༅།། ལྷ་ལན་རྡོ་བཅུ་མ། ཁང་གསར་རྡོ་རྗེ།

འདིར་བཀོད་པའི་བསམ་ཚུལ་དེ་ཚོར་ལན་འདེབས་དང་གསལ་བཤད་ཁ་གསལ་བྱེད་དགོས་པ་ཅང་རིག་མ་སོང་། འོན་ཀྱང་དེ་ཚོར་བཀླགས་རྗེས་བསམ་བློ་གཏོང་གིན་སྐད་ཆ་ཁ་ཤས་བཤད་འདོད་བྱུང་།

ཁྱེད་ཅག་ཚང་མས་མཁྱེན་གསལ་བཞིན། བཀུར་འོས་ཆབ་བྲག་ལྷ་མོ་སྐྱབས་ངེད་གཉིས་ལེ་དབར་མང་པོའི་རྒྱང་ཐག་གིས་ཆོད་ཡོད། ངེད་གཉིས་བར་སྒེར་དང་སྤྱི་གཉིས་ཐད་ནས་འཁོན་འཛིན་གང་ཡང་མེད། ངེད་གཉིས་ཀྱིས་འདིར་གླེང་བ་དེ། སྤྱི་དོན་ལ་ཨེ་ཕན་སྙམ་པ་དང་སྤྱི་པ་ལ་བློ་སྐྱེད་ཅིག་འབྱུང་དུ་རེ་བ་དེ་ལས་གཞན་གྱི་སྐུལ་སློང་གང་ཡང་ཡོད་མ་རེད། འོན་ཀྱང་མཆན་འཇོག་མཁན་ཚོས་ངེད་གཉིས་དབར་ཞེ་འཁོན་ཆེན་པོ་ཡོད་པ་ལྟར་གྱི་གཟིགས་སྣང་བྱུང་འདུག དེ་ནོར་བ་རེད་ཞུ་འདོད་བྱུང་།

བཀུར་འོས་ལྷ་མོ་སྐྱབས་ཀྱིས་གསུངས་པ་དེ་ཚོས་ང་ལ་ཕན་ཐོགས་ཡོང་གི་འདུག ཁྱེད་ཅག་གིས་ཀྱང་ལེགས་པར་གཟིགས་ཏེ་དཔྱད་ན་ཕན་ཐོགས་ཡོང་ངེས་རེད། བགྲོ་གླེང་ཞེས་པ་དེ་ལྟད་མོར་བལྟ་བ་ལྟ་བུ་མ་རེད། ལྟད་མོ་ཡིན་ན། རྩལ་གང་ཆེ་དང་འར་གང་ཆེ་དེ་ཚོར་དོ་སྣང་ཆེ་བ་བྱེད་ཀྱི་རེད། བགྲོ་གླེང་ཞེས་པ་དེའི་གཙོ་བོའི་གནད་འགག་ཆུང་ཆུང་དེ་འདྲ་ལ་ཐུག་ཡོད། དཔེར་ན། ཁོང་གིས་རང་བཙན་དང་རང་སྐྱོང་གཉིས་ངོ་བོའི་ཐོག་ནས་འགལ་བ་ཡིན་པར་གསུངས་ཀྱི་ཡོད། དེ་ག་རང་ལ་དགོངས་པ་བཞེས་ན། གཏིང་ཟབ་མོ་ཞིག་གི་བར་དུ་འགྲོ་ས་ཡོད་རེད། དེ་ལ་ཁྱད་པར་ཆེན་པོ་མེད་ན། རང་བཙན་བློས་བཏང་བ་རེད་ཅེས་ཧང་སངས་སངས་བྱེད་དགོས་དོན་མི་འདུག་ག
སྤྱིར་བཏང་མི་ཞིག་གིས་ནམ་རྒྱུན་རྟག་པར་གོ་ཡོང་བའི་སྐད་ཆ་ཞིག་བཤད་སྐབས། དེ་ལ་སྤྱི་ཚོགས་ཀྱིས་དོ་སྣང་ཞེ་དྲག་བྱེད་ཀྱི་མ་རེད། དེ་ལས་ལྡོག་སྟེ་ནམ་རྒྱུན་གྱི་ས་མཚམས་དེ་ཚོ་བརྒལ་ནས་ཤོད་མཁན་དེ་ཚོར་དོ་སྣང་ཆེན་པོ་བྱེད་ཀྱི་རེད། རྟག་པར་ཚང་མས་གོ་བསྡད་པ་བསྐྱར་ལྡབ་བྱེད་དགོས་ན། བསྐྱར་ལྡབ་བྱེད་མཁན་ལའང་དམིགས་བསལ་བཤད་རྒྱུ་མེད་པ་འདྲ་ཞིག་ཡོང་གི་རེད། འོན་ཀྱང་དེ་ཙམ་གྱིས་བཤད་མཁན་གླེན་པ་ཡིན་པར་བརྩིས་ན་འགྲིག་གི་མ་རེད།
བཀུར་འོས་ལྷ་མོ་སྐྱབས་ཀྱིས་གསུངས་པ་དེ་ཟློས་གར་འདྲ་བོ་ཞིག་ཡིན་ན། དེ་བོད་ཀྱི་ལྷ་མོ་འདྲ་བོ་རེད། ཉོབ་ཏོ་རེད། ངས་བཤད་པ་དེ་ཚོ། དིང་སང་གི་གཞོན་ནུ་ཚོས་དགའ་བོ་བྱེད་པའི་འཁྲུག་གཞས་འདྲ་བོ་རེད། འོན་ཀྱང་འཁྲུག་མ་འཁྲུག་ཙམ་གྱིས་རྒྱུ་མཚན་ལྡན་མི་ལྡན་གྱི་སྐད་ཆ་བཤད་ན་ཡག་པོ་མ་རེད།
བཀུར་འོས་ལྷ་མོ་སྐྱབས་ལགས་ཀྱི་རྩོམ་རིག་སྤྱི་ཡོངས་ལ་ལེགས་པར་གཟིགས་ན། ཁོང་གི་དགོངས་ཚུལ་དེ་ཚོ་གཏིང་ཟབ་ས་ནས་དྲང་པོ་དྲང་བཞག་གིས་གསུངས་ཐུབ་ཡོད། འདི་ལ་ང་ཚོས་གདེང་འཇོག་གསལ་པོ་གནང་དགོས་པ་དེ་གལ་ཆེན་པོ་རེད། ལྷག་པར་དུ། དེང་གི་དུས་འདིར་༸རྒྱལ་བ་རིན་པོ་ཆེའི་བཀའ་བཞིན་སྒྲུབ་ཐུབ་རུང་མ་ཐུབ་རུང་། རང་ངོས་ནས་ལྷག་བསམ་རྣམ་དག་གནང་མཁན་ཉུང་བའི་སྐབས་འདིར། ཁོང་གིས་རང་གི་ནུས་ཚོད་ཀྱི་འགན་ཞིག་བཞེས་བཞིན་པ་འདི་ལ་ཚང་མས་གུར་བཀུར་ཞུ་དགོས། དེ་མིན་ང་འདྲ་བོས་ཆབ་བེ་ཆོབ་བེ་ལུང་པ་གང་བཤད་ཡོང་དུས། དོན་ངོ་མའི་ཁ་གཏད་ལངས་མཁན་སུ་འདུག ང་མ་ཡིན་པ་གཞན་དག་གིས་སྡུག་རིགས་ངན་ཚད་བྲིས་པ་དེ་ཚོ་ལ་ཡ་ལན་བྱེད་མཁན་སུ་འདུག བྱེད་བསམ་ནའང་ཤེས་ཚད་ཀྱིས་ལྡང་གི་འདུག་གམ། དེར་བརྟེན། ཁོང་གི་གནང་སྟངས་ལ་ངས་ནི་ཁ་ཞེ་གཉིས་མེད་ཀྱིས་གུས་བརྩི་ཡོད།
ང་རང་དྲྭ་རྒྱའི་ནང་དམག་ཆེན་བརྒྱབ་དྲག་སྟེ། གོང་དུ་བཀོད་པའི་རྩོམ་དེ་ལའང་བཤད་མི་འོས་པའི་སྐད་ཆ་སྦོམ་པོ་མང་པོ་ཞིག་བཤད་འདུག འོན་ཀྱང་ཀློག་པ་པོ་ཚོས་དེ་ཙམ་གཞི་ལ་བཞག་སྟེ་ཆགས་སྡང་ཕྱོགས་རིས་བྱས་ན་ཡག་པོ་མ་རེད། ངས་སྡིག་པ་བསགས་པའི་ཞོར་ལ་ཁྱེད་ཅག་ལའང་གསོག་བཅུག་པ་འདྲ་བོ་ཆགས་ཀྱི་འདུག དེ་དག་ཐུགས་ལ་བཞག་སྟེ་དགོངས་འཆར་གནང་རོགས་གནང་། དོན་དག་རང་གི་སྒང་ལ་དགོངས་འཆར་གནང་རོགས།

