བསྟན་འཛིན་ཉིན་བྱེད།
༢༠༡༠ ཟླ་ ༩ ཚེས་ ༢༧ ཉིན་ཨ་རིའི་རྒྱལ་ནང་གསར་ཤོག་ནེའུ་ཡོག་དུས་བབ་ New York Times ནང་གནས་ཚུལ་ཐོན་གསལ་ལྟར་ན། ༧གོང་ས་མཆོག་གིས་སེམས་ཁམས་རིག་པ་བ་ Psychologist འབུམ་རམས་པ་ཌ་ཝི་ཌུ་སོན་ Dr. Davidson གྱིས་ཆེད་འཛུགས་བྱས་པའི་མེ་ཏི་སེན་སེམས་ཀྱི་འཕྲོད་བསྟེན་དཔྱད་ཞིབ་བསྟི་གནས་ཁང་ Center for Investigating Healthy Mind དུ་ཨ་སྒོར་ཁྲི་ལྔ་ཡི་ཞལ་འདེབས་གནང་རྒྱུའི་ཞལ་བཞེས་གནང་འདུག
གནས་ཚུལ་འདི་བཞིན་ཕྱོགས་གཅིག་ནས་བལྟས་ན་དགའ་འོས་པ་ཞིག་ཡིན་སྲིད། གང་ཡིན་ཟེར་ན་བསྟི་གནས་ཁང་གིས་དངུལ་འབོར་དེ་དག་སྒོམ་སྟེ་བྱམས་སྙིང་རྗེ་འཕེལ་རྒྱས་གཏོང་རྒྱུའི་ཉམས་ཞིབ་ཐད་བེད་སྤྱོད་གཏོང་རྒྱུ་རེད། གལ་ཏེ་ཉམས་ཞིབ་ཚགས་ཚུད་ཅིག་བྱུང་ཚེ་འགྲོ་བ་མིར་ཕན་རྒྱུ་ཡིན་པས་དགེ་བའི་ལས་ཤིག་རེད།
ཡིན་ནའང་ཕྱོགས་གཞན་ཞིག་ནས་བསམ་བློ་གཏོང་ཚེ་དངུལ་འབོར་ཕོན་ཆེ་དེ་འདྲ་ཞལ་འདེབས་གནང་བ་དེ་ཏག་ཏག་བསྡད་ཡོད་མེད་ང་ལ་བློ་དོགས་ཞིག་སྐྱེས་བྱུང་། དེའི་རྒྱུ་མཚན་གཙོ་བོ་ནི། ང་ཚོ་བཙན་བྱོལ་བ་ཚོར་ས་ལག་མཐིལ་ཙམ་ཞིག་མེད་པར་མ་ཟད། དཔལ་འབྱོར་གྱི་ཆ་ནས་ཆེས་ཉམས་ཐག་རེད། ལྷག་པར་དུ་ཨ་རི་ནི་འཛམ་གླིང་གི་དམག་སྲིད་དང་དཔལ་འབྱོར་གང་ཅིའི་ཐད་ནས་སྟོབས་ཤུགས་ཆེ་ཤོས་ཡིན་སྟབས་ང་ཚོ་སྐྱབས་བཅོལ་ཡུལ་མེད་ཉམས་ཐག་ཅིག་གིས་ཞལ་འདེབས་སྤྲད་པ་དེ་བློ་ཡུལ་དུ་ཤོང་ཁག་པོ་ཞིག་རེད། གལ་ཏེ་ཉམས་ཞིབ་དེ་ཆེས་གལ་ཆེ་ཞིག་ཡིན་ན་ཨ་རིའི་གཞུང་དང་གཞུང་འབྲེལ་མ་ཡིན་པའི་སྒྲིག་འཛུགས་ཁག་གིས་འགྲོ་གྲོན་གཏོང་ན་འཚམ་པོ་འདུག་སྙམ།
