གངས་དཀར་རྒྱལ་སྲས།
འཛམ་གླིང་སྟེང་གི་མིང་དོན་མཚུངས་པའི་ཕུལ་བྱུང་མི་སྣ་གྲགས་ཅན་༧གོང་ས་ཏཱ་ལའི་བླ་མ་བསྟན་འཛིན་རྒྱ་མཚོ་ནི་བོད་ཆོལ་ཁ་གསུམ་གྱི་བོད་མི་ཡོངས་ཀྱིས་དད་པའི་ཕྱག་བྱེད་ས་དང་རེ་བའི་སྐྱབས་བཅོལ་ས་གཅིག་པོ་ཡིན། དེ་ནི་ང་ཚོ་བོད་མི་ཚོའི་གཟི་བརྗིད་དང་ལ་རྒྱའང་ཡིན། འདས་པའི་ལོ་ངོ་འདི་འདྲའི་མང་པོ་ཞིག་གི་རིང་ལ་ཁོང་གིས་ང་ཚོ་ཁྲིད་དེ་དེང་སྐབས་ཀྱི་གནས་བབ་འདི་འདྲ་ཞིག་ཏུ་སླེབས་ཚར་བ་རེད་ལ། ང་ཚོས་ཁོང་ཉིད་བེད་སྤྱོད་བྱས་ཏེ་ང་ཚོ་བོད་ཁ་བ་ཅན་འཛམ་གླིང་འདིས་དོ་སྣང་བྱ་ཡུལ་ཞིག་ཏུ་གྱུར་བའང་རེད། དེོན་དག་དེ་དག་ནི་ང་ཚོའི་གནས་བབ་དང་ཁོང་གི་འགན་དབང་ལ་འབྲེལ་བ་ཡོད་པའི་གནས་བབ་ཅིག་གི་འབྲས་བུ་རེད། ཡིན་ནའང༌། ད་ལྟ་ཏཱ་ལའི་བླ་མ་དགུང་གྲངས་མཐོ་སར་སླེབས་པའི་སྐབས་འདི་དག་ཏུའང་ཁོང་གིས་མིའི་རིགས་དང༌། མི་རིགས། འགྲོ་བའི་དོན་དུ་ཕྱོགས་ཕེབས་སོགས་མཛད་འཕྲིན་ལ་བྲེལ་བ་ཆེ་བ་ཚང་མས་མིག་གིས་མཐོང་བཞིན་དུ་ད་དུང་ཁོང་ལ་དོན་དག་གང་ཞིག་གི་མཛད་སྒོ་དང༌། འདུ་ཁང་དང་དཔེ་མཛོད་ཁང་གང་ཞིག་གི་འགྲུབ་སྟོན་དང༌། སློབ་གྲྭ་དང་ཚོགས་པ་གང་ཞིག་གི་དུས་ཆེན་སོགས་ལ་གདན་འདྲེན་གང་ཐུབ་བྱེད་པ་ནི་རང་ཉིད་ཀྱི་ཁེ་གྲགས་ལས་ྋགོང་ས་མཆོག་ལ་བསམ་བློ་གཏོང་གི་མེད་པའི་རྟགས་རེད། ང་ཚོའི་སྤྱིར་བཏང་གི་མི་ཞིག་ཡིན་ན་ལོ་གྲངས་བདུན་ཅུ་བརྒལ་དུས་གོམ་པ་དྲང་མོ་ཞིག་ཀྱང་སྤོ་མི་ཐུབ་པའི་ཚད་རེད། ཡིན་ནའང༌། ང་ཚོས་ྋགོང་ས་མཆོག་ད་དུང་ལས་དོན་ཆེ་ཕྲ་གང་མང་ལ་གདན་འདྲེན་བྱེད་པ་དང་གསུང་ཆོས་སྣ་ཚོགས་གསུང་འཇུག་པ་ནི་སེམས་ཀྱིས་བཟོད་པ་ཞིག་རེད་དམ། བྱང་ཆུབ་ལམ་རིམ་འགྲེལ་བ་བཞི་སྦྲགས་ནི་སྐྱེས་བུ་དར་མ་ཞིག་གིས་ཤར་མར་ཀློག་དགོས་ནའང་ལས་སླ་བོ་ཞིག་མིན་པ་ང་ཚོས་ཤེས་གསལ་རེད། ྋགོང་ས་མཆོག་ལ་འགྲེལ་བ་བཞི་སྦྲགས་ལྗགས་ཁྲིད་གནང་གི་བཅུག་ན་ཁོང་ལ་སྐུ་ངལ་ག་ཚོད་ཅིག་འདུག