ཉིན་བཅུའི་རིང་གི་སྤྱི་འཐུས་གྲོས་ཚོགས་རིང་བཀའ་སྤྱི་ཚོ་གྲོས་ཚོགས་ར་བར་ལྷན་དུ་འཛོམས་ནས་ཕན་ཚུན་ལ་བཤད་རེས་ཉན་རེས་དང་གོ་ཤེས་བསྟུན་ཤེས་བྱས་ཏེ་མཇུག་བསྒྲིལ། ཐེངས་འདིའི་གྲོས་ཚོགས་སྐབས་བཙན་བྱོལ་བོད་གཞུང་ལས་ཁུངས་ཁག་གིས་ཕྱི་ལོ་ ༢༠༠༩ དང་ ༢༠༡༠ ལོའི་ལོ་འཁོར་ལས་བསྡོམས་སྙན་སྒྲོན་ཞུས་པ་དང་། སྤྱི་འཐུས་ཚོས་བཀའ་བློན་ཚོ་ཚ་འདེད་ཡང་འདེད་བྱས་ཏེ་རང་རང་གི་བློར་ཤར་བའི་དོགས་པ་རྣམ་རྟོག་རྣམས་གཙང་སེལ་བྱེད་དུ་བཅུག མཇུག་མཐར་ཚོགས་གཙོས་ཚོགས་དུས་སྐབས་གྲོས་ཚོགས་ནང་ལས་རིམ་བང་བསྒྲིགས་པ་རྣམས་ཆ་ཚང་གྲུབ་ཟིན་ཞེས་ཐེངས་འདིའི་གྲོས་ཚོགས་ཀྱི་རྒྱལ་ཁའི་ཕྱོགས་ཤིག་ཀྱང་གླེང་།
དེ་ལྟར་གྲོས་ཚོགས་ཀྱི་ཚོགས་དུས་བཅུ་བ་མཇུག་བསྒྲིལ་བ་དང་སྤྱི་འཐུས་ཚོ་རང་རང་གི་བཞུགས་གནས་སུ་ཕེབས་སོང་། ཁོང་རྣམ་པ་ཚོས་ཕན་ཚུན་ལ་ཕྱག་གཏོང་རེས་དང་གྱེས་ཕྱག་འབུལ་རེས་བྱས་ཤིང་། འཛུམ་དམུལ་དམུལ་ངང་ཟླ་དྲུག་གི་རྗེས་ནས་མཇལ་ཡོང་ཟེར། སྐབས་འདིར་ངས་བསྐྱར་དུ་གྲོས་ཚོགས་ར་བའི་བྱུང་བ་ཁག་ཅིག་ལ་ཕྱིར་འདང་བརྒྱབས། ཕྱིར་འདང་དེའི་ཁྲོད་ནས་སྐབས་རེར་ང་ལ་བློ་སྤོབས་སྐྱེས་ཤིང་ལན་རེར་བློ་ཕམ་བྱུང་། བློ་སྤོབས་སྐྱེས་པ་ནི་གྲོས་ཚོགས་ར་བའི་ནང་བཀའ་སྤྱི་ཚོ་ལྷན་དུ་འཛོམས་ནས་བོད་མི་རིགས་ཀྱི་འདས་མ་འོངས་ད་ལྟ་གསུམ་གྱི་ཆེད་དུ་བཀའ་མོལ་གནང་བཞིན་པར་མ་ཟད། ཕན་ཚུན་ལ་འཛེམ་དོགས་དང་འཚེར་སྣང་མེད་པའི་སྒོ་ནས་བཤད་རེས་ཉན་རེས་དང་གོ་ཤེས་བསྟུན་ཤེས་བྱས་དུས་བློ་སྤོབས་སྐྱེས་ཤིང་། ལས་དོན་ཆེ་མ་ཆུང་གསུམ་གང་ཡིན་རུང་གྲོས་ཚོགས་ར་བ་བརྒྱུད་དཔྱད་ཞིབ་དང་