འབྲེལ་བ་མེད་པའི་བསམ་འཆར་དང་དྲི་བ་ལ་ལན་ཞུ་གི་མིན། གང་ཡིན་ཟེར་ན། ཉིན་མ་གསུམ་བཞིའི་རིང་ལས་བྲེལ་ཆེ་ཙམ་ཡོད། འོན་ཀྱང་ཉིན་རེའི་སྔ་དགོང་གཉིས་སུ་མཆན་གསར་པ་དེ་ཚོ་ཚང་མ་ཀློག་གི་ཡིན།
དེ་ཙམ་ཡིན། ཐུགས་རྗེ་ཆེ།

ཁང་གསར་རྡོ་རྗེ་ལགས་ལ་དངོས་གནས་ཆབ་སྲིད་ཀྱི་ཤེས་ཚད་ཡག་པོ་འདུག ད་བར་འདིར་རྩོད་གླེང་བ་སུ་དང་གང་གིས་ཁོང་ལ་དོ་ཟླ་མི་འདུག ད་དུང་མ་མཐུད་དེ་གླེང་བར་སྨོན།

ཁང་གསར་བ། ཁྱོད་ཀྱིས་༸རྒྱལ་བ་རིན་པོ་ཆེའི་བཀའ་སྒྲུབ་མཁན་ཚོ་ལ། སྲུང་མ་ཞེས་འཕྱ་དམོད་བྱས་པ་དང་། ༸རྒྱལ་བ་རིན་པོ་ཆེ་སྐུ་ཕྲེང་ ༥ ནས་ ༡༤ བར་གྱིས་བོད་པ་མུན་ནག་ནང་ལ་བཞག་པ་རེད་ཟེར་བ། ༸རྒྱལ་བ་རིན་པོ་ཆེའི་དགོངས་ཚུལ་དང་བོད་མི་དཀྱུས་མའི་བསམ་ཚུལ་གཉིས་གལ་ཆེ་ཆུང་གཅིག་པ་རེད་ཟེར་བ་དེ་ཚོ་རང་ཉིད་གིས་ནོར་འཁྲུལ་ཤོར་བ་ཁས་མ་བླངས་ཕྱིན། ང་རང་ལ་བྱེད་རྒྱུ་གཞན་མེད་ནའང་། གང་ཐུབ་ཀྱིས་ངོ་རྒོལ་བྱེད་ཀྱི་ཡིན།

ད་དུང་ཁྱོད་ཀྱིས་ཟམ་གདོང་རིན་པོ་ཆེ་རྩོམ་པ་པོ་མ་རེད་ཅེས་གྲོས་ཆོད་རྫུན་མ་བཞག་ཡིན་པ། དེ་ཚོ་དཔེ་མི་སྲིད་པའི་ཧམ་པ་རེད།

གཞོན་ནུ་ཚོགས་པས་རང་སྐྱོང་ལ་ངོས་ལེན་བྱེད་ཀྱི་ཡོད་པ་མངོན་གསལ་རེད། ཁྱེད་རང་གིས་བཀབ་ཐུབ་ཀི་མ་རེད། ཚང་མས་མཐོང་གི་འདུག

གུས་མོར་ཟླ་ངོ་གཉིས་ཀྱི་རིང་ལས་དོན་ཞིག་གི་དབང་གིས་འདིར་བསམ་ཚུལ་དང་མཆན་བུ་འདེབས་རྒྱུའི་དུས་ཁོམ་བྱུང་མ་སོང། ཁ་སང་རང་ལས་མཇུག་གྲུབ་པར་བརྟེན་དེ་རིང་འདིར་ཡོང་ནས་ལྷོད་ལྷོད་བྱས་ཏེ་དྲྭ་ལམ་ཁག་ཅིག་ཉུལ་བ་ཡིན།

དུས་བབ་དྲྭ་བའི་ངོས་ཐད་ནས་བཤད་ན་ཆེད་རྩོམ་དང་དེ་བཞིན་གསར་འགྱུར་སོགས་ཕྱོགས་མང་པོ་ཞིག་ནས་མར་དང་ཐུར་དུ་འགྲོ་བཞིན་པའི་ཚོར་བ་ཞིག་ལས་ཡར་རྒྱས་དང་མདུན་དུ་འགྲོ་བཞིན་པའི་ཚོར་བ་སྤྲད་མ་སོང། འདི་ལྟར་བལྟས་ཏེ་ཚོད་དཔག་བྱས་པ་ཡིན་ན་རྒྱུན་མཐུད་ནས་དུས་ཐུང་ངང་མར་དང་ཐུར་དུ་འགྲོ་ངེས་ཡིན་པའི་ཚོར་བ་ཞིག་རང་བཞིན་གྱིས་སྐྱེར་བཅུག་སོང། འདི་བསམ་ཚུལ་གཅིག་ཡིན།

