ཨེ་མོ་རི་བྱམས་བརྩེའི་ལྟེ་གནས་ཁང་གསར་འཛུགས་གནང་མཁན་དང་འགན་འཛིན་དགེ་བཤེས་བློ་བཟང་བསྟན་འཛིན་ནེ་གེ་ལགས་ལས་འཁྱུར་ངལ་གསོ་བྱས།
ཕྱི་ཚེས་ ༢༩ ཉིན། ཨེ་མོ་རིའི་གཙུག་ལག་སློབ་གཉེར་ཁང་གི་དྲ་རྒྱའི་སྟེང་གནས་ཚུལ་སྤེལ་བ་ལྟར་ན། ཨེ་མོ་རི་བྱམས་བརྩེའི་ལྟེ་གནས་ཁང་(Emory Compassion Center )གསར་འཛུགས་གནང་མཁན་དགེ་བཤེས་བློ་བཟང་བསྟན་འཛིན་ནེ་གེ་ལགས་ཀྱིས་ལོ་ངོ་ ༢༨ རིང་གི་ལས་འཁུར་གནང་རྗེས་ལས་འཁྱུར་ངལ་གསོ་བྱས་ཡོད་པ་དང་། རྒྱ་གར་ལྷོ་ཕྱོགས་སུ་ལོ་གསུམ་རིང་སྒོམ་སྒྲུབ་ཉམས་ལེན་གནང་འཆར་ཡོད་འདུག ད་ལྟ་ཁོང་གི་ཚབ་ཏུ་ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་རོབ་རོ་སིར་ (Rob Roeser) ལགས་འགན་འཛིན་གསར་བར་བསྐོ་བཞག་བྱས་ཡོད་འདུག
འདས་པའི་ལོ་ངོ་ ༢༨ རིང་། དགེ་བཤེས་བློ་བཟང་བསྟན་འཛིན་ནེ་གེ་ལགས་ཀྱིས་ནང་པའི་སེམས་སྦྱོང་དང་སེམས་ཁམས་ཚན་རིག་གི་ཞིབ་འཇུག་ཟུང་སྦྲེལ་བྱས་ཏེ། ས་གནས་མང་པོའི་མི་རྣམས་ཀྱི་སྡུག་བསྔལ་ཇེ་ཉུང་དུ་གཏོང་བ་དང་། སེམས་ཀྱི་བརྟན་ཚུགས་དང་བདེ་ཐང་གོང་མཐོར་གཏོང་བའི་ཐད་འཛམ་གླིང་ཡོངས་ལ་ཞབས་འདེགས་མི་དམན་པ་ཞུས་ཡོད། ཁོང་གིས་འདས་པའི་ལོ་ངོ་སུམ་ཅུ་མ་ཟིན་ཙམ་གྱི་རིང་། ནང་ཆོས་དང་ཚན་རིག་ཟུང་སྦྲེལ་ཐོག་ཕན་ཚུན་ལེགས་ཆ་ལེན་རེས་ཀྱི་ལས་གཞི་དང་། བགྲོ་གླེང་། སློབ་ཚན་གཏན་འབེབས། ཉམས་ཞིབ་རྩོམ་ཡིག་སྤེལ་བ་སོགས་ཡོད་ཚད་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་དགོངས་གཞིར་བཟུང་གྲུབ་འབྲས་བྱུང་བ་ཞིག་ཡིན་པ་གསུངས་འདུག
ཁོང་གིས་འཛིན་སྐྱོང་གནང་བའི་ལས་གཞི་གཙོ་བོ་གསུམ་ཡོད་དེ། དང་པོ་ནི་དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་ཐབས། (CBCT) ཞེས་པ་དེ་ཡིན། དེ་ནི་བོད་ཀྱི་བློ་སྦྱོང་གཞིར་བཞག་པའི་འཇིག་རྟེན་པར་བྱམས་བརྩེ་སྒོམ་སྒྲུབ་བྱེད་སྟངས་ཀྱི་ལམ་སྟོན་ཞིག་ཡིན་པ་དང། ད་ལྟ་རྒྱལ་ཁབ་ ༢༨ ནང་སློབ་གསོ་དང་སྨན་བཅོས། སྤྱི་ཚོགས་ཁྲོད་དུ་བེད་སྤྱོད་བྱེད་བཞིན་ཡོད། གཉིས་པ་ནི་ཨེ་མོ་རི་དང་བོད་ཀྱི་ཚན་རིག་ལས་རིམ། (ETSI) ཞེས་པ་དེ་ཡིན། དེ་ནི་བོད་ཀྱི་དགོན་སྡེའི་སློབ་གསོ་དང་དེང་རབས་ཚན་རིག་སློབ་གསོ་ཟུང་འབྲེལ་གྱི་ལས་གཞི་ཞིག་ཡིན། གསུམ་པ་ནི་སྰི་ཤེས་ཡོན། (SEE Learning) ཞེས་པ་དེ་ཡིན། དེ་ནི་སྔོན་འགྲོ་སློབ་གྲྭ་ནས་མཐོ་རིམ་བར་གྱི་སློབ་མའི་ཆེད་དུ་བཟོས་པའི་སློབ་གསོའི་ལམ་ལུགས་ཤིག་ཡིན་པ་དང། ཆོས་ལུགས་ཀྱི་ལྟ་བ་ལས་བརྒལ་བའི་ཀུན་སྤྱོད་སློབ་གསོ་དང་སེམས་མོས་ཀྱི་ཤེས་ཚད་གོང་མཐོར་གཏོང་བར་དམིགས་ཡོད། ད་ལྟ་རྒྱལ་ཁབ་ ༧༨ ནང་ཁྱབ་བརྡལ་བྱུང་ཡོད།
དགེ་བཤེས་བློ་བཟང་བསྟན་འཛིན་ནེ་གེ་ལགས་ཀྱིས་ད་བར་སྒྲུབ་པའི་ཕྱག་ལས་ཐད་རྒྱུས་མངའ་ཅན་འགའ་ཤས་ལ་ཁ་པར་བརྒྱུད་བཅར་འདྲི་ཞུས་པར། འབྲས་སྤུངས་བློ་གསལ་གླིང་གི་སྒོམ་སྒྲུབ་དང་ཚན་རིག་ལྟེ་གནས་ཁང་གི་འགན་འཛིན་དགེ་བཤེས་ལྷ་རམས་པ་སྐལ་བཟང་ཆོས་ལྡན་ལགས་ཀྱིས། ང་རང་དགེ་བཤེས་ལགས་ལ་བཅར་ཐེངས་མང་པོ་བྱུང་ཡོད་པ་དང་། ཕྱི་ལོ་ ༢༠༡༩ ཨེ་མོ་རི་ལ་སློབ་སྦྱོང་བྱེད་རྒྱུའི་གོ་སྐབས་ཐོབ་པ། ཁོང་དང་ལྷན་དུ་ཚོགས་འདུར་མཉམ་ཞུགས་བྱས་པ། བཀའ་སློབ་ཉན་རྒྱུ་སོགས་གོ་སྐབས་མང་པོ་ཐོབ་སོང་། དགེ་བཤེས་ལགས་ཀྱིས་ད་བར་དུ་སྤྱི་ཚོགས་ཞབས་ཞུ་ཞུས་པ་དང་། དེ་ཡང་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་སྒྲུབ་རྒྱུ། བོད་ཀྱི་སྤྱི་ཚོགས་དང་། བོད་ཀྱི་ཆོས་དང་རིག་གཞུང་ཁོ་ན་ལ་ཕན་ཐོགས་ན་བསམ་པའི་ཀུན་སློང་ཞིག་མ་གཏོགས་སྒེར་གྱི་ཁེ་ཕན་ཆེད་སྒོར་མོ་སྐར་གང་ཐོབ་ན་བསམ་པའི་འདུ་ཤེས་སྐྱེས་མྱོང་མེད་ཅེས་དང་། དེ་བཞིན་ཁྱེད་རང་ཚོ་གྲྭ་བ་ཡིན་པས་སྤྱི་ཚོགས་ཞབས་ཞུའི་ལས་དོན་མ་གཏོགས་མིང་དང་གོ་ས། སྒོར་མོ་སོགས་ཀྱི་དོན་དུ་བསམ་བློ་གཏོང་མི་དགོས་པ་ཞིག་རེད། ༧གོང་ས་རྒྱལ་བ་རིན་པོ་ཆེའི་དགོངས་གཞི་དང་བོད་ཀྱི་སྤྱི་ཚོགས་ཞབས་ཞུའི་སླད་དུ་བསམ་བློ་གཏང་བ་ཡིན་ན། ཁུངས་མ་འཁྱོལ་བ་ཡོད་པ་མ་རེད་སོགས་གསུངས་མྱོང་ཡོད། ང་ཚོའི་ངེས་པར་དུ་ཁོང་གི་གསུང་དེ་སེམས་ལ་ཉར་དགོས་འདུག་བསམས་བྱུང་། དེ་བཞིན་དགེ་བཤེས་ལགས་ནི་བློ་གསལ་གླིང་ལ་མཚོན་ན་ཨ་མ་ལྟ་བུའི་བཀའ་དྲིན་ཆེན་པོ་ཡིན་པ་དང་། འབྱུང་འགྱུར་ཡང་དགེ་བཤེས་ལགས་ལ་ལམ་སྟོན་རེ་སྐུལ་ཞུ་རྒྱུའི་འཆར་གཞི་ཡོད་སྐོར་སོགས་བརྗོད་བྱུང་།
