བཙན་བྱོལ་གྱི་གསར་འགོད་པ་ཚོ་སྒྱིད་ལུག་ཆགས་འདུག

འདི་གའི་གསར་འགོད་པས་ཉེ་ཆར་བོད་ནས་གསར་དུ་འབྱོར་བའི་གཞིས་བཞུགས་སྤུན་ཟླ་གཉིས་དང་ཐུག་འཕྲད་བྱས་ཏེ། གཞིས་ལུས་རྒྱ་ཆེའི་མང་ཚོགས་ཀྱིས་ད་ལྟའི་བོད་རྒྱའི་འབྲེལ་མོལ་ལ་རེ་བ་གང་འདྲ་ཞིག་བརྒྱབ་ཡོད་མེད་སོགས་གླེང་མོལ་སྣ་ཚོགས་བྱས་ནའང་། ཁོང་རྣམ་པ་གཉིས་མི་རིང་བར་ཕྱིར་བོད་དུ་ལོག་འཆར་ཡོད་སྟབས་མིང་སོགས་བཀོད་མེད།

ཟླ་འདིའི་ཕྱི་ཚེས་ ༣ ཉིན་ང་དུས་བཅད་བྱས་པ་ལྟར་ཉེ་ཆར་བོད་ནས་གསར་དུ་འབྱོར་བའི་གཞིས་བཞུགས་སྤུན་ཟླ་གཉིས་ཀྱི་སར་བཅར་བ་ཡིན། ཉིན་དེར་ང་ཚོས་དུས་ཡུན་ཆུ་ཚོད་གཅིག་ཙམ་རིང་བོད་ཕྱི་ནང་གཉིས་ཀྱི་བོད་རིགས་མང་ཚོགས་ཚོའི་འཚོ་བའི་གནས་སྟངས་དང་། ལྷག་པར་དུ་གཞིས་བཞུགས་སྤུན་ཟླ་ཚོས་མྱངས་དང་མྱོང་བཞིན་པའི་དཀའ་སྡུག་དང་མནར་གཅོད་འོག་གི་མི་ཚེ། འདས་པའི་ལོ་འགའི་ནང་བྱུང་བའི་བོད་ནང་གི་ཞི་རྒོལ་ཁག་གི་གནས་སྟངས། ད་ལྟ་གཞིས་བཞུགས་སྤུན་ཟླ་རྣམས་ཀྱིས་འདི་ཕྱོགས་སུ་བཟུང་བའི་རེ་བ་དང་ལྟ་ཚུལ་བཅས་ཕྱོགས་སྣ་མང་བོ་ཞིག་གི་ཐད་དུ་གླེང་མོལ་བྱས། བར་སྐབས་ཤིག་ནས་ཁོང་རྣམ་པ་གཉིས་ཀྱིས་ངེད་གཉིས་ལ་བསམ་ཚུལ་གཅིག་ཡོད། ཁྱེད་ཀྱིས་དེ་ངེས་པར་དུ་ཚགས་པར་སྟེང་འགོད་རོགས་ཟེར། ངས་ཀྱང་དེ་ལྟར་ཁས་ལེན་ཞུས།