གཉིས་ནས་དུས་བབ་དྲྭ་བའི་ནང་དེང་ཆབ་བྲག་དང་ཁང་སར་གཉིས་རྩོད་པར་ཞུགས་འདུག དེ་ཡང་རྩོད་པའི་རྣོ་སྒང་དང་སྐབས་རེ་ཚིག་གི་ཟུར་དང་ངོས་མ་འདྲ་བ་ནས་བལྟས་ན་ཁོང་རྣམ་པ་གཉིས་ཀྱིས་མཚམས་ལ་རེར་ཁོང་ཁྲོ་ཡང་ཅུང་ཙམ་རེ་བཞེས་ཀྱི་མེད་དམ་སྙམ་པའི་ཚོར་ཤེས་སླེབས་བྱེད་ཀྱི་བརྗོད་ཚིག་ཀྱང་ཇི་སྙེད་ཅིག་མཐོང་རྒྱུ་འདུག མ་གཞི་རྩོད་པའི་རྩ་བ་ནི་བོད་མི་རིགས་ཀྱི་དཀའ་ངལ་སེལ་བྱེད་ཀྱི་ཐབས་ལམ་དེ་ལམ་དབུ་མ་ཡག་གི་རེད་དམ། རང་བཙན་ཡག་གི་རེད། རང་བཙན་རྩོད་མཁན་ཚོ་མགོ་མི་ཚོས་མཁན་དང་། ཆབ་སྲིད་ཀྱི་ཤེས་རྒྱ་མེད་མཁན་རེད་དམ། ཡང་ན་དབུ་མའི་ལམ་དུ་ཞུགས་མཁན་ཚོ་གོ་སྐབས་རིང་ལུགས་པ་དང་སྐབས་འཚོལ་རིང་ལུགས་པ། དེ་བཞིན་ཆབ་སྲིད་གཞུང་ལུགས་དང་དངོས་ཡོད་གནས་སྟངས་ལ་བལྟ་མི་ཐུབ་པའི་མིས་ཅི་བཤད་ལ་ཉན་བཞིན། རྒྱུགས་བཞིན། འདུར་བའི་ཨུར་ཞོགས་བྱེད་མཁན་རེད་ལྟ་བུའི་ནང་དོན་དེ་ག་ལ་རྣམ་པ་དང་བརྗོད་ཚུལ་སྣ་ཚོགས་ཀྱི་སྒོ་ནས་རྩོད་པར་ཞུགས་འདུག་པ་འདི་རེད།
འོན་ཀྱང་རྩ་བ་དེ་ག་ལ་ཡར་ག་ཁྱད་མཚར་ཞིག་རྒྱས་འདུག དེ་ནི་ཁོང་གཉིས་ཀྱི་གཞི་རྩའི་རྩོད་གཞི་དང་ཕན་ཚུན་ལ་འཆད་བཞིན་གླེང་བའི་ཁྱབ་ཚད་དང་ས་ཁོངས་ལས་བརྒལ་བའི་དྲི་རྟགས་སྣ་ཚོགས་ཤིག་བསམ་བཞིན་དང་བསམ་བཞིན་མ་ཡིན་པར་སླེབས་བཞིན་འདུག དཔེར་ན་ཆབ་བྲག་གིས་རྩོད་པའི་རྩ་བ་དབུ་མའི་ལམ་འདི་བོད་དོན་བདེན་མཐའ་གསལ་བྱེད་ཀྱི་ཐབས་ལམ་ཡག་ཤོས་ལ་ངོས་འཛིན་བྱེད་བཞིན་པ་ལས་གཞན་བོད་ཀྱི་བདེན་མཐའ་གསལ་བྱེད་དུ་རང་བཙན་གྱི་ལྟ་བ་འཁྱེར་ཆོག་གི་མ་རེད་ལབ་མི་འདུག་ལ། རང་བཙན་གྱི་ལྟ་བ་འཛིན་མཁན་གྱི་མིའི་ནུས་པ་དང་བྱེད་ཕྱོགས་ལ་ཟུར་དང་ངོས་མ་འདྲ་བའི་སྒོ་ནས་སྐྱོན་བརྗོད་བྱས་ཡོད་པ་ལས། རང་བཙན་གྱི་ལྟ་བ་དང་ལངས་ཕྱོགས་ཁོ་རང་ལ་སྐྱོན་བརྗོད་དམིགས་བཀར་བྱས་ཏེ་གསུངས་མི་འདུག དེ་བཞིན་ཁང་སར་ལགས་ཀྱིས་ཀྱང་རྒྱལ་བ་རིན་པོ་ཆེ་དང་ལམ་དབུ་མ་ལ་ཐད་ཀར་སྐྱོན་འཛུགས་བྱས་མེད་ལ། བོད་ཀྱི་བདེན་མཐའ་སེལ་བྱེད་ཀྱི་ཐབས་ལམ་ལ་མཐའ་གཅིག་ཏུ་རང་བཙན་ལས་ལམ་ཁ་གཞན་མེད་ཚུལ་ཀྱང་གསུངས་མི་འདུག འདི་ཚོ་ནི་རྩོད་གཞིའི་རྩ་བ་དང་མི་མཐུན་པའི་ཡན་ལག་གི་ཡར་ག་གྱེས་ཚུལ་གཞན་ཞིག་རེད།
དེ་རིང་དེ་ཙམ་ཡིན། ད་ཕྱི་ལོག་ཏུ་གྲོགས་པོ་ཁ་ཤས་དང་མཉམ་དུ་གོ་ཧྤེས་འཐུང་དུ་འགྲོ་དགོས། ཁང་སར་ལགས་ཀྱིས་རྒྱལ་བ་རིན་པོ་ཆེའི་སྲུང་མ་ཞེས་པའི་རྩོམ་ཡིག་དེའི་ཐད་གུས་མོར་བསམ་ཚུལ་གཞན་ཞིག་ཡོད། དོ་དགོངས་མ་ཐུབ་རུང་སང་ཉིན་སྤེལ་ངེས་ཡིན་པ་ཐུགས་འཇགས་འཚལ།

གསལ་བཤད་དང་ལན་འདེབས་ཞུ་དགོས་པ་མེད་ན། སྔོན་ལ་གཉིད་ཅིག་ཉལ་བར་འགྲོ་གི་ཡིན། སང་ཞོགས་མཇལ་ཆོག

བློ་གྲོས་ཅན་ཟེར་ན་འདི་རེད། ལེགས་བཤད་ཟེར་ན་འདི་འདྲ་ལ་ཟེར། མཁས་པ་བརྩད་ཅིང་མ་དྲིས་ན། །དེ་སྲིད་བར་དུ་གཏིང་མི་དཔོགས། །རྔ་ལ་དབྱུ་གུས་མ་བརྣུན་ན།། དེ་སྲིད་གཞན་དང་ཁྱད་ཅི་ཡོད།། ཅེས་པ་ལྟར་རེད། དེར་བརྟེན། རྣམ་དཔྱོད་ཀྱིས་དབྱུ་གུས་བརྣུན་མཁན་རྒན་ལྷ་མོ་སྐྱབས་དང་རྔ་སྒྲ་ཡང་དག་པར་སྒྲོག་མཁན་ཁང་གསར་རྡོ་རྗེ་གཉིས་ཀར་ཐུགས་རྗེ་ཆེ་ཞུ།

ཁང་གསར་རྡོ་རྗེ་ལགས་ཀྱིས་འདི་འདྲའི་ལེགས་བཤད་ཀྱི་སྐྱེས་མང་དུ་སྩོལ་བར་ཞུ།

ཐབས་ཇུས་ལ་མཁས་པའི་ཤེས་ལྡན་ཁང་གསར་རྡོ་རྗེས་སྤེལ་བའི་དཔྱད་རྩོམ་མང་ཆེ་བ་ལ། ཞིབ་པར་བལྟས་པས་སྲིད་དོན་ཚན་རིག་དང་མཐུན་པའི་ཐབས་ཇུས་དང་སློབ་གསོའི་རིན་ཐང་ཡོད་པར་མཐོང་བས། རང་སེམས་ཧ་ཅང་དགའ་མོས་བྱུང་།