གྲོས་བསྡུར་ཡང་དག་བྱས་པར་བློ་བདེ་བས་ཡིན། ཡང་སྐབས་རེར་རང་གི་བཤད་རེས་གལ་ཆེན་པོར་བརྩི་བ་ལས་གཞན་ལ་ཉན་རེས་གལ་ཆེན་དུ་མི་བརྩི་བ་དང་། གོ་ཤེས་བསྟུན་ཤེས་མེད་པར་དགོས་མེད་ཀྱི་ཚིག་དང་ཐ་སྙད་རེ་ཟུང་གི་ངོ་གདོང་ནས་ཕན་ཚུན་ཚིག་འཁྲི་བྱེད་རེས་དང་སྐྱོན་མཚང་འབྲུ་རེས་བྱས་དུས་བློ་ཕམ་བྱུང་། ཇི་ལྟར་བཤད་རུང་གྲོས་ཚོགས་ར་བར་བསླེབས་རྗེས་ཁྱོད་ཀྱིས་ཚིག་གཅིག་མི་གློད་ན་ངས་ཀྱང་ཚིག་རིས་ཤིག་མི་གཏོང་ཟེར་མཁན་མང་།
ད་དུང་གྲོས་ཚོགས་ནང་སློབ་དཔོན་ཐོན་མའི་དགོངས་པའང་དཀྲུག་གིན་འདུག ཁོང་ཚོས་བོད་ཀྱི་བརྡ་སྤྲོད་པའི་གཞུང་དུ་ཐོན་མིས་གང་གཏན་ལ་ཕབས་པའི་བོད་སྐད་ཡིག་གི་བརྡ་དག་གཞུང་ལུགས་ལ་གཞི་མི་བཅོལ་བར། ཡི་གེའི་དག་ཆའང་ཕྱག་བསྐྱངས་པ་མང་ཉུང་གིས་གཏན་འབེབས་གནང་།
དེའི་སྟེང་དུ་ང་ལ་བློ་ཕམ་ཆེན་པོ་ཞིག་བྱུང་། བློ་ཕམ་དེ་ཡང་གྲོས་ཚོགས་ཀྱི་འཐུས་མིའི་སྟེང་ནས་བྱུང་། སྐབས་བཅུ་བཞི་བའི་སྤྱི་འཐུས་ཀྱི་ལས་ཡུན་རྫོགས་རྒྱུར་ཟླ་དྲུག་ལས་མེད་པའི་སྐབས་འདིར་ཡང་། སྤྱི་འཐུས་ཁག་ཅིག་གིས་རང་ཚུགས་ཐུབ་གི་མི་འདུག ཁག་ཅིག་གང་དུའང་ཐེ་གི་མི་འདུག ཕལ་ཆེར་ས་མིག་མ་སྟོང་ཙམ་གྱིས་རང་གི་རྐུབ་སྟེགས་སྲུང་འདུག ཁོང་ཚོས་སྤྱི་དོན་དུ་ལས་ཤིག་སྒྲུབ་ཀྱིན་པ་ནི་གྲོས་ཆོད་གྲོས་འཆར་རེ་གཏན་འབེབས་གནང་སྐབས་ཕྱག་བསྐྱངས་ནས་རྒྱབ་སྐྱོར་གནང་མིན་ཙམ་རེད། གསུང་ཡང་ཞེ་དྲག་འཇོན་གི་མི་འདུག་ལ། ཕལ་ཆེར་རང་རང་ལ་རིག་པའི་རྣམ་དཔྱོད་བཏོན་ནས་གསུང་འབྱོན་རྒྱུ་ཡང་ཞེ་དྲག་ལྷག་མེད་པ་འདྲ།
