བཀའ་བློན་ཁྲི་པའི་འོས་གཞི།

   
ལོ་རྒྱུས་འདི་གསལ་བསྒྲགས་བྱེད་མཁན། བསྟན་པ་འབྲུག་གྲགས། ཨོ་སི་ཊིར་ལི་ཡ།( Australia) ཀརྨ་ཚེ་རིང་། བྷེལ་རྗམ། (Belgium) སྤེན་པ་བློ་བཟང་། དབྱིན་ཡུལ། (England) ཐུབ་བསྟན་རྒྱ་མཚོ།  ཧྥ་རན་སི། (France) སྐལ་བཟང་སྒྲོལ་དཀར། ཨི་ཊ་ལི། (Italy) མཁྱེན་རབ་ཆོས་འཕེལ། སི་པེན། (Spain) བློ་བཟང་ལགས། སུད་ཌན། (Sweden) ཨ་ད་སྐལ་བཟང་ཀང་རང་། སུད་སི། (Switzerland) སྐལ་བཟང་ཕུན་ཚོགས། ཨ་རི། (USA) བསོད་ནམས་དཔལ་ལྡན། ཨ་རི། (USA) བསོད་ནམས་ཚེ་རིང་། ཨ་རི། (USA) འབའ་ཡུལ་བཀྲ་ཤིས་བསྟན་འཛིན། ཨ་རི། (USA) ངག་དབང་ཆོས་ཆེན། ཨ་རི། (USA) ཨ་མདོ་ཚེ་རིང་། (USA)  བཅས་འཛམ་གླིང་གི་ས་ཕྱོགས་གང་སར་ཡོད་པ་བོད་གྱི་གནད་དོན་ལ་སེམས་ཁུར་དང་། དུས་རྒྱུན་བོད་དོན་ལས་འགུལ་བ་ང་ཚོ་སྒེར་ངོས་ནས་མཁས་དབང་བློ་བཟང་སེང་གེ་མཆོག་བཀའ་བློན་ཁྲི་པར་དགའ་མོས་ཀྱིས་དམིགས་བཀར་ངོ་སྤྲོད་ཞུ་བཞིན་ཡོད།

མཁས་དབང་བློ་བཟང་སེང་གེ་ནི་ཧར་ཝར་ཌི་གཙུག་ལག་སློབ་གྲྭ་ཆེན་མོའི་ཁྲིམས་ཀྱི་ཉམས་ཞིབ་པ་རྒན་གྲས་ཡིན།

རྡོ་རྗེ་གླིང་ས་གནས་དང་། སོ་ན་དྷའི་དབུས་བོད་སློབ་ཁག་གཉིས་ནང་སློབ་སྦྱོང་གནང་ཡོད་པ་དང་། ཕྱི་ལོ་༡༩༨༨ ནས་༡༩༩༡ བར་དབྱིན་ཇིའི་སྐད་ཡིག་ཐོག་ནས་ས་གནས་དེར་ཉེ་བའི་གཙུག་ལག་རབ་འབྱམས་པ་ B.A. (Honors )སློབ་མཐར་ཕྱིན། དེ་རྗེས་༡༩༩༡ ནས་༡༩༩༤ བར་ལྡི་ལིའི་གཙུག་ལག་སློབ་གྲྭ་ཆེན་མོའི་ནང་། ཁྲིམས་ལུགས་སྐོར་གྱི་ཉེ་བའི་གཙུག་ལག་རབ་འབྱམས་པ་ (LLB) སློབ་སྦྱོང་གནང་ཡོད་པ་རེད།

    ཕྱི་ལོ་༡༩༩༥ ཨ་རིའི་སློབ་ཡོན་ལས་གཞིའི་ཁོངས་སུ་འདེམས་ཐོན་བྱུང་ནས། ཧར་ཝར་ཌིའི་ཁྲིམས་ལུགས་སློབ་གྲྭའི་གཙུག་ལག་རབ་འབྱམས་པ་སློབ་དཔོན་གྱི་སློབ་སྦྱོང་མཐར་སོན་གནང་ཡོད་པས། བསླབ་པ་མཐར་སོན་གྱི་ཆེད་རྩོམ་དེ་ནང་ཆོས་དང་འགྲོ་བ་མིའི་ཐོབ་ཐང་སྐོར་ལ་བྲིས་ཡོད་པ་རེད། སུད་སི་ཇཱི་ནའི་ཝ་ནང་ཡོད་པའི་རྒྱལ་སྤྱིའི་ཁྲིམས་ལུགས་མཁས་པའི་ལྷན་ཚོགས་ནས། ༡༩༩༦ ལོའི་དབྱར་དུས་སུ་ཁོང་ལ་དམིགས་བསལ་སློབ་གཉེར་གྱི་གོ་སྐབས་གནང་ཡོད་པ་དང། དེ་དང་འབྲེལ་ནས་བོད་དོན་ཉམས་ཞིབ་ཀྱི་ཐོག་ལ། ཁྲིམས་ལུགས་ཀྱི་དབང་བསྒྱུར་དང། འགྲོ་བ་མིའི་ཐོབ་ཐང་གི་སྐོར་ལ་ ༡༩༩༧ ལོར་སྙན་ཐོ་པར་སྐྲུན་གནང་ཡོད་པ་རེད། ༡༩༩༦ ལོར་ཁོང་ལ་སྙན་གྲགས་ཆེ་བའི་དམིགས་བསལ་མཁས་དབང་གི་སློབ་སྦྱོང་གི་གོ་སྐབས་ཐོབ་ཡོད་པས། ཁོང་གིས་བོད་ཀྱི་ཤེས་ཡོན་ལམ་ལུགས་གཞིར་བཟུང་ཐོག་ནས། ཨེ་ཤ་ཡ་ཞི་བདེ་རྒྱ་མཚོའི་ཁུལ་གྱི་རྒྱལ་ཁབ་ཁག་གི་འགྲོ་བ་མིའི་རིན་ཐང་དང་། འགྲོ་བ་མིའི་ཐོབ་ཐང་ཞེས་པའི་མིང་འཁོད་པའི་རྩོམ་ཡིག་ལེ་ཚན་ཞིག་ཀྱང་བྲིས་ཡོད་པ་རེད།

