ཁང་རྡོར་ལགས་ལ་གྲོས་འདེབས་སུ་སྤྲིངས་པ། རྡོ་རྗེ་རིན་ཆེན།

    རྡོ་རྗེ་རིན་ཆེན།

ཁང་རྡོར་ལགས་ཀྱི་དཔྱད་བརྗོད་བྱིངས་ལ་དེ་དེ་བཞིན་ནོ་ཞུ་རྒྱུ་ལས་དམིགས་བསལ་ལྟ་ཚུལ་མེད། འོན་ཀྱང་གནད་དོན་འགའ་ཤས་ཐད་སྤྲིངས་ཡིག་འདི་བརྒྱུད་བསམ་ཚུལ་བསྡུར་འདོད་ལས་ཐད་ཀར་དགག་བྱ་བྱེད་ཀྱིན་མེད་པའང་ཞོར་ལ་གསལ་འདེབས་ཞུ་རྒྱུ་ཡིན། 

   དང་ཐོག་བཤད་འདོད་པ་ནི་གནས་ཚུལ་གང་ཡིན་ཡང་རྒྱུ་རྐྱེན་དང་འབྲེལ་ཞིང༌། རྒྱུ་ རྐྱེན་དེ་དག་ལའང་ལོ་རྒྱུས་ཀྱི་རྒྱབ་ལྗོངས་རེ་ཡོད་པ་ལྟར་ལོ་རྒྱུས་ཀྱི་དོན་དངོས་རང་བཞིན་ལ་བལྟས་ཏེ། ད་གཟོད་བླང་དོར་གྱི་གནས་ལ་ཚུལ་བཞིན་དཔྱད་ན་ནི་སྨྲ་བ་བོ་ཚད་མར་འཛིན་པ་ཡིན། 

   ཁང རྡོར་ལགས་ཀྱིས་ང་ཚོའི་གཞུང་ལ་དད་པ་ཞུ་ཡུལ་གྱི་བླ་ཆེན་བླ་ན་མེད་པ་ཞིག་ཡོད་པ་ལས། གཞན་དམག་དཔུང་དང་སྒྲིག་འཛུགས་ཚགས་ཚུད་པོ་གང་ཡང་མེད། ཅེས་གསུངས་འདུག ངས་བལྟས་ན་ང་ཚོར་དམིགས་བསལ་དམག་དཔུང་མེད་པ་དེ་ཡང་དགོས་དབང་ཞིག་ཡིན་པར་སྙམ།

འགྲོ་མགོན་ཆོས་འཕགས་ལ་ཆེན་པོ་ཧོར་གྱིས་བོད་ཆོལ་ཁ་གསུམ་གྱི་བདག་དབང་ཕུལ་བ་དང༌། ༧གོང་ས་ལྔ་བ་ཆེན་པོར་གོ་ཤྲི་བསྟན་འཛིན་གྱིས་ཤར་དར་རྩེ་མདོ་ནས་ནུབ་ལ་དྭགས་ཚུན་གྱི་ས་སྡེ་མི་གསུམ་ལྷ་འབངས་སུ་ཕུལ་པ། ཆིན་གོང་མ་ཧྲུན་ཀྲི་རྒྱལ་ས་ཅིན་ཁྲིན་ནས་ལེ་དབར་བཞི་བཅུའི་སར་༧གོང་ས་ལྔ་བ་ཆེན་པོར་ཕེབས་བསུར་བཅར་པ་དེ་ཡང་བོད་དམག་གི་སྒྲིག་འཛུགས་དང་སྟོབས་ཤུགས་ལ་བརྟེན་པ་ཞིག་མིན།

གལ་ཏེ་ང་ཚོར་བོད་མིའི་གནས་བབ་ལ་དཔག་པའི་དམག་དཔུང་ཞིག་ཡོད་པའི་དབང་དུ་བཏང་ནའང༌། ལོ་རྒྱུས་ཀྱི་གོད་ཆག་དེའི་ནང་ང་ཚོའི་དམག་མི་ཁྲི་ཁ་ཤས་ཀྱིས་རྒྱ་དམག་འབུམ་ཚོ་མང་པོར་འཐབ་པས་མི་བཏུབ་མ་ཟད། རང་གཞན་གཉིས་ཀར་ཤི་རྨས་ཚབས་ཆེན་ཐེབས་པའི་མཇུག་འབྲས་ད་ལྟའི་རང་བཞིན་འདི་ལྟར་འགྱུར་རྒྱུར་ཡང་ སྔོན་དཔགས་ཐུབ་པ་ཞིག་རེད།