དེའི་ག་ལ་ཚད། གྲོས་ཚོགས་ནང་བཀའ་ཁྲིའི་དབང་སྡུད་མངོན་གསལ་དོད་པོ་དང་ཤུགས་ཆེན་པོ་འདུག དོན་དག་གང་འདྲ་ཞིག་ཡིན་རུང་བཀའ་ཁྲི་ཁོང་གིས་གསེད་བཀྲོལ་གནང་རྗེས་སྤྱི་འཐུས་ཚོར་ཐག་གཅོད་སླ་བ་དང་ཕྱག་སྐྱོང་སླ་བ། གོ་ཤེས་བསྟུན་ཤེས་བརྒྱ་འགྱུར་དུ་སླ་རུ་གྱུར་འགྲོ དེ་ནི་སྤྱི་འཐུས་མི་རེ་ངོ་རེའི་རང་ཚུགས་ཐུབ་མིན་གྱི་སྟེང་དུ་བབས་ཡོད།
གྲོས་ཚོགས་ར་བ་གཅིག་པུ་ག་ལ་ཡིན། ད་ལྟའི་བཀའ་ཁྲི་མཆོག་ནི་མཁས་པའི་དབང་བོ་ཕུལ་ཏུ་བྱུང་བ་ཞིག་ཡིན་པར་རྒན་མགོ་དཀར་ནས་གཞོན་སོ་དཀར་ཚུན་ཆད་དུ་ཡོངས་གྲགས་ཡིན་ལ། དོན་ལའང་དེ་ལྟར་ཡིན་མོད། སྤྱི་འཐུས་ཚོར་བལྟས་ཀྱིན་བལྟས་ཀྱིན་ཁོང་ཚོས་བཀའ་ཁྲིས་གསུངས་པའི་དོན་དག་གང་ཡིན་རུང་། ཡང་དག་པ་དང་དངོས་ཡོད། རྒྱུ་མཚན་ལྡན་པ་ལྟར་མཐོང་བ་ལས་རང་གིས་དེའི་ཕན་ནས་རིག་པའི་རྣམ་དཔྱོད་བེད་སྤྱོད་བཏང་། དཔྱད་ཞིབ་བྱས། མཇུག་མཐར་གོ་དོན་རྙེད་རྗེས་ད་གཟོད་ཕྱག་སྐྱོང་རྒྱུར་འབད་བརྩོན་མི་གནང་བར་རྗེས་སུ་འབྲངས་རྐྱང་བྱེད། དེ་ལྟར་སྐབས་བཅུ་བཞི་བའི་སྤྱི་འཐུས་ཀྱི་ལས་རྒྱུན་རྫོགས་ཉེར་ཡོད།
ཐེངས་འདིའི་གྲོས་ཚོགས་ར་བའི་ནང་བཀའ་ཁྲིས་ཀྱང་གྲོས་ཚོགས་ཀྱི་སྤུས་ཀ་ཇེ་ཞན་ཇེ་སྡུག་ཏུ་འགྲོ་བཞིན་པའི་སྣང་ཚུལ་བྱུང་བ་དང་ཡིད་ཆད་བློ་ཕམ་བྱུང་སྐོར་གསུངས་ཡོད་ལ། དོན་ལའང་། དེ་ལྟ་བུའི་སྣང་ཚུལ་རེ་གཉིས་བྱུང་ཡོད། དེ་ལྟར་ན། སྐབས་རྗེས་མའི་སྤྱི་འཐུས་བཞི་བཅུ་ལྷག་གོ་མི་རེ་ངོ་རེ་བཞིན་རང་རང་གི་རྣམ་དཔྱོད་རྩལ་དུ་འདོན་ཐུབ་པ་དང་། རང་རང་གི་མིག་དང་རྣ། བློ་དང་རིག་པར་ཡིད་ཆེས་གཏོད་ཐུབ་པ། གྲོས་མི་ལ་འདྲི་ནའང་གྲོས་ཐག་རང་གིས་གཅོད་ཐུབ་པའི་ཚད་ལྡན་ཚུགས་ཐུབ་ཀྱི་འཐུས་མི་རེ་ཡིན་དགོས། མང་ཚོགས་ཀྱིས་ཀྱང་དེའི་ཕྱོགས་ལ་ད་ལྟ་ནས་གྲ་སྒྲིག་གནང་དགོས་པར་འདོད་དོ། །
