བོད་དོན་ལ་ཉམས་མྱོང་གིས་ཕན་ན་མང་པོ་ཡོད།
བར་ཞི་ངག་དབང་།
ཤེས་རིག་བཀའ་བློན་ལས་རོགས་ཟུར་པ། (ཁེ་ན་ཊ)
བོད་བྱེས་གཞུང་གི་སྲིད་ཀྱི་མགོ་འཁྲིད་འགན་འཁུར་བྱེད་པོ་བཀའ་བློན་ཁྲི་པའི་འོས་འདེམས་ལྔ་ཚན་གསུམ་པ་རིང་མིན་འཆར་ལ་ཉེ་བའི་དུས་ཚོད་འདི་ནི་བོད་རིགས་རྣམས་ཀྱི་ལས་འགན་གལ་ཆེན་ཞིག་ཡིན། དེ་ཡང་གང་ཟག་ཁྱད་ཆོས་ཡོན་ཏན་གང་འདྲ་ཡོད་པ་ཞིག་འདེམས་དགོས་ཞེ་ན། ཆ་རྐྱེན་ཨང་དང་པོ། རྒྱལ་སྤྱིའི་ཁྲིམས་ཀྱི་འགྲོ་སྟངས་ལ་སློབ་སྦྱོང་ཐར་སོན་གྱི་ལག་འཁྱེར་ཡོད་པ། གཉིས་པ། བོད་མི་རིགས་ལ་ཤ་ཞེན་དང་ལ་རྒྱ། ལྷག་བསམ་ཡོད་པ། གསུམ་པ། རང་དོན་བློས་བཏང་གིས་བོད་མི་རིགས་དང་། བསྟན་པ་ཆབ་སྲིད་ཀྱི་དོན་དུ་དཀའ་བ་སྤྱོད་ཐུབ་པའི་སྙིང་སྟོབས་ཅན་གྱི་གང་ཟག་ཅིག་འདེམས་དགོས་སྟབས། དེ་ལྟ་བུའི་ཁྱད་ཆོས་ཚང་བའི་གང་ཟག་ཅིག་ད་ལྟའི་འོས་མིའི་ཁོངས་སུ་མཁས་དབང་བློ་བཟང་སེངྒེ་གཅིག་པུ་ལས་མ་མཐོང་།
ང་རང་སྒེར་ངོས་ནས་ཁོང་ལ་ད་བར་ངོ་ཤེས་འགྲོག་འདྲིས་སོགས་རྩ་བ་ནས་མེད་ཀྱང་། ཁོང་ཆུང་དུས་རྒྱ་གར་ནང་སློབ་སྤྱོང་བྱེད་སྐབས་ཐེ་ཝན་སོ་པ་བཅོ་ལྔ་ཚེ་རིང་སྐོར། ཁོང་གིས་བོད་ཞེན་ཆེན་པོས་ལས་ཀ་བྱས་པའི་ལོ་རྒྱུས་སྐབས་དེའི་གསར་འགྱུར་ནང་འཁོད་པ་དང་། དེ་རྗེས་སྔ་ལོ་ངྷ་ས་བཞུགས་སྒར་དུ་བོད་མིའི་ཚོགས་ཆེན་སྐབས། ཁོང་གིས་མི་དམངས་ལ་གསུངས་བཤད་གནང་བའི་འོད་སྡེར་ཞིག་བཅས་ཕྲན་ནས་དངོས་སུ་མཐོང་བྱུང་བའི་ནང་། ཁོང་གིས་ད་བར་བོད་ནང་དང་། ཕྱི་རྒྱལ་ཁག་ཏུ་བོད་དོན་ལ་དོ་སྣང་སེམས་འཁུར་ཇི་འདྲ་བྱས་དང་། ད་ལྟའི་གནས་བབ་དང་བསྟུན་ཏེ་བོད་དོན་བདེན་མཐའ་གསལ་ཐབས་ཀྱི་ཐབས་ལམ་གང་འདྲ་འཚོལ་བ། འཛམ་གླིང་གི་ལོ་རྒྱུས་དང་ཁྲིམས་ལུགས། སྲིད་དོན་གྱི་གནས་ལུགས་མང་པོ་ཞིག་ལ་གོམས་འདྲིས་ཉམས་མྱོང་སོགས་ཁྱོན་ཡོངས་ལ་གཞིགས་ན། བོད་དོན་ལ་ཤ་ཞེན་དང་ལྷག་བསམ་གཡོ་བ་མེད་མཁན་ཞིག་ཡིན་པར་ཡིད་ཆེས་བྱེད་ཆོག་སྟབས། ད་ལམ་བཀའ་བློན་ཁྲི་པ་འདེམས་ཐེངས་གསུམ་པ་འདི་མཁས་དབང་བློ་བཟང་སེངྒེ་ལགས་ངེས་པར་འདེམས་དགོས་པར་མཐོང་སོང་།
