ཕྱི་ཚེས་ ༢༧ ཉིན་གྱི་ཞོགས་པར་ངྷ་སའི་ཉེ་འགྲམ་སྙིང་སྟོབས་གླིང་བོད་ཕྲུག་དབང་བོ་སྐྱོན་ཅན་གཅེས་སྐྱོང་ལག་ཤེས་སྦྱོར་བརྡར་ཁྱིམ་ཚང་གིས་གསར་འགོད་པ་ཚོ་བསྐངས་ཏེ། འདས་པའི་མི་ལོ་བཅུ་རིང་གི་སྙིང་སྟོབས་གླིང་གི་ཀྱག་ཀྱོག་གི་བཞུད་ལམ་དང་། ད་ལྟའི་འཛུགས་སྐྲུན་དང་ཡར་རྒྱས་ཀྱི་རྣམ་པ་ངོ་སྤྲོད་གནང་བྱུང་། སྐབས་དེར་བོད་མི་མང་སྤྱི་འཐུས་དང་སྙིང་སྟོབས་གླིང་གི་འགན་འཛིན་གཅིག་ལྕོགས་ངག་དབང་ལྷ་མོ་ལགས་ཀྱིས་གསུངས་དོན། སྤྱིར་ང་ཚོ་སྙིང་སྟོབས་གླིང་དུ་དབང་བོ་སྐྱོན་ཅན་གྱི་རིགས་མི་འདྲ་བ་གསུམ་ཙམ་ཡོད། རྣ་ཡི་མི་གོ་བ་དང་རྐང་ལག་སྐྱོན་ཅན་ཡིན་ཡང་རིག་པ་རྣོ་པོ་ཡོད་མཁན་ཚོར་སློབ་སྦྱོང་དང་ལག་ཤེས་སློབ་སྦྱོང་དང་། གཞན་ཁག་ཅིག་ལོ་ཆེན་པོ་ཡིན་ཡང་ལོ་ཆུང་གི་རིག་ཚོར་ལས་མེད་མཁན་དེ་དག་ལ་རིག་པའི་རྩེ་གཅིག་ཏུ་སྒྲིམ་ཐུབ་ཆེད་དམིགས་བསལ་སློབ་སྦྱོང་སྤྲོད་ཀྱིན་ཡོད། གཞན་རིགས་ཤིག་ཁ་ཟས་དང་གཅིན་སྐྱག་ལའང་བདག་པོ་རྒྱག་མི་ཐུབ་མཁན་ཁག་ཅིག་བཅས་རེད། ཐོག་མའི་གསར་འཛུགས་ཀྱི་དུས་ནས་ད་བར་དབང་བོ་སྐྱོན་ཅན་ ༢༠༠ ལྷག་སྙིང་སྟོབས་གླིང་དུ་འཛུལ་ཞུགས་བྱས་ཡོད་ཅིང༌། དེའི་ཁྲོད་ཀྱི་བུ་མོ་གཉིས་བོད་ཁྱིམ་དུ་འཛུལ་ཐུབ་པ་དང༌། གཞན་ ༡༠ ལྷག་ཕྱིར་རང་ཁྱིམ་ཏུ་ལོག་ཏེ་རང་ཁ་རང་གསོ་ཐུབ་པ་རུ་གྱུར་པ་མ་ཟད། དབང་བོ་སྐྱོན་ཅན་གྱི་བརྩམས་ཆོས་མང་པོ་ཞིག་ལ་འཛམ་གླིང་དབང་བོ་སྐྱོན་ཅན་ཁྲོད་བྱ་དགའ་ཐོབ་མྱོང་། ཅེས་བརྗོད་བྱུང།
