རྒྱ་ནག་དམར་ཤོག་ཚོགས་པའི་དབུས་རྒྱུན་ཝང་ཧུའུ་ཉིང་ཟེར་བ་བོད་ཀྱི་རྒྱལ་ས་ལྷ་ས་དང་མངའ་རིས་ཁུལ་དུ་འགྲོ་སྐབས། མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་ལག་བསྟར་བྱས་ཏེ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་ཟེར་བ་གསར་འཛུགས་བྱ་དགོས་ལུགས་སོགས་བཤད་འདུག
ཟླ་འདིའི་ཕྱི་ཚེས་ ༡༩ ནས་ ༢༢ བར་རྒྱ་ནག་དམར་ཤོག་ཚོགས་པའི་དབུས་རྒྱུན་དང་། རྒྱལ་ཡོངས་སྲིད་གྲོས་ཀྱི་འགན་འཛིན་ཝང་ཧུའུ་ཉིང་(Wang Huning) ཟེར་བ་བོད་ཀྱི་རྒྱལ་ས་ལྷ་ས་དང་། ལྷ་སའི་མཐུན་སྒྲིལ་སྤྱི་གླིང་། སེ་ར་དགོན། མངའ་རིས་སྤུ་ཧྲེང་རྫོང་གི་གསེར་གཞུང་ཐང་ཆེན། རྩྭ་མདའ་རྫོང་གི་མཐོ་ལྡིང་དགོན། སྒར་རྫོང་གི་བདེ་མཆོག་མི་རིགས་གྲོང་ཚོ་སོགས་སུ་ལྟ་སྐོར་ལ་ཕྱིན་ནས། བོད་ལྗོངས་བཅོས་སྐྱོང་བྱེད་པར་ཐོག་མར་བོད་ལྗོངས་ཟེར་བ་བརྟན་ལྷིང་ཡོང་དགོས་ལུགས་དང་། བོད་ཞི་བའི་བཅིངས་གྲོལ་ཟེར་བ་ཞིག་བཏང་ནས་མི་ལོ་ ༧༥ རིང་འགྱུར་ལྡོག་བྱུང་ཡོད་ལུགས་སོགས་བཤད་འདུག་ལ། ཁོས་མངའ་རིས་ཁུལ་གྱི་རྒྱལ་ཡོངས་སྲིད་གྲོས་རྒྱུན་ལས་ཁག་དང་། བོད་རང་སྐྱོང་ལྗོངས་ཟེར་བའི་སྲིད་གྲོས་ལས་ཁུངས་སུ་ཕྱིན་ནས་ལས་བྱེད་སོགས་དང་ཐུག་འཕྲད་ཀྱང་བྱས་འདུག
ཝང་ཧུའུ་ཉིང་ཟེར་བས། བོད་ཀྱི་རྒྱལ་ས་ལྷ་ས་གཙོས། མངས་རིས་སོགས་སུ་རྒྱ་ནག་དམར་ཤོག་ཚོགས་པའི་སྐབས་ཉི་ཤུ་པའི་ཀྲུང་ཨུའི་ཚང་འཛོམས་གྲོས་ཚོགས་ཐེངས་བཞི་པའི་སྙིང་དོན་ཟེར་བ་ཞིག་ལག་བསྟར་གཏིང་ཟབ་དང་། རྒྱ་ནག་དམག་ཤོག་ཚོགས་པའི་མགོ་ཁྲིད་ཞི་ཅིན་ཕིན་གྱིས་བོད་ལྗོངས་ལས་དོན་ཟེར་བར་བཤད་པའི་གཏམ་བཤད་ཀྱི་སྙིང་དོན་ཟེར་བ། དེ་བཞིན་དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཟེར་བར་སློབ་སྦྱོང་བྱས་ཏེ། བརྟན་ལྷིང་དང་འཕེལ་རྒྱས་ཟེར་བ། སྐྱེ་ཁམས། མཐའ་མཚམས་སྟོབས་ལྡན་ཟེར་བ་བཅས་ཡོང་སླད་དམ་འཛིན་ཡག་པོ་བྱ་དགོས་ལུགས་དང་། ལོ་ལྔའི་འཆར་འགོད་ཨང་བཅོ་ལྔ་ཟེར་བའི་སྐབས་སུ་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཟེར་བ་ཞིག་འཛུགས་སྐྲུན་བྱེད་པར་ནུས་ཤུགས་ཡོད་རྒུ་གདོན་དགོས་ལུགས་སོགས་བཤད་འདུག
རྒྱ་ནག་གཞུང་ཕྱོགས་ཀྱི་གསར་འགྱུར་བརྒྱུད་ལམ་ཁག་ལྟར་ན། ཝང་ཧུའུ་ཉིང་ཟེར་བའི་ད་ལན་གྱི་སྐོར་སྐྱོད་སྐབས། བོད་ལྗོངས་ཟེར་བ་བཅོས་སྐྱོང་བྱས་པར་ཐོག་མར་བོད་ལྗོངས་ཟེར་བ་བརྟན་ལྷིང་ཡོང་བ་དགོས་པས། ཁྲིམས་ལྟར་བོད་སྐྱོང་བླང་བྱ་ཟེར་བ་ཞིག་ལག་བསྟར་བྱས་ཏེ། སྤྱི་ཚོགས་ཀྱི་རྨང་གཞི་བརྟན་པོ་འཛུགས་དགོས་ལུགས་དང་། བོད་ཞི་བའི་བཅིངས་གྲོལ་ཟེར་བ་ཞིག་བཏང་ནས་མི་ལོ་ ༧༥ འཁོར་བའི་རིང་གངས་ལྗོངས་མཐོ་སྒང་ཟེར་བར་གནམ་ས་བླ་འོག་བསྒྱུར་བའི་འགྱུར་ལྡོག་བྱུང་ཡོད་སྟབས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་ཟེར་བ་ཞིག་འཛུགས་རྒྱུ་དང༌། ཀྲུང་ཧྭ་མི་རིགས་གཅིག་མཐུན་ཚོགས་པ་ཟེར་བ་འཛུགས་སྐྲུན་ལ་སྐུལ་འདེད་གཏང་དགོས་པ། དེ་བཞིན་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ལག་ལེན་དོན་འཁྱོལ་ཡག་པོ་བྱས་ཏེ། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་ཟེར་བ་གསར་འཛུགས་བྱ་དགོས་ལུགས་སོགས་བཤད་འདུག
ཡང་ཁོས་ཆོས་ལུགས་ཀྲུང་གོ་ཅན་བསྒྱུར་བའི་ལས་དོན་དང་འབྲེལ་ནས། བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཟེར་བ་ཞིག་ཡོང་བར་ཤུགས་བརྒྱག་དགོས་པ་དང་། བོད་ཀྱི་ལོ་རྒྱུས་ཡིག་ཆ་དང་། གནའ་དཔྱད་དངོས་རྫས། རིག་གནས་ཤུལ་བཞག་སོགས་བེད་སྤྱོད་བྱས་ཏེ། མི་རིགས་སོ་སོའི་བར་འགྲོ་འོང་སྤེལ་རེས་དང་མཉམ་འདྲེས་ཀྱི་ལས་དོན་གཉེར་ནས། མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཟེར་བ་ལག་བསྟར་དགོས་ལུགས་སོགས་ཀྱང་བཤད་འདུག
རྒྱལ་ཡོངས་སྲིད་གྲོས་ཀྱི་འགན་འཛིན་ཝང་ཧུའུ་ཉིང་ཟེར་བ་དེ་ཧྲང་ཧེ་གྲོང་ཁྱེར་གྱི་མི་ཡིན་ཞིང་། ཕྱི་ལོ་ ༡༩༧༤ ལོར་རྒྱ་ནག་དགེ་འོས་སློབ་ཆེན་དུ་ཞུགས་ནས་ཧྥ་རན་སིའི་སྐད་ཡིག་སྦྱངས། ཕྱི་ལོ་ ༡༩༧༧ ལོར་ཧྥི་ཏན་ (Fudan) གཙུག་ལག་སློབ་ཆེན་གྱི་རྒྱལ་སྤྱིའི་ཆབ་སྲིད་སྡེ་ཁག་ནང་ཞུགས་ཏེ་ཧྲང་ཧེ་གྲོང་ཁྱེར་སྤྱི་ཚོགས་ཚན་རིག་སྐོར་ལ་ཞིབ་འཇུག་བྱས། སློབ་མཐར་ཕྱིན་རྗེས་སློབ་ཆེན་དེའི་ཁྲིམས་ལུགས་དགེ་རྒན་བྱས། ཕྱི་ལོ་ ༡༩༩༥ ལོར་སྐབས་དེའི་སྲིད་འཛིན་ཅང་ཙི་མེན་གྱི་བློས་ཐུབ་དཔོན་རིགས་ཀྲུང་ཆིན་ཧོང་ (Zeng Qinghong) དང་ཝུ་པན་ཀོ་ (Wu Bangguo) གཉིས་ཀྱི་ཆབ་སྲིད་ལས་རོགས་བྱས་པ་བརྒྱུད། ཕྱི་ལོ་ ༡༩༩༨ ལོར་རྒྱ་ནག་དབུས་སྲིད་ཇུས་ཉམས་ཞིབ་ཁང་གི་ཚོགས་གཞོན་དང་། ཅང་ཙི་མེན་གྱི་མཚོན་བྱེད་གསུམ་གྱི་བསམ་བློའི་སློབ་སྟོན་པ་བྱས། ཕྱི་ལོ ༢༠༠༧ ལོར་རྒྱ་ནག་དབུས་གཞུང་སྒྲུབ་ཁང་གི་དྲུང་ཆེར་བསྐོས་ཏེ། སྐབས་དེའི་སྲིད་འཛིན་ཧུའུ་ཅིན་ཐོ་ཡི་ཚན་རིག་འཕེལ་རྒྱས་ཀྱི་ལྟ་བའི་སློབ་སྟོན་པ་དང་། ཕྱི་ལོ་ ༢༠༡༢ ལོར་དབུས་རྒྱུན་ལས་ལྷན་ཚོགས་ཀྱི་འདེབས་བསྐོ་བརྒྱུད་དེ་དབུས་སྲིད་བྱུས་ཉམས་ཞིབ་ཁང་གི་འགན་འཛིན་དུ་བསྐོས་པར་མ་ཟད། སྐབས་དེ་ནས་བཟུང་རྒྱ་ནག་དབུས་ཆབ་སྲིད་ལྷན་ཁང་གི་དཔོན་རིགས་ཚོའི་གྲས་ནས་ཞི་ཅིན་ཕིན་གྱི་བློས་ཐུབ་སློབ་སྟོན་པར་གྱུར་ཡོད། ད་ལྟ་རྒྱ་ནག་དམར་ཤོག་ཚོགས་པའི་དབུས་རྒྱུན་དང་། རྒྱལ་ཡོངས་སྲིད་གྲོས་ཀྱི་འགན་འཛིན་ཡང་ཡིན།
གསར་འགོད་པ། དཔལ་ལྡན།
