ངྷ་ས་ནས་བོད་མི་བརྒྱ་ཆ་ ༧༥ དེབ་སྐྱེལ་བྱས་ཟིན།

ཕྱི་ཚེས་ ༢༦ གི་ཕྱི་དྲོ་ཆར་ཞོད་ཧ་ཅང་ཆེ་ནའང་། ང་ལས་གྲོགས་གཉིས་དང་མཉམ་དུ་ངྷ་ས་མེག་གྷན་བདེ་དོན་ཚོགས་ཁང་དུ། སྐབས་གསུམ་པའི་བཀའ་བློན་ཁྲི་པ་དང་སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱི་འོས་འདེམས་ཆེན་མོའི་ཆ་ཤས་ལེན་རྒྱུར་དེབ་སྐྱེལ་བྱེད་དུ་བསྐྱོད། ངེད་ཚོ་ལས་ཁུངས་ལ་འབྱོར་དུས་ཕྱི་དྲོའི་དུས་ཚོད་ ༢ པ་ཟིན་ཙམ་རེད་ལ། དེར་དེབ་སྐྱེལ་བྱེད་དུ་ཡོང་མཁན་གྱི་མི་འགས་དེབ་སྐྱེལ་བྱེད་རྒྱུར་བསྒུག་འདུག

ཕྱི་དྲོའི་དུས་ཚོད་ ༢ དང་སྐར་ ༡༠ ཡོལ་ཙམ་ལས་མགོ་བརྩམས་པ་དང་ང་ཚོས་ཀྱང་དེབ་སྐྱེལ་བྱེད་མགོ་བརྩམས་པ་ཡིན་ལ། ཉིན་དེར་བདེ་དོན་གྱི་ཚོགས་ཁང་ཆུང་ཆུང་དེའི་ནང་དེབ་སྐྱེལ་བྱེད་དུ་ཡོང་བའི་མིའི་འཁྲུག་ཆ་ཧ་ཅང་དོད། ངའི་ལས་གྲོགས་ཤིག་གི་རང་བཙན་ལག་དེབ་ཀྱི་དུས་ཡུན་རྫོགས་འདུག་པས། དུས་ཡུན་འཕར་འགྱང་དང་དངུལ་ཆད་ཕུལ་བ་བཅས་བྱས་ཏེ། དེབ་སྐྱེལ་ཟིན་དུས་ཆུ་ཚོད་ ༣ དང་སྐར་མ་ ༣༠ ལ་སླེབས་འདུག་ལ། སྐབས་དེ་དག་ཏུ་བོད་མི་སུམ་ཅུ་ཙམ་གྱིས་འཚང་ཁ་ཤིག་ཤིག་གིས་དེབ་སྐྱེལ་བྱས་སྟབས། མི་གཉིས་ཀྱིས་འཆར་ཅན་ལྟར་དེབ་སྐྱེལ་ཐོ་འགོད་བྱས་པའི་སྟེང་། ངྷ་ས་བདེ་དོན་ཚེ་རིང་ཕུན་ཚོགས་ལགས་ཀྱང་དེབ་སྐྱེལ་བྱེད་སར་ཕེབས་ནས་ལས་གནས་དངོས་ལ་ཞུགས། དེ་ལྟར། ཉིན་དེའི་ཆར་ཤོད་ཆེ་མིན་ལ་མ་ལྟོས་པར་དེབ་སྐྱེལ་བྱེད་མཁན་མང་བོ་འདུག་ལ། དེབ་སྐྱེལ་བྱེད་མཁན་གྱི་ལས་བྱེད་རྣམས་ཀྱང་ལས་བྲེལ་གྱིས་ཁེངས་འདུག