ལར་ནས་ང་ཚོའི་དབུ་ ཁྲིད་དེ་དམག་དཔུང་ལྡན་པའི་སྒྲིག་འཛུགས་ཤིག་གི་མགོ་གཙོ་ཡིན་ན། འཛམ་ གླིང་ནང་ཁོང་གི་མཚན་མཐོང་དེ་ཙམ་རྒྱས་པ་དང་ལྷག་པར་སྙན་གྲགས་ཆེ་བའི་ནོ་སྦེལ་ཞི་བདེ་གཟེངས་རྟགས། དེ་བཞིན་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་སོགས་ཀྱང་གནས་ཚུལ་གཞན་ཞིག་ཆགས་སྲིད།

ཡང་གཅིག་བཤད་ན་དུས་རབས་བཅུ་གསུམ་པའི་ནང་སོག་པོའི་དམག་གི་སྟོབས་ཤུགས་རྒྱ་ནག་ཁྱོན་ཡོངས་མ་ཟད། འཛམ་གླིང་ཤར་ནུབ་ཀྱི་ཡུལ་གྲུ་གང་མང་ཞིག་སོག་པོའི་དཔུང་ཆེན་གྱི་རྟ་ཕོའི་རྨིག་ སྒྲས་རྫུས་མྱོང་ཡོད། འོན་ཀྱང་ད་ལྟ་འདི་ལྟར་ དྲན་ཡུལ་ཙམ་དུ་གྱུར་པ་ཡང་དམག་དཔུང་གི་ནུས་པས་མ་འདང་པར་ལན་པ་ཞིག་ཀྱང་ག་ལ་ ཡིན།
 
གསལ་ བོར་བཤད་ན་བོད་ཀྱི་རྒྱ་སྐྱེད་ནི་ཆོས་ཀྱི་རྒྱ་སྐྱེད་དང༌། སོག་པོའི་རྒྱ་སྐྱེད་ནི་དཔའ་ཡི་རྒྱ་སྐྱེད། དབྱིན་ཇིའི་རྒྱ་སྐྱེད་ནི་མུ་གེའི་རྒྱ་སྐྱེད་ཡིན་ཞེས་མཁས་དབང་དགེ་ཆོས་ལགས་ཀྱིས་གསུངས་ཡོད་ལ། དེ་བཞིན་བོད་ཀྱི་ཆོས་ལ་བརྟེན་ནས་སྲིད་དར་ཚུལ་ཡང་ཁོང་གིས་བཞེད་འདུག
  
རྒྱུ་མཚན་དེར་བརྟེན་བོད་ལ་དམག་དཔུང་གི་ནུས་པ་མེད་ནའང་ཆོས་ཕྱོགས་ཀྱི་དམག་དཔུང་ བརྟན་པོ་ཞིག་སྲུང་སྐྱོབ་ཐུབ་ཅིང༌། ཆོས་ ཕྱོགས་ཀྱི་དཔུང་ཆེན་དེ་དག་ད་ལྟ་འཛམ་གླིང་ཤར་ནུབ་ཡུལ་གྲུ་གང་སར་སྐྱོད་དེ། བོད་ པ་ཟེར་དུས་འཛམ་གླིང་ནང་ཚང་མས་རྒྱུས་མངའ་ཡོད་པ་ཞིག་དང་དེའི་རིག་གཞུང་རྣམས་ད་ ལྟའི་འཛམ་གླིང་གི་གཅེས་ནོར་ཞིག་ཡིན་པར་ངེས་པ་རྙེད་དུ་བཅུག་ཡོད། དེ་ དག་ནི་ང་ཚོས་རང་གི་གནས་བབ་ཐོག་རང་གི་འཇོན་ཐང་ཞིག་མངོན་ཐུབ་འདུག་ལ། དེ་ ཡང་ཕུགས་དེད་ན་དེའི་སྒྲིག་འཛུགས་ཚགས་ཚུད་པོ་ཞིག་ཡིན་པ་དེར་རེག་ལུས་ཡོད།
  
ཁང་རྡོར་གྱི་འདོད་པ་ལྟར་ང་ཚོའི་གཞུང་ལ་དད་པ་ཞུ་ཡུལ་གྱི་བླ་ཆེན་བླ་ན་མེད་པ་ཞིག་ཡོད་པ་དེས། དམག་དཔུང་གི་སྒྲིག་འཛུགས་ཀྱང་ཚགས་ཚུད་པོ་ཞིག་བཟོས་ཡོད་ན། ད་ལྟ་ནུབ་ཕྱོགས་པའི་ཁྲོད་རི་མོའི་ལམ་ནས་ཟུར་ཟ་ཤུགས་ཆེར་བྱེད་བཞིན་པ་སྟེ་ཁ་ཆེའི་སྟོན་པ་མོ་ཧན་ མོ་དྷེའི་ཕྱག་གཅིག་ལ་ཆོས་ཀྱི་གསུང་རབ་བསྣམས་ཤིང༌། ཕྱག་གཅིག་ལ་རལ་གྲི་འཕྱར་བའི་མཐུན་དཔེ་གཞན་ཞིག་རང་རེའི་དབུ་ཁྲིད་མཆོག་ཀྱང་ཆགས་རྒྱུ་མ་ཡིན་ནམ།

