མཉམ་འབྲེལ་གྱི་གཞི་རྩའི་ནང་བསམ་བློ་མཉམ་འབྲེལ་གྱིས་མཐུན་སྒྲིལ་རྡོག་རྩ་ཆིག་སྒྲིལ་དང་གཅིག་ཕན་གཅིག་རོགས་བྱེད་གལ་ཆེ་སྐོར་གསུངས།

ནང་སྲིད་བཀའ་བློན་མཆོག་གིས་ད་ལྟའི་མཉམ་འབྲེལ་གྱི་འགན་འཛིན་ལྷན་ཚོགས་ཀྱིས་ད་སྔ་བར་མཉམ་འབྲེལ་ལ་འཕྲད་པའི་དཀའ་ངལ་ཁག་ལ་ཕྱིར་མིག་བལྟས་ཏེ། མ་འོངས་པར་ཡར་རྒྱས་ཀྱི་གོམ་ཁ་སྤོ་རྒྱུ་གལ་ཆེན་ཡིན་སྐོར་གསུངས་སོང་།

དེ་རིང་ཕྱི་ཚེས་ ༢༧ ནས་ ༣༠ བར་ཉིན་གྲངས་ ༤ རིང་དྷ་ས་བོད་མིའི་མཉམ་འབྲེལ་གྱི་གོ་སྒྲིག་འོག བོད་མིའི་སྤྱི་མཐུན་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཐེངས་ཚོགས་ཆེན་ཐེངས་  ༢༥ པ་འཚོག་གི་འདུག སྔ་དྲོའི་ཆུ་ཚོད་ ༩།༣༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་ཚོགས་ཆེན་དབུ་འབྱེད་ཀྱི་མཛད་སྒོར། སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་མཆོག དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་དང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག དེ་བཞིན་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག ཁྲིམས་ཞིབ་པ་གཞན་འཕགས་པ་ཚེ་རིང་མཆོག་དང་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། སྤྱི་འཐུས་རྒྱུན་ལས་རྣམ་པ་དང་ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་པདྨ་བདེ་ལེགས་ལགས་དང་འགན་འཛིན་ཚེ་རིང་ནོར་བུ་ལགས་གཉིས་གཙོ་བྱས་པའི་ས་གནས་མཉམ་འབྲེལ་ཁག་བཅོ་ལྔ་ཡི་ཚོགས་གཙོ་དང་དྲུང་ཆེ་རྣམ་པ་བཅས་འཛོམས་འདུག

སྐབས་དེར་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གིས། ཕྱི་ལོ་ ༢༠༢༦ ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུག་ཁྲོད་བརྒྱ་ཆ་རྩེ་ཕུད་སོན་པའི་ཤེར་བདག་གི་སློབ་མ་བསྟན་འཛིན་ནོར་བུ་ལགས་སུ་གཟེངས་རྟགས་དང་ཕྱག་འཁྱེར་ཕུལ་བ་དང་། ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་བོད་མིའི་སྤྱི་མཐུན་མཉམ་འབྲེལ་གྱི་དྲ་ཚིགས་གསར་བ་དབུ་འབྱེད། ནང་སྲིད་བཀའ་བློན་དཔལ་ལྡན་དོན་གྲུབ་མཆོག་གིས། སྤྱི་མཐུན་མཉམ་འབྲེལ་གྱི་རྩིས་ལོ་ ༢༠༢༥་་་༢༠༢༦ ལོའི་གཙང་ཁེ་ནས་ཆ་ཤས་ཧིན་སྒོར་འབུམ་ ༤༥ སྒྲིག་གཞི་དང་གྲོས་ཆོད་དགོངས་དོན་བཞིན་ས་གནས་ཤས་བདག་མཉམ་འབྲེལ་ཁག་ལ་བགོས་འགྲེམས་བཅས་གནང་སོང་།

བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་པདྨ་བདེ་ལེགས་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནས་ཚོགས་ཆེན་ལ་བསྩལ་བའི་བཀའ་སློབ་ཅིག་སྒྲོག་སྦྱངས་གནང་བའི་ནང་། བཙན་བྱོལ་སྤྱི་ཚོགས་ཀྱི་བོད་མིའི་སྤྱི་མཐུན་མཉམ་འབྲེལ་ཁྲིམས་མཐུན་དེབ་སྐྱེལ་བྱས་ཏེ་ལོ་ ༢༡ འཁོར་བ་དང་བསྟུན་ས་གནས་བོད་མིའི་མཉམ་འབྲེལ་ཁག་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ཉེར་ལྔ་པ་འཚོགས་བཞིན་ཡོད་པའི་ཚོགས་ཞུགས་རྣམས་ལ་འཚམས་འདྲི་བཀྲ་ཤིས་བདེ་ལེགས་དང༌། ཚོགས་འདུ་དམིགས་དོན་བཞིན་ལེགས་སྒྲུབ་ཡོང་བའི་སྨོན་འདུན་ཡོད།

སྤྱི་མཐུན་མཉམ་འབྲེལ་གྱི་དམིགས་ཡུལ་གཙོ་བོ་བོད་མིའི་འཚོ་རྟེན་དཔལ་འབྱོར་བརྟན་པོའི་ངང་ཡར་རྒྱས་གོང་འཕེལ་ཡོང་ཐབས་བྱ་རྒྱུ་འདི་ཡིན་གཤིས། དེའི་ཐད་ད་ཕན་ཚང་མས་ལྷག་བསམ་ཆེར་བསྐྱེད་ཀྱིས་འབད་བརྩོན་ཇི་ལྟར་བྱས་པ་དང་གྲུབ་འབྲས་ཇི་བྱུང་བཅས་ཀྱི་ལོ་རྒྱུས་གསལ་འཁོད་ཀྱི་དུས་དེབ་པར་རིགས་བཅས་པ་ཞིག་པར་སྐྲུན་བྱ་འཆར་དེར་གསལ་བས་ཞིབ་བརྗོད་མི་དགོས། སླད་ཕྱིན་དཔལ་འབྱོར་མཉམ་འབྲེལ་གྱི་གཞི་རྩའི་ཐོག་ནང་བསམ་བློ་མཉམ་འབྲེལ་གྱིས་མཐུན་སྒྲིལ་རྡོག་རྩ་ཆིག་སྒྲིལ་དང་། གཅིག་ཕན་གཅིག་རོགས། ཐུན་མོང་ཡར་རྒྱས་གོང་འཕེལ། ཡུལ་མིར་མཐུན་གཤིབ། ལས་དོན་དྲང་བདེན། ཉམ་ཐག་ལ་ལྟ་སྐྱོང་སོགས་གང་ཅི་སྤྱི་ཚོགས་ཀྱི་མིག་དཔེར་འོས་པ་བྱ་གལ་ཡིད་འཇགས་འཚལ། ཞེས་གསུངས་འདུག