ཡིན་ནའང་། ངྷ་ས་བདེ་དོན་ཚེ་རིང་ཕུན་ཚོགས་ལགས་ཀྱིས་དེ་རིང་མི་མང་པོ་དེབ་སྐྱེལ་བྱེད་དུ་ཡོང་འདུག་པའི་རྒྱུ་མཚན་ནི། ཕྱི་ཚེས་ ༢༡ དང་ ༢༢། ༢༣ བཅས་ལ་ས་གནས་འོས་བསྡུའི་ཚོགས་མི་འོས་འདེམས་སྐབས། མི་མང་པོས་འོས་བསྡུའི་དེབ་སྐྱེལ་བྱས་མེད་པར་བརྟེན། ང་ཚོས་དེབ་སྐྱེལ་བྱེད་དུ་ཤོག་ལབ་པས་རེད་ཅེས་གསུངས།

ད་ལྟ་ཟླ་གཉིས་རིང་གི་འོས་བསྡུའི་དེབ་སྐྱེལ་བྱ་རྒྱུར་ཉིན་ ༢༣ ལས་ལྷག་མེད་ཅིང་། ངས་ངྷ་ས་བདེ་དོན་ཁོང་ལ་དེབ་སྐྱེལ་མགོ་བརྩམས་པ་ནས་ད་ལྟའི་བར་ཆ་སྙོམས་ཀྱིས་ཉིན་རེར་མི་ཅི་ཙམ་གྱིས་དེབ་སྐྱེལ་བྱེད་ཀྱིན་ཡོད་མེད་སྐོར་དྲིས་པར་ཁོང་གིས། ད་ལྟའི་ཆར་དེབ་སྐྱེལ་ཟིན་པའི་མིའི་གྲངས་འབོར་འདི་རེད་ཅེས་ཏག་ཏག་ཅིག་རྩིས་རྒྱག་རྒྱུ་ཁག་པོ་རེད། ཡིན་ནའང་། འོས་འདེམས་སྐབས་སྔོན་མར་རོབ་རྩིས་བྱས་པ་ལྟར་ན་ངྷ་སར་མི་བདུན་སྟོང་ཡས་མས་ཤིག་ཡོད་རབས་འདུག་ལ། དེའི་རྗེས་ཕྱི་རྒྱལ་དུ་ཕྱིན་པ་དང་ཡང་བོད་ནས་ཡོང་བ་དང་ས་གནས་གཞན་ནས་ཡོང་བ་སོགས། གང་ལྟར་ད་ལྟའི་ཆར་ངྷ་སར་མི་ཆིག་ཁྲི་ཙམ་ཡོད་པས། དེའི་ནང་ནས་བརྒྱ་ཆ་བདུན་ཅུ་དོན་ལྔ་ལྷག་གིས་འོས་བསྡུའི་དེབ་སྐྱེལ་ཟིན་ཡོད་ཅེས་གསུངས།

ཁོང་གིས་ད་དུང་། ངྷ་སྟེང་བོད་ཁྱིམ་དང་ཤེས་རབ་དགའ་ཚལ་སློབ་གླིང་། གྷོ་པལ་པུར། ནོར་གླིང་། སྒྲོལ་མ་གླིང་། སྙིང་སྟོབས་གླིང་། ཚད་མའི་དགའ་ཚལ་གླིང་བཅས་ཀྱི་ས་གནས་ཁག་ཅིག་མ་གཏོགས་ས་གནས་གཞན་ཚང་མར་དེབ་སྐྱེལ་བྱས་ཟིན་པས། མི་རིང་བར་གོང་གསལ་ས་གནས་ཁག་ཏུ་དེབ་སྐྱེལ་བྱ་རྒྱུ་ཡིན་ཞེས་གསུངས།