ལར་ནས་ཨ་རིའི་གཙུག་ལག་སློབ་གྲྭ་ཆེན་མོས་བྱམས་སྙིང་རྗེར་ཉམས་ཞིབ་བྱས་པའི་འབྲུ་དོན་འདིས་ང་ཚོ་བོད་པ་ཚོར་ཁ་ཡོད་ལག་ཡོད་ཀྱི་ཁེ་ཕན་གང་འདྲ་ཞིག་རག་རྒྱུ་ཡོད་མེད་ཀྱི་དྲི་བ་ཞིག་རང་བཞིན་གྱིས་སེམས་ལ་ཤར་སོང་། ལ་ལས་ཞལ་འདེབས་ཕོན་ཆེན་དེ་འདྲ་གནང་བར་བརྟེན་༧གོང་ས་མཆོག་གི་སྐོར་ཨ་རིའི་སྙན་གྲགས་ཆེ་ཤོས་ཀྱི་ཚགས་ཤོག་ནང་གནས་ཚུལ་ཐོན་པ་རེད་ཅེས་བརྗོད་སྲིད་པས་རྒྱུ་མཚན་ མེད་པ་ཞིག་མིན་མོད། ཡིན་ནའང་གནས་ཚུལ་ཞིབ་ལྟ་བྱས་སྐབས་༧གོང་ས་མཆོག་ནི་བོད་མིའི་ཆོས་ཀྱི་དབུ་ཁྲིད་ Tibetan Spiritual Leader རེད་ཅེས་བྲིས་པ་མ་གཏོགས་ཆོས་སྲིད་གཉིས་ལྡན་གྱི་དབུ་ཁྲིད་ Spiritual and Political Leader of Tibet ཅེས་བཀོད་མི་འདུག འདི་ནི་ཆེད་མངགས་བྲིས་པ་ཞིག་ཡིན་ཅིང་། གོ་དོན་གཙོ་བོ་ནི་བོད་དེ་རྒྱའི་བཙན་རྒྱལ་འོག་ཡོད་པའི་དྲང་བདེན་གྱི་ཆབ་སྲིད་ཀྱི་གནས་བབ་ལ་གདེང་འཇོག་མ་བྱས་པ་རེད།
དེར་བརྟེན་ངའི་བློར་ཨ་རིའི་སེམས་ཁམས་རིག་པ་བ་ཞིག་ལ་ཨ་སྒོར་ཁྲི་ལྔ་ཞལ་འདེབས་གནང་བ་ལས་དངུལ་འབོར་དེ་དག་བོད་ཕྲུག་ན་གཞོན་བློ་སེམས་བཀྲ་བ་ལ་ལར་མ་མཛུགས་བྱས་ཏེ་སེམས་ཁམས་རིག་པ་ཇི་སྙེད་ཅིག་གསོ་སྐྱོང་བྱེད་ན་ལེགས་པ་མི་འདུག་གམ་ཞེས་དྲི་བ་ཞིག་ཤར་སོང་།།
བསྟན་འཛིན་ཉིན་བྱེད་ལགས།
ཁྱེད་ཀྱིས་༸གོང་ས་མཆོག་ནས་ལོ་རེར་ཧིན་སྒོར་ས་ཡ་བདུན་ཅུ་བརྒྱད་ཅུ་རེ་བོད་གཞུང་ལ་གསོལ་རས་གནང་གི་ཡོད་པ་མ་ཤེས་སམ། ཁྱེད་རང་ཡང་༸གོང་ས་མཆོག་གི་ཕྱག་དངུལ་གྱི་བཀའ་དྲིན་འོག་ནས་འཚར་ལོངས་བྱུང་བ་ཞིག་མ་ཡིན་ནམ། ལར་ནས་༸གོང་ས་མཆོག་ནི་བོད་མི་ཁོ་ནའི་དབུ་ཁྲིད་ཅིག་མིན་པ་འདི་ཤེས་དགོས། འཛམ་བུ་གླིང་གི་དབུ་ཁྲིད་རེད། ཁོང་བོད་མི་ཁོ་ནའི་ཁྲོད་བཞུགས་ཏེ་གཞན་དུ་མཛད་འཕྲིན་མ་བསྐྱངས་ན་བོད་དོན་འདི་འཛམ་གླིང་ལ་ཇི་ལྟར་ཁྱབ་ཐུབ། ཅིག་ཤེས་ཟེར་མཁན་ཞིག་གིས་འདི་ཙམ་ཡང་མ་ཤེས་པ་ནི་ངོ་མ་བློ་ཕམ་པའི་གནས་རེད།