ངས་འདི་ལྟར་བཤད་ན་ཁྱེད་ཀྱིས་ང་རང་ནི་ཇི་མཛད་ལེགས་མཐོང་ཅན་དང་ྋརྒྱལ་བ་རིན་པོ་ཆེའི་ སྲུང་མ། ཡང་ན་རྙིང་ཞེན་ཅན་ཞིག་ཡིན་པའི་ངེས་པ་འདྲོངས་སྲིད་ཅིང་གཞན་ཁག་ཅིག་གིས་སྡིག་ དམོད་ཀྱང་བྱེད་སྲིད། འོན་ཀྱང་ང་རང་ནི་དུས་དང་རྣམ་པ་ཀུན་ཏུ་རང་གི་བློ་གྲོས་ལ་བརྟེན་ནས་དངོས་ཐོག་ བདེན་འཚོལ་བྱེད་མཁན་ཞིག་ཡིན་ཞེས་ཤོད་རྒྱུ་ཡིན།

 བོད་སྤྱི་འབངས་བདེ་ཐབས་སུ་ྋགོང་ས་ལྔ་བ་ཆེན་པོ་ཤོད་ཅི་ལ་ དགོས། རྒྱལ་བ་ཡོན་ཏན་རྒྱ་མཚོའི་སྐབས་ནས་ཐུགས་སྣང་ཡོད་ཀྱང་མི་སྲུན་སྡིག་ཏོའི་ཚོགས་ ཀྱི་བསམ་སྦྱོར་ལ་བརྟེན་ཇི་མཛད་ལག་ལེན་དུ་བསྟར་ཐབས་མ་བྱུང་བའི་ཚུལ་རྣམས་ལ་ བསམ་ཚེ་སྙིང་གི་རུས་པའི་གཏིང་ནས་མཆི་མ་དཀུ་རྒྱུ་ཞིག་མི་འདུག་གམ།

 ཁྱེད་ཀྱིས་ངས་སྐད་ཆ་རྡོག་རྡོག་ཅིག་བཤད། ྋརྒྱལ་དབང་ལྔ་བ་ཆེན་པོས་འབྲི་དགོས་པ་བཀའ་ཤོག་མང་ཙམ་བྲིས་ཏེ་མདོ་སྟོད་སྨད་ དུ་བཀྲམས་ནས་དེ་ཚོ་དབང་དུ་བསྡུ་ཐབས་མི་བྱེད་པར་འབྲི་མི་དགོས་པ་སྙན་ངག་བྲིས་ ནས་བཞུགས་པ་དེ་སློབ་གྲྭ་འཛུགས་པའི་དུས་ཚོད་མ་བྱུང་ནས་རེད་དུས་ཚོད་བྱུང་ནས་ རེད། དབང་ཆ་སྤྲོད་དགོས་ས་བོད་པ་ཞིག་ལ་དབང་མ་སྤྲད་པར་སྤྲོད་མི་དགོས་ས་སོག་རིགས་ ཤིག་ལ་རྒྱལ་པོའི་དབང་གནང་བ་འདི་ཅི་རེད།  ཅེས་ཤོད་འདུག

