པོར་ཧྥི་ཤོ་ནལ་ (professional ) ཞེས་པ་འཚོ་ཐབས་དང་ཆེད་ལས་སོགས་ཀྱི་དོན་ལ་འཇུག་ཅིང་། ཐ་སྙད་འདི་བོད་སྐད་ཐོག་དུས་ནམ་ཞིག་ལ་གསར་བསྒྱུར་བྱས་པ་ཡིན་མིན་གསལ་པོར་བཤད་མི་ཐུབ་ཀྱང་། ཕལ་ཆེར་དུས་རབས་ཉི་ཤུའི་ལོ་རབས་ལྔ་བཅུའི་རྗེས་སུ་བྱུང་བའི་མིང་ཚིག་ཅིག་ཡིན་ཞེས་བཤད་ཆོག་པར་སེམས། (professional )པོར་ཧྥི་ཤོ་ནལ་ཞེས་པ་ལ་བརྟེན་ནས་བོད་མིའི་སྤྱི་ཚོགས་ནང་ཆེད་ལས་པ་དང་ཁྱད་ལས་པ། རིགས་གཅིག་རྐང་འཛིན་པ་བཅས་ཐ་སྙད་གསུམ་ཙམ་བྱུང་། དེ་ཡང་རང་རེའི་བཙན་བྱོལ་ནང་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཡིག་ཆ་དག་ཏུ་ཆེད་ལས་པ་དང་ཁྱད་ལས་པ། རིགས་གཅིག་རྐང་འཛིན་གསུམ་དོན་གཅིག་ལྟ་བུར་བཀོལ་སྤྱོད་བྱེད་བཞིན་པས། དེ་དག་གི་གོ་དོན་ལ་ཅུང་ཟད་དཔྱད་པར་འདོད། མིག་ཚིག་དེ་དག་དོན་གཅིག་མིང་གི་རྣམ་གྲངས་ལྟ་བུར་གོ་དགོས་པའི་སྐབས་ཡོད་སྲིད་ཀྱང་། རྣམ་པ་ཐམས་ཅད་དུ་དོན་གཅིག་མིང་གི་རྣམ་གྲངས་སུ་བཟུང་མི་རུང་ཞིང་། དེ་དག་ལ་ཐུན་མོང་མ་ཡིན་པའི་གོ་དོན་རེ་ཡོད།
༡༽ཆེད་ལས་པ་ཞེས་པ་ནི་འཚོ་ཐབས་ཙམ་གྱི་ཆེད་དུ་ལས་དོན་བྱེ་བྲག་པ་གང་ཞིག་ཆེད་དུ་གཉེར་མཁན་གྱི་གང་ཟག་ལྟ་བུ་ཡིན། དཔེར་ན། ཞིང་པ་དང་འབྲོག་པ་ལྟ་བུ།
༢༽ཁྱད་ལས་པ་ཞེས་པ་ནི་འཚོ་ཐབས་ཙམ་མ་ཡིན་པར་ལྟ་གྲུབ་ཡོད་པའི་གཞུང་ལུགས་སམ་ལས་དོན་བྱེ་བྲག་པ་གང་ཞིག་ལ་ཆེད་དུ་སྦྱང་མཐར་ཕྱིན་པའི་སྟེང་ཁྱད་དུ་འཕགས་པའི་གདེང་ཚོད་དང་མྱོང་གོམས་ཕུན་སུམ་ཚོགས་པ་ཡོད་མཁན་ཞིག་ལ་གོ་དགོས། དཔེར་ན། ཀླད་རྩ་ལྟ་བུའི་ཤེས་བྱ་བྱེ་བྲག་པ་གཅིག་ཉིད་ལ་ལོ་མང་ཞིབ་འཇུག་བྱས་ཏེ་གྲུབ་དོན་ལ་མྱོང་བ་བླ་མེད་ཐོབ་པའི་གང་ཟག་ལྟ་བུ་ཡིན།
