ལོ་རབས་དྲུག་ཅུའི་ནང་བོད་མིའི་དབུ་ཁྲིད་ྋགོང་ས་མཆོག་གིས་བོད་ཀྱི་སྲིད་དབང་ལམ་ལུགས་དམངས་གཙོ་ཅན་དུ་བསྒྱུར་པ་ནས་ད་བར་མི་ལོ་ལྔ་བཅུ་ཕྱིན་པ་རེད། ཞིབ་འདང་ཞིག་བརྒྱབ་ཚེ་དེ་ནི་འདས་པའི་མི་ལོ་ལྔ་བཅུའི་སྔོན་དུ་རླབས་ཆེན་གྱི་དབུ་ཁྲིད་ཅིག་གིས་རང་གི་རྒྱལ་ཁབ་ཀྱི་སྲིད་དབང་དུས་བསྟུན་བཅོས་སྒྱུར་བྱས་པ་ཞིག་དང༌། གཞན་དུ་ན་ལོ་རྒྱུས་ཐོག་གི་རང་ཉིད་ཀྱི་བདག་དབང་ཞིག་རྐང་བཙུགས་ནས་མི་དམངས་ལ་གསོལ་རས་གནང་བ་ཞིག་ཀྱང་རེད། འདི་ལྟར་བལྟས་ཚེ་རང་རེའི་ཡུལ་ཁམས་དང་ས་འབྲེལ་རྒྱ་ནག་གཙོས་ཀོ་རི་ཡ་བྱང་མ་དང༌། འབར་མ་སོགས་སྲིད་དབང་གཅིག་སྡུད་ལམ་ལུགས་ཀྱི་དབུ་ཁྲིད་ཚོའི་མདུན་དུ་རང་རེའི་དབུ་ཁྲིད་མཆོག་ནི་ཇི་འདྲའི་རྒྱུ་སྐར་ཁྲོད་ཀྱི་ཉི་མ་ཞིག་ཨང༌།
ཡིན་ནའང་ཐབས་སྐྱོ་བ་ཞིག་ལ་འདས་པའི་མི་ལོ་ལྔ་བཅུ་དེའི་ཁྲོད་བཙན་བྱོལ་བོད་མིའི་སྤྱི་འབོར་མང་ཤོས་ཤིག་གིས། ད་དུང་དམངས་གཙོའི་གོ་རྟོགས་ཡང་དག་པ་ཞིག་དང་དེའི་རིན་ཐང་གསལ་བོ་ཞིག་རྙེད་ཀྱི་མེད་པ་ནི། བོད་མིའི་སྤྱི་འབོར་མང་ཤོས་ཀྱིས་འོས་བསྡུའི་ལས་རིམ་ནང་ཆ་ཤས་ལེན་གྱི་ཡོད་མེད་དེ་ཚད་འཇལ་གསལ་བོ་ཞིག་ཆགས་ཡོད། ཚུལ་དེ་འདས་པའི་ཆར་སྤྱི་འཐུས་ཚོགས་གཙོའི་བཀའ་ཁྲི་འོས་འདེམས་སྐོར་གྱི་གསུང་བཤད་དང༌། དེ་བཞིན་བློ་བཟང་སེང་གེའི་བཀའ་བློན་ཁྲི་བའི་འོས་བསྡུའི་བསྐྱར་བཅོས་ཞེས་པའི་རྩོམ་ཡིག་གཉིས་སུ་གསལ་བོར་སྣང་སྟབས་འདིར་བསྐྱར་བརྗོད་བྱེད་གལ་མ་མཆིས།
ད་ལྟ་ང་ཚོས་རང་རེའི་དབུ་ཁྲིད་ཀྱི་ངོས་དང་མི་དམངས་རང་ཉིད་ཀྱི་ངོས་ཏེ་ངོས་གཉིས་ནས་གཞིགས་ཚེ། དམངས་གཙོ་ཞེས་པའི་ཚིག་དོན་ངོ་མ་དེ་ངོས་གང་ཞིག་དང་འབྲེལ་ཐག་ཉེ་བ་ཡོད་པ་དང༌། ཡང་ན་ངོས་གང་དང་ས་འདྲེས་རྡོ་འདྲེས་སུ་འདུག་པའང་ཟུར་བསྟན་ལེབ་མཐོང་ཡིན་པ་རེད། ཡིན་ནའང་བསམ་ཡུལ་ལས་འདས་པ་ཞིག་ལ་ད་ལྟ་རྒྱ་ནག་གཞུང་གིས་ཏཱ་ལའི་བླ་མས་སྤྱི་ཚོགས་རྙིང་བ་རོ་ལངས་རྒྱག་གི་ཡོད་ཚུལ་བཤད་ལ། བཙན་བྱོལ་བོད་གཞུང་ཡང་ཁྲིམས་འགལ་ཡིན་ཚུལ་ཤོད་ཀྱིན་ཡོད།
ངོ་མ་ངུ་རྒྱུ་ཡོང་ལ་དགོད་རྒྱུ་ཡང་ཡོང་བ་ཞིག་ནི། རང་རེའི་དབུ་ཁྲིད་མཆོག་གིས་དམངས་གཙོའི་སྒོ་འཕར་ཡངས་པོར་ཕྱེས་ནས་མི་ལོ་ལྔ་བཅུ་ཙམ་ཕྱིན་ནའང༌། ང་ཚོ་མི་དམངས་ད་དུང་དམངས་གཙོའི་གནས་ལུགས་དང་ཐག་རིང་ས་ཞིག་ན་ཡོད་པ་དེས། སླར་ཡང་ཁོང་ལ་ཁ་རྡུང་གཏོང་བྱེད་ཀྱི་ལག་ཆ་འདི་དག་ཆགས་ཀྱི་ཡོད་པ་རེད། འདིས་ང་ཚོ་རང་ཉིད་ཀྱིས་རང་ཉིད་མེད་པ་བཟོ་བ་དང༌། དམངས་གཙོ་དང་ང་ཚོ། ང་ཚོ་དང་ང་ཚོའི་དབུ་ཁྲིད་བར་གྱི་རྒྱང་ཐག་ཀྱང་གསལ་བོ་ཞིག་བསྟན་ཡོད།
མཚམས་འདི་ནས་ཡིད་ལ་ཐོལ་གྱིས་འཁོར་ཡོང་བ་ཞིག་ནི་སྔོན་ཆད་ཕྱི་རྒྱལ་གྱི་ཡུལ་མི་ཞིག་གིས་བོད་མིའི་སྤྱི་ཚོགས་ཀྱི་གཟུགས་བརྙན་གསོན་པོར་བྲིས་པ་སྟེ། བོད་པ་རྣམས་འདམ་རྫབ་ཁྲོད་ཀྱི་ཤིང་རྟ་འཁོར་ལོ་ཞིག་གི་ནང་ལྷོད་པར་བཞུགས་པ་དང༌། ྋགོང་ས་མཆོག་གིས་གཅིག་པུས་ཤིང་རྟའི་ཡུ་བར་འཇུས་ཏེ་འདམ་རྫབ་ཁྲོད་ཀྱི་ཤིང་རྟ་དེ་ཡར་འདྲུད་བཞིན་པའི་དཔེ་རིས་དེ་ནི་ཇི་འདྲའི་དཔེ་མཚོན་ཡང་དག་ཅིག་ཨང༌། ལར་ནས་ང་ཚོ་འདི་མུར་ཕྱིན་ཚེ་ང་ཚོའི་སྣང་ཚུལ་འདིས་རྒྱ་གཞུང་གིས་ཏཱ་ལའི་བླ་མ་ཞལ་མ་བཞུགས་དུས་བོད་པའི་གནད་དོན་མཇུག་སྒྲིལ་བར་འདོད་པའི་རེ་བ་དེར་ཡང༌། ང་ཚོ་རང་ཉིད་ཀྱིས་རྒྱ་གཞུང་ལ་གསལ་འདེབས་སམ་བརྡ་ལན་ཞིག་ཅིས་མ་ཡིན།
ཟླ་བ་ལྷ་མོ་ལགས། ཁྱེད་ཀྱི་དྲི་བ་དེ་དང་ཐོག་ངས་ང་རང་ལ་བཏང་བ་ཡིན།
དྲང་མོར་ཞུ་ན།ངས་རྩོམ་ཡིག་ཕྱི་མའི་ཆེད་དུ་སྔ་མ་དེ་སྔོན་འགྲོའི་ཚུལ་དུ་འབྲི་དགོས་བྱུང༌།ཐུགས་ཕན་སོས་མིན་མི་ཤེས་ཀྱང་རྩོམ་ཡིག་ཕྱི་མ་ཞིག་རང་མིན་དུས་བབ་དྲ་ཚིགས་སུ་བསྐུར་ཆོག
རྡོ་རྗེ་རིན་ཆེན་ལགས།ཁྱེད་ཀྱིས་གསུང་བ་དེ་ཚོ་སྡོན་མ་ནས་ཐོས་མྱོང་ཡོད་ཁྱོད་ཀྱིས་བསམ་ན་ང་ཚོའི་་མང་ཚོགས་ལ་ལམ་སྟོན་ག་འདྲ་ཞིག་སྟོན་ན་བཟང་ངམ།