ཉི་ཧོང་དུ་འཚོག་བཞིན་པའི་ ༢༠༢༦ ལོའི་ཨེ་ཤ་ཡའི་རྩེད་འགྲན་ཁྲོད་བོད་ཀྱི་བུད་མེད་ལུས་རྩལ་བ་བསྟན་འཛིན་ཆོས་འཛོམས་ལ་འདུར་རྒྱུགས་འགྲན་བསྡུར་ཁྲོད་གསེར་གྱི་རྟགས་མ་ཐོབ་ཡོད་འདུག
ཕྱི་ཟླ་ ༩ ཚེས་ ༢༧ ཉིན་བོད་འཕན་ཡུལ་གྱི་བོད་རིགས་བུད་མེད་ལུས་རྩལ་བ་བསྟན་འཛིན་ཆོས་འཛོམས་ཀྱིས་ཉི་ཧོང་གི་ན་ཀོ་ཡ་ས་གནས་སུ་འཚོག་བཞིན་པའི་ ༢༠༢༦ ལོའི་ཨེ་ཤ་ཡའི་རྩེད་འགྲན་གྱི་བུད་མེད་འདུར་རྒྱུགས་ནང་ཆུ་ཚོད་ ༣ དང་སྐར་མ་ ༢༦ སྐར་ཆ་ ༠༩ ཡིས་སྤྱི་ལེ་ ༤༢།༡༩༥ རྒྱུགས་པར་གསེར་གྱི་རྟགས་མ་ཐོབ་ཡོད་འདུག དེ་ནི་བོད་ཀྱི་ལུས་རྩལ་པས་ཨེ་ཤ་ཡ་དབྱར་དུས་ཀྱི་ལུས་རྩལ་རྣམ་གྲངས་སུ་ཞུགས་པའི་གསེར་གྱི་རྟགས་མ་ཐོབ་པ་ཐོག་མ་རེད་འདུག
ཕྱི་ཚེས་ ༢༧ ཉིན་གྱི་སྤྱི་ལེ་ ༤༢།༡༩༥ ཅན་གྱི་འདུར་རྒྱུགས་འགྲན་བསྡུར་ཁྲོད། ཀ་ཛཀ་སི་ཐན་གྱི་ལུས་རྩལ་པ་ཡ་སི་མི་ན་ཌོ་ཟན་བྷ་ཡེ་ཝ་(Yasmina Toxanbayeva) ཡིས་ཆུ་ཚོད་ ༣ སྐར་མ་ ༢༢ སྐར་ཆ་ ༢༠ ཐོག་ཨང་དང་པོ་ཐོབ་པ་དང་། བོད་ཀྱི་ལུས་རྩ་ལ་བ་བསྟན་འཛིན་ཆོས་འཛོམས་ཀྱིས་ཆུ་ཚོད་ ༣ སྐར་མ་ ༢༦ སྐར་ཆ་ ༠༩ ཐོག་ཨང་གཉིས་པ་བླངས་ཤིང་། རྒྱ་ནག་གི་ལུས་རྩལ་བ་མ་ལེ་ཡིས་ཆུ་ཚོད་ ༣ སྐར་མ་ ༣༢ སྐར་ཆ་ ༢༦ ཐོག་ཨང་གསུམ་པ་བླངས་ཡོད་འདུག དེ་དུས་ཚང་མས་ཀ་ཛཀ་སི་ཐན་གྱི་ཡ་སི་མི་ན་ཌོ་ཟན་བྷ་ཡེ་ཝ་ལ་གསེར་གྱི་རྟགས་མ་ཐོབ་ཡོད་བསམས་ཡོད་ཀྱང་། ཕྱི་ཚེས་ ༢༨ ཉིན། གཞུང་འབྲེལ་རྒྱུགས་འབྲས་བསྒྱུར་བཅོས་བཏང་སྟེ། ཀ་ཛཀ་སི་ཐན་གྱི་ལུས་རྩལ་པ་ཡ་སི་མི་ན་ཌོ་ཟན་བྷ་ཡེ་ཝ་ལ་ཐོབ་པའི་གཟེངས་རྟགས་ཀྱི་རིམ་པ་རྩིས་མེད་དུ་གྱུར་བ་ཁྱབ་བསྒྲགས་བྱས་པ་དང་། རྒྱུ་རྐྱེན་ནི་མོའི་གྱོན་པའི་ལྷམ་སྒྲིག་ལམ་དང་མི་མཐུན་པས་གྲུབ་འབྲས་ཕྱིར་འཐེན་བྱས་ཡོད་འདུག གཞུང་འབྲེལ་ཆོག་མཆན་དང་འགལ་ཡོད་པས། ཐོ་འགོད་དང་ཆོག་མཆན་ཞུས་མེད་པ་འགྲན་བསྡུར་རྗེས་ཀྱི་ཆས་གོས་བསྐྱར་ཞིབ་ཁྲོད་གསལ་ཁ་བཏོན་འདུག འཛམ་གླིང་ལུས་རྩལ་མཉམ་འབྲེལ་ཚོགས་པའི་ལུས་རྩལ་འགྲན་བསྡུར་དང་ལུས་རྩལ་སྒྲིག་ལམ་ཞེས་པའི་དོན་ཚན་ལྔ་པར། ལུས་རྩལ་པས་འགྲན་བསྡུར་ནང་ཞུགས་སྐབས་རྐང་རྗེན་དང་། ལྷམ་གྱོན་པ། ཐ་ན་ལྷམ་ཡ་གཅིག་གྱོན་ནའང་ཆོག འོན་ཀྱང་ལྷམ་གྱོན་ཚེ་འབྲེལ་ཡོད་གཏན་འབེབས་བྱས་པའི་སྒྲིག་ལམ་དང་ཡོངས་སུ་མཐུན་དགོས་པ་གསལ་པོ་བཀོད་ཡོད་འདུག
