ངས་རྒྱ་ནག་ལ་འདི་ལྟར་ལྟ་བཞིན་ཡོད། ཀླུ་སྨྱོན།

ལོ་རབས་བརྒྱད་ཅུ་པའི་དུས་མགོ་ཙམ་ནས་རྒྱ་ནག་གིས་སྒྱུར་བཅོས་སྒོ་འབྱེད་ཀྱི་སྲིད་ཇུས་ཤིག་ལག་བསྟར་བྱས་ཏེ་རང་ཉིད་ཀྱི་ད་ལྟ་དང་མ་འོངས་པའི་མདུན་ལམ་དེ་རང་ས་དང་འཛམ་གླིང་སྟེང་རྒྱ་བསྐྱེད་ཡོང་ཐབས་བྱས་པ་རེད། བྱེད་ཐབས་དེ་ཡིས་སྤྱི་ཡོངས་ནས་རྒྱ་ནག་གི་ཆབ་སྲིད་དང་དཔལ་འབྱོར། དམག་དོན་དང་རིག་གཞུང་དར་སྤེལ་སོགས་ལ་རྫིག་རྫིག་རྔམ་རྔམ་གྱི་སྒོ་ནས་ཕན་ཐོགས་ཆེན་པོ་ཞིག་བྱུང་ཡོད་པ་མ་ཟད། རྒྱ་ནག་རང་ཉིད་ཀྱི་གཟུགས་བརྙན་དེ་ཨེ་ཤི་ཡའི་སྤྱི་གཙུག་ནས་བརྒལ་ཏེ་ཡོ་རོབ་གླིང་ཆེན་གྱིས་མ་ཁོགས་པར་སྟོབས་ཆེན་ཨ་རིའི་རྒྱལ་ཁབ་ཀྱི་ཁ་གཏད་དུ་ལངས་ཐུབ་པའི་དུས་རབས་གསར་པའི་ལྕགས་རི་རིང་པོ་ཞིག་ཏུ་གྱུར་ཡོད་པ་རེད།

ཧྭ་ཡིས་མི་བཞི་ཤོག་ཁག་གཏོར་ཕམ་བཏང་བ་དང་མའོ་འདས་གྲོངས་སུ་ཕྱིན་པ་གཉིས་བསྡོངས་ཏེ་རིག་གནས་གསར་བརྗེའི་དུས་ཟིང་མཇུག་སྒྲིལ་ཐུབ་ཙམ་བྱུང་བ་དེས། ཁྲག་དྲི་བྲོ་བའི་ལོ་རྒྱུས་འཇིགས་སུ་རུང་བ་ཞིག་རྒྱ་ནག་ལྕགས་རིའི་ཕྱི་ལོགས་སུ་འདེད་ཐུབ་པ་ཞིག་བྱུང་བས། རྒྱ་ནག་གི་སྤྱི་འབངས་རྒན་དར་གཞོན་གསུམ་ཚང་མར་དབུགས་དབྱུངས་ཚད་ངེས་ཅན་ཞིག་སྤྲད་པ་དང་། ཕ་ཡི་ནག་ཉེས་བུ་ཡིས་འཁུར་མི་དགོས་པའི་ཆབ་སྲིད་ཀྱི་འགྱུར་ལྡོག་ཆེན་པོ་དེས་ཁྱིམ་རྒྱུད་འཛུག་སྐྲུན་དང་མི་རབས་བར་གྱི་འབྲེལ་ལམ་གོང་དུ་འགྲོ་བར་ཡང་ཕན་ཐོགས་ཆེན་པོ་ཞིག་བྱུང་ཡོད་ལ། དེ་བཞིན་ཐོན་སྐྱེད་ནུས་ཤུགས་དེ་ཡང་རིག་གསར་དུས་སྐབས་དང་མི་འདྲ་བར་གལ་སྲིད་དཀའ་སྤྱད་འབད་བརྩོན་བྱས་ཚེ་མང་ཉུང་ལ་མ་ལྟོས་པའི་འབྲས་བུ་ལྗིད་ཏིག་ཏིག་གང་མང་ཞིག་མིག་གིས་མཐོང་རྒྱུ་ཡོད་པའི་འཇིག་རྟེན་གསར་པ་ཞིག་གི་ནང་དུ་བསྐྱོད་ཐུབ་ཡོད།

ཧུའུ་ཡིས་ཧྭ་ཡི་དུས་སྐབས་སུ་མགོ་བཙུགས་པའི་བྱ་བ་བཟང་པོ་གང་མང་ཞིག་གི་མཇུག་བསྐྱངས་ཡོད་པ་དང་། དེ་དག་གི་ཁྲོད་དུ་གླེང་རིན་ཆེན་པོ་ཡོད་པ་ཞིག་ནི་ཆབ་སྲིད་ཀྱི་མཁའ་དབུགས་ཏེ་འབག་རྩོག་ཅན་ནས་དྭངས་གཙང་གི་ཕྱོགས་སུ་ཁ་ལོ་ཞིག་སྒྱུར་ཨེ་ཐུབ་བལྟས་ཡོད་པ་དེ་ཡིན། དཔལ་འབྱོར་སྲིད་བྱུས་ཀྱི་ཕྱོགས་ནས་ཞིབ་ཚགས་པོས་སྒོ་ནས་མ་བལྟས་ཚེ་ཧུའུ་ཧྭ་གཉིས་ལ་ཁྱད་པར་ཆེན་པོ་ཞིག་མི་མཐོང་ན་ཡང