    ཕྱི་ལོ་༡༩༩༧ ལོར་ཨ་རིའི་བོད་ཀྱི་ཐེབས་རྩ་དང། ཨ་རིའི་སློབ་ཡོན་ལས་གཞི་ཁང་གིས་རྒྱབ་གཉེར་གནང་བ་དང། ཧར་ཝར་ཌི་ཁྲིམས་ཀྱི་སློབ་གཉེར་ཁང་ནས་ཁྲིམས་ལུགས་སྐོར་གྱི་འབུམ་རམས་པའི་སློབ་ཡོན་ཐོབ། ཕྱི་ལོ་༢༠༠༤ ལོར་ཧར་ཝར་ཌིའི་ཁྲིམས་ཀྱི་གཙུག་ལག་སློབ་གྲྭ་ཆེན་མོ་ནས། ཁོང་ལ་ཆེས་མཐོའི་ཁྲིམས་ཀྱི་སློབ་ཐོན་པའི་ལག་ཁྱེར་ཐོབ་ཡོད་ཅིང། སྐད་གྲགས་ཆེ་བའི་གཙུག་ལག་སློབ་གྲྭ་ཆེན་མོ་དེ་ནས་ཆེས་མཐོའི་ཁྲིམས་ཀྱི་སློབ་ཐོན་པའི་ལག་ཁྱེར་དེ་ནི། འདས་པའི་ལོ་རྒྱུས་ནང་བོད་མི་ས་ཡ་དྲུག་ཙམ་མ་ཟད། ཧི་མ་ལ་ཡའི་ས་ཁུལ་གྱི་རྒྱལ་ཁབ་འབྲུག་དང། བལ་ཡུལ། སོག་པོ་བཅས་ནས་ཐོབ་པ་དང་པོ་དེ་ཆགས་ཡོད་པ་རེད། ཆེས་མཐོའི་ཁྲིམས་ཀྱི་སློབ་ཐོན་ཆེད་རྩོམ་གྱི་ཁ་བྱང་ལ། ཕྱི་ལོ་༡༩༥༩ ནས་ ༢༠༠༤ བར་གྱི་བཙན་བྱོལ་བོད་གཞུང་གི་ལོ་རྒྱུས་དང་མང་གཙོ་ཞེས་པའི་སྟེང་བྲིས་ཡོད་པས། ཆེད་རྩོམ་དེ་ལ་ the Yong K. Kim’ 95 Prize for excellence ཞེས་པའི་གཟེངས་རྟགས་ཐོབ། ༢༠༠༤ ལོར་བློ་བཟང་སེང་གེ་ཁོང་གིས་བོད་གཞུང་ཤེས་རིག་ལས་ཁུངས་ལ། མཁས་དབང་གི་ལག་ཁྱེར་ཐོབ་པ་དང་དེ་དང་འབྲེལ་བའི་ལས་དོན་རྣམས་ཚར་ཟིན་པས་ཇི་ལྟར་བྱེད་དགོས་མིན་གྱི་སློབ་སྟོན་ཞུས་པར། ༢༠༠༥ ཟླ ༦ ཚེས་༡༧ ཉིན་ཤེས་རིག་ལས་ཁུངས་ཀྱི་ངོས་ནས། ཨ་རིར་མཁས་དབང་བློ་བཟང་སེང་གེ་ཁོང་གིས་གནང་བཞིན་པའི་རྒྱ་བོད་ཀྱི་ཆེས་མཐོའི་དཔོན་རིགས་ཚོའི་དབར་ཐུག་འཕྲད་སོགས་ཀྱི་ལས་དོན་སྒྲུབ་ཀྱི་ཡོད་པ་དེ། བོད་དོན་དང་འབྲེལ་བའི་སྤྱི་ཚོགས་ཞབས་ཞུ་ལ་ངོས་འཛིན་བྱས་ཏེ། ཨ་རིའི་ནང་སློབ་མཐར་ཕྱིན་རྗེས་རྒྱ་གར་ནང་ལས་ཀ་བྱེད་རྒྱུ་མི་དགོས་བར་གནང་སྟེ། ཨ་རིའི་སློབ་ཡོན་ལས་གཞི་ཁང་གི་ཐག་བཅད་འོག་ནས། ༢༠༠༧ ཟླ་ ༢ ཚེས་༡༣ ཉིན་ཨ་རི་གཞུང་གིས་ཁོང་གི་ཐོང་མཆན་ལག་འཁྱེར་ཕྱིར་འགྱངས་གནང། དེ་ནས་ཨ་རི་ཧར་ཝར་ཁྲིམས་ཀྱི་གཙུག་ལག་སློབ་གྲྭ་ཆེན་མོ་ནང་ཉམས་ཞིབ་པའི་ལས་ཀ་སྤྲད་པ་དང། ༢༠༠༨ ལོར་ཁྲིམས་ཀྱི་ཉམས་ཞིབ་པ་རྒན་གྲས་ཀྱི་ཁོངས་སུ་བཏང་ཡོད་པ་རེད། མཁས་དབང་བློ་བཟང་སེང་གེ་མཆོག རྒྱ་གར་དང་ཡུ་རོབ་སོགས་རྒྱལ་ཁབ་གཞན་དག་ནང་ཕེབས་སྐབས། ཨ་རིའི་མི་སེར་གྱི་ལག་ཁྱེར་མ་བླངས་པར་ད་དུང་རྒྱ་གར་གཞུང་གིས་གནང་བའི་སྐྱབས་བཅོལ་བའི་ལག་དེབ་སེར་པོའི་ཐོག་ནས་ཕེབས་བཞིན་ཡོད་པ་རེད།
སྔ་ཕྱིར་བོད་དོན་ལས་འགུལ་དང་འབྲེལ་བའི་ཕྱག་ལས།