སྟན་འཛིན་ཉིན་བྱེད་ལགས། ཁྱེད་ཀྱིས་བརྒྱུད་ལམ་གང་ལེགས་འགའ་སྤྱད་ནས། ནིས་ཝོ་ཡོག་དུས་བབ་ཁང་ལ། གོང་ས་མཆོག་ལ་ཆོས་སྲིད་གཉིས་ཀྱི་དབུ་འཁྲིད་ཅེས་བྲིས་མེད་དོན་ཅི་ཡིན་འདྲི་རྩོད་གནང་རོགས། དེ་བཞིན་དབྱིན་སྨྲ་བ་གང་ན་སུ་བཞུགས་དག་གིས་ཀྱང་ངོ་།། གཞན་ཞལ་འདེབས་དེས་འཛམ་གླིང་ལ་དེ་འདྲའི་རིག་གནས་ཤིག་བྱུང་ན་ལས། བོད་ཁོ་ནར་ཕན་དགོས་པའི་དམན་སེམས་ཀྱིས་ཅི་བྱེད། སྐྱབས་མགོན་མཆོག་གིས་བཙན་བྱོལ་བོད་གཞུང་དམངས་དང་རིགས་གཅིག་རྐང་འཛིན་སོགས་ལ་ཇི་ཙམ་གནང་གི་ཡོད་པ་མཁྱེན་ལེ་ཡོད་སྙམས་སོ།།
ངས་གོང་ས་མཆོག་གིས་ཞལ་འདེབས་ཕུལ་བ་དེ་དོན་ཐོག་གནས་འདུག་བསམ་བྱུང་། རང་དབང་ལུང་པ་ནས་ནར་སོན་ཞིང་ནུབ་ཕྱོགས་ལ་ཧ་ཅང་རྒྱུས་ཡོད་ཁུལ་གྱིས་ཆེན་པོ་ཆེན་ལབ་མཁན་དེ་ཚོར་བློ་གཏད་ཡེ་ནས། དེ་འདྲའི་བློ་དཀར་པོ་ཡོད་ན་བཙན་བྱོལ་གཞུང་དང་ཚོགས་པ་སྒྲིག་འཛུགས་ནས་བོད་དོན་ཆེད་ཉིན་གཅིག་གི་ལས་དོན་མི་གནང་བ་ཅིན་ཡིན་ནམ། གང་གི་ཁྱད་ལས་སྐྱེས་མ་ཐག་ནས་གཞན་སྐྱོན་ཁོ་ན་བཙལ་བའམ་དེར་བརྟེན་ཁེ་ཕན་གཞན་ཞིག་རེག་གི་ཡོད་ན་ཅི་ཤེས།
བསྟན་འཛིན་ཉིད་བྱེད་ཟེར་བས་༧གོང་ས་་མཆོག་གིས་རོགས་དངུལ་གནང་བར་མི་འདོད་པའི་རྣམ་པ་བསྟན་འདུག་པར་ཅི་ཞིག་ཡིན་ནམ།་་ང་ཚོའི་བོད་ཀྱི་མཚན་སྙན་ནི་༧གོང་ས་མཆོག་གི་མཚན་སྙན་དང་འབྲེལ་ཡོད་ཅིང།་་བོད་ཀྱི་ལས་དབང་ནི་༧གོང་ས་མཆོག་གི་ལས་དབང་དང་འབྲེལ་ཡོད་པར་ཤེས་དགོས།་་༧གོང་ས་མཆོག་གི་གྲོགས་པོ་ནི་ང་ཚོ་