གསར་འགོད་པས་ཉིན་དེར་དེབ་སྐྱེལ་བྱེད་དུ་ཕེབས་པའི་མི་མང་ཁག་ཅིག་ལ་སྐབས་གསུམ་པའི་བཀའ་བློན་ཁྲི་པ་དང་། སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱི་འོས་བསྡུ་ཆེན་མོར། ཁོང་ཚོ་རང་ཉིད་ལ་གྲ་སྒྲིག་གང་འདྲ་ཡོད་མེད་དྲིས་པས། གངས་སྐྱིད་ཁུལ་དུ་གནས་སྡོད་ལྷ་བྲིས་པ་སྦྱིན་པ་རྒྱ་མཚོས་བརྗོད་དོན། སྤྱིར་སྐབས་གསུམ་པའི་བཀའ་བློན་ཁྲི་པ་དང་སྐབས་བཅོ་ལྔ་བའི་བོད་མི་མང་སྤྱི་འཐུས་གཉིས་ཀ་བོད་མི་མང་སྤྱི་ལ་ཤ་ཚ་མཁན་ཞིག་དང་ལྷག་བསམ་ཅན་རེ་འདེམས་རྒྱུའི་བསམ་བློ་ཡོད་ནའང་། ཕར་སྤྱི་ཚོགས་ལ་ལྟ་སྐབས་མི་སུ་དང་སུ་ལ་འོས་བླུགས་ན་གང་འདྲ་ཡོད་པ་དང་། ཡང་ན་མི་སུས་སྤྱི་ཚོགས་ལ་ཁ་ཞེ་གཉིས་མེད་ཀྱིས་ལས་ཀ་བྱེད་ཐུབ་ཀི་རེད་དམ་ཟེར་ན། རང་ཉིད་ལའང་གདེང་ཚོད་ཆེན་པོ་མི་འདུག ཡིན་ནའང་། མི་གཞན་ལ་སྐད་ཆ་འདྲི་བ་དང་རང་ཉིད་ཀྱིས་དེའི་སྐོར་ལ་མུ་མཐུད་བསམ་བློ་གཏོང་བཞིན་པ་ཡིན་སྟབས། བོད་མི་མང་དང་སྤྱི་ཚོགས་ལ་ཕན་ཐོགས་མཁན་ཞིག་འོས་ལྡུག་རྒྱུར་གྲ་སྒྲིག་ཡོད་ཅེས་ཟེར།

ཡང་མེག་གྷན་དུ་གནས་སྡོད་བསྟན་འཛིན་ཆོས་དར་གྱིས་བརྗོད་དོན། སྤྱིར་ང་རང་ཉིད་འོས་བསྡུའི་ཁྲོད་ཐེངས་པོར་ཞུགས་ཀྱིན་ཡོད་ནའང་། རང་ཉིད་སྒེར་ངོས་ནས་འོས་ལྡུག་རྒྱུར་གྲ་སྒྲིག་བྱས་ནས་བསྡད་ཡོད་ཅེས་དང། ཁོས་བཀའ་སྤྱི་གཉིས་མི་གང་འདྲ་ཞིག་དགོས་མིན་སྐོར་བརྗོད་དོན། ངས་བསམ་ན་བཀའ་སྤྱི་གཉིས་ཀའི་སུ་ཡིན་རུང་དུས་རབས་འདིར་འཚར་ལོངས་བྱུང་བ་དང་དེང་དུས་ཤེས་ཡོན་ལྡན་པ་ཞིག་བྱུང་ན། གཅིག་ནས་༧གོང་ས་མཆོག་གི་ཐུགས་དགོངས་ལྟར་འགྲུབ་པ་དང་། གཉིས་ནས་གཞོན་སྐྱེས་ཤིག་བསླེབ་ན་ཡག་པོ་འདུག་ཟེར།