ཕྱི་ལོ་༡༩༨༨ ནས་ ༡༩༩༡ བར་ལྡི་ལིའི་ས་གནས་བོད་ཀྱི་གཞོན་ནུའི་ལྷན་ཚོགས་ཀྱི་ཚོགས་གཙོ་དང་ཚོགས་གཞོན། དྲུང་ཆེ་བཅས་ཀྱི་ཕྱག་ལས་གནང་། དེ་བཞིན་པཎ་ཆེན་སྐུ་གོང་མ་གློ་བུར་དུ་དགོངས་པ་རྫོགས་པའི་སྐབས། རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་བྱས་པས། བདུན་གཅིག་ལྷག་ཙམ་གྱི་རིང་ལ་ལྡི་ལི་རུ་ཡོད་པའི་ཏི་ཧར་ཇཱལ་བཙོན་ཁང་དུ་བཅུག ད་དུང་ཁོང་གིས་ས་གནས་གཞོན་ནུའི་ལས་རོགས་བཞི་དང་ལྷན་དུ། ཐེ་ཝན་ནས་བོད་སོག་ལས་ཁུངས་ཀྱི་ངོ་ཚབ་ནས་བོད་དོན་དང་འབྲེལ་བའི་ཡིག་ཆ་ཁག་འཕྲོགས་ནས། བཙན་བྱོལ་བོད་གཞུང་ལ་རྩིས་སྤྲད་ཡོད་པ་རེད། ས་གནས་གཞོན་ནུའི་དྲུང་ཆེ་གནང་བའི་རིང་ལ། ལས་དོན་སོགས་གང་ཅིའི་ཐད་ཚགས་ཚུགས་གནང་ཡོད་པས། ༡༩༩༢ ལོའི་རྒྱལ་ཡོངས་ཚོགས་ཆེན་སྐབས། ཁོང་དབུས་གཞོན་ནུའི་ལྷན་ཚོགས་སུ་ལོ་ན་ཆུང་ཤོས་ཀྱི་དབུས་རྒྱུན་ལས་པར་འདེམས་ཐོན་བྱུང་ཡོད་པ་རེད། ༡༩༩༥ ནས་ ༡༩༩༧ བོད་རང་དབང་སློབ་ཕྲུག་ཚོགས་པའི་ནང་ཚོགས་འདུ་དང་ལས་འགུལ་བཅས་ཀྱི་ནང་འཛུལ་ཞུགས་གནང་བ་དང། དེ་བཞིན་ས་གནས་བོད་ཀྱི་ཚོགས་པའི་སློབ་སྟོན་པ་གནང། ༡༩༩༨ ལོར་རྒྱ་ནག་གི་སྲིད་འཛིན་ཅང་ཙེ་མིན་ཧར་ཝར་ཌིའི་གཙུག་ལག་སློབ་གྲྭ་ཆེན་མོའི་ནང་ལྟ་སྐོར་ལ་ཡོང་སྐབས། བློ་བཟང་སེང་གེ་ལགས་དང་ས་གནས་ཀྱི་བོད་མི། དེ་མིན་ལས་འགུལ་བའི་སྡེ་ཚན་༢༤ ལས་གྲུབ་པ་ཞིག་གིས། ངོ་རྒོལ་གྱི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་པ་དེ་ནི། ཝི་ཊི་ནམ་གྱི་དུས་རབས་ནས་རྒྱ་ནག་ལ་ངོ་རྒོལ་བྱས་པ་ཆེ་ཤོས་དེ་ཆགས་ཡོད་པ་རེད། ཁོང་ལ་world wide fund ཟེར་བའི་ཐེབས་རྩ་ཁང་གིས་ཁྲིམས་ལུགས་ལས་དོན་ཐད་ལ་ཚད་ལྡན་དཔང་ཡིག་གནང་བ་དང། འཚེ་མེད་ཞི་བའི་ལྟ་གྲུབ་སློབ་གཉེར་གྱི་ཆེད་དུ་བཙུགས་པའི་ཤེས་ཡོན་སྡེ་ཚན་Fletcher Summer Institute ཞེས་པས་ཀྱང་གོང་བཞིན་དཔང་ཡིག་གནང་ཡོད་པ་རེད།
རྒྱ་ནག་གི་གནད་ཡོད་མཁས་དབང་ཁག་དང་འབྲེལ་ལམ་གྱི་ཕྱག་ལས།