བོད་ཀྱི་གྲོགས་པོ་ཡིན་ལ།་་༧གོང་ས་མཆོག་གིས་གནང་བ་ནི་ང་ཚོ་བོད་ཀྱིས་གནང་བ་ཡིན་པས་བོད་པ་རྣམས་འདི་ལྟར་ཉམ་ཐག་པའི་སྐབས་སུའང་གཞན་ལ་ཕན་རོགས་བྱེད་བཞིན་འདུག་བསམ་ནས་འཛམ་གླིང་གི་མི་མང་དགའ་མགུ་ཡིད་རང་བྱ་བར་ངེས་སོ།་།མདོར་ན་ཚིག་ཐག་ཆོད་པོས་བཤད་ཐུབ་པ་ནི།་༧གོང་ས་མཆོག་རྒྱལ་ན་ང་ཚོ་བོད་རྒྱལ་ཞིང།་༧གོང་ས་མཆོག་ཕམ་ན་ང་ཚོ་བོད་ཕམ་པ་ཡིན།་སྤྱིར་ནས་ང་ཚོ་བོད་མི་སྤྱི་ཡོངས་ནས་འཐབ་རྩོད་རྒྱ་མི་ལ་བྱེད།་ཁ་རྡུང་རྒྱ་མི་ལ་གཏོང་།་རྩོམ་ཡིག་གི་ཁ་ཕྱོགས་རྒྱ་མི་ལ་གཏད་ནས་ལན་འདེབས་བྱེད་བཞིན་པའི་སྐབས་ནང་ཁུལ་ལ་འཚང་འབྲུ་རེས་དང་ལྷག་པར་༧གོང་ས་མཆོག་གི་བླ་ན་མེད་པའི་མཛད་ཕྱོགས་ལ་བསམ་འཆར་འདོན་པའི་ཁུལ་བྱེད་པ་ནི་སངས་རྒྱས་ལ་ཀ་ཁ་སློབ་པའི་ངང་ཚུལ་ཙམ་དུ་ཟད་དོ།་།རྒྱལ་སྤྱིའི་མཁས་དབང་རྣམས་ཕར་ཞོག་ཐ་ན་རྒྱ་མིའི་གཞུང་འབྲེལ་མི་སྣ་གནད་ཡོད་དག་གིས་ཀྱང་༧ཏཱ་ལའི་བླ་མ་ནི་ནང་དོན་རིག་པར་བྱང་ཆུབ་པ་ཡིན་པ་ཨ་རྐྱང་རྐྱང་འཛམ་གླིང་གི་ཆབ་སྲིད་ལའང་ཧ་ཅང་བྱང་ཆུབ་པ་ཞིག་རེད་ཅེས་དབང་མེད་དུ་ཁ་ནས་ཤོར་འདུག་པཨེ་ཤེས།་ངས་དྲན་གསོ་གཏོང་འདོད་པ་ནི།་་སྐུ་ཕྲེང་བཅུ་གསུམ་པའི་ཆུ་སྤྲེལ་ཞལ་གདམས་སུ་ང་ཚོ་བོད་མིར་མས་བུ་ལ་གདམས་པ་ལྟར་གདམས་ཀྱང་ང་ཚོས་བཀའ་བཞིན་མ་སྒྲུབ་པས་མཐའ་མར་བོད་ཕུང་ལ་སྦྱར་བ་འདི་བྱུང་བ་ཡིན་ནོ།་་།
འདིར་སྨྲས་པ།་
རྣམ་དཔྱོད་བློ་མིག་བྲལ་བ་རང་རིགས་འགས།།
བཀའ་དྲིན་བསམ་ཤེས་མེད་པའི་རང་རིགས་འགས།།
ཕྱོགས་ཞེན་དུག་ཆུས་མྱོས་པའི་རང་རིགས་འགས།།
གངས་ལྗོངས་བོད་འདི་ཕུང་ལ་སྦྱོར་ཉེར་བདའ།།