་། སྤྱི་དམངས་ཀྱི་གཞི་རྩའི་ཆབ་སྲིད་ཁེ་དབང་ལམ་ལུགས་དེ་ཧུའུ་ཡིས་མངོན་གསལ་དོད་པོའི་སྒོ་ནས་བཅོས་སྒྱུར་བྱེད་འདོད་བྱས་ཡོད་པ་རེད། དེ་ཡང་སྤྱི་དམངས་ཚོས་རྒྱལ་ཁབ་ཀྱི་སྲིད་བྱུས་གཏན་འབེབ་ཡིག་ཆ་གཅིག་པོ་མ་ཎི་བཞིན་སྐྱོར་མི་དགོས་པར་རང་རང་གི་སེམས་ནང་གི་བརྗོད་འདོད་པ་དག་དབུས་གཞུང་གི་མགོ་ཁྲིད་ཚོའི་རྣ་ལམ་དུ་སྒྲོག་ཆོག་པ་དང་སྒྲོག་ཐུབ་པའི་གོ་སྐབས་ཤིག་བྱུང་ན་བསམས་པ་དེ་ནི་ཧུའུ་དེ་ཧྭ་ལས་ཐོལ་བརྒལ་བྱུང་བའི་རྟགས་མཚན་གསར་པ་ཞིག་རེད། གོ་སྐབས་འདི་བཟུང་ནས་རྒྱ་ནག་གི་སློབ་ཆེན་སློབ་མ་དག་གིས་དམངས་གཙོའི་ལས་འགུལ་སྤེལ་བའི་བློ་སྤོབས་ཤིག་རྙེད་དེ་མཇུག་མཐར་ཕམ་ཉེས་བྱུང་མིན་ལ་མ་ལྟོས་པར་སྔ་ཕྱིར་འཛམ་གླིང་གི་གསར་འགྱུར་ཆེ་གྲས་སུ་གྱུར་པའི་དམངས་གཙོའི་ལས་འགུལ་འདྲ་མིན་ཞིག་སྤེལ་བ་རེད།

ཏིང་གི་དངོས་ཐོག་བདེན་འཚོལ་དང་སྒྱུར་བཅོས་སྒོ་འབྱེད་ཀྱི་སྲིད་ཇུས་དེ་རྩ་བའི་ཆ་ནས་སྤྱི་དམངས་དག་གི་བློ་ལ་ཧ་ཅང་འབབ་པོ་བྱུང་སྟེ་འགོག་རྐྱེན་ཅི་ཡང་མེད་པར་ཐོལ་བརྒལ་རང་བཞིན་གྱི་གྲུབ་འབྲས་གང་འཚམ་ཞིག་བླངས་པ་མ་ཟད། དེས་ཏིང་རང་ཉིད་ཐེ་བའི་དམར་ཕྱོགས་མགོ་ཁྲིད་ཚོའི་གཟུགས་བརྙན་དེ་ཡང་མའོ་ཡི་དུས་རབས་ཀྱི་དྲག་གཟུགས་ནས་ཞི་གཟུགས་དང་ཞི་གཟུགས་ནས་མཛེས་གཟུགས་སུ་འཕར་བ་དང་། སྤྱི་དམངས་ཚོའི་སེམས་པའི་ནང་དུ་དཔལ་འབྱོར་གྱིས་ཡོད་ཚད་ཐག་གཅོད་ཐུབ་པའི་འདོད་སེམས་ཤིག་མི་མངོན་པའི་ངང་བསྐྲུན་ཐུབ་ཡོད། འདི་ལ་ཡང་རྒྱབ་ལྗོངས་ཆེ་ཐག་ཆོད་ཅིག་ཡོད་པ་སྟེ། རིག་གནས་གསར་བརྗེའི་དུས་སུ་རྒྱ་ནག་མི་མང་གི་ལུས་པོས་ལྟོགས་སྐོམ་དང་སེམས་པས་དོགས་འཇིགས་ཀྱི་སྡུག་བསྔལ་ཚད་ལས་བརྒལ་བ་ཞིག་མྱངས་ཡོད་པས། ཏིང་གིས་མི་མང་ཚོར་རང་གི་ལུས་སེམས་དང་ས་ཞིང་སོགས་རང་ལ་དབང་བར་གྲགས་པའི་གསེར་གྱི་དུས་རབས་ཤིག་གཏན་འབེབ་བྱས་པར་མི་དགའ་བའི་རྒྱལ་འབངས་སུ་ཞིག་ཡོད་དམ།