མེག་གྷན་དུ་གནས་སྡོད་ཉི་མ་བསྟན་འཛིན་གྱིས་བརྗོད་དོན། ངའི་ངོས་ནས་བལྟས་ན་ཐེངས་འདི་ནི་བོད་མི་རིགས་ཀྱི་གནད་འགག་གི་དུས་ཚོད་ཅིག་ལ་སླེབས་བསྡད་པར་ངོས་འཛིན་བྱེད་ཀྱིན་ཡོད་ལ། རང་ཉིད་ཀྱི་ངོས་ནས་ལུང་ཚན་བྱེ་བྲག་པའི་དབྱེ་འབྱེད་མེད་པར་བཀའ་སྤྱི་གཉིས་ཀའི་གང་ཡིན་རུང་མི་ཚད་ལྡན་དང་སྤུས་དག་ཅིག་ལ་འོས་ལྡུག་རྒྱུར་གྲ་སྒྲིག་ཟིན་པ་ཡིན་ཞེས་ཟེར།
གཙུག་ལག་ཁང་ཉེ་འགྲམ་དུ་གནས་སྡོད་ནོར་རྒྱལ་ལགས་ཀྱིས། ངས་བོད་མི་མང་ལ་ཕན་ཐོགས་མཁན་ཞིག་ལ་བསམ་བློ་གཏོང་གིན་ཡོད་ནའང་། ད་ལྟའི་ཆར་མི་སུ་ལ་འོས་ལྡུག་དགོས་པ་དང་སུ་ཡག་པོ་ཡོད་མེད་ཤེས་ཀྱི་མེད། ཡིན་ནའང་། མི་རིང་བར་གྲ་སྒྲིག་བྱ་གི་ཡིན་ཟེར།

ནོར་གླིང་ནས་ཡོང་བའི་བསྟན་འཛིན་ཆོས་འཛོམས་ལགས་ཀྱིས། ངས་བོད་མི་མང་སྤྱི་འཐུས་ལ་མི་གསུམ་གྲ་སྒྲིག་བྱས་ཡོད་ལ། བཀའ་བློན་ཁྲི་པའི་འོས་མིའི་ནང་དུའང་མི་གསུམ་གྲ་སྒྲིག་བྱས་ཡོད་ཅེས་དང་། ཁོ་མོས་བཀའ་སྤྱི་གཉིས་ལ་ཚང་དགོས་པའི་ཁྱད་ཆོས་སྐོར་ནས་བརྗོད་དོན། སྤྱིར་བཀའ་སྤྱི་སུ་ཡིན་རུང་སློབ་སྦྱོང་དང་ཡོན་ཏན་དགོས་པ་གལ་ཆེན་པོ་ཡིན་ཡིན་པ་རེད། དེའི་སྟེང་དུ་སྐད་ཡིག་མང་བོ་མཁྱེན་མཁན་དང་ཉམས་མྱོང་ཆེན་པོ་དགོས་པ་གལ་ཆེན་པོ་རེད་ཅེས་ཟེར།

ཕྱི་ཚེས་ ༢༦ ཉིན་གྱི་དེབ་སྐྱེལ་ཁང་གི་དེབ་སྐྱེལ་བྱེད་མཁན་གྱི་མིའི་འདུ་འཛི་དང་། ངྷ་ས་བདེ་དོན་གྱིས་ངྷ་ས་ནས་མི་མང་བརྒྱ་ཆ་ ༧༥ ལྷག་གིས་དེབ་སྐྱེལ་ཟིན་སྐོར་གསུངས་པ། གོང་གསལ་གྱི་མི་འདི་ཚོའི་བཤད་སྟངས་བཅས་ལ་བལྟས་ན། སྐབས་སྔོན་མའི་འོས་འདེམས་ཆེན་མོ་ལས་ཐེངས་འདིའི་འོས་འདེམས་སྐབས་མང་ཚོགས་ཀྱིས་འོས་བསྡུའི་ཆ་ཤས་ཤུགས་ཆེར་ལེན་རྒྱུ་ཡིན་པའི་གདེང་ཚོད་ཅིག་རྙེད་ཡོང་ལ། ཁོང་ཚོས་གྲ་སྒྲིག་ཀྱང་བྱེད་བཞིན་པའི་སྒང་རེད།

གསར་འགོད་པ། ཨ་རིག་འགྱུར་མེད།