འགྲེལ་བ་བཞི་སྦྲགས་ལ་ཉན་མཁན་ཡང་དེ་ཙམ་མང་པོ་མི་འདུག དེ་ནི་འགྲེལ་བ་བཞི་སྦྲགས་ཡིན་པས་ཀྱང་མ་རེད། མ་གཞི་ནས་གསུང་ཆོས་ལ་ཉན་དུས་དེ་འདྲ་རེད། ྋགོང་ས་མཆོག་གིས་གོང་ནས་སྐུ་ངལ་ལ་མ་འཛེམ་པར་ལེགས་ཉེས་བླངས་དོར་གྱི་གནད་རྣམས་གཅིག་གཅིག་གཉིས་གཉིས་བྱས་ནས་གསུངས་ནའང༌། ཉན་མཁན་མང་ཤོས་ཀྱིས་གསུང་ཐོས་པའི་ཕན་ཡོན་བསམ་ནས་ཡོང་བ་དང་འདྲ་བར། མི་ལ་ལས་ཕན་ཚུན་ལ་ཁ་བརྡ་བྱས་ནས་གད་པོ་འདྲ་བགད། ཁ་པར་འདྲ་བཏང༌། ཁ་ལག་འདྲ་ཟོས། དེ་འདྲ་བྱས་ནས་བསྡད་འདུག ལ་ལ་གཉིད་ཁུག་འདུག ཡང་ལ་ལ་ཙོག་ནས་འདུག་མ་ཐུབ་པར་གདོང་ལ་སུན་སྣང་གི་རྣམ་པ་རེ་ཤར་ནས་གཡས་ལོག་གཡོན་ལོག་བྱས་ནས་འདུག མི་མང་ཆེ་བ་ནི་གླིང་ག་ཞིག་ན་སྤྲོ་སྐྱིད་གཏོང་གི་ཡོད་པའི་རྣམ་པ་ལས་གསུང་ཆོས་ཤིག་ལ་ཉན་གྱིན་ཡོད་པའི་རྣམ་པ་ཞིག་མཐོང་རྒྱུ་མི་འདུག དྲང་མོར་བཤད་ན་མང་ཚོགས་མང་ཤོས་ཀྱིས་ཉན་ཤེས་ཀྱིའང་ཡོད་རྒྱུ་མ་རེད། སྐབས་འདིར་བསམ་བློ་ཞིག་བཏང་དུས་ྋཏཱ་ལའི་བླ་མས་གོང་ནས་འགྲེལ་བ་བཞི་སྦྲགས་གསུང་བའི་སྐུ་ངལ་དང་མང་ཚོགས་ཀྱིས་འོག་ནས་འགྲེལ་བ་བཞི་སྦྲགས་ལ་ཉན་པའི་རྣམ་པ་གཉིས་བསྡུར་ན། ང་ཚོའི་ཡིད་ལ་ཤར་འོང་བ་ནི་ཅི་འདྲའི་བསམ་ཡུལ་ལས་འདས་པ་ཞིག་རེད་ཨང༌། ྋགོང་ས་མཆོག་གིས་ལྗགས་ཀློག་གནང་བའི་འགྲེལ་བ་བཞི་སྦྲགས་ནི་བར་སྣང་དུ་གནམ་གྲུ་ཞིག་འཕུར་བ་དང་འདྲ་བར་གནམ་གྲུ་འཕུར་ཚར་རྗེས་སྒྲའང་རིམ་བཞིན་ཡལ་འགྲོ་བ་བཞིན། ྋགོང་ས་མཆོག་གིས་འགྲེལ་བ་བཞི་སྦྲགས་གསུང་ཚར་དུས་མང་ཚོགས་ཀྱི་བློ་ངོ་ན་འགྲེལ་བ་བཞི་སྦྲགས་གསུང་ཚར་བའི་དོན་སྤྱི་མ་གཏོགས་འགྲེལ་བ་བཞི་སྦྲགས་ལས་རེག་པའི་གདམས་ངག་གམ་ལེགས་བཤད་ཅིག་ཕལ་ཆེར་མེད། དེ་ལས་ྋགོང་ས་མཆོག་ལ་ཉིན་གཅིག