གཞོན་ནུའི་ཚོགས་ཆེན་སྐབས་ ༡༤ པ་འཚོགས་པ།

དེ་རིང་ཞོགས་པར་ངྷ་སྟེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་ནང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༤ པའི་མཛད་སྒོ་འཚོགས་ཡོད་ལ། ཐེངས་འདིའི་ཚོགས་ཆེན་སྟེང་ས་གནས་ཁག་ ༤༧ ནས་ཚོགས་ཞུགས་མི་སྣ་ ༡༧༠ ལྷག་ཕེབས་ཡོད་འདུག

གཞོན་ནུ་ལྷན་ཚོགས་ཀྱི་ཐེངས་ ༡༤ བའི་ཚོགས་ཆེན་གྱི་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་རྒྱལ་རི་སྒྲོལ་མས་གཙོས་རྒྱུན་ལས་ཁག་ཅིག་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་རྒྱུན་ལས་ཟུར་བ་ཁག་ཅིག གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་ས་གནས་ཁག་གི་ཚོགས་ཞུགས་མི་སྣ། གསར་འགོད་པ་སོགས་མི་སྣ་ ༢༠༠ ཙམ་འདུ་འཛོམས་བྱུང་ཡོད།

ཚོགས་ཆེན་གྱི་མཛད་སྒོའི་སྟེང་བོད་ཀྱི་གཞོན་ནུ་ལྷན་ཚོགས་ཀྱིས་བོད་རང་བཙན་གཟེངས་རྟགས་དང་རྒྱལ་གཅེས་དཔའ་བོའི་གཟེངས་རྟགས། སྤྱི་ཚོགས་ཞབས་ཕྱིའི་གཟེངས་རྟགས། ས་གནས་གཞོན་ནུ་རྩེ་ཕུད་ཀྱི་གཟེངས་རྟགས་བཅས་ཕུལ་ཡོད་ལ། ས་གནས་གཞོན་ནུ་ཁག་གི་གཟེངས་བསྟོད་བྱ་དགའ་ཨང་དང་པོར་སྦེལ་ཀོབ་ས་གནས་བོད་ཀྱི་གཞོན་ནུ་དང་། ཨང་གཉིས་པ་རྡོ་རྗེ་གླིང་ས་གནས་བོད་ཀྱི་གཞོན་ནུ། ཨང་གསུམ་པ་སུམ་ལ་ས་གནས་བོད་ཀྱི་གཞོན་ནུ་བཅས་ལ་གནང་ཡོད།

རྒྱལ་གཅེས་དཔའ་བོའི་གཟེངས་རྟགས་དེ་ཕྱི་ལོ་ ༢༠༠༨ ལོའི་བོད་གཞིས་ཀྱི་བོད་རིགས་སྤུན་ཟླ་རྣམས་ཀྱིས་ཞི་བའི་ངོ་རྒོལ་གྱི་ལས་འགུལ་སྤེལ་པར་གནང་ཡོད་ལ། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ངག་དབང་འོད་འབར་ལགས་ཀྱིས་གཞིས་བཞུགས་སྤུན་ཟླ་རྣམས་ཀྱི་འཐུས་ཚབ་གནང་སྟེ་གཟེངས་བསྟོད་བྱ་དགའ་བཞེས་ཡོད།

བོད་རང་བཙན་གཟེངས་རྟགས་དེ་ ༢༠༠༨ ལོར་ཞི་རྒོལ་ཆེན་མོའི་ནང་འདས་གྲོངས་སུ་ཕྱིན་པ་རྣམས་ཀྱི་ཆེད་དུ་གནང་ཡོད་ལ། བོད་རང་བཙན་འཐབ་རྩོད་པ་དང་གཞོན་ནུ་ལྷན་ཚོགས་ཀྱི་ཚོགས་གཙོ་ཟུར་བ་ལྷ་བཟང་ཚེ་རིང་ལགས་ཀྱིས་བོད་གཞིས་ཀྱི་རྒྱལ་གཅེས་དཔའ་བོ་རྣམས་ཀྱིས་འཐུས་ཚབ་གནང་སྟེ། གཟེངས་བསྟོད་བྱ་དགའ་བཞེས་ཡོད།

