སྲས་མཁས་གྲུབ་དོན་འགྲུབ་ཀྱིས་བརྩམས།
གོང་བུས་དབྱིན་ཡིག་ནས་བོད་ཡིག་ཏུ་བསྒྱུར།
བོད་པ་ཚོས་ངེས་པར་དུ་གདོང་ལེན་བྱ་དགོས་པའི་སྐྱུག་བྲོ་བའི་བདེན་པ་ཞིག་ཡོད། ད་དུང་ཡང་རྒྱ་ནག་དམར་ཤོག་ཚོགས་པས་ (CCP) ཉིན་ཞིག་བོད་ལ་དངོས་གནས་ཀྱི་རང་སྐྱོང་སྤྲོད་ངེས་པར་ཡིད་ཆེས་མཁན་རྣམས་ནི་འཁྲུལ་སྣང་ཞིག་ལ་འཇུས་ནས་བསྡད་ཡོད། བོད་ནང་གི་དམར་ཤོག་ཚོགས་པའི་ལོ་རྒྱུས་ནི་འདུམ་འགྲིག་དང་གྲོས་མོལ། རིག་གཞུང་གི་ངོ་བོར་བརྩི་བཀུར་གྱི་ལོ་རྒྱུས་མ་རེད། དེ་ནི་ཚོད་འཛིན་དང་། རྒྱ་བསྒྱུར། གཉའ་གནོན་གྱི་ལོ་རྒྱུས་ཤིག་ཡིན། དེ་ལྟའི་ལམ་ལུགས་ཤིག་གློ་བུར་ཞི་འཇམ་དུ་གྱུར་ནས་བོད་པ་ཚོར་རང་དབང་ངང་འཚོ་བའི་གོ་སྐབས་སྤྲོད་ངེས་རེད་ཅེས་བསམ་པ་ནི་རེ་བ་ཙམ་ལ་བརྟེན་པའི་འཆར་སྣང་ཞིག་ཡིན།
དམར་ཤོག་ཚོགས་པའི་དབང་སྒྱུར་འོག་དེང་སང་གི་བོད་ནང་གི་འཚོ་བ་ནི་ལྟ་རྟོག་གིས་ཁྱབ་ཡོད་དེ། ལམ་མདོ་རེ་རེར་པར་ཆས་བཙུགས་ཏེ་དགོན་པ་དང་། གྲོང་ཚོ། ཐ་ན་སྒེར་གྱི་ཁྱིམ་ཚང་ཚུན་ཆད་ལ་ལྟ་ཞིབ་བྱེད་ཀྱི་ཡོད། བོད་ཀྱི་རིག་གཞུང་ཉམས་རྒུད་ཇེ་ཆེར་འགྲོ་བཞིན་ཡོད། སློབ་གྲྭ་ཁག་ཏུ་བོད་ཀྱི་སྐད་ཡིག་ཟུར་ཕུད་བྱེད་བཞིན་ཡོད། ཆོས་ལུགས་ཀྱི་ཉམས་ལེན་ལ་བཀག་སྡོམ་བྱས་ཡོད། དེང་རབས་ཅན་ཞེས་པའི་མིང་འོག་ནས་སྲོལ་རྒྱུན་རྣམས་རིམ་བཞིན་ཉམས་ཆག་ཏུ་འགྲོ་བཞིན་ཡོད། ཆབ་སྲིད་ཀྱི་གཉའ་གནོན་ནི་ད་དུང་ཡང་རྒྱ་ཁྱབ་ཏུ་གནས་ཡོད། མི་མཐུན་པའི་སྐད་ཆ་སྟེ་སྙན་ངག་གམ་ཡང་ན་སྨོན་ལམ་ཞིག ཡང་ན་ངོ་རྒོལ་གྱི་ལས་འགུལ་གང་ཞིག་ཡིན་ཡང་། མྱུར་དུ་དྲག་གནོན་བཀག་སྡོམ་བྱེད་ཀྱི་ཡོད། འདྲ་མཉམ་མིན་པའི་དཔལ་འབྱོར་གྱི་ཧེ་བག་ཇེ་ཆེར་འགྲོ་བཞིན་ཡོད། ས་གནས་ཀྱི་ཡུལ་མི་ལས་ཧན་མི་རིགས་གཞིས་ཆགས་པར་ཕན་པའི་རྒྱལ་ཁབ་ཀྱི་ཁེ་ལས་དང་འཛུགས་སྐྲུན་མང་བས། བོད་པ་ཚོ་རང་གི་ཕ་ས་ཕ་ཡུལ་དུའང་ཟུར་དུ་ལུས་པའམ་གྲངས་ཉུང་ཆགས་ཡོད།
གལ་ཏེ་རང་སྐྱོང་དངོས་གནས་ཡོང་སྲིད་པ་ཡིན་ན། ད་ལྟའི་དམར་ཤོག་གི་ལམ་ལུགས་འོག་འཚོ་ཀྱིན་པའི་བོད་པ་ཚོས་ད་ལྟ་ནས་དེའི་རྟགས་མཚན་མཐོང་དགོས། འོན་ཀྱང་ཁོང་ཚོས་མཐོང་བ་ནི་དེའི་ལྡོག་ཕྱོགས་རེད། ཁོང་ཚོས་ནི་རྒྱ་ནག་རྒྱལ་ཁབ་དང་སྔར་ལས་ཟབ་པའི་སྒོ་ནས་མཉམ་བསྲེས་བྱེད་པ་དང་། དམ་དྲག་སྔར་ལས་ཆེ་བ། བོད་ཀྱི་ངོ་བོ་གསོན་གནས་ཐུབ་པའི་བར་སྟོང་སྔར་ལས་ཆུང་དུ་འགྲོ་བ་མཐོང་གི་ཡོད།
