མཚོ་མགོ་བ་ཨཱཅཱརྱ་པདྨ་རྡོ་རྗེ།
ཆབ་སྲིད་ཀྱི་བྲོ་བ་མྱང་འདོད་ལྟ་ཅི། དྲི་མ་ཙམ་ཡང་སྣོམ་འདོད་མེད་པས་བཙན་བྱོལ་བོད་མིའི་ཆབ་སྲིད་དང་འཚོ་ཐབས་ལ་ཐེ་བྱུས་བྱེད་པ་ནི་མིག་མེད་ལོང་བ་ཞིག་གིས་མིག་ལྡན་སྣེ་འཁྲིད་བྱས་པ་དང་ཅིས་མི་མཚུངས། འོན་ཀྱང་རྒྱལ་བའི་ཐུགས་རྗེའི་འོད་ཟེར་གྱིས་བྱིན་གྱིས་རླབས་ཤིང་ངྷ་རམ་ས་ལའི་རི་གཤོངས་སུ་བསླངས་པའི་མང་གཙོའི་ཀ་བ་གསུམ་པོ་དེ་བཞིན་མི་ཉམས་རྒྱུན་འཛིན་བྱེད་ཐུབ་དང་མི་ཐུབ། ལོ་རྒྱུས་ཀྱི་ཁ་ཕྱོགས་གང་དུ་བསྐྱོད་དང་མི་བསྐྱོད་སོགས་ཀྱི་ཐག་གཅོད་ནི། མགོ་འཛིན་རྣམས་ཀྱི་གཤིས་སྤྱོད་ལ་རག་ལས་པ་ལས་མི་དམངས་ཀྱི་བསམ་ཚུལ་དང་འོས་ཤོག་གྲངས་བཤེར་ལ་ནུས་པ་གང་ཡང་མེད་སྟབས། གང་ཟག་སོ་སོའི་མཐོང་སྣང་ལ་ཀ་བ་གསུམ་པོའི་སྲུང་མར་བསྐོ་གཞག་འདི་འདུག་སྙམ་པའམ། སུ་ཞིག་བསྐོ་དགོས་སམ་སྙམ་པའི་སོམ་ཉི་ལ་གནས་པའམ། ཡང་ན། འདུ་ཤེས་ཅི་ཡང་མེད་པར་རང་ཉིད་ཀྱི་འཚོ་བར་རོལ་བ་འབའ་ཞིག་ཏུ་གནས་པ་སོགས་གནས་བབ་ཅི་འདྲ་ཞིག་ཡིན་རུང༌། ལྷ་སྲུང་མར་བསྟེན་ན་རང་གཞན་ཐམས་ཅད་ལ་བདེ་སྐྱིད་དང༌། འདྲེ་སྲུང་མར་བསྟེན་ན་རང་གཞན་ཐམས་ཅད་སྟོང་པའི་རྒྱུ་ཡིན་པ་བློ་ངོར་ཆུད་པར་བྱས་ཏེ་འོས་ཤོག་མི་འཕེན་པའི་སྔོན་ཚུད་ནས་ཀ་བ་གསུམ་སྤྱི་དང༌། ལྷག་པར་འཛིན་སྐྱོང་བཀའ་ཤག་གཞལ་ཡས་ཁང་གི་ཁྲི་བཟང་མཐོན་པོའི་སྟེང་དུ་བསྐོ་གཞག་བྱ་རྒྱུའི་སྲུང་མ་དེ་བཞིན་ལྷ་འདྲེ་གང་ཡིན་བརྟག་དཔྱད་ནན་པོ་བྱེད་དགོས་པར་མཐོང༌།