ཅང་གི་མཚོན་བྱེད་གསུམ་སོགས་ཀྱི་ཁ་གཡང་མཐོན་པོ་དེ་ཡང་རྩ་བའི་ཆ་ནས་སྤྱི་དམངས་ཚོར་བཙིར་གནོན་དེ་ཙམ་མེད་པའི་ལྷོད་ཡངས་ཀྱི་སྲིད་བྱུས་ཤིག་ཡིན་ཞིང་། དཔལ་འབྱོར་སྲིད་བྱུས་ཀྱི་ཆ་ནས་ཨ་མའི་བུ་ལ་འཇོན་ཐང་ཡོད་ན་དགའ་ལྡན་ཁྲི་ལ་བདག་པོ་མེད་པའི་གོ་སྐབས་ཤིག་བརྒྱུད་བསྒྲགས་དང་ལག་ལེན་ཡང་གང་འཚམ་བྱས་ཡོད་པས། རྒྱ་ནག་གི་སྤྱི་འབངས་ཧ་ཅང་མང་པོ་ཞིག་སྒོར་དུང་ཕྱུར་དུ་མའི་བདག་པོར་གྱུར་པ་དང་། མི་རབས་གསར་པ་གང་མང་ཞིག་ཨ་རིས་གཙོས་པའི་ཕྱི་རྒྱལ་གྱི་སློབ་གྲྭར་ཆེད་སྦྱོང་ལ་འགྲོ་ཐུབ་པ་བྱུང་བ་དེས་མ་འོངས་པའི་བདག་པོ་ཡིན་པའི་མི་རབས་ཤིག་ལ་འཛམ་གླིང་གི་གནས་ཚུལ་རྒྱུས་ལོན་ཐད་གོ་སྐབས་བཟང་པོ་རབ་དང་རིམ་པ་ཞིག་བྱུང་ཡོད་པ་རེད། དེ་བཞིན་རྒྱ་ནག་ནང་ཕྱི་རྒྱལ་གྱི་ཁེ་ལས་པ་ཚོར་མ་རྩ་ཚོད་མེད་འཇོག་ཏུ་བཅུག་པ་དེས་ཨ་རི་སོགས་འབྱོར་ལྡན་རྒྱལ་ཁབ་ཚོ་རྒྱ་ནག་གི་དཔལ་འབྱོར་གྱི་དྲ་རྒྱའི་ནང་དུ་འཐེན་ཐུབ་པ་བྱུང་ཞིང་། དེ་ཡང་ཕྱི་རྒྱལ་ཁག་ཅིག་ཆབ་སྲིད་ཀྱི་དཀའ་རྙོག་སོགས་ཀྱིས་འཇིགས་ཏེ་རེ་ཞིག་དྲ་རྒྱ་འདི་ལས་ཐར་འདོད་སྐྱེས་ན་ཡང་ཕྱོགས་མང་པོ་ཞིག་ནས་སྲོག་ལ་འཚེ་ཡང་རེག་བྱ་འཇམ་པའི་གསེར་གྱི་དྲ་རྒྱ་འདི་བློས་མི་ཐོངས་པའི་ཚད་དུ་སྐྱེལ་ཐུབ་པ་ཞིག་བྱུང་ཡོད་པ་ནི་དངོས་ཡོད་ལོ་རྒྱུས་སུ་གྱུར་ཡོད། ཉིན་གཅིག་གི་སྔོན་ལ་རྒྱ་ནག་དང་ཐེ་ཝན་གཉིས་ཀྱི་བར་དུ་ཚོང་དོན་ཆིངས་ཡིག་འཇོག་ཐུབ་པ་བྱུང་བ་འདིས། མཚོ་འགག་གཉིས་ཀྱི་འགལ་ཟླ་ཆེན་པོ་ཞིག་འཐོར་ཞིག་ཏུ་སོང་སྟེ་མི་འགྱངས་པར་ཐེ་ཝན་མཚོ་གླིང་འདི་བཞིན་ད་ལྟའི་ཧོང་ཁོང་ལྟ་བུའི་རྒྱ་ནག་གི་ཟུར་གཏོགས་རང་སྐྱོང་ས་ཁུལ་ཞིག་ཏུ་འགྱུར་རྒྱུའི་སྐྱ་ཐིག་བཏབ་ཟིན་ཅིང་།  སྐྱ་ཐིག་འདིའི་སྟེང་དུ་ཚོན་མདོག་ཅི་འདྲ་ལྡན་པའི་མཛེས་རིས་ཤིག་བཞེང་ཐུབ་མིན་ནི་གཙོ་བོ་རྒྱ་ནག་གི་ཉ་འཛིན་སྲིད་བྱུས་དང་ཐེ་ཝན་གྱི་ཉ་ཟས་འཇུ་རྩལ་ལ་རག་ལས་ཡོད།

ཧུའུ་གཉིས་པ་འདིའི་རིང་ལ་རྒྱ་ནག་གི་ཆབ་དཔལ་དམག་རིག་བཞི་པོ་ལྟོས་འཇོག་གིས་དར་རྒྱས་ཀྱི་རྩེ་མོར་བསླེབས་ཏེ་ང་རྒྱལ་དང་སྤོབས་པ་བྱེད་ཆོག་ཆོག་གི་དུས་རབས་ཤིག་ལ་བསླེབས་ཡོད་པ་རེད། དེ་ཡང་གནའ་སྔ་མོར་རྒྱ་ནག་གི་སྤྱི་འབངས་ཤིག་ནུབ་ཕྱོགས་རྒྱལ་ཁབ་ཏུ་བསླེབས་དུས་རང་ཉིད་རྒྱ་ནག་པ་ཞིག་ཡིན་ཞེས་བརྗོད་རྒྱུར་ངོ་ཚ་དགོས་པ་ཡིན་ན། ཧུའུ་གཉིས་པའི་དུས་རབས་འདིར་རྒྱ་མི་སུ་ཞིག་ཡིན་ཡང་ནུབ་ཕྱོགས་དང་ཤར་ཕྱོགས་སྤྱི་ཚོགས་གང་ཞིག་ཏུ་ཡང་རང་ཉིད་རྒྱ་ནག་པ་ཞིག་ཡིན་ཞེས་མགོ་བོ་མཐོན་པོ་དང་བྲང་ཁོག་དགྱེ་དགྱེ་བྱེད་ཆོག་གི་ཡོད་ལ་དེ་བཞིན་བྱེད་ཀྱིན་ཡང་ཡོད་པ་རེད། དཔེར་ན་དེང་སྐབས་འཛམ་གླིང་གི་ས་ཕྱོགས་གང་སར་ཡོད་པའི་རྒྱ་ནག་པ་ཆེས་མང་པོ་ཞིག་གིས་རང་རང་གནས་ཡུལ་རྒྱལ་ཁབ་དེའི་ནང་དུ་དམངས་གཙོ་དང་རང་དབང་གི་ཁེ་དབང་ལ་ལོངས་སུ་སྤྱོད་བཞིན་ཡོད་ན་ཡང་། ནམ་ཞིག་རྒྱ་ནག་གི་གཟི་བརྗིད་དམ་མཚན་སྙན་ལ་ཐུག་པའི་གཏམ་བཤད་སྤེལ་བ་དང་ཁྲོམ་སྐོར་བྱེད་སྐབས་སུ། ད་ལྟའི་རྒྱ་ནག་རྒྱལ་ཁབ་འདི་སྲིད་དབང་གཅིག་སྡུད་ལམ་ལུགས་ཀྱིས་སྐྱོང་བའི་རྒྱལ་ཁབ་ཅིག་ཡིན་མིན་ལ་མ་ལྟོས་པར་རང་རང་གི་མེས་རྒྱལ་རྒྱ་ནག་གི་ཕྱོགས་སུ་ལངས་ཏེ་སྤོབས་པ་དང་ང་རྒྱལ་ཆེན་པོས་རྒྱ་ནག་རྒྱལ་ཁབ་འདི་ལས་ལྷག་པའི་རྒྱལ་ཁབ་ཅིག་ས་སྟེང་དུ་མེད་པ་ལྟ་བུའི་འབོད་ཚིག་སྒྲོག་རྒྱུར་ཡ་ང་ཅི་ཡང་མེད་པ་དང་། ཐ་ན་རྒྱ་ནག་ནས་ཁ་མ་སོས་ནམ་མ་ལངས་པར་མཚོ་ཐོག་ནས་ཁྲིམས་འགལ་གྱིས་ཨ་རིར་བྲོས་ཡོང་སྟེ་གནས་སྡོད་བྱེད་བཞིན་པའི་རྒྱ་མི་ཞིག་ཡིན་ཡང་། བོད་མི་ཚོས་རྒྱ་རྒོལ་ཁྲོམ་སྐོར་བྱེད་སྐབས་རྒྱལ་བ་རིན་པོ་ཆེར་ཚིག་ངན་གཅིག་གི་སྐྱོན་བརྗོད་ལས་མེད་ཀྱང་དེ་བོད་མི་ཚོའི་རྣ་ལམ་དུ་སྐྱེལ་ཨེ་ཐུབ་ཀྱི་འབད་བརྩོན་བྱེད་བཞིན་ཡོད་པ་རེད། དཔེར་ན་༢༠༠༨ལོར་ཨ་རིའི་སྒྲ་ཁུ་མཐོ་སློབ་ཏུ་རྒྱ་རིགས་བུ་མོ་ཞིག་གིས་བོད་པའི་རང་དབང་རྩོད་ལེན་གྱི་རྩ་དོན་ལ་རྒྱབ་སྐྱོར་གྱི་སྐད་ཆ་ཚིག་འགའ་བརྗོད་པར་ཨ་རིའི་མཐོ་སློབ་དེ་གར་སློབ་གཉེར་བྱེད་བཞིན་པའི་རྒྱ་རིགས་གཞོན་སྐྱེས་ཚོས་འཇིགས་སྐུལ་དང་དམའ་འབེབ་སྣ་ཚོགས་བྱས་པ་དང་། དེ་འབྲེལ་རྒྱ་ནག་ཏུ་ཡོད་པའི་ཁོ་མོའི་ཕ་མ་གཉིས་ལ་ཡང་འཇིགས་སྐུལ་གྱིས་སྡོད་མི་བདེ་བ་བཟོས་པ་དང་། ཐ་ན་རྒྱ་རིགས་ཐེ་ཝན་གྱི་མི་སེར་ཐེ་ཝན་རང་བཙན་འདོད་མཁན་དང་ཧོང་ཁོང་གི་མི་སེར་དམངས་གཙོ་དོན་གཉེར་བ་ཞིག་ཡིན་ན་ཡང་བོད་རང་བཙན་ལ་མཐའ་གཅིག་ཏུ་ངོ་རྒོལ་བྱེད་པ་འདིས། རྒྱ་ནག་པ་འདི་ཚོ་ཡུལ་དུས་གནས་སྐབས་ག་འདྲ་ཞིག་ཏུ་འཚོ་སྡོད་བྱེད་བཞིན་ཡོད་ཀྱང་། སེམས་ཀྱི་གཏིང་ན་རྒྱ་རིགས་ཆེན་པོའི་རིང་ལུགས་དང་རྒྱ་རིགས་སྒེར་གཅོད་རིང་ལུགས་འདི་རྩ་བ་བརྟན་ཅིང་རྩེ་མོ་རྒྱས་ནས་བསྡད་ཡོད་པ་དེ་ལས་སླ་བོའི་སྒོ་ནས་མཐོང་གི་འདུག