ཁོང་བདམས་པ་ཡིན་ན། ༧གོང་ས་སྐྱབས་མགོན་ཆེན་པོའི་དགོངས་གཞི་བསྒྲུབ་ཐུབ་པ་ནི། བཀའ་ཁྲི་འདེམས་ཐེངས་གཉིས་པར་ཟམ་གདོང་རིན་པོ་ཆེ་བསྐྱར་འདེམས་བྱུང་མ་ཐག་༸གོང་ས་མཆོག་གིས། ངའི་བསམ་པར་ད་ལམ་བོད་རིགས་གཞོན་ནུ་ཤེས་ཡོན་ཅན་ཞིག་གདམ་གྱི་རེད་བསམ་ཡང་། སྟབས་མ་ལེགས་པ་ཞིག་ལ་ཡང་བསྐྱར་བླ་རྒན་ཞིག་བདམས་འདུག ཅེས་བཀའ་ཕེབས་པ་གསར་དེབ་ནང་བཀོད་པ་མཐོང་བ་ལྟར། ཇ་རོ་ལྡད་སྐྱོར་བརྒྱབ་ན་དྲོ་བ་ཆུ་ལས་ཡོང་རྒྱུ་མེད་པ་དངོས་པོའི་རང་བཞིན་དང་། ཡང་འགའ་ཤས་ཀྱི་བསམ་པར་མཁས་དབང་བློ་བཟང་སེངྒེ་ད་བར་ངྷ་སའི་ལས་ཁུངས་ནང་ལས་ཀ་བྱས་པའི་ཉམས་མྱོང་མེད་ཚུལ་བསམ་གྱི་ཡོད་ཀྱང་། ངྷ་སའི་ལས་ཁུངས་ནང་དངོས་སུ་བཞུགས་པའི་ཉམས་མྱོང་གིས་བོད་དོན་ལ་ཕན་ན། དེ་སྔོན་བོད་རང་བཙན་ཡོད་པའི་སྐབས་ཀྱི་བོད་གཞུང་གི་ལས་བྱེད་རྣམས་ལ་བོད་གཞུང་ལས་ཁུངས་ཁག་ནང་དངོས་སུ་ལས་ཀ་བྱས་བའི་ཉམས་མྱོང་ཕུན་སུམ་ཚོགས་པོ་ཡོད་ཀྱང་། འཛམ་གླིང་རྒྱལ་སྤྱིའི་ཁྲིམས་ཀྱི་འགྲོ་སྟངས་མ་ཤེས་པ་དང་། ལྷག་བསམ་སྙིང་སྟོབས་ཀྱི་ནུས་པས་མ་འདང་བའི་དབང་གིས་བོད་ས་རྒྱ་ལག་ཏུ་ཤོར་བ་སུས་ཀྱང་བསྙོན་དུ་མེད།
ད་བར་ལོ་ལྔ་ཚན་གཉིས་སྟོང་ཟད་དུ་སོང་ཟིན་ཞིང་། དེའི་སྟེང་ད་ལམ་ལྔ་ཚན་གསུམ་པ་འདི་ཡང་སྟོང་ཟད་དུ་བཏང་བ་ཡིན་ན། ལས་དོན་འདིའི་ཐོག་ཆོལ་གསུམ་བོད་མི་འབུམ་ཕྲག་མང་པོས་རང་གི་རྩ་ཆེའི་ཚེ་སྲོག་བློས་བཏང་དང་གཏོང་བཞིན་པ་རྣམས་དང་། དེ་བཞིན། ཆོལ་གསུམ་ཁ་གསུམ་གྱི་བོད་མི་འབུམ་ཕྲག་རྒྱ་དམར་གྱི་བཙོན་འོག་ཏུ་མནར་གཅོད་མྱངས་དང་མྱོང་བཞིན་པ་རྣམས་ལ། ང་ཚོ་བཙན་བྱོལ་དུ་ཡོད་པའི་བོད་མི་རྣམས་ནས་བསམ་ཤེས་རྩ་བ་ནས་མ་གནང་བ་དང་། ༸གོང་ས་སྐྱབས་མགོན་ཆེན་པོས་སྐུ་ངལ་བརྒྱ་ཕྲག་མཛད་དེ། ཐུགས་རེ་ཆེན་པོ་གནང་བ་ཆུད་ཟོས་སུ་བཏང་བ་བཅས་ངོ་ཚ་ཁྲེལ་གཞུང་རྩ་བ་ནས་མེད་པའི་ནག་ཉེས་གསོག་གིན་ཡོད། དེར་བརྟེན། རྒྱ་བལ་འབྲུག་གསུམ་གཙོས་ཕྱི་རྒྱལ་ཁག་ཏུ་གནས་པའི་བོད་མི་ཚང་མས་གལ་ཆེའི་དུས་སྐབས་འདི་རྩ་ཆེའི་གཙིགས་འཛིན་བྱས་ཏེ། ད་ལམ་ཐེངས་གསུམ་པའི་བཀའ་བློན་ཁྲི་པ་དེ་འདེམས་སྟངས་མ་ནོར་བ་ཞིག་ཅིས་ཀྱང་གནང་རོགས། ཞེས་བྱེས་འཁོད་བོད་མི་ཚང་མར་གསལ་འདེབས་ཞུ་རྒྱུ་ཡིན།
