འགྲོ་མིའི་ཐོབ་ཐང་གི་ལམ་ནས་སྣང་ཚུལ་འགའ་གསེད་པ། བོད་འབྱོར་རྩོམ་ཡིག

གནས་སྐབས་རིང་དགོས་དབང་གིས་མིང་བཀོད་མེད།
                   
༢༠༡༠ ལོའི་སྤྱི་ཟླ་ ༤ པའི་ཚེས་ ༦ ཉིན་གྱི་སྔ་དྲོའི་ཆུ་ཚོད་བཅུ་གཅིག་དང་ཕྱེད་ཀའི་སྟེང་དུ། ནུབ་བྱང་མི་རིགས་སློབ་ཆེན་དུ་ཆབ་སྲིད་ཀྱི་རླུང་དམར་འུར་འུར་གཡུག་པའི་ཁྲོད་དུ་བདག་གི་གྲོགས་ཞོགས་ལྗང་དང་ཐེའུ་རང་གཉིས། སྤྱི་བདེ་ལས་ཁུངས་དང་བདེ་འཇགས་ལས་ཁུངས། སློབ་གསོ་ཅུའུ་བཅས་ ཀྱི་མི་སྣ་བཅུ་གྲངས་འགས་འཛིན་བཟུང་བྱས་ནས་བུད་སོང་བར་མ་ཟད། མི་བུ་སྒེར་གྱི་རང་དབང་དང་རྩིས་ཐང་། ཁེ་དབང་བཅས་ལ་རྡོག་བརྫིས་བཏང་སྟེ་གྲོགས་པོ་གཉིས་ཀྱི་དཔེ་ཆ་དང་འབྲེལ་ཡོད་སློབ་སྦྱོང་གི་ཡོ་ཆས་གློག་ཀླད་སོགས་བཙན་འཁྱེར་བྱས་སོང་། དེ་རིང་ནི་གྲོགས་པོ་གཉིས་བཀག་ཉར་བྱས་ཏེ་གཟའ་འཁོར་གཅིག་ཏག་ཏག་འགོར་སོང་མོད། ད་དུང་ཁོང་གཉིས་ཀྱི་ཕྱོགས་ནས་སྐད་ཆ་གང་ཡང་ཐོས་མ་བྱུང་། ཐ་ན་ཁོང་གཉིས་ཤི་གསོན་གྱི་ལམ་ཁ་གང་ཞིག་ན་ཡོད་མེད་དང་ས་གནས་གང་ཞིག་ཏུ་བཙན་ཁྲིད་བྱས་ཡོད་མེད་ཀྱི་བརྡ་ཙམ་ཡང་མི་ཐོས་པའི་ཉིན་མ་འདི་ཚོར། ཁོ་བོ་དང་ཁོ་བོ་འདྲ་བ་མང་པོ་ཞིག་གི་སེམས་ཁམས་རྦད་དེ་བདེ་གནས་སུ་ལྟུང་ཐུབ་ཀྱིན་མེད་པར་མ་ཟད། གོ་ཐོས་སུ་ཁོང་གཉིས་ཀྱི་ཁྱིམ་བདག་ཚོའི་སེམས་ཁམས་ཡང་རྨང་ནས་བཅག་ འདུག་སྐད། དོན་རྐྱེན་འདིས་དངོས་སམ་བརྒྱུད་པའི་སྒོ་ནས་ངེད་གྲོགས་པོ་ཚོའི་སློབ་སྦྱོང་བྱ་སའི་སེམས་ཁམས་ཀྱི་ཁོར་ཡུག་དེ་འཕྲོག་ཡོད་པ་ཕུད། དོན་རྐྱེན་གྱི་སྒང་འདི་ལ་གྲོགས་པོ་ལ་ཤས་ཀྱིས་ཁྲོམ་སྐོར་གྱི་ལམ་ནས་ཞི་བའི་སྐད་འབོད་བྱ་ཞེས་ཚོར་ཤེས་དྲག་