འདས་པའི་ལོ་ ༡༥ ནང་བློ་བཟང་སེང་གེ་ཁོང་གིས། རང་ཉིད་ལ་རྒྱ་ནག་གི་ད་ལྟའི་ཆབ་སྲིད་ལམ་ལུགས་དང་ཁྲིམས་ཀྱི་ལས་དོན་བཅས་ཀྱི་ཐད་ལ་རྒྱུས་མངའ་ཆེན་པོ་ཡོད་པ་བཞིན། རྒྱ་ནག་གི་ཆིང་ཧཱེ་དང་པེ་ཅིང་། རྒྱ་ནག་དམར་ཕྱོགས་སློབ་གྲྭ བོད་རིག་པའི་ཞིབ་འཇུག་ཁང་སོགས། གཙུག་ལག་སློབ་གྲྭ་ཡག་ཤོས་ཁག་ནས་ཐོན་པའི་རྒྱ་རིགས་མཁས་དབང་བརྒྱ་ཕྲག་མང་པོ་དང་ལྷན། བོད་ཀྱི་འདས་པའི་རང་བཙན་གྱི་ལོ་རྒྱུས་དང་ད་ལྟའི་མི་སེར་སྤེལ་ཡུལ་གྱི་གནས་བབས། རྒྱ་གཞུང་གིས་ཁྲིམས་འགལ་ཐོག་ནས་བོད་དབང་བསྒྱུར་བྱས་པའི་སྐོར། ༧གོང་ས་མཆོག་གིས་དགོངས་བཞེས་གནང་བཞིན་པའི་དབུ་མའི་ལམ་གྱི་སྐོར་ལ་བགྲོ་གླེང་དང་གྲོས་བསྡུར་སོགས་གནང་ཡོད་པ་དང། བགྲོ་གླེང་བ་རྒྱ་རིགས་དེ་དག་ཀྱང་ཆབ་སྲིད་དང་ཁྲིམས་མཐུན་གྱི་གནས་བབས་བཅས་ལ་ཧ་ཅང་གི་ཤེས་ཚད་མཐོན་པོ་ཡིན་ཞིང་། དེ་དང་ལྷན་དུ་རྒྱལ་ཁབ་ཕན་ཚུན་འབྲེལ་ལམ་ཡག་པོ་ཡོང་ཆེད་དུ། རྒྱ་རིགས་དང་བོད་རིགས། རྒྱ་གར་གྱི་མི་སྣ། ནུབ་ཕྱོགས་པའི་མཁས་དབང་སོགས་ཆེད་བསྐོངས་ཀྱིས། བོད་ཀྱི་ད་ལྟའི་གནས་བབས་ཐད་ལ་ཐེངས་ ༧ ལས་མང་བ་ཚོགས་འདུ་བསྐོངས་ཚོགས་ཀྱི་གོ་སྒྲིག་གནང་ཡོད་པ་རེད། ༢༠༠༣ ལོར་སྔོན་དུས་མི་སུ་གང་གིས་གོ་སྒྲིག་བྱས་མ་མྱོང་བ་༧གོང་ས་མཆོག་དང། རྒྱ་ནག་གི་མཁས་དབང་ ༣༥ དབར་མཇལ་འཕྲད་ཀྱི་ཚོགས་འདུ་གོ་སྒྲིག་ཞུས་ཡོད་པ་དང། དེ་བཞིན་ ༢༠༠༩ ལོའི་ཟླ་བ་ ༥ པའི་ནང་༧གོང་ས་མཆོག་དང་རྒྱ་ནག་ནས་ཡོང་བའི་མཁས་དབང་བརྒྱ་ལྷག་ཙམ་གྱི་དབར། ཧར་ཝར་ཌིའི་གཙུག་ལག་སློབ་གྲྭ་ཆེན་མོའི་ནང་ཚོགས་འདུ་གོ་སྒྲིག་ཞུས་ཡོད་པ་རེད་ལ། བོད་རིགས་སློབ་ཕྲུག་དང་རྒྱ་ནག་གི་སློབ་ཕྲུག་དང་མི་མང་དབར། ནུས་ལྡན་གྱི་འབྲེལ་ལམ་ཡོང་ཆེད་དུ་སྦྱོང་བརྡར་སྤྲོད་ཀྱི་ཡོད་པ་རེད།

