རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ཝོལ་ཀར་ལགས་ཀྱིས་རྒྱ་ནག་གིས་བོད་ནང་དུ་ཆོས་དད་རང་དབང་ཚུད་པའི་ཐོབ་ཐང་རྡོག་རོལ་གཏོང་གི་ཡོད་པར་སེམས་འཚབ་དང་སྦྲགས་བོད་མིའི་གཞི་རྩའི་ཐོབ་ཐང་ལ་སྲུང་སྐྱོབ་དགོས་པའི་རེ་སྐུལ་གནང་།
ཁ་སང་ཕྱི་ཚེས་ ༧ ཉིན་ནས་ཟླ་བ་གཅིག་རིང་ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་(United Nations Human Rights Council) ཐེངས་༦༣ པ་འཚོག་མགོ་བཙུགས་ཡོད་པ་ལྟར། ཁ་སང་ལྷན་ཚོགས་དབུ་འབྱེད་སྐབས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ཝོལ་ཀར་ (Volker Türk) ལགས་ཀྱིས། རྒྱ་ནག་གཞུང་གིས་བོད་ནང་གི་བོད་མི་རྣམས་ཀྱི་གཞི་རྩའི་རང་དབང་ཐོབ་ལ་དམ་དྲག་དང་གཉའ་གནོན་བྱེད་ཀྱིན་ཡོད་པ་མ་ཟད། ལྷག་པར་བོད་མི་རྣམས་ལ་ཆོས་དད་རང་དབང་གི་ཐོབ་ཐང་སྤྲོད་ཀྱིན་མེད་པའི་ཐད་སེམས་འཚབ་ཆེན་པོ་ཡོད་སྐོར་སོགས་བརྗོད་འདུག
ལྷན་ཚོགས་ཀྱི་ཚོགས་གཙོ་ལགས་ཀྱིས། རྒྱ་ནག་གཞུང་གིས་བོད་མི་མང་གི་ཆོས་དད་རང་དབང་སོགས་ཀྱི་ཐོབ་ཐང་ཐོག་དམ་དྲག་ཤུགས་ཆེ་རུ་གཏོང་བཞིན་པ་དེར་བློ་འཚབ་ཆེན་པོ་ཡོད། སྲིད་ཇུས་འདི་དག་མགྱོགས་མྱུར་ཕྱིར་འཐེན་གནང་དགོས་པའི་འབོད་སྐུལ་ཞུ་རྒྱུ་ཡིན། ཞེས་བརྗོད་འདུག
དེ་བཞིན་ལྷན་ཚོགས་ཀྱི་ཚོགས་གཙོ་མཆོག་གིས། དེང་སྐབས་འཛམ་གླིང་ནང་དམག་འཁྲུག་དང་། ཆབ་སྲིད། འཕྲུལ་རིག་སོགས་ཀྱི་ལམ་ནས་འགྲོ་བ་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་གིན་ཡོད་པའི་གནས་བབ་ཐེར་འདོན་གནང་བ་དང་སྦྲགས། ཨ་རི་དང་ཨི་རན་གྱི་དམག་འཁྲུག ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནས་སྟངས། ཚོགས་མི་རྒྱལ་ཁབ་ཁག་གིས་འགྲོ་བ་མིའི་ཐོབ་ཐང་གི་གནས་བབ་གོང་མཐོར་གཏོང་དགོས་པའི་གནས་སྟངས་སོགས་ཀྱི་ཐད་ལ་གླེང་སློང་གནང་ཡོད་པ་མ་ཟད། འཛམ་གླིང་ཡོངས་ཀྱིས་འགྲོ་བ་མིའི་ཐོབ་ཐང་དང་། འདྲ་མཉམ། རྒྱལ་སྤྱིའི་མཉམ་ལས། བུད་མེད་དང་བྱིས་པ་སོགས་ཀྱི་ཁེ་ཕན་སྲུང་སྐྱོབ་དགོས་པའི་རེ་སྐུལ་ཞུས་སོང་།
གནད་དོན་དེ་དང་འབྲེལ་ནས། ཇི་ནི་ཝར་རྟེན་གཞི་བྱས་པའི་བོད་ཀྱི་དོན་གཅོད་ལས་ཁུངས་ཀྱིས། རྒྱལ་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་གསལ་བཤད་བྱས་པར་དགའ་བསུ་ཞུ་བ་དང་ཆབས་ཅིག རྒྱལ་སྤྱིའི་ཐོག་ནས་བོད་མིའི་ཆོས་དང་རིག་གཞུང་། དེ་བཞིན་གཞི་རྩའི་ཐོབ་ཐང་སྲུང་སྐྱོབ་བྱ་རྒྱུའི་གལ་ཆེའི་རང་བཞིན་བསྐྱར་ནན་བྱེད་ཀྱི་ཡོད། འདི་ག་ལས་ཁུངས་ཀྱིས་མཉམ་འབྲེལ་རྒྱལ་ཚོགས་ཀྱི་ལས་ཁུངས་དང་། ཕྱི་འབྲེལ་ལས་དོན། རྒྱལ་སྤྱིའི་མཐུན་གྲོགས་རྒྱལ་ཁབ་བཅས་ལ་མུ་མཐུད་ནས་འབྲེལ་བ་བྱས་ཏེ། བོད་ནང་གི་གནས་བབ་དེ་དག་རྒྱལ་སྤྱིའི་འགྲོ་བ་མིའི་ཐོབ་ཐང་གི་བགྲོ་གླེང་ནང་ཚུད་པ་བྱ་རྒྱུ་ཡིན་སྐོར་སྤེལ་འདུག
འདི་ལོའི་ཕྱི་ཟླ་ ༧ ཚེས ༡༥ ནས་ཕྱི་ཟླ་ ༧ ཚེས་ ༨ བར་སུད་སི་གྲོང་ཁྱེར་ཇི་ནི་ཝ་རུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ འཚོགས་པ་དང་བསྟུན། ལྷན་ཚོགས་ཀྱི་ཚོགས་གཙོ་སྐུ་ཞབས་ཝོལ་ཀར་ (Volker Türk) ལགས་ཀྱིས་མཉམ་འབྲེལ་རྒྱལ་ཚོགས་ཀྱི་ཚོགས་མི་རྣམས་ལ་གོ་ལ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་ནས་གཏམ་བཤད་གནང་སྐབས། དེང་སྐབས་འཛམ་གླིང་ཁྲོད་རྒྱལ་སྤྱིའི་ཁྲིམས་ལ་རྩིས་མེད་རྡོག་རོལ་དང་གཞི་རྩའི་ཐོབ་ཐང་དང་རང་དབང་ལ་གནོན་ཤུགས་ཇེ་ཆེར་འགྲོ་བཞིན་པར་ཉེན་བརྡ་བཏང་ཡོད་པ་མ་ཟད། ངོ་ཚ་ཁྲལ་མེད་ཀྱི་བྱ་སྤྱོད་དེ་དག་གིས་འགྲོ་བ་མིའི་རིགས་ལ་དཀའ་ངལ་ཤུགས་ཆེན་བཟོ་མུས་ཡིན་སྐོར་དང་། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་ཕྱིར་འཐེན་དགོས་པའི་འབོད་སྐུལ་གནང་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