པོ་ཁོང་དུ་མ་ཆུད་པར་བཤད་ལ། ཡང་ལ་ཤས་ཀྱིས་མིག་སྔའི་གནས་བབ་ཀྱི་འགྱུར་ལྡོག་ལ་ཨེན་ཙམ་བརྟག་རྗེས་དེ་ལ་དེ་བསྟུན་གྱི་སྦྱོར་བ་རྩོམས་ཟེར། ཁོ་བོའི་ངོས་ཐད་ནས་རྒྱུན་ལྡན་མ་ཡིན་པའི་གནད་དོན་འདི་ལ་ཧོབ་ཀྱིས་བལྟས་ན། ཚོར་ཤེས་ཀྱི་ངར་སྒང་ལ་ཁྲོམ་སྐོར་དང་སྐད་འབོད་ཀྱི་བགྱི་བ་ལྷུར་ལེན་རྒྱུ་ནི་ཅུང་ཙམ་སླ་རུ་སྣང་ཡང་། དེའི་མཇུག་འབྲས་དང་ཤུགས་རྐྱེན་དེས་དྲང་ལྡོག་གཉིས་ལས་གང་གི་ཕྱོགས་སུ་ནུས་པ་ཐོན་མིན་བཤད་དཀའ་ཙམ་གདའ་བས། རེ་ཞིག་དངོས་ཡོད་གནད་དོན་ལ་གཡོལ་ནས་འགྲོ་བ་ལྟ་བུའི་ལམ་ཁ་འདི་གདམས་པ་ཡིན།

 ན་གཞོན་ཤེས་ཡོན་ཅན་སྐུ་ཞབས་མེ་ལྕེ་ལགས་ཀྱིས་བཤད་པ་ནང་བཞིན། རང་དབང་དང་མང་གཙོ་ཤུགས་ཆེར་སྒྲོག་པའི་ལམ་ཁ་འདི་བདམས་རྒྱུ་ཡིན་ཕྱིན། མ་གདམས་པའི་ཡར་སྔོན་དུ་རང་སྟེང་ནས་བསམ་བློའི་གྲ་སྒྲིག་གྱ་ནོམ་པ་ཞིག་དགོས་པ་ནི། ཚེར་མའི་ལམ་དུ་གོམ་ཁ་སྒྱུར་དགོས་ནི་རེད། ང་ཚོས་གདམས་ཟིན་པའི་ལམ་ཁ་འདི་ནི་ཚེར་མའི་ལམ་ཁ་ཡིན་ནི་རེད་སྙམ་པའི། ཚེར་མའི་ལམ་ལ་གདོང་གཏོད་ཕོད་པའི་བསམ་བློའི་གྲ་སྒྲིག་སྔ་ས་ནས་དགོས་ཞེས་པའི་ཁོང་གི་སྐད་ཆ་འདིས་ང་ལ་གནས་ངེས་མེད་དང་དུས་ངེས་མེད་དུ་སྙིང་ཕུར་བརྡབས་ཀྱིན་འདུག ཁོང་གི་སྐད་ཆ་འདིས་ཅི་ཞིག་གསེད་འགྲོལ་བྱ་བཞིན་ཡོད་དམ་ཞེ་ན། ཤེས་ཡོན་ཅན་གྱི་ལམ་ཁ་དང་རང་དབང་མང་གཙོའི་ལམ་ཁའི་ཉེན་ཚབས་ཀྱི་རང་བཞིན་དང་དཀའ་ངལ་གྱི་རང་བཞིན་དེ་བསྟན་ཡོད་པ་མ་ཡིན་ནམ། སྔ་གཞུག་ཙམ་མ་གཏོགས། གྲོགས་པོ་གཉིས་གཙོས་གྲོགས་གཙག་འབིག་དང་གངས་ཉི། མཛངས་མ་སྨིན་དྲུག་ལ་སོགས་པའི་ཉེན་འོབས་འདི། བདེན་ལུགས་སྲོག་གིས་གཅེས་མཁན་ཞིག་ཡིན་ཕྱིན