ངོ་མ། བོད་མི་སྤྱི་བོ་གནམ་བསྟན་ཡོངས་ལ་ཉེ་རིང་གི་དྲི་མས་མ་གོས་པར་རང་ཁྱིམ་གྱི་ཨ་མས་བུ་ཕྲུག་ལྟར་གཅེས་པར་འཛིན་ཅིང་ཤེས་འཇོན་གཉིས་ལྡན་གྱི་མི་སྣ་ཞིག་རག་ཐབས་ཀྱིས་འཚོལ་ཞིབ་བྱ་རྒྱུ་དེ་ཡང་རེ་བ་ཞིག་ཡིན། ཡང་ཁ་ཤས་ཀྱིས་དེང་དུས་འཛམ་གླིང་སྤྱི་ཡོངས་ཀྱི་འགྱུར་འགྲོས་དང་བསྟུན་ཏེ། གཞོན་སྐྱེས་ལ་གོ་སྐབས་འབུལ་དགོས་ཞེས་ཤོད་ཀྱི་ཡོད། རེད་ཨ། བོད་མིའི་མངོན་འདོད་སྒྲུབ་རྒྱུའི་ཤེས་ཡོན་དང༌། འཇོན་ཐང༌། སྙིང་སྟོབས། འདུན་པ་ཡོད་པ་ཞིག་ཡོད་ན། གང་གི་འགྲོ་ཆགས་འདུག་གསུམ་སྔ་དེང་གང་གི་ཁོངས་སུ་གཏོགས་དང་མི་གཏོགས། སྐད་རིགས་སྨྲ་བའི་དབང་ཕྱུག་ཡིན་དང་མིན་ལ་ཁྱད་པར་གང་ཡང་མེད། འོན་ཀྱང་འོས་འདེམས་བྱ་རྒྱུའི་གོ་སྐབས་དང་ཐོབ་དབང་ཡོད་པ་ཐམས་ཅད་ཀྱིས་དེ་སྔ་ང་ཚོས་བདམས་ཟིན་པའི་སྤྱི་འཐུས་དང་ས་གནས་མགོ་འཛིན་སོགས་ཀྱིས་རང་ཉིད་འདེམས་ཐོན་བྱུང་བ་ན་དུས་ནས་དུས་སུ་བོད་མི་རིགས་དགའ་དགོས་པའི་ལས་དོན་ཅི་དང༌། ངུ་ཤོར་དགོས་པའི་ལས་དོན་ཅི་བྱས་སོགས་འདས་པའི་གནས་ཚུལ་རྣམས་ཞིབ་ཕྲ་མིག་འོག་ཏུ་ཆུད་པའི་ཐོག་ནས་ཕྱི་ལོ་ ༢༠༡༡ ལོའི་ནང་བསྐོ་འགྱུར་གྱི་བཀའ་ཁྲི་དེ་བཞིན་གཟབ་ནན་ཐོག་འོས་འདེམས་བྱེད་དགོས་པ་ལས། ཁ་ནས་ཁྲིམས་ཀྱིས་དབང་བསྒྱུར་ཞེས་ཤོད་ཀྱང་དོན་དངོས་ཐོག་དུས་ད་ལྟ་ཡང་བཙན་པོ་དང་བཀའ་བསྒོས་རྒྱུན་འཛིན་གྱི་ལོ་རབས་སུ་རང་འཇགས་གནས་པའི་བཟོ་འདྲ་ཞིག་དང༌། རང་ཉིད་ཀྱི་སྐྱིད་སྡུག་དང་འབྲེལ་བའི་རང་ཕྱོགས་ལ་ཡོད་ཚད་ཐམས་ཅད་བྱེད་མཁན་དང༌། གཞན་དེར་མཐོང་ཆུང་དང་བརྗིད་ཉམས་བསྟན་ཏེ་ཞུ་གཏུགས་བྱེད་མི་འདྲོག་ཏུ་འཇུག་མཁན་ཡང་ཡོད། ཕྱོགས་གཅིག་ནས་བལྟས་ན། ཁོ་པ་ཚོའི་བསོད་ནམས་དང་དབང་ཐང་ཡིན་སྲིད་མོད་ཀྱང༌། གཅིག་ཤོས་སུ་ངོ་ཤེས་དང་མི་ཤེས། ཤེས་ཡོན་ལྡན་དང་མི