རྩོམ་ཡག་པོ་བྲིས་འདུག ཚང་མས་རྩོམ་གྱི་སྤྱི་ཁོག་ཧྲིལ་པོ་ནས་བསམ་གཞིགས་གཏོང་རྒྱུ་དང་ཤེས་རྒྱུ་མང་པོ་འདུག
སྤོབས་པ་སྐྱེ་འོས་པའི་གནས་ཚུལ་ཀློག་དུས་ཧ་ཅང་དགའ་པོ་བྱུང། ཡང་ཁ་ཤས་ཀྱིས་གསུངས་མ་བྱོན་པ་དེར་ཡང་ཐུགས་ཁག་མེད། ད་སྤྱི་འཐུས་ནང་ལོ་བཅུ་དང་ཡང་བཅུ་ཕྲག་གཉིས་གསུམ་བཞུགས་ཙང་གསུངས་ཡག་རྫོགས་པ་ཡིན་གྱི་རེད།
ཁྱེད་རང་གིས་སྤྱི་འཐུས་སུས་གསུང་འབྱོན་མེད་ན་དེ་གསལ་བོ་བྱས་ནས་བཤད་ན་ཡག་པོ་འདུག གལ་སྲིད་སྤྱི་འཐུས་གསུང་མི་འབྱོན་མཁན་དང་རྐུབ་སྟེགས་སྲུང་མཁན་དེ་ཚོ་གསལ་བོ་བྱས་ནས་མི་མང་ལ་ངོ་སྤྲོད་བྱ་ཐུབ་ན། སྤྱི་འཐུས་རྗེས་མའི་སྤུས་ཀ་ཡག་རུ་འགྲོ་ཡ་རེ་བ་ཡོད་རེད་བསམ་གྱི་འདུག དེ་མིན་སྤྱི་ཡོངས་སྐྱོན་བརྗོད་བཙན་བྱོལ་སྤྱི་ཚོགས་ནང་ལ་མང་མེད་ན་ཉུང་མེད་ཚོད་རེད། ཡིན་ན་ཡང་ཐད་ཀར་སྐྱོན་བརྗོད་བྱེད་མ་ཐུབ་པས་རྐྱེན་གྱིས་སྤྱི་འཐུས་དང་སྒྲིག་འཛུགས་ཁག་གི་སྤུས་ཀ་ཡག་རུ་འགྲོ་ཐུབ་ཀྱི་མེད་པ་རེད། ལྷག་པར་དུ་གསར་འགོད་ལས་རིགས་གཉེར་མཁན་ཚོས་སྤྱི་འཐུས་ལྷན་ཚོགས་ཡིན་ན་སྤྱི་འཐུས་སྒེར་ཡིན་ན་དེ་ལ་ཐད་ཀར་སྐྱོན་བརྗོད་བྱེད་དགོས་པ་རེད། མང་གཙོའི་ཀ་བ་བཞི་བ་གསར་འགོད་ལས་རིགས་ཡིན་པས་རྒྱུ་མཚན་ཡང་དེ་ལ་ཐུག་པ་རེད་དྲན།
མི་མང་བོ་ཞིག་གིས་སྤྱི་འཐུས་དང་བཀའ་ཁྲི་ང་ཚོས་འདེམས་པ་ཡིན་ཟེར་ནས་སྐད་རྒྱགས་རྒྱུར་གོམ་གཤིས་ཤིག་ཆགས་ཡོད་་པ་རེད། ངས་དེ་ཡི་སྐོར་ལ་བསམ་བློ་མང་བོ་ཞིག་གཏོང་ཁུལ་བྱས། དངོས་ནས་བཤད་ན་དེ་ནི་མི་མང་གི་འདེམས་ཀྱི་ཡོད་དམ། དགའ་ཉེ་སྤུན་མཆེད་དང་། ཕྱོགས་རུས་འཐེན་འཁྱེར་ལ་དགའ་བའི་གོམ་གཤིས་ངན་ལངས་དུ་ཤོར་བ་དག་གི་ནད་ཚ་མ་དྲགས་པར་ལུས་ཡོད་མེད་དེ་ཡི་མཚམས་ཤིག་རེད། དངོས་ནས་བཤད་ན། ང་ཚོས་རང་གི་མི་མང་འདི་གོ་རྟོགས་སད་ཡོད་མེད་དེ་ལ་བསམ་བློ་གཏོང་དགོས་ཀྱི་འདུག མི་མང་སད་མེད་དུས་ཤིག་ལ། བཀའ་བློན་དང་སྤྱི་འཐུས་རེ་ཟུང་ཞིག་གཉིད་ལས་སད་ཡོད་ཀྱང་དེ་ཙམ་རེད། མཐའ་མཇུག་དུ་ང་ཚོས་རང་གི་མི་མང་དེ་ང་རང་དང་ཁྱེད་ཅག་གི་འགན་གང་ཞིག་འཁུར་ཡོད་མེད་ཀྱི་སྐོར་ལ་བསམ་བློ་གཏོང་རན་རེད་འདུག འདི་ནི་དམིགས་བསལ་གྱིས་ཨ་རིག་འགྱུར་མེད་ལ་ཞུས་པ་མིན། རྩོམ་ཡིག་འདི་དང་འབྲེལ་བའི་དྲ་ཐོག་གི་སྤུན་ཟླ་ཡོངས་ལ་ཞུས་པ་ཡིན།
ཡག་པོ་བྲིས་འདུག གྲོས་ཚོགས་ར་བའི་ཟུར་ཉན་པ་ཞིག་དང་གསར་འགོད་པ་ཞིག་གི་ཁྱད་ཆོས་ཀྱི་སྟེང་ནས་རྣ་བ་གསལ་ཤིང་མིག་དབང་རྣོན་པོས་གཟབ་ཉན་དང་གཟབ་ལྟ་བྱས་པར་གྲུབ་འབྲས་ལོན་འདུག
འདི་ལྟར་ང་ཚོ་སུས་ཀྱང་རྣ་བ་སྲབ་སྲབ་དང་མིག་ཟུང་རིལ་རིལ་བྱེད་དགོས་ཀྱི་འདུག འདི་ལྟར་དཔྱད་ཞིབ་དང་དོགས་འཆར། བགྲོ་གླེང་བཅས་གནང་ཐུབ་དགོས་ཀྱི་འདུག
རྩོམ་གི་དངོས་གཞི་ལས་ཁ་བྱང་འདེམས་སྟངས་ཡག་གི
སྤྱི་འཐུས་འདེབས་མཁན་ཡང་མི་དམངས་ཡིན་ལ། ཤེས་འཇོན་མི་འདུག་གསུངས་མཁན་ཡང་མི་དམངས་ཡིན། འོ་ན་མི་དམངས་ཀྱི་གང་ཞིག་འགན་དུ་བླངས་ཡོད་པ་རེད་ལ། གང་ཞིག་འཐུས་ཤོར་དུ་བཏང་བ་རེད། འདི་མི་དམངས་ཀྱི་གྱོང་རེད་ལ་ནོར་འཁྲུལ་ཡང་ཡིན། སྤྱིར་མི་དམངས་རྣམས་ལ་རང་ཉིད་ཀྱི་འདོད་ཚུལ་དང་རྟོགས་ཞིབ། རྒྱུས་མངའ་སོགས་གང་ཡང་མེད་པར། མིའི་བཤད་རྗེས་ལ་ཤོར་འགྲོ་བའི་ཉེར་ལེན་