རང་དབང་བརྩོན་ལེན་གྱི་འཐབ་བྱུས། ༼བཞི་པ།༽ བོད་འབྱོར།

བོད་མིའི་རང་དབང་དང་ཐོབ་ཐང་བརྩོན་ལེན་ཐད་ཀྱི་འཐབ་ཇུས་དང་ལག་བསྟར།

བཞི་བ། བཙན་བྱོལ་བོད་གཞུང་གི་ནུས་ཤུགས་གོང་མཐོར་གཏོང་བ།

ཀ གཞུང་ཞབམ་རྣམ་གྱི་ཐོབ་ཐང་ཡར་རྒྱས་གཏོང་བ།

བཙན་བྱོལ་བོད་གཞུང་ནི་བོད་བཙན་བྱོལ་སྤྱི་ཚོགས་མཉམ་གཅིག་ཏུ་སྦྲེལ་བྱེད་ཀྱི་ཁྲག་རྩ་ལྟ་བུ་དང་ཁྲག་རྩ་ནང་གི་ཁྲག་དེ་ཉིན་རེ་བཞིན་འཁོར་རྒྱུགས་བྱེད་དུ་འཇུག་མཁན་ནི་བཙན་བྱོལ་བོད་གཞུང་གི་གཞུང་ཞབས་རྣམ་པ་རེད།དེ་བས་གཞུང་ཞབས་རྣམ་པའི་སྒེར་གྱི་འཚོ་ བའི་ཐད་བསྡོད་གནས་དང་བུ་ཕྲུག་སློབ་འཇུག་ནང་མིའི་འཕྲོད་བསྟེན།རྒན་ཡོལ་རྗེས་ཀྱི་འཚོ་བར་འགན་ལེན་གྱིས་རྒན་ཕོག་ལ་སོགས་ཀྱི་ཐད་སེམས་ཁྲལ་གནང་མི་དགོས་པར་ཕུན་ སུམ་ཚོགས་པའི་ཆ་རྐྱེན་བསྐྲུན་དགོས་པ་ནི།བཙན་བྱོལ་བོད་གཞུང་གི་གཡོལ་བཤོལ་མི་རུང་ བའི་འོས་འགན་རེད།དེ་ལྟར་ཡིན་པའི་དབང་གིས་བཙན་བྱོལ་བོད་གཞུང་གི་ངོས་ནས་གོམ་པ་དང་པོ་དེ་གཞུང་ཞབས་རྣམ་པའི་ཟླ་ཕོག་ཆེན་པོ་སྤར་དགོས།

ཁ།    ལས་བྱེད་སྦྱོང་བརྡར།

བཙན་བྱོལ་བོད་གཞུང་གི་གཞུང་ཞབས་དང་བཙན་བྱོལ་བོད་སྤྱ ི་ཚོགས་ཀྱ ི་ལས་བྱེད་ པ་རྣམ་པས་ཧུར་བརྩོན་གྱ ིས་ཞབས་ཞུ་ཞུས་པ་ལ་བརྟེན་ནས་བླ ་ན་མེད་པའི་གྲུ བ་ འབྲ ས་ཐོབ་ཡོད་པ་རེད།    རྒྱུ ན་ཤེས་ལྟར་ན་ལས་བྱེད་སོ་སོའི་ལས་ཀ་དང་འབྲེལ་ ཡོད་སྐོར་གྱི་ཆེད་ལས་ཐད་ཅི་ཙམ་གྱི་ཤེས་བྱ་ལག་རྩལ་ཡོད་ན་དེ་ཙམ་གྱིས་གྲུབ་འབྲས་ལེགས་པོ་བསྐྲུན་ཐུབ་ཀྱིན་ཡོད་པ་ལྟར།བོད་བཙན་བྱོལ་སྤྱི་ཚོགས་ཀྱི་གཞུང་ཞབས་དང་ལས་ བྱེད་རྣམ་པར་ཡང་དུས་དང་རྣམ་པ་ཀུན་དུ་ཆེད་ལས་སྦྱོང་བརྡར་རྣམ་པ་འདྲ་མིན་དང་དུས་ ཡུན་འདྲ་མིན། ཐབས་ཤེས་འདྲ་མིན་གྱིས་སྤེལ་བ་ཡིན་ན།བོད་བཙན་བྱོལ་སྤྱི་ཚོགས་ཀྱི་ ལས་བྱེད་པའི་ཆེད་ལས་སྐོར་གྱི་ཤེས་བྱ་དང་ནུས་པ་སྔར་ལས་ལྷག་པར་གོང་འཕེལ་དུ་སོང་ ནས་དེ་བས་ཀྱང་བླ་ན་མེད་པའི་གྲུབ་འབྲས་བསྐྲུན་ཐུབ་གི་རེད།དེ་བས་ལས་བྱེད་སྦྱོང་བརྡར་ སྤྲོད་ཕྱོགས་ཀྱི་ཐབས་ལམ་ཐད་དཔེར་ན།