སྤྱི་ཚོགས་ཞབས་ཕྱིའི་བྱ་དགའ་འདི་ལོའི་ལོ་མགོར་ཡུལ་ཤུལ་ཁུལ་དུ་ས་ཡོམ་གྱི་གནོད་སྐྱོན་བྱུང་སྐབས། གཞིས་ཀྱི་ས་ཁུལ་ཁག་མང་བོའི་གཞིས་བཞུགས་སྤུན་ཟླ་རྣམས་ཀྱིས་མ་སྐུལ་དང་བླངས་ཐོག ས་ཡོམ་གྱི་གོད་ཆག་བྱུང་བའི་ཡུལ་མི་རྣམས་ལ་མྱུར་སྐྱོབ་དང་སྨན་བཅོས་རོགས་རམ། གཤིན་པོར་འདས་མཆོད་བསྒྲུབས་པ་སོགས་ལ་གནང་ཡོད་ལ། ཡུལ་ཤུལ་གདུང་སེལ་མྱུར་སྐྱོབ་ཚོགས་ཆུང་གི་རྩིས་པ་བློ་བཟང་ཚེ་རིང་ལགས་ཀྱིས་གཟེངས་བསྟོད་བྱ་དགའ་བཞེས་ཡོད།

ཉིན་དེར་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས། དེ་རིང་ང་ཚོ་འདིར་ཉིན་བདུན་རིང་ལྷན་འཛོམས་གནང་བ་འདི་བཀའ་དྲིན་རྗེས་དྲན་ཙམ་གྱི་ཆེད་དུ་མིན་པར། ལྷན་ཚོགས་འདི་ཐོག་མར་བཙུགས་པའི་དམིགས་དོན་ཁག་སྐབས་བབ་ལག་བསྟར་རྒྱུན་འཆང་བྱེད་མཁན། ད་ཡོད་གཞོན་ལྷན་དབུས་སའི་རྒྱུན་ལས་ཚོས་སྒྲིག་འཛུགས་ཀྱི་ལོ་སྔ་མའི་ལས་དོན་ལ་ཞིབ་བཤེར་དང་། མ་འོངས་པའི་ལས་འཆར་བཀོད་སྒྲིག་དང་། ལྷག་པར་དུ་དབུས་སྤྱི་ཁྱབ་རྒྱུན་ལས་སྐབས་ ༡༤ པ་འོས་འདེམས་བྱ་ཆེད་ཡིན་ཞེས་གསུངས།

ཁོང་གིས་གལ་ཆེའི་དོན་ཚན་གཉིས་གསུངས་དོན། དང་པོ། ད་ཡོད་དབུས་སུའི་འགན་འཁུར་བ་དང་ཚོགས་མི་ཡོངས་ནས་སྒྲིག་འཛུགས་འདིའི་ཚོགས་མི་དང་དབུ་ཁྲིད་རྒན་པ་ཚོའི་ལྷག་བསམ་རྣམ་དག་དང་ཐུགས་རེ་བཟང་པོ་རྒྱུན་འཆང་གིས། དཔྱད་ཞིབ་དང་ཁ་ཕྱོགས་མ་ནོར་བའི་སྒོ་ནས་སྒེར་སེམས་མེད་པར། སྒྲིག་འཛུགས་འདི་ལ་ངེས་པར་འགན་འཁུར་ཁ་ཞེ་གཉིས་མེད་གནང་རྒྱུ་དང་། གཉིས། སྒྲིག་འཛུགས་འདི་ཉིད་ལས་འགུལ་རང་བཞིན་གྱི་ལྷན་ཚོགས་ཤིག་ཡིན་པ་ལས། ཆབ་སྲིད་ཚོགས་པ་ཞིག་མིན་པ་དབུ་ཁྲིད་རྒན་གྲས་ཚོའི་གསུང་རྒྱུན་ཡིན་ཐོག ༢༠༠༧ ལོར་གཞོན་ལྷན་ཚོགས་ཆེན་གྱི་ཚོགས་བཅར་བ་རྣམས་མཇལ་བཅར་སྐབས། ༧གོང་ས་མཆོག་གིས་ཀྱང་ལྷན་ཚོགས་འདི་ཆབ་སྲིད་ཀྱི་ཚོགས་པ་ཞིག་མིན་པ་དྲན་སྐུལ་ནན་གསུངས་མཛད་ཡོད་ཅིང་། སྒྲིག་འཛུགས་འདི་ཉིད་སྲིད་དོན་གྱི་ཚོགས་པ་ཞིག་མིན་པར་ལས་འགུལ་རང་བཞིན་གྱི་ལྷན་ཚོགས་ཤིག་ཡིན་པ་དེ་ནི་སྒྲིག་འཛུགས་འདིའི་ས་མཚམས་དང་། མ་འོངས་པར་སྒྲིག་འཛུགས་ཡུན་གནས་ཀྱི་ལྕགས་རི་ལྟ་བུ་ཞིག་ཡིན་པ་དེ་དབུས་ས་ཚང་མས་ངེས་ཤེས་ལག་བསྟར་དགོས་པ་བསྐྱར་བརྗོད་ཞུ་རྒྱུ་ཡིན་ཞེས་གསུངས།