སྒོམ་སྒྲུབ་དང་ཚན་རིག་ལྟེ་གནས་ཁང་གི་བོད་དྲུང་དགེ་བཤེས་ལྷ་རམས་པ་དཀོན་མཆོག་འཕེལ་རྒྱས་ལགས་ཀྱིས། ང་རང་ཕྱི་ལོ་ ༢༠༡༨ ནས་ལོ་ངོ་དྲུག་གི་རིང་དབྱར་དགུན་གྱི་ཚན་རིག་ཟབ་སྦྱོང་དང་། དེའི་རྗེས་སུ་ལོ་གསུམ་གྱི་ཚན་རིག་རྒྱུན་འཁྱོངས་ཟབ་སྦྱོང་། ད་ལྟ་འཚོག་བཞིན་པའི་ཚན་རིག་ཆེད་སྦྱོང་འཛིན་གྲྭ་བཅས་འགྲིམ་པའི་ཉམས་མྱོང་ལ་གཞིགས་ཚེ། དགེ་བཤེས་བློ་བཟང་བསྟན་འཛིན་ནེ་གེ་ལགས་ནི་༧གོང་ས་རྒྱལ་བ་རིན་པོ་ཆེ་མཆོག་གིས་ལོ་ངོ་ཉིས་བརྒྱའི་ཇུས་ཆེན་གྱི་དགོངས་གཞིའི་ཐོག་ཤར་བསྐྱོད་དང་། བོད་ཀྱི་དགོན་སྡེའི་གནས་བབ་ལ་རན་པའི་ལོ་ལྔའི་ཚན་རིག་སློབ་ཚན་བཀོད་སྒྲིག་གིས་མཚོན་པའི་ཨེ་མོ་རི་དང་བོད་ཀྱི་ཚན་རིག་ལས་རིམ་དང་། དཔྱད་སྒོམ་ལ་བརྟེན་པའི་སྙིང་རྗེའི་སྦྱོང་ཐབས། སཱི་ཤེས་ཡོན་བཅས་ཀྱི་གཞི་རྒྱ་ཆེ་བའི་ལས་གཞི་ཁག་དང་ཁ་འབྲལ་དུ་མི་རུང་ཞིང་། ནང་པ་སངས་རྒྱས་པའི་སེམས་ཀྱི་ཚན་རིག་དང་དེང་རབས་ཚན་རིག་བར་གྱི་མཉམ་ལས་ཆེད་འཛམ་གླིང་ཤར་ནུབ་རྒྱ་ཁྱབ་ཏུ་ལས་གཞི་གསར་གཏོད་དང་། ལག་བསྟར་བཅས་ཀྱི་ཐད་གྲུབ་འབྲས་འབུར་དུ་ཐོན་ཡོད་པའི་སྐྱེས་བུ་རླབས་ཆེན་ཞིག་དང་། མདོར་ན་ཁོང་ནི། ཚན་རིག་ཁྱོན་ནས་མི་ཤེས་པའི་དགེ་འདུན་པ་རྣམས་དེང་རབས་ཀྱི་ཚན་རིག་པ་དངོས་གནས་ཤིག་ཆགས་ཐུབ་པར་ལས་གཞི་འདྲ་མིན་སྤེལ་བའི་བྱས་རྗེས་ཅན་ཞིག་རེད། ཅེས་བརྗོད་བྱུང་།
དགའ་ཤར་སྒོམ་སྒྲུབ་ཚན་རིག་དང་ཉམས་ཞིབ་ལྟེ་གནས་ཁང་གི་འགན་འཛིན་ཟུར་པ་དགེ་བཤེས་བློ་བཟང་རྣམ་རྒྱལ་ལགས་ཀྱིས། དགེ་བཤེས་བློ་བཟང་བསྟན་འཛིན་ནེ་གེ་ལགས་ནི་ཨེ་མོ་རི་དང་བོད་ཀྱི་མཐུན་ཚོགས་གསར་གཏོད་བྱེད་མཁན་རེད། ཁོང་གིས་བཀའ་དྲིན་ལས་རྒྱ་གར་ནང་གི་དགོན་སྡེ་ཁག་ཏུ་ཚན་རིག་ཟབ་སྦྱོང་ཆེད་དགེ་རྒན་ ༢༠༠ ལྷག་གསོ་སྐྱོང་བྱས་ཡོད། དེ་བཞིན་ཁོང་གིས་ཚན་རིག་བསླབས་པ་ཁོ་ན་མིན་པར། ནང་ཆོས་དང་ཚན་རིག་བར་གྱི་བགྲོ་གླེང་འཚོགས་པ་དང་། དགེ་རྒན་རྣམས་ཀྱིས་ནང་ཆོས་དང་ཚན་རིག་འབྲེལ་ཡོད་ཀྱི་དཔྱད་རྩོམ་བྲིས་པ་རྣམས་ཨ་རིའི་དུས་དེབ་ཁག་ཏུ་སྤེལ་བའི་ལས་དོན་བྱས་ཡོད་ལ། རང་ཉིད་ཕྱི་ལོ་ ༢༠༡༧ ལ་ཚན་རིག་ལྟེ་གནས་ཁང་གི་འགན་འཛིན་བྱེད་སྐབས་དགེ་བཤེས་ལགས་ལ་ལམ་སྟོན་ཞུས་མྱོང་བར་ཕན་ཐོགས་བྱུང་ཡོད་པ་དང་། དེ་བཞིན་གདན་ས་ཁག་གི་མཁན་པོ་མང་པོ་ཞིག་དང་མཉམ་འབྲེལ་གྱིས་གདན་ས་ཁག་ཏུ་ཚན་རིག་བསླབ་གཞི་བཙུགས་པ་མ་ཟད། སྐྱེ་དངོས་རིག་པ་དང་དངོས་ཁམས་རིག་པ། དབང་རྩ་རིག་པ་ལྟ་བུ་ད་སྔ་བོད་ཡིག་ནང་མེད་པའི་རིགས་བོད་བསྒྱུར་གྱིས་སློབ་ཚན་གསར་འཛུགས་བྱེད་ཐུབ་ཡོད་པ་ནི་ཁོང་གི་མཛད་རྗེས་གཙོ་བོ་ཞིག་རེད་འདོད། ཅེས་བརྗོད་བྱུང་།
དགེ་བཤེས་བློ་བཟང་བསྟན་འཛིན་ནེ་གེ་ལགས་ནི་ཕྱི་ལོ་ ༡༩༦༠ ལོར་ཧི་མ་ལ་ཡའི་རི་རྒྱུད་ཀྱི་ཁུ་ནུ་རུ་སྐྱེས་ཤིང་། འབྲས་སྤུངས་བློ་གསལ་གླིང་དུ་ཆོས་ཞུགས་ཀྱིས་གཞུང་ཆེན་བཀའ་པོད་ལྔར་གསན་བསམ་སློབ་གཉེར་གྱིས་དགེ་བཤེས་ལྷ་རམས་པའི་མཚན་རྟགས་བཞེས། ཕྱི་ལོ་ ༡༩༨༧ ནས་ཨ་རི་སོགས་ཕྱི་རྒྱལ་ཡུལ་གྲུ་ཁག་ཏུ་ཆེད་བསྐྱོད་ཀྱིས་ནུབ་ཕྱོགས་པའི་དོན་གཉེར་ཅན་རྣམས་ལ་ནང་ཆོས་འཆད་ཁྲིད་དང་། བོད་ཀྱི་རིག་གཞུང་ངོ་སྤྲོད་གནང་། ཕྱི་ལོ་ ༡༩༩༨ ལོར་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་ཨེ་མོ་རི་གཙུག་ལག་སློབ་གཉེར་ཁང་དང་། འབྲས་སྤུངས་བློ་གསལ་གླིང་བར་གན་རྒྱ་བཞག་སྟེ་ཨེ་མོ་རི་དང་བོད་ཀྱི་མཐུན་ཚོགས་ཞེས་པ་ཐོག་མར་དབུ་བརྙེས་པ་ནས་བཟུང་། ཨེ་མོ་རི་གཙུག་ལག་སློབ་གཉེར་ཁང་གི་སྒོམ་སྒྲུབ་ཚན་རིག་དང་། སྙིང་རྗེ་གཞི་རྩར་བཟུང་བའི་ལྟེ་གནས་ཁང་གིས་སློབ་གསོའི་རང་བཞིན་ལྡན་པའི་ལས་གཞི་དེ་དག་བརྒྱུད། འཛམ་གླིང་འདི་བྱམས་བརྩེ་དང་ཞི་བདེ་ལྡན་པ་ཞིག་བསྐྲུན་རྒྱུར་འབད་བརྩོན་གནང་ཡོད་པ་སོགས་གཟེངས་སུ་ཐོན་པའི་ཕྱག་ལས་མང་དག་ཅིག་གནང་ཡོད་འདུག
གསར་འགོད་པ། རྟ་མགྲིན་མཚོ། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