ཕྱི་ཚེས་ ༢༨ ཉིན་གྱི་ཕྱི་དྲོ། བསྟན་འཛིན་ཆོས་འཛོམས་ཀྱི་གཅུང་མོ་ཀུན་བཟང་དབང་མོས་གསར་འགོད་པར་ལན་འདེབས་བྱས་པའི་ནང་དུ། བསྟན་འཛིན་ཆོས་འཛོམས་ནི་ཆུང་དུས་ནས་བཟུང་གོམ་བགྲོད་དང་རྒྱུགས་ཤར་གློད་པར་དགའ་ཞིང་། རང་ཁྱིམ་ནས་ཞིང་ཁ་བར་སྐར་མ་ ༢༠ ལྷག་འགྲོ་དགོས་པར་རྟག་ཏུ་རྐང་ཐང་དུ་འགྲོ་བར་བྱེད་ལ། གཅུང་མོ་རང་ཉིད་རྐང་ཐང་དུ་འགྲོ་བར་མི་དགའ་བས་ནམ་རྒྱུན་ལྕགས་རྟ་བཞོན་ནས་འགྲོ་ཡི་ཡོད་པ་དང་། གཅེན་མོས་རང་ཉིད་རྒྱབ་ལ་འཁུར་ནས་འགྲོ་ཡི་ཡོད་པའི་འདས་དོན་སོགས་ཀྱི་སྐོར་གླེང་འདུག
ཕྱི་ལོ་ ༢༠༢༤ ཟླ་ ༨ ཚེས་ ༡༧ ཉིན། ༢༠༢༤ ལོའི་ལྷ་སའི་བུད་མེད་ཀྱི་འདུར་རྒྱུགས་ཕྱེད་ཀའི་འགྲན་བསྡུར་ཁྲོད་བསྟན་འཛིན་ཆོས་འཛོམས་ཀྱིས། ཆུ་ཚོད་ ༡ སྐར་མ་ ༢༥ སྐར་ཆ་ ༡༨ ཐོག་ཨང་དང་པོ་བླངས་ཡོད། ཕྱི་ལོ་ ༢༠༢༥ ཟླ་ ༡༡ ཉིན། ཀྲུའུ་ཧའེ་(珠海)རུ་འཚོགས་པའི་རྒྱ་ནག་རྒྱལ་ཡོངས་བུད་མེད་འདུར་རྒྱུགས་སྤྱི་ལེ་ ༢༠ ཅན་གྱི་འགྲན་བསྡུར་ཁྲོད། བསྟན་འཛིན་ཆོས་འཛོམས་ཀྱིས་གཟུགས་གཞི་བདེ་མིན་ལ་མ་བལྟོས་པར། ཆུ་ཚོད་ ༡ སྐར་མ་ ༤༢ སྐར་ཆ་ ༥༨ གི་གྲུབ་འབྲས་ཐོག་འགྲན་བསྡུར་ཁྲོད་ཨང་ ༢༨ པ་ཐོབ་ཡོད་འདུག ཕྱི་ལོ་ ༢༠༢༦ ཨན་ཧུའེ་ཧོང་ཧྲན་(安徽黄山)དུ་འཚོགས་པའི་རྒྱ་ནག་རྒྱལ་ཡོངས་བུད་མེད་ཀྱི་འདུར་རྒྱུགས་ཕྱེད་ཀའི་འགྲན་བསྡུར་ཁྲོད། ཁོ་མོས་ཆུ་ཚོད་ ༡ སྐར་མ་ ༣༩ སྐར་ཆ་ ༠༦ གི་གྲུབ་འབྲས་ཐོག་ཨང་རིམ་གསུམ་པ་བླངས་ཤིང་། ཟླ་༥ པར། ཨན་ཧུའེ་ཧོ་ཧྥེ་(安徽合肥) རུ་འཚོགས་པའི་རྒྱ་ནག་རྒྱལ་ཡོངས་བུད་མེད་འདུར་རྒྱུགས་འགྲན་བསྡུར་ཁྲོད་ཨང་གཉིས་པ་བླངས་ནས། སྐབས་ ༢༠ པའི་ཨེ་ཤ་ཡ་རྩེད་འགྲན་ཆེན་མོར་ཞུགས་པའི་ཐོབ་ཐང་ཐོབ་ཡོད་འདུག
གསར་འགོད་པ། རྟ་མགྲིན་མཚོ། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