ཨ་རིའི་ནིའུ་ཡོག་ཏུ་རྟེན་གཞི་བྱས་པའི་བྱང་ཨ་རི་དང་ཨེ་ཤ་ཡའི་དབར། འཛམ་གླིང་གི་གོ་རྟོགས་སྤེལ་ཆེད་ཀྱི་ཨེ་ཤ་ཡའི་ཚོགས་པས། ༢༠༠༧ ལོར་ཨེ་ཤ་ཡའི་ན་གཞོན་འགོ་འཁྲིད་ཅེས་པ་ན་གཞོན་ ༢༤ བདམས་པའི་ནང་ནས་ཁོང་འདེམས་ཐོན་བྱུང་ཡོད་པ་རེད། ཉེ་དུས་ལྷོ་ཀོ་རི་ཡ་དང། སེང་ག་པོར། ཉི་ཧོང། ཐཱེ་ལེན་ཌི། མཱ་ལཱེ་ཤི་ཡ། རྒྱ་གར་བཅས་ཀྱི་ནང་ཨེ་ཤ་ཡའི་ན་གཞོན་འགོ་འཁྲིད་ཀྱི་ལྷན་ཚོགས་སུ་འཛུལ་ཞུགས་གནང་ཡོད་པ་དང། ཁོང་ལ་དབྱིན་ལན་གྱི་ཞི་བདེ་དང་ས་གནས་རྒྱལ་སྤྱིའི་ནག་ཉེས་གུ་ཡང་ཚོགས་པས་འགོ་འཁྲིད་ཀྱི་གཟེངས་རྟགས་དང། དབྱིན་ལེན་གྱི་ཀེམ་བྷི་རི་ཇཱི་གྲོང་ཁྱེར་ཞི་བདེའི་ཚོགས་པས་དྲང་བདེན་གྱི་གཟེངས་རྟགས་ཞེས་པ་གནང་ཡོད་པ་རེད། དེ་བཞིན་ཨ་རིའི་ཨེ་ཤ་ཡའི་མི་རིགས་སྤྱི་ཚོགས་ཚོགས་པའི་སློབ་སྟོན་པའི་འཐུས་མི་ཡིན་ཞིང། འཛམ་གླིང་རྒྱལ་ཁབ་ཁག་གི་མཁས་དབང་དང་ཁྲིམས་ཞིབ་པ། དཔོན་རིགས་སོགས་ལྷན་འཛོམས་ཀྱིས་ཨོ་སི་ཁྲི་རི་ཡའི་ལུང་པ་ཝིན་ནཱ་ནང་། རྒྱུན་ལྡན་ནས་འཚོགས་བཞིན་པའི་འཛམ་གླིང་དྲང་བདེན་གྱི་གླེང་སྟེགས་ཐོག་བློ་བཟང་སེང་གེ་ལགས་འཛུལ་ཞུགས་གནང་མུས་ཡིན།

    ༢༠༠༨ ཟླ་ ༤ པའི་ནང་ཤར་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་ལས་དོན་ཁག་གི་གནད་དོན་ཐད། ཨ་རིའི་གྲོས་ཚོགས་གོང་མའི་ཕྱི་སྲིད་འབྲེལ་ལམ་མཐུན་ཚོགས་ཀྱི་དྲུང་ཆེ་གཞོན་པ་ཇཱོན་ནི་གྷར་པཱོན་ཊི་མཆོག་དང། ༧གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན། ཨ་རིའི་གློག་བརྙན་འཁྲབ་སྟོན་པ་རཱི་ཆར་གྷི་རི་བཅས་ལྷན་བཅས་དང་ལྷན་དུ། མཁས་དབང་བློ་བཟང་སེང་གེ་མཆོག་གིས་ཆབ་སྲིད་དང་ཁྲིམས་ལུགས་ཀྱི་གནད་དོན་དབྱེ་ཞིབ་དཔྱིས་ཕྱིན་གནང་ཡོད་པ་དང། དེ་བཞིན་ཨ་རི་ཝ་ཤིན་ཊོན་དུ་རྟེན་གཞི་བྱས་ཡོད་པའི་ཨ་རིའི་ཆབ་སྲིད་སློབ་སྟོན་གྱི་ལྟེ་གནས་ཁང་གཞུང་དོན་སོགས་ཀྱི་ཐད་ལ་དམིགས་བསལ་མཁས་དབང་ལྷན་འཛོམས་ཀྱི་ཚོགས་པའི་ནང་བོད་ཀྱི་གནད་དོན་ཐད་ལ་འགྲེལ་བརྗོད་བྱེད་མཁན་གྱི་འཐུས་མི་ཡིན།