་གི་སྐུ་ངལ་གསོ་བའི་ཁོམ་པ་ཞིག་སྤྲད་ན་ལེགས། གསུང་ཆོས་གསུང་རྒྱུ་ནི་ཏཱ་ལའི་བླ་མའི་འགན་དབང་དང་འབྲེལ་བ་ཡོད་པ་ཞིག་ཡིན་ནའང༌། འགྲེལ་བ་བཞི་སྦྲགས་ལྟ་བུ་ནི་མང་ཚོགས་ཀྱིས་གོ་དཀའ་ལ་ཁོང་གིས་གསུང་དཀའ་བའི་གསུང་ཆོས་ཅིག་ཡིན་པས་རྗེས་ཕྱོགས་འདིའི་ཐད་ལ་གསུང་ཆོས་བཀོད་སྒྲིག་བྱེད་མཁན་སོགས་འབྲེལ་ཡོད་མི་སྣ་ཚང་མས་ཐུགས་འདང་གནང་དགོས་འདུག བོད་མི་ཚང་མ་ྋགོང་ས་མཆོག་ལ་དད་པ་ཡོད་པ་བདེན་ལ་དེའང་སེམས་གཏིང་ནས་ཡོད། ཡིན་ནའང་དད་པ་དེ་དག་སེམས་ལ་ཡོད་པ་ཙམ་ལས་ལག་ལེན་བསྟར་ཐུབ་མཁན་ཉུང་ཉུང་རེད། དོན་དག་དེའི་དབང་གིས་ྋགོང་ས་མཆོག་གིས་འདྲུད་བཞིན་པའི་ཤིང་རྟ་འཁོར་ལོ་ཞིག་ཏུ་བོད་མི་འགའ་བསྡད་དེ་ྋགོང་ས་མཆོག་ལ་སྐྱབས་སུ་མཆི་ཞེས་ལག་ཟུང་ཐལ་མོ་སྦྱར་ནས་དད་པས་སྐྱབས་སུ་འགྲོ་བའི་ཟུར་ཟའི་རི་མོ་དེ་བྱུང་བ་རེད་ལ། དེ་ནི་དོན་དངོས་དང་མཐུན་པའི་རི་མོ་ཞིག་ཀྱང་རེད། ང་ཚོས་ྋགོང་ས་མཆོག་ལ་དཀའ་ངལ་ཆེ་མ་ཆུང་གསུམ་བཟོས་ནས་གསུང་ཆོས་གང་མང་གསུང་འཇུག་པ་ལས། ྋགོང་ས་མཆོག་གིས་གསུང་བའི་ངག་ཐོག་དང་ཡིག་ཐོག་གང་མང་ན་ཡོད་པའིབཀའ་སློབ་ལམ་སྟོན་སྣ་ཚོགས་ལ་སློབ་སྦྱོང་དང་ལག་ལེན་བྱས་ན་ལེགས་ལ། དེའང་རྩ་འཛུགས་དང་སྒྲིག་ལམ་ཡོད་པ་ཞིག་བྱས་ན་ྋགོང་ས་མཆོག་གི་སྐུ་ཚེགས་ཅུང་ཙམ་སེལ་ཐུབ་ལ། ཁོང་གི་དགོངས་པ་མི་ནུབ་བརྟན་པའི་གཞི་རྩར་འགྱུར་བའི་ཐབས་ལམ་གསར་བ་ཞིག་ཀྱང་ཀྱང་རེད། གང་ལྟར་ྋགོང་ས་མཆོག་གི་སྐུའི་གནས་བབ་ལ་ང་ཚོས་བསམ་བློ་བཏང་ནས་ཁོང་གི་མཛད་འཕྲིན་བཀོད་སྒྲིག་བྱས་ན་ལེགས།
རིག་འབྱུང་དོན་བཀྲ་ལགས་ཀྱིས་བཤད་པ་དེ་དངོས་ནས་རེད། ༧གོང་ས་མཆོག་གི་སྐུའི་འཕྲོད་བསྟེན་ལ་ཐུགས་ཁུར་གནང་བཞིན་ཡོད་ན། ཐབས་ལམ་ཡག་ཤོས་དེ་སྐུ་སྒེར་ཡིག་ཚང་ལ་སྙན་ཞུ་འབུལ་རྒྱུ་དེ་རེད། དེ་མིན་དྲ་ཐོག་ནས་བཤད་བསྡད་ན་གྲུབ་འབྲས་ཐོན་གྱི་མ་རེད།