ཚོགས་གཙོ་པདྨ་བདེ་ལེགས་ཀྱིས་འདི་གའི་གསར་འགོད་པར་ཐེངས་འདིའི་ཚོགས་ཆེན་སྟེང་གྲོས་བསྡུར་ག་རེ་གནང་འཆར་ཡོད་མེད་ཐད།  ཐེངས་སྔོན་མའི་ཚོགས་ཆེན་གྱི་གྲོས་ཆོད་ཁག་ལ་བསྐྱར་ཞིབ་བགྱིས་ཏེ་མཇུག་སྐྱོང་དགོས་རིགས་དང་། ལག་བསྟར་ཐུབ་པ་དང་མ་ཐུབ་པའི་གནད་དོན་ལ་བསྐྱར་ཞིབ། མཉམ་འབྲེལ་བཅོ་ལྔ་རེ་རེ་ཡིས་འདས་པའི་ལོ་གཅིག་རིང་གི་ལས་བསྡོམས་དང་རྩིས་ཁྲ་སྙན་སྒྲོན་ཞུ་དགོས་པ་དང་དེར་མཉམ་འབྲེལ་གཞན་གྱིས་དོགས་འདྲི་ཞུས་ཏེ། དེ་ལས་མ་འགྲིག་པའི་རིགས་མ་འོངས་པའི་ཚོགས་ཆེན་སྐབས་གྲོས་འཆར་དུ་འཁྱེར་དགོས་ཀྱི་ཡོད། གཙོ་ཆེ་ཤོས་ནི་མཉམ་འབྲེལ་གྱི་ལས་དོན་བྱེད་ཕྱོགས་ཡར་རྒྱས་དང་ཚགས་ཚུད་གཏོང་ཐབས་རེད། ཤེར་བདག་མི་མང་ལ་ཞབས་ཞུ་ཞུ་སྟངས་ཐད་འཐུས་ཤོར་ཕྱིན་པ་དང་སྐྱོན་ག་རེ་ཡོད་མེད་སོགས་ཀྱི་ཐོག་གྲོས་བསྡུར་དང་བགྲོ་གླེང་བྱས་ཏེ། མ་འོངས་པར་ལས་དོན་དེ་ཚོ་ཡར་རྒྱས་གཏོང་ཐབས་སྐོར་རེད། ཅེས་བརྗོད་བྱུང་།

བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས། ༧གོང་ས་མཆོག་གི་བཀའ་སློབ་ནང་བསམ་བློ་མཉམ་འབྲེལ་གྱིས་མཐུན་སྒྲིལ་རྡོག་རྩ་ཆིག་སྒྲིལ་དགོས་པ་གསལ་འདུག མཉམ་འབྲེལ་དེ་གཙོ་བོ་སེམས་ཀྱི་ནང་ནས་མཐུན་སྒྲིལ་དགོས་པར་༧གོང་ས་མཆོག་གིས་བཀའ་གནང་འདུག དེ་མེད་པ་ཡིན་ན། སྐྱོ་བོ་དེ་སྐྱོ་བོ་རང་འཇགས་ལྷག་གི་ཡོད་པ་དང་ཕྱུག་པོ་ཕྱུག་པོར་གྱུར་ནས་འགྲོ་བཞིན་ཡོད་པས། སྐྱོ་བོའི་སྡུག་བསྔལ་ཕྱུག་པོས་ཤེས་རྟོགས་མ་ཐུབ་པའི་དབང་གིས་མཉམ་འབྲེལ་གྱི་དགོས་དམིགས་གཙོ་བོ་འགྲུབ་ཀྱི་མེད་པའི་གནས་སྟངས་ཆགས་ཀྱི་ཡོད། ཅེས་དང་།  ཕྱི་ལོ་ ༡༩༦༠ ནང་༧གོང་ས་མཆོག་གི་བཀའ་དགོངས་འོག་མི་རབས་རྒན་པ་ཚོར་ཤེས་ཡོན་མེད་ཀྱང་། སྤྱི་པའི་ལས་དོན་ལ་ལྷག་བསམ་རྣམ་དག་གིས་ཞབས་འདེགས་ཧུར་ཐག་ཞུས་ཏེ་མཉམ་འབྲེལ་རྒྱུན་སྐྱོང་ཐུབ་པ་དང་། མཚམས་ལ་རེར་རྩིས་ཁྲ་དང་འབྲེལ་ནས་གཞུང་གི་དངུལ་ཕྱིར་རྩིས་སྤྲོད་མ་ཐུབ་པའི་གནས་སྟངས་བྱུང་ཡོད་ཀྱང་། ཕྱི་ལོ་ ༢༠༠༥ ལོ་ནས་བཟུང་སྤྱི་མཐུན་མཉམ་འབྲེལ་ཁྲིམས་མཐུན་གྱི་ངོ་བོར་བསྒྱུར་ཐུབ་ནས་ཁྲིམས་ཀྱི་དབང་སྒྱུར་འོག་འགྲོ་བཞིན་ཡོད་པས། ད་ལྟ་ཤེར་བདག་མི་མང་གིས་འཛིན་སྐྱོང་འགན་འཛིན་དང་རྩིས་པ་སོགས་ལས་ཀྱི་སྣེ་མོ་བ་འདེམས་སྒྲུག་བྱེད་སྐབས་ཚད་མཐོའི་ལག་འཁྱེར་ཡོད་མེད་ཙམ་ལ་མ་བལྟས་པར་ཕྱོགས་ཡོངས་ནས་མགོ་ཁྲིད་མི་སྣ་ཚད་ལྡན་འདེམས་རྒྱུ་གལ་ཆེན་ཡིན་པ་དང་། མཉམ་འབྲེལ་ཁག་གི་ཁྲིམས་ཚད་ལྡན་ཡིན་ཡང་། དེང་སྐབས་ལྷག་བསམ་ཉམས་བཞིན་པའི་སྐབས་འདིར་མཉམ་འབྲེལ་གྱི་དངུལ་འཁྱེར་ནས་བྲོས་མཁན་ཡོད་སྟབས། འཛིན་སྐྱོང་དང་ཤེར་བདག་མི་མང་གིས་སོ་སོའི་ཐོབ་ཐང་དང་འགན་འཁྲིར་ཤེས་རྟོགས་ལྡན་པའི་ཐོག་ནས་མཉམ་འབྲེལ་གྱི་ལས་དོན་རྒྱུན་སྐྱོང་རྒྱུ་གལ་ཆེན་ཡིན་སྐོར་སོགས་གསུངས་སོང་།

སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་གིས། འཛིན་སྐྱོང་ཟེར་ན། ལས་བྱེད་ཚོ་ཞོགས་པའི་ཆུ་ཚོད་དགུ་པ་ནས་ལྔ་བའི་བར་ལས་ཀར་རྗེས་འདེད་གཏོང་མཁན་དང་། ལས་དོན་འཐུས་ཤོར་ཕྱིན་པར་ངོས་འཛིན་ཐུབ་པ་དང་གསར་བཏོད་ཀྱི་ལས་ལ་རིག་པ་སྒྲིམ་ཞིང་ཞུགས་ཐུབ་མཁན་ཞིག་ཡིན་དགོས་པ་ལས། ལས་ཀར་སྒུག་པའི་ལས་བྱེད་རྐྱང་ཡིན་ཚེ། ལས་ཁུངས་དེ་དུས་ནམ་ཡང་ཡར་རྒྱས་འགྲོ་མི་སྲིད། དྲུང་ཆེ་ཚོར་ལྷག་བསམ་རྣམ་དག་ཨང་དང་པོ་དང་། གཉིས་པ་དེ་ལས་ཀའི་དཀའ་རྙོག་གི་ཆེ་ཆུང་ལ་མ་བལྟས་པར་ཐབས་ལམ་བཙལ་ནས་མྱུར་དུ་ཐག་གཅོད་ལེན་ཐུབ་རྒྱུ་གལ་ཆེན་ཡིན། དྲུང་ཆེས་ཐག་གཅོད་ལེན་མ་ཐུབ་ཚེ་ལས་དོན་འཕར་འགྱང་གིས་འཐུས་ཤོར་འགྲོ་ཡི་ཡོད། ཅེས་དང་། མཉམ་འབྲེལ་གྱིས་ཁྲིམས་ལུགས་གཞིར་བཞག་ཐོག་ཕྱག་ལས་མ་གནང་བ་ཡིན་ན། སྦན་རྡ་རའི་དཀའ་ངལ་དེ་མིས་བཟོས་ཤིང་ལྐོག་ཟ་རུལ་སུངས་ཀྱི་དཀའ་ངལ་ཡིན་པ་དང་། ཏི་ཛུའི་ནང་ཡོད་པའི་དཀའ་ངལ་དེ་ཡང་ལྐོག་ཟ་རུལ་སུངས་ཡིན་པ་དང་ལས་བྱེད་ཀྱིས་བཟོས་པའི་དཀའ་ངལ་རེད། ད་རེས་ཧོན་སུར་ནང་འཕྲད་བཞིན་པའི་དཀའ་ངལ་དེ་ཡང་ཁྲིམས་ལུགས་བཞིན་ལས་དོན་མ་བསྒྲུབས་པའི་དབང་གིས་བྱུང་བ་རེད། ཅེས་དང་། ད་ལྟའི་མཉམ་འབྲེལ་གྱི་འགན་འཛིན་ལྷན་ཚོགས་ཀྱིས་འདས་པའི་འགན་ལྷན་རིམ་པ་བརྒྱུད་ད་སྔ་བར་མཉམ་འབྲེལ་ལ་འཕྲད་པའི་དཀའ་ངལ་ཁག་ལ་ཕྱིར་མིག་བལྟས་ཏེ། མ་འོངས་པར་ཡར་རྒྱས་ཀྱི་གོམ་ཁ་སྤོ་རྒྱུ་གལ་ཆེན་ཡིན་སྐོར་སོགས་གསུངས་སོང་།

