བོད་ནས་ཁ་པར་བརྒྱུད་གནས་ཚུལ་འབྱོར་བ་ལྟར་ན་མདོ་ཁམས་སྡེ་དགེ་འཇོ་མདའ་རྫོང་གིས་ཨད་སྤུན༼ དབེན་པའི ༽ གདོང་སྒྲ་གྲོང་ཚོའི་བོད་མི་ག་ལུག་ལ་ལོ ༡ དང་ཕྱེད་དང༌། དབང་ཕྱུག་ལ་ལོ་ ༡ བཅས་ཀྱི་ཁྲིམས་ཐག་བཅད་དེ་བཙོན་འཇུག་བྱས་ཏེ། ཟླ་ཁ་ཤས་ཕྱིན་ཡོད་ཀྱང་ད་བར་ཤེས་རྟོགས་ཐུབ་ཡོད་མི་འདུག ན་ནིང་སྡེ་དགེ་འཇོ་མདའ་རྫོང་ཁོངས་ནས་བོད་མི་མང་པོ་ཞིག་གིས་ས་ཞིང་མ་བཏབ་སྟེ། རྒྱ་གཞུང་ལ་མི་འདོད་པའི་རྣམ་འགྱུར་ཤུགས་ཆེན་བསྟན་སྐབས། རྒྱ་གཞུང་གིས་བོད་མི་ཞིང་དང་པོ་རྨོ་མཁན་ལ་སྒོར་ཁྲི་བརྒྱ་སྤྲོད་རྒྱུ་ཡིན་ཚུལ་སོགས་བཤད་ཀྱང་བོད་མི་རྣམས་ཀྱིས་ཁས་བླངས་མེད་པ་དང༌། རྒྱ་གཞུང་གིས་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་གྲོལ་ཐོབ་པའི་དགའ་སྟོན་ལེགས་སྐྱེས་ཆེད་ཡིན་ཟེར་ནས་རླངས་འཁོར་ཆེ་ཆུང་མང་པོ་སྤྲོད་འཆར་བྱས་ཀྱང་། བོད་མི་རྣམས་མ་གྲོས་བསམ་པ་གཅིག་མཐུན་གྱིས་མི་སུ་གང་གིས་རླངས་འཁོར་བླངས་མེད་པ་དང༌། ྋགོང་ས་མཆོག་ལ་མཚན་སྨོད་སྐུར་འདེབས་དགོས་པ་སོགས་ལ་དང་ལེན་བྱས་མེད་པ་རེད། ད་ལོ་ཡང་རྒྱ་གཞུང་གིས་ས་ཞིང་འདེབས་ལས་མ་བྱས་ན་མི་འགྲིག་པའི་བཙན་བཀའ་ཤུགས་ཆེན་བཏང་ཡོད་པ་དང༌། དཔྱིད་ཀ་ཙམ་ལ་གདོང་སྒྲ་གྲོང་ཚོའི་ལྷ་ཁང་དུ་སིདྷི་དང་མ་ཎི་སྒྲུབ་བའི་སྐབས་བོད་མི་རྣམས་ཀྱིས་གཅན་གཟན་གྱི་ལྤགས་རིགས་མེར་བསྲེག་བཏང་བས་རྒྱ་གཞུང་གི་ཉེན་རྟོག་པ་དང་། དམག་མི་བརྒྱ་ལྷག་འབྱོར་ཏེ་བཀག་འགོག་བྱས་པ་དང༌། བོད་མི་མང་པོ་ལ་ཚད་ལས་འདས་པའི་ཉེས་བརྡུང་བཏང་སྟེ་ཞང་ནང་དུ་བཀུག་སྐབས། གོང་གསལ་བོད་མི་གཉིས་ནས་རྒྱུ་མཚན་གསལ་བརྗོད་སོགས་བྱས་པར་བརྟེན་འཛིན་བཟུང་བཀག་ཉར་བྱས་པ་མ་ཟད། ད་སྐབས་ས་གནས་དེར་ཉེན་རྟོག་པ་དང་དམག་མི་མང་པོ་རྒྱུན་སྡོད་བྱེད་བཞིན་ཡོད་པ་དང་། བོད་མི་མང་པོ་ཞིག་ལ་སུན་བཙིར་དུ་མ་བཏང་རྐྱེན་རི་མགོ་སོགས་སུ་བྲོས་བྱོལ་དུ་འགྲོ་དགོས་ཆགས་ཡོད་པའི་གནས་ཚུལ་ཐོན་འདུག
གོང་གི་གནས་ཚུལ་འདི་དགེ་བཤེས་སྨོན་ལམ་ཐར་ཕྱིན་ལགས་ཀྱི་ཟིན་བྲིས་ལས་བཤུས།