༸གོང་ས་མཆོག
ཏག་ཏག་རེད་འདུག
དྲ་གྲོགས་གཅན་བཟོད་རྒམ་ལགས། ཐུགས་རྗེ་ཆེའོ༎
མཐེབ་གཞུང་ཐོག་ན་ཨང་གྲངས་དང་པོ་ནས་ཀླད་གོར་བར་དུ་ཡོད་པའི་ཨང་དང་པོའི་སྔོན་དུ་སྦྲུལ་རིས་འདྲ་~ ཡོད་པ་དེ་དང་ shift མཉམ་དུ་མནོན་དང་ཡོང་གི་རེད། ངའི་རྩིས་འཁོར་ལྟར་ན་དེ་འདྲ་རེད།
ངའི་མཐེབ་གཞོངས་ནས་ཡིད་བཞིན་ནོར་བུའི་མཚན་གྱི་གོང་དུ་དགོད་རྒྱུའི་ཆེ་རྟགས་སམ་འཕགས་ནོར་བདུན་མཚོན་བྱེད་ཅེས་པ་ཨང་བདུན་པ་འདྲ་བ་དེ་རྙེད་མ་བྱུང་བས་དགོངས་འགལ་མེད་པ་ཞིག་དང་དྲ་གྲོགས་ཚོས་དེ་གང་ནས་འཐོབ་མིན་ལམ་སྟོན་ཞིག་མཛོད་དང༌།
ཐུགས་རྗེ་ཆེ།
གངས་སྲས་ལགས་སུ་ཐུགས་རྗེ་ཆེ་ཞུ། རྒྱུན་མཚན་ནི་གསུང་དགོས་པ་དེ་གསུངས་འདུ།
གལ་པོ་ཆེ་ལ་ནན་ཏན་དང་། དམ་པའི་ཆོས་ལ་བརྒྱ་ཚར། ཞེས་པ་ལྟར་ཕྲན་གྱིས་ཀྱང་ཚིག་འགའ་ཞུ་འདོད་བྱུང༌།
1་སློབ་གྲྭ་དང་སྤྱི་སྒེར་གྱི་ཚོགས་པ་ཁག་གི་ལས་རིམ་དང་པོའི་འགོ་འབྱེད་གནང་སྐབས་སོགས་སུ་གོང་ས་མཆོག་སྤྱན་འདྲེན་ཞུ་བ་དེ་གང་ཟག་སྒེར་དང་ཚོགས་པ་སྒེར་གྱི་མིང་གྲགས་སོགས་ཀྱི་ཆེད་དུ་མིན་པར་སྤྱི་དོན་དང་ཁ་ཞེ་གཉིས་མེད་ཡིན་ན་ཡང་ད་ལྟའི་སྐབས་ང་ཚོ་གདོང་དམར་བ་ཚོར་ཡིད་བཞིན་ནོར་བུ་གཅིག་མ་གཏོགས་འཛད་མེད་ཅིག་མེད་ལ། དེ་ཡང་སྐུ་ན་སྨིན་པ་ཞིག་ཡིན་པས། གལ་ཆེ་གལ་ཆུང་དང༌། སེམས་ཚོར་གཙོ་བོ་མིན་པར་རྣམ་དཔྱོད་བེད་སྤྱད་ནས་ང་ཚོ་གངས་ཅན་པས་བཀལ་པའི་ཁོང་གི་ཁུར་པོ་ལྕི་མོ་དེ་གང་ཐུབ་ཀྱིས་ཡང་དུ་གཏང་དགོས་པ་ནི་ཆེས་ཤིན་ཏུ་གལ་ཆེ་བ་ཡིན་པས་དགོངས་པར་གཞག་རོགས།