ཡང་ཁོང་གིས། སྤྱིར་ང་ཚོ་བོད་མི་ས་ཡ་དྲུག་ཐུན་མོང་གི་ནུས་ཤུགས་དོན་སྨིན་དང་འཐབ་རྩོད་ཀྱི་རྒྱལ་ཁ་ནམ་ཞིག་འཐོབ་མིན་གཙོ་བོ་ནི། གཞན་གྱི་རྒྱབ་སྐྱོར་དང་ངོས་འཛིན་ལ་རག་མི་ལས་པར། ང་ཚོའི་ཆིག་སྒྲིག་དང་འགན་འཁུར་གྱི་ནུས་ཤུགས་ལ་རག་ལས་ཡོད་པས། དེ་རིང་གོ་སྐབས་འདི་བརྒྱུད་ཚང་མས་༧གོང་ས་མཆོག་གི་བཀའ་དགོངས་དང་། བོད་རང་བཙན། སྒྲིག་འཛུགས་ཀྱི་ཆེ་མཐོང་དང་སྒྲིག་གཞི་སོགས་ཁ་འཁྲི་མགོ་སྐོར་དང་ཁ་མཁས་ཚིག་སྟོང་ཙམ་མིན་པར། ༧གོང་ས་མཆོག་གི་བཀའ་དགོངས་དང་བོད་རང་བཙན་སླར་གསོ། དེ་བཞིན་གཞོན་ལྷན་གྱི་མཚན་མཐོང་བཅས་ལ་ལྷག་བསམ་རྣམ་དག་གིས་ཀུན་སློང་དང་བྱ་སྤྱོད་དངོས་ཀྱི་སྒོ་ནས་ཆིག་སྒྲིལ་དང་འགན་འཁུར་གྱི་ནུས་པ་སྤུང་དགོས་པའི་དྲན་སློང་དང་རེ་སྐུལ་ཞུ་རྒྱུ་ཡིན་ཞེས་དང་།