སྤྱི་མཐུན་མཉམ་འབྲེལ་གྱི་ལས་བསྡོམས་ལྟར་ན། བོད་མིའི་སྒྲིག་འཛུགས་ཀྱི་ལམ་སྟོན་འོག་ས་གནས་མཉམ་འབྲེལ་ཁག་ནས་༸རྒྱལ་བའི་གོ་སྟོན་དང་བྱམས་བརྩེའི་ལོ་སྲུང་གཙི་ཞུས་ཡོད་ཅིང་།  ཕྱི་ལོ་ ༢༠༢༥ ཟླ་ ༡༡ ཚེས་ ༡༥ ཉིན་བོད་མིའི་སྤྱི་མཐུན་མཉམ་འབྲེལ་དང་ས་གནས་མཉམ་འབྲེལ་ཁག་ནས་ ༸གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་མཚོན་ཆེད་དུ་ཟངས་གསེར་ལས་གྲུབ་པའི་སྤྱན་རས་གཟིགས་ཕྱག་སྟོང་སྤྱན་སྟོང་གི་སྐུ་འདྲ་ཞིག་ཕུལ་བ་དང་།  ནང་སྲིད་ལས་ཁུངས་བརྒྱུད་མ་ན་ལི་བོད་མིའི་སྡོད་སྒར་དུ་ཆུ་ལོག་གི་འཇིགས་པ་བྱུང་བར་ཛ་དྲག་ཞལ་འདེབས་ཧིན་སྒོར་འབུམ་བརྒྱད།  སྦན་རྡ་ར་ས་གནས་མཉམ་འབྲེལ་གྱི་དཀའ་སེལ་ཆེད་ཧིན་སྒོར་འབུམ་ ༢༣ གྱི་རོགས་སྐྱོར། དེ་བཞིན་ར་ཝང་ལ་མཉམ་འབྲེལ་གྱི་དཀའ་སེལ་ཆེད་ཧིན་སྒོར་འབུམ་ ༥ ཡི་རོགས་སྐྱོར། ལ་དྭགས་དང་ཧོན་སུར། ཨོ་རི་ཤ་བཅས་ལ་འབྱུང་བའི་གནོད་འཚེ་བྱུང་སྐབས་གདུང་སེམས་མཉམ་སྐྱེད་མཚོན་ཆེད་དུ་ཧིན་སྒོར་འབུམ་ ༥ བཅས་འབུལ་ཐུབ་པ་བྱུང་འདུག་ལ། ལོ་རེར་བོད་མིའི་སྒྲིག་འཛུགས་ལ་གཙང་ཁེ་བརྒྱ་ཆ་ ༡༥ ཕུལ་དང་འབུལ་མུས་རེད་འདུག