་ལྡན། གོ་ས་ཡོད་དང་མེད། འབྱོར་བ་ལྡན་དང་མི་ལྡན། ཁ་བསང་ཐུབ་དང་མི་ཐུབ། བརྙས་བཅོས་འཁུར་ཐུབ་དང་མི་ཐུབ་སོགས་བོད་མི་ཐམས་ཅད་ཀྱི་བདེ་སྡུག་ཞུ་ས་ཞིག་ཏུ་བསྐོ་གཞག་བྱས་པའི་སྤྱི་མི་ཞིག་ཡིན་པ་དྲན་པ་མ་བརྗེད་པ་བྱེད་དགོས་པར་མཐོང༌།
ད་ལྟའི་ཆར་དྲ་རྒྱ་དང་གསར་ཤོག་ཁག་ཏུ་འབྱུང་འགྱུར་བཀའ་བློན་ཁྲི་པའི་འོས་མི་མང་དག་ཅིག་གི་ལོ་རྒྱུས་དྲིལ་བསྒྲགས་གནང་ཡོད་ཀྱང༌། བོད་མི་རིགས་ལ་ཞབས་འདེགས་སྒྲུབ་ཁུལ་གྱིས་རང་ཁོངས་གཞིས་ཆགས་ལྟ་བུ་བོད་མི་ཉུང་ཤས་ཤིག་གི་བདེ་སྡུག་ཙམ་པོ་བའི་སླད་དུ་ཁ་རྩོད་དང་ཁ་བདེ་པོ་ཤོད་ཐུབ་པ་ཙམ་ཞིག་ལ་བསྔགས་བརྗོད་དང༌། ཡག་པོ་ཡོད་ཤག་བརྩི་བ་ནི། མཐོང་བ་གཙོ་འཛིན་བྱེད་པའི་དུས་རབས་གསར་པ་འདིར་སྐྱོན་ཆ་ཞིག་ཏུ་བརྩི་གི་ཡོད་པས། གཞན་ནས་ཐོས་པ་ལྟ་ཅི། རང་གིས་མཐོང་བ་དེ་ཡང་སྒྲོ་འདོགས་དང་སྐུར་འདེབས་གང་ཡིན་མཐོང་ཐོས་གཉིས་ཀའི་ཐོག་རྩིང་ཞིབ་གཉིས་ཀྱིས་མཐར་འཁྱོལ་བའི་བརྟག་དཔྱད་བྱ་རྒྱུ་ནི་ཤིན་ཏུ་གལ་ཆེ།
རྩ་བའི་མང་གཙོའི་ལམ་ལུགས་ནང་སྲིད་འཛིན་དང་སྲིད་བློན་དུ་བསྐོ་གཞག་བྱས་པའི་གང་ཟག་ཅིག་གིས་རྒྱལ་ཁབ་དང་མི་རིགས་ཀྱི་མངོན་འདོད་སྒྲུབ་མི་ཐུབ་ཚེ། ལོ་ལྔ་མ་ཚང་བའི་སྔོན་ནས་ཕྱིར་འཐེན་བྱས་ཏེ་གསར་པ་བསྐོ་གཞག་བྱ་རྒྱུའི་ཐོབ་དབང་ཡོད་པ་གོར་མ་ཆག་ཀྱང༌། ང་ཚོ་བཙན་བྱོལ་བའི་གནས་བབ་འདིར་གང་ཟག་གཅིག་གིས་ང་ཚོའི་སྐར་མ་གཅིག་འཕྲོ་བརླག་བཏང་བ་ཡིན་ནའང་རྒྱལ་ཁབ་གཞན་གྱི་གྱོང་གུད་ལ་འགྲན་ཐབས་མེད་པ་ཞིག་ཡིན་སྟབས། གང་ཟག་དེ་བཀའ་ཁྲིར་བསྐོས་ན་ཇི་ལྟར་ཡོང་ངམ་སྙམ་པའི་ཚོད་ལྟ་བྱ་ས་ཞིག་ཀྱང་མིན་པ་ར་འཕྲོད་དགོས། ཆབ་སྲིད་པ་ཚོས་རྩ་ཁྲིམས་རིན་པོ་ཆེ་ལུང་དྲངས་ཏེ་གང་ཟག་གཅིག་གིས་བཀའ་ཁྲི་ལོ་བཅུ་ལས་གནང་མི་ཆོག་པར་མ་ཟད། གལ་ཏེ་ལོ་བཅུ་ལས་བརྒལ་ཏེ་ཕྱག་ལས་གནང་བ་ཡིན་ན། རང་བཙན་ལྡན་པའི་རྒྱལ་ཁབ་སྤྱི་དང༌། ལྷག་པར་རང་རེའི་ཁ་གཏད་རྒྱ་ཕྱོགས་ནས་བཙན་བྱོལ་གྱི་མང་གཙོ་དེ་མང་གཙོ་ཚད་ལྡན་ཞིག་མ་ཡིན་པའི་སྐྱོན་བརྗོད་བྱེད་ངེས་ཞེས་གཏམ་བསྒྲགས་ཀྱང༌། ཅོལ་ཆུང་ངས་བལྟས་ན། དགག་ཆ་ལ་ལྟོས་ཏེ་དགོས་པ་གཙོ་ཆེ་ཞེས་པ་ལྟར་དགག་ཆ་དགོས་པར་གཟིགས་དགོས།
དོན་དངོས་ཐོག་གཞན་གྱི་སྐྱོན་བརྗོད་ལ་འཇིགས་སྣང་དང་འཚེར་སྣང་སྤུ་ཙམ་ཞིག་ཡོད་ན། དྷ་སའི་བརྙན་འཕྲིན་དང༌། དྲིལ་བསྒྲགས་ཀྱིས་འགྲེམས་སྤེལ་གནང་བཞིན་པའི་འོད་ལྡེར་ཁག་བརྒྱུད་ནས་གྲོས་ཚོགས་ཀྱི་ཚོགས་དུས་སྐབས་གླེང་མོལ་ཇི་ལྟར་གནང་བཞིན་པ་དེ་དག་ལ་གཟིགས་ན་ཤེས་ཐུབ་པས། གཏམ་གླེང་དེ་དག་ཡིད་ཀྱི་དཀྱིལ་འཁོར་དུ་ཤར་ཡང་རྒྱལ་ཁབ་དང་མི་རིགས་ལ་བསམ་ཤེས་ཀྱིས་གྲེ་བར་བསྐྱིལ་ཏེ་སྨྲ་སྒོ་ནས་མ་ཕྱུང་མེད་ན་ད་གཟོད་ཅི་འདྲའི་མི་མཛེས་སམ། གང་ལྟར་ཇི་སྲིད་བཙན་བྱོལ་དུ་གནས་པ་དེ་སྲིད་དུ་རྩ་ཁྲིམས་རིན་པོ་ཆེའི་ནང་འཁོད་པའི་ཚིག་འབྲུ་རེ་རེ་བཞིན་ལག་བསྟར་བྱེད་ཐུབ་པ་ཞིག་ད་ལྟའི་བར་བྱུང་མེད་ལ། སླད་མར་ཡང་ཡོང་ཐབས་བྲལ་བ་ཞིག་ཡིན་གཤིས། ཤེས་འཇོན་ཉམས་གསུམ་ལྡན་ཞིང་འཛམ་གླིང་གི་འགྱུར་གྲོས་དང་མཐུན་པའི་ལམ་བུར་བོད་མི་རིགས་སྣེ་འདྲེན་བྱེད་ཐུབ་མཁན་གྱི་གང་ཟག་ཅིག་ཡིན་ཚེ་ལོ་ངོ་བཅུ་མ་གཏོགས་ལོ་ངོ་བཅོ་ལྔ་ཉི་ཤུར་བསྐོ་གཞག་བྱས་ཀྱང་སྐྱོན་ཆ་ཅི་ཡོད།
