མང་ཚོགས་ལ་དེབ་སྐྱེལ་བྱེད་པར་དྲན་སྐུལ་ལས་འགུལ།

ཁ་སང་རེས་གཟའ་ཉི་མའི་ཉིན་ན་གཞོན་དང་བླངས་ཚོགས་པ་ཞིག་གིས་ངྷ་སའི་མང་ཚོགས་ཚོར། ༢༠༡༡ ལོའི་བཀའ་སྤྱིའི་འོས་བསྡུའི་དེབ་སྐྱེལ་བྱ་རྒྱུར་ད་ནི་ཉིན་ ༡༨ ལས་མེད་སྟབས། དུས་ཡུན་དེའི་ནང་ངེས་པར་དུ་དེབ་སྐྱེལ་བྱ་རྒྱུར་དྲན་སྐུལ་གྱི་ལས་འགུལ་ཞིག་སྤེལ་ཡོད།

ཟླ་འདིའི་ཕྱི་ཚེས་ ༡ སྟེ། རེས་གཟའ་ཉི་མའི་ཉིན། ངྷ་ས་ཐེག་ཆེན་ཆོས་གླིང་གཙུག་ལག་ཁང་གི་སྒོ་འགྲམ་དུ། ན་གཞོན་དང་བླངས་རུ་ཁག་ཅིག་གིས་ཕྱི་ལོ་ ༢༠༡༡ ལོའི་བཀའ་སྤྱིའི་འོས་བསྡུ་ཆེན་མོའི་ཆ་ཤས་ལེན་རྒྱུར། བོད་མི་རྣམས་ཀྱིས་འོས་བསྡུའི་དེབ་སྐྱེལ་བྱེད་རྒྱུར་ཉིན་བཅོ་བརྒྱད་ལས་མེད་པའི་དྲན་སྐུལ་གྱི་ལས་འགུལ་ཞིག་སྤེལ་ཡོད་ལ། ལས་འགུལ་སྤེལ་སྐབས་མང་ཚོགས་དེབ་སྐྱེལ་བྱས་མེད་རིགས་ལ་ངེས་པར་དུ་ཉིན་བཅོ་བརྒྱད་ནང་ཚུན་དུ་དེབ་སྐྱེལ་བྱ་ཐུབ་པ་དགོས་སྐོར་འགྲེལ་བརྗོད་དང་། དེབ་སྐྱེལ་ཟིན་པ་རྣམས་ལ་རང་གི་གྲོགས་པོ་གྲོགས་མོ་གཞན་ལའང་དེབ་སྐྱེལ་བྱ་རྒྱུར་སྐུལ་མ་གནང་དགོས་པ་སོགས་ཀྱི་འབོད་སྐུལ་གནང་ཡོད།

ལས་འགུལ་འདི་བོད་ཀྱི་གཞོན་སྐྱེས་ཁག་ཅིག་གིས་བཀའ་བློན་ཁྲི་པ་དང་བོད་མི་མང་སྤྱི་འཐུས་ཀྱི་འོས་བསྡུའི་སྐོར། མི་དམངས་ལ་གོ་རྟོགས་སྤེལ་ནས་དམངས་གཙོའི་ལྟ་བ་གོང་འཕེལ་གྱི་ཆེད་དུ་ན་གཞོན་ཁག་ཅིག་གིས་དང་བླངས་ཀྱིས་སྤེལ་བའི་ལས་འགུལ་ཞིག་ཡིན་ལ། རུ་ཁག་འདིའི་ནང་དུ་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱང་མཉམ་ཞུགས་གནང་ཡོད།
དང་བླངས་རུ་ཁག་འདིས་བཀའ་སྤྱི་གཉིས་ལ་ཆ་རྐྱེན་འགའ་ལྡན་དགོས་སྐོར་ཡོངས་བསྒྲགས་བྱས་དོན། ང་ཚོས་བཙན་བྱོལ་གཞུང་གི་བཀའ་བློན་ཁྲི་པ་དང་བོད་མིའི་སྤྱི་འཐུས་སུ་ཡིན་རུང་གཤམ་གསལ་གྱི་ཆ་རྐྱེན་ལྡན་པ་བསླེབ་ཐབས་བྱ་རྒྱུ་དེ་ཡིན།

བོད་རྒྱལ་ཁབ་ལ་འགྱུར་བ་མེད་པའི་དགའ་ཞེན། ཆོལ་ཁ་ཆོས་ལུགས་ཀྱི་བསམ་བློའི་འཐེན་འཁྱེར་མི་བྱེད་མཁན། བོད་ཀྱི་རྩ་དོན་གཞི་རྩར་བཟུང་བའི་ཐོག་ཆབ་སྲིད་ཀྱི་ལངས་ཕྱོགས་བརྟན་པོ་ཡོད་པ། རང་འཁྲིའི་ལས་འགན་དྲང་བདེན་ཐོག་བྱེད་རྒྱུར་ཞུམ་པ་མེད་པའི་སྙིང་སྟོབས་བཅངས་མཁན་བཅས་ཡིན་པས། བཙན་བྱོལ་བོད་མི་རྒན་གཞོན་སུ་འདྲ་ཞིག་ཡིན་རུང་བཀའ་བློན་ཁྲི་པ་དང་བོད་མི་མང་སྤྱི་འཐུས་ལ་གོང་གསལ་གྱི་ཆ་རྐྱེན་དེ་དག་ཚང་མིན་ངེས་པར་དུ་གཟིགས་ནས་འོས་འཕེན་རོགས།

