ཡིད་སྐྱོའི་གནས་ཚུལ།

ཚོཊ་དྲུང་ལས་ཁུངས་ཀྱི་དྲུང་ཡིག་ཆེན་མོ་ཕུར་བུ་ཚེ་རིང་ལགས་ནད་མནར་གྱི་རྐྱེན་པས་ཟླ་འདིའི་ཚེས་ ༢༩ ཉིན་འདས་གྲོངས་སུ་ཕྱིན་ཡོད་འདུག    

ཚོགས་དྲུང་ལས་ཁུངས་ཀྱི་དྲུང་ཡིག་ཆེན་པོ་ཕུར་བུ་ཚེ་རིང་ལགས་ནད་མནར་གྱི་རྐྱེན་པས་ཟླ་འདིའི་ཚེས་ ༢༩ ཉིན་བོད་གཞུང་བདེ་ལེགས་སྨན་ཁང་དུ་འདས་གྲོངས་སུ་སོང་ཡོད་ལ། ཁོང་འདས་གྲོངས་སུ་ཕྱིན་པའི་གནས་ཚུལ་ཐོས་འཕྲལ་ཚེས་ ༣༠  ཉིན་གྱི་ཕྱི་དྲོའི་ཆུ་ཚོད་ ༢ ཐོག་བཀའ་བློན་རྣམ་པ་དང་། སྤྱི་འཐུས་རྣམ་པ།  ལྷན་ཁང་ཁག་གི་དྲུང་ཆེ་རྣམ་པས་དབུས་གཞུང་ཞབས་ལས་བྱེད་བཅས་གངས་སྐྱིད་གསོལ་ཐབ་ཚོགས་ཁང་དུ་མཉམ་འཛོམས་ཀྱིས་ཐོག་མར་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་དམ་པ་ཁོང་གི་ལོ་རྒྱུས་སྙིང་བསྡུས་སྒྲོག་སྦྱོང་གནང་རྗེས། སྲི་ཞུ་བ་རྣམས་ཀྱིས་དམ་པ་ཁོང་ལ་མྱ་ངན་གུས་འདུད་མཚོན་ཆེད་ཆུ་ཚོད་ ༡ རིང་སྨོན་ལམ་གསུང་འདོན་གནང་ཡོད། འདས་པོ་ཁོང་ནི་ ༡༩༥༢ ལོར་བོད་གཙང་སྟོད་གཅེན་ལུང་དུ་ཕ་དབུ་རྒྱན་རང་གྲོལ་དང་། མ་འཛོམས་པ་གཉིས་ཀྱི་བུར་འཁྲུངས་ཡོད་ལ། ༡༩༥༩ ལོར་རྒྱ་གཞུང་གིས་བོད་ས་ཡོངས་རྗོགས་བཙན་བཟུང་བྱས་རྐྱེན་ཁོང་ཡང་རྒྱ་གར་ལ་སྐྱབས་བཅོལ་དུ་ཡོང་ནས་ཐོག་མར་རྡོར་གླིང་བོད་གཞུང་གཏན་སློབ་དང་། དེའི་རྗེས་ལྡི་ལིར་ལོ་གཅིག་རིང་སློབ་སྦྱོང་བྱས། ༡༩༧༣  ལོར་གཞུང་ཞབས་ཁོངས་སུ་ཞུགས་ཏེ་དང་ཐོག་གཞོན་དྲུང་ཚོད་ལྟའི་ཐོག་བལ་ཡུལ་ཁུམ་ཤིའི་རྩིས་དྲུང་དང་།  ༡༩༧༨ ལོར་ལུགས་བསམ་མཉམ་སྦྲེལ་གྱི་གཞོན་དྲུང་དང་། ༡༩༨༡ ལོར་ལྡི་ལི་བོད་གནས་བསྐྱར་ཞིབ། ༡༩༨༥ ལོར་རྟེན་བཞེངས་བཟོ་འགོའི་ལས་ཚབ་དང་བདེ་སྲུང་རྩིས་པ།  ༡༩༨༧ ལོར་གནས་རིམ་བརྒྱད་པར་གནས་སྤོར་གྱིས་མོན་གྷོ་རུམ་བཟོའི་འགན་འཛིན་དང་།  ༡༩༩༡ ལོར་བདེ་སླར་བཟོ་འགོ ༡༩༩༢ ལོར་དྲུང་གཞོན་ལས་རོགས་ཐོག་བདེ་སྲུང་ལས་ཁུངས་སུ་གནས་སྤར། ༡༩༩༣ ལོར་དྲུང་གཞོན་དུ་གནས་སྤར། ༡༩༩༩ ལོར་ཟུང་འབྲེལ་དྲུང་ཆེ་ནས་འཕྲོད་བསྟེན་ལས་ཁུངས་ཀྱི་ཟུང་དྲུང་ལ་ལས་གནས་སྤར། ༢༠༠༡ ལོར་དབུས་འོས་བསྡུ་ལས་ཁང་གི་ཟུང་དྲུང་དང་།  ༢༠༠༧ ལོར་དྲུང་འཕར་དུ་གནས་སྤར། ༢༠༠༨ ལོར་ཚོགས་དྲུང་ལས་ཁུངས་སུ་གནས་སྤོས་ཀྱིས་ཚོགས་དྲུང་ལས་ཚབ་ཏུ་བསྐོ་གཞག་བྱས། ༢༠༡༠ ལོར་དྲུང་ཡིག་ཆེན་མོར་གནས་སྤོས་ཀྱིས་ཚོགས་དྲུང་གི་ལས་འགན་བཞེས་མུས་ཐོག་ལོ་ངོ་ ༣༧ རིང་རང་གཞུང་ལ་ལྷག་བསམ་རྣམ་དག་གིས་སྲི་ཞུའི་ཞབས་འདེགས་ཞུས་ཡོད། ཡིད་སྐྱོ་དགོས་པ་ཞིག་ལ་ནད་མནར་གྱི་རྐྱེན་པས་ཟླ་འདིའི་ཚེས་ ༢༩ ཉིན་གྱི་ཕྱི་དྲོར་བོད་གཞུང་བདེ་ལེགས་སྨན་ཁང་དུ་འདས་གྲོངས་སུ་སོང་ཡོད་པ་རེད།

གསར་འགོད་པ། དཔལ་ལྡན་རྒྱ་མཚོ།