ཁོང་གཉིས་ཀྱིས་གསུངས་དོན། ད་ལྟ་བོད་ནང་གི་གནས་ཚུལ་རྣམས་ཕྱི་ཕྱོགས་སུ་ཡོད་པའི་གསར་ཤོག་ཁག་དང་རླུང་འཕྲིན་ཁག བརྙན་འཕྲིན་ཁག་བཅས་སུ་ཁྱབ་བསྒྲགས་ཡག་པོ་བྱེད་ཐུབ་ཀྱི་མི་འདུག དེ་གང་ཡིན་ཟེར་ན། ཁྱེད་ཚོ་གསར་འགོད་པ་དང་དྲིལ་བསྒྲགས་མཁན། རྩོམ་སྒྲིག་པ། རྒྱང་སྒྲོག་པ་སོགས་སུ་ཡིན་རུང་དོ་སྣང་དེ་ཙམ་མ་བྱས་པས་ལན་པ་རེད། དཔེར་ན། ཁྱེད་ཚོས་བོད་ནང་གི་གནས་ཚུལ་ཞིག་ཁྱབ་བསྒྲགས་བྱེད་སྐབས་ཐབས་རྡུགས་པ་ཞིག་རེད། བཙོན་དུ་ཚུད་པའི་མི་ཞིག་གི་སྐོར་གནས་ཚུལ་སྒྲོག་གི་ཡོད་པའི་དབང་དུ་བཏང་ན་སྡེ་བ་གང་ནས་ཡིན་མིན་གསལ་བོ་ཤེས་མེད་པའི་ཐོག མི་དེའི་མིང་ཡང་གསལ་བོ་མ་ཤེས་པར་གནས་ཚུལ་སྤེལ་བ་ལྟ་བུ་ཡོང་གི་འདུག

དོན་རྐྱེན་བྱུང་བའི་མི་ཞིག་ཡིན་ན་དེ་དྲིལ་བསྒྲགས་རྒྱ་ཆེན་པོ་བྱེད་ཐུབ་ཀྱི་མི་འདུག མི་དེའི་མིང་དང་ས་གནས། ཁོའི་ལོ་རྒྱུས་རྒྱབ་ལྗོངས་སོགས་གསལ་བོ་ཤེས་མི་འདུག མཐར་གཏུག་ན་དོན་རྐྱེན་བྱུང་བའི་མི་རང་ཉིད་ཀྱིས་སྡུག་གྱོང་ཉོས་པ་ལྟ་བུ་ཞིག་རེད། ཁྱེད་ཚོ་ཁྱབ་བསྒྲགས་བྱེད་མཁན་ཡིན་པའི་ཆ་ནས་འཛམ་གླིང་ག་ས་གང་དུ་ཁྱབ་བསྒྲགས་ཤུགས་ཆེན་པོ་བྱེད་དགོས་ཀྱི་འདུག དེའི་ཆེད་དུ་ཁ་པར་གཏོང་དགོས་ནའང་ཡང་དང་རིམ་གྱིས་ཁ་པར་བཏང་སྟེ་ས་གནས་ས་ཐོག་གི་འབྲེལ་ཡོད་མི་སྣར་སྐད་ཆ་དྲིས་ན་འགྲིག་གི དེ་མིན་ཚོད་ཚོད་ལ་ཉེན་རྟོག་ཁང་དུ་ཁ་པར་རེ་བཏང་སྟེ་སྐད་ཆ་དྲིས། ཁོང་ཚོས་ཁྱེད་ཚོས་ཁ་པར་གཏོང་ཡུལ་ནོར་བ་རེད་ལབ་རྗེས་བཞག་འཇོག་གི་རེད། དེ་ལྟ་བུ་ཞིག་གིས་གནས་ཚུལ་རྒྱུས་ལོན་གསལ་བོ་བྱེད་ཐུབ་གི་མ་རེད།

དེ་བཞིན་བརྙན་འཕྲིན་དང་རླུང་འཕྲིན། དྲ་རྒྱ་བཅས་ཀྱི་ཁ་བྱང་སོགས་བརྗེ་བསྒྱུར་བྱས་ཚེ་དུས་ལྟར་གསལ་བོར་བཟོ་ཐུབ་ཀྱི་མི་འདུག དཔེར་ན། འདི་ལོའི་རྒྱལ་སྟོན་དུས་ཆེན་སྐབས་ཨེ་ཤ་ཡ་རང་དབང་རླུང་འཕྲིན་ཁང་གི་གསང་ཨང་དེ་བརྗེ་བསྒྱུར་བྱས་སོང་། མང་བོ་ཞིག་གིས་དེ་ལ་རེ་བ་ཆེན་པོ་བྱས་བསྡད་ཡོད་མོད། ལམ་སེང་གསལ་བཟོ་བྱེད་ཐུབ་མ་སོང་།