2་ གསུང་ཆོས་ཉན་ཕྱོགས་ལ་དཔྱད་ན་བོད་པ་ཚོར་གསུང་ཆོས་དང་གསུང་ཆོས་གནང་མཁན་ལ་དད་པ་ཡོད་ཐག་ཆོད་རེད། འོན་ཀྱང་གསུང་ཆོས་ཞུ་སྟངས་ཀྱི་ཐད་ལ་ཞན་ཆ་མང་པོ་ཡོད་རེད། དངོས་སུ་སོ་སོའི་བསམ་བློ་ལ་བཅོས་སྒྱུར་གཏོང་བྱེད་ཀྱི་སྨན་མཆོག་ཏུ་གྱུར་བ་བསླབ་པ་གསུམ་གྱི་སྐོར་དང༌། ལས་འབྲས་ཀྱི་སྐོར། བརྟེན་འབྲེལ་ཡན་ལག་བཅུ་གཉིས། སྐྱེ་བ་སྔ་ཕྱི། གཞན་ཕན་གྱི་སེམས། ཐེག་པ་སོ་སོའི་ལམ་བགྲོད་ཚུལ་གྱི་རིམ་པ་སོགས་བརྗོད་གཞིར་མཛད་ནས་གསུང་སྐབས་ཆོས་ཞུ་བ་མང་པོས་དོ་སྣང་ཇི་ཙམ་དགོས་པ་དེ་ཙམ་མི་བྱེད་པ་དང༌། དེ་ལས་གཏམ་གླེང་དང༌། ཁ་མཚར། གཉིད་པ། བཟའ་བ་དང་བཏུང་བ་ལ་ལོངས་སྤྱོད་པ་སོགས་ཚུལ་མ་ཡིན་པ་མང་དག་ཅིག་བྱེད་ཅིང་། རང་གིས་དཀའ་ཚེགས་སྤྱད་མི་དགོས་པར་ཉན་པ་ཙམ་གྱིས་འཐུས་པའི་དབང་ལུང་སོགས་ལ་ཚང་ག་ཆེ་ཞིང་ཚོགས་རྫས་དང་ཚེ་རིལ་སོགས་ཀྱི་ཆེད་དུ་རྒན་གྲས་དང་ཕྲུག་གུ་རྣམས་རྡོག་པས་བརྫི་ལ་ཉེ་བ་ཡོད་ཀྱང་སྣང་བ་མེད་པར་རྩོད་ལེན་བྱེད་པ་སོགས་དེ་དག་ལ་ཏན་ཏན་འགྱུར་བ་ཞིག་གཏང་ཐུབ་ན་ཅི་མ་རུང༌།
གངས་ཞེས་བཅོས་རོགས། འོག་ཏུ་ཡང་ནོར་བ་དེ་བཅོས་རོགས།
ཨ་ག་གང་སྲས་ལགས། སྤྱིར་བཏང་ཟིན་བྲིས་ཡག་པོ་ཞིག་སྤེལ་འདུག ཡིན་ནའང་ནང་དུ་གོ་ནོར་འགའ་འདུག ལྷག་པར་དུ་༼ྋགོང་ས་མཆོག་གིས་འགྲེལ་བ་བཞི་སྦྲགས་གསུང་ཚར་དུས་མང་ཚོགས་ཀྱི་བློ་ངོ་ན་འགྲེལ་བ་བཞི་སྦྲགས་གསུང་ཚར་བའི་དོན་སྤྱི་མ་གཏོགས་འགྲེལ་བ་བཞི་སྦྲགས་ལས་རེག་༽ཅེས་བྲིས་འདུག འདི་ནོར་བ་དོན་སྤྱི་ཙམ་ཡོད་ན་འགྲིག་གི་རེད། སོ་སོ་སྐྱེ་བོ་ལ་དོན་སྤྱི་ལས་མངོན་སུམ་དུ་རྟོགས་པ་ལྟ་བུ་ཁག་པོ་ཡིན་ནི་རེད།
སྤྱིར་བཤད་དོན་བདེན་པ་རེད། རྒྱབ་སྐྱོར་ཡོད། འགྲེལ་བ་བཞི་སྦྲགས་དང་། ལམ་རིམ་མཆན་བཞི་སྦྲགས་ཁ་ཁ་རེད་དེང་སེང་གནང་གི་ཡོད་པ་དེ་འགྲེལ་བ་བཞི་སྦྲགས་རེད།
དེ་རིང་གངས་དཀར་རྒྱལ་སྲས་ཀྱིས་གནད་ལ་ཕོག་པའི་ཟིན་བྲིས་ཤིག་སྤེལ་འདུག་སྙམ་སོང་། འདི་འདྲའི་སྐོར་ལ་སྔོན་མ་ནས་ལབ་གླེང་ཞིག་ཡོད་པ་རེད་དེ། ད་དུང་ཡོང་གི་མེད་པ་གསལ་བོ་རེད། འདིའི་རིགས་འགོག་ཐབས་མང་བོ་བྱེད་ཀྱིན་ཡོད་པ་རེད་དེ། ད་དུང་འདི་ལྟར་མང་བོ་ཞིག་ཆགས་འགྲོ་བ་འདི་དངོས་གནས་༸གོང་ས་མཆོག་གི་སྐུ་ངལ་རང་རེད།