༡    ཟབ་སྦྱོང་སྤྲོད་མཁན་གྱི་ཆེད་ལས་མཁས་པ་རྡ་རམ་ས་ལར་གདན་ཞུས་ཀྱིས་ རིགས་འདྲའི་ལས་བྱེད་པ་ཕྱོགས་བསྡུས་ཀྱིས་འབྲེལ་ཡོད་ཆེད་ལས་ཟབ་སྦྱོང་སྤྲོད་པ།

༢    དགོས་མཁོ་དང་གནས་ཚུལ་ལ་བརྟེན་ནས་ལས་བྱེད་པ་འདེམས་ཏེ་རྒྱ་གར་གྱ ི་འབྲེལ་ ཡོད་སྡེ་ཚན་དང་སློབ་གྲྭ་ཁག་གི་ནང་འབྲེལ་ཡོད་ཆེད་ལས་ཐད་ཟབ་སྦྱོང་དུ་གཏོང་བ།

༣    དགོས་མཁོ་དང་གནས་ཚུལ་ལ་བརྟེན་ནས་ལས་བྱེད་པ་འདེམས་ཏེ་ཕྱི་རྒྱལ་ཡུལ་ གྲུ་ཁག་གི་འབྲེལ་ཡོད་སྡེ་ཚན་དང་སློབ་གྲྭ་ཁག་གི་ནང་འབྲེལ་ཡོད་ཆེད་ལས་ཐད་ཟབ་སྦྱོང་ ཆེད་གཏོང་བ།འདིར་གལ་ནན་ཆེན་པོས་ཞུས་རྒྱུ་ཞིག་ནི་གོང་གསལ་གྱི་ཟབ་སྦྱོང་ལས་གཞི་དེ་རིགས་ངེས་པར་དུ་ཞིབ་ཕྲ་ཡིན་པ། (Specific)
གྲངས་ཚད་ལྡན་པ། (Measurable)
སྒྲུབ་ཐུབ་པ།  (Achievable)
དངོས་ཡོད་གནས་ཚུལ་དང་མཐུན་པ། (Realistic)
དུས་ཡུན་གྱི་ཚད་ཡོད་པའི་ (Timely) སྒོ་ནས་འཆར་འགོད་བྱས་ཏེ།
ཟབ་སྦྱོང་གྲུབ་ཟིན་དུས་ཟབ་སྦྱོང་ལ་ཞུགས་པའི་ལས་བྱེད་གང་ཟག་སྒེར་པ་མི་རེ་ངོ་རེའི་ ངོས་ནས་འབྲེལ་ཡོད་ལས་རིགས་ཀྱི་ཤེས་བྱ་དང་ལག་རྩལ་གཏིང་ཟབ་ཏུ་སོང་ཡོད་པ་མ་ཟད།
 ཉིན་རེའི་འབྲེལ་ཡོད་ལས་ཀའི་སྤུས་ཀ་དང་མགྱོགས་ཚད་གྲངས་ཚད་ཀྱི་སྟེང་ནས་སྟོན་ཐུབ་ པའི་མིག་མཐོང་ལག་ཟིན་གྱི་གྲུབ་འབྲས་ལྡན་པར་བྱེད་དགོས།