འོ་ཡུག་འཁྱམ་པོའི་གཏམ་ལ་ལན་འདེབས་རིན་མེད་ཀྱང་དེ་རིང་མ་བཤད་རང་བཤད་དུ་གྱུར་སོང་།་་་་་་་རྒྱུ་མཚན་ནི་བློ་སེང་གིས་རྒྱུ་ནོར་ལྐོག་རྔན་གྱིས་བརྔན་ནས་རང་རིགས་ན་གཞོན་ཚོར་མགོ་འཁོར་གཏོང་བ་རེད་ལ་དེ་ནི་ཁོང་གོང་ས་མཆོག་གི་དབུ་ཁྲིད་པའི་བཙན་བྱོལ་གཞུང་དེ་མགོ་གཏིང་སློག་བསམ་པའི་བསམ་ངན་འཁྱེར་ཡོོད་པ་གསལ་གསལ་ཐིང་ཐིང་རེད། ཅེས་བཤད་འདུག་པས་བློ་སེང་ནི་རྒྱུ་ནོར་ལྐོག་རྔན་སྤྲོད་མཁན་ཞིག་དང་རྒྱབ་སྐྱོར་གཞོན་སྐྱེས་དག་ལྐོག་རྔན་ལེན་མཁན་ཞིག་དང་།་་་ད་དུང་བློ་སེང་བཙན་བྱོལ་བོད་གཞུང་དེ་མགོ་གཏིང་སློག་མཁན་ཞིག་ཡིན་ཚཱུལ་བཤད་འདུག་པས་ཏན་ཏན་ཁོ་ལ་ཁུངས་དང་ར་སྤྲོད།་་་་་་དཔང་རྟགས་གསལ་པོ་ཡོད་ངེས་རེད།་་་་་་་ཁྱེད་ཀྱིས་མི་མང་གི་འདུན་དུ་བསལ་བཤད་བྱེད་དགོས་པ་ནི་ཁྱོད་ཀྱི་གཡོལ་དུ་མེད་པའི་འགན་ཞིག་རེད་ལ་དོན་དེ་བདེན་པ་ར་སྤྲོད་བྱེད་ཐུབ་ན་རྗེས་སུ་ཡིད་རང་ཡོད།་་་་་་་་་་སྤྱིར་ཁྱེད་ཀྱིས་བློ་སེང་ལ་སྨ་འབད་དང་ཚིག་མཚཽན་བཏགས་ལུགས་ལ་བལྟས་ན་རྒྱ་ནག་ལ་ཕལ་ཆེར་འདི་འདྲ་བ་ཞིག་སྐྱོན་བརྗོད་བྱེད་མྱོང་ཡོད་མི་སྲིད།་་་་་་་མ་ཚོད་བློ་སེང་ནི་ཧུ་ཅིང་ཐོ་ལྟ་བུ་ཞིག་ཏུ་ངོས་འཛིན་བྱས་འདུག་་་་་་་་་་
དེར་བརྟེན་ཁྱེད་ཀྱིས་ངེས་པར་དུ་ཁུངས་དང་ར་སྤྲོད་གསལ་པོ་ཞིག་ངེས་པར་དུ་བྱེད་རོགས་
མ་ཚད་སྨྱུག་མིང་འོག་ནས་མར་དོན་དེ་གསལ་པོ་བཟོ་རོགས།་་་་་་སྨྱུག་མིང་འོག་ནས་མ་དོན་ཀྱང་རྗེས་སུ་ཁྱེད་རང་སུ་ཡིན་པ་རྟོགས་ངེས་རེད།
དེ་དུས་ཁྱེད་ཀྱི་གང་ཞིག་བྱེད་དགོས་ཁྱེད་ཀྱི་བསམ་བློ་བཏང་ཡོད་ཤས་ཆེ།
ལྷག་པར་དུ་ཁྱེད་ཀྱི་བློ་སེང་གིས་ལྐོག་རྔན་སྤྲད་ནས་གཞོན་སྐྱེས་དག་མགོ་བསྐོར་བཏང་བ་ཞེས་པ་ངེས་པར་དུ་ཁྱེད་རང་དངོས་སུ་མི་མང་མདུན་དུ་ལངས་ནས་གསལ་བཤད་བྱེད་དགོས་ངེས་རེད།
ད་དུང་ཁྱེད་རང་གི་གདོང་རིས་དངོས་དེ་ཡང་མཐོང་འདོད་འདུག
ཡ་ཁོ་རས་བར་ཞི་ངག་དབང་༼ཆ་རྐྱེན་ཨང་དང་པོ། རྒྱལ་སྤྱིའི་ཁྲིམས་ཀྱི་འགྲོ་སྟངས་ལ་སློབ་སྦྱོང་ཐར་སོན་གྱི་ལག་འཁྱེར་ཡོད་པ།༽ རང་གཞུང་གི་བཀའ་ཁྲི་ཡིན་ན་རྒྱལ་སྤྱིའི་ཁྲིམས་ཀྱི་འགྲོ་སྟངས་ལ་སློབ་སྦྱོང་ཐར་སོན་གྱི་ལག་འཁྱེར་ཡོད་པའི་རྒྱུ་མཚན་ཅི་ཞིག་ཡོད་དམ་དམ་དམ།
ད་ལྟ་བཙན་བྱོལ་གཞུང་གི་དགེ་རྒན་ལ་ལག་ཁྱེར་ཡོད་མེད་ཁོ་ནའི་སྟེང་ནས་འདེམས་པས་བཙན་བྱོལ་གཞུང་གི་ལོ་ངོ་ལྔ་བཅུའི་ནང་རང་གི་རིག་གཞུང་ལ་ཞབས་འདེབས་སྒྲུབ་མཁན་ཞིག་གསོ་སྐྱོང་བྱེད་ཐུབ་མེད།
དེའི་ཐོག་ནས་ལག་ཁྱེར་ལས་ལག་ལེན་གལ་ཆེ་བ་བསྟན་ཡོད།
དྲ་གྲོགས་འོ་ཡུག་འཁྱམ་པོ་ལགས་་་་་་་་་ཁྱོད་རང་ལ་སློབ་སྦྱོང་གི་བརྒྱུད་རིམ་གང་འདྲ་ཡོད་ངས་མི་ཤེས་ཀྱང་ཚིག་སྦྱོར་དང་དག་སྡེབ་ལ་དཔོག་ན་ཕལ་ཆེར་་་་ཁག་པོ་རེད་འདུག་་་་་་་ཁྱོད་རང་བྲང་ཐོག་ལ་ལག་པ་ཞོག་ནས་རྣོ་བསམ་ཞིབ་ཏུ་ཐོངས་དང་བློ་བཟང་སེངྒེ་ལ་འདི་ལྟར་སྡང་ཟུག་བྱེད་དགོས་པའི་གཏན་ཚིག་ཅིག་ཕལ་ཆེར་རྙེད་མི་ཐུབ་་་་་་དེ་མ་རྙེད་ན་ཁྱོད་ཀྱིས་བློ་སེང་ལ་བྲིས་པའི་རྩོམ་ཡིག་ཡོད་ཚད་ཕྱོགས་ཞེན་ཁོ་ན་ཡིན་པ་གཞི་ནས་རྟོགས་ཐུབ།་་་་་་་་་དེ་དུས་ཁྱོད་ཀྱི་མི་གཞི་དེ་ཡང་ངོ་ཤེས་ཡོང་་་་་་་་་་་ཁྱོད་ཀྱིས་བློ་བཟང་སེངྒེས་རྒྱུ་ནོར་ལྐོག་བརྔན་བྱེད་ནས་མགོ་སྐོར་གཏོང་ཚུལ་བཤད་འདུག་པ་འདི་་་་་སྐད་ཆ་ཚབས་ཆེན་ཡིན་པས་་་་་གལ་སྲིད་ཁྱོད་ལ་དཔང་རྟགས་ར་སྤྲོད་ཡོད་ན་་་་ངོ་གདོང་ཕྱི་ལ་སྟོན་ནས་་་་་མི་མང་ལ་གསལ་བཤད་བྱེད་དགོས་་་་་་དེ་མེད་ན་སྐད་ཆ་འདི་ཁྱོད་རང་བློ་སེང་ལ་མ་དགའ་ཕྲག་དོགས་ཀྱིས་བྲང་ལ་སྦར་ཤད་བྱས་ནས་ངུས་པ་དང་ཁྱད་པ་གཏན་ནས་མེད་་་་་་་
མི་རབས་རྒན་པའི་ནང་ནས་མི་རབས་གསར་པ་ལ་རེ་ལྟོས་ཆེན་པོ་གནང་མཁན་ལ་ནི་ངག་དབང་ལགས་ལྟ་བུ་ད་ལྟ་དཀོན་ཚོད་དུ་འདུག ཁོང་གིས་ཕྱོགས་རིས་སོགས་གང་ཡང་མ་གནང་བར་དགོངས་ཚུལ་གསལ་སྟོན་གནང་འདུག་པར་རྗེས་སུ་ཡི་རང་ཞུ་ཡི་ཡོད།