གཞིས་ལུས་སྤུན་ཟླ་ཚོས་ལུས་སྲོག་ལ་མནར་གཅོད་དང་འཇིགས་ཉེན་ཡོང་བ་ཤེས་བཞིན་དུ། ངོ་ལོ་ལྔ་བཅུའི་རིང་རང་སྲོག་བློས་གཏོང་གིས་གོ་མཚོན་གྱི་སོ་ཁ་ནས་རང་བཙན་གྱི་མངོན་འདོད་ཆེད་ཆོད་སེམས་ལ་འགྱུར་བ་མེད་པར་འཐབ་རྩོད་རྒྱུན་འཆང་དང་། ལྷག་པར་དུ་ ༢༠༠༨ ལོ་ནས་གཞིས་ལུས་ན་གཞོན་མི་རབས་གསར་པ་ཚོས་སྔར་བས་ཀྱང་། རྒྱལ་ཞེན་དང་སྙིང་སྟོབས་ཀྱི་ཆོད་སེམས་ཇེ་གསལ་ཇེ་བརྟན་ངང་ཚེ་སྲོག་ལ་བརྟེན་ནས་བོད་རང་བཙན་སླར་གསོའི་འཐབ་རྩོད་ཚད་མཐོ་རུ་བཏང་བ་ནི། ང་ཚོའི་རྒྱལ་ཁའི་སྒོ་མོ་དང་མདུན་སྐྱོད་ཀྱི་འབོད་སྒྲ་ནུས་ལྡན་ཞིག་ཡིན་སྟབས། ང་ཚོ་རང་དབང་ལུང་པར་འབྱོར་བའི་བཙན་བྱོལ་བོད་མིས་མ་མཐར་ཡང་གཞིས་ལུས་བོད་མིའི་རང་བཙན་གྱི་མངོན་འདོད་དང་འབོད་སྒྲ་དེ་ངེས་པར་རྒྱལ་སྤྱིའི་ཐོག་བསྐྱལ་ཐུབ་པ་དང་། རང་བཙན་གྱི་བདེན་གཏམ་བཤད་ཕོད་པའི་ཆོད་སེམས་བརྟན་པོ་དགོས་པ་ནི། འཐབ་རྩོད་ཀྱི་རྨང་གཞི་གཙོ་བོ་དང་གལ་ཆེའི་འོས་འགན་ཡིན་ཞེས་གསུངས་ཡོད།

མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་ལགས་ཀྱིས། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱི་ངོས་ནས་སྔར་ནས་བོད་རང་བཙན་གཙང་མ་དགོས་པའི་ལངས་ཕྱོགས་བཟུང་ཡོད་པ་ནི་དངོས་ཡོད་གནས་ཚུལ་ཞིག་ཡིན་མོད། བར་སྐབས་ཤིག་ནས་རྒྱ་གཞུང་གིས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་དེ་འཇིགས་སྐུལ་རིང་ལུགས་པའི་སྒྲིག་འཛུགས་ཤིག་རེད་ཅེས་འཁྱོག་བཤད་བྱེད་ཀྱིན་ཡོད། དེའི་ཐད་བཙན་བྱོལ་བོད་གཞུང་དང་ལྷག་པར་དུ་བོད་མི་མང་སྤྱི་འཐུས་ལྷན་ཚོགས་ཀྱིས་སྔར་ནས་ཞུས་མྱོང་ལ། དེ་རིང་གི་ཚོགས་ཆེན་འདིའི་ཐོག་ནས་ཐག་ཆོད་པའི་ཐོག་ནས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་འཇིགས་སྐུལ་རིང་ལུགས་པའི་སྒྲིག་འཛུགས་ཤིག་མིན་པར། བརྒྱ་ཆ་བརྒྱ་ཤེས་ཀྱི་ཡོད་ལ་ཡིད་ཆེས་ཀྱང་ཡོད་ཅེས་གསུངས།

ཁོང་གིས་ད་དུང་། རྒྱ་ནག་གིས་གཞོན་ནུ་ཚོགས་པ་འཇིགས་སྐུལ་རིང་ལུགས་པ་རེད་ཟེར་བ་ལྟ་བུ། དགྲ་ཕྱོགས་ནས་ཚུར་སྐྱོན་བརྗོད་ཤུགས་ཆེར་བྱས་ཡོང་དུས་དེ་ནི་གཞོན་ནུའི་ལས་དོན་ལ་ནུས་པ་ཡོང་གི་ཡོད་པའི་རྟགས་རེད་ལ། རྒྱ་གཞུང་གིས་ཤེས་བཞིན་དུ་རྫུན་སྒྲིག་དང་འཁྱོག་བཤད་བྱས་པར་བཤད་རྒྱུ་གང་ཡང་མེད་མོད། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱི་སྟེང་ནས་མུ་མཐུད་དེ་ཕྱག་ལས་གནང་དགོས་པ་རེད་ཅེས་གསུངས་ཡོད།

བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་དོན་འགྲུབ་ལྷ་དར་ལགས་ཀྱིས་ཉིན་དེར་གསར་འགོད་པའི་བཅར་འདྲི་དང་ལེན་སྐབས་གསུངས་དོན། དེ་རིང་གི་ཚོགས་འདུའི་སྟེང་རྒྱལ་གཅེས་དཔའ་བོའི་གཟེངས་རྟགས་དང་སྤྱི་ཚོགས་ཞབས་ཞུའི་གཟེངས་རྟགས། རང་བཙན་འཐབ་རྩོད་པའི་གཟེངས་རྟགས་སོགས་ཀྱི་བྱ་དགའ་ཕུལ་བ་དེ། ང་ཚོས་གཞིས་ལུས་རྒྱ་ཆེའི་མི་མང་གི་སྙིང་སྟོབས་དང་རིགས་ཞེན། ལ་རྒྱ་སོགས་ལ་གུས་བཀུར་གྱི་ཆེད་དུ་ཕུལ་བ་ཡིན། དེ་ནི་བཙན་བྱོལ་སྤྱི་ཚོགས་ཀྱི་ལོ་ངོ་ལྔ་བཅུ་ལྷག་གི་ནང་ཏན་ཏན་རྒྱལ་རབས་ལོ་རྒྱུས་ནང་འཁོད་འོས་པ་ཞིག་དང་མ་འོངས་པར་ཡང་། འཐབ་རྩོད་ཀྱི་མདུན་སྐྱོད་དེ་ཚད་མཐོ་རུ་གཏོང་ཐུབ་པ་ཞིག་ལ་ངོས་འཛིན་ཞུ་གིན་ཡོད།

དེ་རིང་གི་གཟེངས་རྟགས་ཕུལ་བ་དེ་ཡང་གཟེངས་རྟགས་ཀྱི་གནད་དོན་གཅིག་པུ་ཙམ་མིན་པར། བོད་ཕྱི་ནང་གཉིས་ཀྱི་བསམ་འདུན་གཅིག་ཡིན་པ་དང་། གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱི་རེ་བ་ཆེ་ཤོས་དང་འཐབ་རྩོད་ཀྱི་བདག་པོ་བོད་གཞིས་ལུས་རྒྱ་ཆེའི་མི་མང་ཡིན་པར་མ་ཟད། མ་འོངས་པར་བོད་གཞིས་བྱེས་གཉིས་ཀྱི་བོད་མི་ཚོས་འཐབ་རྩོད་ཀྱི་ཚད་མཐོ་རུ་བཏང་སྟེ། ༧གོང་ས་སྐུ་ཕྲེང་བཅུ་བཞི་བ་ཁོང་ཕྱིར་བོད་དུ་གདན་འདྲེན་ཐུབ་པ་ཡོང་ཆེད་དུ་ཡིན་ཟེར།

ཐེངས་འདིའི་ཚོགས་ཆེན་སྟེང་སྐབས་ ༡༣ པའི་གྲོས་ཆོད་ཁག་ལ་ཞིབ་བཤེར་དང་འབྲེལ་ཕྱག་ལེན་འཁེལ་བསྡད་མཇུག་སྐྱོང་གནང་ཕྱོགས་སྐོར་དང་། ཆབ་སྲིད་དང་འབྲེལ་བའི་གཞོན་ནུའི་ལངས་ཕྱོགས་དང་ལས་དོན་སྤེལ་ཕྱོགས་སྐོར། རིག་གཞུང་ཅེས་འཛིན་སྐོར། ༧གོང་ས་མཆོག་གི་སྐུ་ཕྱཱའི་སྐོར། གཞོན་ནུའི་སྒྲིག་འཛུགས་སྲ་བརྟན་དང་སྤྱི་ཚོགས་ཞབས་ཞུའི་སྐོར་སོགས་ལ་བགྲོ་གླེང་གནང་རྒྱུ་ཡིན་འདུག་ལ། ཉིན་དང་པོར་གཞོན་ནུའི་ཚོགས་གཞོན་དོན་གྲུབ་རྡོ་རྗེ་ལགས་ཕྱིར་འཕུད་དང་འབྲེལ་བའི་གནད་དོན་སྐོར་ལ་བགྲོ་གླེང་གནང་རྒྱུ་ཡིན་འདུག

གསར་འགོད་པ། ཨ་རིག་འགྱུར་མེད།