ག    ཉམས་མྱོང་ཅན་གྱི་ལས་བྱེད་ནང་འདྲེན་ཞུས་རྒྱུ།

བཙན་བྱོལ་བོད་གཞུང་གི་ནུས་ཤུགས་གོང་མཐོར་སྤེལ་བའི་ཆེད་དུ་དེ་སྔའི་བཙན་བྱོལ་བོད་ གཞུང་གི་ལས་བྱེད་རྙིང་པ།ཕྱི་རྒྱལ་ཡུལ་གྲུ་ཁག་ཏུ་ཕེབས་ནས་ད་ལྟ་གཞི་བསྡོད་ཆགས་ཟིན་ ཡོད་པ་ཚོ་ཕྱིར་གདན་འདྲེན་ཞུས་ཏེ་བོད་བཙན་བྱོལ་སྤྱི་ཚོགས་ལ་རོགས་རམ་ཞུ་རྒྱུ། དེ་ཡང་ཕྱི་རྒྱལ་དུ་གནས་བསྡོད་བྱས་ཡོད་པའི་བཙན་བྱོལ་བོད་གཞུང་གི་ལས་བྱེད་རྙིང་པ་ ཚོས་ལོ་མང་པོའི་རིང་བཙན་བྱོལ་བོད་གཞུང་ལ་ཞབས་ཞུ་ཞུས་པའི་དབང་གིས།ཁོང་ཚོ་ བཙན་བྱོལ་བོད་སྤྱི་ཚོགས་ལ་རྒྱུས་མངའ་ཆེ་ཞིང་ལས་ཀའི་ཉམས་མྱོང་ཕུན་སུམ་ཚོགས་པ་ ལྡན་པའི་སྟེང་།ལྷག་པར་དུ་ཁོང་ཚོར་བོད་གཞུང་དང་མི་དམངས་ལ་བརྩེ་སེམས་དང་ཤ་ཞེན་ གཏིང་ཟབ་ཡོད་པ་རེད།དེ་ཙམ་དུ་མ་ཟད་ཁོང་རྣམ་པ་ཕྱི་རྒྱལ་དུ་ཕེབས་ནས་རིག་གཞུང་ དང་སྤྱི་ཚོགས་མི་འདྲ་བའི་ཁོར་ཡུག་ཁྲོད་ཉམས་མྱོང་གསར་བ་དང་ཤེས་བྱ་གསར་བ་ལེགས་ གྲས་གང་མང་ཐོབ་ཡོད་པའི་སྟེང་།དེའི་ཁྲོད་ཀྱི་མི་སྣ་མང་པོ་ཞིག་ལ་ཆ་མཚོན་ན་ད་ལྟའི་ཆར་ དཔལ་འབྱོར་དང་འཚོ་བའི་གནས་སྟངས་སོགས་ཕྱོགས་གང་ཅིའི་ཐད་མཐུན་རྐྱེན་ཕུན་སུམ་ ཚོགས་པ་ལྡན་ཡོད།ཁོ་ཚོའི་གྲས་ཀྱི་མི་སྣ་མང་པོ་ཞིག་ལ་བོད་གཞུང་དང་བོད་བཙན་བྱོལ་སྤྱི་ ཚོགས་ལ་རོགས་སྐྱོར་དང་ཞབས་འདེགས་ཞུས་འདོད་ཀྱི་ཕུགས་བསམ་དྲོན་མོ་ཡོད།དེ་བས་ བོད་གཞུང་བཀའ་ཤག་ནས་བཅོས་མིན་ལྷག་བསམ་གྱིས་ཁོང་རྣམ་པ་ཕྱིར་རྒྱ་གར་ལ་གདན་ འདྲེན་ཞུས་ཏེ།དང་བླངས་དང་ཕྱེད་དང་བླངས་ཀྱིས་བོད་གཞུང་ལ་དུས་ཡུན་རིང་ཐུང་འདྲ་ མིན་ཐོག་རོགས་རམ་ཞུས་སུ་བཅུག་པ་ཡིན་ན།ཕྱོགས་གཅིག་ནས་བཙན་བྱོལ་བོད་གཞུང་གི་ ནུས་ཤུགས་ཡར་འདེགས་བྱེད་ཐུབ་པ་དང་ཡང་ཕྱོགས་གཅིག་ནས་དང་བླངས་ལས་བྱེད་པ་དེ་ དག་གིས་བོད་གཞུང་དང་བཙན་བྱོལ་སྤྱི་ཚོགས་ལ་རོགས་རམ་བྱེད་འདོད་ཀྱི་རེ་བ་བཟང་པོ་ དེ་ཡང་བསྐོངས་ཐུབ་ཡོད་པ་རེད།