རྒྱ་ནག་དམར་ཤོག་ཚོགས་པས་ལོ་རབས་རེ་རེ་བཞིན་རང་གི་གཞི་རྩའི་ལངས་ཕྱོགས་མི་བསྒྱུར་བ་གསལ་བོ་བསྟན་ཚར་ཡོད། དམར་ཤོག་ཚོགས་པའི་ལྟ་གྲུབ་ཀྱི་གཞི་རྩ་ནི་ཚོད་འཛིན་ལ་བརྟེན་པ་ལས་འདུམ་འགྲིག་ལ་མིན། དེ་ལྟའི་ལམ་ལུགས་ཤིག་གི་ནང་གི་རང་སྐྱོང་ནི་དངོས་གནས་ཀྱི་རང་སྐྱོང་མ་རེད། དེ་ནི་རང་དབང་ལ་བརྫུས་པའི་གཡོ་སྒྱུའི་སྐེ་ཐག་ཅིག་ཡིན།
རང་བཙན་གཙང་མ་ནི་རང་ཐག་རང་གཅོད་ཀྱི་ཐོབ་ཐང་ངེས་སྲུང་བྱེད་པའི་ལམ་བུ་ཁོ་ན་དེ་ཡིན། དེས་པེ་ཅིང་གི་སྒེར་གཅོད་ཀྱི་ཚབ་ཏུ་བོད་པ་ཚོར་རང་གི་མ་འོངས་པ་ཐག་གཅོད་བྱེད་པའི་གོ་སྐབས་སྤྲོད་ངེས་ཡིན་པ་མ་ཟད། དེས་བོད་ཀྱི་སྐད་ཡིག་དང་། ཆོས་ལུགས། སྲོལ་རྒྱུན་བཅས་བརྟན་སྲུང་བྱེད། དེས་བཙོན་འཇུག་གི་འཇིགས་སྣང་མེད་པར་གཏམ་བཤད་དང་། རྩོམ་འབྲི། རྩ་འཛུགས་བྱེད་པའི་ཆབ་སྲིད་ཀྱི་རང་དབང་ཡང་ངེས་པར་སྲུང་བ་ཡིན། དེ་མ་ཟད། བོད་ཀྱི་ཐོན་ཁུངས་རྣམས་བོད་མིའི་ཁེ་ཕན་གྱི་དོན་དུ་བེད་སྤྱོད་བྱེད་པ་ལས་རྒྱ་ནག་དམར་ཤོག་ཚོགས་པའི་ཆེད་དུ་སྔོག་འདོན་བྱ་རྒྱུ་མིན་པ་ངེས་བརྟན་བཟོ་ཡི་ཡོད།
རང་སྐྱོང་ཡོང་སྲིད་པར་ཡིད་ཆེས་མཁན་ཚོར་ངས་འདི་བརྗོད་འདོད། ད་ལྟའི་གནས་སྟངས་འོག་བོད་ནང་གི་འཚོ་བར་ཚོད་ལྟ་ཞིག་བྱོས། གོམ་པ་རེ་རེ་ལ་ལྟ་ཞིབ་བྱེད་པའི་ལམ་ཁར་བསྐྱོད། བོད་སྐད་བཀག་སྡོམ་ལ་སྐུལ་མ་གཏོང་སར་བོད་སྐད་ཤོད། གྲྭ་པ་ཚོར་འདྲི་ཞིབ་བྱེད་སའི་དགོན་པ་ཁག་ཏུ་སྨོན་ལམ་ཐོབ། དེ་ནི་རང་སྐྱོང་མ་རེད། དེ་ནི་བཙན་འཛུལ་རེད།
རྒྱ་ནག་དམར་ཤོག་ཚོགས་པ་རྟག་ཏུ་མི་འགྱུར། དེ་ལྟར་མིན་པར་ཡིད་ཆེས་པ་ནི་རང་གིས་རང་ཉིད་ལ་བསླུ་བྲིད་གཏོང་བ་དང་། རང་བཙན་གྱི་གྱོད་གཞི་འཛུགས་སྐྲུན་བྱེད་པར་གཏོང་དགོས་པའི་དུས་ཚོད་རིན་ཐང་ཅན་འཕྲོ་བརླག་གཏོང་བ་ཡིན། བོད་ཀྱི་མ་འོངས་པ་ནི་རང་གི་ངོ་བོ་ཁས་མི་ལེན་པའི་ལམ་ལུགས་ཤིག་ཏུ་མི་གནས་པར་རང་གི་རྒྱལ་དབང་སླར་གསོ་བྱེད་པའི་ནང་དུ་གནས་ཡོད།
མ་རྩོམ་གྱི་དྲ་ཐག་https://europeantimes.org/the-mirage-of-autonomy-why-tibetans-must-confront-reality/?fbclid=IwY