དེང་སྐབས་གསར་འབྱོར་བ་ཚོ་འདིར་འབྱོར་དུས་གསར་འགོད་པ་ཚོ་གནས་ཚུལ་ལེན་པ་དང་སྐད་ཆ་འདྲི་གི་ཚུར་ཡོང་གི་མི་འདུག ཕར་བཙལ་ནས་འགྲོ་དགོས་ཀྱི་འདུག ང་ལྟ་བུར་མཚོན་ན་སྔོན་མའང་རྒྱ་གར་དུ་ཡོང་མྱོང་ཡོད། སྐབས་དེ་དུས་གསར་འགོད་པས་བསྐོར་ཡོང་གི་འདུག ཡིན་ནའང་། དེང་སྐབས་དེ་ལྟར་འདྲི་གི་ཡོང་མཁན་མི་འདུག གསར་འགོད་པ་གང་དུ་ཡོད་མེད་ཀྱང་ཤེས་རྟོགས་ཐུབ་ཀྱི་མི་འདུག ངའི་ལྟ་སྟངས་ལྟར་བྱས་ན་སྔོན་ཆད་དང་བསྡུར་ན་དེང་སྐབས་གསར་འགོད་པ་ཚོ་སྒྱིད་ལུག་ནས་བསྡད་འདུག་ཅེས་གསུངས་པ་མ་ཟད། མཇུག་མཐར་ཡང་ཁོང་རྣམ་པ་གཉིས་ཀྱིས་གོང་གི་བསམ་ཚུལ་དེ་ངེད་གཉིས་ཀྱིས་འདི་ཕྱོགས་ཀྱི་གསར་འགོད་པ་རྣམས་ལ་བཤད་འདོད་པའི་བསམ་ཚུལ་གལ་ཆེ་ཤོས་དེ་ཡིན་པས། ངེས་པར་ཚགས་ཤོག་ཐོག་སྤེལ་རོགས་ཟེར་ནས་ནན་བརྗོད་གནང་།

ངས་ཁོང་གཉིས་ཀྱིས་གང་གསུངས་པ་རྣམས་སྒྲ་སྡུད་དུ་བཅུགས་རྗེས་ཁོང་གཉིས་ལ་ཐེངས་འདིའི་བོད་རྒྱ་འབྲེལ་མོལ་ཐེངས་དགུ་བར་གཞིས་ལུས་བོད་མི་རྣམས་ཀྱིས་རེ་བ་གང་འདྲ་ཞིག་བརྒྱབས་ཡོད་མེད་ཐད་བཀའ་འདྲི་ཞུས་པར་ལན་འདེབས་གནང་དོན།  བོད་ནང་དུ་ཐེངས་འདིའི་བོད་རྒྱལ་འབྲེལ་མོལ་ལ་སྔར་དང་མི་འདྲ་བའི་རེ་བ་ཤུགས་ཆེན་པོ་ཞིག་རྒྱག་གི་འདུག ད་ཐེངས་ཀྱི་འབྲེལ་མོལ་འདི་བྱས་རྗེས་བོད་རྒྱའི་གནད་དོན་དེ་བཟང་ཕྱོགས་སུ་ཚད་ངེས་ཅན་ཞིག་ཏུ་སླེབས་ཀི་རེད་ཟེར་གྱིན་འདུག དེ་ལྟར་རེ་བ་བརྒྱབས་པ་ལྟར་ཉེ་ཆར་གསར་འགོད་གསལ་བསྒྲགས་སྐབས་གསར་འགོད་པ་རྣམས་ཀྱིས་རྒྱ་རི་བློ་གྲོས་རྒྱལ་མཚན་ལ་འཚང་ཁ་ཤིག་ཤིག་གིས་དྲི་བ་འདྲི་བཞིན་པ་དེར། བོད་ནང་དུ་ཡོད་པའི་བོད་མི་དོན་གཉེར་བ་རྣམས་ཀྱིས་ཉ་མོ་ཆུ་དང་འཕྲད་པ་ལྟར་ཉན་བསྡད་ཡོད་པ་རེད། འོན་ཀྱང་། རྒྱ་རི་བློ་གྲོས་རྒྱལ་མཚན་མཆོག་གི་ངོས་ནས་ཞིབ་ཕྲའི་གནད་དོན་རྣམས་ལན་གསལ་བོ་བྱས་ནས་རྒྱག་གི་མི་འདུག དེར་བརྟེན་གཞིས་ལུས་བོད་མི་རྣམས་ཀྱིས་གནས་ཚུལ་ཁ་གསལ་བོ་ཞིག་ཤེས་ཐབས་ཡོད་པ་མ་རེད།