ཉམས་མྱོང་ཅན་གྱི་ལས་བྱེད་གདན་འདྲེན་ཞུས་པའི་ཆེད་དུ་བོད་གཞུང་བཀའ་ཤག་ནས་ དམིགས་གསལ་འབྲེལ་མཐུད་སྡེ་ཚན་ཞིག་བཙུགས་ཏེ། འབྲེལ་མཐུད་སྡེ་ཚན་དེས་ཕྱོགས་ གཅིག་ནས་ཕྱི་རྒྱལ་ཡུལ་གྲུ་ཁག་དུ་གནས་བསྡོད་བཙན་བྱོལ་བོད་མིའི་ལས་བྱེད་རྒན་པ་ཚོར་ འབྲེལ་གཏུགས་ཀྱིས་གནས་ཚུལ་རྒྱུས་ལོན་དང་ཤེས་རྟོགས་ཡོད་པར་བྱེད་པ།ཕྱོགས་གཞན་ ཞིག་ནས་བཙན་བྱོལ་བོད་གཞུང་གི་ལས་ཁུངས་ཁག་ལ་འབྲེལ་གཏུགས་ཀྱིས་བཙན་བྱོལ་བོད་ གཞུང་གི་ལྷན་ཁང་ཁག་གི་ནང་གསེས་ལས་ཁུངས་འདྲ ་ མིན་གྱ ི་ལས་རིགས་སྡེ་ཚན་ཁག་ ལ་མཁོ་པའི་རོགས་རམ་བརྩད་བཅད་དེ།ཕན་ཚུན་བར་གྱི་གནས་སྟངས་ཁག་ལ་རྒྱུས་ལོན་ གྱིས་དང་བླང་ལས་ཀ་བཀོད་སྒྲིག་བྱེད་རྒྱུ།ལས་གཞི་འདིའི་ཐད་བཙན་བྱོལ་བོད་གཞུང་ བཀའ་ཤག་གིས་བསྐྲུན་དགོས་པའི་མཐུན་འགྱུར་ཁག་ནི།

༡    བོད་གཞུང་བཀའ་ཤག་གིས་ཁོང་རྣམ་པར་གདན་ཞུས་ཡི་གེ་འབུལ་བ།

༢    བོད་གཞུང་བཀའ་ཤག་གིས་ཁོང་རྣམ་པར་ཉུང་མཐའ་ཡང་ཟླ་བ་གསུམ་གསཡི་ ཞིབ་ཕྲའི་ལས་ཀ་བཀོད་སྒྲིག་བྱེད་པ།

༣    བོད་གཞུང་བཀའ་ཤག་གིས་ཁོང་རྣམ་པར་བསྡོད་གནས་མཁོ་སྤྲོད་བྱེད་པ།

༤    གདན་ཞུས་དང་བླང་ལས་བྱེད་པའི་ཁྲོད་གྲུབ་འབྲས་ལེགས་པོ་བསྐྲུན་མཁན་རྣམས་ལ་ཐུགས་རྗེ་ཆེ་ཞུས་དཔང་ཡིག་དང་ལེགས་སྐྱེས་འབུལ་རྒྱུ།

༼མུ་འགོད།༽