ཁ་སང་ཕྱི་ཚེས་ ༦ ཉིན་བཞུགས་སྒར་ངྷ་རམ་ས་ལའི་བོད་ཀྱི་གསར་འགོད་པའི་མཐུན་ཚོགས་ཀྱིས། བོད་དོན་ཀྱི་གློག་བརྙན་ཕབ་བསྐྲུན་པ་དོན་འགྲུབ་དབང་ཆེན་ལ་ཟླ་སྔོན་མའི་ནང་རྒྱ་གཞུང་གིས་ལོ་ ༦ གི་ཁྲིམས་ཐག་བཅད་པར་ངོ་རྒོལ་གྱི་བསྒྲགས་གཏམ་ཞིག་སྤེལ་ཡོད་ལ། དེ་དང་མཉམ་དུ་བོད་རིགས་ན་གཞོན་དཔར་ལེན་པ་ཀུན་དགའ་ཚངས་དབྱངས་ལ་ལོ་ ༥ དང་། མཆོད་མེ་རྩོམ་རིག་དྲ་བའི་གཙོ་གཉེར་བ་དཀོན་མཆོག་ཚེ་འཕེལ་ལ་ལོ་ ༡༥ བཅས་ཀྱི་ཁྲིམས་ཐག་བཅད་པ་དང་། གཞན་རྒྱ་གཞུང་གི་ཆབ་སྲིད་ཉེས་མིང་འོག་གནོན་བཙིར་ཐེབས་མཁན་བོད་ཡུལ་མདོ་དབུས་ཁམས་གསུམ་གྱི་གསར་འགྱུར་ལས་རིགས་དང་འབྲེལ་ཡོད་སྤྱི་དང་། རྩོམ་སྒྲིག་པ་དང་རྩོམ་པ་པོ་ཡོངས་ལ་གདོང་སེམས་མཉམ་སྐྱེད་དང་། ཁོང་ཚོར་རང་དབང་དང་གུ་ཡངས་གཏོང་དགོས་པ། འབྱུང་འགྱུར་གྱི་ལས་དོན་ཐོག་ཐེ་ཇུས་མི་བྱ་རྒྱུ་སོགས་ལ་འབོད་སྐུལ་ཞུས་འདུག
བསྒྲགས་གཏམ་དེའི་ནང་བཀོད་དོན། རྒྱ་ནག་གཞུང་གིས་སྔ་ལོའི་ཕྱི་ཟླ་ ༡༠ པའི་ནང་པེ་ཅིན་ནང་རྒྱལ་སྤྱིའི་གསར་འགོད་པའི་ཚོགས་ཆེན་ཞིག་བསྐོང་ཚོགས་སྐབས། དམིགས་དོན་བཀའ་མོལ་དང་ཁས་ལེན། གསལ་བཤད་གནང་བ་བཞིན་དངོས་སུ་བོད་མིའི་སྨྲ་བརྗོད་དང་གསར་འགོད་རང་དབང་བེད་སྤྱོད་བྱེད་མཁན་ཚོར་དོ་དམ་མི་ཡོང་བར། བརྩི་སྲུང་དགོས་པའི་རྟག་ཏུ་འབོད་སྐུལ་ཞུ་བཞིན་ཡོད། གཞན་ཡང་བོད་ཀྱི་གསར་འགོད་མཐུན་ཚོགས་ཀྱི་ངོས་ནས་སྔོན་མ་ནས་བོད་ནང་དུ་གནད་དོན་རྟོག་ཞིབ་སླད། གསར་འགོད་པའི་སྐུ་ཚབ་ཆེད་གཏོང་བྱ་རྒྱུའི་རེ་འདུན་ཡོངས་ཁྱབ་ཏུ་རྒྱ་གཞུང་ལ་འབོད་སྐུལ་ཞུས་ཀྱང་། ད་བར་དེ་ལ་རྒྱ་གཞུང་གིས་ལན་འདེབས་ཀྱི་འདེང་སྤོབས་མེད་པའི་ཚོར་སྣང་བྱུང་། ང་ཚོའི་ངོས་ནས་ད་ལྟའང་ཆོག་མཆན་གནང་ཚེ། བོད་ནང་གི་དངོས་ཡོད་གནས་སྟངས་ལ་ཞིབ་རྟོག་ཆེད་བསྐྱོད་རྒྱུའི་འདུན་པ་ལ་འགྱུར་བ་མེད་ཅེས་ནན་བརྗོད་བྱ་རྒྱུ་ཡིན། ཞེས་བཀོད་འདུག
བོད་ཀྱི་གསར་འགོད་མཐུན་ཚོགས་ཀྱིས་རང་འགན་ངོས་ཟིན་པའི་ཐོག་ནས་ལས་དོན་གལ་ཆེན་ཞིག་གནང་འདུག་པར་བསྔགས་བརྗོད་ཞུ།