བོད་གངས་ཅན་པའི་རྒྱལ་དམངས་ཀྱི་གནས་སྟངས་ཤིན་ཏུ་སྐྱོ་བའི་དུས་རབས་འདིར། མཁས་མཛངས་ལྡན་པའི་བོད་རིགས་རྣམས་ཀྱིས་གཞུང་སྒེར་གྱིས་མགྲོན་འབོད་བྱེད་པ་ལ་ནམ་ཡང་མི་སྒུག་པར། མ་བསྐུལ་དང་ལེན་གྱིས་བཙན་བྱོལ་བོད་གཞུང་གི་ལས་རིགས་ཁག་གི་ནང་དུ་གང་འགྱོགས་སྒོས་ཞུགས་ནས། རང་གི་ཤེས་འཇོན་ལྟར་བོད་དོན་རླབས་ཆེན་སྒྲུབ་དགོས་པ་ནི། རྒྱལ་སྤྱིའི་དུས་བབ་ཀྱིས་སྤྲད་པའི་སོ་སོ་མི་ཚེའི་ལས་འགན་རེད་ལ་ཤི་གསོན་བོད་འབངས་ཡོངས་ཀྱི་རེ་བ་ངོ་མ་ཡང་འདི་རེད། དེར་བརྟེན་བདག་གིས་ཀྱང་བོད་གཞུང་གི་ལས་རིགས་སུ་ཞུགས་ཏེ། དངོས་ཤུགས་བརྒྱུད་གསུམ་ནས་ཞབས་འདེགས་གང་ནུས་ཉིན་ལྟར་ཞུ་བཞིན་ཡོད་ལ། ད་དུང་བཙན་བྱོལ་བོད་གཞུང་གི་ལས་ཁང་ཁག་ལ་ངེས་པར་དུ་ཐབས་ཇུས་ལ་མཁས་པའི་ཤེས་འཇོན་ཅན་གྱི་བོད་མི་མང་པོ་ཡོད་དགོས་པ་འདི་གལ་གནད་ཤིན་ཏུ་ཆེ་བར་མཐོང་།

གལ་ཏེ་བཙན་བྱོལ་བོད་གཞུང་གིས། ཐབས་ཇུས་ལ་མཁས་པའི་ཤེས་འཇོན་ཅན་གྱི་བོད་མི་རྣམས་ལ། མཐོང་ཆུང་གིས་མཐོ་གནོན་དང་འབུར་འཇོམས་བྱས་ནས། ལས་གནས་མི་སྤྲད་པ་དང་ཐབས་ཇུས་གོང་འཕེལ་ཀྱི་བྱ་འགུལ་སྣ་ཚོགས་པ་ཞིག་སྤེལ་མ་བཅུག་ན། ང་ཚོའི་བོད་གཞུང་འདི་སྔར་གྱི་ལོ་རྒྱུས་རྙིང་པ་བཞིན་འཕེལ་མེད་སོར་གནས་དང་ནུས་མེད་ཉམས་རྒུད་ནས་རྩ་མེད་དུ་འགྲོ་ངེས་ཡིན་པ་ཀུན་གྱི་ཤེས་གསལ་རེད།

ད་ལྟ་བཙན་བྱོལ་བོད་གཞུང་གིས་ཛ་དྲག་གིས་བསྒྲུབ་དགོས་པའི་བྱ་བ་གལ་ཆེན་ཞིག་ནི། ༼བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས༽ཚད་ལྡན་ཕུན་སུམ་ཚོགས་པ་ཞིག་མྱུར་དུ་གསར་འཛུགས་བྱེད་རྒྱུ་འདི་རེད།

ཤེས་རབ་གསལ་ཞིང་ཉམས་མྱོང་ཆེ་བའི་བོད་རིགས་ལྷག་བསམ་ཅན་རྣམས། བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས་འདིར་གང་འགྱོགས་ཕྱོགས་གཅིག་ཏུ་བསྡུས་ནས། འཆར་གཞི་ཡོད་པའི་སྒོ་ནས་ཉམས་ཞིབ་སྡེ་ཚན་དུ་མ་རྩ་འཛུགས་བྱས་ཏེ། ཞིབ་འཇུག་པ་རྣམས་ཀྱིས་ཉིན་ལྟར་ཆུ་ཚོད་བརྒྱད་རེ། བློ་དང་རིག་པ་སྣ་ཚོགས་པས་བོད་ཀྱི་རྒྱ་ཆེའི་ལས་དོན་སྤྱི་ལ་ཞིབ་དཔྱོད་བྱེད་རྒྱུ་དང་། ཡང་སྐབས་རེ་བློ་སེམས་རྩེ་གཅིག་གིས་ཟབ་མོའི་ལས་དོན་དམིགས་བསལ་ལ་ཞིབ་འཇུག་མཐར་ཕྱིན་པ་བྱས་ནས་ཐབས་ཇུས་ཀྱི་བསྡོམས་རྩིས་ཐོབ་པར་བྱེད་བཅུག་དགོས།

བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས་འདིའི་ལས་འགན་ནི། བོད་གངས་ཅན་ལྗོངས་ཀྱི་ཆོས་ལྡན་མི་རིགས་འདིའི། གནས་སྐབས་དང་མཐར་ཐུག་གི་དམིགས་ཡུལ་རྣམས་སྒྲུབ་ཐུབ་པའི་མཐུན་རྐྱེན་དུ། གོ་རིམ་ཡོད་པའི་འཆར་གཞི་དང་། ཕན་ནུས་ཆེ་བའི་ཐབས་ཇུས། སྣ་ཚོགས་མཉམ་འབྲེལ་ཀྱི་ལས་འགུལ་སོགས་དུས་ཐོག་ཏུ་བོད་གཞུང་གི་ལས་རིགས་སོ་སོའི་ལས་བྱེད་པ་རྣམས་ལ་ཐབས་ཇུས་བསླབ་སྟོན་དང་གནས་ཚུལ་མཁོ་འདོན་བྱེད་རྒྱུ་དེ་ཡིན།

བོད་ཀྱི་ཆེས་མཐོའི་ཐབས་ཇུས་ཞིབ་འཇུག་ལྟེ་གནས་འདིའི་མེད་ན་མི་རུང་བའི་འབྲེལ་ཡོད་ལས་ཁང་གལ་ཆེན་ཞིག་ནི། ཕྱི་ནང་གི་དགོས་ངེས་གནས་ཚུལ་རྣམས་འཚོལ་སྡུད་ཐུབ་པའི་༼བོད་ཀྱི་ཆེས་མཐོའི་གསང་བའི་ལས་ཁང༽ཞིག་ཡོད་དགོས་ལ། བོད་ཀྱི་ཆེས་མཐོའི་གསང་བའི་ལས་ཁང་འདིས་ངེས་པར་དུ་གནས་ཚུལ་མཁོ་སྤྲོད་བྱེད་ཐུབ་པའི་མི་སྣ་སྤྱང་གྲུང་འཛོམས་པ་མང་པོ་སྦྱོང་བརྡར་བྱས་ནས། རྒྱལ་ཁབ་ཕྱི་ནང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པའམ་སྒེར་བ་རྣམས་དང་། འབྲེལ་བ་མངོན་ལྐོག་གཉིས་ནས་བྱས་ཏེ་འབྲེལ་ཡོད་དགོས་ངེས་ཀྱི་གནས་ཚུལ་རྣམས་དུས་ཐོག་ཏུ་རག་ཐུབ་པ་བྱེད་དགོས།