་ནམ་ཉིན་མ་ཞིག་ལ་འོ་སྐོལ་ཤེས་ཡོན་ཅན་རེ་རེ་ཡི་སྟེང་དུ་ཡོང་ཁོ་ཐག་ཡིན་ནི་རེད་སྙམ།རང་དབང་དང་འགྲོ་མིའི་ཐོབ་ཐང་དེ་ཚེ་སྲོག་དང་ཟུངས་ཁྲག་གི་རྫོངས་བས་བརྗེས་ནས་འོང་བ་ཉེ་རབས་ལོ་རྒྱུས་ལ་འདྲིས་ཆ་ཡོད་མཁན་ཚོས་བལྟས་ན་ཧ་གོ་ཡོང་། ང་ཚོར་རྒྱ་གར་དབྱིན་ཇིའི་སྒེར་སྡོམ་གྱི་འོག་ནས་གྲོལ་བར་འཇུག་མཁན་གྱི་བྱེད་པོ་སྟེ་མ་ཧཱ་གན་རྡི་ལྟ་བུའི། མི་བུ་རང་ངོས་ནས་ཁེ་དབང་དང་ བདེན་པ་བརྩད་པའི་མི་བུ་ནི་མང་དུ་དགོས་ལ། ཁོང་ལྟ་བུའི་སྒེར་གཅོད་པའི་ཁྲིམས་རར་གདོང་གིས་གཏོད་མཁན་ཡང་མང་དུ་དགོས་ས་རེད། ང་ཚོའི་སྣང་ངོར་བཙན་ཁྲིད་བྱེད་པ་དང་བཙོན་འཇུག་བྱེད་པ་ནི་རང་དབང་མང་གཙོའི་ལམ་ཁ་ནས་འགྲེང་བར་ཕྱོགས་མཁན་ཞིག་དང་། རིགས་སྤྱིའི་ཁེ་དབང་དང་བདེ་སྡུག་གི་སྔུན་ནས་རང་ཉིད་ཀྱི་སྨྲ་ལྕེ་དུར་སྦས་བྱེད་པར་ངོ་གནོང་བའི་མི་བུ་ཚུགས་ཐུབ་པ་ཞིག་ཡིན་ཕྱིན། དེ་ནི་ཆེས་རྒྱུན་ལྡན་དང་ཆེས་བབ་བརླིང་གི་སྣང་ཚུལ་ཞིག་ཡིན་པའི་ འདུ་ཤེས་དེ་ཆགས་དགོས་ཚོད་རེད་སྙམ།

སྒེར་གཅོད་པས་གྲོགས་པོ་གཉིས་འཛིན་བཟུང་བྱས་པའི་གནས་ཚུལ་དེ་སློབ་གྲྭ་འདི་གའི་སློབ་མ་ཚོས་ལ་མོར་ཐོས་རྗེས། སློབ་མ་ལ་ཤས་ཀྱིས་རང་ཉིད་ཀྱི་དཔེ་ཆ་རེ་འགའ་དང་གློག་ཀླད། ཡིག་སྣོད་སོགས་སྦས་ཀྱིན་ འདུག་སྐད། གནས་ཚུལ་འདི་ཐོས་རྗེས་ང་རང་ཡི་ཆད་དྲག་པོ་ཞིག་སྐྱེས་པའི་མོད་ལ་ སེམས་ཁམས་འདི་བློང་བློང་བོར་གྱུར་སོང་། རྒྱུ་མཚན་ཅིའི་ཕྱིར་ཞེ་ན། སྣང་ཚུལ་འདིའི་ངོས་ནས་གནས་ལུགས་ཤིག་གི་མཐིལ་བརྟོལ་ནུས་པ་ནི། བོད་ཀྱི་སློབ་ཆེན་སློབ་མ་ཚོས་ འགྲོ་མིའི་ཐོབ་ཐང་དང་རང་དབང་། དམངས་གཙོ་ལ་སོགས་པའི་ཐ་སྙད་འདི་དག་གི་ཟུར་ཙམ་ ཡང་རྟོགས་ཐུབ་ཀྱིན་མེད་པར་མ་ཟད།ཆབ་སྲིད་ནི་དམངས་ཀྱི་ཆེད་དུ་སྤེལ་བ་དང་། ཆབ་ སྲིད་ནི་མི་བུ་སྒེར་གྱི་ཐོབ་ཐང་དང་རྩིས་ཐང་ལ་སྲུང་སྐྱོང་བྱེད་སྤྱད་ཅིག་ཡིན་ པའི་གནད་ཀ་འདི་ཡང་རྟོགས་ཀྱིན་མེད་པ་དེ་ རེད། མི་སྒེར་གྱི་གསང་བ་དང་ཐོབ་ཐང་མང་པོ་ཞིག་སྒེར་གཅོད་པས་གང་འདོད་ཅི་འདོད་ ཀྱིས་རྡོག་རིལ་བཏང་མི་ཆོག་པའི། འགྲོ་མིའི་ཐོབ་ཐང་དང་ཁྲིམས་ལུགས་ཀྱིས་རང་ཉིད་ ལ་བྱིན་པའི་དབང་ཆ་དེ་གང་ན་ཡོད་མེད་དང་ག་རེ་ཐོབ་མེད་ཀྱི་ཕྱོགས་སུ་བློ་མིག་ ལྡོངས་ཡོད་པ་མ་ཡིན་ནམ། ཟུར་འདི་ནས་འདང་རེ་བརྒྱབ་ན་ང་ཚོ་ད་དུང་རང་དབང་དང་ དམངས་གཙོ་ཞེས་པའི་ཐ་སྙད་འདི་གཉིས་ལ་རྒྱང་ཐག ་ཇི་འདྲའི་རིང་ཨང་། བདག་གི་ཀློག་པོ་ཀྱེ།

འགྲོ་མིའི་ཐོབ་ཐང་ནི་དོན་གྱིས་བཤད་ན་དབང་ཆ་ཞིག་རེད། དབང་ཆ་དེ་གང་གིས་བདག་པོ་རྒྱག་དགོས་ནི་རེད་ཟེར་ན། མི་བུ་སྒེར་སོ་སོ་ནས་བདག་པོ་རྒྱག་དགོས་ནི་རེད། འགྲོ་མིའི་ཐོང་ཐང་ནི་མི་བུ་སྒེར་ལ་ ཡོད་འོས་པའི་སྤྱི་ཚོགས་ཁྲོད་ཀྱི་དབང་ཆ་ཞིག་རེད། མི་བུ་སྒེར་སོ་སོ་སྤྱི་ཚོགས་ ག་གེ་མོ་ཞིག་གི་ཁོངས་མི་ཡིན་པའི་ཆ་ནས། མི་བུ་སྒེར་སོ་སོར་སྤྱི་ཚོགས་དེ་དང་ རྒྱལ ་ཁབ་དེ་ལ་མངའ་བའི་དབང་ཆ་མང་པོ་ཞིག་ལོངས་སུ་སྤྱོད་རྒྱུའི་རང་དབང་ཡོད་པ་རེད། འགྲོ་མིའི་ཐོབ་ཐང་གི་དབང་ཆའི་ཁོངས་སུ་གཏམ་བརྗོད་རང་དབང་དང་འདུ་ཚོགས་རང་མོས། དཔལ་འབྱོར་བརྩོན་ལེན་གྱི་རང་དབང་། རང་ཐག་རང་གཅོད་ཀྱི་བདག་དབང་། རང་ཉིད་ཀྱི་ མངའ་ཁོངས་རང་བདག་གི་རང་དབང་། ཞི་བདེའི་རང་དབང་། འཕེལ་རྒྱས་ཀྱི་རང་དབང་སོགས་ མང་པོ་ཡོད་པ་རེད། འགྲོ་མིའི་ཐོབ་ཐང་ནི་རང་ བྱུང་དང་སྤྱི་ཚོགས་གཉིས་ཐད་ན་ཡོད། ང་ཚོ་སྐྱེས་མ་ཐག་ནས་ང་ཚོའི་ལུས་སྟེང་ན་རང་ བྱུང་གི་རང་དབང་དང་ཐོབ་ཐང་མང་པོ་ཞིག་ཡོད། དེ་བས་འགྲོ་མིའི་ཐོབ་ཐང་ནི་སྔར་ནས་ ཡོད་པ་ཞིག་ཡིན་པ་མ་གཏོགས། ཆབ་སྲིད་དང་སྲིད་གཞུང་གིས་སྐྲུན་ནས་འོང་བ་ཞིག་ནི་ ག་ནས་ཡིན། ཆབ་སྲིད་ནི་འགྲོ་མིའི་ཐོབ་ཐང་སྲུང་སྐྱོབ་བྱེད་སྤྱད་ཙམ་ཡིན་པ་ཤེས་ པར་གྱིས།

འགྲོ་མིའི་ཐོབ་ཐང་ནི་སྤྱི་ཚོགས་ཀྱི་ གླེང་བྱ་དང་རེ་འདུན་ཡིན་པ་ལས་འགོག་བྱ་ག་ལ་ཡིན། འགྲོ་མིའི་ཐོབ་ཐང་གི་ནང་དོན་ ནི་སྤྱི་ཚོགས་ལ་ངོ་རྒོལ་བྱ་བའི་དོན་མ་ཡིན་ལ། སྤྱི་ཚོགས་ཀྱི་མིག་སྔའི་ཁེ་ཕན་ ལ་ངོ་རྒོལ་བྱེད་པའི་དོན་ནི་རྩ་བ་ནས་མ་ཡིན། དེ་ལས་ལྡོག་སྟེ། རྒྱུ་འབྲས་བློ་ མིག་གསལ་བའི་སྤྱི་ཚོགས་ནི་མི་བུ་སྒེར་གྱི་དབང་ཆ་ཤུགས་ཆེར་སྒྲོག་པའི་སྤྱི་ ཚོག ས་ཤིག་ཡིན་ལ། མི་བུ་སྒེར་གྱི་དབང་ཆར་སྲུང་སྐྱོབ་དང་དེ་ཉིད་འཕེལ་རྒྱས་ཡོང་ ཐབས་ལ་འབད་རྒྱུ་ནི་སྤྱི་ཚོགས་ཧྲིལ་བོའི་ཁེ་ཕན་འབའ་ཞིག་ཏུ་སྒོམ། མི་བུ་སྒེར་ གྱི་རང་དབང་གིས་སྤྱི་ཚོགས་དང་རྒྱལ་ཁབ་ཀྱི་སྲིད་གཞུང་ལ་ངོ་རྒོལ་བྱེད་པར་ བསྙད་འདོགས་ལ། སྤྱི་ཚོགས་དེའི་ཚབ་ཉན་པའི་དབང་མཐའ་སྒེར་གཅོད་དཔོན་ངན་ཚོའི་ཁེ་ ཕན་ལ་གནོད་པའི་གནད་དོན་གྱི་སྟེང་དུ། གཞི་ནས་མི་བུ་སྒེར་གྱི་རང་དབང་དང་སྤྱི་ཚོགས་གཉིས་ལ་འགལ་བ་འབྱུང་བར་དཔག་ན། ང་ཚོའི་རང་དབང་ནི་ཆབ་སྲིད་དང་རྩ་ཁྲིམས་ཀྱི་ཕྱི་གོས་འོག་ན་སྡོམ་གཅུན་བྱས་ཡོད་པ་མངོན་གསལ་རེད། ང་ཚོའི་མི་རིགས་འདིར་འགྲོ་མིའི་ཐོབ་ཐང་དང་དབང་ཆའི་ངོས་ཐད་ཀྱི་གོ་ རྟོགས་སད་དགོས་རྒྱུ་ནི་དམིགས་འབེན་རེད་སྙམ།