བོད་མིའི་སྤྱི་མཐུན་མཉམ་འབྲེལ་ནི་ཕྱི་ལོ་ ༢༠༠༥  ཟླ་ ༤ ཚེས་ ༢༠ ཉིན་རྒྱ་གར་གྱི་ཕྱི་ལོ་ ༢༠༠༢ ལོའི་ (Multi-State Co-operative Society Act) ཁྲིམས་ལ་དེབ་སྐྱེལ་བྱས་ཏེ་ཁྲིམས་མཐུན་དབུ་བརྙེས་པ་ནས།  ཕྱི་ལོ་ ༢༠༠༥ ལོའི་བར་དཔལ་འབྱོར་ལས་ཁུངས་ཀྱིས་འཛིན་སྐྱོང་བྱེད་བཞིན་པའི་རྡ་ས་བོད་ཀྱི་གསོལ་མགྲོན་ཁང་དང་། སྒང་ཏོག་བོད་ཀྱི་གསོལ་མགྲོན་ཁང་གཉིས་སྤྱི་མཐུན་མཉམ་འབྲེལ་གྱིས་རྩིས་ལེན་ཞུས།  ཕྱི་ལོ་ ༢༠༠༦ ལོར་ནང་སྲིད་ཀྱིས་འཛིན་སྐྱོང་གནང་བཞིན་པའི་ལྡི་ལི་ཕྱིར་ཚོང་ཁང་ཡང་རྩིས་ལེན་ཞུས།  ཕྱི་ལོ་ ༢༠༡༤ ཟླ་ ༡༡ ཚེས་ ༩ ཉིན་ཀར་ན་ཊ་ཀ་མངའ་གཞུང་གི་མཐུན་སྦྱོར་འོག་སྦང་ལོར་ནང་ས་ཆ་ཕི་ཊི་གྲུ་བཞི་མ་ ༢༧༠༠༠ ཞུ་ཐུབ་ཡོད་པ་དེའི་སྟེང་དུ། དབུས་ལས་ཁུངས་དང་ལས་ཤག མགྲོན་ཁང་བཅས་ཐོག་བརྩེགས་གསུམ་ཅན་ཞིག་དབུ་འབྱེད་གནང་བ་དང་།  ཕྱི་ལོ་ ༢༠༡༡ ལོར་སྦེལ་ཀོབ་ཏུ་དེའི་ཡན་ལག་སྡེ་ཚན་གསར་འཛུགས་གནང༌། ཕྱི་ལོ་ ༢༠༡༧ ལོར་སྦེལ་ཀོབ་ཏུ་གནའ་སྲོལ་གྱི་སྤོས་བཟོ་ཁང་གསར་འཛུགས་གནང་། ཕྱི་ལོ་ ༢༠༢༢ ལོར་སྦེལ་ཀོབ་ཏུ་བོད་ཀྱི་གསོལ་མགྲོན་ཁང་ཞེས་པ་ཞིག་སྒོ་འབྱེད་གནང་། ཕྱི་ལོ་ ༢༠༢༣ ལོར་སྦེལ་ཀོབ་ཏུ་ཆུ་སྐྱལ་ས་(Swimming pool) ཞིག་གསར་བཟོ་བྱས། ཕྱི་ལོ་ ༢༠༢༥ ལོར་སྦེལ་ཀོབ་ཏུ་དེང་དུས་ཀྱི་ཁྱད་ཆོས་ཚང་བའི་བསིལ་ཁང་ངམ་མགྲོན་ཁང་ཞིག་གསར་དུ་སྒོ་འབྱེད་བྱས་པ་དང་། ཕྱི་ལོ་ ༢༠༢༢ ལོར་ལྡི་ལི་བསམ་ཡས་གླིང་དུ་མདོ་ཁམས་ཆུ་བཞི་སྒང་དྲུག་གི་མགྲོན་ཁང་ཞིག་ལོ་དགུའི་རིང་བོགས་གཡར་ཐོག་གན་ཡིག་བླངས་ཏེ་སྒོ་འབྱེད་བྱས་ཡོད་འདུག

གསར་འགོད་པ། སྐལ་བཟང་སྦྱིན་པ།