ང་ཚོ་ཚང་མས་མགོ་བོ་ས་ལ་གཏུགས་ཏེ་མྱ་ངན་ཞུ།

ལྕགས་མོ་མཚོ་ཞུ་བ་ཞིག་གིས་འདི་འདྲ་ཞིག་བྲིས་འདུག “ཞོགས་པ་དེར། ཚོགས་ན་ཞལ་འདོན་སྐྱོར་བཞིན་པའི་གྲྭ་བ་དེ་ཚོ། ཞོགས་པ་དེར། སློབ་ཁང་དུ་ཀ་ཁ་གྱེར་བཞིན་པའི་སློབ་ཕྲུག་དེ་ཚོ། ཞོགས་པ་དེར། བསྐོར་ལམ་ན་མ་ཎི་སྐོར་བཞིན་པའི་རྒན་རྒོན་དེ་ཚོ། འདི་ལྟར་ས་ཆེན་འགུལ་བསྐྱོད་གཅིག་གིས་ཁྱུར་མིད་བྱས”  ཞེས་བྲིས་འདུག ངོ་མ་སེམས་སྐྱོ་ནི་ཞིག་རེད་ཟེར།

ཁ་སང་ཕྱི་ཚེས་ ༡༡ ཉིན་རྒྱ་གར་ལྷོ་ཕྱོགས་སེར་བྱེས་གྲྭ་ཚང་གིས་ཡུལ་ཤུལ་སྐྱེ་རྒུ་མདོའི་ས་ཡོམ་གྱི་གོད་ཆག་ཐད་བདུན་ཚིགས་བཞི་བའི་བསྔོ་སྨོན་མཆོད་འབུལ་རྒྱ་ཆེན་པོ་ཞིག་གནང་ཡོད་པ་དང་། སྐབས་དེར་དགེ་འདུན་པ་ཨ་རིག་དགེ་མཐོང་དང་འཇམ་དབྱངས་གཉིས་ཀྱིས་སྐྱེ་རྒུ་མདོའི་ས་ཡོམ་གྱི་གོད་ཆག་ཐད། བོད་ཕྱི་ནང་གཉིས་ཀྱི་དྲ་ཚིགས་ཁག་ལས་བསྡུ་སྒྲིག་བྱས་ཏེ། བོད་གཞིས་བྱེས་གཉིས་དང་། ཕྱི་རྒྱལ་ཡུལ་གྲུ་ཁག་གི་བོད་རིགས་རྩོམ་པ་པོ་དག་གིས་བྲིས་པའི་གདུང་སེམས་མཉམ་སྐྱེད་དང་། སེམས་གསོ་མཚོན་པའི་སྙན་རྩོམ་ཁག་ཅིག་ཕྱོགས་སྒྲིག་བྱས་ཏེ། ༼ མགོ་བོ་བཏུད་དེ་མྱ་ངན་ཞུ ༽ ཞེས་པའི་དཔེ་དེབ་ཅིག་འདོན་སྤེལ་བྱས་ཡོད་འདུག ཨ་རིག་དགེ་མཐོང་ལགས་ཀྱིས་བརྗོད་ན། སྐྱེ་རྒུ་མདོའི་ས་ཡོམ་གོད་ཆག་ཐད་དངུལ་དངོས་ཀྱི་རོགས་སྐྱོར་བོད་ནང་གི་རྒྱ་ཆེའི་མང་ཚོགས་གཙོས་པའི་འཛམ་གླིང་གང་ས་ནས་འབྱོར་གྱིན་འདུག སྨྱུག་ཐོགས་པ་ཚོའི་ངོས་ནས་སེམས་ཀྱི་རོགས་སྐྱོར་མཚོན་ཆེད་སྙན་རྩོམ་ཕྱོགས་སྒྲིག་གི་དཔེ་དེབ་འདི་བཏོན་པ་ཡིན་ཟེར།

དཔེ་དེབ་འདིའི་སྔོན་གླེང་ནང་ཨ་རིག་དགེ་མཐོང་ལགས་ཀྱིས་བཀོད་དོན། རང་ནུས་ཀྱིས་ལྕོགས་ཚོད་དང་བསྟུན་ནས་༼ མགོ་བོ་བཏུད་དེ་མྱ་ངན་ཞུ ༽ ཞེས་པའི་རྗེས་དྲན་གྱི་དེབ་ཅིག་འདོན་སྤེལ་བྱ་རྒྱུ་བྱས་པ་ཡིན། རི་ཆུ་སྟོང་ཕྲག་གིས་བར་ཐག་ཆོད་པའི་ཕྲན་ལ་མཚོན་ན། སེམས་སྡུག་ནས་མིག་ཆུ་བཞུར་རྒྱུ་དང་ཡིད་མུག་ནས་འདང་རེ་རྒྱག་རྒྱུ་ལས་མི་འདུག འོན་ཀྱང་མིག་ཆུ་གཙང་བོར་འདྲེས་ཀྱང་ཁྱེད་ཅག་གི་མྱ་ངན་སེལ་མི་ཐུབ་ལ། སྐྱོ་གདུང་རི་བོར་བརྩེགས་ཀྱང་ང་ཡི་སེམས་པ་འང་ཅི་ལྟར་རྟོགས། དེས་ན་འདས་གྲོངས་སུ་ཕྱིན་པ་རྣམས་ལ་རྗེས་དྲན་དང་། མནར་གཅོད་ཀྱི་སྡུག་བསྔལ་མྱོང་བཞིན་པའི་ཤུལ་ལྷག་ཚོར་སེམས་གསོའི་ཕྱིར་ཏུ། བོད་ཕྱི་ནང་གི་རྩོམ་པ་པོ་དང་བསམ་བློ་པ་ཚོའི་སེམས་ཚོར་དམར་རྗེན་མ་དག་དྲག་འདེམས་ཀྱི་རྩོམ་དེབ་ཅིག་བཏོན་ན་དགེ་ཕན་དང་། ལོ་རྒྱུས་ཀྱི་ཡིག་ཚང་ནས་ནམ་ཡང་མི་ཡལ་བ་དེ་རེད་སྙམ། དེའི་ཕྱིར་དཔལ་འབྱོར་གྱིས་གནོད་ཤུགས་ལ་མགོ་མ་བསྒུར་བར་ངེད་གྲོགས་པོ་ཟུང་གིས་བློ་ཐག་གཙང་བཅད་ཀྱིས་ལས་ཀ་འདི་ལ་འབད་པ་ཡིན། ཡང་རྩོམ་ཡོང་སྟངས་ཆ་ནས་ཀྱང་རྩོམ་པ་པོ་ཚོར་མ་སྐུལ་དང་བླངས་ཀྱིས་ཕྱག་རྩོམ་ཕུལ་བ་ལས། ནམ་རྒྱུན་ལྟར་བླ་མ་དང་དཔོན་པོ་རེའི་ཕྱིར་ཏུ་རྗེས་དྲན་གྱི་དེབ་འདོན་སྐབས་རྩོམ་པ་པོ་གྲགས་ཅན་ཚོ་ལ་ཞུ་བ་འཐེན་དགོས་པ་དང་། གསལ་བསྒྲགས་བཀྲམ་པ་སོགས་ཀྱི་ངལ་བ་བྱས་མེད། ཅེས་བྲིས་འདུག

དེབ་དབུ་འབྱེད་དབུ་འབྱེད་དང་སྤྲགས་སེར་བྱེས་མཁན་རིན་པོ་ཆེ་ཅཱརྱ་བློ་བཟང་དཔལ་ལྡན་མཆོག་གིས་གསུངས་བཤད་གནང་དོན། དེ་རིང་འཇམ་དབྱངས་དང་ཨ་རིག་དགེ་མཐོང་གཉིས་ཀྱིས་དཔེ་དེབ་ཅིག་བཏོན་འདུག དེབ་འདི་ནམ་རྒྱུན་གྱི་དེབ་དང་མི་འདྲ་བར་མི་ཚང་མར་ཚོར་བ་སྤྲོད་ཐུབ་པ་ཞིག་རེད། དེ་རིང་སེར་བྱེས་ཀྱི་མཛད་རིམ་དང་བསྟུན་ནས་བློ་གསལ་བ་ཁོང་གཉིས་ཀྱི་དཔེ་དེབ་སྒོ་འབྱེད་གནང་རྒྱུ་རེད། འདིའི་ནང་༧གོང་ས་མཆོག་གི་ཐུགས་གསོའི་གསུང་འཕྲིན་དང་འབོལ་སྐུལ་གྱི་བཀའ་སློབ། དཔལ་རྒྱལ་བ་ཀརྨ་པ་མཆོག་གི་ཐུགས་གསོའི་སྙན་རྩོམ། དེ་བཞིན་བོད་ཕྱི་ནང་གི་མཁས་དབང་རྣམས་ཀྱི་གདུང་སེམས་མཉམ་སྐྱེད་ཀྱི་རྩོམ་ཡིག་ཁག་འཁོད་ཡོད། འདི་དག་རྩོམ་པ་པོ་རྣམས་ཀྱི་སེམས་གསོ་དང་སྐབས་ཐོག་གི་སྡུག་བསྔལ་གསལ་བོར་མཚོན་པའི་རྩོམ་ཡིག་ཞེ་གཅིག་ཡིན། འདི་མ་འོངས་པའི་དྲན་རྟེན་ཆགས་ངེས་རེད། དེ་རིང་རྩོམ་སྒྲིག་པ་ཁོང་གཉིས་དང་ང་ཚོ་ཚང་མས་སྒ་སྐྱེ་རྒུ་མདོའི་ཆག་འཇིག་ལ་ལུས་ཀྱི་མགོ་བོ་ས་ལ་གཏུགས་ནས་མྱ་ངན་དང་གདུང་སེམས་མཉམ་སྐྱེད་ལྷན་ཅིག་དུ་བྱ། ཞེས་གསུངས་སོང་།