བོད་མི་ལ་ལ་ཞིག་གིས་གཞན་གང་ཡང་མི་མཐོང་བར་རྒྱལ་བ་རིན་པོ་ཆེས་ཕྱག་དངུལ་ཉུང་ཉུང་དེར་ཁ་གདངས་མིག་ཅེར་ནས་བལྟས་བསྡད་ཡོད་རེད། ང་ལྟ་བུ་ཞིག་ཡིན་ན་ཐོག་བོད་ནས་གསར་དུ་འབྱོར་དུས་སྣེ་ལེན་ཁང་གི་ལྟ་རྟོག་རོགས་སྐྱོར་དང་ལེན་བྱས་ཡོད། དེང་སང་རང་ཁ་སོས་ཙམ་ཞིག་བྱུང་ཡོད། རྒྱལ་བ་རིན་པོ་ཆེས་ཕྱག་དངུལ་གནང་ན་ཡང་མི་ལེན་ཐག་ཆོད་ཡིན། ང་ལ་གནང་བ་ལས་ཁོང་གིས་སེམས་ཁམས་རིག་པ་དང་འབྲེལ་བའི་ལས་གཞི་སྒྲུབ་མཁན་རེ་ལ་གནང་ན་ཕན་ཐོགས་ཆེ་བ་ཡོད་རེད།
སེམས་ཁམས་དང་འབྲེལ་བའི་ལས་གཞི་དེ་ཚོ་རྒྱལ་བ་རིན་པོ་ཆེས་ཆེས་དགའ་མོས་གནང་ས་ཞིག་རེད། ཁོང་ལ་ཞལ་འདེབས་རེ་གནང་རྒྱུ་ཡོད་ན་དེ་ཚོར་ལོས་གནང་། ང་ཚོ་བོད་མི་ཚོས་རྒྱལ་བ་རིན་པོ་ཆེའི་ཕྱག་དངུལ་ཟ་རྒྱུ་མང་དྲགས་ན་ཉུང་དྲགས་ཡོད་པ་མ་རེད། ཁྱོད་ཚོས་འདི་འདྲ་བཤད་རྒྱུ་ཡིད་ལ་ཤར་བ་ཁྱད་མཚར་རེད།
ཁྱོད་ཀྱིས་སྐབས་འདིར་ཁེ་ཕན་ཞེས་བ་དེ་ཐད་ཀར་བོད་པ་ཚོར་རེགས་སྲིད་པ་ཞིག་རེད་དམ་ཅེས་འདྲི་བཞིན་ཡོད་ན་དེ་ལས་གཞི་འདི་ལས་འཆར་ཁག་ལ་ལྟོས་ནས་སྐད་ཆ་བཤད་རྒྱུ་ཞིག་རེད། འོན་ཀྱང་གཅིག ༧གོང་ས་མཆོག་གིས་ནམ་ཡང་ཆོས་ལུགས་དང་མི་རིགས་ལ་དབྱེ་བ་མེད་པར་འགྲོ་བ་མིའི་རིགས་ཡོངས་ལ་ཞབས་འདེགས་དང་ལེགས་སྐྱེས་ཞིག་འབུལ་རྒྱུ་ཁོང་གི་དགོངས་གཞི་གཙོ་བོ་རེད། གཉིས། ༧གོང་ས་མཆོག་གིས་བཙན་བྱོལ་གཞུང་བཙུགས་ནས་ད་ལྟའི་བར་ལོ་རེ་རེ་བཞིན་ཧིན་སྒོར་འབུམ་ཕྲག་མང་བོ་སྔོན་རྩིས་གཏན་འབེབས་དང་ཐ་ན་ཟུར་འཇོག་གིས་སློབ་ཡོན་གནང་བཞིན་ཡོད་ཀྱང་། སྨན་གྱི་ལས་རིགས་ཞིག་ཡིན་ནའང་སེམས་དང་ཀླད་པ། རྣམ་ཤེས་སོགས་ལ་ཞིབ་འཇུག་བྱེད་མཁན་ལས་ནད་གཡོག་སྦྱངས་མཁན་རྐྱང་ཐོན་བཞིན་ཡོད་སྟབས། གཅིག་བྱས་ན་ཁོང་ཨུ་ཐུག་པ་ཡིན་རྒྱུ་རེད།
