ཐེངས་འདིར་༧གོང་ས་མཆོག་གིས་གྲོས་ཚོགས་ལ་བསྩལ་བའི་གསུང་འཕྲིན་ཐད་བོད་མི་མང་སྤྱི་འཐུས་གྲོས་ཚོགས་དང་བཀའ་ཤག དམིགས་བསལ་སྐུ་ཚབ་རྣམ་གཉིས་དང་བཀའ་ཟུར་རྣམ་པ་བཅས་ནས་ཉན་ཞིབ་བགྲོ་གླེང་གནང་རྗེས་གསལ་བོ་གསལ་རྐྱང་བཟོས་ཡོད།
སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཚོགས་དུས་དགུ་བ་མཇུག་སྒྲིལ་རྗེས་ཀྱི་ཉིན་རྒྱབ་དེར། བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་བོད་མི་མང་སྤྱི་འཐུས་ཚོགས་གཙོ་གཞོན་གཉིས་ཀྱིས་ཐེངས་འདིའི་གྲོས་ཚོགས་ཚོགས་དུས་དགུ་བའི་གྲོས་ཆོད་དང་འབྲེལ་བའི་ཐོག་དམིགས་བསལ་གསར་འགོད་གསལ་བསྒྲགས་ཤིག་བསྐྱངས་ཡོད། སྐབས་དེར། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུངས་དོན། ཐེངས་འདིའི་གྲོས་ཚོགས་ཚོགས་དུས་དགུ་བར་དམིགས་ཏེ་༧གོང་ས་མཆོག་གིས། མགོ་ཁྲིད་ཙམ་མིན་པར་མི་མང་ནང་ཁུལ་ཏུ་གནས་ཚུལ་ཁག་ཅིག་གིས་མགོ་རྨོངས་སུ་བཅུག་ཡོད་པ་དེ་དག་ཕྱི་གསལ་ནང་གསལབཟོ་དགོས་པ་དང་། གྲོས་ཚོགས་ནང་སྤྱི་འཐུས་རྣམ་པས་རྣམ་དཔྱོད་སྟོན་སྟངས་དང་ཕྱག་ལས་གནང་སྟངས། སྒེར་གྱི་གནས་ཚུལ་གླེང་བའི་གནས་ཚུལ་དང་ཕྱོགས་འཐེན་གྱི་རྣམ་པ་དེ་དག་སྤངས་ཏེ། གྲོས་ཚོགས་ཀྱི་ལས་དོན་བྱེད་ཕྱོགས་ཀྱི་སྤུས་ཚད་ཡག་ཏུ་གཏོང་བ་དང་གནས་ཚད་མཐོ་རུ་བཏང་སྟེ་མི་མང་ལ་འགན་འཁུར་ཐུབ་པ་ཞིག་བྱ་དགོས་པའི་བཀའ་སློབ་ཕེབས་པ་ལྟར། སྐབས་བཅུ་བཞི་པའི་བོད་མི་མང་སྤྱི་འཐུས་གྲོས་ཚོགས་ཀྱི་ཚོགས་དུས་དགུ་བའི་སྟེང༧གོང་ས་མཆོག་གི་གསུང་འཕྲིན་དང་འབྲེལ་བའི་ཐོག་སྤྱི་མོས་ཐོག་གྲོས་ཆོད་གཏན་འབེབས་གནང་ཡོད།
དེ་ཡང་གཙོ་བོ། གྲོས་ཚོགས་ཀྱི་གནས་ཚད་ཡག་ཏུ་གཏོང་བ་དང་སྤུས་ཀ་མཐོ་རུ་གཏོང་ཆེད་སྤྱི་འཐུས་ཚོའི་ངོས་ནས་མ་འོངས་པར་ནུས་པ་གང་ཡོད་ཀྱིས་འབད་པ་བྱ་རྒྱུ་དང་། ད་ལྟའི་བར་སྤྱི་འཐུས་རྣམ་པས་ནུས་པས་མ་འདང་བ་དང་རྟོན་བཞིའི་མཇུག་ལྡོག་ནོར་བའི་གནས་ཚུལ་བྱུང་བ་ཚང་མ་༧གོང་ས་མཆོག་ལ་བཟོད་གསོལ་ཞུས་པ་དང་། མ་འོངས་པར་ཕྱོགས་ལྷུང་སྤངས་ཏེ་མང་ཚོགས་ལ་འགན་འཁུར་བའི་ཐོག་ཕྱག་ལས་གནང་རྒྱུའི་དམ་བཅའི་ཚུལ་ཏུ་གྲོས་ཆོད་བཞག་ཡོད་ལ། དེ་བཞིན། ཞི་བའི་དོན་ཚན་ལྔ་དང་ ༢༠༠༨ ལོའི་བོད་རྒྱ་ཞི་མོལ་གྱི་གནད་དོན་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ། འབྲེལ་མོལ་ཐེངས་དགུ་པའི་འགྲེལ་བརྗོད་ཡིག་ཆ་ཚང་མ་༧གོང་ས་མཆོག་གི་དགོངས་གཞི་རང་ཡིན་པར་མ་ཟད། གྲོས་ཚོགས་ལ་མ་བསྟན་པའི་ཡིག་ཆ་དང་དབུ་མའི་ལམ་གྱི་བསམ་འཆར་ཡིག་ཆ་སོགས་༧གོང་ས་མཆོག་གི་དགོངས་གཞི་ཡིན་མིན་གྱི་དོགས་པ་ཡོད་པ་སོགས་གྲོས་ཚོགས་ནང་བགྲོ་གླེང་དང་། བོད་གཞུང་བཀའ་ཤག་དང་དམིགས་ཚབ་སྐུ་ཚབ་རྣམ་གཉིས། དེ་བཞིན་འབྲེལ་ཡོད་བཀའ་ཟུར་རྣམ་པ་གདན་ཞུའི་ཐོག་བགྲོ་གླེང་ཉན་ཞིབ་གནང་བ་ཡིན་ལ། བཀའ་ཤག་གི་ངོས་ནས་སི་ཊ་སི་སྤག་གི་གྲོས་ཆོད་ནས་བཟུང་བརྒྱུད་རིམ་མཐའ་དག་གསལ་བཤད་དང་དམིགས་བསལ་སྐུ་ཚབ་རྣམ་གཉིས་ཀྱིས་བོད་རྒྱ་འབྲེལ་མོལ་སྐོར་ལ་གསལ་བཤད་དང་འགྲེལ་བརྗོད་གསལ་བོ་གནང་སྟེ། མ་འོངས་པར་བསྐྱར་གླེང་མི་དགོས་པར་༧གོང་ས་མཆོག་གིས་བཀའ་ཕེབས་པ་བཞིན་གཙང་མ་གཙང་རྐྱང་དང་གསལ་བོ་གསལ་རྐྱང་ཆགས་ཡོད་ལ། གྲོས་ཚོགས་ནང་ཁུལ་ཏུའང་དགག་བྱ་ཅི་ཡང་མེད་པའི་སྤྱི་མོས་ཐོག་གྲོས་ཆོད་གཏན་འབེབས་བྱས་ཡོད། ཅེས་གསུངས་བྱུང་།
ཡང་ཁོང་གིས་གསར་འགོད་གསལ་བསྒྲགས་བརྒྱུད་བོད་ནང་གི་བོད་མི་ཚོར་གསུངས་དོན། བོད་ནང་གི་བོད་མི་ཚོར་མཚོན་ནའང་རྩ་བ་ཉིད་ནས་སེམས་ཁྲལ་བྱ་མི་དགོས་པ་ཞིག་རེད། གང་ཡིན་ཅེ་ན། ང་ཚོ་བཙན་བྱོལ་ནང་ཡོད་པའི་བོད་མི་ཚོས་༧གོང་ས་མཆོག་གི་ཐུགས་རྗེ་བཀའ་དྲིིན་ལ་བརྟེན་ནས་དམངས་གཙོའི་ལམ་སྲོལ་གསར་གཏོད་བྱས་ཏེ་ལོ་ ༥༠ འགྲོ་གིན་ཡོད་པས་བསམ་ཚུལ་མི་འདྲ་བ་ཡོང་སྲིད་པ་དང་ཡོང་ཆོག་པ། བསམ་ཚུལ་བཤད་ཆོག་པ་ཞིག་རེད། གནས་ཚུལ་གང་གི་ཐད་དུའང་ང་ཚོ་གཅིག་སྒྲིལ་མེད་པ་དང་ནུས་པ་གཅིག་ཏུ་སྒྲིལ་བའི་རེ་བ་མེད་པ། བཙན་བྱོལ་སྤྱི་ཚོགས་འཐོར་བསྡད་པ་ཞིག་དང་དམངས་གཙོའི་གོ་སྐབས་གནང་བ་ལེན་མ་ཐུབ་པའི་གནས་སྟངས་ཆགས་མེད། ཅེས་གསུངས།
དམང་གཙོའི་སྤྱི་ཚོགས་ནང་བསམ་ཚུལ་མི་འདྲ་བ་ཡོང་ཆོག་པ་དང་། བསམ་ཚུལ་མི་འདྲ་བ་བཤད་ཆོག་པ་དེ་དམང་གཙོའི་རིན་ཐང་ཞིག་རེད། འོན་ཀྱང་ནང་ཁུལ་མཐེན་ཁྱེར་དང་ནང་སྐྲུག་བྱེད་རྒྱུ་དེ་ནི་ང་ཚོ་བོད་མི་མང་ལ་ནམ་ཡངས་མི་དགོས་པ་ཞིག་རེད། དེས་ན་མ་འོང་པར་སྤྱི་འཐུས་རྣམས་པས་མི་དམང་གི་མངོན་འདོད་མཁྱེན་པའི་ཐོག་ནས་དགེར་འཁོན་ཀྱི་ཆད་དུ་སྤྱི་དོན་རས་སུ་མི་བོར་རྒྱུ་ང་ཚོའི་རེ་བ་ཡིན།
གཙང་མ་དང་གསལ་བོ་དེ་ཀུན་ལ་དགོས་ཡ་དེ་རེད།