐང་སྤོལ་གྱི་རྒྱལ་པོ་དང་དུས་རབས་ཤིག་གི་རྐང་སྤོལ་བ་ཡག་ཤོས་ཤིག་ཏུ་ངོས་འཛིན་བྱེད་ཀྱིན་ཡོད།

ལཱ་མིན་ཡ་མལ་(Lamine Yamal) ནི་སི་པེན་གྱི་ཆེད་ལས་རྐང་རྩེད་སྤོ་ལོ་རྩེད་མཁན་ཞིག་ཡིན་ཞིང་། ཁོང་ནི་དེང་རབས་རྐང་རྩེད་སྤོ་ལོའི་ནང་གི་ན་གཞོན་འཇོན་ཐང་ཅན་ཆུང་ཤོས་གྲས་སུ་རྩི་བཞིན་ཡོད། ཕྱི་ལོ་ ༢༠༠༧ ཟླ་ ༧ ཚེས་ ༡༣ སི་པེན་གྱི་ཨེ་སི་པུ་ལི་གྷེ་སི་དྷི་ལོ་བྷི་རི་གྷ་ཊི(Esplugues de Llobregat) སྐྱེས་ཤིང་། རོ་ཀ་ཕོན་དྷ་(Rocafonda) རུ་འཚར་ལོངས་བྱུང་། ཁོང་གིས་འཛམ་གླིང་ན་སྐད་གྲགས་ཡོད་པའི་བྷར་སི་ལོ་ནའི་ན་གཞོན་རུ་ཁག་ནས་རྐང་སྤོལ་ལ་ཞུགས། འཛམ་གླིང་གི་རྐང་སྤོལ་དགའ་ཞེན་པ་དག་ལ། ལོ་ཆུང་རྩེད་འགྲན་པ་ཡ་མལ་གྱི་ཡ་མཚན་ཅན་གྱི་སྤོ་ལོ་དྲིལ་སྐོར་དང་། སྤོ་ལོ་བརྒྱུད་སྤྲོད་ཀྱི་རྣམ་དཔྱོད། མྱུར་བའི་ཐག་གཅོད་བྱེད་སྟངས། དེ་བཞིན་ཡིད་དབང་འཕྲོག་པའི་ལྒང་འདེད་བཅས་ཀྱིས་མིག་ཟུང་དབང་མེད་དུ་མི་འཕྲོག་ཀ་མེད་དུ་གྱུར་ཡོད། ཁོང་ནི་འཛམ་གླིང་གི་རྐང་སྤོལ་རྩེད་འགྲན་ཁྲོད་ཀྱི་གཞོན་སྐྱེས་ཤེས་རབ་ཆེ་ཤོས་ཤིག་ཏུ་ངོས་འཛིན་བྱེད་ཀྱི་ཡོད་ལ། ཁོང་གི་དམིགས་བསལ་གྱི་སྒྲིག་གཞི་རྩལ་དང་། གསར་གཏོད་ནུས་པ། མཐོང་རྒྱ་དང་བློ་རིག་སྒྲིམ་པའི་དབང་གིས། ད་ལྟ་ཁོང་ནི་འཛམ་གླིང་གི་ལོ་ན་ཆེས་ཆུང་བའི་རྐང་སྤོལ་གྱི་སྐར་ཆེན་ཞིག་ཏུའང་ངོས་འཛིན་བྱེད་མུས་ཡིན་པ་མ་ཟད།  ལྷག་པར་ཁོང་གི་རྩེད་འགྲན་སྐབས་ཕར་རྒོལ་དང་སྤོ་ལོ་བརྒྱུད་སྤྲོད་གཉིས་ཀའི་ཐོག་ནས་རུ་ཁག་ཡོངས་ལ་ནུས་པ་ཆེན་པོ་ཐོན་མུས་དང་། ཁོ་ནི་བྷ་སི་ལོ་ན་དང་སི་པེན་གཉིས་ཀའི་རྒྱལ་ཡོངས་རུ་ཁག་གི་རྐང་སྤོལ་བ་ཆུང་ཤོས་ཡིན་ཡང་། ཁོང་གི་འཇོན་ཐང་དང་། བློ་གཅིག་སེམས་གཅིག དེ་བཞིན་མངོན་འདོད་བཅས་ཀྱིས་ལཱ་མིན་ཡ་མལ་ནི་ཁོང་གི་མི་རབས་ནང་གི་རྩེད་འགྲན་པ་གྲགས་ཅན་ཞིག་ཏུ་འགྱུར་བའི་ནུས་པ་ཡོད་པའི་མ་འོངས་པའི་སྐར་ཆེན་ཞིག་ཏུ་ངོས་འཛིན་བྱེད་ཀྱིན་ཡོད། 