ངས་བསམ་ན་ཁོང་གིས་ཞིབ་ཕྲའི་ལན་གསལ་བོ་རྒྱག་གི་མེད་པ་དེས་མང་བོ་ཞིག་འཐུས་ཤོར་ལ་འགྲོ་གི་འདུག་ལ། ད་བར་བཙན་བྱོལ་བོད་གཞུང་གི་ངོས་ནས་ཀྱང་མང་བོ་ཞིག་འཐུས་ཤོར་དུ་ཕྱིན་པ་རེད། དཔེར་ན། དང་ཐོག་ཏིན་ཞོ་ཕིང་སྐུ་འཚོ་བཞུགས་སྐབས་བོད་རང་བཙན་ཕར་ཕུལ་གཞན་སྐད་ཆ་ག་རེ་ཡིན་ནའང་བཤད་ཆོག་གི་རེད་ཟེར་དུས། སྐད་ཆ་སྣ་ཚོགས་ཤིག་བཤད་དེ་གོ་སྐབས་མེད་བརླག་བཟོས་པ་རེད། དེ་བཙན་བྱོལ་བོད་གཞུང་གིས་མ་འཇོན་པ་གཅིག་རེད། དེ་བཞིན་དེང་སྐབས་བོད་རྒྱའི་འབྲེལ་མོལ་སྐོར་གྱི་གནས་ཚུལ་དག་གསང་བའི་སྒོ་ནས་བསྒྲུབ་དགོས་པའི་དབང་དུ་བཏང་ནའང་། བོད་རིགས་རྒྱལ་གཅེས་མང་ཚོགས་ཀྱི་སེམས་གནད་ལ་འབབ་སྤྱད་ཅིག་གསལ་བོ་བཟོ་དགོས་ཀྱི་འདུག

དེ་མིན་བོད་རྒྱའི་འབྲེལ་མོལ་འདི་དེང་སྐབས་ཇེ་བཟང་དུ་འགྲོ་བཞིན་འདུག ཐོག་མར་མགོ་འཛུགས་བྱས་སྐབས་རྒྱ་རི་བློ་གྲོས་རྒྱལ་མཚན་སོགས་བྱེས་གྱུར་བོད་མི་ཁག་ཅིག་ཕྱིར་བོད་ནང་དུ་རང་གི་གཉེན་ཚན་ལ་ཐུག་འཕྲད་དུ་ཡོང་བ་རེད་ཟེར་གྱིན་ཡོད་པ་རེད། དེའི་རྗེས་སུ་༧གོང་ས་མཆོག་སྒེར་ངོས་ཀྱི་ཤ་ཁྲག་རེ་ཟུང་ཕེབས་པ་རེད་ཟེར་གྱིན་འདུག ད་ལྟ་༧གོང་ས་མཆོག་གི་སྐུ་ཚབ་ཕེབས་ཏེ་བོད་རྒྱ་འབྲེལ་མོལ་གྱི་མགོ་འཛུགས་ཀྱིན་ཡོད་ཟེར་གྱིན་འདུག དེ་བཟང་ཕྱོགས་ཀྱི་འགྱུར་བ་ཆེན་པོ་ཞིག་རེད། ཡིན་ནའང་། ངས་གོ་ཐོས་བྱུང་བ་ལྟར་ན་ཐེངས་འདིར་ཁོང་ཚོའི་བར་ལོ་ཙྭ་བ་ཡང་མེད་པར་ཕན་ཚུན་བར་སྐད་བརྡ་འཕྲོད་ཀྱི་མི་འདུག་ཟེར་བས། དེ་ལ་བློ་ཕམ་ཡོད་ཅེས་གསུངས།