ལར་ནས་ཉམས་མྱོང་། ཉམས་མྱོང་། སུ་ཞིག་དང་པོ་ནས་ཉམས་མྱོང་དང་ལྡན་ནས་སླེབས་པ་རེད། ཉམས་མྱོང་ནི་ལས་སྒྲུབ། དཀའ་ངལ་ལ་གདོང་ལེན་བྱས་ན། ད་གཟོད་ཡོང་བ་ཞིག་ལས། ཨ་མའི་ཁོག་ནས་སྐྱེས་དུས་ནས་ཡོད་པ་གང་ཡང་མ་རེད། ངག་དབང་ལགས་ཀྱིས་བཤད་པ་དེ་ག་རང་དུ་འདུག ཉམས་མྱོང་ཟེར་བ་གལ་ལོས་ཆེ། གལ་ཆེ་བ་ནི་ཏན་ཏན་རེད། བཀའ་ཁྲིའི་ཆ་རྐྱེན་གཙོ་བོ་དེ་ཉམས་མྱོང་ཡིན་ན་ནི། ཉམས་མྱོང་ཅན་མང་པོ་ཡོད་པ་རེད། འོན་ཏེ། ད་ལྟའི་དུས་རབས་འདིར། ཉམས་མྱོང་ལ་ཨུ་ཚུགས་བརྒྱབ་ནས་འདུག་པའི་དུས་རབས་ཡོལ་ཚར་བ་རེད། ད་ལྟ་ས་གནས་ཚང་མ་ན་སྔོན་འགྲོའི་འོས་ཤོག་གྲངས་བཤེར་བྱེད་ཀྱིན་པའི་སྒང་རེད། ཏན་ཏན་མང་ཚོགས་ཀྱིས་ཉམས་མྱོང་དང་ཤེས་ཡོན་གཉིས་ལས་ཤེས་ཡོན་འདེམས་ཡོད་ངེས། དེར་ཚོམ་པ་མི་དགོས་པ་ཞིག་རེད། མང་ཚོགས་ཀྱིས་གསལ་རྟོགས་བྱུང་ཡོད་པ་ཞིག་ནི། ཉམས་མྱོང་གིས་ཕྱུག་མཁན་མང་དག་ཅིག་གིས་མང་ཚོགས་ཀྱི་འདོད་བློ་དང་གཞུང་གི་དགོས་མཁོ་གཉིས་ཀ་ཡག་པོ་ཞིག་བསྐང་ཐུབ་མེད་པ་དེ་རེད། དེའི་མཇུག་འབྲས་ལ། ད་ལྟ་མང་ཚོགས་ཁྲོད་ན་སྔོན་འགྲོའི་འོས་གྲངས་གླེང་མུས་ཀྱི་ནང་ལ། གཞོན་སྐྱེས་མཁས་པ་བློ་བཟང་སེང་གེ་ལགས་འོས་ཤོག་མཐོ་ཤོས་ལ་སླེབས་ཡོད་པ་འདི་རེད། མདོ་དོན་ཡང་སྙིང་། ཤེས་ཡོན་དང་སྙིང་སྟོབས། འཇོན་ཐང་གསུམ་ལས་གལ་ཆེ་བ་གང་ཡང་ཡོད་པ་མ་རེད།
བར་ཞི་རྩེ་མགྲོན་ངག་དབང་བསྟན་སྐྱོང་གིས་བརྩམས་པ་རང་གི་ལོ་རྒྱུས་དེའི་ཁ་བྱང་ལ་༼མི་ཚེའི་བྱུང་བ་དངོས་སུ་གསལ་བར་འཆར་བའི་མེད་ལོང་ཞེས་བྱ་བ་བཞུགས་སོ།།༽ཞེས་བཀོད་ཡོད། ཕྱི་ལོ་ ༢༠༠༡ ལོར་དཔར་སྐྲུན་བྱས་པ་རེད། ཁོང་གིས་ཕྱི་ལོ་༡༩༩༩ བར་གྱི་རང་གི་ལོ་རྒྱུས་བྲིས་ཡོད་ནའང་། ཕྱི་ལོ་ ༡༩༧༡ ལོའི་གོང་གི་ལོ་རྒྱུས་བཀོད་པའི་ནང་། གནད་འགག་ཅན་གྱི་རིགས་མང་པོ་ཞིག་ཕྱི་གསལ་ནང་གསལ་གྱིས་བྲིས་འདུག ཁོང་ནི་ད་ལྟའི་དཔེ་སྟོན་སློབ་གྲྭའི་ས་ཁང་ཡོད་ས་དེ་ཧིན་སྒོར་སུམ་སྟོང་བྱས་ནས་ཤེས་རིག་ལས་ཁུངས་ཀྱི་མཚན་ཐོག་ལ་ཉོ་མཁན་དང་། ཁྲིམས་མཐུན་ཡིག་ཆ་བཟོ་མཁན་དེ་རེད།