ལས་འདི་ལྟར་བྱུང་བ་རེད། གྲོས་ཚོགས་ནང་དུ་བློ་གཟུར་བའི་ངང་ནས་བལྟས་ན་གང་ལ་གང་འཚམས་ཀྱི་འཐུས་མིའི་ཚོས་ཕྱག་ལས་གནང་ཡོད་པ་རེད། འོན་ཀྱང་ང་ཚོའི་འཐུས་མི་རྣམས་ལ་སྐྱོན་ཞིག་ཡོད་པ་ནི་གྲོས་ར་གྲོས་འདེབས་ཞེ་དྲག་མི་གནང་བར་རང་སྒེར་དང་། ཕྱོགས་ཞེན། འཐེན་འཁྱེར་གྱི་ངོ་བོ་ཤིན་ཏུ་ཆེ་ལ་རང་སྒེར་དང་། ཕྱོགས་འཐེན་རང་ལུགས་རྩོད་པ་ཤིན་ཏུ་དགའ་ཞིང་དེ་ནི་ཁོ་ཚོའི་འཇོན་ཐང་ཞིག་ལ་བློམ་བཞིན་ཡོད་པ་མ་ཟད། ཆབ་སྲིད་ཀྱི་ནུས་ཤུགས་ཀྱང་སྤེལ་ཡོད་བསམ་པའི་འདུ་ཤེས་ཆེ། མི་དམངས་ཀྱིས་ཀྱང་དེ་འདྲ་ཞིག་ཡིན་བསམ་པའི་ཕྱོགས་གཉིས་ཀའི་ལྟ་བ་གཞི་གཅིག་ལ་སྣང་པའི་སྐྱོན་ཡོད། དེ་བས་དགྲ་ཕྱོགས་ལ་ལབ་གླེང་མེད་པར་ནང་རྩོད་དང་རང་ཕྱོགས་ཁོ་ནའི་ལམ་བུ་བརྒྱུད་བཞིན་པ་འདི་དག་དགའ་གཉེན་སྡུག་གི་གནས་སུ་མཆིས། བསམ་བློ་ཞིབ་ཏུ་བཏང་ན་འདི་འདྲའི་གོ་འཛོལ་ཞིག་དང་ཉེས་སྐྱོན་རྐྱང་གི་གྲོས་ཚོགས་ཤིག་འབྱུང་བཞིན་པ་ནི་འདི་ནང་དུ་བསམ་གཟས་ནས་དབྱེན་སྦྱོར་མཁན་རྒྱ་མིའི་གསང་ཉུལ་བ་ལོས་ཡོད་བསམ་པ་འདུག རེ་ཟུང་ལ་དོགས་གནས་ཀྱང་ཧ་ཅང་ཆེ།
བདེན་དོན་ལ་བརྟེན་པའི་གནས་ལུགས་རིགས་པ་དང་རྒྱུ་མཚན་དུ་མའི་ལམ་ནས་ངོ་སྤྲོད་ཇི་ཙམ་ཞུས་ཀྱང་། མང་ཆེ་བ་ཞིག་ལ་ཧ་ཅང་གོ་བརྡ་འཕྲོད་དཀའ་བ་དང་། ཡང་གཞན་དག་མང་པོར་གོ་བརྡ་འཕྲོད་ཀྱང་དགོས་དབང་གིས་གོ་བརྡ་མ་འཕྲོད་པའི་ཚུལ་བཟུང་སྟེ་བཞུགས་པ་དང་། ཡང་འགའ་རེས་གོ་བརྡ་འཕྲོད་མིན་ལ་མི་ལྟོས་པར་སྙན་རྒྱབ་ཀྱི་ལྷགས་པ་ལྟ་བུར་སྣང་མེད་བཏང་སྙོམས་སུ་བཞག་པ་ལ་བརྟེན་ནས་བསམ་ཚུལ་སྨྲ་བརྗོད་ཐམས་ཅད་རང་བཞིན་ནུས་མེད་སོང་བའི་གནས་ཚུལ་ཞིག་བྱུང་།