ཕྲན་གྱིས་ཉན་སྟངས་ནོར་བ་མིན་ན། སྐབས་ ༡༢ པའི་གྲོས་ཚོགས་ཀྱི་ཚོགས་དུས་ཤིག་ཏུ་ྋགོང་ས་མཆོག་གི་བཀའ་སློབ་བཀྲིན་སྩལ་བའི་ནང་དོན་དུ། རྩ་བའི་གང་ཟག་གཅིག་གིས་བཀའ་བློན་གནང་རྒྱུའི་དུས་ཚོད་གཙང་རྗེས་མུ་མཐུད་འོས་འདེམས་བྱེད་མི་ཆོག་ཀྱང༌། ང་ཚོའི་མང་གཙོ་འདི་མང་གཙོ་གཞན་དང་མི་འདྲ་བར་མ་ཟད། མི་ཡང་ཉུང་ཉུང་ཡིན་ཙང་དེའི་ཐོག་བསམ་བློ་གཏོང་རྒྱུ་ཡོད་ཅེས་གསུངས་པ་ཞིག་ཁོ་བོའི་བློ་ངོར་དྲན་བཞིན་འདུག དེས་ན་ཁོ་བོས་བལྟས་ཀྱང་བོད་ཀྱི་ཆབ་སྲིད་ཤིན་ཏུ་ཉག་ཕྲ་བའི་དུས་ཡུན་འདིར་མང་གཙོའི་འགྲོ་ལུགས་ཨུ་ཚུགས་མཐར་སྐྱེལ་མིན་པར་ཆབ་སྲིད་སྤྱི་དང༌། ཁྱད་པར་རྒྱ་བོད་གཉིས་ཀྱི་ཆབ་སྲིད་ཀྱི་འགྱུར་འགྲོས་ལ་མཁྱེན་རྒྱ་ཡངས་ཤིང་རང་དོན་ཁྱད་དུ་བསད་དེ་ཞབས་འདེགས་སྒྲུབ་འདོད་ཡོད་མེད། རང་ཉིད་ཀྱི་འཇོན་ཐང་དང་ནུས་ཤུགས་ཐམས་ཅད་ཁ་ཞེ་གཉིས་མེད་ཀྱིས་བོད་དོན་བདེན་མཐའ་གསལ་ཐབས་སུ་འབད་འབུངས་བྱེད་ཐུབ་མིན། དེ་བཞིན་མང་ཚོགས་ནས་ཆབ་སྲིད་ལ་དོ་འཁུར་ཅི་ཙམ་ཡོད་མེད་སོགས་ཕྱོགས་མང་པོ་ཞིག་ལ་ལྟོས་ཏེ་གོམ་སྟབས་སྤོ་དགོས། རྒྱ་གར་གྱི་ཁ་དཔེར། བཟང་པོའི་གང་ཟག་དེ་ཉིད་ངན་པ་ཡིན་པར་སྒྲུབ་རྒྱུ་དེ་ནི་འཇིག་རྟེན་པའི་གོམས་གཤིས་རྙིང་པ་ཞིག་ཡིན་ཞེས་ཟེར་སྲོལ་ལྟར་སྤྱི་སེམས་སྙིང་དུ་བཅངས་ཏེ་ལེགས་ལེགས་དང༌། གང་དྲང་དྲང་བྱས་ཀྱང་རེ་བ་པོ་རང་ཉིད་ཀྱི་མངོན་འདོད་དང་མི་མཐུན་ན་སྐྱོན་བརྗོད་དང༌། རྫུན་དང་གཡོ་སྒྱུ། ཉིན་མ་གང་འཁྱོལ། སྤྱི་སེམས་ཡལ་དུ་འདོར་མཁན་ཞིག་ཡིན་ཀྱང་རང་ཉིད་དང་འཐབ་ཕྱོགས་གཅིག་པ་ཡིན་ཚེ་བསྔགས་བརྗོད་བྱེད་པ་ནི་འཇིག་རྟེན་པའི་གཤིས་ཤིག་ཡིན་པས་བཅོས་སུ་གང་ཡང་མེད། འོན་ཀྱང་ང་ཚོ་མི་མང་རྣམས་ཀྱིས་གཟབ་དགོས་པ་ནི། མགོ་ཚོས་མདོག་དང༌། སྨྲ་མཁས་མདོག