ཕྱོགས་གཅིག་ནས་བལྟས་ན་ལོས་ཡིན་ཏེ། རྒྱ་མིས་གཙོས་པའི་འགྲོ་བ་མི་སུ་ཞིག་ཡིན་ཡང་རང་རང་གི་ཕ་མེས་ཡང་མེས་དག་གི་ཤ་ཁྲག་རུས་གསུམ་ས་རུ་ཐིམ་ས་དང་རང་ཉིད་ཀྱི་ལྟེ་ཁྲག་དྲོན་མོ་ཐོར་སའི་ས་ཆ་དང་རང་གི་རིགས་རྒྱུད་དུ་གཏོགས་པའི་མི་དམངས་ལ་བརྩེ་དུང་མེད་པའི་གང་ཟག་སུ་ཞིག་མཆིས། ཡིན་ན་ཡང་། རྒྱ་རིགས་འདི་དག་གིས་ང་ཆེ་ང་བཙན་གྱི་ང་རྒྱལ་ཆེན་པོའི་སྒོ་ནས་རང་གི་མི་རིགས་མ་གཏོགས་མི་རིགས་གཞན་པ་དག་མིའི་གྲས་སུ་འཇོག་གིན་མེད་པར་དེ་དག་གི་ཐོབ་ཐང་ཡོངས་རྫོགས་རྡོལ་རོལ་དུ་བཏང་བ་དང་གཏོང་བཞིན་པའི་སྤྱོད་ངན་དེ་དག་མིག་གིས་མཐོང་ཐེངས་རེ་རེར། ཤེས་པ་རྣལ་དུ་གནས་པའི་མི་ཞིག་ཡིན་ཚེ་སྙིང་ལ་མི་བཟོད་པའི་སྐྱོ་སྣང་དང་ཁོང་ཁྲོ་སྐྱེས་ཡོང་བ་དང་། ཅིའི་ཕྱིར་རྒྱ་མི་རིགས་འདིས་བོད་མི་གཙོས་པའི་གྲངས་ཉུང་མི་རིགས་དག་ལ་ཐུབ་ཚོད་དང་གཉའ་གནོན། ཐ་ན་བཤུ་གཞོག་སོགས་བྱེད་པ་ཡིན་ནམ་ཞེས་རང་གིས་རང་ལ་དྲི་བ་འདོན་པར་བྱེད་དོ།།

ཕྱོགས་གཞན་ཞིག་ནས་བལྟས་ཚེ་འདི་ལ་ཡ་མཚན་རྒྱུ་ཅི་ཡང་མེད་དེ། འགྲོ་བ་མིའི་རིགས་ཀྱི་སེམས་ཁོང་ན་རང་ཉིད་དང་རང་གི་རིགས་སུ་གཏོགས་པ་ཚོར་ཞེན་ཆགས་དང་དེ་ལས་ལྡོག་པ་ཚོར་སྡང་སེམས་དང་འདོར་སེམས་ཡོད་ཚུལ་ནི་ནང་ཆོས་ཀྱི་གྲུབ་མཐའི་གཞུང་ལུགས་ཁག་ལས་ཡང་དང་ཡང་དུ་འབྱུང་ཞིང་། དེ་ལ། བདག་ཡོད་ན་ནི་གཞན་དུ་ཤེས། །བདག་དང་གཞན་ལས་ཆགས་དང་སྡང་། །ཞེས་པའི་སྡོམ་ཚིག་རྒྱུ་མཚན་གྱིས་ཡོངས་སུ་བསྡམས་པ་ཞིག་བྲིས་གནང་ཡོད་པ་རེད། གོང་གི་སྡོམ་ཚིག་འདི་གཞི་ལ་བཞག་ནས་ཞིབ་འཇུག་ཅིག་བྱས་ཚེ། རང་རེ་བོད་ཀྱི་ས་ཆ་གང་མང་ཞིག་ཏུ་གྲངས་ཉུང་མི་རིགས་སུ་གྱུར་པའི་ཁ་ཆེ་ཚོས་རང་རང་གི་ཆོས་ལུགས་ཀྱི་ཆོ་ག་གཉེར་སའི་ལྷ་ཁང་བཞེང་རྩིས་བྱེད་དུས་ས་གནས་བོད་རིགས་ཚོས་དེ་ལ་ངོ་རྒོལ་བྱས་ནས་བཞེང་དུ་མ་བཅུག་པའི་གནས་ཚུལ་ཡོད་པ་དང་། བདག་གི་ཕ་ཡུལ་དུ་དེ་ལས་ཀྱང་ཚབས་ཆེ་བ་ཞིག་ནི་ནང་པའི་སྤྱི་ཚོགས་ལས་རྒྱ་ཆུང་བའི་བོད་རིགས་བོན་པོའི་དད་ལྡན་པ་ཚོས་བོན་ལུགས་ལྷ་ཁང་དང་དགོན་པ་བཞེང་གྲབ་བྱེད་དུས་ས་གནས་ཀྱི་ནང་ཆོས་དད་ལྡན་པ་ཚོས་ངོ་རྒོལ་བྱས་ཏེ་བར་ཆད་བརྩམས་པའི་ལོ་རྒྱུས་ཀྱང་གནའ་ནས་ད་ལྟ་ལ་ཐུག་གི་བར་དུ་ཡོད་པ་ཀུན་གྱིས་མཁྱེན་གསལ་རེད། འདི་ནི་སྤྱི་ཚོགས་ཆེ་བས་ཆུང་བར་ཐུབ་ཚོད་དང་གཉའ་གནོན་བྱེད་སྟངས་ཤིག་ཡིན་པས་རྒྱ་ནག་གཞུང་དང་མི་དམངས་ཀྱིས་བོད་ལ་འཛིན་པའི་སྲིད་བྱུས་དང་རྩུབ་སྤྱོད་དག་ཀྱང་གོང་གི་དཔེ་མཚོན་དེ་དག་ལས་མ་འདས་སོ།།