        བརྒྱ་ཕྲག་བཅུ་དྲུག་དང་བཅུ་བདུན་གཉིས་ཀར་བོད་དབུས་གཙང་གི་ སྤྱི་ཚོགས་དེ་དབང་ཆ་དང་གྲུབ་མཐའི་འཐབ་རྩོད་ཁྲོད་དུ་ལྷུང་ཞིང༌། ྋརྒྱལ་མཆོག་ལྔ་བ་ཆེན་པོའི་ཡབ་ཧོར་བདུད་འདུད་རྡོ་རྗེ་ཡང་བཙོན་ནས་སྐུ་གཤེགས་ འདུག སྡེ་གཟིར་གྱི་ཡོ་ལང་ཆེན་པོ་དེའི་ཁྲོད་ྋགོང་ས་ལྔ་བ་ཆེན་པོས་དགུང་གྲངས་ཉེར་ དྲུག་ཐོག་ཆབ་སྲིད་ཀྱི་ཐུགས་འགན་བཞེས་པ་ཡང་རང་རྣམ་དུ་བོད་འདིར་མགོ་ཆིངས་ཤིག་ ཡོད་ན་དུས་ཀྱང་བདེ་ཞིང༌། ས་དགེ་བཀར་རྙིང་གསུམ་སོགས་གྲུབ་མཐའ་གཞན་རྣམས་དམིགས་པ་མེད་པའི་དབྱིངས་སུ་ རྒྱས་མི་འདེབས་པར་ཕན་ནམ་སྙམ་པ་བྱུང་ཞེས་པར་ཞིབ་འདིང་གསལ་བོ་ཞིག་རྒྱོབས།
 ྋགོང་ས་ལྔ་བ་ཆེན་པོས་ཆབ་སྲིད་ཀྱི་ཐུགས་འགན་བཞེས་པའི་ལོ་ ཕྱི་མར་བོད་ཀྱི་རྒྱལ་རབས་ལོ་རྒྱུས་བྲིས་པ་དང༌། དེ་ནས་ལོ་གཅིག་གི་རྗེས་འཛམ་གླིང་ནང་སྙན་གྲགས་ཆེ་བའི་ཕོ་བྲང་པོ་ཏ་ལ་གསར་ བཞེངས་མཛད་པ་དང་འབྲེལ་ལྷ་སའི་ཇོ་ཁང་གི་དཀར་ཆག་བརྩམས་པ་རྣམས་དྲིན་དུ་མི་ ཆེའམ། སྐབས་དེ་དག་ཏུ་བྲོས་ཐོར་དུ་སོང་བའི་གཙང་བའི་དཔུང་དམག་ལྷག་ལུས་དང་དེའི་ ཕྱོགས་གཏོགས་དང་བཅས་པས་ས་གནས་ཁག་སོ་སོ་ནས་ངོ་ལོག་ཟིང་འཁྲུག་རིམ་པ་དང༌། ལྷོ་འབྲུག་བར་ཡང་དམག་ཐབས་ཀྱིས་སྡོད་བཟོད་མི་བདེ་བའི་ཚུལ་དག་ལ་ཞིབ་ཏུ་སོམས།

 སྐབས་དེའི་དབུས་གཙང་གི་སྤྱི་ཚོགས་ཁྱོན་ཡོངས་ཡམ་ཡོམ་ཤིན་ཏུ་ཆེ་ཞིང་བདེ་འཇགས་མེད་ཁར། གྲུབ་མཐའི་དབར་གྱི་འགལ་ཟླའི་རྣོ་ངར་དང༌། མཐའ་དམག་གི་ཉེན་ཁ། འབངས་མིའི་ངོ་ལོག ལྷག་པར་དགའ་ལྡན་ཕོ་བྲང་གི་སྲིད་དབང་གསར་བར་སོག་པོའི་རྒྱབ་རོགས་ལ་མ་བརྟེན་ མཐུ་མེད་དུ་གྱུར་པའི་དུས་ཚོད་འདི་འདྲ་ཞིག་ལ། གཞི་རིམ་མང་ཚོགས་ཁྲོད་སློབ་གྲྭ་བཙུགས་མིན་གྱི་སྐད་ཆ་ནི་སྐབས་དེའི་ཡུལ་དུས་གནས་བབ་དང་འཚམས་པ་ཞིག་རེད་དམ།

 ཡིན་ནའང་ྋགོང་ས་ལྔ་བ་ཆེན་པོས་དགའ་ལྡན་ཕོ་བྲང་ལ་ངོ་ལོག་ མཁན་མ་གཏོགས་བོན་པོ་ཚུད་པའི་བོད་ཀྱི་ཆོས་ལུགས་ཁག་རིས་མེད་སྒོ་ནས་བསྐྱངས་ ཤིང་སློབ་གཉེར་བྱེད་ས་དགོན་པ་བཅུ་གསུམ་ཙམ་གསར་འདེབས་དང༌། དེ་བཞིན་དཔེ་རྒྱུན་དཀོན་པ་རྣམས་ཁྱབ་བརྡལ་དུ་གཏོང་སླད་འབྲས་སྤུངས་དགའ་ལྡན་ཕོ་བྲང་གི་དཔར་ཁང༌། རྩེ་པོ་ཏ་ལའི་ལྟག་སྒོའི་རྒྱབ་ཀྱི་དཔར་ཁང་གཉིས་གསར་དུ་བཙུགས། འབྲས་སྤུངས་དགའ་ལྡན་ཕོ་བྲང་ནུབ་མར་གསོ་རིག་འགྲོ་ཕན་གླིང་དང༌། དེ་བཞིན་གཞིས་རྩེ་བསམ་འགྲུབ་རྩེར་གསོ་རིག་དྲང་སྲོང་འདུས་པའི་གླིང༌། རྩེ་ལྷ་དབང་ལྕོག་ཏུ་གསོ་རིག་སློབ་གྲྭ་ཁག་ཅིག་འཛུགས་གནང་མཛད་པ་དེ་དག་ཡུལ་ དུས་གནས་བབ་ལ་དཔག་པའི་བྱས་རྗེས་བླ་མེད་ཅིག་ཏུ་མི་ཚོར་རམ།