༧གོང་ས་མཆོག་ལ་མིའི་འདུ་ཤེས་ཀྱིས་ཁྱེད་ཀྱིས་འཁང་ར་གནང་བར་གདེངས་འཇོག་ཡོད།
འོན་ཀྱང་དངུལ་འབོར་དེ་ཕར་ཞོག་དེ་ལས་མང་ཞིག་ཡིན་རུང་ཞལ་འདེབས་གནང་བའི་དབང་ཆ་ཡོངས་སུ་༧གོང་ས་མཆོག་ལ་ཡོད་པ་ནི་འཇིག་རྟེན་གྱི་མི་ཞིག་ལ་ཆ་བཞག་ཀྱང་དེ་ལྟར་རེད། ལར་ནས་འདིས་༧གོང་མཆོག་ནི་བོད་མི་གཅིག་བུ་མིན་པར་འཛམ་གླིང་གི་ཉི་མ་ཡིན་པ་དང་། ༧གོང་ས་མཆོག་གི་ཐུགས་སེམས་ལ་ལྷད་མེད་པ་མཚོན། འདི་ཚོ་ཇུས་མེད་ཇུས་འཁྲི་རང་རེད། དེ་ནི་༧གོང་ས་མཆོག་མི་བུ་ཞིག་གི་བརྩིས་ཐང་གིས་བཤད་ཚུལ་ཡིན།
གཞན་༧གོང་ས་མཆོག་ལྷ་རུ་རྩི་བ་ནི་རང་ཅག་བོད་མིའི་ཐུན་མོང་མ་ཡིན་པའི་ཁྱད་ཆོས་ཡིན། སུ་ཞིག་གིས་དེར་བརྩིས་མ་ཐུབ་ན་བོད་པའི་ཁྱད་ཆོས་ཀྱི་བྱེ་བྲག་ཅིག་མ་ཚང་བ་ཡིན། དེ་ནི་བལྟ་ཚུལ་གཞན་དེ་རེད། སངས་རྒྱས་ཀྱིས་གང་གནང་བ་ལ་མི་འགྲིག་པར་བཤད་ས་ཞིག་མེད།
བསྟན་འཛིན་ཉིན་བྱེད་ཀྱིས་ཕར་སོང་མེད་ན་ཚུར་འོང་མེད་ཞེས་པའི་ཚིག་འདིའི་དོན་གོ་མེད་པ་འདྲ།
འོན་ཏེ།
ཉིན་བྱེད་ནི་གཞུང་འབྲེལ་ཐོག་ཨ་རིར་སློབ་སྦྱོང་བྱེད་བཞིན་པའི་གཞཽན་སྐྱེས་ཤིག་དང་།
ལྷག་པར་ཁོས་རིགས་གཅིག་རྐང་འཛིན་ཞེས་པར་མཐའ་གཅིག་ཏུ་དགག་པ་རྒྱག་གི་ཡོད།
དེ་འདྲའི་སྐོར་ལ་རྩོམ་ཡིག་སྤེལ་ན་ཡག་པོ་མི་འདུག་གམ།
བོད་པའི་གོམས་གཤིས་སྐྱུག་བྲོ་ཤོས་ཤིག་ནི་སོ་སོའི་གནས་བབ་དང་ཆོས་ཉིད་ཀྱི་རང་བཞིན་ལ་མ་བལྟ་བར།
མཐོ་ས་དང་འབྲེལ་མེད་ཅིག་ལ་ལག་པ་དམ་ཐག་གཅོད་འཇུས་ནས་སྡུག་སྐད་རྒྱག་རྒྱུ་དེ་རེད།
སྣ་བོས་གནད་དོན་ལ་ཞིབ་འབྲི་བྱས་འདུག་ཀྱང་།
རྫོགས་ཚིག་མང་པོ་དེ་འདྲ་རྒྱག་པ་དེ་སུའི་ཁུངས་ཡིན་ནམ།
ངས་བྱས་ནས་སྲོལ་འདི་འདྲ་མེད་ན་ཡག་ཤོས་རེད།