གླེང་གཞི་ཟུར་བ་ཞིག་སྟེ། ད་ལྟ་རྒྱ་ནག་ཕྱི་ནང་དུ་ཡོད་པའི་མི་ཧ་ཅང་མང་པོ་ཞིག་གིས་རེ་སྒུག་དང་ཚོད་དཔག་སྣ་ཚོགས་བྱེད་ཡུལ་དུ་གྱུར་པའི་དམངས་གཙོའི་ལམ་ལུགས་དེ་དུས་ནམ་ཞིག་དར་ཆ་དམར་པོའི་འོག་གི་རྒྱ་ནག་སྐམ་ས་ཆེན་མོར་ལམ་ལྷོངས་ལྡན་པའི་ངང་གཞུང་འབྲེལ་ཆབ་སྲིད་ལམ་ལུགས་ཤིག་ཏུ་འགྱུར་ཐུབ་བམ་ཞེས་དང་། གལ་སྲིད་བཟང་རྒུའི་འབྱུང་ཁུངས་སུ་བརྗོད་པའི་དམངས་གཙོའི་ལམ་ལུགས་དེ་རྒྱ་ནག་ཏུ་སྤྱི་ཡོངས་ནས་ལག་ལེན་བྱས་ཚེ་དེས་རྒྱ་མི་རིགས་སྤྱི་དང་ཁྱད་པར་དུ་བོད་པས་གཙོས་པའི་གྲངས་ཉུང་མི་རིགས་དག་ལ་ཁེ་ཕན་ཇི་འདྲ་ཞིག་འཐོབ་བམ་ཞེ་ན། ད་ལྟའི་དམར་ཕྱོགས་ལམ་ལུགས་འདིའི་འོག་ནས་ཀྱང་སྤྱི་ཡོངས་ནས་རྒྱ་ནག་གི་མི་རིགས་ཚོར་དཔལ་འབྱོར་དང་ཤེས་ཡོན་སོགས་ཕྱོགས་གང་མང་ཞིག་ནས་ཁེ་ཕན་ཆེན་པོ་ཞིག་ཐོབ་དང་འཐོབ་བཞིན་པ་དང་། དེ་བཞིན་བོད་མི་རིགས་འདི་ལ་ཡང་སློབ་གྲྭ་མེད་སར་སློབ་གྲྭ་དང་ལམ་ཁ་དང་གློག་མེད་སར་ལམ་ཁ་བཟོ་བ་དང་གློག་འཐེན་པ་སོགས་ཕྱིའི་ལྟར་སྣང་གི་འཚོ་བའི་མཐུན་རྐྱེན་ཁྲ་ཁྲ་ཟིང་ཟིང་གང་མང་ཞིག་སྤྲོད་བཞིན་ཡོད་པར་སུས་ཀྱང་ངོས་ལེན་བྱེད་ངེས། དེ་བཞིན་དགོན་པའི་གྲྭ་བཙུན་ཚོར་ཆོས་འདུལ་བ་དང་མཐུན་པའི་ཁང་པ་གསར་རྒྱག་དང་རབ་བྱུང་གི་བཅའ་ཁྲིམས་དང་དེ་ཙམ་མི་མཐུན་པའི་བརྙན་འཕྲིན་བཙན་སྤྲོད་བྱེད་པ་ལྟ་བུ་བཟང་ངན་གྱི་གདམ་ག་རྒྱག་མི་ཤེས་པའི་རོགས་སྐྱོར་གྱི་ཟློས་གར་ཡང་གང་མང་ཞིག་འཁྲབས་དང་འཁྲབ་བཞིན་ཡོད། ཡིན་ན་ཡང་། གལ་སྲིད་རྒྱ་ནག་འདི་དམངས་གཙོའི་ལམ་ལུགས་ཅན་དུ་གྱུར་ཚེ་དེས་རྒྱ་མི་རིགས་ལ་ད་ཡོད་ལས་ལྷག་པའི་འགྲོ་བ་མིའི་གཞི་རྩའི་ཁེ་དབང་དང་དཔལ་འབྱོར་རིག་གཞུང་སོགས་གང་ཐད་ནས་ཁེ་ཕན་ཆེན་པོ་ཞིག་འཐོབ་རྒྱུ་ཡིན་ཞིང་། གྲངས་ཉུང་མི་རིགས་ཚོར་ཡང་རང་རང་གི་ཆོས་རིག་བདག་ཉར་སོགས་ཕྱོགས་གང་ཐད་ནས་སྔོན་དང་མི་འདྲ་བའི་གོ་སྐབས་མང་ཙམ་འཐོབ་རྒྱུར་ཐེ་ཚོམ་མེད། ཡིན་ན་ཡང་། རྒྱ་ནག་དེ་དམར་ཕྱོགས་ཅན་ཡིན་ན་འདྲ། དམངས་གཙོ་ཅན་ཡིན་ཡང