འདིར་ངེས་པར་དུ་ཤེས་དགོས་ཞིག་ནི།

བོད་ནི་རྒྱ་ནག་གི་ཆ་ཤས་ནམ་ཡང་བྱེད་མ་མྱོང་ལ། བོད་ནི་རང་བཙན་ཆ་ཚང་ཡོད་པའི་རྒྱལ་ཁབ་གཅིག་ཡིན་པ་ནི་ལོ་རྒྱུས་ཀྱིས་བདེན་དཔང་བྱས་ཡོད་པས། སུས་ཀྱང་ལོ་རྒྱུས་ལ་འགྱུར་བ་བཏང་མི་ཐུབ། རྒྱ་དམར་གྱིས་བསམ་བཞིན་བོད་ལ་བཙན་འཛུལ་བྱས་ནས་བོད་ཡུལ་རྒྱ་ནག་གི་མི་སེར་སྤེལ་ཡུལ་བྱེད་བཞིན་པ་ནི། རྒྱ་སྤྱིའི་ཁྲིམས་དང་ཡོངས་སུ་འགལ་བའི་ཉེས་སྤྱོད་ཚབས་ཆེན་ཞིག་རེད། དེར་བརྟེན་བོད་མི་དམངས་རྣམས་ལ་བོད་རང་དབང་རང་བཙན་རྩོད་རྒྱུའི་ཐོབ་ཐང་ཆ་ཚང་ཡོད་ལ། བོད་མི་དམངས་རྣམས་ལ་རང་དབང་རང་བཙན་རྩོད་རྒྱུ་ནི་དུས་རབས་ཀྱིས་སྤྲད་པའི་ལས་འགན་ཞིག་ཡིན།

འོན་ཀྱང་གོང་ས་སྐྱབས་མགོན་ཏཱ་ལའི་བླ་མས། རྒྱ་བོད་མི་རིགས་ཕྱོགས་གཉིས་ཀྱི་གནས་སྐབས་དང་ཡུན་རིང་གི་ཞི་བདེའི་ངང་མཉམ་གནས་ཡོང་ཆེད། ཕྱོགས་གཉིས་ལ་ཕན་པའི་དབུ་མའི་ལམ་གྱི་ཐབས་ཇུས་ལ་བརྟེན་ནས་རྒྱ་བོད་གྱི་འགལ་ཟླ་རྣམས་བསལ་ཐུབ་པའི་དགོངས་ཚུལ་གསུངས་ཡོད། དབུ་མའི་ལམ་ཐབས་ཇུས་ནི་སྔར་བྱུང་ལོ་རྒྱུས་རྣམས་བྱུང་ཚར་བ་ཞིག་ཡིན་པས་རྩོད་ལེན་མི་བྱེད་པ། གཙོ་ཆེ་ཤོས་ཕྱིས་འབྱུང་རྒྱ་བོད་མི་རིགས་གཉིས་ཞི་བདེ་ཡུན་གནས་ཡོང་བའི་ཕྱིར། རྒྱལ་བ་རིན་པོ་ཆེས་ཐུགས་བརྩེ་བས་རླབས་ཆེན་གྱི་དགོངས་པ་དབུ་མའི་ལམ་གྱི་ཐབས་ཇུས་འདི་སྟོན་ཡོད་པ་ལས། ལོ་རྒྱུས་ཐོག་བོད་རང་བཙན་མིན་པས་དབུ་མའི་ལམ་འདི་སྟོན་པ་ཞིག་མ་རེད།
འོན་ཀྱང་ཤེས་ལྡན་ཁང་གསར་རྡོ་རྗེས། ད་ལྟའི་རྒྱ་ནག་དམར་པོའི་གཞུང་འདི་ལ་གཞི་རིམ་གྱི་འགྱུར་བ་ཧ་ཅང་ཆེན་པོ་ཞིག་མ་སོང་གི་བར་དུ། རང་བཙན་དང་རང་སྐྱོང་གཉིས་ཕར་བཞག ལྷ་ས་གྲོང་ཁྱེར་གྱི་ས་ཆ་ཆུང་ཆུང་དེ་ཙམ་ཞིག་ཀྱང་བདག་ཅག་ལ་རྩ་བ་ནས་སྤྲོད་ཀྱི་མ་རེད། སྤྲད་ཀྱང་ཡུན་རིང་གནས་ཀྱི་མ་རེད། ནམ་རྒྱ་ནག་དམར་པོའི་གཞུང་འདི་འཐོར་བ་ན། དེ་དུས་རང་བཙན་དང་རང་སྐྱོང་གཉིས་ཀ་ལ་གོ་སྐབས་འདྲ་མཉམ་དུ་ཡོད་པ་རེད། གསུངས་པ་ལྟར་ང་ཚོས་ཞུམ་པ་མེད་པའི་སྙིང་སྟོབས་དང་ལྷག་བསམ་རྣམ་དག་གིས་སྔར་ལས་ལྷག་པའི་ཞིབ་འཇུག་དང་། སྔར་ལས་ལྷག་པའི་འཆར་གཞི་དང་། སྔར་ལས་ལྷག་པའི་ཐབས་ཇུས་དང་། སྔར་ལས་ལྷག་པའི་ལས་འགུལ་སྣ་ཚོགས་ཞིག་བོད་འབངས་ཡོངས་ཀྱི་མངོན་འདོད་མ་འགྲུ་བར་དུ་ཕྱོགས་ཀུན་ནས་གཏིང་ཟབ་སྤེལ་དགོས་སོ།

བོད་ནི་རྒྱ་ནག་གི་ཆ་ཤས་ནམ་ཡང་བྱེད་མ་མྱོང་ལ། བོད་ནི་རང་བཙན་ཆ་ཚང་ཡོད་པའི་རྒྱལ་ཁབ་གཅིག་ཡིན་པ་ནི་ལོ་རྒྱུས་ཀྱིས་བདེན་དཔང་བྱས་ཡོད་པས། སུས་ཀྱང་ལོ་རྒྱུས་ལ་འགྱུར་བ་བཏང་མི་ཐུབ། རྒྱ་དམར་གྱིས་བསམ་བཞིན་བོད་ལ་བཙན་འཛུལ་བྱས་ནས། བོད་ཡུལ་སྟོད་སྨད་བར་གསུམ་རྒྱ་ནག་གི་མི་སེར་སྤེལ་ཡུལ་བྱེད་བཞིན་པ་ནི། རྒྱ་སྤྱིའི་ཁྲིམས་དང་ཡོངས་སུ་འགལ་བའི་ཉེས་སྤྱོད་ཚབས་ཆེན་རེད། དེར་བརྟེན་བོད་མི་དམངས་རྣམས་ལ། བོད་རང་དབང་རང་བཙན་རྩོད་རྒྱུའི་ཐོབ་ཐང་ཆ་ཚང་ཡོད་ལ། བོད་མི་དམངས་རྣམས་ལ་རང་དབང་རང་བཙན་རྩོད་རྒྱུ་ནི་དུས་རབས་ཀྱིས་སྤྲད་པའི་ལས་འགན་ཞིག་ཡིན།