འོག་ནས་ཉན་མཁན་ལ་དེ་འདྲའི་དཀའ་ངལ་ཡོད་ན། སྒང་ནས་འཆད་མཁན་ལ་དཀའ་ངལ་ཡོད་པ་ནི་དངོས་མཐོང་ལག་ཟིན་ཡིན་ནོ།།
དངོས་གནས་བསམ་བློ་གཏོང་མ་འདྲ་བ་ཞིག་རེད། མུ་མཐཱུད་དུ་ཕྲིས་དང་དགའ་བསུ་ཡོད།
མགོན་པོ་གང་ང་ཚོའི་སྣང་ངོར་ཤར་བ་ནི་སྨྲ་བསམ་བརྗོད་མེད་ལྷུན་གྲུབ་རང་བྱུང་གི་ཆོས་སྐུ་ཞིག་ལས་ཤ་ཁྲག་གིས་ཕུང་བོར་གྲུབ་པའི་སྤྱིར་བཏང་གི་མིའི་ཚུལ་འཛིན་པའི་སྤྲུལ་སྐུ་ཞིག་ཏུ་སྣང་གི་མེད་པས་རྒྱུ་མཚན་གྱིས་ཁོང་གི་སྐུ་ངལ་ལ་ཐུགས་བསམ་བཞེས་མཁན་ཤིན་ཏུ་ནས་ཉུང་།
ཆེན་པོ་རྣམས་ཀྱིས་ཁེ་གྲགས་འབྱོར་བའི་གཡོག་ལ་བཀོལ།
ཕལ་བས་ཚོགས་ཀྱིས་རེ་དོགས་ཧམ་པའི་བྲན་ཏུ་འཛིན།
མདོར་ན་གངས་ཅན་མགོན་པོ་མི་ཡི་ཤ་ཚུགས་ཅན།
སྐུ་ངལ་གསོ་བའི་དུས་ཤིག་བྱིན་ན་གདོང་དམར་བ།
ངེད་ཀྱིས་རྨོངས་འཆར་འགའ་ཞུ་གི་ཡིན།
༧གོང་ས་མཆོག་ལ་སྐུ་ངལ་གསོ་བའི་དུས་ཚོད་དགོས་ཀྱི་འདུག་ཟེར་བ་དེ་བདེན་པ་རེད། བོད་རིགས་ཚོས་བསམ་བློ་གཏོང་དགོས་ངེས་རེད།
འོན་ཀྱང་། འགྲེལ་བ་བཞི་སྦྲགས་མི་མང་གིས་གོ་མ་གོ་དང་མི་མང་གིས་གསུང་ཆོས་ལ་བློ་རྩེ་བསྒྲིམས་བྱེད་ཀྱི་མེད་པའི་གནད་དོན་ཐད་ལ་བསམ་བློ་གཏོང་རྒྱུ་ཡོད།
གཅིག
ངེད་ཀྱི་བསམ་ཚུལ་ཡིན་ན། ༧གོང་ས་མཆོག་ནས་མི་མང་ལ་གསུང་ཆོས་གནང་བ་དང་གཞོན་སྐྱེས་ཚོར་ནང་ཆོས་ངོ་སྤྲོད་གནང་བ་འདི་གལ་ཆེན་རེད་དྲན། འདི་ལ་སྐབས་འཕྲལ་གཉིས་ཀའི་དགེ་ཕན་འདུག་དྲན། དེ་གཅིག་ཡིན།
གཉིས།
༧གོང་ས་མཆོག་ལ་སྐུ་ངལ་གསོ་བའི་དུས་ཚོད་ཡོང་ཐབས་ལ། ག་རེ་ཉུང་ངུ་གཏོང་དགོས་ཀྱི་འདུག་ལབ་ན།
ཚོགས་པ་སྒེར་བ་སོགས་ཀྱིས་དབུ་འབྱེད་མཛད་སྒོ་སོགས་ལ་༧གོང་ས་མཆོག་གདན་འདྲེན་ཞུ་བཞིན་པ་དེ་ངེས་པར་དུ་མཚམས་འཇོག་གནང་ཐུབ་ན་ཡག