    དེ་བཞིན་ཤེས་ཡོན་གྱི་སྡེ་ཚན་འདྲ་མིན་ནང་དུ་རྒྱ་བོད་ཀྱི་གནད་དོན་དང། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས། མང་གཙོའི་ཤེས་ཡོན་སྡེ་ཚན་ལམ་ལུགས། རྩོད་རྙོག་འདུམ་སྒྲིག་གི་སྐོར་གསུངས་བཤད་གནང་བ་དང།  མཁས་དབང་ལྷན་འཛོམས་ཀྱི་ཚོགས་པ་དང། ཡུ་རོབ་མི་མང་ཆབ་སྲིད་གླེང་སྟེགས། ཨེ་ཤ་ཡ་དང་བྱང་ཨ་རི། ཧྥ་རན་སིའི་ནང་ཡོད་པའི་སྤྱི་ཚོགས་ཚན་རིག་གི་གཙུག་ལག་སློབ་གྲྭ་ཆེན་མོ། དབྱིན་ཡུལ་ལོ་ཌོན་ནང་ཡོད་པའི་གཙུག་ལག་སློབ་གྲྭ་ཆེན་མོ། ཨོ་སི་ཁྲིར་ལི་ཡའི་ཝིན་ནཱ་ནང་གི་ཌཱེ་ཀིན་གཙུག་ལག་སློབ་གྲྭ་ཆེན་མོ། ཐེ་ཝན་གཙུག་ལག་སློབ་གྲྭ་ཆེན་མོ། པེ་ཅིང་གཙུག་ལག་སློབ་གྲྭ་ཆེན་མོ། རྒྱ་གར་གྱི་མཱ་ཌི་ར་སི་གཙུག་ལག་སློབ་གྲྭ་ཆེན་མོ་སོགས་དང། ཨ་རི་ནང་ཡོད་པའི་འཕྲུལ་ལས་ཀྱི་སྡེ་ཚན་སོགས་གཙུག་ལག་སློབ་གྲྭ་ཆེན་མོ་འདྲ་མིན་ནང་རྒྱ་བོད་གཉིས་ཀྱི་གནད་དོན་སྐོར་ལ་གསུང་བཤད་གནང་བར་ཕེབས་དང་ཕེབས་བཞིན་པ་རེད།

    ད་དུང་ཁོང་གིས། གསར་འགྱུར་བརྒྱུད་ལམ་ཁག་ནིའུ་ཡོག་དུས་བབ་དང། ལོན་ཌོན་དུས་བབ། ཝལ་སི་ཊིར་ཇོར་ནལ། བྷི་བྷི་སི། ཨ་རིའི་བདུན་རེའི་དུས་དེབ། དུས་བབས་དུས་དེབ། ཝོ་ཤིན་ཊོན་སྦྲག་ལམ། དེ་རིང་གི་ཨ་རི། བྷོ་སི་ཊོན་གྷི་ལོབ། ཧར་ཝར་ཌིའི་ཁི་རིམ་སོན་སོགས་ཀྱིས་རེ་སྐུལ་བཞིན་ཆེད་གླེང་དང་ཆེད་རྩོམ་བཅས་གནང་བཞིན་པ་དང།  ཧར་ཝར་ཌིའི་ཨེ་ཤ་ཡའི་དུས་དེབ་དང། མང་གཙོ་ཆེད་གླེང་། ཤར་ཨེ་ཤ་ཡ། རྒྱལ་སྤྱིའི་ཁྲིམས་ལུགས་བཅས་སོགས་ནས། བློ་བཟང་སེང་གེ་མཆོག་གིས་བོད་ཀྱི་གནད་དོན་ཐད་གླེང་བའི་ཆེད་རྩོམ་ཁག་ཅིག དཔར་སྐྲུན་བྱས་ཏེ་དཔེ་དེབ་འགའ་འགྲེམས་སྤེལ་བྱས་ཡོད་པ་རེད།

༢༠༠༣ དང་༢༠༠༩ ནང་༧གོང་ས་མཆོག་ནིའུ་དབྱིན་ལེན་ཌི་ཆིབས་བསྒྱུར་གྱི་ལས་དོན་བསྒྲུབས་ཡོད་པ་དང། ཨེ་ཤ་ཡའི་རང་དབང་རླུང་འཕྲིན་ཁང་གི་རྩོམ་སྒྲིག་པའི་སློབ་སྟོན་པ་དང། རླུང་འཕྲིན་དེའི་ནང་འདས་པའི་ལོ་ ༡༣ རིང་བདུན་རེ་བཞིན་མང་གཙོ་དང་ཁྲིམས་ཀྱི་དབང་བསྒྱུར་སྐོར་ལ་འཆར་འགོད་གཏམ་གླེང་གནང་གི་ཡོད། དེ་དང་འབྲེལ་ནས་འགྲོ་བ་མིའི་ཐོབ་ཐང་སྐོར་གྱི་དཔེ་དེབ་གཅིག་བོད་ཡིག་ནང་འགྲེམས་སྤེལ་གནང་ཡོད་པ་རེད། ལོ་བདུན་རིང་ངལ་བ་ཁྱད་བསད་ཀྱིས་སློབ་དཔོན་ཆེན་མོའི་སློབ་སྦྱོང་གནང་བའི་རིང་བོད་ཀྱི་གནད་ཡོད་མི་སྣ་རྒན་གྲས་ཁག་ ༡༠༠ སྐོར་ཞིག་ལ་བཅར་འདྲི་ཞུས་ཏེ་དཔྱད་གཞིའི་ཡིག་ཆ་ཕྱོགས་སྒྲིག་བྱས་ཡོད། བཅར་འདྲི་ཞུ་ཡུལ་ནི་བཀའ་ཟུར་ཀུན་བདེ་གླིང་འོད་ཟེར་རྒྱལ་མཚན། སྐུ་སྒེར་དྲུང་ཆེ་རྟ་ར་བསྟན་འཛིན་ཆོས་ཉིད། དེ་བཞིན་སྤྱི་འཐུས་སོགས་ཡིན་ཞིང། ༧གོང་ས་མཆོག་དང་ཟམ་གདོང་རིན་པོ་ཆེ་རྣམ་གཉིས་ལ་བཀའ་འདྲི་ཞུས་ཡོད་པ་ནི་སྨྲོས་མི་དགོས་པ་རེད། ཤོག་གྲངས་༢༥༠ ལས་གྲུབ་པའི་དཔྱད་གཞི་ཡིག་ཆ་དེ་ནི། མི་ལོ་༤༥ རིང་འགྱུར་ལྡོག་ཆེ་བའི་བཙན་བྱོལ་ནང་གི་བོད་ཀྱི་ལོ་རྒྱུས་ཀྱི་ལས་འགུལ་རྣམས་ཕྱོགས་གཅིག་དང། ཕྱོགས་གཞན་ཞིག་ནི་བཙན་བྱོལ་ནང་གི་མང་གཙོའི་འཕེལ་རིམ་སྟེ། སྤྱི་འཐུས་ཀྱི་བརྒྱུད་རིམ་དང་འཕྲུལ་རིགས་ལམ་ལུགས་ཀྱི་འོས་འཕེན། ཁྲིམས་ལུགས་གཏན་འབེབས། ཆོས་ལུགས་རིས་མེད། ཕྱོགས་རིས་རིང་ལུགས་མེད་པ་བཟོ་ཐབས། གཞུང་འབྲེལ་མ་ཡིན་པའི་ཚོགས་པ་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས་ལྟ་བུའི་སྒྲོམ་གཞི་སྒྲིག་སྟངས་བཅས་ཀྱི་སྐོར་པར་སྐྲུན་བྱས་པ་དང། འཛམ་གླིང་འདིའི་ཐོག་གནད་དོན་དེ་དག་གི་ཐད་ལ་གསུང་བཤད་འདྲ་མིན་གནང་གི་ཡོད།