ཇུ་ཌི་བྷེ་ལིང་ཧམ་(Jude Bellingham ) ནི་འདི་ལོའི་དབྱིན་ཡུལ་གྱི་སྐྱེས་པའི་རྐང་སྤོལ་རུ་ཁག་གི་ཚབ་མཚོན་གྱི་ལོ་ཆུང་རྐང་སྤོལ་བ་ཞིག་ཡིན་པ་མ་ཟད། འཛམ་གླིང་སྟེང་གི་ན་གཞོན་རྩེད་མོ་བ་ནུས་པ་ཅན་ཆུང་ཤོས་གྲས་སུ་རྩི་བཞིན་ཡོད་ལ། ཁོང་གི་དམིགས་བསལ་གྱི་རྩེད་ཐང་སྟེང་གི་རིག་པ་དང་། བབ་བསྟུན་གྱི་ནུས་པ། མགོ་ཁྲིད་ཀྱི་ནུས་པ། དེ་བཞིན་ལོ་ཚད་ལས་བརྒལ་བའི་འཕུར་མཆོང་གི་ནུས་པ་དང་། སྤོ་ལོ་ཚོད་འཛིན། སེམས་ཁམས་བརྟན་པོ་བཅས་ཀྱིས་དགའ་མོས་བྱེད་མཁན་ཚོའི་ཡིད་ཀྱི་བརྟན་པ་དབང་མེད་དུ་འཕྲོག་ཡོད་ལ། བྷོར་སུ་སི་ཡ་དོར་མོན་ཌི་(Borussia Dortmund) རྐང་སྤོལ་རུ་ཁག་ཏུ་སྐད་གྲགས་ཆགས་རྗེས། རེལ་མ་ཌི་རི་ཌི་(Real Madrid) རུ་ཁག་ཏུ་ཞུགས་ནས་རུ་ཁག་གི་དཀྱིལ་སྙིང་ལྟ་བུའི་རྩེད་འགྲན་པའི་གྲས་སུ་གྱུར།   ཁོང་གིས་རུ་ཁག་དང་དབྱིན་ཡུལ་གྱི་རྐང་སྤོལ་རུ་ཁག་ཏུའང་ཕུལ་བྱུང་གི་རྩེད་འགྲན་བྱས་སྟབས། ཁོང་ནི་མ་འོངས་པར་རེ་བ་ཆེན་པོ་ཡོད་པའི་དེང་རབས་རྐང་རྩེད་སྤོ་ལོའི་སྐར་མ་འོད་ཆེན་ཞིག་ཏུ་རྩི་བཞིན་ཡོད། 

ཧྥི་ཧྥ་རྐང་སྤོལ་འགྲན་ཚོགས།

གྲགས་ཆེ་བའི་རྐང་རྩེད་སྤོ་ལོའི་འགྲན་ཚོགས་དེ་ནི་ཕྱི་ལོ་ ༡༩༣༠ ལོར་ལྷོ་ཨ་མེ་རི་ཁའི་རྒྱལ་ཁབ་ཡུ་གྷེ་རུ་ ( Uruguay ) རུ་ཐོག་མའི་ས་བོན་འབུས། དེ་ནས་བཟུང་ལོ་བཞི་རེའི་མཚམས་སུ་ལོ་ལྟར་རྩེད་འགྲན་དེ་བསྡུ་འཆར་ཡོད་ཀྱང་། འཛམ་གླིང་དམག་ཆེན་གཉིས་པའི་རྐྱེན་གྱིས་ཕྱི་ལོ་ ༡༩༤༢ དང་ ༡༩༤༦ གཉིས་སུ་རྩེད་འགྲན་བསྡུས་མེད་ཀྱང་། ཕྱི་ལོ ༡༩༥༠ ལོར་ལྷོ་མེ་རི་ཁའི་བྷི་རཱ་ཛིལ ( Brazil ) གྱིས་རྩེད་འགྲན་གོ་སྒྲིག་བྱས་རྗེས། ད་བར་ལོ་བཞི་རེའི་མཚམས་སུ་གཅིག་ཀྱང་མ་ཆད་པར་ལུ་གུ་རྒྱུད་དུ་བསྡུས་ཡོད་དེ། ཡུ་རོབ་ཀྱི་རྒྱལ་ཁབ་ཧྥ་རན་སི  ( France ) དང་འཇར་མི་ནི་(Germany ) ཨི་ཊ་ལི (Italy ) བཅས་ཀྱིས་ཐེངས་གཉིས་རེར་རྩེད་འགྲན་གོ་སྒྲིག་བྱས་འདུག  དེ་བཞིན་སི་པེན( Spain ) དང་དབྱིན་ཡུལ། ཨར་ཇིན་ཊི་ན་( Argentina )  སོགས་ཀྱིས་ཐེངས་གཅིག་རེར་གོ་སྒྲིག་བྱས་འདུག ལྷག་པར་དུ་ཕྱི་ལོ་ ༢༠༠༢ ལོའི་རྩེད་འགྲན་དེ་ཉི་ཧོང་དང་ལྷོ་ཀོ་རི་ཡར་འཚོགས་ཡོད་ཅིང་། དེ་ནི་ཨེ་ཤ་ཡའི་ནང་དུ་རྒྱལ་སྤྱིའི་སྐྱེས་པའི་རྐང་སྤོལ་འགྲན་ཚོགས་བསྡུ་ཐེངས་དང་པོར་གྱུར་ཡོད་འདུག་ལ། ཕྱི་ལོ་ ༢༠༢༢ རྩེད་འགྲན་ཐེངས་ ༢༢ པ་དེ་ཨེ་ཤ་ཡའི་ཁོ་ཊར་རྒྱལ་ཁབ་ཏུ་འཚོགས་ཡོད་ཅིང་། དེ་ནི་ཨེ་ཤ་ཡའི་ནང་བསྡུ་ཐེངས་གཉིས་པ་དེ་ཆགས་ཡོད་པ་རེད་འདུག་ལ། ཧྥི་ཧྥ་རྐང་སྤོལ་རྩེད་འགྲན་ནི་གོ་ལ་ཡོངས་ཀྱི་རྐང་སྤོལ་རྩེད་འགྲན་གྱི་སྡིངས་ཆ་ཆེ་ཤོས་ཤིག་ཏུ་ངོས་འཛིན་བྱེད་ཀྱིན་ཡོད། 

ཕྱི་ལོ ༢༠༢༢ ལོར་ཁོ་ཊར་དུ་འཚོགས་པའི་རྩེད་འགྲན་ཁྲོད། རྩེད་རིགས་དབྱེ་ཞིབ་པ་མང་པོ་ཞིག་གིས། ཐོག་མའི་རྩེད་འགྲན་གྱི་རིམ་པ་དང་།   རྩེད་འགྲན་པ་རྣམས་ཀྱི་ནུས་རྩལ་དང་དྲག་འདེམས་ཀྱི་རིམ་པ། རུ་ཁག་གི་སྤྱི་ཡོངས་ཀྱི་རྩེད་འགྲན་པ་རྣམས་ལ་གཞིགས་ནས།  ལོ་དེའི་རྒྱལ་སྤྱིའི་ཧྥི་ཧྥ་གསེར་གྱི་རྟགས་མ་དེ། ཧྥ་རན་སི་ ( France )དང་། བྷི་རཱ་ཛིལ  (Brazil ) འཇར་མ་ནི( Germany) སི་པེན (Spain) ཨར་ཇིན་ཊི་ན( Argentina) དབྱིན་ཡུལ་གང་རུང་ཞིག་ལ་འཐོབ་རྒྱུའི་ཚོད་དཔག་བྱེད་ཀྱི་ཡོད་ཀྱང་། མཐར་རྣོ་ངར་ལྡན་པའི་རྩེད་འགྲན་གྱི་ཁྲོད་ནས་ཨར་ཇིན་ཊི་ནས་འཛམ་གླིང་རྐང་སྤོལ་གྱི་གསེར་གྱི་བུམ་པ་དེ་བཀྱགས་ཡོད་ཅིང་། དེ་ནི་སྐུ་ཞབས་མེ་སི་ལགས་ཀྱི་རྐང་སྤོལ་རྩེད་འགྲན་ཁྲོད་ཀྱི་ཆེས་གཡུར་དུ་ཟ་བའི་འབྲས་བཟང་ཞིག་དང་། མེ་སི་ལ་ཐོབ་པའི་འཛམ་གླིང་རྐང་སྤོལ་གྱི་གསེར་ཐོ་ཐོག་མ་དེ་གྱུར་བས། རྩེད་རིགས་ཆེད་མཁས་པ་རྣམས་ཀྱིས། དེ་ནི་མེ་སི་ཡིས་ཆེས་གཡུར་དུ་ཟ་བའི་འབྲས་བཟང་གི་འོད་སྣང་ཁྲོད་ནས། ཁོང་གི་ཞེན་མི་དང་ལྒང་ཞེན་པ་རྣམས་ལ་ཕུལ་བའི་ལེགས་སྐྱེས་ཆེ་ཤོས་ཤིག་ཏུ་ངོས་འཛིན་བྱེད་ཀྱིན་ཡོད། 

 ཧྥི་ཧྥ་རྩེད་འགྲན་ཕྱི་ལོ ༡༩༣༠ ལོར་མགོ་བརྩམས་པ་ནས་བཟུང་ད་བར་གྱི་རྩེད་འགྲན་ནང་། བྷི་རཱ་ཛིལ  (Brazil ) གྱིས་གསེར་གྱི་རྟགས་མ་ཐེངས་ ༥ བཀྱགས་ཡོད་པ་དང་། འཇར་མ་ནི( Germany) དང་( Italy ) ཡིས་ཐེངས་ ༤ རེ། ཨར་ཇན་ཊི་ན་ཐེངས་ ༣ ། ཡུ་རུ་གྷེ་ཡ( Uruguary) ཧྥ་རན་སི་གཉིས་ཀྱིས་ཐེངས་ ༢  རེར་བཀྱགས་ཡོད་འདུག 

གསར་འགོད་པ། དཔལ་ལྡན།