བྱུས་གཏོགས་མེད་པའི་བྱུས་གཏོགས་རང་རེད།
དེ་ལས་ཁ་ཚ་དགོས་གཏུགས་ཀྱི་སྤྱི་ཚོགས་ཐོག་གི་གནས་ཚུལ་འདྲ་གླེང་རྒྱུ་མི་འདུག་གམ།
ནེའུ་ཡོག་དུས་བབ་ཐོག་༧གོང་ས་མཆོག་ལ་ཆོས་སྲིད་གཉིས་ཀྱི་དབུ་ཁྲིད་མ་བྲིས་པ་དེས་༧གོང་ས་མཆོག་གི་མཚན་མཐོང་ལ་གང་ཡང་གནོད་ཀྱི་མ་རེད། ཆོས་སྲིད་གཉིས་ཀྱི་དབུ་ཁྲིད་ཅེས་འབོད་སྟངས་དེར་༧གོང་ས་མཆོག་གིས་བཀའ་སློབ་ཞིག་གནང་ཡོད། དེའི་ཐད་ལ་༧གོང་ས་མཆོག་གིས་ད་ཆར་གཞུང་གི་འཛིན་སྐྱོང་གི་དབང་ཆ་མང་ཆེ་བ་བཀའ་བློན་གྱིས་ཐག་གཅོད་ཀྱི་ཡོད་པ་རེད་ལ། དེང་ཕྱིན་རིམ་བཞིན་སྲིད་ཀྱི་དབང་ཆ་ཚང་མ་བཀའ་ཁྲིས་འཁྱེར་དགོས་དུས། ༧གོང་ས་མཆོག་བོད་མིའི་ཆོས་སྲིད་གཉིས་ཀྱི་བདག་པོ་ཡིན་ལབ་ན་ཡག་པོ་མི་འདུག་ཅེས་གསལ་པོར་གསུངས་སོང་། དེ་བཞིན་ལོ་སྔོན་མའི་ལྡི་ལིའི་ཚོགས་ཆེན་ཞིག་གི་ཐོག་ཏུའང་༧གོང་ས་མཆོག་གིས་རྩེད་མོ་དང་སྦྲགས་ཟམ་གདོང་རིན་པོ་ཆེ་ནི་ངའི་སྲིད་ཀྱི་དབུ་ཁྲིད་ཡིན་པ་དང་། ངོས་རང་ཁོང་གི་ཆོས་ལུགས་ཀྱི་དབུ་ཁྲིད་ཡིན་ཞེས་གསུངས་ཡོད། དེའི་ཕྱིར་ཐ་སྙད་དེར་དྲང་དོན་དང་ངེས་དོན་གཉིས་ཡོད་པ་འདྲ། ངས་བསམས་ན་༧གོང་ས་མཆོག་ནི་བོད་མི་རིགས་ཀྱི་ཆོས་སྲིད་གཉིས་ཀྱི་དབུ་ཁྲིད་ཡིན་པ་ལས་བཙན་བྱོལ་བོད་གཞུང་འཛིན་སྐྱོང་གི་དབུ་ཁྲིད་པར་མིན་པར་གོ་དགོས།
༸གོང་ས་མཆོག་གིས་ད་བར་བོད་ཕྲུག་ཚོ་རང་བཙན་ཡོད་པའི་རྒྱལ་ཁབ་ཀྱི་ཕྲུག་གུ་ཚོ་ལས་ལྷག་པའི་གསོ་སྐྱོང་བྱས་ཀྱང་། མཐའ་མཇུག་ཁ་ཕྱིར་འཁོར་ནས་༸གོང་ས་མཆོག་ཁ་གཏད་ལང་རྒྱུ་ཙམ་ལས་ག་རེ་འཇོན་གྱི་འདུག ད་བར་ཕན་ཐོག་པ་སུ་བྱུང་འདུག ལར་ནས་ཏཱ་ལའི་བླ་མའི་དགེ་རྩའི་ཁོངས་༸གོང་ས་མཆོག་ནས་ལོ་རེར་ཧིན་སྒོར་འབུམ་ཕྲག་མང་པོ་ཆེད་དུ་བོད་ཕྲུག་ཚོའི་སློབ་ཡོན་ཆེད་ཟུར་འཇོག་བྱས་ཡོད། དེར་བརྟེན་ཁྱོད་ཀྱིས་མ་བརྟགས་མ་དཔྱད་པར་དཔྱད་རྩོམ་རེ་སྤེལ་ཁུལ་བྱས་པ་ཡིད་རེ་སྐྱོ། སྤྱིར་ཨ་སྒོར་ཁྲི་ལྔ་དངུལ་འབོར་ཆེན་ཡིན་ཡང་ཁྱོད་དང་ཁྱོད་འདྲ་བའི་བོད་ཕྲུག་ཀླད་སྟོང་ཚོར་ཅི་ཡང་མི་ཕན་ཁོ་ཐག་ཡིན་ནོ།།
འཇིག་རྟེན་སྤྱིའི་བདེ་སྡུག་འདོར་ལེན་གྱི་དོན་ཆེན་དང་འབྲེལ་ན་ཨ་རིའི་དབུས་གཞུང་ལ་ཡང་༸གོང་ས་མཆོག་ཞལ་འདེབས་འབུལ་ངེས་སོ། །
ནང་སེམས་ཁམས་དང་ཕྱི་ལུས་ཀྱི་བདེ་སྡུག་དབར་གྱི་ལྟོས་འབྲེལ་ཐད་དེང་རབས་ཚན་རིག་གི་ལམ་ནས་རྟོག་ཞིབ་དང་དོ་སྣང་བྱེད་པའི་བྱ་བ་འདི་རྒྱུན་ལྡན་ཚན་རིག་པ་རྣམས་ཀྱི་དཔྱད་ཞིབ་ལྟར་མཇུག་འབྲས་ལ་འགན་འཁུར་ཅི་ཡང་མེད་པར་གྲུབ་དོན་གསར་པ་ཞིག་རྙེད་ཐབས་ཙམ་ཕྱིར་ཞིབ་འཇུག་ལ་ཞུགས་པ་འདྲ་ཞིག་གཏན་ནས་མིན་ནོ།།
འོན་ཀྱང་ཁྱེད་ནས་ཕྱོགས་འདིའི་རིགས་ལ་དོན་སྣང་དང་བསམ་ཚུལ་སྨྲ་བརྗོད་ཀྱི་ངལ་བ་བསྟེན་པ་ལེགས་སོ།།
རྫོགས་ཚིག་འདི་དེང་རབས་བོད་པའི་སྐད་གཤིས་དང་རྩོམ་རིག་གི་རྒྱ་ལས་འཆོར་ཉེན་འདུག་གོ། དེ་བས་འདིར་མང་ཐག་ཆོད་ཅིག་བྲིས་ནས་ཡོད་དོ། །
༧གོང་ས་མཆོག་གིས་ཨ་སྒོར་ཁྲི་ལྔ་ཡིས་ཞལ་འདེབས་གནང་བ་རྗེས་སུ་ཡི་རིང་ཡོད། བསྟན་འཛིན་ཉིན་བྱེད་ཡིན་ན་ཉིན་སྒྲིབ་ཡིན་ན་མི་ཤེས། གང་ལྟར་༧གོང་ས་མཆོག་གི་ཐུགས་རྗེས་ལོ་གཅིག་གི་ནང་ལ་ང་ཚོར་ཨ་སྒོར་ག་ཚོད་རག་གི་ཡོད་མེད་ཤེས་སོང་ངམ། བཙན་བྱོལ་བོད་གཞུང་ཨ་སྒོར་གྱིས་འཁོར་གྱི་ཡོད་པ་དེ་ཤེས་མ་སོང་ངམ། ཁྲི་ལྔ་ཕར་ལ་གནང་ཡང་ཁྲི་ག་ཚོད་ང་ཚོར་རག་གི་ཡོད་མེད་དེ་ལ་བསམ་བློ་གཏོང་དགོས་པ་རེད། ཧམ་པ་ཚ་བོ་ཞེ་དྲག་བྱེད་རྒྱུ་མེད་རེད།