མི་ནག་ཚང་ལུང་རིགས་རྒྱལ།
ད་ལྟ་ངས་ཟིན་བྲིས་འདི་འབྲི་བཞིན་པའི་སྐབས་སུ། ང་ཚོའི་འོས་སྒམ་གཉིས་དེ་སྔ་མོ་ནས་པེ་ཅིན་ལ་འབྱོར་ཡོད་སྲིད། ཡང་མིན་ན། རྒྱ་ནག་དམར་ཤོག་ཚོགས་པའི་གསང་བའི་ལས་བྱེད་འགས་ཀ་ཐུ་མན་གྲུ་ནས་བཙན་འཕྲོག་བྱས་པའི་འོས་སྒམ་དེ་གཉིས་ཀྱི་རྗེས་འབྲས་གང་འདྲ་ཞིག་ཆགས་མིན་ལ་ཕྱོགས་ཡོངས་སུ་ཉན་ཞིབ་བྱེད་ཀྱིན་པའི་སྒང་ཡིན་ཀྱང་སྲིད།
༧གོང་ས་མཆོག་ད་ཆར་དགུང་ལོ་ ༧༥ ལ་ཕེབས་ཡོད་པ་རེད། ཁོང་གིས་ཡང་དང་བསྐྱར་དུ། ཁོང་ཉིད་དེང་སང་ཕྱེད་བགྲེས་ཡོལ་ཡིན་ཅེས་གསུང་གི་ཡོད་ལ། སྐབས་རེར་ཁོང་གི་ཕྱག་གཉིས་ཀྱི་ཡ་གཅིག་ནི་བོད་རིགས་མི་དམངས་ཀྱིས་ཐད་ཀར་འོས་འདེམས་བྱས་པའི་བཀའ་བློན་ཁྲི་པ་དེ་ཡིན་ཅེས་གསུང་གི་ཡོད།
༧གོང་ས་མཆོག་གི་དགུང་ནའི་བབ་དང་བསྟུན་ནས་བོད་མི་རིགས་ཀྱི་སེམས་ཁམས་ནི་ལོ་རེ་བཞིན་དངངས་སྐྲག་གམ། རྔམ་དྲག་ཅིག་གི་ནང་དུ་ལྷུང་བཞིན་ཡོད། རྔམ་དྲག་འདི་ལ་དཔག་པའི་གྲ་སྒྲིག་ཡག་ཤོས་ནི་གང་ལྟར་ཀྱང་དམངས་གཙོའི་དབུ་ཁྲིད་རྩོད་མེད་ཅིག་འདེམ་རྒྱུ་དེ་ཡིན། དེ་ལྟར་ཕྱི་ཚེས་ ༤ ཉིན་བཙན་བྱོལ་བོད་མི་ཚོས་ལག་དེབ་ལྗང་ཁུ་དེ་ཁྱེར་ནས་ཡུལ་ཕྱོགས་སོ་སོ་ནས་འོས་འཕེན་གྱི་བང་སྒྲིག་པ་རེད།
རྒྱ་དཀར་ནག་གཉིས་ཀྱི་བར་དུ། བལ་གཞུང་འདི་དམངས་གཙོ་དང་དམར་ཤོག་གང་ཡིན་བཤད་ཚོད་མི་ཐུག་པའི་སྐབས་ཤིག་ལ། བལ་ཡུལ་གྱི་ཉེན་རྟོག་པ་ཚོས་རྒྱ་གཞུང་གི་ལད་མོ་བྱས་ཤིང་། འོས་སྒམ་བསྡུ་ལ་ཉེ་བའི་སྐབས་དེར་གློ་བུར་དུ་རྒྱུག་ནས་བོད་མི་ཚོའི་ལག་ནས་བཙན་འཕྲོག་བྱས་ཡོད་ལ། ཚུལ་འདི་ནི་རིག་གནས་གསར་བརྗེ་ཆེན་པོའི་སྐབས་ཀྱི་བྱེད་སྟངས་དང་གཅིག་མཚུངས་ཡིན།