འཇོན་མདོག སེམས་ཤུགས་ཡོད་མདོག་སོགས་གདོང་མདོག་གི་མི་ཚེ་སྐྱེལ་མཁན་རྣམས་ཀྱིས་ཅི་གསུངས་ལ་ཡིད་དབང་མི་འཕྲོག་པར་མི་རིགས་ཀྱི་འདི་ཕྱི་གཉིས་ཀྱི་འགན་ཁུར་འཁྱོགས་པའི་ཐོག་ནས་རྣམ་དཔྱོད་བེད་སྤྱོད་དགོས་པ་དེ་དོན་དགོངས་འཇགས་འཚལ། །
ངས་སྲུང་མའི་སྐོར་བཤད་རྒྱུ་རེད་འདུག་བསམ་སོང་སྟེ། རེད་མི་འདུག
བཀའ་ཁྲི་ཀ་བ་གསུམ་གྱི་སྲུང་མ་མ་རེད། ཀ་བ་གསུམ་གྱི་ཆབ་སྲིད་ཀྱི་གཙོ་འཛིན་རེད།
གལ་སྲིད་སྲུང་མ་ཞིག་དགོས་འདུག་ན། སྲུང་མ་དམར་ནག་གཉིས་ཡོད་རེད། ད་དུང་དགོས་ན་གདུང་འདྲེ་འདྲ་འཚོལ་རྒྱུ་ཡིན་ན་མ་གཏོགས།
བཀའ་བློན་ཁྲི་བར་སུ་འདེམས་ཡང་དེ་ནི་བོད་མི་འབུམ་གཅིག་དང་ཁྲི་ལྔ་ཡི་སྐྱིད་སྡུག་འགོ་བ་ཡིན་པ་ཙམ་རེད།
ཟམ་གདོང་རིན་པོ་ཆེ་ཡང་བསྐྱར་བཀའ་བློན་ཁྲི་པར་འདེམས་ཐུད་ནའང་དགའ་བསུ་ཡོད།
རྒན་ལགས་རྩོམ་ཡིག་ཁ་བྱང་ཅུང་མི་བདེ་བས་བསམ་ཞིག་སླར་ཡང་ཡོད་པ་མཁྱེན།།
་་་་་་་་ཡིན་ཡང་སོགས་ཀྱིས་་་་་་་་ ང་ཚོ་བཙན་བྱོལ་བའི་གནས་བབ་འདིར་གང་ཟག་གཅིག་གིས་ང་ཚོའི་སྐར་མ་གཅིག་འཕྲོ་བརླག་བཏང་བ་ཡིན་ནའང་རྒྱལ་ཁབ་གཞན་གྱི་གྱོང་གུད་ལ་འགྲན་ཐབས་མེད་་་་་་་ ཟེར།
ངས་གོ་བ་ནོར་མེད་ཚེ། ཁྱོད་ཀྱི་དགོངས་ཚུལ་ཡིན་ན། ད་ལྟའི་བཀའ་ཁྲིའི་མ་འོངས་པར་བཀའ་ཁྲིའི་འགན་མུ་མཐུད་དུ་ཁུར་དགོས་ཟེར་བ་འདྲ། དེ་ལ་ངེས་ལེན་བྱེད་མི་ཐུབ་པ་མ་ཟད་ད་དུང་ཁྱེད་ཀྱི་སྐད་ཆ་བཤད་སྟངས་ཀྱང་དེ་འདྲིའི་ཡག་པོ་མཐོང་མ་སོང་། ཁྱེད་ཀྱི་གསུངས་པ་ཅུང་ཙམ་འདིར་བསྐྱར་བཀོད་བྱས་ན། ༼ལྷ་སྲུང་མར་བསྟེན་ན་རང་གཞན་ཐམས་ཅད་ལ་བདེ་སྐྱིད་དང༌། འདྲེ་སྲུང་མར་བསྟེན་ན་རང་གཞན་ཐམས་ཅད་སྟོང་པའི་རྒྱུ་ཡིན་པ་བློ་ངོར་ཆུད་པར་བྱས་ཏེ་འོས་ཤོག་མི་འཕེན་པའི་སྔོན་ཚུད་ནས་ཀ་བ་གསུམ་སྤྱི་དང༌། ལྷག་པར་འཛིན་སྐྱོང་བཀའ་ཤག་གཞལ་ཡས་ཁང་གི་ཁྲི་བཟང་མཐོན་པོའི་སྟེང་དུ་བསྐོ་གཞག་བྱ་རྒྱུའི་སྲུང་མ་དེ་བཞིན་ལྷ་འདྲེ་གང་ཡིན་བརྟག་དཔྱད་ནན་པོ་བྱེད་དགོས་པར་མཐོང༌། ༽
༼འོན་ཀྱང་ང་ཚོ་མི་མང་རྣམས་ཀྱིས་གཟབ་དགོས་པ་ནི། མགོ་ཚོས་མདོག་དང༌། སྨྲ་མཁས་མདོག འཇོན་མདོག སེམས་ཤུགས་ཡོད་མདོག་སོགས་གདོང་མདོག་གི་མི་ཚེ་སྐྱེལ་མཁན་རྣམས་ཀྱིས་ཅི་གསུངས་ལ་ཡིད་དབང་མི་འཕྲོག་པར་མི་རིགས་ཀྱི་འདི་ཕྱི་གཉིས་ཀྱི་འགན་ཁུར་འཁྱོགས་པའི་ཐོག་ནས་རྣམ་དཔྱོད་བེད་སྤྱོད་དགོས་པ་དེ་དོན་དགོངས་འཇགས་འཚལ། ། ༽
འདི་དག་མི་དམངས་ལ་འཇིགས་སྐུལ་འབའ་ཞིག་ལས་གཞན་དོན་དག་ཆེན་པོ་མཐོང་མ་སོང་། ༧རྒྱལ་བ་རིན་པོ་ཆེ་བཞུགས་ཡུན་གྱི་རིང་ལ་ང་ཚོས་བཀའ་བློན་གསར་པ་འདམས་ཐུབ་ན་དགོས་པ་ཆེ་ཞིང་སྐྱོན་ཆེན་པོ་འབྱུང་མི་སྲིད་སྙམ། ང་ཚོས་གོ་སྐབས་འདི་དམ་འཛིན་བྱེད་དགོས།
ཀ་བ་གསུམ་འཛུགས་སའི་གཞུང་ས་བརླག་ཟིན་པས། ཀ་བ་གསུམ་གང་དུ་ཡོད་དམ། གལ་སྲིད་བོད་ཡིག་ནང་ཡོད་པ་ལུང་འདྲེན་གནང་ན། དེ་ནི་སྡོམ་པ་ཤོར་ཟིན་པའི་སྔོན་འགྲོའི་སྒྲུབ་བྱེད་ལས་གཞན་མིན། ད་ཐང་ཆད་སོང་། བག་ལེབ་བཙོང་ནས་བྱུང་ན་ཨ་རི། མ་བྱུང་ན་ཡོ་རོབ་ལ་ཐོན་ཐབས་བྱེད་ཀྱིན་ཡིན་ཏོ། བདེ་མོ། གྲོགས་འབུ་ཚོ།
སྐད་ཆ་གསལ་པོ་བཤད་ཐུབ་མེད་པ་འདྲ། སྐད་ཆའི་སྙིང་པོ་གཅིག ཟམ་གདོང་རིན་པོ་ཆེ་ཡང་བསྐྱར་བཀའ་བློན་ཁྲི་པར་འདེམས་དགོས་ཟེར་བ་འདྲ།