འོན་ཀྱང་གོང་ས་སྐྱབས་མགོན་ཏཱ་ལའི་བླ་མས། རྒྱ་བོད་མི་རིགས་ཕྱོགས་གཉིས་ཀྱི་གནས་སྐབས་དང་། ཡུན་རིང་གི་ཞི་བདེའི་ངང་མཉམ་གནས་ཡོང་ཆེད། དབུ་མའི་ལམ་གྱི་ཐབས་ཇུས་ལ་བརྟེན་ནས་རྒྱ་བོད་གྱི་འགལ་ཟླ་བསལ་ཐུབ་པའི་དགོངས་ཚུལ་གསུངས་ཡོད། དབུ་མའི་ལམ་གྱི་ཐབས་ཇུས་ནི་སྔར་བྱུང་ལོ་རྒྱུས་རྣམས་བྱུང་ཚར་བ་ཞིག་ཡིན་པས་རྩོད་ལེན་མི་བྱེད་པ། གཙོ་ཆེ་ཤོས་ཕྱིས་འབྱུང་རྒྱ་བོད་མི་རིགས་གཉིས་ཞི་བདེ་ཡུན་གནས་ཡོང་བའི་ཕྱིར། རླབས་ཆེན་གྱི་དགོངས་པ་དབུ་མའི་ལམ་གྱི་ཐབས་ཇུས་འདི་སྟོན་ཡོད་པ་ལས་་

Various views are need for a country.It could be a kind of slave system if withought different views and values in a country.Therefore,please work it out with your view but not only waste pepers and spaces.

དཔྱོད་ལྡན་གསར་བརྗེ་སྐྱབས་ཀྱིས་ལྷ་མོ་སྐྱབས་ལགས་སུ་ཕུལ་བའི་ལན་འདི་རེད།

སྤྱིར་བཏང་ཁ་སང་ནས་ནག་མོ་ཅོ་མཛིང་ལྟ་བུའི་ཁ་རྩོད་ཚིག་འདི་མཚམས་བཞག་ན་འདོད་སོང་། དེ་ལྟར་མཚམས་འཇོག་འདོད་ཀྱི་མཇུག་བསྡུ་ཞིག་ཀྱང་འབྲི་ཁུལ་བྱས་ནས་མཆན་བུ་བཏབས་ཡོད། དེ་རིང་འདིར་རྒན་ལགས་ཀྱིས་ཁང་གསར་ངེད་གཉིས་ཀྱི་མིང་གི་བཟུང་ནས་ཕྱག་རྩོམ་ཕེབས་འདུག གུས་མེད་དུ་མི་འགྲོ་ཆེད་གཤམ་ལ་ཡང་བསྐྱར་བསམ་ཚུལ་འགའ་འབུལ་བར་བརྩོན།

༡༽གནས་ལུགས་རྒྱུ་མཚན་ཟེར་བ་དེ་མཐར་གཏུགས་ན་གནས་སྟངས་རེད་འདོད། དངོས་ཡོད་གནས་སྟངས་ལས་ལྷག་པའི་གནས་ལུགས་རྒྱུ་མཚན་ཞིག་དང་། བདེན་པ་རྡོག་རྡོག་ཟེར་བ་ཞིག་ཡོད་སྟངས་མེད་པ་ཞིག་རེད། མ་གཞི་ནས་རྒན་ལགས་ནང་བཞིན་ལྟ་གྲུབ་གླེང་བའི་གཞུང་ལུགས་སྟེ། དཔེ་དེབ་དང་ཡིག་ཆའི་གསེང་ནས་གནས་ལུགས་རྒྱུ་མཚན་དང་བདེན་པ་འཚོལ་བའི་དུས་ཚོད་དེ་སྔ་ས་ནས་ཡོལ་ཚར་བ་རེད། དངོས་ཡོད་གནས་སྟངས་ཀྱིས་སྟོང་བའི་གནས་ལུགས་རྒྱུ་མཚན་གང་ཡིན་ཡང་མཐར་གཏུགས་ན་གནས་ལུགས་མ་རེད་ལ། རྒྱུ་མཚན་ཡང་མ་རེད། བདེན་པ་ནི་དེ་བས་ཀྱང་ག་བ་ག་བ།

༢༽རང་བཙན་དང་ལམ་དབུ་མ་གཉིས་འགལ་བ་ཡིན་སྟངས་ངོ་བོའི་སྒང་ནས་གསུངས་འདུག རྒྱལ་ཁབ་གསར་འཛུགས་དང་རྒྱལ་ཁབ་བློས་གཏོང་གི་ཐད་ནས་གསལ་བོར་གསུངས་འདུག འདི་ཡང་ལྟ་གྲུབ་དང་གཞུང་ལུགས་བར་གྱི་འགལ་ཟླ་ཞིག་མ་གཏོགས། དངོས་ཡོད་གནས་སྟངས་སྟེ། བོད་དོན་དང་བོད་མིའི་མངོན་འདུན། རྒྱ་ནག་གི་ངོས་འཛིན་སོགས་ཀྱི་སྟེང་ནས་འགལ་ཟླ་གང་ཡང་མེད། རང་བཙན་བརྩད་ན་རེད། ལམ་དབུ་མར་ཞུགས་ནའང་རེད། འདི་གཉིས་གང་ཡིན་ཡང་བོད་དོན་ཡིན་པ་དངོས་ཡོད་གནས་སྟངས་རེད། བོད་མི་ཚོའི་རང་བཙན་ལ་འདོད་མོས་ཡོད་པ་དང་། ལམ་དབུ་མ་བརྒྱུད་ནས་རང་སྐྱོང་ཚད་ལྡན་ཞིག་རེག་པར་འདོད་བཞིན་པའང་དངོས་ཡོད་གནས་རེད། ང་ཚོས་ལམ་དབུ་མ་ཟེར་ནས་ལྟ་གྲུབ་དང་གཞུང་ལུགས་ཀྱི་འགྲེལ་བརྗོད་དང་གསལ་བཤད། དེ་བཞིན་འབྲེལ་མོལ་རིམ་པ་ག་ཚད་བྱས་ཀྱང་རྒྱ་ནག་གིས་དེ་ནི་རང་བཙན་རང་རེད་ཟེར་བཞིན་པ་འདི་ཡང་དངོས་ཡོད་གནས་སྟངས་རེད། ལྷག་པར་དུ་འབྲེལ་མོལ་ཐེངས་དགུ་བའི་རྗེས་རྒྱ་ནག་གིས་བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་ཡིག་ཆ་དེ་དོན་ཚན་བདུན་གྱི་སྒང་ནས་རང་བཙན་དང་། རྣམ་པ་འགྱུར་བའི་རང་བཙན། ཕྱེད་རང་བཙན་ཡིན་ཚུལ་ང་ཚོའི་མིག་གིས་རིག་ས་དང་རྣ་བས་གོ་ས་ནས་གསལ་བསྒྲགས་བྱས་ཡོད། ད་བར་དུ་ང་ཚོས་འདི་གཉིས་ལ་འགལ་ཟླ་ཡོད་ཚུལ་གང་གླེང་བ་རྣམས་བཙན་བྱོལ་སྤྱི་ཚོགས་ནང་གི་རྩོད་གླེང་ཞིག་ལས་བོད་རྒྱའི་བར་གྱི་རྩོད་གླེང་ཞིག་མ་རེད། དེ་ཡང་གཙོ་བོ་དེ་གཉིས་ཀྱི་ལྟ་གྲུབ་དང་གཞུང་ལུགས་རྐྱང་བའི་སྒང་ནས་གླེང་བ་མ་གཏོགས། གནས་སྟངས་རང་གི་སྟེང་ནས་སུས་ཀྱང་གླེང་ཡོད་པ་མ་རེད་ལ། གླེང་ཤེས་སྟངས་ཀྱང་ཡོད་པ་མ་རེད།