རྒྱ་ནག་གཞུང་གིས་བོད་མིའི་རྩོད་མེད་ཀྱི་དབུ་ཁྲིད་ཅིག་ཡིན་ཚེ་བརྐུ་བའམ་འཕྲོག་པ། གསོད་པ། གནོན་པ། དེ་མིན་ན་རྒོལ་བཞིན་ཡོད། པན་ཆེན་ཆུང་སྲིད་ནི་འདིའི་དཔེ་མཚོན་ཡག་ཤོས་ཡིན་ལ། བོད་ནང་གི་བོད་མིའི་དབུ་ཁྲིད་དང་སྐྱེས་ཆེན་དམ་པ་ཚང་མ་འདི་ལྟའི་གནས་སྟངས་གཅིག་གི་འོག་ཏུ་བཞུགས་ཡོད།
རྒྱ་ནག་གཞུང་གིས་༧གོང་ས་མཆོག་གི་སྐུ་ཚེའི་ན་བཟའ་བརྗེ་བར་སྒུག་བཞིན་པའི་སྐབས་སུ། བོད་མི་རིགས་ཀྱིས་ཐད་ཀར་དུ་ཁོང་གི་ཕྱག་ཡ་གཅིག་འགྱོག་བཞིན་ཡོད། ཁོང་གི་ཕྱག་ཡ་འདིའི་མགོར་འཐམ་ནས་བོད་མི་རྣམས་མུ་མཐུད་ནས་བདེན་དོན་གྱི་ཆེད་དུ་ལངས་རྒྱུ་ཡིན་པ་ཐག་གིས་ཆོད་ཡོད། དེར་བརྟེན། ཕྱི་ཚུལ་ནས་བལྟས་ན། བལ་ཡུལ་ཉེན་རྟོག་པས་བོད་མི་ཚོའི་འོས་སྒམ་འཕྲོག་པ་ལྟར་སྣང་ཡང་། དོན་ངོ་མར། རྒྱ་ནག་གཞུང་གིས་རྒྱལ་སྤྱིའི་ངོ་ཚར་མ་འཛེམས་པར་བལ་ཡུལ་གྱི་རུམ་ནས་ལག་པ་ཚུར་བརྐྱངས་ཏེ། བོད་མི་ཚོའི་འོས་སྒམ་དེ་བརྐུས་པ་རེད།
ཁྱེད་རྣམ་པ་ཕེབས་ནས་བཀའ་མོལ་གནང་བར་ཧ་ཅང་དགའ་ཡོད།
ངའི་བསམ་པར་ཐེངས་འདིར་བོད་མི་ཚོའི་ཁོང་ཁྲོ་དེ་ཐད་ཀར་དུ་ཀ་ཐ་མན་གྲུ་ན་བསྡད་འདུག་སྙམ། ཞོར་དུ་བལ་ཡུལ་མི་དམངས་དང་བོད་རིགས་མི་དམངས་ཀྱི་བར་ལ་ཡང་དགོས་མེད་ཀྱི་དམོད་ཚིག་དང་རྣམ་འགྱུར་རེ་ཤོར་རྒྱུ་རེད་འདོད། དེ་ལྟར་བྱུང་ན་རྒྱ་ནག་གཞུང་གི་འདོད་ཐོག་ཏུ་རྒྱུག་པ་རེད།
དེ་ལས་ང་ཚོས་ཁ་རྡུང་འདི་ཐད་ཀར་དུ་རྒྱ་ནག་གཞུང་གི་སྟེང་ལ་བསྐོར་རྒྱུ་དང་། ཕྱི་ཕྱོགས་ཀྱི་གནོན་ཤུགས་ཤིག་འཁྱེར་ཐུབ་པའི་དབང་དུ་བཏང་ན་ཡང་དེ་པེ་ཅིན་གྱི་དམར་ཤོག་པ་དེ་ཚོའི་སྟེང་ལ་བསྐོར་དགོས་རྒྱུ་དེ་ཡིན། གང་ཡིན་ཅེ་ན། རྒྱལ་སྤྱིའི་གསར་འགོད་པ་དང་སྲིད་དོན་ཉམས་ཞིབ་པ། ཆབ་སྲིད་པ་སུ་ཡིན་རུང་བལ་ཡུལ་གྱི་ཉེན་རྟོག་པ་དེ་ཚོར་བཀའ་གཏོང་མཁན་སུ་ཡིན་གྱི་ཕུ་ཐག་དེད་ན་པེ་ཅིན་གྱི་མགོ་ཁྲིད་ཚོ་ལས་འགྲོ་ས་མེད་པ་གསལ་བོར་ཤེས་ཐུབ་པ་ཞིག་རེད།