སེར་བྱེས་དགེ་བསྐོས་དགེ་བཤེས་ལྷ་རམས་པ་མངའ་རིའི་ཚེ་དབང་མཆོག་གིས་གསུངས་དོན། དེ་རིང་འདིར་སེར་བྱེས་ཀྱི་སློབ་གཉེར་བ་དང་དཔེ་ཆ་པ་བྱ་བྲལ་ཨ་རིག་དགེ་མཐོང་དང་བསམ་འཇམ་དབྱངས་གཉིས་ཀྱིས་དེབ་ཅིག་བཏོན་འདུག འདིའི་ནང་བོད་ནང་གི་མཁས་པ་དང་རྩོམ་པ་པོ། ཨ་རི་དང་ཡུ་རོབ་ཁུལ་བཅས་ཀྱི་བོད་རིགས་ཚོས་བྲིས་པའི་རྩོམ་ཡིག་མང་པོ་ཞིག་བསྡུས་ཡོད། ནམ་རྒྱུན་དང་མི་འདྲ་བར་སེམས་ཚོར་ཆེན་པོས་བྲིས་པ་རྐྱང་རྐྱང་རེད། འདི་ཕྱི་རྒྱལ་ཁག་དང་བོད་ནང་ལ་ཁྱབ་བསྒྲགས་བྱ་དགོས་པ་རེད། སྐྱེ་རྒུ་མདོའི་མི་མང་ལ་གདུང་སེམས་མཉམ་སྐྱེད་དང་སེམས་གསོ་ཏན་ཏན་ཐེབས་ངེས་རེད། སེམས་ཀྱི་རྨ་ཁ་གསོ་ཐུབ་པ་ལྟ་བུ་ཞིག་ཡོང་གི་རེད། བྱེས་ཡུལ་བོད་མི་ཚོས་བོད་ནང་གི་སྤུན་ཟླ་ཚོར་གདུང་སེམས་མཉམ་སྐྱེད་བྱ་ཐུབ་སོང་སྙམ་པ་ཞིག་འདུག

 ང་རང་གིས་དེབ་འདི་བཀླགས་པ་ཡིན། ལྕགས་མོ་མཚོ་ཞུ་བ་ཞིག་གིས་འདི་འདྲ་ཞིག་བྲིས་འདུག “ཞོགས་པ་དེར། ཚོགས་ན་ཞལ་འདོན་སྐྱོར་བཞིན་པའི་གྲྭ་བ་དེ་ཚོ། ཞོགས་པ་དེར། སློབ་ཁང་དུ་ཀ་ཁ་གྱེར་བཞིན་པའི་སློབ་ཕྲུག་དེ་ཚོ། ཞོགས་པ་དེར། བསྐོར་ལམ་ན་མ་ཎི་སྐོར་བཞིན་པའི་རྒན་རྒོན་དེ་ཚོ། འདི་ལྟར་ས་ཆེན་འགུལ་བསྐྱོད་གཅིག་གིས་ཁྱུར་མིད་བྱས”  ཞེས་བྲིས་འདུག ངོ་མ་སེམས་སྐྱོ་ནི་ཞིག་རེད། རྩོམ་སྒྲིག་པ་ཁོང་གཉིས་ཀྱིས་དེབ་འདི་ཕྱོགས་བསྒྲིགས་ནང་ཐུབ་པ་ལ་ཐུགས་རྗེ་ཞུ་རྒྱུ་ཡིན། སྐྱབས་རྗེ་མཁན་རིན་པོ་ཆེ་ཡིས་ཧིན་སྒོར་ལྔ་སྟོང་དང་། བསམ་བློ་ཁང་ཚན་གྱི་ཨ་ལགས་རིན་པོ་ཆེ་ཡིས་སྒོར་བདུན་སྟོང་གི་ཞལ་འདེབས་ཕུལ་འདུག འདིར་སེར་བྱེས་དགེ་འདུན་པ་ཡོངས་ཀྱི་ཚབ་བྱས་ཏེ་ཧིན་སྒོར་གཅིག་ཁྲི་ཞལ་འདེབས་ལ་ཕུལ་བ་ཡིན། ཁྱེད་གཉིས་ཀྱིས་དུས་ཚོད་ཐུང་ཐུང་རིང་ལས་ཀ་འདི་འདྲའི་རླབས་ཆེན་ཞིག་བསྒྲུབས་པར་དམིགས་བསལ་གྱིས་ཐུགས་རྗེ་ཆེ་ཞུ་རྒྱུ་དང་། ང་ཚོ་སེར་བྱེས་གྲྭ་ཚང་ནང་འདི་འདྲའི་རྩོམ་འབྲི་ཤེས་མཁན་ཡོད་པར་དགའ་བསུ་དང་རྗེས་སུ་ཡི་རངས་བསྔགས་བརྗོད་ཡོད། ང་ཚོ་དབུ་ཆོས་རྣམ་གསུམ་ཕྱག་མཛོད་དང་བཅས་བའི་ངོས་ནས་རྗེས་སུ་ཡི་རངས་ཞུ་བཞིན་ཡོད། ཅེས་གསུངས་བྱུང་།