ཅེས་དང་། ཡང་།
བཙན་བྱོལ་ནང་གཞུང་འཛིན་དང་ཕྱོགས་འགལ་ཚོགས་པའི་དབྱེ་བ་མེད་སྟབས་ཚོགས་པ་འདི་གཉིས་ཀྱི་འགན་དེ་གྲོས་ཚོགས་ཀྱི་འཐུས་མི་ཚོས་འཁུར་དགོས་པ་ཡིན་མོད། འོན་ཀྱང་ད་ལྟ་བར་གྲོས་ཚོགས་ཀྱི་འཐུས་མི་ཚོས་བཀའ་ཤག་གྲོགས་མེད་ཁེར་རྐྱང་དུ་བཞག་པའི་ཚོར་བ་ཤུགས་ཆེ་བྱུང་།
༼འདི་ཁོང་གི་བརྗོད་ཚིག་ཇི་བཞིན་མིན། དོན་དག་དེ་འདྲ་ཞིག་ཡིན་སྙམ་ཡོད། ནོར་ན་དགོངས་དག༽
བཀའ་ཁྲི་མཆོག་གིས་འུ་ཐུག་གི་བཀའ་མོལ་འདི་འདྲ་གསུངས་པ་ཐེངས་གཅིག་གཉིས་མིན་བསམ་པ་ཡོད། འོན་ཀྱང་ད་ལན་གསར་འགོད་པས་གྲོས་ཚོགས་ཀྱི་འཐུས་མི་ཚོས་བཀའ་ཁྲིའི་ལན་འདེབས་དང་གསལ་བཤད་སོགས་ལ་རྒྱབ་སྐྱོར་བྱེད་རྐྱང་བྱེད་ཀྱི་ཡོད་པའི་བཟོ་འདྲ་ཞིག་གསུགས་འདུག
རྒྱུ་མཚན་རྡོ་ནང་བཞིན་གྱི་གཞོམ་མེད་མཁྲེགས་པོ་དེ་འདྲ་བཀོད་ཡོང་དུས་ཁོང་ཚོར་ལབ་རྒྱུ་གང་ཡང་མ་བྱུང་བས་ཡིན་འགྲོ་མ་གཏོགས་དེ་མིན་འཐུས་མི་འདི་ཚོས་ལས་སླ་པོར་མགོ་འཇོག་འཇོག་བྱེད་ཀྱི་མ་རེད། དམིགས་བསལ་འགའ་ཞིག་གི་བྱེད་སྟངས་ལ་བལྟ་དུས་བཀའ་ཤག་གི་ལན་འདེབས་དང་གསལ་བཤད། ལས་དོན་གྱི་བྱེད་ཕྱོགས་སོགས་ལ་རྒྱབ་སྐྱོར་དང་ལས་དོན་ལེགས་འགྲུབ་དོན་འཁྱོལ་ཡོང་བའི་ཆེད་རོགས་འདེགས་བྱ་རྒྱུའི་ཚབ་ལ་བརྒྱུད་རིམ་དེའི་ཁྲོད་ནས་སྐྱོན་འདོགས་བྱ་ས་ཞིག་ཇི་ལྟར་རྙེད་ཨེ་ཡོང་བསམ་བསམ་གྱི་རྔམས་སེམས་ཞིག་དང་དོ་སྣང་ཞིག་ཡོད་པ་ལྟ་བུའི་ཚོར་སྣང་བྱུང་།
གོ་མྱོང་རྐྱང་རྐྱང་བྲིས་འདུག་གཱ འུ་གཉིས་ཀྱི་བསམ་ཚུལ་གཅིག་པ་ཡིན་ས་རེད། ད་དུང་འུ་ཚོའི་བསམ་ཚུལ། ཧེ་ཧེ་ཧེ།
རྩེད་མོ་ཡིན། བསུམ་ཚུལ་ཡག་ཐག་ཆོད་ཅིག་བྲིས་འདུག