སྔར་ལོ་འདས་ལོར་༧གོང་ས་མཆོག་མཁན་སྤྲུལ་རིན་པོ་ཆེའི་དགོན་པར་ཆིབས་བསྒྱུར་གྱི་སྐབས་དང་བསྟུན་ཏེ། འདི་ག་སྙིང་སྟོབས་གླིང་དུ་གཟིགས་སྐོར་གནང་སྐབས། ཕྱི་གསལ་ནང་གསལ་དང་ལབ་གླེང་ཉུང་དུ་གཏོང་དགོས་སྐོར་བཀའ་གནང་དོན་ལྟར། ཐེངས་འདིར་ཁྱེད་ཅག་གསར་འགོད་པ་ཚོར་སྙིང་སྟོབས་གླིང་ཐོག་མར་གསར་འཛུགས་ཀྱི་སྐབས་སུ་གཞན་ལ་བུ་ལོན་གཡར་བ་ནས་བཟུང་སྟེ། འདི་ལོའི་ཕྱི་ཟླ་ ༣ པའི་ཕྱི་ཚེས་ ༣༡ བར་གྱི་ཞིབ་ཕྲའི་རྩིས་ཕྲ་ཆ་ཚང་ཕུལ་ཡོད། ལབ་གླེང་ཉུང་དུ་གཏོང་དགོས་ཞེས་པ་དེ་འདས་པའི་དུས་སུ་ཁང་པ་གསར་རྒྱག་གི་ཐད། རྒྱ་གར་བ་དང་ང་ཚོའི་བར་ལ་ལབ་གླེང་བྱུང་བ་དང༌། ཐོས་བསམ་གླིང་བཙུན་དགོན་གསར་རྒྱག་གི་སྐབས་སུ་ང་ཚོས་ལམ་ཁ་མ་གཡར་ཚུལ། ལ་དྭགས་སྦེ་ཏེ་སློབ་གྲྭའི་འཐུང་ཆུའི་དཀའ་ངལ་དེ་ང་ཚོས་བཟོས་ཚུལ་སོགས་ཀྱི་ཐད། དགོན་པ་དང་སློབ་གྲྭ་དེ་གཉིས་ཀྱི་འགན་འཛིན་གྱིས་ཐད་ཀར་༧གོང་ས་མཆོག་ལ་སྙན་སེང་ཞུས་འདུག ཕྱིས་སུ་སྐུ་སྒེར་གྱི་མི་སྣ་གདན་ཞུ་ཐོག་གནད་དོན་དེ་དག་ང་ཚོ་དང་འབྲེལ་བ་ཡོད་མེད་ཀྱི་ཞིབ་ཕྲའི་གནས་ཚུལ་འགྲེལ་བཤད་བྱས་པ་ཡིན། ཅེས་གསུངས་བྱུང༌།
མཐའ་མར་ཁོང་གིས་ལས་བྱེད་བསྡུ་སྟངས་དང་མ་འོངས་ལས་འཆར་གང་ཡོད་འགྲེལ་བརྗོད་གནང་དོན། སྙིང་སྟོབས་གླིང་བོད་ཕྲུག་དབང་བོ་སྐྱོན་ཅན་གཅེས་སྐྱོང་ལག་ཤེས་སྦྱོར་བརྡར་ཁྱིམ་ཚང་འདི་ནི། ད་ལྟའི་ཆར་ཨམ་རྗེ་གཉིས་དང་སྨན་ཞབས་པ་གཅིག ལྷ་བྲིས་དགེ་རྒན། ཨ་མ་ལ་བཅས་ལས་བྱེད་ ༡༧ དང༌། དབང་བོ་སྐྱོན་ཅན་མོ་ ༡༧ དང་ཕོ་ ༡༦ ཡོད་བཅས་ཁྱོན་བསྡོམས་ ༥༠ ཡོད། ད་ལྟའི་དུས་འདིར་ང་ཚོས་སྨན་པ་དང་སྨན་ཞབས་པ་ལག་འཁྱེར་ཡོད་པ་དང་ཤེས་ཡོན་ཚད་མཐོན་པོ་ཡོད་མཁན་བསྡུ་ཀྱིན་ཡོད་པ་ལས། ལས་བྱེད་གཞན་དག་དབང་བོ་སྐྱོན་ཅན་ལ་དམིགས་ཏེ་ཤེས་ཡོན་ཚད་མཐོན་པོ་དེ་འདྲ་མིན་པར་གཙོ་བོ་ལྷག་བསམ་དང་སེམས་ཤུགས། བྱམས་སྙིང་རྗེ་ཅན། ངང་རྒྱུད་རིང་པ་དེ་འདྲའི་རིགས་བསྡུ་བཞིན་ཡོད་ཅིང་། བཙན་བྱོལ་བོད་མི་གཅིག་པུ་མིན་པར་ཧི་མ་ལ་ཡའི་རི་བརྒྱུད་ཀྱི་དབང་བོ་སྐྱོན་ཅན་གྱི་རིགས་ཀྱང་བསྡུ་རུབ་བྱེད་ཀྱིན་ཡོད། མ་འོངས་པར་ང་ཚོས་ལས་བྱེད་དང་དབང་བོ་སྐྱོན་ཅན། དེ་བཞིན་ཕྱི་ཕྱོགས་ནས་ཕེབས་པའི་མི་སྣར་དམིགས་ཏེ་བོད་ཕྱི་ནང་གཉིས་ཀྱི་དཔེ་དེབ་སྣ་མང་འཛོམས་པའི་དཔེ་མཛོད་ཁང་ཞིག་གསར་རྒྱག་བྱ་རྒྱུ་ཡིན་ལ། ལུས་རྩལ་སྦྱོང་བརྡར་དང་འཕྲོད་བསྟེན་ལ་ཕན་པའི་འཕྲུལ་ཆས་སོགས་ཀྱི་མཐུན་སྐྱེན་བསྐྲུན་འཆར་ཡོད། ཅེས་ངོ་སྤྲོད་གནང་བྱུང་།
དངོས་གནས་་ཕན་ཐོག་ཡོད་པ་རེད། ང་ཚོ་བོད་པའི་ནང་སྤྱི་ཚོགས་ཀྱི་ཞབས་ཞུ་དེ་ལྟར་གནང་ཐུགས་རྗེ་ཆེ།
འགོ་བཙུགས་པ་དབྱར་གྱི་མེ་ཏོག་རེད།
རྒྱུན་སྐྱོང་བ་དགུན་གྱི་འཇའ་ཚོན་འདྲ།
དུས་བརྟན་དུ་མཐོང་བས་ང་མི་དགའ།
འབོ་ལུག་ཡང་སེམས་ཕམ་དོན་མེད་རེད།
ཧཧཧཧཧཧཧ་་
ཁག་ཡོད་ལག་ཡོད་ཀྱི་ཕན་ཐོག་ལ་ཡི་རང་དང་འབྲེལ་འབྱུང་འགྱུར་ཡང་ཡག་ཐོག་ཡག་བརྩེགས་ཡོང་བའི་རེ་སྨོན་བྱེད་བཞིན་ལགས།
༄༅། ངོ་མ་སེམས་དགའ་ནི་ཞིག་རེད་
འུ་ཅག་བོད་ཚང་གིས་རྒྱན་དང་དོ་བདག་རང་ཉིད་ཀྱི་ཚེ་འདི་ཕྱི་གཉིས་ཕན་རེད་
ངོ་མ་བཀའ་དྲིན་ཆེ།།
ཐུགས་རྗེས་ཆེ་འགོ་བཙུགས་པ་ལས་རྒྱུན་སྐྱོངས་བ་གལ་ཆེན་པོ་རེད།
དོན་དངོས་ཐོག་ནས་སྤྱི་ཚོགས་ལ་ཕན་པའི་ལས་ཀ་འདི་འདྲ་བྱེད་མཁན་རིགས་ལ་དགའ་བསུ་རྒྱབ་སྐྱོར་སླད་མེད་ཡོད་ད་་་་་