སྐུ་བར་ཞི་ངག་དབང་བསྟན་སྐྱོང་གིས་བརྩམས་པ་ཡིན་འདུག ཁོང་གི་ལོ་རྒྱུས་དེབ་དེ་བཀླགས་མྱོང་བ་ཞིག་ཡིན་ན། མི་འདི་བྱས་རྗེས་ཅན། རང་ཚུགས་ཅན་ཟེར་ནོ་ཡིན་ཡ། མི་ལོ་ལྔ་བཅུའི་རིང་གི་བཙན་བྱོལ་བོད་ཀྱི་ལོ་རྒྱུས་ཤེས་འདོད་ན། སྐུ་ངོ་ངག་བསྟན་གྱི་ལོ་རྒྱུས་དེབ་དེ་ཀློགས་དང་། གནད་དོན་མང་པོ་གསེད་བཀྲོལ་ཧ་ལས་པ་གནང་ཡོད། རྩ་ཆེ་ཡ།
་་་་་ ད་བར་ལོ་ལྔ་ཚན་གཉིས་སྟོང་ཟད་དུ་སོང་ཟིན་ཞིང་། ་་་་་ ཟེར་ན་ག་རེ་ཟེར་བགྱིད་ཡོད་རེད། བཅུའི་སྔོན་ལ་བློ་བཟང་སེང་གེ་ལགས་ན་ཚོད་མ་ལོངས་པའི་ཕྲུ་གུ་མ་འབྱར་ཅིག་ཡིན་ནམ།
བློ་བཟང་སེང་གེ་ལགས་ཀྱི་མཁྱེན་ཡོན་དང་ལྷག་བསམ་ལ་བསྟོད་སྔགས་གནང་བ་འོས་ཤིང་འཚམས། དྲྭ་གྲོགས་གཞན་གྱིས་གསུངས་པ་བཞིན་རྒྱལ་ཁབ་ཀྱི་དབུ་འཁྲིད་ལ་ཁྲིམས་ཀྱི་སློབ་སྦྱོང་ཡོན་ན་གཡང་ཙེའི་ཁ་ལ་ཡར་སྒྲོན་རེད། འོན་ཀྱང་ལས་ཀའི་ཉམས་མྱོང་དང་ལྷག་པར་རང་མི་རིགས་ཀྱི་སྐད་དང་ཡི་གེ་དང་རིག་གཞུང་སོགས་རང་རྐྱ་འཕེར་བ་ཞིག་མ་ཤེས་ན་རྒྱལ་སྤྱིའི་ཁྲིམས་ལུགས་ཤེས་པ་གཅིག་པུས་རང་རེའི་བདེན་མཐའ་གསལ་ཐབས་དང་ཆོས་དང་རིག་གཞུང་ཉམས་པ་སླར་གསོ་དང་མི་ཉམས་རྒྱུན་འཛིན་བྱེད་པར་དཀའ་ངལ་འཕྲད་རྒྱུ་ཟུར་བལྟས་ལེབ་མཐོང་རེད།།
ཡང་ད་བར་ལོ་ལྔ་ཚན་གཉིས་སྟོང་ཟད་དུ་ཕྱིན་ཚུལ་གླེང་བ་ནི་ཆེས་ཐལ་ཆ་རེད་སྙམ། བཀའ་ཁྲི་མཁས་དབང་ཟམ་གདོང་རིན་པོ་ཆེས་སྤྱི་འཐུས་གནང་སྐབས་ནས་བཟུང་བཀའ་ཁྲིའི་ལས་རྒྱུན་ཐེངས་གཉིས་བར་བཙན་བྱོལ་གཞུང་ངམ་སྒྲིག་འཛུགས་འདིའི་ཁྲིམས་ལུགས་གཏན་འབེབས་དང་དཔལ་འབྱོར་འགྱུར་བཀོད། གཞིས་ཆགས་བསྲ་བརྟན། ཤེས་ཡོན་སྲིད་བྱུས་གསར་གཏོད་སོགས་མཛད་རྗེས་ཆེན་པོ་བཞག་ཡོད་པ་གཟུ་བོའི་བློ་ཡིས་དཔྱད་ན་ངེས་ཤེས་སྐྱེ་ངེས།
རྩོམ་བྲིས་གནང་མཁན་བར་ཞི་ངག་དབང་འཁོད་པ་ཁེ་ན་ཌར་བཞུགས་པ་དེ་སྔའི་གཞུང་ཞབས་ཡིན་པ་བར་གཞིས་ངག་དབང་བསྟན་སྐྱོང་ཞུ་བ་ཁོང་ཡིན་ཚེ་ཚིག་གཉིས་ཞུ་འདོད་བྱུང་། ཉིད་ནས་བཙན་བྱོལ་སྤྱི་ཚོགས་ལ་ཐུགས་འཁུར་གྱི་བཀའ་ཁྲིའི་འོས་མི་འཚམས་སྦྱོར་དང་མི་མང་ལ་འབོད་སྐུལ། ྋགོང་ས་སྐྱབས་མགོན་ཆེན་པོས་སྐུ་ངལ་བརྒྱ་ཕྲག་མཛད་དེ། ཐུགས་རེ་ཆེན་པོ་གནང་བ་ཆུད་ཟོས་སུ་བཏང་ན་ངོ་ཚ་ཁྲེལ་གཞུང་རྩ་བ་ནས་མེད་པའི་ནག་ཉེས་གསོག་གིན་ཡོད་པ་རེད་སོགས་ཤ་ཞེན་ཡོད་པའི་བཀའ་མོལ་མང་ཙམ་གནང་འདུག་པ་ཤིན་ཏུ་ལེགས། འོན་ཀྱང་གོ་ཐོས་ལ་སྐུ་ཉིད་ནས་ད་བར་དང་བླངས་དཔྱ་ཁྲལ་འབུལ་གྱི་མེད་ལུགས་འདུག་པས་སྔོན་ལ་བཙན་བྱོལ་བོད་མི་སྤྱི་མཚུངས་ལྟར་ལག་དེབ་ལྗང་ཁུ་དེ་བཞེས། དེ་ནས་སྤྱི་དོན་ལ་དགོངས་པ་བཞེས་ན་མཚན་དོན་མཚུངས་ངེས་ལ་དེ་དོན་འཕྲལ་ལ་དགོངས་པ་བཞེས་པའི་རེ་འདུན་ཞུ་རྒྱུ་དང་། ལག་དེབ་བསྐྱར་བཟོ་དང་གསར་ཞུར་དེང་སྐབས་དམིགས་བསལ་ཆག་ཡང་ཡོད་སྐད།
ཚན་པ་དང་པོ་ལས་ཀློག་ཐུབ་མ་སོང་་མང་གྲགས་འདུག་པ་མ་ཟད་གང་བརྗོད་འདོད་ཡོད་པ་ཡང་གསལ་ཐང་ངེར་རེད་ལ་འདི་ལྟར་དགོས་པས་བསྒྲུབ་བྱེད་ཀྱང་རང་དོན་སྒྲུབ་བྱེད་དུ་༧་གོང་ས་མཆོག་གིས་གསུངས་རེ་རྒྱུ་མཆན་དུ་བཀོད་ཡོད་པ་ཐག་གིས་ཆོད།
གལ་ཏེ་སྐྱབས་བཅོལ་གཞུང་འདི་ཁྲིམས་ཁང་ཞིག་ཡིན་ན་
ཆ་རྐྱེན་ཨང་དང་པོ། རྒྱལ་སྤྱིའི་ཁྲིམས་ཀྱི་འགྲོ་སྟངས་ལ་སློབ་སྦྱོང་ཐར་སོན་གྱི་ལག་འཁྱེར་ཡོད་པ། ཞིག་ཡིན་ན་ཡག་ཐོག་ལ་རྒྱན་རེད
དེ་མ་གཏོགས་རྒྱུ་མཚན་གཏན་ནས་མི་འདུག
གོང་བརྩོམ་ནས་ཚིག་ཁ་ཤས་ཀློག་པ་ཙམ་གྱིས་བྲིས་པ་པོ་དེ་བློ་བཟང་སེང་གེའི་ཨབ་ཕྲུག་བྱབ་ཆུང་ཞིག་ཡིན་པ་ཤེས་སོང་། རང་རིགས་ཡོན་ཏན་བ་སྤུ་ཙམ་ཡང་མེད་པའི་ཁ་སྟོང་པའི་ལྕེ་ལེ་དེ་གཡུག་བཞིན་པའི་བློ་བཟང་སེང་གེ་དེ་དོན་དུ་གང་ཡང་འཇོན་གྱི་མ་རེད་ལ་བཀའ་ཁྲིའི་གོ་ས་ཡང་ཐོབ་ཀྱི་མ་རེད། ཁོས་ད་རེས་ཀྱི་གོ་སྐབས་བཟུང་ཏེ་མི་རབ་གསར་རྙིང་གི་སྔར་མེད་སྐད་ཆ་ཞིག་བཟོས་ཡོད་ལ། དེ་ནི་དོན་དུ་རྒྱ་མིའི་སྲིད་ཇུས་ཞིག་ལ་མགོ་བོ་འཐོམས་ནས་དེ་རེས་ཀྱི་གོ་སྐབས་དེ་གལ་ཆེར་འཛིན་གྱི་ཡོད་པ་རེད། དེའི་པྱིར་ཁོས་རྒྱུ་ནོར་ལྐོག་རྔན་གྱིས་བརྔན་ནས་རང་རིགས་ན་གཞོན་ཚོར་མགོ་འཁོར་གཏོང་བ་རེད་ལ་དེ་ནི་ཁོང་གོང་ས་མཆོག་གི་དབུ་ཁྲིད་པའི་བཙན་བྱོལ་གྱུ་གཞུང་དེ་མགོ་གཏིང་སློག་བསམ་པའི་བསམ་ངན་འཁྱེར་ཡོོད་པ་གསལ་གསལ་ཐིང་ཐིང་རེད། ཁོ་ལ་བཀའ་ཀྲིའི་དངོས་གཞིའི་འོས་སུ་རྒྱབ་སྐྱོར་བྱེད་མཁན་མེད་པ་ཡང་ཇི་མང་དུ་རེད།