༣༽རྒན་ལགས་ཀྱིས་ཨུ་ཚིགས་བསྐྱོན་གི་འདུག ལམ་དབུ་མ་གང་ཟག་གི་ཆེ་མཐོང་སྒང་ནས་ཡོང་བ་ལས་དོན་ལ་རྟོན་པའམ་ངེས་ཤེས་གསལ་བོ་ཆགས་ནས་ཡོང་མེད་པ་དངོས་ཡོད་གནས་ཚུལ་རེད། འདི་ལ་ངས་གསལ་བཤད་འབྲི་དགོས་དོན་མི་འདུག གསལ་གསལ་ལྷང་ལྷང་རེད་འདོད། གང་ལྟར་རྒན་ལགས་གནོད་ས་དེ་ཁང་གསར་ལགས་ཀྱིས་དབུ་མ་དང་པོ་འདོན་འཇམ་དབྱངས་ནོར་བུ་ཡིན་ན་ཞེས་པའི་དཔེ་འཇོག་དེ་རེད། རང་ཉིད་འདོད་པ་མེད་ས་དང་གནོད་ས་ཞིག་ཡོང་སྐབས་རྒྱུ་མཚན་བཙལ་ནས་ཨུ་ཚིགས་བསྐྱོན་པ་འདི་ལ་གསལ་བཤད་བྱས་ཀྱང་འགྲོ་ས་མེད་པ་གསལ་བོ་རེད།

༤༽བདག་གཞན་མཉམ་བརྗེ་ཟེར་བ་དེ་ཚོ་ངོ་མས་རྒྱ་ཆེན་པོ་དང་གཏིང་ཟབ་པོ་རེད། རྒྱ་ཅི་ཙམ་ཆེ་ཞིང་གཏིང་ཇི་ཙམ་རིང་བ་དེ་ཙམ་གྱིས་མིའི་རྣམ་དཔྱོད་དང་དང་ལེན་སོགས་ཀྱི་སྒང་ནས་ཡོང་ཐབས་ཁག་པོ་རེད། རྒྱ་རིགས་སྤུན་ཟླ་ཟེར་བ་དེ་ཡང་ཚད་མཐོན་པོ་དེ་ཚོས་བཤད་རྒྱུ་ཞིག་རེད་མ་གཏོགས་བོད་དང་བོད་མི་རིགས། རང་ཉིད་བོད་པ་ཞིག་གི་དགའ་སྡང་ཆགས་ཞེན་གྱི་ངོས་ནས་ཚད་དེ་འདྲ་ཞིག་ལ་སླེབས་ཐབས་ཁག་པོ་རེད། ང་ཚོའི་དབུ་ཁྲིད་དང་། རྒྱ་རིགས་དམངས་གཙོ་དོན་གཉེར་བའམ་ཤེས་ཡོན་ཅན་ཚོས་རྩོམ་ཡིག་རེ་ཟུང་གིས་རྒྱ་རིགས་མང་ཚོགས་སྤྱིའི་བོད་ལ་དགའ་སྡང་ཆགས་ཞེན་གང་འདྲ་ཡོད་མེད་ཚབ་མཚོན་ཐུབ་གི་མ་རེད། ཁ་ཐུག་གི་སྐད་ཆའམ། དངོས་ཡོད་གནས་སྟངས་ཀྱི་སྒང་ནས་རྒན་ལགས་དང་ངེད་གཉིས་བསྡུར་བ་ཡིན་ནའང་། རྒྱ་རིགས་ཚོར་འབྲེལ་འདྲིས་དང་། འབྲེལ་ལམ། རྒྱུས་ལོན། དེ་མིན་ཕྱོགས་གང་ཐད་ནས་ང་བཟང་བ་གི་རེད་མ་གཏོགས་རྒན་ལགས་ཡག་གི་མ་རེད། རྟོག་པ་མཐོན་པ་བྱས་ནས་གསུངས་ཀི་ཡོད་ན་གནས་ཚུལ་ལོགས་ཀ་རེད། འོན་ཏེ་རྟོག་པ་མཐོན་པོ་གནང་ས་ང་ཚོའི་ནང་ཁུལ་གྱི་ཁོར་ཡུག་འདི་མ་རེད། སྐུ་ཉིད་ལ་སྐད་ཡིག་གི་བཀག་རྒྱ་མེད་ན་བརྒྱུད་ལམ་ནི་ག་ཚད་དགོས་དགོས་རེད། ཐུགས་ལ་མ་གནོད་རོགས།

༥༽རང་བཙན་རྩོད་མཁན་དང་རང་བཙན་གླེང་མཁན་ཚོར་དཀར་འདོན་གནང་རོགས་ཞེས་རྒན་ལགས་དང་ལུང་རིགས་གཉིས་ཀར་ཞུས་ཡོད། དཀར་འདོན་གནང་སའང་ཁ་གསལ་བོ་བྱས་ནས་ཞུས་ཡོད། ཐ་ན་གང་གཉིས་ཀྱི་རྩོམ་ཡིག་སྔ་མ་དག་གི་ནང་སྤེལ་བའི་རྗོད་པའི་ཚིག་འགྲོས་གཅིག་བུའི་སྟེང་ནས་ཀྱང་དཀར་འདོན་གནང་དགོས་ས་མང་པོ་རེད། དཀར་འདོན་གནང་དང་མི་གནང་དེ་ཁྱེད་རྣམ་གཉིས་ཀྱི་རང་དབང་རེད་མ་གཏོགས་ངས་ཨུ་ཚིགས་གང་ཡང་བྱེད་ཀི་མིན།

དེ་རིང་འདི་ཙམ་ཡིན། ཆུ་ཚོད་མི་འདུག ལས་ཀ་གཞན་པ་ཡོད།

ཉིན་གུང་གི་བར་གསེང་དུ། འཁྱུག་ཙམ་བལྟ་རུ་ཡོང་བ་ཡིན། ཉིན་གུང་ཡོལ་རྗེས་ལས་ཀ་ཡོད་ལ། དེ་རྗེས་ངོ་ཤེས་ཁ་ཤས་དང་འཛོམས་དུས་བཟོས་ཡོད། གནད་དོན་ཁག་ལ་དེ་རིང་དགོང་མོ་ཆུ་ཚོད་ ༩།༡༠ ཙམ་ལ་གསལ་བཤད་ཞུས་ཆོག