ད་ནི་འོས་སྒམ་དེ་ངེས་པར་དུ་ཕྱིར་ལོན་དགོས་པའི་རྒྱུ་མཚན་མི་འདུག ཁོང་ཚོར་དགོས་ན་འཁྱེར་དུ་ཆུག
གལ་སྲིད་ཕྱིར་རག་པ་ཡིན་ནའང་ང་ཚོའི་ངོས་ནས་བརྐུ་ལ་ཤོར་ཚར་བའི་འོས་སྒམ་ཞིག་ཁ་ཕྱེ་ནས་འོས་ཤོག་གྲངས་བཤེར་བྱས་ན་འཚམ་པོ་མེད་ཁར། ཁྲིམས་སྒྲིག་ལ་ཡང་འགྲིག་གི་མ་རེད་འདོད།
དེ་ལས་བརྡ་ཁྱབ་གསལ་བོ་ཞིག་བརྒྱབ་སྟེ། ཞིབ་བཤེར་ནན་མོ་དང་བཅས་ས་གནས་དེ་གཉིས་ཀར་བསྐྱར་དུ་འོས་ཤོག་འཕེན་འཇུག་རྒྱུའམ། ཡང་ན། སྔོན་འགྲོའི་འོས་ཤོག་རྩིས་མེད་དུ་གཏོང་རྒྱུ་དེ་རེད།
ཐབས་ཤེས་རྩེ་ཕུད་ནི་མཐའ་མ་ལྟར་སྣང་ཡང་། འོས་གཞིའི་མི་སྣ་མང་པོ་ཞིག་གི་འོས་ཤོག་ལ་ཁྱད་པར་ཏན་ཏན་འགྲོ་སྲིད་པས་དུས་ཚོད་དང་འགྲོ་གྲོན་གྱིས་ལྕོགས་ན་བསྐྱར་དུ་འོས་འཕེན་རྒྱུ་དེ་འདོམ་བདེ་ཤོས་རེད་འདོད།
བཀུར་འོས་ལུང་རིགས་རྒྱལ་ལགས། བདེ་མོ། ཁྱེད་རང་ཕྱི་ཕྱོགས་སུ་ཕེབས་ནས་དོན་རྐྱེན་ཞིག་བྱུང་ཡོད་པ་རེད། འོན་ཀྱང་འདི་ཕྱོགས་ནས་དྲ་འབུ་ཁག་ཅིག་གིས་དོན་མེད་ཀྱི་སྐད་ཆ་མང་བོ་ཞིག་དྲ་ཐོག་ཏུ་འགོད་བཞིན་པ་ལ་ཆ་འཇོག་མ་མཆིས་ཀྱང་། གཙོ་བོ་དུས་སྐབས་ཡག་པོ་ཞིག་དང་བསྟུན་ནས་ཁྱེད་རང་ཕྱིར་ཕེབས་རྒྱུ་རེ་བ་ཆེ། དེའི་བར་རྩོམ་ཡིག་གནད་ལ་ཁེལ་བ་རེ་བསམ་འཆར་གྱི་ས་ཁོངས་སུ་བསྐུར་གི་སྡོད། མཚམས་རེ་རྩོམ་སྒྲིག་གི་གཏམ་བྲིས་ན་བཟང་གི དེ་ནི་འོས་པ་ཞིག་རེད་བསམ་གི གང་ལྟར་གཙོ་བོ་སྙུག་རྩེ་ནས་བོད་ཀྱི་བདེ་སྡུག་དང་གནས་སྟངས་གླེང་ན་བསྡད་ས་ལ་ཁྱད་པར་མ་མཆིས་སོ།།