    རྒྱུན་ལྡན་ནས་དྷ་སར་འགྲོ་ཡི་ཡོད་པའི་དུས་དང་བསྟུན་ནས། བོད་གཞུང་གི་སྲི་ཞུ་བ་ཆེ་ཕྲ་ཡོངས་ལ་འབྲེལ་ལམ་འཛིན་གྱི་ཡོད་ལ། དེ་བཞིན་བཙན་བྱོལ་བོད་གཞུང་གི་གཞུང་འབྲེལ་སྤྱི་འཐུས་དང།  དབུས་བོད་ཀྱི་གཞོན་ནུ་ལྷན་ཚོགས་ཀྱི་འཐུས་མི། དབུས་བུད་མེད་ལྷན་ཚོགས། སློབ་ཕྲུག་དང་ལས་འགུལ་བ། དྷ་སར་དང་ས་གནས་གཞན་ཁག་ཏུ་རྟེན་གཞི་བྱས་ཡོད་པའི་ཤེས་ཡོན་སྡེ་ཚན་ཁག་ཏུ་ཟབ་སྦྱོང་སྤྲོད་ཀྱི་ཡོད། གཞིས་ཆགས་ཁག་གི་སློབ་གྲྭ་བཅུ་ཕྲག་གཅིག་ལྷག་ཙམ་ནང།  ཁོ་རང་ཉིད་ཆེད་བསྐྱོད་ཀྱིས་ཤེས་ཡོན་གྱི་སྐོར་གྱི་དཀའ་ངལ་ལ་གདོང་ལེན་བྱེད་སྟངས་དང་། གཞིས་ཆགས་ཀྱི་གཞིས་གྲོང་ཁག་གི་དཀའ་ངལ་ལ་གདོང་ལེན་བྱེད་སྟངས། བོད་ཀྱི་གནད་དོན་སྐོར་ལ་ཤེས་རྟོགས་གོང་མཐོར་གཏོང་བའི་ཕྱག་ལས་བཅས་གནང་ཡོད་ལ། འཛམ་གླིང་གི་ས་ཕྱོགས་གང་ས་བོད་མི་ཚོས་གོ་སྒྲིག་བྱས་པའི་ཟབ་སྦྱོང་ཁག་ཏུ་བོད་ཀྱི་གནས་བབས་སྐོར་གོ་རྟོགས་གོང་འཕེལ་བཏང་བ། ན་གཞོན་མི་རབས་ཚོར་ཤེས་ཡོན་གྱི་ཐོག་ལ་ཧུར་བརྩོན་བྱེད་དགོས་པའི་སྐུལ་མ་དང་།  ཤེས་འཇོན་གཉིས་ལྡན་གྱི་གནས་བབས་དེའི་ཐོག་ནས། ཕྱི་ལོ་ ༡༩༩༦ ནས་ཁོང་གིས་རྒྱ་གར་ནང་ཡོད་པའི་བོད་གཞུང་ཤེས་རིག་ལས་ཁུངས་ཀྱི་ཁྱབ་ཁོངས་འོག་ཏུ་ཡོད་པའི་དབུས་བོད་སློབ་ཀྱི་སློབ་གྲྭ་ཁག་མང་པོ་ཞིག་ལ། བོད་ཀྱི་ཤེས་ཡོན་དང་ཟས་རིགས་འཆར་འགོད་སློབ་སྟོན་གྱི་ལས་དོན་བསྒྲུབས་ནས་ཕན་རླབས་ཆེན་པོ་ཐོན་བཞིན་ཡོད།