ཉམས་མྱོང་མེད་ན་ཆོག་པར་འདོད་པ་ནི་ཅུང་འགྲིག་མིན་མི་ཤེས། ད་གང་ལྟར་བློ་སེང་བཀའ་ཁྲི་ཆགས་རྒྱུ་གཏན་འཁེལ་བ་འདུག་ན། ད་དགའ་སྐྱོ་ཆགས་སྡང་གི་སྐད་ཆ་མ་བཤད་ན་ཡག་གི་བསམ། གང་ལྟར་བཀའ་ཁྲིའི་ཉམས་མྱོང་ལས་སྤྱི་འཐུས་ཀྱི་ཉམས་མྱོང་གལ་ཆེ་བ་ནི་བདེན་པར་མཐོང་། དེའི་སྟབས་ཀྱིས་དྲ་གྲོགས་རྣམས་ཀྱིས་སྤྱི་འཐུས་དངོས་གཞིའི་སྐབས་སུ་ཤུགས་རྒྱག་རྒྱུ་གལ་ཆེན་རེད་བསམ་གི ད་ལོར་མདོ་སྟོད་གཉིས་ཀྱི་སྤྱི་འཐུས་ལ་འཕོ་འགྱུར་ཤུགས་ཆེན་ཞིག་འགྲོ་མདོག་ཁ་བོ་མཐོང་སོང་མོད། དབུས་གཙང་གི་སྤོ་རྡོ་མོ་རྡོ་ཚོ་སྔར་བཞིན་ཡོང་གི་རེད་བསམ་པ་འདུག འདིའི་སྐོར་ནས་མང་ཚོགས་ཀྱིས་གོ་རྟོགས་ཡོད་པའི་སྒོ་ནས་གཟབ་ཙམ་གནང་ཐུབ་ན་ལེགས།
བདེན་ནམ་མི་ཤེས་ལ་གསལ་འདེབས་ཡིན་མིན་ཆ་མ་ངེས་མོདྊྊ། ཆབ་སྲིད་ཀྱི་ཚོར་བ་རྩེ་ར་བླངས་པ་མངོན་གསལ་རེད། བཀའ་བློན་ཞིག་ཡིན་དགོས་ཚེ་རྒྱལ་སྤྱིའི་ཁྲིམས་ཀྱི་ཕྱག་འཁྱེར་དགོས་པའི་ཁྱབ་པ་མི་འདུག་སྙམ། དེ་འདྲ་ཡིན་དགོས་ཚེ་རྒྱ་གར་སྲིད་འཛིན་མན་མོན་ཧན་སིན་དང་རྒྱ་ནག་སྲིད་འཛིན་ཧོ་ཅན་ཐོ་སོགས་རྒྱལ་སྤྱིའི་ཁྲིམས་ལུགས་ཕྱག་འཁྱེར་བཞེས་མྱོང་མི་འདུག་ལ། དེ་འདྲ་ཞིག་དགོས་པའི་རྩོད་རྙོག་ཀྱང་མི་འདུག ད་དུང་ཤིན་ཏུ་བདེན་ངེས་འདྲེན་པ་ཞིག་ནི་མཁས་དབང་བཀའ་ཁྲི་ཟམ་གདོང་རིན་པོ་ཆེ་མཆོག་ཀྱང་དེ་འདྲ་བཞེས་མྱོང་མེད་མོད། མཁྱེན་རྒྱ་བློ་སེང་ལས་ལྷག་ཞིང་འཇོན་ཐང་བློ་སེང་ལས་ཡངས་བ་མ་མཁྱེན་པ་ཡིན་ནམ། ད་དུང་བློ་སེང་ལ་ཕྱོགས་ཞེན་མེད་ཚུལ་དང་ལྷག་བསམ་ཆེ་ཚུལ་བཤད་པ་ཡང་དྲང་བདེན་གྱི་སྐད་ཆའི་ཆ་མ་རྙེད།
དངོས་ནས་རྩོམ་ཡག་པོ་ཞིག་བྲིས་འདུག སྔོན་གྱི་བྱས་རྗེས་གཅིག་པུས་ལྟས་ནས་མི་རབས་གསར་བའི་ལམ་ཁ་བཀད་མི་རུང་། འདི་འདྲ་ཞིག་འདེམས་དགོས། རྒྱལ་སྤྱིའི་ཁྲིམས་ཀྱི་འགྲོ་སྟངས་ལ་སློབ་སྦྱོང་ཐར་སོན་གྱི་ལག་འཁྱེར་ཡོད་པ། གཉིས་པ། བོད་མི་རིགས་ལ་ཤ་ཞེན་དང་ལ་རྒྱ། ལྷག་བསམ་ཡོད་པ། གསུམ་པ། རང་དོན་བློས་བཏང་གིས་བོད་མི་རིགས་དང་། བསྟན་པ་ཆབ་སྲིད་ཀྱི་དོན་དུ་དཀའ་བ་སྤྱོད་ཐུབ་པའི་སྙིང་སྟོབས་ཅན་གྱི་གང་ཟག་ཅིག་འདེམས་དགོས་སྟབས།