གང་ལྟར་ལུངས་རིགས་རྒྱལ་ལགས་འོས་ཤོག་འཕེན་སྐབས་སུ་གང་ཞིག་དུ་བཞུགས་མིན་མ་ཤེས་པ་ངའི་ནོར་ཡོད། གལ་ཏེ་དྭངས་བླངས་པ་འོས་གཞི་འདོན་མཁན་ཁག་ཅིག་ལ་ངོས་ལན་བྱས་དེ་འོས་བསྡུའི་སྐབས་དེར་ས་གནས་དེར་བཞུགས་མེད་ན་ཁོང་ལ་ཡང་ནོར་འཁྲུལ་ཡོད།འགའ་ཞིག་གི་བཤད་ས་འོས་བསྡུའི་སྐབསཕྱི་རྒྱལ་ཁག་ལ་ཡོད་ན་འོས་ཤོག་རྩེས་མེད་རེད་ཟེར། དེ་བདེན་པ་ཡིན་ནམ
འོས་ཤོག་ལ་ཞེས་བཅོས་རོགས། མཆན་རྒྱས་པ་ཞིག་འབྲི་འདུན་ཡོད་མོད་གློག་ཆད་སོང་བས་བྲེལ་ཚུབ་ངང་མཇུག་བསྡུ་དགོས་ཆགས་སོང་། ད་ཅང་མི་དྲན་གི། གང་ལྟར་ཀྱང་། གང་ནས་བསྡད་ཀྱང་། ཁྱེད་དང་ཁྱེད་ཀྱི་རྣམ་དཔྱོད་ནི་སྔར་ལྟར་ཡིན་པས། སྨྱུ་གུ་ཐང་ལ་འཇོག་མི་རུང་ཨ་མའི་བུ། བཀྲ་ཤིས་བདེ་ལེགས།
རྒན་མི་ནག་ལགས། སྐུ་བདེའམ། གློ་བུར་དུ་འཕྲད་ན་གློ་བུར་དུ་ཅི་ཞིག་བཤད་དགོས་མིན་ཡང་བཤད་ཁག་པ་འདུག ངོ་མ་འདི་ལྟར་བཤད་ན་བལ་ཡུལ་གྱིས་རྒྱལ་སྤྱིའི་སྟེང་རང་ཉིད་རྒྱ་ནག་གི་ཞིང་ཆེན་ཞིག་ཡིན་པའི་ངོ་ལེན་བྱས་པ་མ་ཡིན་ནམ། འོ་བརྗེད་གྲབས་འདུག་སྤྱི་འཐུས་ལ་མ་འདུག་རོགས།
སྐུ་ཞབས་ལུང་རིགས་ལགས།
རྒྱུན་རིང་པོ་ཞིག་ལ་འཇམ་ཐིང་ངེར་བསྡད་སོང་། དེ་རིང་གཞི་ནས་ཅིག་གྲག་ཡོང་དུས་དངོས་གནས་དགའ་སོང་། ཁ་སང་སྔོན་འགྲོའི་འོས་བསྡུའི་སྐབས་སུ་ངས་འོས་མི་བཙལ་བ་ཡིན། དེ་དུས་ཡར་མར་ལ་ཁ་པར་བཏང་ནས་སྐུ་ཉིད་ཚུར་ཕེབས་རྒྱུ་ཡིན་མིན་དྲིས་པ་ཡིན། སྤྱི་མཐུས་ལ་ཁེལ་ན་ཡོང་ངེས་རེད་ཟེར་བ་ཞིག་གོ་སོང་། ངས་གྲོགས་པོ་ཚོ་ལའང་དེ་ལྟར་ལབ་ཡིན། ཁོང་ཚོས་ཀྱང་དེ་ལྟར་ཡིན་ན་ཁོ་ལྡུག་དགོས་པ་ཟེར་གྱིན་འདུག སྔོན་འགྲོ་འོས་འཕེན་གྱི་སྐབས་ཏག་ཏག་དེར་སྐུ་ཉིད་གར་ཡོད་འདིར་ཡོད་ངེས་གཏན་མེད་པ་ཞིག་ཆགས་པ་དེས་ཉིད་ཀྱི་འོས་ཤོག་ཏན་ཏན་ཤུགས་རྐྱེན་ཐེབས་ས་རེད།