ཁོང་གིས་དེ་མིན་གྱི་གནས་ཚུལ་གཞན་པ་ཞིག་གསལ་འགྲེལ་གནང་དོན། ད་ལྟ་གཞིས་ལུས་རྒྱ་ཆེའི་ཞིང་འབྲོག་མང་ཚོགས་ཚོ་དངོས་གནས་དྲང་གནས་ཤེས་ཡོན་གནས་ཚུལ་སྐྱོ་བོ་རེད། ཡིག་རྨོངས་པ་རེད། དེར་བརྟེན་རྒྱ་ནག་གིས་མགོ་བསྐོར་བསླུ་བྲིད་གཏོང་ཆོག་ཆོག་རེད། དཔེར་ན། དེང་སྐབས་རྒྱ་ནག་གིས་ང་ཚོས་༧གོང་ས་མཆོག་ལ་ཚུར་རྒྱ་ནག་ཏུ་ཕེབས་རོགས་ཟེར་གྱིན་ཡོད་ནའང་། ཁོང་ཕེབས་གི་མི་འདུག་ཅེས་དྲིལ་བསྒྲབས་རྫུན་མ་བྱེད་ཀྱིན་འདུག མང་ཚོགས་ནང་དུའང་རྒྱ་ནག་གིས་༧གོང་ས་མཆོག་ལ་དེ་ལྟར་ཕེབས་རོགས་ཟེར་ནས་གདན་འདྲེན་ཞུ་དུས། ད་དུང་མི་ཕེབས་པ་འདི་ཡ་མཚན་རེད་ཟེར་ནས་འགྲོགས་ལངས་མཁན་འདུག ཁོང་ཚོས་༧གོང་ས་མཆོག་ཆ་རྐྱེན་གང་ཡང་མེད་པའི་ཐོག་ནས་གདན་འདྲེན་ཞུ་གི་མེད་པ་དེ་ཤེས་ཀྱིན་ཡོད་པ་མ་རེད་ཅེས་གསུངས། 

མཇུག་མཐར་ཁོང་གཉིས་ཀྱིས་ད་ལྟ་ང་ཚོ་གཞིས་ལུས་རྒྱ་ཆེའི་བོད་རིགས་མང་ཚོགས་ཀྱིས་ཕྱི་ཕྱོགས་ཀྱི་གནས་ཚུལ་མང་བོ་ཞིག་ཨ་རིའི་རླུང་འཕྲིན་དང་བརྙན་འཕྲིན། ཨེ་ཤ་ཡ་བཅས་ལ་བརྟེན་ནས་ཤེས་ཐུབ་གི་འདུག་ལ། ངའི་རེ་བ་ཆེ་ཤོས་ཨ་རིའི་བརྙན་འཕྲིན་ཁང་དུ་ཁམས་དང་ཨ་མདོའི་ལེ་ཚན་ཞིག་འཇོག་རྒྱུ་དེ་ཡིན་པ་མ་ཟད། དེའི་ནང་ནས་ཀྱང་ཆབ་སྲིད་དང་འབྲེལ་བའི་ལམ་སྟོན་མང་བོ་བྱེད་རྒྱུ་དེ་གལ་ཆེན་པོ་རེད། དེ་མིན་ད་ལྟ་རླུང་འཕྲིན་དང་བརྙན་འཕྲིན་ཁག་ཅིག་ནང་གླུ་གཞས་དང་རྩོམ་ཡིག་སྒྲོག་སྦྱོང་གནང་བ་ལྟ་བུ་ནི་ད་ལྟའི་བོད་རྒྱའི་ཆབ་སྲིད་གནད་དོན་ཛ་དྲག་གི་སྐབས་འདིར་དགོས་མཁོ་ཅི་ཡང་མེད་པ་ཞིག་རེད་ཅེས་གསུངས་ཡོད།