དེ་བཞིན་ང་ཚོའི་དམིགས་ཡུལ་ལ་མོས་མཐུན་དང་རྒྱབ་སྐྱོར་ཡོད་ཚེ་བཙན་བྱོལ་སྤྱི་ཚོགས་ནང་དམངས་གཙོའི་ལམ་ལུགས་གོང་འཕེལ་ཡོང་ཐབས་སུ་མཉམ་ཞུགས་གནང་རོགས་ཟེར།

ཉིན་དེའི་ལས་འགུལ་སྤེལ་སྟངས་ནི་དགོད་བྲོ་ལ་སྐྱིད་སྣང་ལྡན་པ། མང་ཚོགས་ལ་མཚར་སྣང་སློང་བ་སོགས་ཀྱི་ཁྱད་ཆོས་ལྡན་པའི་ལས་འགུལ་ཞིག་སྟེ། ན་གཞོན་དང་བླངས་པའི་ཚོགས་མི་གཉིས་ཀྱིས་ལྔ་དང་སྦུབ་ཆ་དཀྲོལ་རྡུང་བྱས་ཏེ་མདུན་དུ་བསྐྱོད་རྗེས། ཚོགས་མི་གཞན་གསུམ་གྱིས་ཤོག་སྒམ་གྱིས་བཟོས་ཏེ། དེའི་སྟེང་དུ་རས་དཀར་བོ་དང་ལྗང་ཁུས་ ༼ རང་བཙན་ལག་དེབ་ ༽ ཀྱི་བཟོ་ལྟ་བཟོས་པའི་འཁྲབ་ཆས་གྱོན་ཏེ། སྲང་ལམ་ནས་བྲོ་འཁྲབ་ཞོར་དང་མང་ཚོགས་རེ་རེ་བཞིན་འོས་བསྡུའི་དེབ་སྐྱེལ་བྱེད་དགོས་པའི་འགྲེལ་བཤད་རྒྱག་ཞོར། ད་དུང་མི་རེ་རེར་འགྲེལ་བཤད་གྲུབ་རྗེས་ལག་ཏུ་ཀ་ར་མངར་མོ་འཇོག་པ་སོགས། རྣམ་པ་ཞི་བ་དང་སྤྲོ་སྣང་འདྲེན་པ་ཡིན་ཐོག འགུག་ཤུགས་ནི་མང་ཚོགས་རྣམས་མཚར་སྣང་གིས་ཁོང་ཚོའི་ཅི་བཤད་གང་འགྲེལ་ལ་གཟབ་ནན་གྱིས་ཉན་དུ་ཡོང་བ་སོགས་རེད།

ན་གཞོན་དང་བླངས་པའི་ཚོགས་གཙོ་རྡོ་རྗེ་ཚེ་བརྟན་ལགས་ཀྱིས། ད་ལྟ་ ༢༠༡༡ ལོའི་བཀའ་སྤྱིའི་འོས་བསྡུ་ཆེན་མོར་བསླེབ་ལ་ཉེ་བ་དང་། མང་གཙོའི་སྤྱི་ཚོགས་ཤིག་ཏུ་མང་ཚོགས་ཀྱིས་རང་གི་དབུ་ཁྲིད་ལེགས་པོ་ཞིག་གདམ་རྒྱུ་ནི་ཧ་ཅང་གི་གལ་ཆེན་པོ་ཡིན།

ཡིན་ནའང་། སྐབས་སྔོན་མ་ཏག་ཏུ་འོས་བསྡུའི་སྐབས་མང་ཚོགས་ཀྱི་འོས་བསྡུའི་དེབ་སྐྱེལ་བྱས་མེད་པར་བརྟེན། འོས་བསྡུ་བྱེད་མ་ཐུབ་པར་དཀའ་ངལ་ཤུགས་ཆེར་འཕྲད་ཡོད། དེར་བརྟེན་འོས་བསྡུ་བྱ་རྒྱུར་ཉིན་བཅོ་བརྒྱད་ལས་མེད་པའི་སྐབས་འདིར། ང་ཚོ་ན་གཞོན་དང་བླངས་པའི་རུ་ཁག་འདིས་ས་གནས་ཁག་ཚང་མའི་བོད་མི་མང་ཚོགས་ཚོར། ཉིན་བཅོ་བརྒྱད་ཀྱི་དུས་ཡུན་འདིའི་ནང་དེབ་སྐྱེལ་ཚར་བ་བྱ་རྒྱུའི་འབོད་སྐུལ་ཞུ་གིན་ཡོད་ཅེས་གསུངས་ཡོད།

གསར་འགོད་པ། ཨ་རིག་འགྱུར་མེད།