ལས་དོན་ཞིག་འགོ་བཙུགས་པ་དང་། སོང་ནས་༧གོང་ས་མཆོག་ལ་གཟིམ་ཆུང་མཇལ་ཁ་ཞུ་བཞིན་པའི་རིགས་དེ་ཉུང་དུ་གཏོང་ཐུབ་ན་ཡག
ཚགས་པར་ཞིག་གསར་དུ་བཏོན་ན་ཡང་། ༧གོང་ས་མཆོག་ལ་གཟིམ་ཆུང་མཇལ་ཁ་ཞུ་བཞིན་འདུག འདི་ཅུང་ཙམ་ཐལ་ཆེ་བ་མིན་འགྲོ་བསམ། འོན་ཀྱང་། བྱེད་མཁན་རྣམས་ལ་དགག་བྱ་མེད། དེ་ནས། ཕྱི་རྒྱལ་ཡུལ་གྲུ་ཁག་གི་ཆོས་ཚོགས་ཁ་ཤས་ཀྱིས་༧གོང་ས་མཆོག་ཚོང་རྫས་ནང་བཞིན་བེད་སྤྱོད་གཏོང་བཞིན་པ་དེའི་རིགས་མཚམས་འཇོག་གནང་གི་འཇུག་ཐུབ་ན་ཡག
གསུམ།
གནད་དོན་འདིའི་རིགས་ཀྱི་སྐོར་ནས། སྐུ་སྒེར་ཡིག་ཚང་ལ་ཡིག་ངག་གཉིས་ཐོག་ནས་ཞུ་ཐུབ་ན་ཡག་ ཞུ་མཁན་ག་ཚོད་ཀྱིས་མང་ན་དེ་ཙམ་གྱིས་བསམ་བློ་གཏོང་གཞི་ཞིག་ཡོང་གི་རེད། ཐག་ཉེ་བ་རྣམས་ཕར་ལ་བཅར་ནས་ཞུས་ན་འགྲིག་གི་རེད། ཐག་རིང་བ་རྣམས་ཀྱིས་ཡིག་ཐོག་དང་ཁ་པར་བརྒྱུད་ནས་ཞུ་ཐུབ་ན་ཡག
རྩོམ་འདི་ཡང་སྐུ་སྒེར་ཡིག་ཚང་གི་༧གོང་ས་མཆོག་གི་གློག་འཕྲིན་ཐོག་(ohhdl@dalailama.com)ལ་གཏོང་ཐུབ་ན་ཡག
བཞི།
༧གོང་ས་མཆོག་གིས་སྐུ་ངལ་གསོ་དགོས་བའི་ཐད། ང་ཚོས་བསམ་ཚུལ་ག་རེ་བཤད་ན་ཡང་། ༧གོང་ས་མཆོག་གི་མཛད་འཕྲིན་ཁག་བཀོད་བསྒྲིག་གནང་མཁན་དག་ལ་ཞུ་ཐུབ་ན་ཡག་གི་རེད་འདོད། དེ་ཙམ་ཡིན།
གངས་སྲས་ཀྱི་རྩོམ་ཡིག་ཆ་ཚང་བཀླགས་པ་ཡིན། སྤྱིར་བཏང་ཡག་པོ་བྲིས་འདུག་
ཀྱང། བར་མཚམས་སུ་དོགས་གནས་ཁ་ཤས་འདུག དཔེར་ན།་གོང་གི་རྩོམ་ཡིག་
ནང་༼ྋགོང་ས་མཆོག་གིས་གོང་ནས་སྐུ་ངལ་ལ་མ་འཛེམ་པར་ལེགས་ཉེས་བླངས་དོར་གྱི་གནད་རྣམས་གཅིག་གཅིག་གཉིས་གཉིས་བྱས་ནས་གསུངས་ནའང༌། ཉན་མཁན་མང་ཤོས་ཀྱིས་གསུང་ཐོས་པའི་ཕན་ཡོན་བསམ་ནས་ཡོང་བ་དང་འདྲ་བར། མི་ལ་ལས་ཕན་ཚུན་ལ་ཁ་བརྡ་བྱས་ནས་གད་པོ་འདྲ་བགད། ཁ་པར་འདྲ་བཏང༌།༌༌༌༌༌༌༌༌༽ཞེས་གསལ་འདུག ༸གོང་ས་མཆོག་གི་གསུང་ཆོས་