་རུང་རྒྱ་ནག་ནི་སྔར་བཞིན་མི་གྲངས་དུང་ཕྱུར་བཅུ་གྲངས་གསོ་སྐྱོང་བྱེད་དགོས་པའི་རྒྱལ་ཁབ་ཆེན་པོ་ཞིག་ཡིན་པས། བོད་ཡུལ་གྱི་གཏེར་དངོས་རིན་ཐང་བྲལ་བ་དེ་དག་སྔར་བཞིན་དང་ཡང་ན་སྔར་ལས་ལྷག་པར་དགོས་མཁོ་ཆེ་བ་ཡོད་དེ། ད་ལྟ་རྒྱ་ནག་དམར་གཞུང་གི་འོག་ཏུ་མི་དམངས་ཚོར་འཆར་ལྡན་བུ་སྐྱེ་ཞེས་པའི་སྲིད་བྱུས་ལག་ལེན་བྱས་ཏེ་མི་གྲངས་འཕེལ་རྒྱས་ལ་ཚོད་འཛིན་ཆེན་པོ་ཞིག་བྱེད་བཞིན་ཡོད་པ་དང་། གལ་སྲིད་མ་འོངས་པར་རྒྱ་ནག་འདི་སྤྱི་དམངས་དག་ལ་བུ་ཕྲུག་ཅི་ཙམ་འདོད་པ་དེ་ཙམ་སྐྱེ་ཆོག་པའི་རང་དབང་ཅན་གྱི་དམངས་གཙོའི་ལམ་ལུགས་ཤིག་ཏུ་བསྐྱོད་པ་ཡིན་ན། དེ་དུས་རྒྱ་ནག་གི་མི་འབོར་འདི་ད་ལྟའི་དུང་ཕྱུར་བཅུ་ཡས་མས་ནས་དུང་ཕྱུར་ཉི་ཤུ་དང་སུམ་ཅུའི་བར་དུ་ཧ་ཅང་མགྱོགས་མྱུར་ཆེན་པོའི་སྒོ་ནས་འཕར་རྒྱུ་ཡིན་པ་གདོན་མི་ཟ་བས། དེ་དུས་ཀྱི་མི་འབོར་ཚད་ལས་བརྒལ་བའི་རྒྱ་ནག་རྒྱལ་ཁབ་དེར་བོད་པའི་གཏེར་ཁ་དེ་དག་སྔར་ལས་དགོས་མཁོ་ཆེ་བ་ཡོད་པ་ནི་ལོང་བས་བལྟས་ཀྱང་ཁམས་གསུམ་མ་ཡིན་ནམ། རང་ལག་ཏུ་ཐོབ་ཟིན་པའི་ས་ཆ་དང་ཐོན་ཁུངས་ནི་རྒྱལ་ཁབ་ཅིག་དམར་པོ་ཡིན་ན་འདྲ་དམངས་གཙོ་ཡིན་ཡང་རུང་ནམ་ཡང་བློས་གཏོང་མི་སྲིད་དེ། རྒྱ་གར་དེ་དམངས་གཙོའི་རྒྱལ་ཁབ་ཅིག་ཏུ་གྱུར་པའི་ཉིན་དང་པོ་ནས་བཟུང་སྟེ་ཀ་ཤི་མིར་གྱི་ས་ཆ་ལག་མཐིལ་འདྲ་བོ་དེའི་ཕྱིར་དུ་ལོ་ངོ་ལྔ་བཅུའི་རིང་ལ་ཕ་ཁི་སི་ཐན་དང་མཉམ་དུ་ཁྱོད་ཤི་ང་གསོན་གྱི་དམར་འཛིང་བྱས་ཡོད་པ་མ་ཡིན་ནམ། འོ་ན་རྒྱ་ནག་དམངས་གཙོར་གྱུར་དུས་ཀྱི་བོད་མི་ཚོར་རང་གི་ས་ཆའི་གཏེར་ཁ་འདོན་ཆོག་དང་མི་ཆོག་གི་གདམ་ཁ་རྒྱག་པའི་རང་དབང་ཡོད་ཅེ་ན། དེ་ནི་ཤིན་ཏུ་ནས་ཀྱང་མ་ངེས་ཏེ། རྒྱ་གཞུང་གིས་ཡོངས་བསྒྲགས་བྱས་པའི་ཡིག་ཆ་ཁག་ཏུ་བོད་རང་སྐྱོང་ལྗོངས་ཁུལ་དུ་བོད་རིགས་རྒྱ་རིགས་ལས་མང་ཚུལ་རྗོད་བཞིན་ཡོད་ཀྱང་། ད་ལྟ་ནས་རྒྱ་མི་རིགས་ཕོན་ཆེ་ཞིག་བོད་ཡུལ་དུ་གནས་སྤོ་བྱས་ཏེ་བོད་ས་ཡོངས་སུ་བོད་མི་རིགས་འདི་གྲངས་ཉུང་མི་རིགས་སུ་གྱུར་དང་འགྱུར་བཞིན་ཡོད་པ་དངོས་ཡོད་གནས་ཚུལ་ཡིན་ཞིང་། མ་འོངས་པར་དམངས་གཙོ་ཅན་གྱི་རྒྱ་ནག་གམ་བོད་དུ། ས་གནས་དཔོན་རིགས་འདེམ་བསྐོ་དང་གཏེར་ཁ་སྔོག་འདོན་སོགས་མང་མོས་ཀྱི་ལམ་ནས་ཐག་