བོད་ཀྱི་གྲོགས་པོ་གསར་པ།

བོད་ཀྱི་གནད་དོན་འདི་ཏཱ་ལའི་བླ་མ་མཆོག་དང་ལྷན་ཡང་དག་པའི་གྲོས་མོལ་གནང་སྟེ་ཞི་བའི་ཐོག་སེལ་དགོས་ཟེར།

ཟླ་འདིའི་ཚེས་ ༩ ཉིན་སུ་ལོ་ཝེ་ཀེ་སྤྱི་མཐུན་རྒྱལ་ཁབ་ཀྱི་རྒྱལ་ཡོངས་གྲོས་ཚོགས་འཐུས་མི་སྐོར་ཞིག་གིས་བོད་ཀྱི་གྲོགས་པོ་  Friend of Tibet  ཞེས་པའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་ཞིག་གསར་འཛུགས་གནང་ཡོད་འདུག་ལ། གྲོགས་པོ་ཚོགས་པ་དེའི་དམིགས་ཡུལ་གཙོ་བོ་ནི། རྒྱལ་ཡོངས་གྲོས་ཚོགས་ཀྱི་འཐུས་མི་དང་མང་ཚོགས་ལ་གཞུང་འབྲེལ་མིན་པའི་གླེང་སྟེགས་ཐོག་བོད་ནང་གི་ད་ལྟའི་གནས་སྟངས་གོ་རྟོགས་སྤེལ་རྒྱུ་དང་འབྲེལ་བོད་མིའི་མངོན་འདོད་ལ་རྒྱབ་སྐྱོར་བྱ་རྒྱུ་དེ་ཡིན་ཚུལ་བརྗོད་ཡོད་འདུག

བོད་ཀྱི་གྲོགས་པོ་ཚོགས་པས་བསྒྲགས་གཏམ་ཞིག་སྤེལ་བའི་ནང་། ང་ཚོས་སུ་ལོ་ཝེ་ཀེ་སྤྱི་མཐུན་རྒྱལ་ཁབ་དང་རྒྱ་ནག་མི་མང་སྤྱི་མཐུན་རྒྱལ་ཁབ་གཉིས་ཀྱི་འབྲེལ་བ་གལ་ཆེན་དུ་བསམ་སྟེ། བོད་ཐེ་བའི་རྒྱ་ནག་གི་ས་ཁྱོན་ཆིག་སྒྲིལ་གྱི་བདག་དབང་རྩོད་ལེན་བྱེད་ཀྱི་མེད། ང་ཚོས་རྒྱབ་སྐྱོར་ཞུ་རྒྱུ་ནི་ང་ཚོ་དང་རྒྱ་ནག་ཕྱོགས་གཉིས་ཀྱི་འབྲེལ་ལམ་དོ་མཉམ་པ་ཞིག་དང་འཇིག་རྟེན་ཀུན་ཁྱབ་ཀྱི་ངོ་བོ་ལྡན་པ།  འགྲོ་བ་མིའི་ཐོབ་ཐང་དང་རྣམ་དཔྱོད་རང་དབང༌། ཁྲིམས་མཐུན་གྱི་རྒྱལ་ཁབ་སོགས་ལ་བརྩི་བཀུར་བྱ་རྒྱུའི་ཆོད་སེམས་དེ་རྒྱ་ནག་དང་འབྲེལ་བ་བྱེད་སྐབས་ཁ་འབྲལ་ཐབས་མེད། ཡིན་ནའང་། ང་ཚོ་བོད་ཀྱི་གྲོགས་པོ་ཚོགས་པས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ལ་ཏཱ་ལའི་བླ་མ་མཆོག་དང་ལྷན་ཡང་དག་པའི་གྲོས་མོལ་གནང་སྟེ། བོད་ཀྱི་གནད་དོན་ཞི་བའི་ཐོག་སེལ་རྒྱུ་དང༌ཚུལ་མཐུན་གྱི་བོད་མི་རིགས་འདི་ཉིད་རྒྱ་མི་རིགས་ཀྱི་ནང་སིམ་པར་འཇུག་པའི་བྱེད་ཐབས་མཚམས་འཇོག་བྱ་དགོས་པའི་འབོད་སྐུལ་ཞུ་རྒྱུ་ཡིན་ཞེས་བཀོད་ཡོད་འདུག 

སུ་ལོ་ཝེ་ཀེ་གྲོས་ཚོགས་བོད་དོན་རྒྱབ་སྐྱོར་ཚོགས་པ་འདི་ནི། སྔར་ལོ་སུ་ལོ་ཝེ་ཀེའི་རྒྱལ་སར་ Jan langos Foundation ཐེབས་རྩ་ཚོགས་པས་ྋགོང་ས་མཆོག་གིས་འཛམ་གླིང་ཞི་བདེ་དང་བོད་ལ་རང་དབང་ཡོང་སླད་སྐུ་ངལ་འཛེམས་མེད་ཐོག་ཐུགས་བརྩོན་མཛད་པར་རྒྱབ་སྐྱོར་མཚོན་ཆེད་ཀྱི་གཟེངས་རྟགས་ཤིག་ཕུལ་བའི་དུས་དེ་ནས་མགོ་བརྩམས་གནང་མཛད་པ་ཞིག་ཡིན་འདུག་ལ། འདི་ལོ་ གསུམ་བཅུའི་དུས་དྲན་ཉིན་སོ་ལོ་ཀ་རྒྱལ་ཡོངས་ཚོགས་ཁང་ཆེན་མོའི་སྒེའུ་ཁུང་སོགས་ཀྱི་སྟེང་བོད་ཀྱི་རྒྱལ་དར་བསྒྲེངས་འཛུགས་བྱས་ཡོད་འདུག