སྐབས་སུ་ཁ་པར་འཁྱེར་མཁན་མི་མང་འཕྲོད་ལ་འཁྱེར་མཁན་གངས་སྲས་ཀྱིས་་
མཐོང་ཡོད་དམ། གལ་སྲིད་མཐོང་ཡོད་ན་སྐུ་སྲུང་བར་སྙན་སེང་ཞུ་དགོས་པ་ལས་
ཁུ་སིམ་སྡོད་དགོས་པའི་གནས་སྟངས་ཆགས་མེད། གང་ཡིན་ཟེར་ན་གསུང་ཆོས་སྐབས་སུ་ཁ་པར་སོགས་ཅ་དངོས་མང་པོ་ཞིག་འཁྱེར་མི་ཆོག་པ་གངས་སྲས་ཀྱིས་མཁྱེན་གསལ་མ་རེད་དམ།
ཡང་གོང་གི་རྩོམ་ཡིག་ནང་
༼ འགྲེལ་བ་བཞི་སྦྲགས་ལྟ་བུ་ནི་མང་ཚོགས་ཀྱིས་གོ་དཀའ་ལ་ཁོང་གིས་གསུང་དཀའ་བའི་གསུང་ཆོས་ཅིག་ཡིན་པས་རྗེས་ཕྱོགས་འདིའི་ཐད་ལ་གསུང་ཆོས་བཀོད་སྒྲིག་བྱེད་མཁན་སོགས་འབྲེལ་ཡོད་མི་སྣ་ཚང་མས་ཐུགས་འདང་གནང་དགོས་འདུག ༽དེ་ལྟར་གསལ་འདུག རྒྱ་ཆེའི་ཀློག་པ་པོ་རྣམས་ཀྱིས་བསམ་ཞིབ་གནང་དང། འགྲེལ་བ་བཞི་སྦྲགས་ལྟ་བུ་མི་མང་གི་གོ་དཀའ་བ་བདེན་སྲིད་ཀྱང། ཁོང་གིས་གསུང་དཀའ་བའི་གསུང་ཆོས་ཅིག་ཡིན་པ་བདེན་ནམ། ངའི་བསམ་པར་
ཁོང་གིས་གསུང་ཆོས་བཀའ་ཆོས་ཤིག་མ་རེད་འདོད།
རྒྱ་ཆེའི་ཀློག་པ་པོ་རྣམས་ཀྱིས་གང་འདོད་ཀྱི་འདུག་གམ།
ཐུགས་རྗེ་ཆེ།
ངོ་མ་བདེན་པ་རེད། གངས་དཀར་རྒྱལ་སྲས་གྱིས་རེ་བ་བཞིན་ཚང་མའི་བསམ་བློ་རེ་གཏོང་རྒྱུ་གལ་ཆེན་པོ་རེད།
སྔོན་མ་ལམ་རིམ་མཆན་བཞི་སྦྲགས་ཏྲེ་ཧོར་བརྟན་བཞུགས་སྐབས་ཚར་གཅིག་གསུངས་ཟིན་པ་རེད། ༧གོང་ས་མཆོག་གི་སྐུ་ནའི་བབས་དང་བསྟན་སྲིད་ཀྱི་མཛད་བྲེལ་ལ་བསམ་གཞིགས་མི་བྱེད་མཁན་བླ་རྒན་ཞེན་ཁོག་ཅན་རེ་ཟུང་གིས་གསོལ་བ་ཕུར་ཚུགས་སུ་འདེབས་པ་ལགས་ན་ཟེར་ནས་སྐུ་ངལ་བཟོ་ཀི་ཡ།
བདེན་ནོ་བདེན་ནོ་གངས་དཀར་རྒྱལ་སྲས་བདེ།
ཚོང་ལ་ཁེ་ལ་རེ་བའི་ཀླད་མེད་བོད་པ་ཚོས།
མཛད་དཀའ་དཀའ་བར་མ་སེམས་ཁེ་ཕན་ལས།
གང་གི་སྐུ་ངལ་སེམས་ཀྱི་ཟུར་ན་མེད།
དངོས་གནས་བདེན་པ་རེད། དེ་དོན་ཚང་མས་དགོངས་པ་བཞེས་རྒྱུ་གལ་ཆེན་རེད་ ད་ང་ཚོ་འཕག་འཚག་རྒྱག་རན་རེད