གཅོད་བྱེད་དགོས་དུས། བོད་ས་གང་དུ་རྒྱ་མིའི་གྲངས་འབོར་མང་ཚེ་བྱ་བ་གང་དང་གང་བྱེད་ཀྱི་འོས་ཤོག་དེ་རྒྱ་མི་ཚོར་ཐོབ་རྐྱང་མ་ཡིན་ནམ། དཔེར་ན་ལྷ་ས་བ་བཀྲ་ཤིས་ཚེ་རིང་སོགས་ཀྱིས་བྲིས་པའི་ཁོང་གི་མི་ཚེའི་ལོ་རྒྱུས་ནང་དུ། ལྷ་སའི་རྒྱ་རིགས་སློབ་ཕྲུག་གི་གྲངས་འབོར་དེ་བོད་རིགས་ལས་ལྡབས་འགྱུར་གྱིས་མང་བ་ཡོད་ལུགས་འཁོད་པ་དེས་མིག་ཁ་ཕྱེ་བར་ཕན་ཐོགས་ཆེན་པོ་འདུག མཐའ་དོན་ད་ལྟ་རྒྱ་ནག་འདི་བཞིན་རང་ཉིད་ཀྱི་དཔལ་འབྱོར་སྲིད་ཇུས་དང་དམག་དོན་དྲག་ཤུགས་གཉིས་ཐད་ནས་འཛམ་གླིང་འདིའི་སྟེང་དུ་རྫིག་རྫིག་རྔམ་རྔམ་གྱི་སྒོ་ནས་ཉིན་རེ་ནས་ཉིན་རེ་བཞིན་འབུར་དུ་འཐོན་བཞིན་ཡོད་པ་དང་། བོད་པ་ཚང་ནི་ཉིན་རེ་བཞིན་སེམས་ཤུགས་ཆེན་པོ་ཞིག་མ་གཏོགས་ཆོས་རིག་སྲིད་གསུམ་གང་ཐད་ནས་རང་ལམ་མི་རྙེད་གཞན་རྗེས་མི་ཆོད་པའི་གནས་དུས་ཤིག་ཏུ་བསླེབས་ཡོད་པས། རང་རེ་རྣམས་རྒྱ་རིགས་ཆེན་པོའི་རིག་གཞུང་དང་ཆབ་སྲིད་ཀྱི་ནང་དུ་ཡོངས་སུ་འཐིམ་རྒྱུ་ཡིན་ནམ། ཡང་ན་དེ་ལས་གཞན་པའི་ལམ་ཁ་གསར་བ་ཞིག་འཚོལ་རྒྱུ་ཡིན། གལ་སྲིད་ལམ་ཁ་གསར་བ་ཞིག་འཚོལ་རྒྱུ་ཡིན་ཟེར་ན་ལམ་ཁ་གསར་བ་དེ་གང་དུ་ཡོད། དེ་ཇི་ལྟར་འཚོལ་དགོས། དེ་འཚོལ་མཁན་སུ་ཡིན། ལམ་ཁ་དེའི་སྟེང་དུ་སྤུངས་པའི་རེ་བ་གསར་བ་དེའི་ལྗིད་ཁོག་ག་འདྲ་ཞིག་ཡིན་ནམ། ལམ་ཁ་གསར་བ་དེ་དང་ད་ལྟའི་རྒྱ་ནག་གཞུང་གཉིས་ཀྱི་བར་དུ་མཐུན་པའི་ཆ་དང་མི་མཐུན་པའི་འགལ་ཟླ་ཅི་ཙམ་ཞིག་ཡོད་དམ།

ཚད་གཞི་ངེས་ཅན་ཞིག་ནས་བལྟས་ཚེ། བོད་ནང་དུ་བོད་པ་ཚོ་རྒྱ་མི་རིགས་ཀྱི་རིག་གཞུང་གི་ནང་དུ་འཐིམ་བཞིན་པ་དང་། བོད་ཕྱི་ཕྱོགས་སུ་བོད་པ་ཚོ་ཕྱི་རྒྱལ་གྱི་རིག་གཞུང་གི་ནང་དུ་འཐིམ་བཞིན་ཡོད་པས། འཐིམ་མཁན་དང་འཐིམ་ས། འཐིམ་སྟངས་དང་འཐིམ་འབྲས་བཞི་ལ་བསམ་བློ་ཞིག་བཏང་ཚེ། རྒྱ་ནག་གིས་བོད་ལ་འཛིན་པའི་སྲིད་བྱུས་འདི་ལ་ཡང་བྱ་དངོས་ཡོད་ཚད་དང་འདྲ་བར་ངོས་གཉིས་ཡོད་པ་དང་། མདུན་ངོས་དེར་མི་རིགས་ཆེན་པོ་ཞིག་གིས་མི་རིགས་ཆུང་ཆུང་ཞིག་ལ་འཛིན་པའི་ཆབ་སྲིད་ཀྱི་དམིགས་ཡུལ་ངེས་ཅན་ཞིག་ཡོད་པ་དང་། རྒྱབ་ངོས་དེར་གནའ་ནས་ད་བར་གྱི་མཚན་ཉིད་རིག་པ་་བ་ཚོས་ཁས་ལེན་ཐུབ་པའི་ཆོས་ཉིད་ཀྱི་འཕེལ་རིམ་དྲག་པོ་ཞིག་ཡོད་པར་འདོད་དོ།།