    དེ་བཞིན་རོཌ་པ་ཆུང་རིགས་བྱས་པ་རྣམས་བགྲང་པ་ཡིན་ན། བོད་ནས་ཁ་ཐུག་ཨ་རིར་ཕེབས་མཁན་བོད་རིགས་མཁས་དབང་དང་། སློབ་མ་བརྒྱ་ཕྲག་བརྒལ་བ་ལ་རོགས་རམ་དང་འབྲེལ་བ་བྱས་ཡོད་ཅིང། ཉེ་ལམ་གྲོངས་མ་ཐག་པའི་ཁོང་གི་ཨ་ཞང་བརྒྱུད་ནས་བོད་ནང་ཤིང་ནགས་བཅད་གཏུབ་བྱས་པའི་ས་ཁུལ་དུ། ཤིང་སྡོང་ཡོང་འབབ་ཡོད་པའི་རིགས་སྟར་ཀ་དང་ཀུ་ཤུ། ཁམ་བུའི་སྡོང་པོ་༤༠༠༠༠༠ ལྷག་འདེབས་འཛུགས་ཀྱི་རོགས་པ་བྱས་ཡོད་པ་དང། གྲོང་གསེབ་ཁག་ཏུ་སྨན་བཅོས་ཀྱི་ཆེད་དུ་བོད་ནང་གི་བོད་རིགས་སྨན་པ་མང་པོ་སྦྱོང་བརྡར་སྤྲད་པ་དང། རྒྱ་གར་ནས་ཨ་རིར་ཡོང་མཁན་འབྲེལ་ཡོད་ལས་བྱེད་དང་མཁས་དབང། གྲོགས་པོ་བཅས་ལ་རོགས་རམ་བྱེད་བཞིན་ཡོད་པ་རེད།

མཁས་དབང་བློ་བཟང་སེང་གེ་ནི་༡༩༦༨ ལོར་རྡོ་རྗེ་གླིང་དུ་ཡོད་པའི་གཞིས་ཆགས་ཆུང་ངུ་ཞིག་ནང་འཁྲུངས་པ་དང། སྐབས་དེའི་གཞིས་ཆགས་ཀྱི་འཚོ་རྟེན་གཙོ་བོ་ཞིང་ཁ་འདེབས་ལས་དང་བ་ཕྱུགས་དང་བྱ་དེ་གསོ་ཉར།  དེ་བཞིན་མེ་ཤིང་འཐུ་སྒྲུག་དང་དགོན་དུས་སུ་ཕ་མ་དང་ལྷན་དུ་བལ་ཚོང་བརྒྱབ་པ་སོགས། གཞིས་ཆགས་ཀྱི་འཚོ་བའི་ཉམས་མྱོང་རྣམས་བརྒྱུད་ནས་འཚར་ལོངས་བྱུང་བ་ཞིག་ཡིན་པ་དང།  ད་ལྟའི་སྐབས་མཁས་དབང་བློ་བཟང་སེང་གེ་ནི་ཨ་རིའི་ས་གནས་བྷོ་སི་ཊོན་དུ་གནས་སྡོད་བྱེད་ཀྱི་ཡོད་ལ། བོད་ཀྱི་ས་ཁུལ་ཆབ་མདོ་ནས་ཕེབས་པའི་ཨ་མ་སྐལ་བཟང་ཆོས་སྒྲོན་ད་ལྟ་ཁོང་དང་ལྷན་དུ་བཞུགས་ཡོད། ཕ་སྐལ་བཟང་ཆོས་གྲགས་ ༢༠༠༤ འདས་གྲོངས་སུ་ཕྱིན་ཡོད། བློ་བཟང་སེང་གེའི་བཟའ་ཟླ་སྐལ་བཟང་དབྱངས་སྒྲོན་ཤག་བྱང་གི་ཕ་མ་ནི། ལྷ་ས་དང་ཉེ་བའི་ལྷོ་ཁའི་ས་ཁུལ་ནས་ཕེབས་ཡོད་ཅིང། ཁོང་གཉིས་ཁྱིམ་ཚང་བཟུང་ནས་ལོ་༡༣ སོང་ཟིན་པ་དང་། ད་ལྟའི་ཆར་ལོ་༣ ལ་ཟིན་པའི་བུ་མོ་གཅིག་ཡོད། སྐད་ཡིག་གི་ཆ་ནས། མཁས་བློ་བཟང་སེང་གེས་བོད་སྐད་དང་དབྱིན་སྐད། ཧིན་སྐད། བལ་སྐད། རྒྱ་སྐད་ཏོག་ཙམ་ཤེས་ཀྱི་ཡོད་པ་དང་པད་མ་བཀོད་པའི་སྐད་ཀྱི་རྨང་གཞི་ཡོད། དུས་ཚོད་མང་ཆེ་བ་བོད་དོན་གྱི་ཐོག་ལ་ངལ་བ་མེད་པར་ཕྱག་ལས་གནང་གི་ཡོད་པ་དང། བར་གསེང་གི་སྐབས་ལ་ཆུ་རྐྱལ་བརྒྱབ་པ་དང་དེབ་ཀློག་པ། ལུས་སྦྱོང་བཅས་གནང་གི་ཡོད།