ང་ཚོའི་སྤྱི་ཆུང་ཆུང་དེའི་ནང་སྲུང་མའི་བསྐོར་གྱིས་བརྩོད་རྙོག་གཅིག་འཇམ་ཀྱང་སྲུང་མའི་བརྩོད་རྙོག་གཞན་ཞིག་མགོ་འབུས་འགོ་རྩམས་ཤིང་ཡོད་འདུག ཀ་བ་གསུམ་གྱི་སྲུང་མ་བཞེས་གསུང་ལུགས་ལ་བཏགས་ན་ཟམ་གདོན་རིན་པོ་ཆེ་ཡང་སྲུང་མ་ཞིག་ཡིན་ས་རེད། ལྷ་ཡིན་ནམ་འདྲེ། དེ་འདྲའི་བཞེད་སྣང་ལ། ཆབ་སྲིད་པ་དང་ཤེས་ཡོན་པ་རྣམས་ནས་རྣམ་ཀུན་ནས་མིང་ཚིག་བེད་སྤྱོད་གནང་ཐབས་ལ་ངེས་པར་ཐུགས་སྣང་གནང་དགོས་པ་ཞིག་ཏུ་མཐོང་། དགྲ་དགའ་གཉེན་སྡུག་ཏུ་གྱུར་རྒྱུའི་མིང་ཚིག་དག་བེད་སྤྱོད་ཉུང་ཙམ་བཏང་ན་ཕན་དོགས་ཆེ་བ་མེད་དམ། ཡང་ན་ང་ཚོར་ཤེས་ཡོན་པ་རྣམས་ཀྱིས་ཟུར་བཟའ་ཁོ་ནའི་མིང་ཚིག་ལས་གཞན་ལ་དོ་སྣང་མེད་པ་ཡིན་ནམ། ཐབས་སྐྱོ་བོ་རེད་མིང་ཆེན་པོ་ཞིག་གི་འོག་ནས་ཚིག་དེ་ལྟར་བེད་སྤྱོད་གནང་བ་ནི་སེམས་ཕན་རེད།
རྩོམ་ཡིག་གི་ཁ་བྱང་ལ་ཅུང་ཟད་ཞུ་རྒྱུ་འདུག་སྙམ། རྩོམ་ཡིག་གི་ཁ་བྱང་གང་ཞིག་བྲིས་བཀོད་བྱས་ཚེ་ངེས་པར་དུ་འཆད་བྱའི་ནང་དོན་འབུར་དུ་ཐོན་ཐབས་དགོས་པ་མ་ཟད། རྩོམ་བྱང་བཀླགས་པ་ཙམ་གྱིས་ནང་དོན་འདིའི་སྐོར་བཤད་ཀྱི་འདུག་སྙམ་པའི་ཚོར་བ་བྱིན་ཐུབ་དགོས་པ་ལས་རྩོམ་བྱང་ལ་དོགས་པ་དང་སོམ་ཉི་ཐེབས་བཅུག་རྒྱུ་མེད།
ཀ་བ་གསུམ་གྱི་སྲུང་མ་སུ་འོས་སམ། ཞེས་བཀོད་པ་འདིས་ཆབ་སྲིད་ལ་དོ་སྣང་མེད་མཁན་ཞིག་ལ་ཅི་ཞིག་བཤད་ཅིན་ཡོད་སྙམ་པའི་དོགས་པ་སླེབས་སྲིད། ད་དུང་བཀའ་བློན་ཁྲི་པ་སུ་འོས་སམ། ཞེས་པའི་དོད་དུ་ཀ་བ་གཅིག་གི་སྲུང་མ་སུ་འོས་སམ། ཞེས་རྩོམ་བྱང་བཀོད་ན་དེ་བས་ཀྱང་མགོ་རྨོངས་སུ་འགྱུར་ངེས་ཡིན། འདི་ནི་ངས་རྨོངས་འཆར་ཙམ་ཞུས་ཁུལ་ཡིན་པས་ཐུགས་བབ་མ་བྱུང་ཚེ་གཡུགས་རྐྱང་བྱེད་ཆོག