འཇིགས་བྲལ་བསྟན་འཛིན་ལགས། ཁྱེད་ཀྱི་བཀའ་མོལ་རྣམས་བཀླགས་པ་ཡིན། སྤྱིར་བཏང་ང་རང་ཡང་གཤིས་སྤྱོད་གཞན་དང་འདྲིས་དཀའ་བ་ཞིག་ཡིན། དགོས་གལ་བྱུང་ན་རིམ་པས་འབྲེལ་བ་བཙུགས་ཆོག

ཅོ་རི་ཉི་མ་ལགས། དོན་གྱི་ཐོག་ཏུ་བབས་ནས་དགོངས་འཆར་གནང་རོགས། ང་ཚོ་དབུས་པ་ཚོ་ལ་གཏམ་དཔེ་ཞིག་ཡོད་རེད། ཆོས་ར་ལ་ཆོས་དང་། གཞས་ར་ལ་གཞས་ཟེར་གྱི་རེད། ད་འབྲེལ་ཡོད་གནད་དོན་རང་གི་སྒང་ལ་གསུངས་རོགས།

ཡིག་ནོར་ཁ་ཤས་མཐོང་སོང་། རྩོམ་སྒྲིག་པས་ཞུ་བཅོས་ཤིག་ངེས་པར་གནང་རོགས།

༡》 ངས་འདི་ནས་བྲེལ་འཚབ་ཀྱིས་བྲིས་སྟབས་དབྱངས་མང་པོ་ཞིག་ཉིས་བརྩེགས་བྱུང་འདུག

༢》 དོན་ཚན་ ༣༽ པའི་ནང་གསེས་དོན་ཚན་གཉིས་པ། 《གཉིས་པ། ཏཱ་ལའི་བླ་མ་སྐུ་པྲེང་བཅུ་བཞི་པ་ཆེན་པོས་སྔ་མོ་མཛད་པའི་བདེན་གསོལ་སྨོན་ཚིག་གི་ནང་།》ཞེས་པའི་སྐུ་པྲེང་དེ་སྐུ་ཕྲེང་ལ་བཅོས་རོགས།

༣》 དོན་ཚན་༤༽ དུམ་མཚམས་གཉིས་པའི་མཇུག་དེར། 《དེ་ལ་དོན་ངོ་མའི་རང་སྐྱོང་ཟེར་ཡིན་དཀའ་བ་》ཞེས་པ་དེ། 《དེ་ལ་དོན་ངོ་མའི་རང་སྐྱོང་ཡིན་དཀའ་བ་》 ཞེས་བཅོས་རོགས།

༤》 དོན་ཚན་ལྔ་པའི་འགོ་དེར། 《ལས་འགན་ཆ་ཤས་ལ་ཆ་ཚང་མ་སྒྲུབ་པ་རེད། 》ཅེས་པ་དེ་《ལས་འགན་ཆ་ཤས་ལས་ཆ་ཚང་མ་སྒྲུབ་པ་རེད། 》ཅེས་བཅོས་རོགས།

དྲྭ་རོགས་ཚོ། རྒྱབ་སྐྱོར་གནང་ནའང་འདྲ། དགག་པ་གནང་ནའང་འདྲ། དགོངས་འཆར་གསུངས་ནའང་འདྲ། དོན་དག་རང་གི་སྒང་ལ་གསུངས་རོགས། དེ་མིན་རང་ཅག་ཚང་མའི་དུས་ཚོད་དང་ནུས་པ་ཆུད་ཟོས་རེད། དོན་མེད་བཤད་བསྡད་པ་ལས་བོད་ནང་ས་ཡོམ་འོག་གྲོངས་པ་ཚོའི་ཆེད་མ་ཎི་ཁ་ཤས་བསགས་ན་ཡག་གི་རེད།

ཁང་གསར་རྡོ་རྗེ་ལགས། ཁྱོད་རང་ལ་ཁ་སྙན་གྱི་ངོ་བསྟོད་རྩ་བ་ནས་མིན། གཤམ་གྱི་སྐད་ཆ་འདི་དག་ལ་དགོངས་པ་བཞེས་ནས་ལན་ཞིག་གནང་རོགས།

འདི་ལྟར་གནད་ལ་ཕིག་ཅིང་དོན་ལ་འབྱོར་བའི་བསམ་ཚུལ་འདི་ཚོ་ཀློག་དུས་བདག་གི་ཡིད་ལ་གསར་སྐྱེས་ནང་ད་དུང་བོད་མི་འདུག་ཨང་བསམ་ནས་སེམས་ཤུགས་འཕེལ་གྱི་འདུག བློ་སྐྱེད་ཐོབ་ཀྱི་འདུག

གུ་ཡངས་དཀྱེལ་ཆེ་ཟེར་བ་ཞིག་བརྗོད་ཀྱི་འདུག་པ་འདི་འདྲ་ལ་ཟེར་བ་མིན་ནམ་སྙམ། འདི་ལྟར་ཁྱོད་ཉིད་ཀྱི་རྩོམ་ཡིག་འདི་དག་ཀློག་སྐབས་རང་ཉིད་ཀྱི་སེམས་ནང་དུ་ཡང་ཡང་འཁོར་བའི་དྲི་བ་མང་དག་ཅིག་ཁྱོད་རང་ལ་འདྲི་འདོད་སྐྱེ།

དེང་སྐབས་ངས་བསམ་ཚུལ་རེ་འབྲི་སྐབས་ཁྱོད་རང་གི་བསམ་ཚུལ་དེ་ཚོ་ཡིད་ལ་འཁོར་གྱི་འདུག འདིའི་ཐད་ཁྱོད་རང་ལ་བསམ་ཚུལ་གང་ཡོད་ན་སེམས་ཀྱི་འདུག
གནད་འགག་རེ་ལ་ཐུག་དུས་དྲི་བ་རེ་སླེབས་ཡོང་གི་འདུག བདག་གི་ཁོར་ཡུག་ན་ཡོད་པའི་རང་དང་འདྲ་བའི་གྲོགས་པོ་ཚོར་གྲོས་བསྡུར་རེ་བྱེད་ཀྱི་ཡོད།

རིགས་པས་བདག་གི་སེམས་ཀྱི་འཛིན་ཕྱོགས་མང་པོ་ཞིག་འཆང་ཡུལ་མེད་པར་གཏོང་དུས་ང་རང་ཉིད་ལ་ཡིད་མུག་སྐྱེ་ཡི་འདུག ཡིན་ནའང་ངའི་སེམས་ན་རྒྱུ་ཞིང་སྙིང་ལ་ཉལ་བའི་དྲི་བ་སྐོར་ཅིག་ལ་ལན་བློ་ཡིད་ཚིམས་པ་ཞིག་ཐོབ་ཀྱི་མི་འདུག ངའི་དྲི་བ་འདི་ཚོ་དྲ་ཐོག་ནས་གླེང་རྩ་བ་ནས་ཤེས་ཀྱི་མི་འདུག

ངའི་སྐད་ཆ་འདི་དག་ཨ་གསར་ཞིག་ཏུ་མ་དགོངས་རོགས། ང་ཁྱོད་རང་ལ་འབྲེལ་ལམ་ཞིག་འཛུགས་འདོད་ཆེ། གལ་ཏེ་དགག་བྱ་མེད་ན་མེད་ལན་ཞིག་གནང་རོགས་ཞུ།