༣༽རིགས་གཅིག་རྐང་འཛིན་པ་ཞེས་པ་ནི། ཤེས་བྱ་བྱེ་བྲག་པ་གཅིག་ལ་སློབ་སྦྱོང་བྱས་ཏེ་ལག་ལེན་བྱེད་མཁན་ལ་གོ་ཆོག་མོད་། འོན་ཀྱང་འདི་ལ་སྒྲ་ཡངས་དོག་གི་དབང་གིས་གོ་བ་གཉིས་ཡོད། སྒྲ་ཡངས་འཇུག་གི་དབང་དུ་བཏང་ནས་བཤད་ན་ནང་དོན་རིག་པ་ཞེས་པ་སྤྱིར་རྒྱ་ཆེ་ཞིང་གཏིང་ཟབ་པ་ཙམ་དུ་མ་ཟད་ནང་གསེས་རྣམ་གྲངས་ཧ་ཅང་མང་ཡང་གཞུང་ལུགས་མང་པོ་འདུས་པའི་སྤྱི་མིང་གཅིག་གི་སྟེང་ནས་ནང་དོན་རིག་པ་ཞེས་བསླབ་བྱ་བྱེ་བྲག་པ་གཅིག་ལྟ་བུར་བཟུང་སྟེ་དེ་སློབ་སྦྱོང་བྱེད་མཁན་དག་ལ་ནང་དོན་རིག་པའི་རིགས་གཅིག་རྐང་འཛིན་པ་ཞེས་བཤད་ཆོག དཔེར་ན། གཞུང་ཆེན་བཀའ་པོད་ལྔ་སློབ་སྦྱོང་མཐར་ཕྱིན་པའི་བོད་ཀྱི་དགེ་བཤེས་ཚོ་ལྟ་བུ་ཡིན། དེ་བཞིན་དུ་བོད་ཀྱི་གསོ་བ་རིག་པ་དང་སྨན་པ་ལྟ་བུ་ཡིན།
སྒྲ་དོག་འཇུག་གི་དབང་དུ་བཏང་ན་གོང་གསལ་བོད་ཀྱི་དགེ་བཤེས་ཚོ་དང་སྨན་པ་རྣམས་རིགས་གཅིག་རྐང་འཛིན་པ་ངོ་མ་མིན། གང་ཡིན་ཞེ་ན། དགེ་བཤེས་ཚོས་བརྗོད་བྱ་དང་རྗོད་བྱེད་ཐ་དད་པའི་གཞུང་ཆེན་བཀའ་པོད་ལྔ་ལ་ལོ་ངོ་ཉི་ཤུ་ལྷག་གི་རིང་སྦྱང་བ་མཛད་ཀྱི་ཡོད་ཀྱང་གཞུང་ལུགས་དེ་དག་ཆེས་གཞི་རྒྱ་ཆེ་ཞིང་གཏིང་ཟབ་པའི་དབང་གིས་སྐྱེས་ཆེན་དམ་པ་རེ་ཟུང་མ་གཏོགས་ཕལ་ཆེ་བས་གཞུང་དོན་མཐའ་དག་ཇི་ལྟར་སྦྱང་བ་མཛད་པ་ལྟར་ལག་ཐོག་ཏུ་ལོན་ཐུབ་དཀའ་བ་དང་། དེ་བཞིན་སྨན་པ་ཚོས་ཀྱས་དཔལ་ལྡན་རྒྱུད་བཞི་ཆ་ལག་དང་བཅས་པ་གཞི་རྒྱ་ཆེ་ཞིང་གཏིང་ཟབ་པས་ཇི་ལྟར་སྦྱང་བ་མཛད་པ་བཞིན་གསོ་བྱ་གསོ་བྱེད་ཇི་ལྟར་གསོ་བའི་ཚུལ་སོགས་ལག་ཐོག་ཏུ་ཇི་བཞིན་ལོན་ཐུབ་དཀའ། དེའི་ཕྱིར་སྒྲ་དོག་འཇུག་གི་རིགས་གཅིག་རྐང་འཛིན་ཞེས་པ་ནི། རིག་པའི་གནས་བྱེ་བྲག་པའམ་ཆ་ཤས་གཅིག་ལ་ཆེད་སྦྱོང་གིས་ཁྱད་དུ་འཕགས་པའི་ནུས་ཤུགས་བླ་ན་མེད་པ་འདོན་ཐུབ་མཁན་དག་ལ་གོ་དགོས་པས་ཁྱད་ལས་པ་ཞེས་པ་དང་སྒྲ་དོག་འཇུག་གི་དབང་དུ་བྱས་པའི་རིགས་གཅིག་རྐང་འཛིན་པ་གཉིས་དོན་གཅིག་ཏུ་མཐོང་།།
དབྱེ་ཞིབ་གང་ཙམ་བྱས་འདུག་ལེགས་པོ་རེད། ཡིན་ནའང་དེ་ཙམ་གྱིས་འདི་དང་འདིའི་རིགས་ལ་དབྱེ་འབྱེད་བྱེད་མི་ཐུབ། དྲ་རོགས་ལགས་ད་རུང་འདིའི་ཕྱོགས་ལ་བསམ་བློ་བཏང་ནས་ཡང་བསྐྱར་དྲ་ཐོག་ལ་ཤོག་ལོ།
རིགས་གཅིག་རྐང་འཛིན་དང་ཆེད་ལས། ཁྱད་ལས་བཅས་ལ་ཁྱད་པར་ཏན་ཏན་ཡོད་ཀྱི་རེད་བསམ་གི་འདུག ང་རང་སྒེར་གྱི་བསམ་ཚུལ་བྱས་ན། ཐ་སྙད་རེ་རེར་གཞུང་ལུགས་ཀྱི་རྒྱབ་ལྗོངས་ཡོད་མེད་མི་ཤེས་ཀྱང་། གོ་ཚོད་དུ་ professionalཞེས་པ་ནི་ཆེད་ལས་ཀྱི་དོན་དང་། expert ཞེས་པ་ཁྱད་ལས་ཀྱི་དོན། specialize ཞེས་པ་རིགས་གཅིག་རྐང་འཛིན་གྱི་དོན་ཡིན་པར་འདོད།
དགེ་བསྟན་མཆོག་ལ་ཞུ་རྒྱུར། ཉིད་ཀྱི་རྩོམ་ཐུང་འདི་ཐེངས་གཉིས་ལ་ཀློག་རྗེས་ཚོར་སྣང་ཞིག་བྱུང་བ་ནི། བརྡ་ཆད་དམ་ཐ་སྙད་དེ་གསུམ་གྱི་གོ་དོན་བོད་ཀྱི་བརྡ་དག་དང་སྦྱར་ཁུལ་བྱས་འདུག་ཀྱང་གོ་དོན་དག་དག་ཅིག་བསྡད་མི་འདུག་བསམ་པ་དང་གཅིག གཉིས་ནས་བོད་སྐད་ཀྱི་བརྡ་ཆད་དེ་གསུམ་professionalཁོ་ན་ལ་སྦྱར་ནས་རང་གི་བསམ་ཚུལ་རྐྱང་བཤད་འདུག་པ་ལས། ཕྱི་སྐད་ལ་སྦྱངས་པ་ཞན་པའམ་གང་ལྟར་རིགས་པའི་གཞུང་ལུགས་ཀྱི་རྒྱབ་རྟེན་དང་ཨིན་རྒྱ་གང་བསྒྱུར་བའི་ཁུངས་ལུང་ཙམ་ལ་ཡང་དཔྱད་མི་འདུག་སྙམ་པའི་ཚོར་སྣང་བྱུང་།
professionalཞེས་པ་སྤྱིར་བོད་པའི་བརྡ་དང་སྦྱར་བདག་སྒྲས་མཚོན་པར་ནུས་པ་སྟེ། ཆོས་པ། སྨན་པ། ཚན་རིག་པ། ས་མཁན་པ་ལྟ་བུས་ཀྱང་མཚོན་ཐུབ་པ་མ་ཡིན་ནམ།